#بنت_شوارع
#الجزء_الاول
فى إحدى المناطق العشوائيه المصريه القديمه،حيث المنازل القديمه ذات الطابق الواحد و الطابقين ، حيث تلتصق المنازل و تقترب من بعضها البعض ...يستطيع من يسكن باول المنطقه أن يسمع من بأخرها
الكثير من البيوت مصنوعه من الخشب و الصفيح
معظم ألاسر تسكن فى غرف حيث تشترك عدة اسر فى شقه واحده بحمام واحد ...بعض الغرف بدون حمام و هنا يلجأ سكانها إلى الذهاب لمرحاض عام على اول المنطقه
بجانب المرحاض توجد حنفيه عموميه تلجأ إليها الكثير من النساء لسد احتياجاتهم المنزليه
تعالوا نقترب من إحدى هذه الغرف لنرى و نسمع إحدى قصصها .
🌸🌸🌸🌸
الحجره عباره عن سرير قديم متهالك ، صندوق لوضع الملابس كرسي قديم ، كنبه بلدى ممزقة يخرج القطن الذى تحول بفعل الزمن من الابيض الى الأسود من عدة أماكن بها ...يغطيها غطاء متهالك لا يفرق كثيرا عنها
تجتمع الاطباق و الاوانى فى جانب من جوانب الحجره و بجانبها دلو مليئ بالماء
فى الحجره منضده يوضع عليها تلفاز صغير قديم و بجانبه مروحه من الحرب العالميه الثانيه..
الاسره تتكون من عبدالشكور الاب و تحيه الام و اربع اطفال ثلاث اولاد و بنت
جلست كالغراب الذى ينعق فوق رأسه على المقعد القديم المتهالك....
الزوج يجلس على الأرض أمام طبليه يوضع فوقها طبق من الفول و اخر من الباذنجان المقلى و رغيفين من الخبز المدعم
هنعمل ايه فى فلوس المدارس يا عبدالشكور؟؟
ربنا يسهل يا تحيه
طب و رمضان و مصاريفه يا عبدالشكور ؟؟
ربك يسهلها يا تحيه
طب و العيد و هدومه ؟
ما قلنا ربنا يسهل يا وليه ..... انتى لازم تطفحينا اللقمه اللى بناكلها ؟؟ طب و الله منا طافح
براحتك ... وفرت ....اللى ياكل على ضرسه ينفع نفسه بس على فين العزم أن شاء الله ؟؟
ملكيش دعوه بيا ...ستات هم
اهو انت كدا ...كل ما اكلمك كلمه تغضب و تجرى زى العيال ....اه يا ميلة بختك فى جوزك يا تحيه ...كان يوم اسود يوم ما وافقت عليك و رضيت اتجوزك ...مالى منا كنت قاعده لوحدى اخر راحه و بسرح على لقمة عيشي و كنت عايشه احلى عيشه ....انا ايه اللى خبطنى فى نافوخى و خلانى اقبل بالكحيان الصدمان العدمان ده ؟
انا اللى زيى كانت تستاهل ميكانيكى و الا حلاق اد الدنيا ...مش حتة زبال
لا و ايه مدخل ولاده مدارس كمان ....فاكر نفسه بنى ادم و بيقطع من لحم الحى و يوديهم مدارس ...ياما قلت له ياخد التلات ولاد يشغلهم معاه و البت مسيرها للجواز و دا راسه و الف سيف أنه يعلمهم ....طب يا اخويا أما نشوف اخرتها ايه معاك ...انا وراك و الزمن طويل يا عبشكور
خرج الزوج يسب و يلعن الزواج و الذى أشار به و المتزوجين و يلعن اليوم الذى طلبت منه والدته أن يتزوج بتحيه طمعا فيها لانها وحيده ورثت الغرفه من أهلها و لن تكلفه اى شئ فهى بحد قولها :
ضعيفه و منكسره و عايزه الستر و لكن ما ما لم تحسب له الام حساب انها امراه كالغراب صوتها مرتفع ، سليطة اللسان ، عابثة الوجه دائما ، سريعة الغضب ، تعادى جيرانها ليس لها حبيب سوى جاره واحده تشبهها كثيرا .
اشعل عبد الشكور لفافه تبغ و جلس على إحدى المقاهى القريبه ينفث جام غضبه فيها
مر متولى ليجد عبدالشكور عابث الوجه يحدث نفسه
مالك يا عبد الشكور يا اخويا ؟ قاعد تكلم نفسك كدا ليه ؟
طهقت يا متولى يا اخويا ...الوليه طول النهار تنق زى الغراب ...زى ما يكون بتستنى دخولى و تبدأ فى وصلة كل يوم
طب و هى عاوزه ايه يعنى ؟؟
عاوزه تقرفنى ...عاوزه تمرر عليا عيشتى
الله الله و ليه كدا يعنى ؟؟
مش عاجبها انى مودى ولادى مدارس و عاوزه تخرجهم من المدرسه و تشغلهم
و قارفه البت اخر قرف حاطاها فى دماغها و مش مهنياها على مذاكره ...اول ما بتشوف البت قاعده على كتاب بيركبها مية عفريت و تلاقيلها اى شغلانه من تحت الارض ...و دايما تشتم فيها و تقولها لو نفعتى ابقى تعالى تفى على دقنى ....البت بتصعب عليا دى لسه عشر سنين و متستاهلش تعمل فيها كدا
معقول ؟؟ دا انا مراتى بتزق فى العيال زق عشان يتعلموا
انا بنتى شاطره اوى يا متولى و دايما الابلاوت بيكرموها و بيدوها جوايز بس اقول ايه الله يجازى ولاد الحرام
قصدك مراتك ؟؟
هو فى ولاد حرام غيرها ...دى بومه متحركه يا متولى يا اخويا
الله يكون فى عونك يا عبده
الله يسامحها امى هى اللى دبستنى التدبيسه السودا دى
خلاص متزعلش نفسك ...كل بيت فيه مشاكله ...البيوت مقفوله على بلاوى يا عبده يا اخويا
عندك حق بس بلوتى انا غير اى بلوه...ربنا يصبرنى يارب....هقوم انا بقا
على فين يا عبده ؟؟
هروح اشوفلى اى مقلب زباله ابات فيه ...القطط و الكلاب ارحم من البومه اللى عندى فى البيت
يا جدع مقلب ايه بس ...تعالى بات معانا الليله دى
لا كتر خيرك انت عندك اللى مكفيك هاجى انا ازنق عليك ...لا لا
منا مش هسيبك تمشي
خلاص يا متولى انا هروح و امرى إلى الله زمانها اتخمدت دلوقتى
افترق الصديقان و توجه عبدالشكور إلى غرفته الخشبيه ..فتح الباب بهدوء ، خلع حذائه لكى حتى لا يوقظ زوجته.....تلمس الحصير المفروش بالأرض لينام بجانب أولاده بعيدا عنها
و ما أن وضع جنبه على الأرض وجد من تقول
ما لسه بدرى يا سبع البرمبه
اتمسي و قولى يا مسا انا مش طايقك يا وليه
ولولوا عليك من بدرى ...و اما انت مش طايقنى ايه اللى رجعك ؟؟ و الا دى الزريبه اللى اشترهالك ابوك
يخربيتك على يخربيت فقرك ...انا قرفت منك ...عليا الطلاق لو ما سكتى لطلقك حالا
حوش حوش ...طب ورينى يا سبع الليل هتطلقنى ازاى ؟ سيب الطلاق لأصحابه ...الرجاله اللى تقدر عليه مش انت يا زبال يا كحيان يا صدمان
بقا كدا .... طب روحى و انتى طالق
#بنت_شوارع
#الجزء_الثانى
يخربيتك على يخربيت فقرك ...انا قرفت منك ...عليا الطلاق لو ما سكتى لطلقك حالا
حوش حوش ...طب ورينى يا سبع الليل هتطلقنى ازاى ؟ سيب الطلاق لأصحابه ...الرجاله اللى تقدر عليه مش انت يا زبال يا كحيان يا صدمان
بقا كدا .... طب روحى و انتى طالق
قفزت تحية من فوق السرير لتلقى بنفسها على عبدالشكور ( كغوريلا من الحجم الثقيل ) الذى كان مازال يتگأ على الحصير ...فقد كانت اسرع منه قبل أن يهم واقفا
اخذت تحيه بتلابيب عبدالشكور و بدأت فى الصراخ
ياااا لهوووووى ...بتطلقنى يا عرة الرجاله بتطلقنى يا راجل يا ناقص بعد عشره ١١ سنه ؟ دا انا هفرج عليك الدنيا
اوعى كدا احسن لك ...انا مش عاوز امد ايدى عليكى
تمد ايدك مين ؟؟ دا انا اللى هوريك
و بدأت تحيه فى الصراخ بشكل مستفز لدرجة أن أبنائها الاربعه استيقظوا فى فزع
و استيقظت الحاره بأكملها و لكن لا أحد يقترب فالكل يعرفها و يعرف لسانها الطويل
لقد اكتفى الجميع بالوقوف على أبواب غرفهم ليتسمعوا سبب الصراخ ، بعضهم يقف شامتا فى تحيه و بعضهم يشفق على عبدالشكور
شق صمت الجميع صوت حميده و هى تدق على باب تحيه
بقا انتوا رجاله انتوا سامعيين الصويت و محدش بيقرب ...مش يمكن حصلت حريقه جوه ؟؟؟ لكوا روقه يا حارة زباله
ادارات سيدات الحاره وجوههم و البعض منهن تمنت أن تكون تحيه انحرقت بالفعل و البعض الاخر عوجت فمها استهزاء بكلام حميده
فتحت تحيه الباب بعد فتره و قد تناثر شعرها الخشن كمن صعقته عاصفه رعديه
مالك يا تحيه يا حبيبتى
الحقينى يا حميده ...الراجل الناقص طلقنى
طلقك ؟؟؟ ازاى
نطقت حميده كلمتها و هى تضرب على صدرها و تنظر إلى عبد الشكور الجالس على الأرض تنزف الدماء من وجهه جراء خربشه ، و يلتف حوله أولاده الاربعه فى ذعر شديد
اخص عليك يا عبدالشكور ...مكنش العشم تعمل فى ام عيالك كدا...قوم يلا ردها و بوس على دماغها
لا ابدا ميحصلش ...انا خلاص مش عاوزاه يغور فى داهيه و ياخد عياله معاه
استهدى بالله بس يا تحيه ...احنا عاوزين نحل يا اختى مش نعقد المواضيع
ابدا على جثتى يا حميده ...قوم يا سبع الرجال شوفلك حته تانيه انت وولادك
هيروحوا فين بس دلوقتى يا تحيه ؟؟
معرفش و الله يغوروا فى اى داهيه
نهض عبدالشكور من الأرض و نظر لتحيه نظرة حقد
انتى فاكره انك هتطردينى من الجنه ؟؟ بركه انى خلصت منك ...مره بومه ...يلا يا اولاد لو هنبات فى مقلب زباله و لا أننا نقعد هنا
مع السلامه و القلب دعيلك يا ضنايا ...دا انا هكسر وراك زير مش قله
خرج عبدالشكور بأبناءه الاربعه و قد التصقوا به من الخوف
تلقاه متولى على اول الحاره
تعالى يا عبده يا اخويا هتروح فين بالعيال دول دلوقتى ؟
لا كتر خيرك يا متولى انا هدور على حتة ابات فيها الليله و اهى ليله و تعدى
لا عيب عليك تعالى تعالى
دخل عبدالشكور و اولاده الاربعه ليجد اولاد متولى السبعه يرتصون على الحصير و لا يوجد سوى فراغ صغير لا يتجاوز المتر
تراجع عبدالشكور مره اخرى
متشكر اوى يا متولى بس الحته ضيقه و انا مش هاجى بعيالى اضيقها عليك اكتر
لا عيب يا عبده ...عليا الطلاق لانت داخل
بص انا هروح لاختى فى عزبة الصفيح ...كتر خيرك يا حبيبي
يا جدع عيب عليك انا حلفت
معلش يا متولى ...عن اذنك يا اخويا
و خرج عبدالشكور مسرعا بأبنائه الاربعه ...استقل ميكروباص ليصل إلى عزبة الصفيح حيث تقطن أخته شرباط
دق على بابها فسمع صوت زوجها الضخم من خلف الباب :
مييييين ؟؟؟؟؟
انا عبدالشكور يا عاشور
عبشكور ؟؟؟ ايه اللى هيجيبه دلوقتى ده ؟
فتح عاشور الباب ليقف بكرشه المتدلى و ملابسه الداخليه يهرش برأسه
يا اهلا يا سي عبشكور ...خير فى حاجه ؟
لا ابدا انا جاى اتطمن على شرباط و العيال
تطمن على شرباط فى نص الليل ؟؟؟
طب مش هتقولى اتفضل و الا ايه ؟؟
ااه ..ايوه اتفضل ...يا شرباااااط تعالى اخوكى عاوزك ...عن اذنك يا عبشكور انا داخل انام اصل الوقت متأخر و انا عندى شغل بدرى زى ما انت عارف
اه اتفضل يا عاشور يا اخويا
خرجت شرباط يظهر على وجهها اثار النوم
خير يا اخويا ؟؟ فى حاجه حصلت ؟؟
اتخانقت مع تحيه و طلقتها
يا لهوى طلقتها ازاى ؟؟ ليه كدا يا اخويا ؟؟
زهقت يا شرباط و فاض بيا ...لو مكنتش طلقتها كنت انتحرت
خلاص هدى نفسك يا اخويا عشان خاطر صحتك
انا بس عاوز اقعد عندك يومين على ما أدبر حالى
عندى ؟؟ اااااه... و ماله يا اخويا تشرف و تنور
هما يومين بس يا شرباط مش هتقل عليكم
طب انتوا اتعشيتوا ؟؟
ايوه احنا واكلين و شبعانين احنا عاوزين ننام بس ...افرشيلنا حصيره فى أوضة الولاد
حاضر ...حاضر يا اخويا
دخلت شرباط لتفرش الحصير فى غرفة اولادها
هنا نطق سامح الصغير انا جعان يا أبا ..انت قلت لعمتى أننا شبعانين ليه ؟؟
انتوا مش اتعشيتوا يا اولاد
ردت اسماء : لا يا أبا ..امى مرضيتش تأكلنا و قالت لما ابوكوا يجى يبقى يطفحكم ...لحد ما رحنا فى النوم و احنا جعانين
اعوذ بالله حتى العيال مسلموش منها ...منك لله يا تحيه ...معلش يا اولاد ناموا كدا الليله و انا الصبح هجيب لكم سندوتشات فول و طعميه و بطاطس
طب ما عمتى كانت عاوزه تأكلنا يا أبا ( نطق سعد )
اسكت يا سعد عيب يا ابنى يمكن عمتك مش عامله حسابها
خلاص يا سعد متزعلش ابوك ...خلاص يا أبا هننام كدا ...يعنى دى مش اول مره ننام و احنا جعانين
شاطر يا عبدالله انا الصبح هجيب لكم الاكل اللى انتوا عاوزينه
خرجت شرباط من غرفة أبنائها
تعالى يا اخويا انا فرشت لكم خلاص و حطيت لكم بطانيه تتغطوا بيها
كتر خيرك يا اختى
دخل عبد الشكور ليجد أبناء أخته الاربعه ينامون على سرير كبير ووجد أخته قد فرشت له حصير من البلاستيك وضعته عليه وساده و بطانيه
ما أن جلس عبدالشكور بأبنائه الاربعه على الحصير فسمع صوت عاشور و هو يقول لشرباط
يقعد فين يا ست شرباط ؟؟ هو انا خلفته و نسيته ؟؟
وطى صوتك ابوس ايدك ليسمعك
و اوطى صوتى ليه ؟؟ انا قاعد فى بيتى و أعلى صوتى زى منا عاوز ....انتى بكرا تقوليله أنه مينفعش يقعد هنا
ازاى بس يا عاشور ؟؟ .... مينفعش أقوله كدا
خلاص اطلع أقوله انا
لا لا خلاص سيبه ...انا هقوله
اه قوليله يا اختى انا بأكلكم بالعافيه مش ناقصه اخوكى و اولاده كمان
سمع عبدالشكور حديث أخته و زوجها و قرر أن يستيقظ مبكرا بأبناءه الاربعه و يترك بيت أخته قبل أن تستيقظ ليوفر عليها الحرج مع زوجها.😔
#بنت_شوارع
#الجزء_الثالث
سمع عبدالشكور حديث أخته و زوجها و قرر أن يستيقظ مبكرا بأبناءه الاربعه و يترك بيت أخته قبل أن تستيقظ ليوفر عليها الحرج مع زوجها.😔
لم يغمض لعبدالشكور جفن ...ظل طوال الليل يفكر إلى اين سيذهب بأبنائه الاربعه ؟
لم يعد له مكان فى هذه الدنيا
سمع عبدالشكور اذان الفجر..( حى على الصلاه حى على الفلاح ) فانتصب جالسا و اخذ يدعو الله باكيا
يا رب خرجنى من الضيق يا رب
يا رب انا غلبان و مليش حد غيرك
اروح فين باولادى الاربعه دول ؟؟
يا رب انت خالقهم و ارحم بيهم منى
يا رب انا مش عارف أتصرف و لا قادر اجيب لهم سكن دبر لى امرى
توكلت عليك يا حى يا قيوم
قام عبد الشكور ليتوضأ و يصلى الصبح ثم أيقظ أبنائه بهدوء
استيقظت الاطفال و هى ما تزال تترنح فهم لم يأخذوا قسط كافى من الراحه همس عبدالشكور ...
قوموا يا اولاد...يا عبدالله يا سعد يا اسماء قوموا يا حبايبي
ايه يا أبا هو النهار طلع ؟؟
خلاص هيطلع اهو ..يلا بينا عشان اجيب لكم سندوتشات زى ما قلت لكم
طب سبنا ننام شويه يا ابا مش قادره اقوم
لا يا اسماء يلا يا حبيبتى قبل ما عمتك و جوزها يصحوا
يووو انا عاوز انام يا ابا مش عاوز اكل
لا يا عبدالله يلا يا حبيبي عشان اجيب لك العسليه اللى بالسمسم اللى بتحبها
صحيح يا أبا ؟؟
ايوا صحيح يا حبيبي يلا يلا قوموا بس بالراحه عشان منصحيش حد
طب مش هنسلم على عمتى و اولادها يا أبا
لا يا سعد احنا هنمشى و نبقى نجيلهم فى وقت تانى باذن الله
خرج الاب بأبنائه الاربعه و هم يتشبثون به من نسمات الصباح البارده
يا أبا الدنيا لسه ضلمه
هتنور دلوقتى يا سامح يلا بينا هنتمشي شويه انا عارف عربيه فول بتعمل فول حلو اوى هنروح ناكل منها
هنا جذب عبدالله ملابس والده : و العسليه يا أبا ؟؟؟
هجيبهالك متخفش يا عبدالله
وصل عبدالشكور لعربة الفول طلب لاطفاله الطعام و جلسوا على الرصيف المواجه لها فى الجهه الاخرى ليتناولوها
التهم الاطفال الطعام بكل شراهه فى دقائق قليله
ها ...لسه جعانين يا اولاد ؟
لا يا أبا شبعنا الحمد لله
احنا هنروح فين دلوقتى يا أبا ؟
ربك هيسهلها يا اسماء
انا عاوز اشرب يا أبا
طب استنى يا عبدالله هروح اجيب لكم ميه من بتاع الفول
لا انا بعرف اجيب
استنى يا عبدالله .....عبداااااالله
لقد شاء القدر أن يتحرك الصغير ذو الستة اعوام لحظه قدوم عربه مسرعه بكل قوه يقودها شاب مستهتر
طار عبدالله فى الهواء من شدة الاصطدام وارتطم على الجانب الآخر
هرول الاب و باقى الاخوه و بائع الفول و الزبائن الى عبدالله الملقى على الاسفلت و الدماء تغطى وجهه ....
الاب اصابه الهلع ..،، الاخوه تصرخ
عبدالله ...عبدالله رد عليا يا ابنى
اهدى يا حج متخضش الواد ...
اسعاف يا ناس بالله عليكم ...اسعااف
الجبان اللى ضربه جرى بس انا اخدت نمرته خد اهى يا حج
نمرة ايه ...انا عاوز الحق ابنى
هنا نطق صاحب عربه الفول
لا حول و لا قوة الا بالله طب فى مستشفى قريبه من هنا حد يوقف تاكسي يا جماعه
مفيش حد هيرضى يقف بالناكسي بتاعه و العيل ده غرقان فى دمه كدا
طب و بعدين ؟؟؟
هى المستشفى بعيد ؟؟؟
حوالى عشر دقايق مشي
انا هجرى اوديه
حمل عبدالشكور صغيره و أطلق قدماه للريح و من خلفه الثلاث اولاد
الى أن وصل باب المشفى و هو يلهث
دلف إلى استقبال الطوارئ
الحقونى يا ناس ابنى بيروح منى ابنى قاطع النفس... ابوس اديكم
هرعت احدى الممرضات لحمل الطفل و إدخاله على سرير الكشف
حضر الطبيب مسرعا ليفحص الصغير و بعد الكشف عليه
انقلوه بسرعه على العنايه المركزه انا شاكك ان الولد ده عنده ارتجاج فى المخ
جلس عبدالشكور على الأرض واضعا يديه على راسه و التف حوله أولاده يبكون
انت يا راجل انت ...قوم تعالى
نعم يا دكتور
الواد ده ابنك ؟؟
ايوه يا دكتور
و ايه اللى عمل فيه كدا ؟؟
عربيه خبطته
و انت كنت فين و سايب الولد لما عربيه تخبطه ؟؟ مش اد الخلفه بتخلفوا ليه ؟؟
و الله يا دكتور الواد هو اللى جرى من ايدى
طب يا سيدى احنا هنحجزه ٢٤ ساعه تحت الملاحظه عشان نتأكد أنه مش ارتجاج
طب هو حالته ايه يا دكتور
ابنك وقع على دماغه وقعه جامده احتاج أننا نحلق له جزء من شعره و خيطناها سبع غرز
يا حبيبي يا ابنى
انت خدت رقم العربيه ؟؟
لا يا دكتور بس فى واحد من اللى كانوا واقفين كان معاه الرقم و جه يدهولى بس انا اتلهوجت فى الواد و مأخدتوش
يا خساره ...امين الشرطه هيجى دلوقتى و يفتح محضر و لو كان معاك النمره كنت رجعت حق ابنك
المهم ابنى يعيش يا دكتور مش مهم اى حاجه تانيه
متخافش هو حالته مستقره بس بعد كدا ابقى خد بالك من ولادك كويس
حاضر يا دكتور بس ربنا يشفيلى ابنى بس
افترش عبدالشكور و ابنائه الثلاثه ارض المشفى و قضوا ليلتهم هناك
فى اليوم التالى تم نقل عبدالله إلى عنبر يعج بالكثير من المرضى
جلس الاب بجانب ابنه يقبل يديه التى ملئتها الخدوش
يا حبيبي يا ابنى
هو نايم كدا ليه يا أبا انا عاوز العب معاه
هو تعبان شويه يا سامح و هيبقى زى الفل أن شاء الله
هو هيفضل رابط دماغه كدا يا أبا
لا يا سعد هما يومين و يفكها أن شاء الله ...اسكتوا بقا يا اولاد لتصحوا اخوكوا
بينما عبدالشكور جالس بجانب ابنه إذ سمع صوت يأتى من خلف ظهره
مييييين ؟؟؟؟ عبدالشكور ؟؟؟
اهلا اهلا وحشتنى يا عبدالحميد
اخص عليك يا عبدالشكور بقى نبقى ولاد خاله و منشوفش بعض عشر سنين .. عارف انا اخر مره شفتك فيها امتى ؟ فى عزا خالتى الله يرحمها
الدنيا مشاغل يا عبدالحميد يا اخويا
انت جاى هنا ليه يا عبدالشكور ؟
ابنى عبدالله خبطته عربيه
لا حول و لا قوة الا بالله الف سلامه عليه و العيال دى عيالك ؟؟
ايوه دى اسماء و دا سامح و دا سعد و اللى عامل الحادثه دا عبدالله
ما شاء الله ربنا يبارك و مراتك فين امال ؟؟
مراتى طلقتها امبارح
ايه ؟؟ ليه كدا يا عبده ؟؟
مره بومه مورهاش غير وجع القلب
و انت لسه قاعد فى المنطقه اللى انت فيها
لغايه امبارح بس كنت قاعد هناك لكن دلوقتى خلاص مبقاش ليا مكان الا الشارع
يا خبر ليه كدا يا عبده ؟
زى ما بقولك كدا ...الشارع هو بيتى الجديد انا و الأربع عيال
لا متقولش كدا انا بيتى مفتوحلك
لا كتر خيرك انا مبحبش اتقل على حد
لا عيب عليك متقولش كدا
معلش يا عبدالحميد سبنى براحتى
طب ما تأجر لك اوضه كدا انت و اولادك يا عبده
منين يا حسره ؟ هو انا لو معايا تمن ايجار اوضه كنت لجأت للشارع ؟؟ انا مرتبى كله ٦٠٠ جنيه مطلوب منى اصرف على الاربع عيال دول منهم
طب و بعدين ؟؟؟
و لا قبلين ...لينا ربنا
طب اقولك انا لقيت لك الحل اللى مش هيكلفك مليم ؟
الحقنى بيه الله يخليك
الحل يا سيدى هو .....
#بنت_شوارع
#الجزء_الرابع
فى المحن تولد المنح ، قد يظن الإنسان أن المشكله التى تصادفه هى نهايه الحياه و لكن كل أمر قدره الله خير ، كل حدث يحدث بالحياه اشاره لشيئ ما و انا اؤمن بالاشارات جدا
🌸🌸🌸🌸🌸
طب ما تأجر لك اوضه كدا انت و اولادك يا عبده
منين يا حسره ؟ هو انا لو معايا تمن ايجار اوضه كنت لجأت للشارع ؟؟ انا مرتبى كله ٦٠٠ جنيه مطلوب منى اصرف على الاربع عيال دول منهم
طب و بعدين ؟؟؟
و لا قبلين ...لينا ربنا
طب اقولك انا لقيت لك الحل اللى مش هيكلفك مليم ؟
الحقنى بيه الله يخليك
الحل يا سيدى هو انك تيجى معايا فى محل شغلى
محل شغلك ؟؟ ازاى يعنى ..اعمل ايه فى محل شغلك يا عبدالحميد ؟؟ دا انت تربى
ما هو ده الحل يا عبده يا اخويا
ازاى يعنى مش فاهم هتفتح لنا تربه ليا انا و اولادى عشان نرتاح بقا من الدنيا و اللى فيها ؟؟
لا لا يا اخى .. مش كدا هو انت فاهم أن الترب عباره عن مقابر كدا و خلاص لأ دا فى أسر كبيره بتبقى عامله زى نظام حوش فيه اوض كدا...و بيبقى فى كمان ساعات فرش عشان قرايب المرحوم لما يجوا يزوروا يستريحوا عليه
معقوله ؟؟
ايوه معقوله انت لو شفت الاوض دى هتلاقيها انضف من الاوضه اللى انت كنت قاعد فيها و لامؤاخذه
بس يا عبدالحميد ...
مبسش و لا حاجه تعالى بس شوف على الطبيعه و بعدين قرر
امرى لله انا مقدميش غير كدا
متقلقش يا عبده انت تخاف من العايشين مش من الميتين
حضر الطبيب و كتب اذن بخروج الطفل
الولد احناحطناه تحت الملاحظه ٢٤ ساعه لو حصل له أى مضاعفات أو رجًع تجيبه على طول ...و ابقى هاتله الدوا ده و اديهوله فى ميعاده
حاضر يا دكتور
طبعا دا مع الغذا الصحى بروتين و كربوهيدرات و كدا
باذن الله يا دكتور
ها ...يلا بينا يا عبده
يلا ..اه صحيح انت كنت جاى المستشفى ليه يا عبدالحميد ؟؟
لا دا انا كنت جاى زياره لواحد جارى هنا و خلاص اتطمنت عليه
طب يلا بينا ...يلا يا اولاد
ذهب عبدالشكور إلى المقابر مع ابن خالته
بدأ يقرأ الفاتحه عند دخوله و يدعو لأموات المسلمين
دلف عبد الحميد إلى داخل المقابر و من خلفه عبد الشكور و الاربعه أبناء إلى أن وصل إلى حوش قديم له بوابه من الحديد الصدئ ..
أخرج عبد الحميد مجموعه ضخمه من المفاتيح و فتح القفل الذى يعلوه الصدئ
دلف عبدالحميد إلى داخل الحوش
ما تخش يا عبده يا اخويا بيتك و مطرحك
جذبت اسماء ملابس ابيها و همست :
انا خايفه يا أبا
متخافيش يا اسماء و اسكتى لتخوفى اخواتك هما كمان
بسم الله الرحمن الرحيم يا رب يا ستير
ادخل يا عبده متخفش
دى مدافن عيلة القرنفلى باشا دى عيله كبيره اوى و معروفه .. تعالى لما افرجك على الاوضه اللى هتناموا فيها
استنى بس يا عبدالحميد ...طب يعنى مش ممكن حد من عيلة المرحوم يجى و يشوفنا و يعملنا مشكله هنا
لا متخافش الناس دى قبل ما تيجى لازم بيتصلوا بيا الاول عشان افتح لهم المكان و اجهزه و بعدين هما مبيجوش هنا الا من السنه للسنه .انا عشان كدا اخترت لكم الحوش ده بالذات ....تعالى بس لما افرجك دا هيعجبك اوى
طب بس سؤال تانى
اتفضل
هما الميتين مدفونين فين ؟؟
متخفش يا عبده الميتين هنا فى الحوش من بره ...شايف الباب الحديد اللى فى الارض ده
ايوه
دا بقا لما ترفعه تلاقى سلم تنزل بقا تحت تلاقى غرفتين غرفه للرجاله و غرفه للحريم متخافش بقا و تعالى لما اوريلك الاوضه اللى هتناموا فيها ...بص الاوضه عامله ازاى ؟؟ فيها سرير و كراسي و ترابيزه و كل حاجه تحتاجها للمعيشه
ايه دا ازاى كدا ؟؟
الناس زمان كانت بتيجى تقعد مع ميتنها تطبخ و تاكل و تقعد معاهم طول النهار و فى الاخر تروح
ايه الكلام ده انا اول مره اسمع بالكلام ده
الحكايات كتير يا عبده يا اخويا
اه صحيح بمناسبه الحكايات انا اسمع أن المقابر بالليل بيبقى فيها عفاريت صحيح الكلام ده
ما عفريت الا بنى ادم يا عبده يا اخويا
يعنى انت مسمعتش الكلام ده قبل كدا يا عبدالحميد ؟
اهو بنسمع زى ما كل الناس بتسمع بس انا مشوفتش حاجه
ربنا يسترها
ان شاء الله هيسترها ...ها عاوزين منى حاجه تانى
لا كتر خيرك
اه صحيح بالنسبه للحمام فى جامع على اول الترب ممكن تبقوا تملوا منه ميه و تدخلوا الحمام فيه هو مفتوح ٢٤ ساعه ..اتفضل مفتاح الحوش اهو و انا هبقى افوت عليكم كمان يومين كدا دا لو مجليش شغل يعنى .... سلام عليكم
لأ استنى انا لازم اروح شغلى اعمل اجازه عشان انا غبت امبارح و زمان الملاحظ قالب عليا الدنيا
طب يلا بينا
لأ يا أبا متسبناش هنا لوحدنا
متخافيش يا اسماء هى ساعه واحده يا بنتى هاخد اجازه و اجيب لكم اكل و اجى على طول ...اقعدوا هنا او ناموا شويه على السرير الحلو ده و انا مش هتأخر عليكم
طب سيب لنا باب الحوش مفتوح
حاضر هسيبه بس متخرجوش بره
حاضر يا أبا
انصرف عبدالحميد و معه عبدالشكور حيث ذهب الأول إلى بيته و الثانى إلى عمله
ظل عبدالشكور يدعو الله أن يحفظ أولاده و يسترها معه عند لقائه بمدبولى رئيسه المباشر فى العمل و الذى يكرهه لله فى لله
و دائما يشبهه عبدالشكور بالشاويش عطيه
اخذ عبد الشكور فى قراءه كل السور الصغيره التى يحفظها كلما اقترب من مكان عمله
الى أن وصل ليجد مدبولى عابث الوجه يجلس على الرصيف ليتابع حركه عمال النظافه و قد تدلى كرشه من العفريته القذره التى يرتديها و بجانبه كوب من الشاى و مجموعه من سندوتشات الفول و الطعميه يلتهمها بلا رحمه
سلام عليكم يا اسطى مدبولى
و عليكم السلام ....يا اهلا يا اهلا بالباشا بتاعنا......ناموسيتك كحلى يا سي عبدالشكور
و الله يا اسطى مدبولى انا عندى ظروف لو عرفتها هتعذرنى
ظروف ايه دى يا اخويا اللى تغيبك امبارح و تأخرك لحد دلوقتى ؟؟
و الله يا اسطى ابنى عبدالله الصغير ضربته عربيه امبارح و كنت محجوز بيه فى المستشفى
ها...و ايه كمان ؟؟
لو مش مصدقنى تذكرة الدخول اهيه و دى الروشته اللى كتبهالى الدكتور
لا حول ولا قوه الا بالله الف سلامه على عبدالله
الله يسلمك يا رب ...بس كنت عاوز استأذنك فى يومين اجازه بس عشان اقعد بالواد
و تقعد بيه ليه ؟؟ هى فين امه ؟
امه انا طلقتها و اخدت ولادى و رحنا قعدنا فى ترب السيده
الله... الله ليه كدا يا عبدالشكور مش تمسك لسانك شويه ؟
مسكته كتير يا اسطى بس خلاص فاض بيا
لا حول و لا قوة الا بالله
طيب اكتب لى طلب بالاجازه و انا امضيلك عليه
كتر خيرك يا اسطى
معاك فلوس يا عبدالشكور ؟؟
ايوه معايا كتر خيرك انا لسه قابض و القبض معايا مصرفتوش
طب الحمد لله اتكل على الله بقا روح لأولادك و ابقى سلملى على عبدالله
الله يسلمك يا رب
انصرف عبدالشكور و قد انتابته سعاده كبيره ...فقد كان يحمل هم لقاءه بمدبولى
و لأول مره كان مدبولى لطيف معه و لم يعنفه كعهده به دائما
ذهب عبدالشكور إلى الصيدليه و احضر الدواء ثم ذهب إلى الجزار و احضر نصف كيلو من اللحم ثم ذهب إلى البقال ليحضر نصف كيلو من الأرز و بعض ارغفه الخبز
احضر أيضا العسليه التى وعد بها عبدالله
وصل عبدالشكور إلى المقابر ... بحث عن الحوش الذى وضع به أبناءه و لكن لم يجده ...ظل يبحث و يبحث و يدخل فى الطرقات المتعدده
يا الله ...انا تهت و الا ايه ؟؟طب اجرب من هنا .....لا برده ....الحوش كان مدهون اخضر و مكتوب عليه مقابر القرنفلى ...طب اجرب من هنا
ظل عبدالشكور يبحث عن الحوش إلى أن رأى أولاده الاربعه يصطفون أمام الحوش
حمد الله كثيرا و هرول إليهم
ايه يا أولاد ؟؟ ايه اللى مقعدكم كدا ؟؟
#بنت_شوارع
#الجزء_الخامس
ظل عبدالشكور يبحث عن الحوش إلى أن رأى أولاده الاربعه يصطفون أمام الحوش
حمد الله كثيرا و هرول إليهم
ايه يا أولاد ؟؟ ايه اللى مقعدكم كدا ؟؟
قفز الابناء الاربعه قائلين :
احنا خايفين يا أبا
خايفين ليه بس ؟؟
اسماء قالت لنا أن فى ناس مدفونه هنا و فى عفاريت هتطلع لنا
ليه كدا يا اسماء ؟ دا انتى الكبيره عيب لما تخوفى اخواتك كدا
نظرت اسماء إلى الأرض خجلا من أبيها
يلا يا اولاد انا جبت لكم لحمه و رز
صحيح يا أبا ...وحشتنا اللحمه اوى
طيب يلا هاتوا الجركن اللى هناك ده و تعالوا معايا اوريكم الجامع فين عشان بعد كدا تبقوا تروحوا تملوا منه لما تحبوا
اخذ عبدالشكور أبناءه الاربعه ليريهم المسجد و الذى كان يبعد عن المقبره حوالى خمس دقائق سيرا على الأقدام
عاد الأب و أوقد الشعله ثم قام بطبخ اللحم و الارز
اطعم صغاره ثم أخرج لهم العسليه
فرح الصغار كثيرا و خاصة عبدالله
يلا يا عبدالله عشان تاخد الدوا و تنام يا ابنى
حاضر يا أبا
يلا يا اولاد ناموا على السرير و انا هنام هنا قدامكم على الكنبه دى
بس يا أبا ...
ما خلاص يا اسماء بقا ...نامى و انتى ساكته
اطفئ عبدالشكور الضوء و اكتفى بالضوء الموجود بوسط الحوش
وضع عبدالشكور رأسه على الوساده و ظل يفكر ماذا سيفعل بعد ذلك ؟؟ هل سيظل فى المقابر طوال حياته ؟؟ و ماذا بعد انتهاء إجازته كيف سيترك أبنائه الاربعه بمفردهم هنا
إن من حسن حظه أن ما حدث له حدث بإجازة المدارس و لولا ذلك لأصبح فى مشكله كبيره
اغمض عبدالشكور عينه و سلم أمره لله
دقائق و سمع صوت صراخ لسيده فى وسط الحوش
حاول عبدالشكور تجاهل الصوت لكن الصراخ ارتفع لدرجه انه أيقظ أبنائه الاربعه
ايه دا يا أبا ؟؟؟ فى ست بتصرخ بره فى الحوش
متخافيش يا اسماء متخافش يا عبدالله دى تلاقيها عيال صايعه عاوزين يخوفونا
لا يا أبا دا صوت واحده ست و عماله تقول ولادى ولادى مش انتوا سامعينها
اومئ الاخوه الثلاثه برؤسهم لاسماء بالموافقة على كلامها دون أن ينطقوا بكلمة واحده
تكتل الاخوه فى كتله واحده فى أحد أطراف السرير
اسرع الأب إلى أبنائه ليطمنهم و يربط على أكتافهم
متخافوش يا اولاد متخافوش انا هطلع اشوف مين اللى بيعمل كدا
لا يا أبا متروحش دى عفريته
اسكتى يا اسماء عفريتة ايه بس ؟
متسبناش و النبى يا أبا
استنى بس يا اسماء هروح اشوف ايه دا و اجى
لا لا
اخذ الصغار فى البكاء بصوت مرتفع فجلس عبدالشكور بجانبهم و أخذهم بحضنه
متخافوش يا عيال خلاص الصوت راح ناموا يلا يا حبايبي
احنا عاوزين نمشي من هنا يا أبا
نمشي نروح فين بعد ما امك طردتنا يا سامح ؟
امى كانت اهون من اللى سامعينه دا يا أبا
لا الصراحه هنا اهون مية مره من امكم
ناموا متخافوش دى اكيد عيال هى اللى بتعمل كدا ...ما هى المقابر ساكنه بناس كتير زينا و اكيد لما عرفوا أن دى اول ليله لنا هنا حبوا يخوفونا
نام الصغار حول ابوهم و هم متشبثون بصدره و اقدامه من الجهات الاربعه
اصبح الصباح ...تناسي الاطفال ما حدث و انشغلوا بإحضار الماء و الطعام من إحدى المطاعم القريبه من المقابر
جاء الليل و خلد الصغار الى النوم بينما ظل عبدالشكور ينتظر ليتسمع اى صوت
و ما أن انطفئ الضوء و صمتت الاطفال
فإذا به يسمع صوت سيارة إسعاف بصوت مرتفع جدا كأنها تقف أمام الحوش
اصاب عبدالشكور الخوف الشديد من أن يستيقظ أبنائه و يصابوا بالهلع من صوت السياره
و فجأه صمت صوت السياره كأن لم يكن و ظهر صوت السيده التى سمعها بالأمس و قد بدأت بالبكاء بصوت منخفض ثم تعالت شدة الصوت شيئا فشيئا إلى أن أصبح صريخ مرتفع جدا مع ترديد كلمه
ولادى ....ولادى
استيقظ الأبناء مره اخرى على الصوت و ارتفع صراخهم و انتابهم حاله من الهلع الشديد
فى هذه المره لم يستطع عبدالشكور تهدئتهم لانه أيضا اصابه الخوف و الهلع
و ما كان منه إلا أنه قام مسرعا اوقد الضوء و اخذ أطفاله بحضنه و اخذ يقرأ الفاتحه و ايه الكرسي و المعوذات
اختفى الصوت بعد فتره ...ظل الاطفال ينتحبون و يطلبوا من أبيهم أن يتركوا المكان بأى طريقه
وعدهم الاب أنه بحلول الصباح سوف يبحث لهم عن مكان آخر غير هذا المكان
🥀🥀🥀🥀🥀🥀
دعونا نذهب سويا لنرى ماذا حدث لتحيه بعد ترك عبدالشكور لها
تحية تجلس أمام الباب بملابس رثه ...قذره الوجهه و اليدين تحضر حميده
اليها لتجلس معها أمام غرفتها الخشبيه
مسا الخير يا تحيه
يسعد مساكى يا حميده
ايه مفيش اخبار عن عبدالشكور و العيال ؟
و لا اخبار و لا اهرام يغور فى داهيه مش عاوزه اسمع عنه حاجه
استهدى بالله بس متشمتيش المعفنين فيكى
و لا حد يقدر يشمت فيا دا انا اضربهم بالجزمه كلهم
و انتى هتمسكى بق الناس يا تحيه ؟؟؟ انا مش عاوزه اقولك بيقولوا عليكى ايه فى الحاره
بيقولوا ايه النسوان العرر دول ؟؟
خلاص بقا ملوش لازمه
لا قولى عشان اوقف كل واحده عند حدها
بيقولوا أن الراجل طفش منك يا تحيه و انك خربتيها و قعدتى على تلها و أنه ما صدق نفد بجلده منك و انك ميطقيش الجن و ازاى هو كان مستحمل دا كله
هنا هاجت تحيه و ماجت و انتصبت واقفه و أخذت تصرخ
اه يا حاره معفنننننه ...الجدع فيكوا يطلع لى و انا اوريله مقامه ....و دينى لأوريكوا يا شويه خرفان
اقعدى بس يا تحيه ...الله ...انتى هتفرجى الناس عليكى و تخليهم يشمتوا فيكى اكتر ؟
قوليلى يا حميده مين اللى اتكلم عليا و انا اقوم اجيبهم من شعرهم
يا ستى سيبك من اللى اتكلم عليكى ..انتى لازم تفرسيهم اكتر لما ترجعى جوزك ليكى
لااااا ...حد الله بينى و بينه انا حالفه
يا ستى افهمى ...حالفه ايه بس؟؟؟ رجوع جوزك هو اقوى رد على الستات العرر دى ..و بعدين اشرطى عليه اللى انتى عاوزاه عشان تأدبيه كويس
اشرط عليه بإبه يا حسره هو حيلته حاجه اتشرط فيها 😏؟
يا ستى انتى ادرى بقا ...تشرطى يشوف شغل تانى و الا يشغل العيال معاه
فكره حلوه دى يا حميده و نفسي فيها من زمان بس هو رافض و قال ايه عاوز يعلمهم
يعنى وافقتى ؟؟
وافقت على ايه ؟
انى اروح لمتولى صاحبه يشوفوا راح في انهى داهيه و يجيبه و يجى ...زمانه متمرمط بالعيال
احسن عشان يعرف قيمتى
خلاص انا هروح لمتولى دلوقتى و ربنا يقدم اللى فيه الخير
بس مش عاوزاكى تقولى لمتولى انى اعرف حاجه ...خليها تيجى منك انتى كأنك انتى اللى عاوزه كدا
طبعا عيب عليكى ...اكيد هقوله كدا متخافيش عليا دا انا حميده و الاجر على الله .
#بنت_شوارع
#الجزء_السادس
بس مش عاوزاكى تقولى لمتولى انى اعرف حاجه ...خليها تيجى منك انتى كأنك انتى اللى عاوزه كدا
طبعا عيب عليكى ...اكيد هقوله كدا متخافيش عليا دا انا حميده و الاجر على الله ..
ذهبت حميده لحجرة متولى لتنفذ ما اتفقت عليه مع تحيه فخرجت لها زوجته
مسا الخير يا ام حسين
يسعد مساكى يا حميده
الاسطى متولى هنا
ايوه موجود بس مأيل شويه
طب ناديهولى يا اختى عاوزه فى موضوع مهم
موضوع ايه يا ادلعدى
موضوع خصوصى كدا
و من امتى فى بينكم مواضيع خصوصيه يا ست حميده
ما تحترمى نفسك يا ام حسين هو انا عشان بكلمك بالذوق يبقى مقدرش عليكى لا يا حبيبتى انتى عارفانى كويس و عارفه انى اقدر اربيكى ازاى
ايه يا وليه انتى جايه تشتمينى فى بيتى ؟
بيتك ايه يا ام بيت ؟ بتسمى الاوضه الكحيانه دى بيت ؟
اسم الله على الفيلا اللى انتى قاعده فيها حوشي يا اختى الخدامين اللى بيتنطوروا شمال و يمين
هنا خرج متولى على صوت زوجته و حميده
فى ايه يا جماعه صلوا على النبى كدا
الف صلاه عليك يا نبى ... يرضيك يا ابو حسين اجى اسال عليك عشان موضوع مهم مراتك تبهدلنى ؟ و تقولى فيه ايه بينك و بينه ؟ هو انا يعنى عشان ست وحدانيه و مليش حد تعمل معايا كدا
لا حقك عليا يا ست حميده
حقها عليك ايه يا اخويا دا هى اللى جت قلت ادبها عليا فى بيتى
اسكتى يا ام حسين و ادخلى جوه
لا مش داخله لما اشوف المره دى عاوزه منك ايه بالظبط
خير يا ست حميده انا تحت امرك
انا جايلك فى خير يا سي متولى
خير أن شاء الله
انا عاوزك تكون واسطه خير بين عبدالشكور و تحيه
وسطه خير ازاى و لمؤاخذه ؟
الله هو انا اللى هقولك ما انت سيد العارفين يا اسطى متولى ، عاوزك تروح لعبدالشكور و تجيبه يصالح الست تحيه عشان خاطر العيال ...زمانه متبهدل بيهم
و الله يا ست حميده انا مش عاوز ادخل نفسي في الموضوع ده ..الموضوع كله مشاكل و قرف
و انت ادها و ادود يا اسطى و انا جايه لك و عارفه انك هتحلها باذن الله
و احنا مالنا احنا بالكلام ده يا ست حميده الراجل طلقها و خلص من قلة ادبها و زفارة لسانها
انا موجهتش كلام ليكى يا ام حسين انا بتكلم مع الراجل بتاعك
خلاص يا جماعه ...استهدوا بالله ...اسكتى يا ام حسين... عشان خاطر العيال بس انا هروحله و احاول انى اجيبه
شالله تسلم يا اسطى يا رب
هتروحله امتى أن شاء الله ؟
بكرا باذن الله هروحله شغله
تسلم يا رب بالاذن انا بقا
مع السلامه
انصرفت حميده و هى تلعن و تسب فى زوجة متولى و تتوعد بأن تنتقم منها فى يوم من الايام بسبب حديثها معها و أنه لم يمنعها منها إلا أنها تريد معالجة أمر تحيه و لولا ذلك لكانت ارتها مقامها
بينما كانت زوجة متولى تغلى كالبركان لعدم ردها على هذه الحيه التى تدعى حميده و انتظرت ابتعادها عن المكان...
وقفت واضعه يدها بوسطها قائله
انت صحيح هتروح لعبدالشكور ؟؟
و ماله يا سميره دا عمل خير
خير ايه هى تحيه دى يتعمل معاها خير ؟ دا انت باللى هتعمله دا هترجع الشر لصاحبك
بس انتى عارفه أن عبدالشكور على اده و زمانه تايه بعياله و الله و اعلم هو فين دلوقتى و عياله عاملين ايه
خلاص اللى تشوفوا يا متولى بس الراجل هيدعى عليك
اللى فيه الخير يقدمه ربنا يا سميره
فى اليوم التالى ذهب متولى إلى حيث يعمل عبدالشكور ...بحث عنه فلم يجده فتوجه إلى مدبولى رئيسه بالعمل
سلام عليكم
و عليكم السلام يا سيدى
متعرفش الاقى عبدالشكور فين يا ريس ؟
عبدالشكور واخد اجازه يومين يا اخ عشان الواد ابنه عمل حادثه
يا ستير يا رب حادثة ايه ؟؟
معرفش عربيه خبطت الواد الصغير ابنه
طب متعرفش الاقيه فين من فضلك ؟
هو قالى أنه راح سكن فى ترب السيده
ايه ؟؟؟ هى حصلت للترب ؟؟
بتقول حاجه يا سيدنا ؟
لا سلامتك ...سلام عليكم
و عليكم
اتجه متولى إلى مقابر السيده و أخذ فى البحث عن عبدالشكور و ابنائه و للصدفه الحسنه وجد سامح ابن عبدالشكور يقف أمام المسجد الموجود بأول المقابر
تعالى يا سامح ابوك فين ؟
ابويا جوا يا عم متولى
طب تعالى وصلنى له يا ابنى
وصل متولى إلى مقبره القرنفلى باشا بعد القاء التحيه على أموات المقابر و قراءه الفاتحه لهم و للمسلمين جميعا
دلف سامح مسرعا لداخل الحوش
يا أبا..... يا أبا عم متولى بره بيسأل عليك
متولى ؟؟ عرف مكانى هنا ازاى ؟؟
تعالى يا متولى اتفضل
سلام عليكم يا ابو سامح
و عليكم السلام ..اتفضل ...اعملى شاى يا اسماء
حاضر يا أبا
ايه دا يا عبده ايه اللى مقعدك هنا ؟
ما انت عارف كل حاجه يا متولى
عارف بس فى المقابر ؟؟؟ دى حاجه صعبه اوى
هعمل ايه بس منا ممعييش أجر اوضه بره و لولا عبدالحميد ابن خالتى قابلته و انا فى المستشفى كنت اترميت انا و اولادى فى الشارع ملقناش حته ننام فيها
طب مش انت قلت هتروح لأختك
اختى حتتها ضيقه برده و لقيت مينفعش اروح اقعد بعيالى الاربعه عندها
طب و ابنك حصله ايه ؟
انت عرفت منين ؟
الريس مدبولى هو اللى قالى و قالى كمان انك ساكن هنا
ااااه فهمت ....ابنى خبطته عربيه و الدكتور خيط له دماغه و الحمد لله على كل حال
لا حول و لا قوة الا بالله طب ما ترجع يا ابن الحلال
ارجع فين يا متولى ؟
ارجع لمراتك و لم عيالك بينك و بينها
و انت ترضهالى يا متولى ؟.... انت مشفتش عملت فيا ايه و طردتنى ازاى ؟
معلش يا عبده عشان خاطر العيال بس
لا يا متولى مينفعش
يعنى دا اخر كلام عندك
ايوه
طب و انت هتفضل هنا على طول ؟
و الله مش عارف بس لغاية دلوقتى مقدميش غير هنا
طيب يا عبده انا همشي دلوقتى و هفوت عليك تانى بعد يومين تكون هديت كدا و نعرف نتكلم سوا
ماشى يا متولى
انصرف متولى ...نظرت اسماء إلى والداها
ليه يا أبا مرضتش نرجع عند امى ؟
امك ؟؟؟ مش دى امك اللى كانت سمه بدنك يا اسماء ؟
ايوه يا أبا بس انا مبحبش المكان هنا و خايفه اوى و مش عاوزه ابات هنا تانى
هنا سمع عبدالشكور صوت عبدالحميد
يا اللى هنا ...
ايوا ...تعالى يا عبدالحميد
عاملين ايه يا عبده ؟
الحمد لله زى الفل
هنا نطقت اسماء ...بس فى هنا عفاريت يا عمى
عفاريت ايه يا اسماء ؟
عفاريت بتيجى بالليل هنا
ايه حكايه العفاريت دى يا عبده ؟؟
دا صوت إسعاف و واحده ست بتعيط فى نص الليل و عماله تقول ولادى ولادى
اااااه
اه ايه ؟؟ انت تعرف حاجه عن الست دى ؟
ايوه ...الست دى يا عبده ....
#بنت_شوارع
#الجزء_السابع
ايه حكايه العفاريت دى يا عبده ؟؟
دا صوت إسعاف و واحده ست بتعيط فى نص الليل و عماله تقول ولادى ولادى
اااااه
اه ايه ؟؟ انت تعرف حاجه عن الست دى ؟
ايوه ...الست دى يا عبده عقلها على ادها بتلف طول الليل فى المقابر و سمعنا أن ولادها ماتوا محروقين
اعوذ بالله طب و صوت الاسعاف اللى بنسمعه دا يا عبدالحميد ؟
دى إسعاف عاديه ما هى المستشفى العام قريبه هنا
شفتى يا اسماء اهو عمك قالك انى دى ست عاديه مش عفريته اهى
و هى هتدخل الحوش ازاى يا أبا ..دا صوتها بيبقى قدام باب الاوضه
انتى شفتيها فى الحوش يا اسماء ؟
لا يا عمى بس صوتها قريب اوى
لا هى بس صوتها عالى و بتقف قدام البوابه من بره و انتى بتفتكريها جوه الحوش
يمكن يا عمى
ها ...عاوزين منى حاجه تانيه ؟
لا كتر خيرك
طيب استأذن انا بقا ....اه بقولك ايه يا عبده مش عاوز تشغل عيلين من عيالك و الا حاجه
اشغلهم ايه ؟؟
يشتغلوا معايا يخدموا عليا يجيبولى طلب ...شويه اسمنت شويه ميه كدا يعنى
معلش يا عبدالحميد انا مش عاوز ولادى يشتغلوا فى الحاجات دى
و مالها الحجات دى يا عبده منها و إليها نعود يا اخويا ..و بعدين الناس اللى بيكون ميت لها ميت بعيد عنك بيبقوا عاوزين يطلعوا حسنه على روح المرحوم و لما يلاقوا عيال صغيره زى دى هيدولهم قرش حلو
انت عاوز ولادى يبقوا شحاتين يا عبدالحميد ؟؟ لا انا معودتهمش على كدا
هنا دخل سامح و سعد و هم يمسكون ذيول جلالبيبهم بأيديهم و يظهر من خلالها أنهم يحملون بها اشياء
ايه دا يا اولاد انتوا عاملين كدا ليه ؟
بص يا أبا الناس ادولنا ايه ؟؟
اطلق الولدان ذيول جلاليبهم على السرير ليظهر أمام عبدالشكور فطائر و جوافه و بلح، خوخ ،تفاح
ايه دا ؟ انتوا جايين الحاجات دى منين ؟
دى رحمه يا أبا
رحمة ايه دى ؟
هنا ضحك عبدالحميد ...مش قلت لك يا عبده المقابر هنا خيرها كتير فكر فى اللى قلت لك عليه و ابقى رد عليا ...سلام
انصرف عبدالحميد بينما وقف عبدالشكور مذهول فهو يريد لاطفاله عزة النفس ولا يريد أن تمتد ايدهم لأحد ...لقد اصابه كرب فوق كربه
كيف له أن يقول لا تأخذوا هذه الأشياء و لا تمدوا ايديكم و هو لا يستطيع شراء هذه الاطعمه لهم ...كيف سيشرح لطفله المحروم من تلك الأشياء أن يدير لها ظهره
قطع تفكيره صوت أبنائه سعد و سامح و هم يتشاجرون
لا انا ليا نص الفلوس
لا الفلوس الراجل ادهالى انا
بس انا كنت معاك يبقى لى النص
ايه دا فى ايه يا اولاد فلوس ايه اللى بتتكلموا عليها ؟؟
فلوس يا أبا الراجل أداها لسامح وقاله دى لك و لاخوك و هو عاوز ياخدها لوحده
ورينى الفلوس دى يا سامح
اخرج سامح النقود من جيب جلبابه ليضعها فى يد أبيه
نظر عبدالشكور للنقود فى اندهاش فقد رأى فى يده ورقه من فئه المائتين جنيه
انت جايب الفلوس دى منين يا سامح اوعى تكون سارقهم يا ابنى
لا يا أبا ...دا راجل شكله غنى اوى كان لابس بدله و راكب عربيه حلوة اوى ادهالى
و بتاخدها منه ليه يا سامح ؟
و ماله يا أبا اما اخدها
لا عيب يا ابنى انت مش شحات
انا بس كان نفسي اجيب ساندوتش شاورما زى اللى الواد فؤاد صاحبى كان بيحكيلى عليه
شاورما ايه دى ؟؟
شاورما يا أبا ..مش عارفها ؟ الواد فؤاد قالى أنهم بيجيبوا سيخ كبير و يرصوا عليه لحمه كتير اوى و بعدين السيخ دا بيفضل يلف لوحده و النار عليه فتحمر اللحمه دى
يقوم الراجل جايب سكينه طويله كدا و يقطع اللحم المتحمر ده و بعدين ياخده يحط عليه بصل و طماطم و فلفل و يحطه فى رغيف مدور كدا و بيبقى طعمه حلو اوى 😋😋
طب و مطلبتش منى ليه يا سامح
اطلب ايه يا ابا دا السندوتش الواد فؤاد بيقولى ب ٣٠ جنيه
كنت عاوز اجيب خمس سندوتشات لينا كلنا عشان افرحك و افرح اخواتى
هنا اغرورقت عينى عبدالشكور بالدموع و اخذ سامح بحضنه ووعده أنه سيذهب ليحضر له الشاورما التى يريدها
فرح سامح كثيرا و قبّل والده
اخذ الاب النقود و توجه إلى أحد محلات بيع الشاورما ...طلب السندوتشات و تبقى معه خمسون جنيه
توجه إلى السوبر ماركت و احضر زجاجه كبيره من البيبسي واشترى شيكولاته لكل ابن من أبنائه
فرح الاطفال كثيرا و تهلل وجههم عند رؤيتهم لابيهم
الله يا أبا ...ايه الريحه الحلوه دى ؟
ما هى دى الشاورما اللى قال عليها سامح
دى ريحتها حلوه اوى يا أبا افتح بسرعه قبل ما تبرد
اختطف الاطفال الطعام و بداو يلتهموه بشراهه بينما جلس عبدالشكور ينظر لهم دون أن تمتد يده إلى طعامه
لاحظ الاب سرعة التهام أطفاله للطعام و أنهم ما يزالوا يريدون أن يستزيدوا منه
قسم طعامه إلى اربع اقسام ووزعها عليهم
و انت يا ابا مش هتاكل ؟
لا انا شبعان يا عبدالله ...كلوا انتوا يا اولاد ..انا جايب لكم كمان شيكولاته و حاجه ساقعه
ربنا يخليك لينا يا أبا
تناول الاطفال الطعام و خلدوا الى النوم
وضع عبدالشكور رأسه على الوساده و هو يفكر إلى ما آل إليه وضعه و يفكر بعرض متولى بالرجوع إلى تحيه
تحيه صعبه التعامل لكنها تظل امهم ...هناك سيكملوا تعليمهم لكن هنا سيتحولون إلى متسولين ...بدأ يحدث نفسه
هترجع لتحيه تانى يا عبده ؟ هترجع للذل و قلة الكرامه ؟ طب و اللى انت فيه دلوقتى دا يعتبر ايه ؟ ما انت كمان مديت ايدك و اخدت الفلوس و رحت جبت بيها اكل
منا كنت عاوز افرحهم و انسيهم الوضع اللى هما فيه
بس برده انت كدا معلمتهمش أنهم ميمدوش ايدهم لحد ...بالعكس انت عملت زيهم
انا غلبان و المتين جنيه دول تلت مرتبى يعنى اشتغل عشر ايام بيهم
خلاص يا عبده اللى حصل حصل بقا متقعدش تلوم نفسك
اغمض عبدالشكور عينيه و دخل فى نوم عميق فرأى سيده تقف أمامه تلبس السواد شكلها بشع ذات جلد سائح و شعر محروق تنظر له بحده
انتى مين ؟
انا انيسه ... انت ايه اللى جايبك هنا ؟؟
انا ..انا
انت جايب ولادك هنا ليه ؟؟ مش خايف عليهم ؟؟ انا كان عندى ولاد زيهم و اهملت فيهم زى ما انت بتعمل كدا و النتيجه كانت ايه ؟؟ ماتوا
ايوا انا السبب
ولادى ماتوا بسببى
انا سبتهم و نزلت البيت ولع بيهم و ماتوا الاربعه ..ليه جيت هنا ؟ ليه بتقلب عليا المواجع ؟ انا عشت بالذنب سنين و سنين لحد ما لقيت الطريقه اللى أكفر بيها عن ذنبى و اعيش اللى عاشوه ولادى ...انا السبب أنهم ماتوا محروقين يبقى العدل انى احرق نفسي زيهم عشان ادوق اللى داقوه ...افتكرونى مجنونه بس انا عاقله
السنين اللى قضتها فى المستشفى مخلتنيش انسي و لا أبطل تفكير انى لازم اموت زى ما ماتوا
كان لازم اطمن الدكاتره انى بقيت كويسه عشان يسمحولى أخرج فى الجنينه ...ايوه الجنينه ...لحد ما جت لى الفرصه و لقيت تمرجى ناسي الولاعه بتاعته اخدتها بسرعه و خبتها و استنيت لما الكل ينام عشان محدش يلحقنى زى ما ولادى ملقوش حد يلحقهم
ولعت فى ملايه السرير ...النار مسكت فيها و عليت عليت بقيت اضحك بشكل هستيري لحد ما النار مسكت فى جسمي بقيت اصرخ بشكل فظيع ...الم رهيب كنت مشفقه على ولادى أنهم حسوا بالألم ده ... الجلد و هو بيسيح و ريحته الرهيبه و الألم مش قادره اوصفه لك
لحقونى بس بعد ايه ...بعد ما كان معظم جسمى اتحرق ...نقلونى بسرعه لمستشفى الحروق و كنت سامعه الدكتور بيقول حالتها صعبه ..صعب انها تنجى
و برغم الالم اللى كنت حاسه بيه الا انى كنت فرحانه انى هروح لاولادى ...خلاص خطوات صغيره و ابقى معاهم ...انا شفتهم ..ايوه لقيتهم بيلعبوا حواليا و بيقولولى يلا يا ماما عشان نروح سوا
اخدونى من اديا و مشينا بعيييد
اسمع يا راجل انت ...انت لازم تمشي من هنا ..انت فاهم ..انا مش عاوزه اضرك انت وولادك ...انتى بتضرنى بصوتهم دا
مش عاوزه اشوفكم هنا تانى ..انت فاهم
استيقظ عبدالشكور من نومه مذعور فهو لا يعلم أن كان ما رآه صحيحا ام لا ؟
هل انيسه هذه موجوده بالفعل ؟ ام أن حديث عبدالحميد معه هو من أثر عليه و جعله يحلم بهذا الحلم ؟؟؟؟
#بنت_شوارع
#الجزء_الثامن
استيقظ عبدالشكور من نومه مذعور فهو لا يعلم أن كان ما رآه صحيحا ام لا ؟
هل انيسه هذه موجوده بالفعل ؟ ام أن حديث عبدالحميد معه هو من أثر عليه و جعله يحلم بهذا الحلم ؟؟؟؟
خرج إلى الحوش الخارجى حيث اسماء الموتى المدفونين بالمقبره مكتوبه على شواهد من الرخام
قائمه من الأسماء فى نهايتها انيسه صالح القرنفلى
يا خبر يبقى صحيح ...الست دى مدفونه هنا و هتأذى ولادى ...انا لازم اسيب الحوش ده بسرعه ...بس هروح فين يا ربى؟
انا كمان اجازتى هتخلص بكرا مقدرش اسيبهم هنا لوحدهم بعد اللى عرفته دا
مفيش قدامى الا تحيه ...منك لله يا تحيه انا لولا خايف على اولادى مكنتش رجعت لك تانى ابدا
انتظر عبدالشكور إلى أن استيقظ أبنائه و طلب منهم جمع أغراضهم ليتركوا المكان
فرحت اسماء كثيرا فهى لا ترتاح للمكان منذ خطته قدمها
هنروح فين يا أبا ؟؟
هنرجع لامك يا عبدالله
مش انت متخانق معاها يا أبا ؟
منا هصالحها يا سامح عشان خاطركم يا اولاد
توجه عبدالشكور إلى بيت متولى و الذى وجده مازال نائما حيث أنه ورديته فى الليل
صباح الخير يا ست ام حسين
يسعد صباحك يا سى عبدالشكور ..حمدالله على السلامه يا اخويا
الله يسلمك يا رب ...الاسطى متولى هنا ؟
ايوه يا اخويا موجود اتفضل
يا ابو حسييييين ...قوم يا راجل سي عبدالشكور عايزك
تعالى يا عبده يا اخويا اتفضل ...اعمليلنا جوز شاى يا سميره
عنيا يا اسطى
ازيك يا عبده عامل ايه يا اخويا
الحمد لله يا متولى
فكرت فى الكلام اللى قلتهولك ؟
ايوه فكرت و اقتنعت بكلامك عشان خاطر العيال بس
عين العقل يا اخويا
بس من غير قلة قيمه يا متولى
عيب عليك ...انا مرضلكش بقلة القيمه ...انا دلوقتى بعد ما نشرب الشاى هروح لحميده أخدها و نروح للست تحيه و ربنا يعمل اللى فيه الخير
ذهب متولى إلى حميده و أخبرها أنه احضر عبدالشكور لمصالحة تحيه و يريدها معه لتلطيف الجو
ردت حميده :
و مالوا يا اخويا اجى معاك عنيا ليك يا سيد الناس ...بس انا واخده على خاطرى يا سى متولى
واخده على خاطرك ليه يا ست حميده
من مراتك ...مراتك بهدلتنى و لولا خاطرك عندى كنت رديت عليها ...اعمل ايه بس كل نسوان الحاره بيغيروا منى على رجالتهم مع انى ميملاش عينى الا سيد الرجاله اللى زيك كدا يا سى متولى
اااايه ..طب ايه؟ مش يلا بينا على الست تحيه
يلا يا اخويا ...بس لسه الكلام مخلصش
ان شاء الله يا ست حميده
ما بلاش ست حميده دى قولى يا دودى
دودى ؟؟🙄 طب يلا بينا عشان منتأخرش على عبده
ذهب متولى و حميده إلى تحيه
استنانى هنا خمسه يا سي متولى لما اقولها على الموضوع أصلها متعرفش عنه حاجه خالص
حاضر يا ست حميده
برده ست حميده ؟؟ طيب
دخلت حميده إلى تحيه لتخبرها بحضور زوجها للصلح
فرحت تحيه فرحا شديدا فهى تشعر بقوتها و سيطرتها على عبدالشكور و يرضى ذلك غرورها بشده
انا عاوزاكى تلبسي جلابيه حلوه كدا يا تحيه
على ايه يا اختى ؟
يا بت عشان لما يشوفك يندم أنه سابك الكام يوم دول
ايوه عندك حق
و مش عاوزاكى تتكلمى معاه فى ايتها حاجه
و ليه بقا أن شاء الله ؟
يا بت جريه الاول و خليه يرجعك و بعد كدا اعملى ما بدالك
ايوه صح ..ماشي
متولى بره هدخله و كأنك لسه سامعه منى الموضوع ده دلوقتى حالا
ماشى كلامك
تعالى يا اسطى متولى
اتفضل يا اخويا ( نطقت تحيه )
سلام عليكم يا ست ام سامح
و عليكم السلام يا اسطى
الست حميده فهمتك انا جاى ليه طبعا
ايوه قالت لى بس يا اسطى صاحبك بهدلنى و طلقنى بعد عشرة ١١ سنه و انا واخده على خاطرى منه اوى
متزعليش يا ست تحيه انا هجيبه لحد عندك يعتذرلك
طب و اليمين اللى رماه عليا ؟
انا هاخده و نروح لشيخ الجامع و نشوف نرد اليمين دا ازاى متقلقيش
ماشي كلامك يا اسطى متولى
بس و حيات الغالين عندك بلاش عتاب و كلام ملوش لازمه قدامنا ..لما تبقوا مع بعض اتصافوا سوا زى ما تحبوا
ماشي كلامك يا اسطى و انا مش هرد لك كلمه
تسلمى يا ست تحيه ...دا العشم برده.....هروح اجيبه و اجيب العيال زمانهم وحشوكى
اه طبعا وحشونى ...وحشونى اوى
ذهب متولى لاحضار عبدالشكور بينما ارتدت تحيه جلباب احمر تظن أنه يجعلها مثيره ، خططت حاجبيها ، وضعت الكحل ربطت منديل على رأسها
زى ما اتفقنا يا تحيه
خلاص يا حميده....الله هو انتى فاكرانى مبفهمش و الا ايه ؟
بعد دقائق سمعت تحيه و حميده صوت ينادى من الخارج
يا ست تحيه
اتفضلوا اتفضلوا ..(نطقت حميده )
دخل عبدالشكور و اولاده إلى داخل الغرفه الخشبيه ليجدوا تحيه تجلس على السرير دون أن تتحرك من مكانها
سلموا على امكم يا اولاد (قال متولى)
سلم على جماعتك يا عبده
جماعته ؟؟ جماعته مين بقا ماطلقنى و اللى كان كان
يا ستى ما احنا جايين نرجعك اهو ...هاخده دلوقتى و هروح للشيخ زى ما قلت لك
ازيك يا تحيه
الله يسلمك يا عبدالشكور
اللهم صلى على النبى الصلح خير يا جماعه
اللهم صلى عليه
يلا يا عبده نروح للشيخ عيد و نشوف هترد ام سامح ازاى
يلا يا متولى
خرج عبدالشكور و متولى ...قفزت تحيه من مكانها
تعالوا يا اولاد احكولى على كل حاجه حصلت معاكم من اول ما خرجتم من هنا
نطق عبدالله انا كنت هموت يا اما
تموت ازاى يا عبدالله ؟
عربيه خبطتنى
و جرالك ايه يا واد ؟
خيطولى دماغى يا اما ...شوفى
شوفتى يا حميده خدهم يومين كان هيموت لى الواد ازاى ؟
و كلنا شاورما يا اما
شاورمه ايه دى يا واد يا سامح ؟؟
شاورما حلوه اوى يا اما ابويا جابها لنا
اه ما هو أن غاب القط العب يا فار ...فلوسوا كتير ابن شلبيه
لا يا اما دى مش فلوسه دى فلوس الراجل ادهالى و احنا فى الترب
ترب ؟؟؟ ترب ايه يا واد ؟ انتوا مش كنتوا عند عمتكم شربات ؟
لا يا اما احنا بتنا ليله واحده بس هناك و ابويا قام من الفجر خدنا و مشينا من عندها
ااه تلاقيها مدتلوش وش و الا جوزها زعق لها منا عارفاهم عالم واطيه ...ها و بعدين يا واد ايه اللى حصل بعد كدا ؟
بعدين رحنا كلنا فول و طعميه و اخويا عبدالله خبطته عربيه
اه و بعدين رحتوا الترب ازاى و قابلت الراجل اللى اداك الفلوس دا فين ؟
ما احنا قابلنا عم عبدالحميد فى المستشفى و هو اللى ودانا هناك
عبدالحميد مين ؟؟؟ ااااه عبدالحميد ابن خالة ابوك ؟ ايوه ما هو بيشتغل تربى ...و بعدين كملوا
مفيش يا اما رحنا قعدنا فى الحوش بس كان فى عفريته
بسم الله الرحمن الرحيم عفريتة ايه دى ؟؟
عفريته يا اما كانت بتيجى تصرخ كل يوم بالليل و اسماء كانت خايفه منها اوى
صحيح الكلام ده يا اسماء ؟ و الا الواد سعد بيكدب ؟
هو احنا كنا بنسمع صوت يا اما بس عم عبدالحميد قال لابويا انها ست مجنونه عيالها ماتوا محروقين
ها ...و قاله ايه كمان يا اسماء ؟
قاله لو عاوز تشغل ولادك هاتهم معايا
ها و ابوكى قاله ايه ؟
ابويا مرضييش
طبعا ما هو طول عمره وش فقر ...و انت يا واد يا سامح الراجل اداك كام ؟
دا راجل شكله غنى اوى يا اما ادانى متين جنيه
متين جنيه حته واحده ؟
ايوا يا اما
و عملت بيها ايه يا ولا ؟؟
اديتها لابويا
اه يا خايب ...كنت عنتها نجيب بيها حاجه كويسه
ما هو ابويا جاب لنا بيها شاورما و شيكولاته و حاجه ساقعه يا اما
شوفتى يا تحيه عايش حياته و لا كأن له حرمه ...و ال ايه داخل عليا مش هاين عليه يجيب بصله حاره معاه و هو جاى يردنى
معلش يا تحيه ابقى يا اختى عاتبيه بعدين
و لا بعدين و لا قبلين انا خلاص عرفت هعمل ايه كويس .
#بنت_شوارع
#الجزء_التاسع
شوفتى يا تحيه عايش حياته و لا كأن له حرمه ...و ال ايه داخل عليا مش هاين عليه يجيب بصله حاره معاه و هو جاى يردنى
معلش يا تحيه ابقى يا اختى عاتبيه بعدين
و لا بعدين و لا قبلين انا خلاص عرفت هعمل ايه كويس .
طب يلا عاوزين نهيص شويه بمناسبه رجوعك لجوزك
نهيص ايه و نيلة ايه بس ؟؟
يا بت يا هبله عشان نكيد العدا ....و النسوان العرر اللى شمتوا فيكى ينبطوا
يا شيخه لا اقعدى اقعدى
لا و الله انا هروح اجيب الطبله و التسجيل و نشغل اغانى و نرقص و نزغرط
أحضرت حميده الطبله و المسجل و أطلقت صوتها بالغناء
( كايده العزال انا من يومى💃💃
ايوه اه ايوه اه🎶
كايده العزال انا من يومى
يا بت يا ام التطريحه ايوه اه
يا احلى من الموز 🍌ابو ريحه ايوه اه
عليكى حته تسريحه دا انا من يومى
كايده العزال انا من يومى🎶
يا حلوه يا ام التوب الاخضر ايوه اه
والطرحه من شارع الازهر ايوه اه
خليتى ايه لاهل البندر دا انا من يومي
كايده العزال انا من يومى🎶
عليكى خطوه يا نعيمه ايوه اه
لو شافها مخرج فى السيما اايوه اه
يعملك فيلم عليه القيمه دا انا من يومى
كايده العزال انا من يومى🎶
يا حلوه انتى ياسماره ايوه اه
يا كايده جدعان الحاره ايوه اه
بيبعتوا الف اشاره دا انا من يومى
كايده العزال انا من يومى🎶
فيه بس واحد على بالى ايوه اه
غالى ومن يومه غالى ايوه اه
خايفه لاقلبه يكون خالى وانا من يومى
كايده العزال انا من يومى🎶
دكانه ابويا عالشارع ايوه اه
وحبيبى فى الدور الرابع ايوه اه
يطلبنى وانا مش راح امانع وانا من يومي
كايده العزال انا من يومى🎶🎶 )
الله يحظك يا حميده ضحكتينى يا وليه
شايفه نسوان الحاره عمالين رايحين جايين ازاى و نفسهم يعرفوا فيه ايه ؟استنى انا هطلعلهم
عقبال عندكم يا نسوان تحيه جوزها رجعها ما هو ميقدرش يستغنى عنها ....دمهم اتحبس
ههههههههه ههههههههه يخربيت فقرك يا حميده
بقولك ايه يا تحيه انا عاوزه اخد العيال تبات عندى الليله
ازاى بس يا حميده ميصحش
هو ايه اللى ميصحش ؟؟ انتى عروسه جديده ...قومى قومى اعملى لجوزك حاجه ياكلها
حاجه ايه اسكتى يا اختى
خلاص خلى الاكل عليا هشوح لكم نص كيلو كبده جايلى من باب الله و اجيبهولك
و الله يا حميده مش عارفه أودى جمايلك دى فين ؟؟ انا لو ليا اخت مكنتش هتعمل كدا زيك
اخص عليكى يا تحيه منا اختك يا بت
ايوه طبعا يا اختى
جوزك جه اهو ...هاخد العيال و اشوحلك الكبده و اجيبهالك
انصرفت حميده و دخل عبدالشكور إلى تحيه الجالسه على السرير بجلبابها الاحمر
انا خلاص رديتك يا تحيه
تسلملى يا اخويا ...ربنا يخليك ليا...حقك عليا لو كنت زعلتك ...انت وحشتنى اوى يا عبده
نظر عبدالشكور لتحيه باندهاش شديد ... لا اصدق اذنى..... كيف تعتذر لى؟؟ هل الطلاق ادبها ؟ يا ليتنى ألقيت عليها اليمين منذ زمن بعيد حتى ينصلح حالها
خلاص يا تحيه حصل خير
بس انت مقولتليش يا اخويا كنت فين الفتره اللى فاتت دى كلها ؟؟
مش وقته دلوقتى يا تحيه هبقى احكيلك كل حاجه بعدين
انقضت الليله الاولى لرجوع عبدالشكور لزوجته و اصبح الصباح و استعد عبدالشكور للذهاب إلى عمله
انتظرت تحيه خروج عبدالشكور و ذهبت إلى حميده و شكرتها على العشاء الذي أعدته لهما و استضافه أطفالها و طلبت منها أن توقظهم
ليه يا تحيه ما تسبيهم نايمين يا اختى
لا كتر خيرك كفايه كدا ... اصلى هاخدهم و اروح مشوار كدا
مشوار ايه خير ان شاء الله ؟
خير يا حبيبتى ...لما اروح و ارجع هبقى اقولك
طيب يا اختى براحتك ...اصحوا يا عيال امكم عاوزاكم
تعالى يا عبدالله تعالى يا سعد انت و سامح يلا يا اسماء
على فين يا اما ؟؟
امشوا شويه هقولكم قدام لما نبعد عن المنطقه
اتجهت تحيه الى ترب السيده مباشره و معها أبنائها الاربعه
ايه دا يا اما انت موديانا على الترب ليه ؟
تعالوا يا اولاد ...اقعدوا هنا لما افهمكم
نعم يا اما
انتوا اربعه ما شاء الله و مصاريفكم كتير صح ؟
صح يا اما
و انتوا شايفين ابوكم على اد حاله و مش قادر يصرف عليكم كويس صح ؟
صح يا اما
طيب فيها ايه بقا لما تساعدوه ؟
و نساعده ازاى يا اما ؟
انتى مش قلتى يا اسماء أن عمك عبدالحميد عاوز اخواتك يشتغلوا معاه
ايوه انا سمعته بيقول كدا
و انت يا سامح قلت إن الراجل الغنى اداك متين جنيه حته واحده ؟
ايوا يا اما
طب يبقى خلاص انتوا بقا تسرحوا فى الترب هنا و ربنا يرزقكم ...كل ما تشوفوا حد جاى للميت بتاعه تروحوا جنبه و تدعوله دعوه ...ثواب يعنى و هو هديلكم اللى فيه النصيب
و اى فلوس هاتجبوها هتاخدوا نصها قولتوا ايه ؟
بس ابونا هيزعل مننا يا اما
و لا هيزعل و لا حاجه و بعدين ما هو خد الفلوس اللى جبتوها و جاب لكم بيها اكل يعنى لو هو مش موافق مكنش خدها
اقولكم ...انا مش هقوله على شغلكم دا و لا انتوا كمان تقولوا
بس انا مبحبش الترب يا اما و بخاف منها
خلاص يا اسماء انا هجيب لك شويه علب مناديل و تسرحى على الكورنيش أو اى حته فيها حبيبه ...أو اقولك انزلى المترو هتلاقى ناس كتير اوى تحن عليكى
بس يا اما
مبسش انا مبخدش رايك يا اختى ...اخواتك اللى اصغر منك هيشتغلوا انتى بقا هتقعديلى فى البيت ؟
اللى تشوفيه يا اما
بس اوعوا حسكم عينكم ابوكوا يعرف حاجه عن اتفاقنا ده
حاضر يا اما
كل يوم ترجعوا قبل ميعاده يعنى قبل ما تيجى الساعه سته تكونوا فى البيت
حاضر يا اما
يلا انا هسيبكم هنا ...مش تعرفوا ترجعوا لوحدكم برده ؟
ايوه يا اما نعرف
و انتى تعالى معايا يا اسماء اجيب لك شويه مناديل و انزلك المترو
عادت تحيه الى حجرتها و ظلت تنتظر على نار اولادها الاربعه
دقت الساعه الخامسه لتجد اولادها الثلاثه سامح و سعد و عبدالله يدخلون عليها و يحملون فى أيديهم اكياس سوداء كبيره
ها ...عملتوا ايه يا اولاد و ايه الكياس دى ؟
دى رحمة يا اما ....
اللهم صلى على النبى ...ايوا كدا خلى الخير يهل على اديكم
ها ...و جمعتم فلوس اد ايه ؟
اهو يا اما الفلوس اللى خدناها كلها ؟
ايه دا خمسين جنيه بس ؟
ما هو الناس كانت بتدينا جنيه اتنين كدا يعنى
لا يا اولاد شدوا حيلكم شويه انا عاوزه كل واحد فيكم يرجع بمية جنيه كدا على الأقل
حاضر يا اما
و البت اسماء مشوفتوهاش ؟؟
لا مشوفنهاش
بعد حوالى ربع ساعه حضرت اسماء هى الأخرى و فى يدها باقى المناديل
ها ...عملتى ايه يا اسماء و بعتى بكام ؟
بعت بعشره جنيه يا اما
نعم عشره جنيه دى ايه ؟؟ طول عمرك خايبه و مش نافعه فى حاجه ...شايفه اخواتك جايبين اكل اد ايه و فلوس اد ايه ؟
ايوه صحيح يا اما هاتى بقا نص الفلوس زى ما قلتيلنا
لا يا اولاد انا هحوشهالكم و لما يجمعوا مبلغ حلو كدا تبقوا تاخدوهم ...يلا يا عيال خدوا كلوا انتوا تعبتوا طول النهار و الباقى هنخبيه احسن ابوكم زمانه جاى ليعرف
أحضرت تحيه كرتونه كبيره ووضعت بها الفواكه و القرص و الفطير المتبقي ووضعتها تحت السرير و أحضرت كيس اسود و ملئته من خيرات الله و ذهبت لحميده
خدى يا حبيبتى شويه الفاكهه و القرص دى
ايه دا كله ؟؟ منين دا كله يا تحيه ؟
الله.... انتى لكى اكل و الا بحلقه؟ ما تاخدى و انتى ساكته يا حميده
اخص عليكى يا تحيه بتخبى عليا ؟ خايفه احسدك
لا ابدا يا حبيبتى دا جماعه قرايب عبدالشكور من البلد جم و جابولنا الحاجات دى .........مالك بتبصيلى كدا ليه ؟
قرايب ؟ و من امتى عبدالشكور له قرايب فى البلد يا تحيه ؟
بصى انا هقولك الحقيقه بس مش عاوزه اى حد يعرف الكلام اللى هقولهولك دلوقتى
قولى سرك فى بير يا حبيبتى
أخبرت تحيه حميده بكل شئ ...لمعت عينيى حميده و قالت
حلو اوى بس الشغل ده له أصول يا تحيه
اصول ايه بقا ؟
يعنى العيل لازم يكون لابس حاجه مقطعه و البت بنتك دى بالشكل ده مش هتصعب على حد
طب و بعدين هنعمل ايه ؟؟
لا دى سبيها عليا انا هخليهم شحاتين رسمى ...بس انا كنت عاوزه مساعدتك فى موضوع كدا
خير يا حميده موضوع ايه يا اختى ؟
متولى
ماله متولى ؟؟
عايزه الطشه من اللى اسمها سميره دى
ليه يعنى من جماله ؟ و الا من غناه ؟و بعدين دا عنده سبع عيال
لا هى كبرت فى دماغى عشان أادب المره اللى اسمها سميره دى و اعرفها مقامها
انا مش لازمنى فلوس انتى عارفه انى مش محتاجه و معايا قرش حلو ..بس انا عاوزه اكسر مناخيرها
طب انا هقولك بقا على حاجه تخليه يجيلك على بوزه
قولى يا حبيبتى بسرعه
شوفى بقا .....
#بنت_شوارع
#الجزء_العاشر
انا مش لازمنى فلوس انتى عارفه انى مش محتاجه و معايا قرش حلو ..بس انا عاوزه اكسر مناخيرها
طب انا هقولك بقا على حاجه تخليه يجيلك على بوزه
قولى يا حبيبتى بسرعه
شوفى بقا انا اعرف ست مبروكه اوى اسمها الشيخه حسنى الست دى ست طيبه اوى مبتعملش الا بالمحبه
انتى مجرباها دى يا تحيه ؟؟
اومال ...ما هو المحروس جوزى جت رجله بالطريقه دى و كل ما يتعوج عليا شويه اروح لها و اخد لها حاجه من قطره تعملى الشغل المظبوط و يرجع زى الخاتم فى صباعى
طب و انا هجيب حاجه من قطره ازاى ؟؟ ايوه عرفت سميره بتنشر غسيلها فى الحاره هلطش منه حاجه و اجيبها
لا مينفعش
و ايه اللى هيقل نفعه بس يا تحيه ؟
لازم يكون حاجه هو عرقان فيها ..يعنى فيها عرقه
بتصعبيها عليا ليه كدا يا تحيه ؟ انا مش هينفع اروح للمره دى بعد ما اتخانقت معاها
ملكيش دعوه بالحاجه دى انا هروح كانى رايحه اشكرهم أنه صلح بينى و بين جوزى و الطش لك حاجه من غسالتها
تمام يا اختى انشالله تسلمى
هروح انا دلوقتى زمان عبدالشكور جه هروح احط له البصاره اللى انا عاملاها و بعدين اروح لسميره
بصاره ؟؟؟ انتى يا وليه ايه مبتفهميش ؟
لا يا اختى بفهم و عشان بفهم بقولك هو ميستهلش الا البصاره ...يلا انا رايحه
ذهبت تحيه لإطعام زوجها و أخبرته أنها ستذهب لتجلس مع زوجه متولى لبعض الوقت
ذهبت تحيه و فى نيتها الغدر جلست مع سميره لتشكرها على ما قام به زوجها فى مشكلتها مع زوجها
قامت سميره لإعداد الشاى فانتهزت تحيه الفرصه و اخذت إحدى اغراض متولى الموضوعه بسبت الغسيل ووضعتها بسرعه فى صدرها
شربت تحيه الشاى و اخذت غرضها و انصرفت مسرعه إلى حميده
يلا يا حميده جبت لك الحاجه اللى قلت لك عليها اهيه
صحيح يا تحيه شاتره يا بت
يلا عشان نلحق نروح للشيخه حسنى
يلا يا اوختى
ذهبت تحيه و حميده إلى بيت الشيخه حسنى
امراه فى الخمسينات من عمرها ترتدى جلباب ابيض طرحه خضراء ...تضع حول رقبتها سبحه خضراء كبيره ..عيناها مرسومه بالكحل ....مرسوم على ذقنها وشم اخضر عباره عن تلات خطوط طوليه
تضع أمامها اناء من الفخار تنبعث منه رائحه البخور الطيبه
سلام عليكم يا ست حسنى
و عليكم السلام يا تحيه ...تعالى اتفضلى
احنا جايين لك يا ستنا علشان ..
عارفه يا تحيه جايين ليه ...و بقولك بلاش
بلاش ليه يا ستنا ؟
اصله مش لقطه يعنى و صاحب عيال
بس هى بتحبه يا ستنا
متكدبيش يا تحيه هى مبتحبوش
ايوه صح يا ست حسنى انا عاوزاه عشان اغيظ مراته اللى حرقت دمى و معرفتش ارد عليها
خلاص انتى حره يا حميده بس مترجعيش تعيطيلى هنا
لا مش هعيط بس اعمليلى حاجه تجبهولى على ملى وشه
طب هاتوا حاجه من قطره
اهو يا ستنا
اخذت حسنى قطعه الملابس من يد تحيه و سألت على اسم متولى و اسم والدته و اسم حميده و اسم والدتها
وضعت على وجهها شال كبير غطى وجهها و بدأت فى نطق ألفاظ غير مفهومه
بعد دقائق رفعت الغطاء من على وجهها و أحضرت ورقه و ريشه و مداد احمر
و كتبت على الورقه اسم متولى و حميده و اسماء والدة كل منهما فى دائره مع بعض الرموز الغريبه
طبقت الورقه و أعطتها لحميده و طلبت منها القائها فى الماء الجارى
حاضر يا ست حسنى ...كدا خلاص ؟
ايوا خلاص
طب و العمل ده أثره يبان امتى ان شاء الله ؟
تلات ايام بلياليهم و هتلاقيه جايلك و انتى بقى عليكى الباقى
تمام يا ستنا ...طلباتك ايه ؟
تحيه عارفه طلباتى
همست تحيه فى إذن حميده اديها متين جنيه
متين جنيه حته واحده ؟ مش كتير يا تحيه ؟
لا مش كتير ...دا كدا شويه كمان ...دا هتجيبه لكى من قفاه
اما نشوف
مالك يا حميده ؟ مستكتره الفلوس ؟
لا ابدا يا ست حسنى
خلى خالص انا عارفه انك جامده و القرش بيطلع منك بالعافيه
انا ؟؟؟ ازاى تقولى كدا دا انا حتى ....
خلاص يا حميده ملوش لازمه انا عارفاكى كويس ...يلا اتفضلوا
طب المتين جنيه اهم ....يلا يا تحيه
خرجت تحيه و حميده من بيت حسنى ..ظلت تحيه تصف لها مدى تمكن حسنى من عملها و مدى اتقانها فى العمل و حميده صامته لا تتحدث
مالك يا حميده من اول ما خرجنا من عند الست و انتى ساكته ؟
مفيش يا تحيه
لا فى ...قولى فيه ايه ؟
حاسه أن الست دى نصابه و ضحكت عليا فى المتين جنيه اللى خدتهم دول
و هى هتنصب عليكى عشان متين جنيه ؟
و هما متين جنيه شويه يا تحيه ؟ دا انتى يا اختى كنتى هتموتى على المتين جنيه اللى عبدالشكور جاب بيهم شاورما لعيالك
لا بس الست مش نصابه و انا مجرباها بنفسي ....يلا بس نرمى العمل زى ما قالت لنا فى الميه
هنشوف يا تحيه نصابه و الا مش نصابه
عادت تحيه و حميده الحاره كل إلى حجرته بعد اتفاق حميده مع تحيه انها ستحضر لها صباحا لتخبرها ماذا تفعل فى مظهر أطفالها حتى يساعدهم الناس بشكل أفضل
فى اليوم التالى انصرف عبدالشكور لعمله و حضرت حميده اخذت تنظر إلى كل طفل من الأطفال و تقترح على تحيه اقتراح
معندكيش لهم بناطيل قصرت عليهم مقطعه و فانلات
ايوا عندى بس مهربدين اوى
ما هو ده المطلوب هاتى هاتى
و الواد عبدالله هاتى حته شاشه تانيه غير الصغيره دى و غرقيها مكركروم و لفيها على دماغه كلها
البسوا يا عيال الحاجات المقطعه دى و فوقيها جلاليبكم و اول ما تقربوا للترب تقلعوا و تحطوا جلاليبكم فى كيس دا هيخلى الناس تديلكم فلوس اكتر
ارتدى الاطفال الملابس الممزقه و فوقها الجلاليب و انصرفوا و بقيت اسماء
طب و اسماء هنعمل معاها ايه يا حميده؟؟
اسماء بقا لازم نعملها حاجه تخليها تصعب على الناس
حاجه أية دى ؟
حرق كبير مثلا فى أيدها
لا حرق ايه بس ؟ كدا عبدالشكور هياخد باله
لا ما انتى تقوليله أن حله الطبيخ وقعت عليها
فكره برده
يلا سخنى سكينه كبيره على البوتجاز
هنا صرخت اسماء و هى لا تصدق أذنها
لا يا اما متحرقنيش بالله عليكى يا اما
متخافيش يا اسماء دا حرق صغير بس هيخلى الناس كلها تعطف عليكى و تديلك فلوس كتير ...و هديكى نصها زى ما اتفقت مع اخواتك يلا يا ستى
لا يا اما مش عاوزه اتحرق
متتكلميش معاها يا تحيه و امسكهالى ...السكينه احمرت اهيه
لا يا اما ...لو بتحبينى لا يا اما
منا عشان بحبك عاوزه اعمل فيكى كدا يا اسماء ....متخافيش ....انزلى من فوق السرير
قفزت اسماء من فوق السرير و هى ترتعد هجمت تحيه عليها لتمسكها لكن الصغيره افلتتها و مرت من بين يديها ....و اتجهت نحو الباب مباشرة و أطلقت قدماها للرياح هاربة من امها و جحيم امها
خدى يا اسماااااااء
#بنت_شوارع
#الجزء_الحادى_عشر
قفزت اسماء من فوق السرير و هى ترتعد هجمت تحيه عليها لتمسكها لكن الصغيره افلتتها و مرت من بين يديها ....و اتجهت نحو الباب مباشرة و أطلقت قدماها للرياح هاربة من امها و جحيم امها
خدى يا اسماااااااااء 😲...البت هربت يا حميده
متخافيش يا تحيه دلوقتى ترجع
هتقول لابوها على اللى كنا عاوزين نعمله فيها
ما تقوله ...انت محسسانى انك بتخافى منه يعنى.... و بعدين احنا هنكدبها متخافيش
يا ترى البت دى راحت فين دى فص ملح و داب
اكيد راحت لاخواتها مش تعرف تروح برده ؟
ايوه تعرف
خلاص زمانها جايه معاهم
لا انا قلبى واكلنى انا هروح اشوفها معاهم و الا لا
ذهبت تحيه إلى المقابر ... بحثت عن أبنائها و رأتهم من بعيد بملابسهم المهترئه يلاحقون كل من يدخل المقابر
وقفت بعيدا
ساااامح ...تعالى
نعم يا اما
مشوفتش اختك اسماء ؟
لا يا اما احنا سايبينها معاكى فى البيت ...هو فى حاجه حصلت ؟
لامحصلش انا رحت اوصل خالتك حميده و رجعت ملقتهاش
ما يمكن سرحت بالمناديل
لا منا لقيت المناديل زى ما هى افتكرتها جت لكم
لا و الله يا اما ...طب انادى على اخواتى و نيجى ندور معاكى ؟
لا لا خليكوا فى شغلكم انتوا تلاقيها راحت تجيب حاجه و زمانها جايه
رجعت تحيه الى حجرتها و الحيره تملأ عقلها و كلما مر الوقت زادت حيرتها أكثر فهى لا تعرف اين اختفت ابنتها ؟ و لا تعرف ما ستقوله لزوجها عن غيابها
عاد الأبناء فى الخامسه فاستقبلتهم بالسؤال
مشفتوش اختكم يا عيال ؟
هى لسه مرجعتش يا اما
لا مرجعتش
طب احنا هنروح ندور عليها حوالين المنطقه يمكن بتلعب هنا و الا هنا
روحوا دوروا ....بس هاتوا الفلوس اللى معاكم الاول احسن تقع منكم
خدى يا اما الفلوس اهى
كام دول يا سعد ؟؟
دول ٥٦ جنيه
بس ؟؟ طب يلا روحوا دوروا على البت بسرعه قبل ما ابوكوا يرجع
ذهب الاطفال ليبحثوا عن شقيقتهم فى كل مكان
عاد عبدالشكور بعد يوم متعب يجر أقدامه من التعب
استقبلته تحيه بالملابس السوداء مع ربطة الراس السوداء أيضا
الحقنا يا عبده
فى ايه يا تحيه ؟ مالك ؟
بنتك اختفت بينها اتخطفت
ايه ؟؟اتخطفت ازاى ؟؟ و انتى كنتى فين ؟
انا كنت نايمه و لما ملقتهاش قعدت ادور طول النهار انا و العيال مفيش فايده
انتى بتقولى ايه ؟؟ و مجتيش ليا الشغل ليه ؟ و مبلغتيش البوليس ليه ؟
بوليس ايه ؟ هو البوليس هيدور لنا على البت ؟ دا لازم يمر ٢٤ ساعه على غيابها
انا مستغربك و الله ايه البرود اللى انتى فيه ده ؟؟؟ انا هروح اقلب الدنيا على البت
خرج عبدالشكور كالمجنون ينادى بصوت مرتفع اسمااااااء اسمااااء
تجمع رجال الحاره حوله ليسألوا
فى ايه يا ابو سامح ؟
بنتى اسماء خرجت و مرجعتش من الصبح
ازاى الكلام ده ؟
البت اكيد اتخطفت عمرها ما غابت عن البيت و لا عملت كدا
فال الله و لا فالك متقولش كدا ...تلاقيها بتلعب هنا و الا هنا و الوقت سرقها ...احنا كلنا هندور معاك
و بحث الجميع عن أسماء حتى حميده و تحيه كانوا يبحثون و كأنهم لا يعلمون حقيقه هروبها
للاسف باءت محاولات الجميع بالفشل
لجأ عبدالشكور إلى الشرطه و قدم بلاغ اختفاء لابنته و أدلى بكل بياناتها و صوره شخصيه لها
عاد الاب المكلوم وهو فى حاله يرثى لها فلقد ظل طوال الليل يبحث عن ابنته دون جدوى
يا ترى انتى فين يا اسماء ؟؟ يا ترى بتعملى ايه دلوقتى يا حبيبتى ؟
اصيب عبدالشكور بانهيار كبير ، ارتفع ضغطه لدرجه انه أصيب بجلطة أدت إلى شلل نصفى مما ارقده بالسرير بائس يائس قليل الحيله
اما ابناؤه الثلاثه فأصابهم الهم و الغم على اختفاء اختهم و مرض ابوهم ...كانوا يجلسون حول أبيهم يبكون
تحيه الوحيده التى تمالكت أعصابها و ظهرت بمظهر قوى رغم بعض الدموع التى كانت تظهرها عند زياره الجيران لعبدالشكور
جمعت تحيه أبنائها و اعطتهم محاضره فى تحمل المسؤليه و أنهم أصبحوا اليوم رجال البيت المسؤلين عنه بعد وقوع ابوهم
طلبت منهم أن يوسعوا نشاطهم خارج المقابر ...فهى لم تفى باحلامها التى كانت تحلمها
اشارت إليهم بالتوجه إلى كورنيش النيل و إلى الاماكن العامه التى يكثر فيها الناس و حتى يبحثوا عن اختهم فى نفس الوقت
نفذ الاطفال ما طلبته منهم تحيه و أصبحوا يتأخرون ليلا حيث يبدأ خروج معظم الناس فى الليل
عبدالشكور كان يلاحظ كل ذلك الغياب و يتسائل بعينيه و يشير إلى تحيه بيده
الى أين يذهبون ؟ و لكن تحيه كانت تظهر الغباء و كأنها لا تفهم ماذا يريد
بعد مرور أسبوعين من حادث اختفاء اسماء
دخلت حميده على تحيه مضطربه
مالك يا حميده عامله كدا ليه ؟
اصل فى موضوع كدا يا اختى عاوزه اقولهولك ..عارفه أنه مش وقته بس مش عارفه اعمل ايه ؟
موضوع ايه يا حميده ؟
موضوع جوازى من متولى
ايه دا ؟ حصل امتى دا ؟
ما انتى عارفه يا تحيه ...الظاهر الست حسنى دى سرها باتع صحيح
مش قلت لك ...مش خساره فيها الفلوس
فعلا مش خساره ...بعد التلات أيام اللى قالت لى عليهم لقيته جاى ال ايه يطمن عليا .....من امتى و هو بيطمن عليا ؟
انتهزت انا الفرصه بقا و رميت عليه شباكى ...مخدش فى ايدى غلوه واحده و دلوقتى جاى و طالب الحلال
طب الف مبروك يا حبيبتى
انا جايه اقولك عشان مش عاوزاكى تزعلى
و ازعل ليه ؟ دا انا افرحلك ... ربنا يتم لك على خير يا رب
انا عارفه أن الظروف يعنى مش مناسبه
لا يا حبيبتى ربنا يتمم لك بخير
احنا هنعمل كدا قاعده على الضيق هنكتب الكتاب و ندخل
طب و مراته ؟؟ قالها ؟؟
لا مقلهاش بس اكيد هتعرف ساعة كتب الكتاب
يا خبر دى هتعملكم مشكله كبيره و يمكن توقف كتب الكتاب خالص
طب و بعدين ؟
انا رايى تكتبوا الكتاب عند الماذون عشان لو عرفت بعد كدا يبقى خلاص حطتوها قدام الأمر الواقع و تخبط دماغها فى الحيط
تصدقى صح ...عندك حق يا تحيه ...الا مفيش اخبار عن أسماء ؟
لا و الله ...و كل شويه اروح القسم اسال و مفيش فايده
خير أن شاء الله ربنا يرجعهالك بالسلامه يا حبيبتى
يا رب يا حميده
بقولك ايه يا تحيه ؟؟ ما تروحى يا اختى للشيخه حسنى تساليها عن بنتك يمكن تعرف طريقها
تفتكرى هتعرف ؟
ايوه دى سرها باتع ...على الأقل حتى تطمنك عليها
و الله فكره انا ازاى مجاش فى دماغى فكره زى دى ؟ هقوم اروح لها حالا
ارتدت تحيه جلبابها و ذهبت إلى الشيخه حسنى لتسألها عن ابنتها
نظرت إليها حسنى بغضب
انتى جايالى ليه يا تحيه ؟
عاوزه اعرف بنتى راحت فين ؟
بنتك اللى كنتى عاوزه تحرقيها و هى حيه ؟
انا ...انا ...
انتى واحده طماعه و مش هتشوفى خير ابدا
طب معلش متعرفيش تدلينى عليها فين ؟
حتى لو اعرف مش هدلك
ابوس ايدك يا ستنا دا ابوها راقد فى البيت جتله جلطه من حزنه عليها
لو عاوزه تعرفى هى فين لازم افتحلك المندل
افتحى يا اختى ...انا موافقه و تحت امرك
لا ...مش دلوقتى انتى تجيلى يوم الجمعه بعد العصر و تجيبي معاكى ابنك الصغير
ابنى ؟ قصدك عبدالله ؟ طب ليه؟
هو اللى هيشوف
طب مينفعش انا اللى اشوف
لا ...لازم طفل صغير مبلغش الحلم
طيب خلاص هجيبه و اجى يوم الجمعه باذن الله 😔
يتبع
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
تعليقات
إرسال تعليق