#زوجة_أبى
#الجزء_السابع
ابويا اخد الفلوس من سنيه و اشترى بيها بضاعه كتير اوى خزنها فى شقة امى الله يرحمها
و بعد حوالى شهر اخد قرض بعشر آلاف جنيه و يتسدد على خمس سنين
سنيه اول ما شافت الفلوس اتهبلت و بقت عنيها تلمع و قالت له
عبوووودى
نعم يا روح عبودى
مفيش حاجه كدا للجمل حبيبك
انا و كل مالى ليك يا جملى يا صغير انت
طب علشان ذوقك ده عندى لك خبر بمليون جنيه
خبر ايه دا ؟؟ قولى يا وش الخير
انا حامل يا عبده ...هجيب لك ولى العهد
معقوله ؟؟..حامل ؟؟ انتى مش قلتيلى انك مبتخلفيش ؟
لا انا قلت لك انا مخلفتش م المرحوم مع انى قعدت معاه خمس سنين الظاهر العيب كان منه بقا ....ايه هو انت مفرحتش و الا ايه ؟؟
لا ابدا ...فرحت طبعا
لا اخص عليك ...شكلك زعلان ..بقا انا بقول دا هيبقى ولى عهدك اللى هيكون ايدك و رجلك و تكتب اسمك و اسمه كدا على اليافطه
و الله ما زعلان و لا حاجه هو انتى هتزعلينى بالعافيه
لا يا اخويا خلاص كسرت فرحتى اهئ اهئ اهئ
يا ستى حقك على و ادى ايدك ابوسها
لا ما انت مش هتضحك على بالكلمتين دول
طيب انا تحت امرك يا حبيبتى اللى تقولى عليه هعمله
انا كنت شفت غوشتين دهب كدا عجبونى اوى و كنت نفسي تشتريهم لى
عنيا ليكى يا سنيه ..طب مش تستنى شويه عقبال بس ما ابيع البضاعه و ابقى اجيب لك اللى عاوزاه
اخص عليك بقى بتبخل على ...لا لا لا مكنتش اتصور منك كدا بقا انا مسلماك محلى و اديتك الألفين جنيه بتوعى و انت مستخسر فى غوشتين مكنش العشم
سنيه سابت ابويا و دخلت جرى على الاوضه و قعدت تعيط بصوت عالى اوى
اه يا حظى الاسود يا اما .... جوزى اللى بحبه و احب له الخير مستخسر فى غوشتين ....جوزى اللى بقوله هخلف لك الولد مستخسر فى كام الف ....اه يا خيبتى ياانى
ابويا قام وراها و قعد يطبطب عليها
متزعليش بقا يا سنيه
لا اوعى ايدك دى متحطهاش على ..انا زعلانه منك
طب حقك على يا ستى
يا سلام يا اخويا...و لا حق و لا حاجه انا خلاص اش عاوزه منك حاجه مكنتش اعرف انك بخيل كدا .....الله يرحمك يا حاج خيري كان بيجبلى الدهب كدا من غير حتى ما اطلب منه
لا لا ازاى ؟؟ انا هجيب لك اللى تشاورى عليه ...بكرا يا ستى هاخدك و نروح نشترى اللى عاوزاه ...خلاص متزعليش منى بقا ....يلا بقا عشان نتعشي
لا مش عاوزه اكل
ليه يا حبيبي ؟؟
نفسي غمه على و نفسي فى التين البرشومى يا عبده
عيونى ليكى يا روح عبده هجيب لك التين البرشومى من تحت الارض
تانى يوم ابويا اخد سنيه و راح اشترالها دهب كتير اوى حوالى ٦ غوايش و جنزير كبير فى رقبتها و اربع خواتم كبيره بفصوص كبيره
و لقيتها داخله فرحانه اوى و عماله تشخلل بالغوايش و لقيت ابويا زعلان
سنيه قعدت تقوله شايف يا عبده الغوايش هتاكل من ايدى حته
مبروكين عليكى يا سنيه
و مالك بتقولها كدا من تحت الضرس
لا و لا من تحت الضرس و لا من فوقه بس مش كنا خلينا الفلوس اللى جبنا بيها الدهب دا كله و اشترينا بها بضاعه؟
جرا ايه يا راجل هو احنا مش متفقين امبارح انك هتجيب لى دهب ؟
ايوه متفقين بس كنت فاكر أن الحكايه مش هتتعدى الألفين جنيه لكن نجيب بسبع آلاف جنيه دهب ؟؟؟ يعنى فلوس القرض تقريبا ....ما انتى عارفه انى مش واخد العشره كلهم و أنهم خصموا ٥٠٠ جنيه مصاريف اداريه... يعنى دلوقتى مبقاش معايا الا الفين و نص بس هيجيبوا ايه دول ؟؟
يا سلام هو دا اللى مزعلك ....و لما خدت منى الألفين جنيه انا مزعلتش ليه ؟؟ منا كنت اقدر ساعتها اشترى بيهم دهب لكن أنا بديتك عن نفسي ...على العموم الدهب اهو لو عاوز ترجعه رجعه
لا و لا هرجعه و لا حاجه ...خلاص اشترى بالباقى بضاعه و امرى لله
لا انا عاوزه ٥٠٠ جنيه
و ليه بقا ؟؟؟؟
انت ناسي أن جايلنا بيبي صغير عاوزه اشتريله شويه حاجات كدا ...لبس و لعب و شويه حاجات
طب ما تستنى شويه يا سنيه
عارف يا عبده لو كنت اعرف انك بخيل كدا عمرى ما كنت اتجوزتك
دا كله و بخيل ياباى عليكى ...خدى يا ستى الخمسمية جنيه أهم و متنسيش تشترى للبنتين كل واحده غيار معاك احسن لبسهم صغر عليهم و بقا شكلهم وحش اوى
لا يا حبيبي الفلوس دى بتاعه ابنى بس ...عاوز تجيب لولادك خدهم هات لهم انا مليش دعوه
ابويا بص لها كدا و سكت
مرت الايام و سنيه يوم عن يوم تستقطع فى ابويا و تاخد فلوسه و هو مبيرفضش لها طلب
و كانت متقله علينا اوى فى شغل البيت ..كانت بتتفنن فى انها تشغلنا عندها خدامات و كانت دايما تشتم فينا و تحاول تبعدنا عن المذاكره بكل طريقه ..
بس انا برده بالرغم اللى كانت بتعمله كنت بذاكر أن شالله بعد ما هى تنام و كنت اذاكر لاختى و دايما اقولها افتكرى ماما يا سعاد و ازاى هتبقى فرحانه بينا اوى لما ننجح
فاتت التسع شهور و سنيه خلفت ولد ...و مش قادره اقولكم اد ايه كانت بتدلع على ابويا اول ما خلفت الولد ...زى ما يكون محدش فى الكون خلف زيها
و كانت عايزه تقعدنى من المدرسه عشان اشيل اخويا سامح ...لكن أنا قعدت اعيط و ابوس فى ايد ابويا و رجله أنه ميقعدنيش لحد ما وافق بالعافيه ...و كانت بتقنعه ساعتها أن البنت فى الاخر ملهاش الا بيتها و جوزها يبقى لازمته ايه بقا الخروج و الدخول على الفاضى
خاصة انى كنت طويله و فرعه و اللى يشوفنى لا يمكن يدينى سنى ابدا ....و مع موت امى كمان و تحملى لمسؤليه اختى دا كبرنى زياده عن اللزوم 😔
و فى يوم سعاد اختى لقتها بتعيط اوى فسألتها بتعيطى ليه يا سعاد ؟؟؟؟
قالت العيال عمالين يعيبوا على شنطتى و مريلتى المقطعه
طب متزعليش انا هقول لبابا يجيب لك شنطه و مريله جداد
صحيح يا سندس ؟؟
ايوه طبعا صحيح
هنا دخلت الست سنيه المستخبيه و قالت هو ايه اللى صحيح يا ست سندس ؟؟
سكت و مردتش عليها
انا مش بكلمك يا بت انتى؟؟
سعاد خافت لسنيه تضربنى و قالت لها أن انا هقول لبابا على شنطه و مريله جداد لها
هنا لقينا سنيه هاجت و ماجت و قعدت تشتم و تقول أصل انتوا معندكوش دم ...أصل انتوا مش شايفين ابوكوا حاله عامل ازاى.... اصل ...اصل ....و ختمت زعيقها بالتهديد و الوعيد أننا منقولش لابونا و أن إحنا لو نطقنا هتسود عيشتنا اكتر ما هى سودا
و راحت خارجه و سيبانا .....لقيت سعاد عماله تعيط و تقول انا مش عاوزه اروح المدرسه تانى يا سندس
لأ متقوليش كدا يا سعاد ...انتى عاوزه ماما تزعل منك
متخافيش انا هتصرف و هجيب لك الشنطه و المريله اللى عاوزاهم
طب و سنيه لما تشوفنى معايا شنطه و مريله جداد هقولها ايه يا سندس ؟؟
ملكيش دعوه انتى ....انا هقولها أن الاخصائيه نادتك لما لقت هدومك و شنطتك مقطعين و ادتك شنطه و مريله جداد .
صحيح يا سندس ...ربنا يخليكى لى يا اختى طب هتجبيهم لى امتى ؟؟🤔🤔
بكرا هاخد فلوس و نروح لعم وجيه اللى على باب الشارع بعد المدرسه و اجيبهم لكى .
ربنا يخليكى لى يا سندس 😍😍
تانى يوم طلعت اكل الفراخ و اجيب الفلوس عشان اجيب لسعاد الشنطه و المريله زى ما وعدتها
و لسه بمد ايدى فى الصفيحه لقيت سنيه فوق دماغى 🥺🥺🥺🥺🥺🥺🥺🥺🥺🥺🥺🥺🥺🥺🥺🥺
#د.جيهان_عادل🤨
#زوجة_أبى
#الجزء_الثامن
تانى يوم طلعت اكل الفراخ و اجيب الفلوس عشان اجيب لسعاد الشنطه و المريله زى ما وعدتها
و لسه بمد ايدى فى الصفيحه و اطلع الفلوس لقيت سنيه فوق دماغى 🥺
ايه داااااااا ...ايه الفلوس دى كلها يا حراميه ؟؟
انا مش حراميه دى فلوس امى الله يرحمها
امك مين ؟؟ هى امك كانت لاقيه تاكل ؟؟ و انا برده بقول الفلوس اللي بعينها بتروح فين ؟؟ أخص عليكى بنت
و الله ما سرقت منك حاجه دى فلوس امى
هاتى ورينى يا حراميه سارقه منى كام ؟؟
يا لهوى سارقه ٩٥٠ جنيه ؟؟😲 دا انا هكسر عضمك يا حراميه يا بنت الكلب
و الله ما سرقت حاجه دى فلوس امى 😰
فلوس امك ؟؟ دا انا هوديكى الأحداث يا حراميه يا عديمة التربيه ...و دينى ما انتى قاعده فى البيت دا تانى
و الله ما خدت حاجه منك ....و الله ما عملت حاجه
ابدااا لازم اوديكى الأحداث عشان تتربى
لأ الله يخليكى متودنيش الأحداث انا مسرقتش حاجه
دى فلوس امى كنت عايناها
اخرسي يا بت متقوليش فلوس امى ....اعترفى انها فلوسي و مش هعملك حاجه
بس هى مش فلوسك يا خالتى سنيه
سنيه اتنرفزت و نزلت تلطيش على وشى
خلاص خلاص يا خالتى فلوسك ..ايوه فلوسك
ايوه كدا اعترفى يا حراميه كنت حاسه برده أن فلوسي بتنقص و كل ما احط حاجه ملقهاش بس مجاش فى خيالى انك حراميه و رتيبه معرفتش تربيكى ...انا بقا هقول لابوكى يقطع من جسمك نساير ...و هقعدك من المدرسه تخدمى اخوكى
لا و النبى يا خالتى متقعدنيش من المدرسه ابوس ايدك و متقوليش لابويا
انا ممكن مقولش لابوكى ...بس ااا
بس ايه ...هعملك اى حاجه تقولى عليها
تصدقى صعبتى عليه يا سندس 😏 خلاص انا مش هجيب سيره لابوكى و دا هيفضل سر بينى و بينك يلا قومى يلا انزلى ع المدرسه و لما تيجى لنا كلام تانى مع بعض
طبعا بعد كدا لما كبرت عرفت ازاى سنيه ضحكت على و لهفت فلوس امى و حسستنى انها عامله جميله فى
نزلت رحت المدرسه و اخدت اختى فى ايدى و سالتنى
انتى جبتى الفلوس يا سندس و هتجبيلى المريله و الشنطه انهارده ؟؟
ربنا يسهل يا سعاد يلا بس أجرى بسرعه اتأخرنا على المدرسه
بقي صعبان على اختى اوى ...و كنت خايفه اقولها على اللى حصل بينى و بين سنيه مترضاش تروح المدرسه تانى ...قعدت افكر و هدانى تفكيرى انى اروح للاخصائيه فعلا
دخلت على الاخصاىيه و انا مكسوفه جدا بس هى صراحه كانت ست لطيفه اوى وشها سمح جدا و اسمها ابله نادره
هى لاحظت على الإحراج راحت نادتنى من على الباب و قالت
تعالى يا حبيبتى ...اسمك ايه
أسمى سندس
فى سنه كام يا سندس ؟؟
فى خامسه ابتدائى يا ابله
طيب يا حبيبتى قولى عاوزه ايه ؟؟
طبعا كنت محرجه و باين على جدا ...دى اول مره أمد ايدى لحد ... بس كان كل هدفى ان اختى متسبش المدرسه و فى الحاله دى هتشتغل خدامه لسنيه و ابنها
الاخصائيه طبطبت على و طمنتنى
و بدأت احكيلها على كل حاجه من اول ما ابويا اتجوز على امى و موت اخويا و قهرة امى عليه و معامله سنيه لينا و استخسارها فينا اللقمه
الاخصائيه قعدت تسمعنى و كان باين على وشها التأثر اوى
و لقيتها بتقولى روحى ناديلى اختك من الفصل
روحت ناديت سعاد ...اول ما شافتها طبطبت عليها و باستها و قالت لنا انا عاوزاكوا تيجوا لى بعد انتهاء اليوم الدراسي
و فعلا روحنالها اخدتنا و راحت اشترت لى و لاختى شنطه و مريله جديده ...وقالت لنا انا زى ماما و لو احتجتوا اى حاجه متتكسفوش منى ...انا معنديش ولاد و من هنا ورايح انتوا ولادى ..و راحت وخدانا فى حضنها و شاورت لنا على بيتها علشان فى اى وقت لو احتجناها نروح لها
لأول مره بعد موت امى الله يرحمها نلاقى يد رحيمه تطبطب علينا ...لاول مره نحس بحضن دافى يحسسنا أننا لسه بنى ادمين عايشين على ضهر الدنيا
لما روحنا لسنيه و شافت الحاجات اللى معانا ... راحت مسكانى من هدومى من عند رقبتى و قالت
انتى جبتى الحاجات دى منين يا حراميه ؟؟ لسه معاكى فلوس من اللى سرقتيها منى ؟؟ انطقى يا بت هطلع روحك انهارده
سعاد اختى لما شافت سنيه بتعمل كدا صرخت و قالت لا يا مرات ابويا ...دا الأبله نادره هى اللى اشترتهالنا
سنيه سابت رقبتى و مسكت دراع سعاد ابله نادره مين يا بت ؟؟
الاخصائيه الاجتماعيه يا مرات ابويا
الله الله و كمان شحاتين ....رحتوا فضحتونا قدام الناس دا انا هسود عشيتكم يا شحاتين يا حراميه ...و دينى لخلى ابوكوا يرزعكوا علقه و الا مش هبات له فى البيت انهارده
معلش و النبى يا مرات ابويا مش هنعمل كدا تانى
سنيه سكتت لحظه كدا و عينها لمعت و قالت خلاص ...بس لما ابوكوا يشوف الحاجه دى هنقول جبناها منين ؟؟
طب خلاص انا هقوله انى اشتريتها لكم عشان ميضربكمش
بصيت لها كدا و سكت
يلا يا اختى انتى و هى ادخلوا غيروا هدومكم و فى شويه بناطيل لسامح اغسلوهم و شطبوا المطبخ فى كوم مواعين فى الحوض
دخلنا غيرنا هدومنا و شطبنا المطبخ لسنيه ...و لما سعاد قالت لها انها جعانه قعدت تنفخ و جابت لنا عيش ناشف بايت من امبارح و حته جبنه صغيره
أكلنا انا و اختى و قعدنا نذاكر فى اوضتنا
بعد شويه ابويا جه و استقبلته سنيه بالترحاب زى كل يوم
و ورته و هى فرحانه الشنط و المرايل و انها نزلت مخصوص انهارده جابتهم من فلوس جات لها من جمعيه
وورته تلات غوايش جداد اشترتهم انهارده ....طبعا بفلوس امى اللى لهفتهم منى
ابويا كالعاده فرح اوى و قعد يقولها كتر خيرك يا سنيه ...و الله انتى اللى بتعمليه مع البنات و لا اكنك جايباهم من بطنك
الله امال ايه يا عبده ...اخص عليك متقولش كدا ..بس ايه رايك فى غوايشى الجديده ؟؟
حلوين اوى تعيشي و تجيبي يا حبى
بعد كدا مرت الايام و اتوثقت علاقتنا بابله نادره و كنا بنروح لها كتير فى المدرسه تأكلنا و تذاكر معانا و تجيب لنا حاجات حلوه ...... كنت بشوف فيها امى اللى اتحرمت منها و هونت علينا كتير من اللى سنيه بتعمله فينا
مرت الايام و اخدت الاعداديه بمجموع كبير و طول الفتره دى منقطعتش علاقتى بابله نادره لا انا و لا اختى سعاد
لما جبت المجموع كنت فرحانه اوى انى هدخل ثانوى عام و هدخل كليه حلوه و احقق امل امى اللى كانت بتحلم بيه
لكن للاسف سنيه دايما كانت وقفالى فى طريقى ..و قعدت تقنع ابويا انها مصاريف ع الفاضى و أن البنت مسيرها للجواز...... و لما صعبت على ابويا و قالها بس البت متشعلقه فى الثانوى و جايبه مجموع حلو خساره ...يمكن تطلع دكتوره و الا مهندسه
سنيه دبت خناقه كبيره مع ابويا و هددته بأنه لو عمل اللى فى دماغه و دخلنى الثانوى هتسحب المحل منه و هتاخد بيتها و هتطرده من كل حاجه
ابويا زى ما يكون اول مره ياخد باله إن سنيه فعلا بقا معاها كل حاجه ...البيت و المحل ...حتى محله اللى لسه باسمه مديون بقرض مش هيعرف يسده لو سنيه نفذت تهديدها و طردته صحيح
ابويا قعد موطى رأسه فى الارض زى اللى غرق دراه
مش عارف يتصرف ....بقى بين نارين ...نار مراته اللى هتاخد منه كل حاجه بما فيهم ابنه كمان و نار أنه يكسر بخاطرى
و طبعا اختار الأسهل له 😔 و دخلنى صنايع تلات سنين
دخلت الصنايع و هناك قابلت هدير اللى علمتنى حاجات عمرى ما كنت اتخيل انى اعملها فى حياتى .
يتبع .......
#د.جيهان_عادل🤗
#زوجة_أبى
#الجزء_التاسع
معلش يا جماعه النت عندى قاطع و يدوب بنشر القصه على الباقه من عند ابنى مش عارفه ارد على اى تعليق ادعولى النت يجى بسرعه 😍😍😍😍😍
دخلت الصنايع و هناك قابلت هدير اللى علمتنى حاجات عمرى ما كنت اتخيل انى اعملها فى حياتى .
انا فاكره اول يوم لى فى المدرسه دى و اد ايه كنت زعلانه انى دخلتها. ..و كنت واقفه لوحدى بعدين دخلت الفصل و قعدت فى اخر تخته جت جنبى بنت قصيره شويه و جسمها مليان ...و قالت لى
فى حد قاعد جنبك ؟؟
لا .... مفيش
انا هدير و انتى اسمك ايه ؟
أسمى سندس
الله اسمك حلو اوى الظاهر هنبقى صحاب يا سندس
هزيت لها راسي كدا ...و هى بقا بدأت تحكيلى عن نفسها و عن عيلتها و ازاى أن أمها اتطلقت من ابوها و هى لسه فى بطنها و انها عمرها ما شافت ابوها ...و ان اللى بيربيها جوز امها و امها و أن لها تلات اخوات منهم اتنين توأم
و قعدت تحكيلى ازاى جوز امها ساعات بيقسي عليها و أنه دخلها صنايع بالرغم انها جايبه مجموع ثانوى بس هو قال مش هصرف عليكى فى ثانوى كفايه انى بربيكى
قعدت اسمع لها و حسيت انها مظلومه زيى فى حاجات كتير انا محرومه من آلام و هى محرومه من الاب ....هى لها زوج أم و انا لى زوجه اب ....زوج أمها غصبها على الصنايع و زوجه ابويا غصبتنى انا كمان على الصنايع
من هنا اتوطدت علاقتنا سوا و بقينا زى الاخوات و كل اسرارنا مع بعض .
هدير كانت بتجيب معاها اكل و كانت بتقسمه بينى و بينها كمان كانت بتقسم مصروفها فى أحيان كتير معايا ..لأنها عارفه أن سنيه مكنتش بتدينى لا مصروف و لا سندوتشات...😔
و ابتدت هدير تجيب مكياج معاها المدرسه و تخلينى احط روج زيها بعد المدرسه....كمان علمتنى اشيل الطرحه و أبين جزء من شعرى و انا ماشيه
و لما كنت احكيلها عن سنيه و افتراها على و على اختى كانت تقولى اعمل فيها مقالب عشان انتقم منها و انا كنت بنفذ زى الاله ...و كنت بفرح اوى لما الاقى مقلبى نفع فى سنيه
انا فاكره اول مره هدير تقولى على حكايه المقالب دى كانت سنيه منكده على كعادتها و رحت اشتكى لهدير و فى وسط الكلام قلت لها إن سنيه و ابويا عاملين عزومه كبيره اوى لتجار السوق و انها مكنتش عاوزانى اجى انهارده علشان اقعد اساعدها فى العزومه ..و انى لما قلت لها انى مقدرش اغيب لأن عندى امتحان ..اتغاظت جدا و قالت لى يبقى مترجعيش البيت ....و انا فعلا مش عاوزه اروح البيت دا تانى
هدير بصت لى كدا و قالت ما انتى هبله
ليه بتقولى كدا يا هدير ؟؟
انا لو منك انتقم من سنيه دى
تنتقمى ازاى يعنى؟؟؟
انتى مش بتقولى انها عامله عزومه كبيره انهارده و عماله تحضرلها من امبارح
ايوه
طب خلاص انتى اللى عليكى تحطى كميه كبيره من الملح فى كل الاكل اللى عاملاه الست هانم و بكدا هتحرقى دمها و تكسفيها قدام الناس
و فعلا نفذت خطه هدير و خليت سنيه مش واخده بالها و حطيت كميه كبيره من الملح على اللحمه و الكفته و الارز و المكرونه و لسان العصفور و الملوخيه و السلطه
سنيه فرغت الاكل فى اطباق صينى من الغالى وقدمت للتجار الاكل و هى مبتسمه اوى
ابتدى التجار ياكلوا ...و اللى ياخد معلقه من حاجه ميكررهاش
سنيه قالت هو فى ايه الاكل مش عاجبكم و الا ايه ؟؟
الناس سكتت
اتفضلوا يا جماعه الاكل هيبرد
واحد من التجار قال اصل احنا فطرنا متأخر و مش حاسين بجوع
كل التجار وافقوا كلامه و قالوا ايوه صح دا اللى حصل
سنيه رجعت الاكل كله و لسه بتدوقه لقته حادق مش
يا خبر الاكل حادق كدا ليه ؟؟؟
و الحمد لله سنيه مجاش فى بالها انى اعمل فيها كدا ابدا
و طبعا كسفتها مكنتش تتقدر و بقت تكلم روحها و تقول دى اول مره تحصل ....ازاى حصل كدا
و ابويا يومها اتحرج اوى من الناس ..... و بقا سيرة العزومه دى على كل لسان .
مره تانيه هدير خلتنى احط لسنيه بودره اسهال فى طبق الرز بلبن بتاعها و طبعا أكلته و هى مش واخده بالها ....و بدأت بقا تسهل لغايه ما كانت هتموت😂😂😂
مره تانيه سنيه كانت مضيقانى اوى اوى و كانت ضاربه سعاد اختى ...رحت لهدير و طلبت منها تفكرلى فى مقلب حلو لسنيه
هدير قالت لى عندى مقلب حلو عملته فى جوز امى قبل كدا بس مش عارفه هينفع مع سنيه و الا لا
طب قولى يا هدير
انتى تجيبي بودره عفريت و ترشي منها على سريرها و فى هدومها تيجى تنام الشويه اللى بتنامهم بالنهار هتقعد تهرش زى الجربانه ... تكونى ايه بقا محضره شويه ميه بصابون كدا حلوين مغرقه بيهم الحمام .... هى بقا مش هتقدر و اكيد هتقوم تستحمى ...تقوم واقعه متزحلقه يمكن يتكسر رقبتها
و لو سالتك بعد كدا قوليلها كنت همسح الحمام يا مرات ابويا 😂
طب و جوز امك حصله ايه ؟؟
محصلوش حاجه يا اختى ..مفيش غير أن رجله و أيدوا اتجلفوا و خلاص
الفكره عجبتنى اوى و نفذتها ...و سنيه قامت تهرش وتقول اكلان فى جسمى ....اكيد فى حشرات من الفراخ و الحمام اللى فوق ...انا هوريكى يا سندس علشان مبتنضفيش لهم كويس
و نادت على و زعقتلى و قالت اطلعى يلا نضفى عند الفراخ على مااخد دش
قلت حاضر
سنيه كانت متنرفزه و قامت بسرعه ع الحمام و راحت هوب متزحلقه ع السيراميك ....وقعت أيدها و رجلها اتكسروا و قعدت تصرخ و مكنتش قادره تقوم من مكانها
انا بقا كنت سامعاها من منور البيت و انا واقفه فوق السطح و قعدت اضحك عليها و اقول دوقى اللى بتعمليه فينا انا و اختى
سنيه فضلت تنادى على انا و سعاد ..و لأجل حظها الزفت سعاد كانت نزلت تشتريلها خضار
و انا كنت سامعاها بس عملت نفسي مش سامعه ...فين و فين لما نزلت لها كانت اتسندت على رجل واحده و قعدت فى الصاله و قاعده تعيط من الالم
نزلت من فوق و كأنى مسمعتهاش ...اول ما شافتنى صرخت فى وشي
كنتى فين يا زفته ياللى ربنا ينتقم منك
رديت عليها بكل برود ...كنت فوق بنضف للفراخ زى ما قولتيلى
و مسمعتنيش و انا بنده عليكى كل ده ؟؟
لا 🤨
طب و ايه اللى خلاكى تغرقى الحمام صابون يا زفته ؟
منا كنت عاوزه انضفه يا خالتى 😏
طب امشي يا بت ....بسرررعه نادى لى ابوكى ....ايدى و رجلى مش حاسه بيهم بينهم اتكسروا جتك كسر رقبتك يا بعيده
حاضر يا خالتى ...فوريره
و نزلت ع السلم و انا عماله اضحك عليها ....
اد ايه كنت بكون مبسوطه اوى لما كنت بعمل فيها مقلب و ينجح ...كنت بحس انى بخلص منها ذل سنين لى و قهرة امى اللى ماتت بسببها
رحت لابويا ناديته و قلت له إن سنيه وقعت على ارضيه الحمام اتزحلقت ...ابويا جه جرى و كان معاه سامح اخويا ...لانه بيطلع من المدرسه يقعد مع ابويا فى المحل و يلعب شويه و بعد كدا ابويا يبعته مع صبى من صبيان المحل لسنيه
ابويا اول أما وصل لسنيه بقت تصرخ و تقوله شفت مقصوفه الرقبه عملت ايه ؟؟؟ مغرقالى الحمام صابون
- اكيد مش قصدها يا سنيه ...تلاقيها كانت عاوزه تمسحهولك
- و هو انا كنت طلبت منها تمسحهولى ؟؟؟ من امتى و انا بخليها تعمل حاجه هى و الا اختها ؟؟؟
- طب معلش هى اكيد كانت عاوزه تساعدك يا حبيبتى
و انا أقوله ايوه صح يا ابويا هو انا لى بركه الا خالتى سنيه 😂
سنيه بقت تبصلى و هى متغاظه منى و تشاورلى من ورا ابويا كدا انها هتورينى
و انا بقا عامله نفسي حمل وديع😇😇 مكنش قصدى اى حاجه 😂
ابويا اخد سنيه و راح جبس لها أيدها و رجلها و رجعت شبه العمده الآلى 😂😂
بقت حتى مش قادره تروح الحمام لوحدها
طبعا تعبتنى انا و اختى فى الفتره دى بزياده ...بس معلش كله يهون فى سبيل انى افش غلى فيها 🤣🤣
و فى يوم لقيت هدير جايه تقولى تعالى يا سندس عاوزاكى فى حاجه مهمه
خير يا هدير ؟؟؟
#د.جيهان_عادل🤗
#زوجة_أبى
#الجزء_العاشر
و فى يوم لقيت هدير جايه تقولى تعالى يا سندس عاوزاكى فى حاجه مهمه
خير يا هدير ؟؟؟
بقولك ايه ما تيجى نزوغ من المدرسه انهارده
نزوغ ليه؟؟؟ و بعدين انتى نسيتى أن عندنا انهارده استاذ ابراهيم بتاع العملى وأنه دايما بينبه أننا منغبش
ما هو عشان ابراهيم دا عاوزين نزوغ ..بيقعد يفرقنا ... يملى الدرس فى خمس دقائق و بعد كدا يخلينا نكنس الورشه و نرشها ..و يخلق لنا الشغل من تحت الارض
طب يا فالحه لو زوغنا هنروح فين ؟؟ و هنعمل ايه ؟؟
ملكيش دعوه انتى بس ....ها ..موافقه تزوغى معايا ؟؟
بس يا هدير انا خايفه ...اول مره اعمل كدا
متخافيش ....و مش هتكون اخر مره أن شاء الله 😂
هتسالونى طب ليه مرفضتش طلب هدير منى ؟
هقولكم معرفش ...يمكن حسيت انه نوع تانى من الانتقام من سنيه ..انى اغفلها و اروح مكان تانى غير المدرسه و اتفسح و اتبسط بعيد عنها
طلعنا انا و هدير من الطابور و اخدتنى من ايدى و طلعنا نجرى
ايه يا هدير ....بالراحه شويه بتجرى ليه كدا ؟؟
يلا بسرعه يا سندس صلاح مستنينا
وقفت و بطلت جرى ....صلاح مين يا هدير ؟؟
تعالى بس يلا هفهمك كل حاجه
لا يا هدير ...مش هتحرك من هنا الا اما تفهمينى
يا ستى صلاح دا واحد جارى هنروح نقابله
طب وواخدانى معاكى ليه ؟؟
ما هو صلاح جايب معاه واحد صاحبه اسمه محمد ...قلت انتى اولى من غيرك بالموضوع ده
لا يا هدير انا عمرى ما عملت كدا ابدا .....انا هرجع المدرسه
لا و النبى يا سندس ..أخص عليكى هتسبينى اروح لوحدى ...اهون عليكى ..دا انا صاحبتك الوحيده
بس يا هديييير
مبسش و النبى ...هما خمس دقايق بس صلاح هيدينى هديه عيد ميلادى و هنمشي على طول
عيد ميلادك ؟؟؟ انتى مش قلتى يا بنتى أن عيد ميلادك فى شهر ٤ يعنى لسه فاضل عليه تلات اشهر
يا ستى مش هتفرق كتير ..متحبكهاش بقا يا ست سندس و يلا اتأخرنا اوى احسن الواد يمشي
ماشي يا هدير بس دى اول و اخر مره اجى معاكى مشوار زى دا
ماشي يا ستى بس مدى رجلك يلا
بعد حوالى ١٠ دقائق مشي وصلنا لجنينه دخلنا فيها و لقيت منظر عجيب
لقيت شباب كتير.... طلبه معاهم شنط المدرسه و كل واحد واخد بنت تحت شجره اللى عمال يتكلم معاها و اللى حاطط ايده على كتفها و اللى ماسك أيدها
ايه دا يا هدير ؟؟ ايه المكان دا ؟؟ و ايه الولاد و البنات دول كلهم ؟؟
دول زى حالاتنا طفشانين من المدرسه يا سندس و اسكتى بقا خلينا ندور على صلاح و محمد
لا لا انا عاوزه امشي انا قلبى اتقبض اوى
بعد ما وصلنا يا سندس ؟؟؟ و الله هما خمس دقائق و هنمشي ..و هعزمك يا ستى بعدها على سندوتشات كبده من اللى بتحبيها ... بس اقفش الهديه الاول
ماشي يا هدير بس انا مليش دعوه بصلاح ده و لا محمد انا هقف معاكى بس عشان مسبكيش لوحدك
ماشي ماشي يا سندس ......اهو صلاح اهو
بصيت كدا لقيت ولدين واحد طويل و اسمرانى جسمه رياضى و عنده عضلات و التانى ابيضانى و أقصر شويه من الاول
هدير لقيتها بتكلم الشاب الابيضانى و بتقولى دا صلاح يا سندس و شاورت على التانى و قالت و دا محمد
صلاح اخد هدير و مشي شويه و انا وقفت استناها لقيت محمد قرب منى و قالى
انتى سندس بقا اللى بيحكوا عنها ؟
سكتت و مردتش عليه
راح مكمل كلام و قال بس انتى احلى كتير من الوصف اللى قالولى عليه
بصيت له كدا ...هما مين اللى قالولك ؟؟؟
هدير ملهاش سيره الا عليكى و صلاح دايما بيتكلم عليكى من كلام هدير ووصفها ليكى و اد ايه انتى انسانه طيبه و اخلاقك عاليه و كمان جميله ...بس صراحه هى معرفتش توصفك ..انتى جميله اوى
وطيت دماغى فى الارض و اتكسفت اوى و قلت له شكرا
و رحت ناديت على هدير ......يا هديييير يلا بقا عشان اتأخرنا
هدير جت و قالت لى لسه بدرى يا سندس
لأ انتى قلتى خمس دقايق بس
طب يلا يا ستى
محمد بص لى و قالى اتمنى اشوفك مره تانيه يا انسه سندس
اتحرجت و مشيت مع هدير و قعدت تورينى هديه صلاح ليها ...دبدوب قطيفه لونه احمر و سلسه و كارت حلو بيضرب موسيقى
هدير بقت تحكيلى عن صلاح و انا مش سامعه اى كلام بتقوله ...كل تفكيرى فى الكلمتين اللى قالهم لى محمد و بقى كلامه يرن فى دماغى
اول مره اكلم ولد ...اول مره حد يقولى انى جميله ...اول مره حد يكون عاوز يشوفنى
فقت على كلمه هدير
اييييييه سرحانه فى ايه ؟؟
مفيش حاجه يا هدير
طب ايه رايك فى الواد محمد ؟؟
رايى ايه و بتاع ايه ؟؟
دا صلاح بيقولى أنه معجب بيكى من قبل ما يشوفك
هدير انا مبحبش الكلام ده
يعنى مش هتيجى معايا مره تانيه ؟؟
هو انتى هتروحى تقابليه تانى ؟؟؟
ايوه و عاوزاكى تيجى معايا
ربنا يسهل يا هدير ....ايه مش هتعزمينا زى ما قلتى ؟؟
اه طبعا يلا بينا
رحنا أكلنا و قعدنا نتفرج على المحلات شويه و روحت البيت
طبعا سنيه كانت متجبسه و الدكتور قال إنها هتفضل فى الجبس شهر الى اربعين يوم
و طبعا دى كانت أفضل فتره لنا مع سنيه لأنها كانت محتاجانا اوى و كانت بتخاف تضايقنا لمنرضاش نعملها حاجه و ساعتها مكنتش هتقدر تضربنا و لا تعمل لنا حاجه ...فبقت تجر ناعم معانا و متضايقناش اوى بلسانها السليط ..
روحت و انا مسهمه و سرحانه فى كلام محمد ...سنيه ندت على اعملها شويه حاجات ...دخلت بسرعه اعملهم لها عشان اروح اقعد فى اوضتى و افتكر كلام محمد لى
دخلت اوضتى و سرحت فى محمد و فى كلامه الجميل و بقيت الوم فى نفسي ليه مردتش عليه ....ليه مكلمتهوش ..دا باين عليه ابن ناس و محترم
قعدت احلم بمحمد لغايه ما رحت فى النوم
تانى يوم لقيت هدير بتقولى أن صلاح و محمد هيستنونا بعد المدرسه على باب الشارع علشان نتمشي سوا كلنا
قلت لها لا يا هدير مينفعش ...انا مقدرش اعمل كدا
قالت هما هايكلونا يا بنتى ؟؟ هنمشي و نشرب كوبايه عصير و خلاص
طبعا انا كنت برفض بس كنت مزقططه من جوايا ...هشوف محمد تانى و هيقولى كلام حلو تانى
خرجنا من المدرسه و هدير ادتنى روچ احط على شفايفى
مشينا شويه لقيت صلاح و محمد واقفين بعيد عن المدرسه شويه ...و لقيت محمد لابس قميص ابيض مخلى وشه زى القمر و تانى أكمام القميص لغايه نص دراعه كدا و عضلات اديه باينه شكلها تحفه
محمد و صلاح سلموا علينا ....و مشينا احنا الاربعه لغايه ما لقينا محل عصير قصب ... وقفوا اشتروا لنا عصير
و محمد قعد يكلم فى و انا اهز راسي و مكسوفه ارد عليه
مشينا شويه و دا كله و انا ساكته متكلمتش تلات اربع كلمات على بعض
فى الاخر محمد سلم على و ضغط على ايدى و قالى انا مبسوط اوى انك رضيتى تيجى انهارده مع هدير ....انا معجب بيكى اوى يا سندس
اتكسفت اوى و ابتسمت ...و هو ضحك و قال
يا خرااااشي عليكى و على كسوفك ايه القمر دا ....انا لازم اشوفك تانى يا سندس اوعى تحرمينى من انى اشوفك
روحت و انا طايره من السعاده ....بقيت افكر فى محمد ليل و نهار ....بس زى ما يكون فى حاجه جوايا معذبانى
عارفه أن اللى بعمله دا غلط ...بس برده بعمله ....عجبنى اوى أن محمد بيقولى أنه معجب بى و عجبنى نظره الحب اللى شايفاها فى عنيه..... انا اول مره حد يحبنى بعد امى
انا مشدوده له بشكل عجيب 😍😍😍
بس فى نفس الوقت ضميري مأنبنى ....لو ماما عايشه كنت اتكلمت معاها و استريحت من الحيره دى ....انا معنديش حد اتكلم معاه 🤔 الااااا .......ابله نادره
انا ازاى نسيتها ؟؟
انا هروح لها بكرا و اقولها على كل حاجه و هى كبيره و اكيد هتقولى على الصح و الغلط و تساعدنى انى اخد قرار فى الموضوع ده .
تانى يوم رحت لابله نادره و حكيت لها على كل اللى حصل
ابله نادره قعدت تسمعنى و مفيش على وشها اى رد فعل و لا مضايقه و لا مبسوطه
لغايه ما خلصت كلام خالص و سكتت
ابله نادره قالت لى خلصتى يا سندس؟؟
ايوه يا ابله
طيب شوفى بقا ....
#د.جيهان_عادل😍
#زوجة_أبى
#الجزء_الحادى عشر
رحت لابله نادره و حكيت لها على كل اللى حصل
ابله نادره قعدت تسمعنى و مفيش على وشها اى رد فعل و لا مضايقه و لا مبسوطه
لغايه ما خلصت كلام خالص و سكتت
ابله نادره قالت لى خلصتى يا سندس؟؟
ايوه يا ابله
طيب شوفى بقا كل اللى انتى حاسه بيه دا شئ طبيعى للى فى سنك ...كمان ظروفك و احساسك أن محدش بيحبك خلاكى منتظره اى كلمه حلوه من اى حد
اللى انتى فيه دلوقتى يا سندس مش حب ...و لا يرقى حتى لدرجه الاعجاب
اللى انتى فيه مجرد انبهار بحاجه جديده اول مره تحصلك فى حياتك ...اول مره تكلمى حد من الجنس الآخر ...كمان باين على الولد من وصفك له أنه واخد باله من نفسه كويس و بيلعب رياضه عشان يرسم جسمه و يجذب البنات له
الولد دا فى سنه كام يا سندس ؟؟
هدير قالت لى أنه فى سنه اولى كليه التجاره
اممممم يعنى قدامه على الأقل تلات سنين عقبال ما يخلص الكليه و جيش سنه و بعد كدا يبتدى يبدأ حياته العمليه
يعنى ايه يا ابله مش فاهمه 🙄🤔
يعنى يا بنتى لسه قدامه كتير اوى على ما يقدر يفتح بيت ...تفتكرى بقا بظروفك اللى انتى فيها ووجود سنيه هيسمحلك انك تستنى دا كله ؟؟ دا على افتراض أن فعلا الولد بيحبك و قصده خير
طب اعمل ايه دلوقتى يا ابله
اولا صاحبتك هدير دى غلطانه و عايزه تشدك فى الغلط معاها ...عارفه انك بتحبيها لكن مينفعش نمشي وراها فى كل شيئ بتعمله ....كل إنسان مننا له طبيعته و كل واحد بيختلف عن التانى مينفعش تبقى امعه
يعنى ايه امعه يا ابله
يعنى ملكيش رأى بتمشي ورا كلام الناس ...انتى المفروض يكون لكى شخصيه تفرضيها على اللى قدامك
و لما حد يقولك حاجه اعرضيها على قلبك و مخك و
طضميرك و لو لقيتى أن الموضوع ده مش عاجب قلبك أو ضميرك يبقى خلاص متعملهوش
انا يا سندس مش معاكى طول الوقت ..لازم انتى تكونى رقيبه نفسك ...و انا متاكده أن جواكى انسانه نقيه و لولا كدا مكنتيش جيتى تحكيلى انهارده
بس انا مش عارفه اعمل ايه دلوقتى يا ابله انا اتعلقت بيه اوى
صدقينى يا سندس دا مش حب دا مجرد تعلق زى ما قلتى دلوقتى .....انتى لازم تبطلى تخرجى معاهم و تبطلى تشوفيه خالص ...دا طبعا لو عايزه تحافظى على قلبك من اى حد يحاول يلعب بيه
حاضر يا ابله انا هعمل اللى قلت لى عليه
بعد كدا هدير حاولت معايا كذا مره انى اخرج معاهم مرضتش و كانت صورة امى دايما قدام عنيا ....بالرغم انى كنت ساعات بحن بس برده صوت ضميري كان أقوى من صوت قلبى
مرت السنين و اختى سعاد دخلت صنايع زيى و بقيت احاول اكون لها الام و احاول أوجهها انها متغلطش
امتحنت الدبلوم و جبت مجموع كبير و سمعت من المدرسين أن فى حاجه اسمها معادله ممكن ادخل من خلالها كليه الهندسه مباشرة ....طبعا انا سمعت كدا و اتجدد الامل قدامى فى تحقيق امل امى الله يرحمها
رحت لابويا فى المحل علشان اكون بعيده عن سنيه اطلب منه انى اعمل معادله علشان ادخل منها كليه حلوة
ابويا سكت و مردش على
ها يا بابا هروح و الا لأ
ما كفايه عليكى كدا يا سندس ....انتى بنت و مسيرك للجواز ايه الداعى لوجع القلب ده كله ؟؟
يا بابا ارجوك دا حلم حياتى اللى بحلم بيه طول عمرى ...انت عارف انى شاطره و كنت جايبه مجموع فى الاعدادى و انت دخلتنى صنايع علشان سنيه ...بس بالله عليك يا بابا ... لأجل عضم التربه توافقنى و تخلينى اعمل معادله ....دى بتاخد كام شهر بس
طب و سنيه يا سندس ؟؟؟ سنيه لو عرفت هتهد الدنيا و هتعمل زى ما عملت لما خدتى الاعداديه
انا عارفه هنقول لسنيه ايه ؟
هقولها انى جبت كذا ملحق و انى هقعد اذاكر هم و هى مبتعرفش لا تقرا و لا تكتب و مبتفهمش اى حاجه فى الكتب .... بس انا عاوزاك تدعمنى بس و ترضى أن اعمل كدا
خلاص انا موافق يا سندس و ربنا يستر و سنيه متعرفش
رحت قدمت على المعادله و قلت لسنيه انى جبت ملاحق
طبعا مكنتش سايبانى لا فى الرايحه و لا الجايه مكنتش بتنادى على ألا يا ساقطه
و انا صراحه مكنش هاممنى لانى عارفه اللى فيها و بقيت اذاكر ليل نهار بإديا و سنانى ...و كل شويه سنيه تدخل تضحك على و تقولى ذاكرى يا اختى ذاكرى ياكش تنفعى يا فاشله
و كنت اسمعها تحرض ابويا على انه لازم يجوزنى لانى فاشله و انها ياما قالت له أنه يقعدنى فى البيت علشان هى كانت عارفه أن ده اللى هيحصل
ابويا بقا كان ياخدها على اد عقلها و يقولها خلينا معاها للآخر و نشوف ايه اللى هيحصل
كانت سنيه تعوج بقها و تقول : ايه اللى هيحصل يعنى هتجيب الديب من ديله 😏😏
مرت الايام و دخلت الامتحان و حليت كويس جدا و نجحت فى المعادله
روحت فرحانه لابويا أقوله أن دلوقتى اقدر ادخل كليه الهندسه أو التربيه .....
ابويا فرح اوى بس حسيت فى عينه بنظرة خوف من سنيه
كنت نفسي أقوله ارجوك ما تكسرش فرحتى مره تانيه عشان خاطر مراتك
ابويا قالى طب روحى يا سندس دلوقتى و نشوف الموضوع ده فى البيت
حاضر يا بابا
و لسه بقوم عشان اروح لقيت واحد داخل على ابويا المحل و بيقوله
الحق يا حاج ابنك سامح صدمته عربيه على اول الشارع
ابويا جرى و انا جريت وراه علشان نشوف سامح
اول ما شفته مكنتش قادره ابص ع المنظر
العربيه داست عليه و جسمه بينزل دم من كل حته ...وشه مليان دم لدرجه ان ملامحه مش باينه من الدم
ابويا بقا قعد يجعر ...سااامح ....سامح... الناس شالت اخويا و ركبوا عربيه و بقوا يزقوا فى ابويا اللى كان متسمر من الصدمه و مفيش على لسانه الا ابنى ....سامح ...ابنى
ركبنا العربيه و طارت على المستشفى
دخلوا بيه اوضه العمليات بسرعه ....بعد شويه لقيت سنيه جايه تصرخ
ابنى ....حبيبي ...يا ضنايا يا ابنى
و مسكت فى هدوم ابويا.... حصله ايه يا عبده ؟؟ و كنت فين يا عبده ؟؟؟ هو الواد مش كان عندك ؟؟؟؟
ايوه و كان لسه مروح مبقلوش خمس دقايق
حصل فيه ايه ؟؟ قولى انت شفته ...حصله ايه ؟؟
لأول مره فى حياتى اشوف سنيه الوحش الكاسر زى الحمل الوديع لاول مره اشوفها بالضعف دا كله
افتكرت ساعتها امى الله يرحمها و لهفتها على سعيد اخويا الله يرحمه 😔.....ياااا المنظر ده فكرنى بحاجات كنت بقول انى نسيتها
طلع الدكتور من اوضه العمليات ....سنيه جريت عليه
ابوس ايدك يا دكتور ..قولى ابنى فيه ايه
ابويا قالها اهدى شويه عشان نفهم يا ام سامح
الدكتور قال للاسف حادثة العربيه أدت إلى تضرر بالغ فى دماغ الطفل و للاسف فى العمود الفقرى كمان
يعنى ايه يا دكتور ؟؟
يعنى للاسف الحبل الشوكى اتقطع و ...و للاسف مش هيقدر و لا يمشي و لا حتى يمسك حاجه بايده ...يعنى شلل رباعى ....دا غير بقا تضررات الدماغ اللى مش عارفين بقا هتوصل لايه ...لما يفوق هنعرف كل حاجه
سنيه سمعت كدا و فضلت تلطم على وشها و تصرخ تصرخ لغايه ما وقعت فى الارض و اغمى عليها
عاوزين تعرفوا حصل ايه بعد كدا مع سنيه و اخويا سامح استنونى فى الجزء الجاى 🥺🥺
يتبع ........😣
#د.جيهان_عادل😔
#زوجة_أبى
#الجزء_الثانى_عشر_والاخير
للاسف الحبل الشوكى اتقطع و ...و للاسف مش هيقدر و لا يمشي و لا حتى يمسك حاجه بايده ...يعنى شلل رباعى ....دا غير بقا تضررات الدماغ اللى مش عارفين بقا هتوصل لايه ...لما يفوق هنعرف كل حاجه
سنيه سمعت كدا و فضلت تلطم على وشها و تصرخ تصرخ لغايه ما وقعت فى الارض و اغمى عليها
ابويا وقف ساكت خالص منطقش ...الناس قوموا سنيه من الأرض و دخلوها على سرير و جم فوقوها
اول ما فاقت قامت تجرى على العنايه المركزه اللى سامح فيها ...و بقت تعيط ...اول مره اشوفها بتعيط بالشكل ده
سامح كان صعبان على ...بالرغم أن أمه ياما ذلتنا عشانه و كان فى تفرقه كبيره فى المعامله من ناحيه ابويا ..و بالرغم أن سنيه كانت دايما تخليه يتعامل معانا كأننا خدامين عنده مش اخواته الكبار
بقول بالرغم دا كله الا انى كنت زعلانه عشانه اوى ...هو برده اخويا الصغير
للاسف خبطة الدماغ اللى اخدها سامح عملت له نزيف ع المخ اثر على مركز الكلام و الذاكره
فأصبح سامح مبيتحركش و الكلام قليل جدا يكاد يكون معدوم و للاسف مش فاكر اى حاجه
طبعا قعد فى المستشفى فتره كبيره حوالى ٥شهور ابويا صرف عليه مبالغ هايله لأنه طبعا كان فى مستشفى خاص و ابتدت حالته تستجيب شويه فى حكايه الكلام ....ابتدى يتكلم بس يتهته و مبيبقاش عارف يجمع الكلام أو ينسي هو كان عاوز يقول ايه 😔
أما الحركه بقا فمع العلاج الطبيعى بدأت ايده تستجيب لكن رجله الدكتور قالنا أنه محتاج عمليه دقيقه مبتتعملش الا فى فرنسا
سنيه كانت قاعده جنبه ليل نهار و نسيتنا و نسيت كل حاجه .....كان كل همها ابنها
انا بقا قدمت فى كليه التربيه لانى شفت أن ابويا مش هيقدر على مصاريف الهندسه و سعاد اختى اخدت الدبلوم و قدمت فى معهد سنتين
اخويا سامح لما خرج من المستشفى كان كاسر ضهر سنيه ....كان مخليها زى التايهه .....و لاول مره اشوف سنيه بتصلى و تعيط لربنا و تقوله يارب ...دى حتى معترضتش لما دخلت كليه التربيه و الا اما اختى دخلت المعهد مع انى كنت متوقعه انها هتهد الدنيا .
و مع ذلك سنيه مصعبتش على لحظه ....و حسيت ان ربنا بيدوقها من نفس الكاس اللى دوقت امى منه
سنيه قعدت مع ابويا بعد ما سامح خرج من المستشفى و قالت له : هنعمل ايه يا عبده فى حكايه سامح ؟؟
هنعمل ايه يعنى ؟؟ اهو هنمشي معاه بالعلاج الطبيعى و الادويه يا سنيه لغايه ما ربنا يسهل
علاج و أدوية ايه انا بسألك عن العمليه هنعملها له امتى ؟
العمليه هتتكلف كتير يا سنيه لو بعنا اللى قدامنا و اللى ورانا مش هنجيب حقها .
مليش دعوه اتصرف بيع المحل بيع البضاعه بيع اى حاجه المهم ابنى يتعالج و يرجع زى الاول
المحل؟؟ هو انتى ناسيه أن المحل عليه قرض ؟؟؟ مش انتى صممتى اخد قرض تانى بعد ما الاول خلص و المحل مديون دلوقتى ب٢٥ الف جنيه
خلاص انا هبيع محلى و دهبى و البيت و هعالج ابنى
حتى لو بعتى دول كلهم برده مش هتوصلى لحق العمليه
يعنى ايه ؟؟؟؟ يعنى مش عاوز ابنى يتعالج ؟؟؟؟
انتى بتقولى ايه ؟؟ انتى اتهبلتى ؟؟ ما هو ابنى زى ما هو ابنك
طب اتصرف ....ان شالله تستلف فلوس ....بيع البضاعه بنص التمن ..اعمل اى حاجه .....اى حاجه يا عبده
حاضر حاضر اهدى بس و انا هعملك كل اللى انتى بر عاوزاه
طيب انا عندى فكره انا هبيع دهبى و اسدد لك القرض عشان تقدر تتصرف فى المحل بتاعك و تبيعه هو كمان
بس كدا يا سنيه مش هيبقى لينا اى مصدر رزق ...كدا انتى بتهدى كل اللى عملته فى سنين
هنا صرخت سنيه و قالت
انت ايييييييه فلوس ايه ؟؟؟و بهد ايه ؟؟؟ انت البعيد معندكش دم ...شايف الواد فى الحاله دى و قلبك مبيرقش
عيب الكلام اللى بتقوليه دا يا سنيه
هى كلمه واحده يا عبده ابنى لازم يتعالج و الا هخلى عاليها واطيها
خلاص خلاص هعمل اللى انتى عاوزاه
و بدا ابويا يخلص إجراءات سداد القرض و عرض محله و محل سنيه للبيع و ابتدى يصفى البضاعه و يبعها بأقل من تمنها
و سنيه عرضت البيت للبيع و باعته لناس محترمه اللى هما بعد كدا بقوا أهل جوزى
الناس لما عرفوا الظروف سابونا فى الشقه و كانوا بياخدوا مننا ايجار و جم سكنوا تحتنا فى شقه امى الله يرحمها و من هنا شافنى جوزى و طلب ايدى بعد كدا
ابويا و سنيه جمعوا المبلغ دا بعد ما استلفوا عليه حوالى ١٥ الف جنيه كمان .....و سافر ابويا مع سامح علشان يعملوله العمليه
فى الفتره دى اشتغلنا انا و اختى بعد الضهر هى فى عيادة دكتور تستقبل المرضى و تحجز وتاخد الكشف و انا فى محل ملابس كانت صاحبته متفهمه لظروفى و عارفه انى طالبه فى كليه التربيه
ابويا فضل شهرين فى فرنسا عقبال ما التحليلات اتعملت و اخويا دخل تحت نظام علاجى لفتره قبل العمليه و بعد كدا عملوا له العمليه
و كل دا و سنيه على نااااار و للاسف مكنش ينفع تروح معاهم عشان المصاريف
ابويا كان بيتصل بيها كل كام يوم علشان يطمنها على حاله سامح .... لغايه ما سامح دخل العمليات و خرج و فتح عنيه و ابتسم لابويا و كان كله تمام ....فجاه ابويا سمع جهاز القلب اللى عليه اخويا بيصفر و لقى الممرضات و الدكتور جايين يجروا و خرجوا ابويا بره الاوضه و كان واقف يتفرج من الازاز و هو مش فاهم ايه اللى بيحصل ...و لاقاهم بيعملوا صدمات كهربيه للقلب لانه توقف فجاه
حاولوا مره و اتنين و لكن للاسف قدر الله نفذ
ابويا مكنش مصدق ...يا الله ابنى حبيبي نور عينى راح
يارب حكمتك ......يارب انا بقالى سنين بأنب فى نفسي و ضميري بيوجعنى انى قصرت فى حق سعيد ابنى و قصرت فى حق رتيبه مراتى .....رتيبه اللى عمرها ما حملتنى فوق طاقتى.....رتيبه اللى كانت بتحبنى اكتر من عنيها ....رتيبه اللى ظلمتها و ظلمت اولادها ....يارب كنت اتمنى انى انا اللى ادفع التمن ...بس حكمتك يارب ...لا راد لقضائك ....دا اكيد ذنب رتيبه ربنا بيخلصه منى 😔
ابويا خلص الإجراءات و شحن جثمان اخويا و مقلش لسنيه أنه مات ....
اول ما سنيه شافته نازل من العربيه افتكرت أن خلاص ابنها خف و نازل معاه
نزلت على السلالم جرى و هى بتزغرط
اول ما لقت ابويا مطلع الصندوق من العربيه بقت تهز دماغها كدا ....و تقول فين ابنى يا عبده ...فين سامح... ها ....هو فين ؟؟ هو وحشه اللعب و خلاك نزلته على باب الشارع؟؟؟....قول يا عبده فين سامح .....فين ؟؟
سنيه بصت على الصندوق و طبعا عرفت ايه اللى جواه و احنا كنا واقفين وراها عمالين نعيط انا و اختى
سنيه صرخت و قالت لااااا لااااا متقولش ان ابنى مات متقولش ...لا انت بتكدب على ...ابنى عايش ...
سنيه هجمت على الصندوق فتحته لقت سامح اخويا مغمض عنيه زى الملاك ....سنيه بقت تشيله و تهز فيه و تصوت ....سامح اصحى يا سامح اصحى يا عين امك ..اصحى اوعى تعمل فى كدا ....انا مليش حد فى الدنيا غيرك ....اصحى اصحى ....
الناس بدأوا يشدوا اخويا من ايدها ...و هى وقفت و قعدت تضحك ضحك هستيري ...و راحت قالعه الايشارب اللى على دماغها و راحت متحزمه و قعدت ترقص
و تهز فى انا و اختى و تقولنا ارقصوا يا عيال اخوكوا رجع و ربنا شفاه ارقصوا ارقصوا
سنيه جالها صدمه رهيبه ...سنيه خسرت كل حاجه دهبها و بيتها اللى هو بيت امى فى الاساس و محلها و حتى ابنها .... للاسف سنيه مقدرتش تتحمل الصدمه و حصل لها مشكله فى قواها العقليه أدت لدخولها مرحلة اكتئاب شديد و انتهت انها شنقت نفسها فى مستشفى الامراض العقلية
أما ابويا بعد اللى حصل و بعد ما كان تاجر كبير و له اسمه أصبح بلا اى مصدر رزق بالعكس كان عليه مبلغ كبير مش عارف يسده ازاى
ابويا من كتر الزعل جاله جلطه و قعد سنتين فى السرير و بعدها توفى 😔
انا و اختى كنا بنشتغل خلال السنتين دول و نصرف على علاجه و ندفع الايجار
بعد ما ابويا اتوفى ..اختى سعاد جالها عريس من بلد جنب بلدنا و جهزتها على اد ما قدرت.... بعدها اتقدملى زوجى الحالى و كان طبعا عارف كل ظروفى و مكلفنيش حاجه ...صراحه هو راجل طيب هو و أهله بس برده حكايه امى و اللى حصلها مأثرين على اوى و مش قادره اثق فى حد تانى ....تفتكروا انا كدا غلطانه انى مش قادره اثق فى زوجى و الا انا عندى حق ؟؟ انتوا عرفتوا حكايتى و تقدروا تحكموا عليها 🥺
تمت🌹🌹
انا عاوزه اقول كلمه بس تعليقا على القصه
التعدد حلال للرجل لكن الظلم حرام ...لكل إنسان بيظلم و فاكر أن ربنا مش هيحاسبه انت غلطان حتى لو ربنا أجل عقابك فى الدنيا لكنه سبحانه يمهل و لا يهمل
دعوه المظلوم و اكل حقوق الناس بالباطل كافيه انها تمحق اى شئ ....شفنا لما سنيه استحلت فلوس سندس و فلوس رتيبه و فلوس الجار اللى باع اللى قدامه و اللى وراه فى تهمه باطله شفتوا أن ربنا سقاها من نفس الكاس و فقدت كل أموالها و كل اللى عاشت عمرها عشان تجمعه
فى النهايه بقول أن الطمع دايما يقل ما جمع و أن الظلم ظلمات يوم القيامه ...فاتقوا الله يا عباد الله و لا تظلموا أنفسكم و اهليكم 😔
🌹🌹🌹🌹🌹🌹🌹🌹🌹🌹🌹🌹🌹🌹🌹
ارجو ان القصه تكون نالت اعجابكم و أرجوا لو أدخلت عليكم شئ من السعاده أن تدعوا لأبى رحمه الله بالرحمه و سائر موتى المسلمين💐
#د.جيهان_عادل💐💐💐💐
ردحذفالله يرحم والدك يا دكتوره