هاله الجزء الاول

#هاله_قصه_حقيقيه

#الجزء_الاول

عايزة احكى لكم حكايتي عشان كل مكسور ومهموم و حاسس ان ما فيش امل يعرف ان ربنا قادر يجبر كسر قلبه ويفرج همه

بس اتحملونى لأن حكايتى طويله و فيها وجع كتير بس زى ما قلت لكم فيها عوض من ربنا كبيره 

بداية كدا احب اعرفكم بنفسي انا أسمى هاله ..والدتى الله يرحمها كانت دايما تنادينى بهاله القمر لانى الحمد لله حلوه و عنيا زرقا زى القطط 

هحكيلكم حكايتى من اولها و الا اقولكم هحكيلكم من اول ما ابويا اتجوز امى 

ابويا كان راجل صعب اوى فوق ما تتخيلوا و للاسف كان سليط اللسان بشكل بشع.... من اول جوازه بوالدتى و فى ليلة دخلتها دبح لها القطه زى ما بيقولوا 

مبروك يا منال 

الله يبارك فيك يا سي صبحى 

بقولك ايه يا منال انا عاوز اقولك كلمتين تحطيهم حلقه فى ودنك علشان  نكون على نور و متزعلنيش منك .... انا زعلى وحش اوى انتى لسه متعرفنيش 

ربنا ما يجيب زعل يا سي صبحى

انا راجل بحب النظام زى عنيا يعنى ارجع الاقى لقمتى جاهزه و فرشتى نضيفه مسمعش اصل الوابور عطل اصل الجاز خلص اصل انا تعبانه ... مبحبش الكلام ده و يوم ما هلاحقى حاجه مش مظبوطه فى بيتى هروحك على بيت أهلك 

انا اصلا بكره جنس النسا ده و لولا امى غصبت عليا مكنتش اتجوزت من أصله 

امى طبعا سمعت و سكتت مكنتش تقدر تتكلم أو تقول حاجه ...لأنها ببساطه لو اعترضت هيرجعها لبيت اهلها و ساعتها الناس مش هتقول رجعت لأن جوزها مطلعش كويس ..انتوا طبعا عارفين الناس بتقول ايه فى المواقف اللى زى دى ؟

امى بطبعها كانت غلبانه اوى و منكسره مكنتش تحب المشاكل و كانت بتمشي جنب الحيط أو بالأحرى جوه الحيط 

لما حملت امى فى اخويا الاولانى عبدالعزيز كانت فرحانه اوى و كان نفسها فى حبيبه لها .... غلطت بس و قالت لابويا نفسي فى بنت تكون اخت ليا لانى مليش اخوات بنات 

ياااا على الكلام الصعب اللى ابويا سمعهولها اليوم ده 

بنت ايه يا ام بنت ...اليوم اللى هتجبيلى فيه بنت هيبقى طلاقك حل ...انا مبحبش البنات و لا خلفتها ...انتى فاهمه ؟؟

طب و ده بايدى ؟؟ دا من عند ربنا يا صبحى 

انتى يا وليه غاويه لت و عجن فى الكلام كدا ليه ؟؟؟...انا قلت كلمه بنات مش عاوز ..جتك البلا فى شكلك 

امى كانت مرعوبه و خايفه انها تولد بنت من كلام ابويا ليها 

و الحمد لله خلفت عبدالعزيز اخويا 

مرت الايام و ابويا طلب منها أنها تحمل مره تانيه و كان عبدالعزيز لسه عمره سنه 

و طبعا امى مقدرتش تعارضه و لا تقوله لا ...كان دايما يشتمها و يهددها بالطلاق 

و حملت امى فى اخويا رمضان و عدت على خير برده لان ابويا كان بيحذرها انها تخلف بنت 

بعدها ربنا أعطاها سعد اخويا و بقى معاها تلات ولاد زى الفل

امى تعبت و قالت الحمد لله رضا على التلات ولاد علشان نعرف نربيهم كويس و نعلمهم بس ابويا مكنش راضيه الكلام ده و قالها لو مش عاوزه تخلفى تانى هتجوز عليكى اللى تجيبلى عشر ولاد 

امى خافت لابويا يتجوز عليها و حملت للمره الرابعه و كان عندها امل انى اكون ولد علشان خاطر ابويا ميزعلش منها 

فاتت الايام و كل احلام  امى بتقول أنها حامل فى بنت بس طبعا كانت تخاف تتكلم أو تقول 

كانت فرحانه بس خايفه اوى من ابويا 

الدايه لما شافت بطنها قالت لها 

بت يا منال بطنك مدوره يا بت ربنا هيسعدك بالبنت اللى بتتمنيها أن شاء الله 

بنت ؟؟؟ لا يا خاله فاطمه انا مش عاوزه بنت صبحى يطلقنى لو جبت له بنت 

انتى هبله يا بت ...دا البت حبيبه ابوها و امها ..بكرا يا اختى لما تكون بين ايديه هتكون عينه اللى بيشوف بيها و هيفضلها على الولاد كمان 

صحيح يا خاله ؟؟

ايوه صحيح و بكرا تقولى خالتى فاطمه قالت لى و انا مصدقتش 

يارب يا خالتى ...انا فعلا نفسي فى بنتى بس خايفه منه أوى 

لا متخافيش ...أن شاء الله تقومى بالسلامه و ليا الحلاوه يا بت 

عنيا ليكى يا خالتى اللى تعوزيه 

عاوزه حلق مخرطه زى اللى انتى لابساه ده 

بس دا فالصو يا خالتى

منا عارفه يا بت هو انا برده هطلب منك حلق دهب ؟؟؟ ...الدهب بقا هطلبه من ابو البنت أن شاء الله و انا بحطها فى حجره كدا 

ربنا يستر يا خالتى 

هيستر أن شاء الله ...كلها شهر و شهير و التانى قصير و تولدى 

و جه يوم الولاده و اللى كان اسود يوم مر على امى فى حياتها 

الخاله فاطمه جت تولدها و ابويا كان قاعد بره البيت مستنى الولد الرابع 

و للاسف مجاش الرابع و جيت انا ...امى بتقولى اول ما نزلتى كل اللى فى الاوضه كانوا بيقولوا بسم الله ما شاء الله ...الله اكبر الله اكبر دى بدر البدور ....قمر ١٤

اللهم صلى على حضرت جمال النبى 

الخاله فاطمه لبستنى جلابيه قديمه مشحوته من واحده جارتنا لأن ده كانت معتقداتهم أن المولود يلبس حاجه مشحوته علشان ربنا يشحته لأهله ...

بعد كدا لفتنى فى لفه و خرجت جرى على ابويا 

هات الحلاوه يا صبحى 

 منال جابت ايه ؟؟؟

 ‏مش هقولك الا لما تجيب الحلاوه الاول و حلاوتى خاتم دهب 

 ‏يا سلام ....ليه جابت اللورد كرومر ؟؟

 ‏كرومر مين و بتاع مين جابت اللى احلى مية مره من اللورد بتاعك ده 

 ‏يا وليه اتكلمى على طول مبحبش رط النسوان ده 

 ‏خد ...بنت زى البدر تتربى فى عزك أن شاء الله 

 ‏نعم ...بنت ؟؟؟؟؟ بنت ايه دى ؟؟؟ 

 ‏و راح ناطر ايد الست كنت هقع من ايدها لولا لحقتنى بسرعه

 ‏ابويا دخل على امى زى التور الهايج و مسكها من رقبتها 

 ‏بقى كدا يا منال ؟؟؟ رايحه تجبيلى بت ؟؟؟

 ‏#دجيهان_عادل

يتبع

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ...