#انتحار ( مستوحاه من قصه حقيقيه )
# الجزء_الاول
دكتور فوزى حالة الانتحار فاقت
انتحار ايه يا فوزى ؟؟
و الله يا دكتور علاء دى حاله شابه جت امبارح قاطعه شرايين أيدها و لولا ستر ربنا كان دمها اتصفى
تقريبا كدا اختها دخلت عليها لقتها سايحه فى دمها و كانت خلاص قربت تفارق الحياه .....اختها فضلت تصوت لحد ما الجيران اتلمت...نزلوا بيها على الطوارئ على طول و دخلت اوضه العمليات امبارح ...طبعا احتاجت نقل دم و اهلها بقوا دايخيين على أكياس دم لان فصيلتها نادره شويه
ياااا طب و ايه خلاها تعمل فى نفسها كدا المجنونه دى ؟
و الله مش عارف بس اللى يحزن انها عندها طفلين منهم طفله رضيعه اختها كانت شايلاها و بتقول دى بنتها عمرها حوالى ٣ شهور و الطفل التانى حوالى ٤ سنين كان واقف بيعيط و على وشه نظرة رعب مشوفتهاش قبل كدا
ياااااا دى اكيد وراها حكايه كبيره ....اللى يخلى واحده زى دى عندها اطفال تنتحر كدا اكيد فى دافع قوى لكدا
اكيد يا دكتور و عشان كدا انا هنصح اهلها يودوها لدكتور نفسي عشان يعالجها اكيد عندها مشكله و مش عارفه تحلها
هقوم انا دلوقتى عشان اتطمن على الحاله
هو مين عملها العمليه ؟؟
دكتور سعيد و انا كنت واقف معاه
يااا دكتور سعيد بنفسه ؟؟
ايوه الحاله كانت صعبه و كانت محتاجه متخصص علشان الشرايين و الاعصاب اللى اتقطعت ...و ربنا يسترها بقا و متكونش أيدها دى حصل لها نسبه عجز
ربنا يسترها يارب ....هقوم انا كمان اتطمن على حاله الولاده اللى ولدتها الصبح عشان اكتب لها على خروج
طيب تمام ...انا جعان تاكل معايا؟
ياريت و الله انا من الصبح محطتش حاجه فى بطنى
طب خلاص هبعت حسنى يجيب لنا اكل على ما نشوف الحالات اللى معانا و نبقى نيجى نتغدا.....عاوز تاكل ايه؟
هاكل ايه يعنى الاكله الرسميه الشعبيه الاولى عندنا فى بلدنا فول و طعميه
طب هتحتاج كام سندوتش ؟؟
من تلاته لخمس سندوتشات
ايه يا ابنى انت هتاكلنا ؟😁
عزيزى الدكتور فوزى دا يعتبر فطارى و غدايا و عشايا كمان حضرتك
ليه مش هتروح و الا ايه؟؟
لأ انا نبطشيه انهارده
طيب الله يعينك ...انا هروح بالليل.... مراتى زهقت يا عم و عماله تنكد على ليل نهار عاوزه تخرج ...هروح اخرجها شويه كدا اوديها عند اهلها يكش يمسكوا فيها كام يوم و يريحونى من زنها ده 😂😂
الحمد لله على العزوبيه يا دكتور ...انا بقى مريح دماغى من الكلام ده و لا حد بيقولى رايح فين و لا جاى منين و لا اتاخرت ليه و لا خرجنى و لا دخلنى 😂
يا بختك يا عم ياريتنى عملت زيك كنت بقيت حر طليق 😂😂😂 فين ايام العزوبيه و القعده مع أصحابنا على القهوه للفجر ....فين لما كنا بتطق فى دماغنا فجأه و ناخد عربيه الواد هادى و نطلع على اسكندريه نوصل هناك الفجر نفطر ع البحر و نرجع ....ياااا كانت ايام يا صديقى
طب ما تيجى نعملها ....احنا لسه فيها هجمع لك الشله و نروح
ههههههه ضحكتنى و الله ...يا ابنى انا دلوقتى بقيت زى الاسري فى الحروب ...هل ينفع واحد اسير يسيب الاسر و يروح يتفسح و يتسرمح مع أصحابه ؟
يا ساتر ليه كدا ؟؟؟
امال ؟؟؟ دا انت تلاقى منظمات حقوق المراه و مذيعات التلفزيون ظهرت قدامك و متخلصش بقا من كلمات زى
اه منا الجاريه اللى جابوهالك ...انت سايبنى زى الكرسي فى البيت و داير تتسرمح .....لا انا بنت ناس و مستاهلش منك تعاملنى كدا ....لما انت مش اد الجواز و اد مسؤليه الجواز بتتجوز ليه ...؟؟
يا خبر اسوح لا يا عم انا كدا رايق ...الله يكون فى عونك
يلا بينا احسن الكلام اخدنا و نسينا الحالات ....متنساش الاكل وحيات ابوك
لا متخفش هقول لحسنى و انا خارج دلوقتى....
******************************
دخل الدكتور فوزى عنبر مكون من ٨ سراير كلها مشغوله بالعيانين ...اللى نايمه و اللى متعلق لها محاليل و اللى بتأن من الوجع ...
توجه دكتور فوزى لسرير الحاله مباشرة
الحاله شابه فى أواخر العشرينات ملامحها بيظهر عليها البؤس الشديد شعرها قصير اوى زى شعر الرجاله
عنيها زايغه مش مستقره ..بتحرك ايدها الغير مصابه فى عصبيه
دكتور فوزى رفع أيدها السليمه علشان يقيس النبض و قالها
ايه يا ست نجلاء كنتى عاوزه تسبينا و تموتى نفسك ليه ؟؟
ليه انقذتونى يا دكتور ؟؟ و مين جابنى هنا ؟؟
اللى جابك هنا اختك و معاها بعض جيرانك
و ايه اللى جاب اختى فى الوقت ده ؟؟
و فى حد ينتحر يا ظالمه و معاه طفلين زى القمر كدا زى ولادك ؟؟
منا عشانهم سبت الباب مفتوح عشان حد من الجيران لما يسمعهم بيعيطوا يدخل ياخدهم
طب و ليه دا كله ...مش حرام عليكى اللى عملتيه ده ؟
هو انتى متعرفيش أن اللى عملتيه دا جريمه تتحاسبي عليها قدام ربنا و قدام القانون
بصت له باندهاش و قالت و قدام القانون ليه ؟ انا مضرتش حد غير نفسي
و هى نفسك دى ملكك انتى ؟ و الا ملك اللى خالقها ؟
انا لولا صعبتى على كنت بلغت الشرطه و كان اتعملك محضر دلوقتى
ممكن اطلب منك طلب يا دكتور تعملهولى ؟
اتفضلى لو فى استطاعتى اعملهولك
عاوزه سيجاره من فضلك
ايه انتى كمان بتدخنى ؟؟ اولا انا ممعيش سجاير لانى ببساطه مبدخنش ....محدش قالك أن التدخين ضار جدا بالصحه ....ثانيا حتى لو معايا سجاير مينفعش تدخنى هنا وسط العيانين دول كلهم ...هو انتى مش شايفه حواليكى الناس عامله ازاى ...يا شيخه حرام عليكى 😁
طب خلاص انا اسفه مش عاوزه حاجه بس عاوزه اعرف هخرج امتى ؟؟
زهقتى مننا بسرعه كدا ؟
عاوزه أخرج من فضلك
حاضر يا ستى هنخرجك بس انتى مش شايفه المحاليل المتعلقه فى دراعك ...دا غير الدم اللى اتنقلك و ده هيعملك شويه سخونيه و لازم تبقى تحت ملاحظتنا كام يوم ...بالاضافه بقا ان لازم دكتور سعيد يجى يشوف الجرح و هو اللى يقرر انك تخرجى و الا لا
دكتور سعيد مين ؟؟
دا الدكتور اللى عملك العمليه يا ستى ...دكتور كبير حظك أنه كان موجود لما جت حالتك و العبد لله كان واقف معاه أثناء العمليه
ياريته سبنى مت ...انا مش عاوزه اعيش ....الله يسامحه و يسامحك انت كمان
يارب اسمع منها و سامحنى يارب ...و ليه بقا يا ستى عاوزه تموتى ؟؟
عشان .........
#انتحار ( مستوحاه من قصه حقيقيه )
# الجزء_الثانى
ياريته سبنى مت ...انا مش عاوزه اعيش ....الله يسامحه و يسامحك انت كمان
يارب اسمع منها و سامحنى يارب ...و ليه بقا يا ستى عاوزه تموتى ؟؟
عشان ......حاجات كتير ...مفيش فى الدنيا دى حاجه تستاهل الواحد يعيش عشانها
لا فى ....انتى نسيتى اولادك
اولادى لهم رب اسمه الكريم هو احن عليهم من ناس كتير قلوبها زى قلوب الوحوش
ياااا شكلك عندك كلام كتير ...و انا مش عاوز ارهقك دلوقتى ...بصى يا ستى انتى تنامى دلوقتى و ترتاحى و بكرا هاجى اقعد معاكى شويه و اسمع منك كل حاجه
لأ انا عاوزه أخرج
و مستعجله على الخروج ليه بس ؟؟
عاوز اتطمن على ياسين و ياسمين
دول ولادك صح ؟؟
ايوه
طب ما انتى خايفه عليهم اهو ...ليه بقا تعملى فى نفسك كدا ؟؟ و تسهرينى جنبك من امبارح يا مفتريه 😂
معلش يا دكتور انا اسفه
يا ستى و لا اسفه و لا حاجه و أن كان على اولادك زمان اختك جايه دلوقتى هى عارفه أن ميعاد الزياره الساعه ٤ و اكيد هتطمنك عليهم
اسيبك بقا دلوقتى و لو احتجتى اى حاجه نادى على ميس ريم
متشكره يا دكتور
بعد شويه دخلت ست لابسه جلابيه سمرا و طرحه و معاها رجل اصلع و بكرش و لابس نضاره كعب كوبايه و سائلين معاهم اكياس فيها عصاير و مشروبات
ازيك يا نجلاء
الله يسلمك يا مريم ....انتى ايه اللى جابك عندى امبارح انتوا مش مقاطعنى من شهور و محدش فيكم بيكلمنى ؟
رد الراجل : دا بدل ما تشكريها انها أنقذت حياتك
ملكش دعوه انت يا عبدالله انا بكلم اختى
يعنى اطلع منها انا ....منا الغريب اللى فى وسطيكم ماشي يا ستى متشكرين.
ردت مريم :غريب ازاى يا عبدالله انت جوزى ...عيب عليكى يا نجلاء دا عبدالله اتبرع لك بدمه و بقا يلف بالليل على أكياس دم عشانك
انا مقلتش لحد ينقذنى و لا يتبرع لى بدمه و على العموم يا ستى متشكرين و لو عايزه ادفع لك تمنهم ادفعلك
لا يا ستى مش عاوزين منك تمنهم و انا الحق على انى جيت انا و جوزى..... كنت عملت زى بقية اخواتك و معبرتكيش ....على العموم ولادك معايا لما تخفى باذن الله ابقى تعالى خديهم ....سلام عليكم
خدى الحاجات اللى جايبها دى معاكى ...وفريها على حالك
يا ساتر عليكى ...حقك على ..انا غلطانه ...يلا يا عبدالله
نجلاء سرحت و نزلت من عينها دمعه ....و قالت فى نفسها لسه فاكره أن ليها اخت تسال عليها ؟؟ كانت فين من زمان ؟
تانى يوم دخل الدكتور فوزى على نجلاء و قالها
ازيك يا ام ياسين
ان شالله تسلم يا دكتور
اتطمنتى على اولادك امبارح ؟؟
لا ....قصدى ايوه يا دكتور
ايوه و الا لأ ....ارسيلك على بر يا نجلاء
الدكتور شاف نجلاء و قاس النبض و تابع حرراتها فى التقرير المتعلق على سريرها و مشي و سابها
و تكرر الموضوع ده يومين ورا بعض ....دكتور فوزى لاحظ أن مفيش حد بيسأل على نجلاء ...و أنه لما طلب شويه ادويه ملقوش حد يجيب لها الا ناس غريبه من اللى كانت جايه تزور العينين اللى معاها فى الاوضه
فوزى كان مستغرب طب فين جوزها ؟ فين أخواتها ؟؟
نجلاء بدأت تشد حيلها و تتحرك من سريرها و بقت تتمشي فى طرقه المستشفى لحد ما رجليها اخدتها لاوضه الدكاتره
دخلت نجلاء علشان تسأل الدكتور امتى هيكتب لها على خروج
سلام عليكم
و عليكم السلام ....انا شايفك انهارده بقيتى احسن الحمد لله
ايوه الحمد لله انا بشكر حضرتك جدا انا عرفت أن حضرتك كنت بتجيب لى الدوا على حسابك .....و كنت عاوزه أسأل هخرج امتى عشان اجيب لحضرتك تمن الدوا اللى دفعتهولى ؟؟
بصى اللى انا شايفه انك بقيتى كويسه اوى بس برده دكتور سعيد هو اللى لازم يقرر علشان يشوف ايدك و يشوف هل الأعصاب اتأثرت و الا لأ و يقولك الخطوه اللى بعد كدا إذا كانت اتأثرت لا قدر الله ...و بعدين يا ستى عيب عليكى دا كلها حاجات بسيطه مش مستاهله و بعدين هو انا مش زى اخوكى و الا ايه ؟؟
انت احسن من اخويا و الله يا دكتور
الله يكرمك يا ستى و يتم شفاكى على خير
طب استأذنك يا دكتور
استنى يا نجلاء ممكن تقعدى شويه اتكلم معاكى
ايوه طبعا يا دكتور ....تحت امرك
معلش سامحينى و متعتبريش دا تطفل منى ، انا قبل ما اكون جراح انا طبيب و مهنتى انسانيه قبل كل شئ و كنت عايز اعرف ليه عملتى كدا ؟ و ازاى هانت عليكى نفسك ؟ و هان عليكى اولادك ؟؟ ليه محدش بيزورك ؟؟ و فين جوزك مظهرش ليه؟
خرج من صدر نجلاء تنهيده كبيره و قالت
حكايتى طويله اوى يا دكتور و مش عاوزه ادوشك بيها
لا و لا هتدوشينى و لا حاجه انا قاعد فاضى دلوقتى و موريش حاجه
طب احكيلك من فين ؟؟ من اول ما اتجوزت و الا لما قررت الانتحار
احكى من الحته اللى تعجبك
هحكيلك من اول ما اتجوزت جوزى الاولانى
هو انتى اتجوزتى اكتر من واحد ؟
ايوه اتجوزت و خلفت ياسين من حماده طليقى و بعد ما اتطلقت اتجوزت عمرو اللى كان السبب فى تفكيري فى الانتحار
خلاص احكى من اول جوزاتك الاولانيه
جوازتى الاولانيه كانت جوازه تقليديه يعنى عريس اتقدملى عن طريق حد من معارفنا و كان لسه ابويا و امى الله يرحمهم عايشين
ابويا كان راجل على اده و عنده عيال كتير و ما صدق جالى واحد ياخدنى و مش هيكلفه كتير ...
حماده كان من الارياف يعنى غير البيئه اللى طلعت فيها خالص و صراحه مكلفش ابويا كتير يعنى يدوب ابويا جاب لى الغساله و التلاجه و البوتجاز و شويه رفايع للمطبخ كدا و خلاص و طبعا جاب دا كله بالقسط ...
انتى منين اصلا يا نجلاء
احنا كنا ساكنين فى شبرا كبرت ووعيت هناك بس اللى اعرفه ان ابويا و امى اصلهم من الصعيد
ابويا كان لسه وراه اربع اخوات غيرى بنتين وولدين و طبعا ما صدق يخلص من هم واحده من العيال
اتجوزت حماده و كنت فاكره انى طلعت من الضيق للوسع كنت لسه عيله مخلصه الدبلوم يعنى كان عندى ١٧ سنه
من تانى يوم جواز لى شفت السواد اللى مشفتوش فى حياتى
ليه جوزك طلع مش كويس ؟؟
لا صراحه جوزى كان كويس إلى حد ما بس كان فيه عيب كبير اوى 😔
#انتحار ( مستوحاه من قصه حقيقيه )
# الجزء_الثالث
اتجوزت حماده و كنت فاكره انى طلعت من الضيق للوسع كنت لسه عيله مخلصه الدبلوم يعنى كان عندى ١٧ سنه
من تانى يوم جواز لى شفت السواد اللى مشفتوش فى حياتى
ليه جوزك طلع مش كويس ؟؟
لا صراحه جوزى كان كويس إلى حد ما بس كان فيه عيب كبير اوى 😔
ايه هو بقا العيب ده ؟؟؟
كان معدوم الشخصيه و ابن امه ....من تانى يوم حماتى لقيتها بتخبط علينا الساعه ٧ الصبح و بتزعق و بتقول
قومى يا سنيوره قومى يا اختى الساعه بقت سبعه جوزى جرى فتح الباب و انا قمت مفزوعه وراه مش مستوعبه هى بتقول كدا لمين 😲🥺
لقيتها بتوجه الكلام لى..... بصيت لجوزى لقيته سابنى و دخل يكمل نوم
متبصيلوش كدا يا شملوله البيت هنا له نظامه و انا اللى بمشيه و بعد كدا تصحى من الساعه خمسه عشان نشوف اللى ورانا
بسسسس
متبسبسيش يا اختى و يلا همى البسي جلابيه استرى بيها نفسك بدل الروب اللى لابساه ده 😏....دقيقتين اتنين الاقيكى تحت
سابتنى و نزلت و انا دخلت على حماده و قلت له ايه الكلام اللى امك بتقوله دا ؟؟ احنا متفقناش على كدا
لا انتى عارفه أن العيشه هتكون مشتركه و انا متفق مع ابوكى على كدا
لااااا بس متفقناش انى اقوم الساعه خمسه الفجر كل يوم
بقولك ايه يا نجلاء دا شغل حريم مليش فيه ..انزلى احسن امى تقلب عليكى ...انتى مشفتيش الوش التانى بتاعها
بصيت له كدا و بقيت اندب حظى و اقول فى سري بقا دا يا ربى اللى كنت فاكراه هيستتنى و يهنينى
لبست جلابيتى و نزلت جرى لقيت حماتى عاجنه طشت عجين كبير و بتقولى يلا يا حلوه اقدحى الفرن عشان هنخبز
بصيت كدا ...نخبز ايه انا مبعرفش اخبز
اهو ده اللى جالنا من مصر و بنات مصر ...انا قولت له ياخد بنت خالته بس اقول ايه منها لله اللى كانت السبب
وقفت ساكته مش قادره ارد عليها و قاعدين حواليها اتنين من سلايفى و عمالين يضحكوا على
حماتى لما لقتنى واقفه مبلمه كدا لقتها شخطت فى و قالت لى
طب يلا يا حلوه مدام مش هتخبزى معانا يلا عاوزاكى تمسكى الدار نضافه كنس و مسح و ادخلى اعلفى البهايم و بعد كدا اطلعى اكلى الطيور و انزلى اعمليلنا فطار انا و سلايفك و فطار لرجاله البيت
بصيت لها كدا و الدمعه كانت هتفر من عينى
طب ....ااا
بتهتهى ليه تانى
انا معرفش اعلف البهايم دى ازاى
يا خيييبتتتتى يا خبتى ...دا العيله الصغيره عندنا بتعلفهم خدى معاكى شهد بنت سلفك اهى توريلك بس بعد كدا هتعلفيهم لوحدك
طبعا رحت انا و شهد عيله عندها حوالى ١٠ سنين بس تحس انها ست كبيره مدقرمه ...رحنا لفينا ورا البيت زريبه كبيره فيها تلات عجول و بقره و حمار و معزه باولادها
البت شاورت لى على حزم برسيم كانت مرصوصه فى جنب و قالت لى العلف كدا تحطى قدام كل بهيمه من دول ربطه برسيم
بعد كدا تبقى تحطيلهم تبن و علف من اللى فى الشيكاره دى......خدى بالك انا مش هاجى معاكى هنا تانى
البت حطت حزمه برسيم واحده و مشيت و سابتنى مع البهايم .....عملت زيها و رجعت البيت
طبعا بيت حماتى تقريبا على قيراط و نص زى ما كنت بسمع منهم ... جزء منه معمول للبهايم و الباقى بقا عباره عن صاله كبيره او( وسط الدار )زى ما بيقولوا و ست اوض
اوضه كنب كبيره او مندره و اوضه فيها الفرن و الحطب
و اوضتين فيهم سراير اوضه للرجاله قبل ما يتجوزوا و اوضه للبنات و طبعا اوضه حمايا و حماتى
نسيت اقولك أن حماتى كانت مخلفه ٨ عيال ٤ رجاله و ٤ بنات
دخلت عليهم و هى مجوزه اتنين من الرجاله و جوزى التالت يعنى كان فاضل واحد بس من اخواته متجوزش و كانت مجوزه بنتين و فاضل بنتين
دخلت عملت الفطار الاول سلقت بيض و جبت جبنه و مخلل و جبنه قديمه و عسل اسود و فول و طبعا العيش سخن و لسه مخبوز
بعد ما فطرنا كانت حماتى لسه بتخبز هى و سلايفى ....قالت لى حضرى لى البطاطس عشان نعمل صنيتين بطاطس فى الفرن ...يلا بسرعه خرطى الاربعه كيلو دول و اضربى اتنين كيلو طماطم فى الخلاط و هاتى اربع بصلات كبار قشريهم و خرطيهم و هانى البتنجان ده نشويه جنب صنيه البطاطس
عملت اللى قالت عليه
بعد كدا دخلت على البيت كنس و مسح ...و طبعا عشان انا مش. متعوده على دا كله ضهرى اتقطم و كنت نفسي بس اريح خمس دقايق
اخيرا خلصوا و لقيتها بتقولى خدى بقا المواعين دى اغسليها
بصيت لها كدا و كنت هعيط
واحده من سلايفى ضحكت و قالت كفايه عليها كدا انهارده يا اما .......هغسلهم انا
راحوا كلهم ضحكوا على و لقيتها بتقولى يلا روحى صحى جوزك عشان يتغدى
طلعت و انا بجر رجليا جررر هموت و ارتاح و دخلت قولت له انزل يلا عشان تتغدى
قال طب يلا ننزل
قلت له لا انا مش قادره سبنى انام ....هموت و انام
لا مينفعش لو منزلتيش معايا امى هتسود عيشتك دا غير انك مش هتلاقى حاجه تكليها
بصيت له كدا و قلت له ..تسود عيشتى ليه منا عملت لها كل اللى طلبته منى ....و بعدين إن كان على الاكل لو لقيت نفسي جعت هقوم اعملى حته فرخه و لا لحمه و شويه رز كدا و اكل
هتعملى لحمه و رز منين ؟؟
من الخزين اللى اهلى جايبينه
لاااااا منا نزلت كل حاجه تحت عند امى
ايه انت بتقول ايه ؟؟؟ خزين ايه اللى نزلته عند امك؟؟
ما هو مينفعش يكون عندك اكل هنا ....الاكل و الشرب كله تحت و كل اخواتى ماشيين على كدا
ايه اللى بتقوله دا ؟؟ طب و فايده التلاجه اللى انا جايباها ايه ؟؟ طب بلاش لو جعت بالليل اعمل ايه ؟
التلاجه يا ستى لها فايده طبعا امى بتشيل فيها العيش اللى بتخبزه عشان يكفى كام يوم ....كمان ممكن تحطى فيها ميه ...تسقعيها يعنى
ياااااااسلام اسقع ميه فى التلاجه؟؟؟ دا ايه المعلومه الخطيره دى ؟ تصدق من غيرك مكنتش عارفه اعمل ايه
بلاش تريقه يا نجلاء هو دا نظام البيت و لازم تمشي عليه
و بعدين حكايه انك تجوعى بالليل دى مش هتحصل لانك بتتعشى تحت قبل ما تطلعى أو بتاخدى عشاكى معاكى
و يلا همى بينا عشان منتأخرش على امى لأحسن تسود عيشتنا
كنت بسمع حماده و انا مش مصدقه ودانى ...اكيد انا بحلم ....اكيد دا كابوس و هصحى منه.... اكيد
قمت نزلت ورا حماده و انا تعباااانه و نزلنا اتغدينا و سلايفى غسلوا مواعين الغدا
عملت الشاى و قعدنا شويه و لقيت حماتى بتقول
من هنا و رايح الشغل لازم يتقسم بين الحريم التلاته ...كل واحده لازم تعرف شغلنتها اللى عليها من غير كلام كدا ....عشان برده كل واحده لها شقتها تطلع تنضفها
هتقسموا الشغل من فطار و غدا و عشا و غسيل مواعين و كنس و طبخ و علف البهايم ....كل واحده يومين و تبدلوا مع بعض ....اظن كلامى واضح ...و اللى هتقصر أو مش هتعمل اللى عليها على بيت ابوها دوغرى ...و هجوز ابنى ست ستها و على عفشها
طبعا سلايفى الكلام ده عارفينه وواخدين عليه لكن كان بالنسبه لى انا كلامها ده كان ابشع حاجه حصلت لى فى حياتى ....
و حسيت اكتر بالقهره و انى وقعت فى ايد من لا يرحم لما عرفت بعد كدا أن ........
#انتحار ( مستوحاه من قصه حقيقيه )
# الجزء_الرابع
طبعا سلايفى الكلام ده عارفينه وواخدين عليه لكن كان لى انا كلامها ده كان ابشع حاجه حصلت لى فى حياتى ....
و حسيت اكتر بالقهره و انى وقعت فى ايد من لا يرحم لما عرفت بعد كدا أن انا مليش حكم على حاجه فى شقتى و أن المفتاح لازم يكون موجود فى الباب على طول...... كل حاجه مستباحه يعنى يطلعوا ياخدوا اى حاجه من شقتى عادى و لا اقدر اعترض و لا اتكلم ...لدرجه ان اخواته البنات كانوا بيطلعوا ياخدوا مكياجى و ساعات هدومى يلبسوها و ساعات يرجعوها و ساعات لا و انا دا كله مقدرش انطق..... ...كمان مفيش حاجه اسمها انى اطلب فلوس من جوزى لأن ببساطه كدا جوزى نفسه مبيبقاش معاه فلوس يدوب مواصلاته و بس و المرتب كله بيديه لأمه و لما اعترضت و قلت له ازاى الكلام ده ؟
قالى و انتى هتحتاجى ايه يعنى ؟؟ اى حاجه تحتاجيها اطلبيها من امى
ازاى يعنى اروح اقولها هاتى فلوس ؟؟
عادى يا نجلاء ...هى مش زى امك و الا ايه ؟؟
لا مش زى امى و لا يمكن هتكون زى امى
بقولك ايه احترمى نفسك و انتى بتتكلمى ....مش زى امك ازاى ...ايه يا اختى مش اد المقام ؟؟
انا مقولتش كدا بس....
مفيش بس انا نازل اقعد تحت شويه
بعدها يا دكتور بحوالى نص ساعه لقيت البت شهد جايه تندهه لى و تقولى تعالى ستى عاوزاكى
نزلت و انا مش واخده خوانه ....لقيت وابل من الشتايم و الزعيق هى و بناتها الاتنين ....مالها امنا يا مصراويه يا مصديه ...متشبهش و الا متشبهش ....روحى يا بت شوفى نفسك ...دا لولا ابنى مكنش حد عبرك و لا بص فى وشك
اه يا بايره ياللى عضيتى فى ركبك .....و حاجات كتير اتقالت مش فاهماها و لا فاكراها بس كنت مذهوله من الهجوم الرهيب ده ...ليه دا كله ؟؟؟؟
بصيت لجوزى كدا و اللى كان قاعد منطقش لقيته خانس و ساكت عرفت على طول أنه نزل قالهم
و اللى عرفته بعد كدا أنه كان بينزل يقول لامه على كل حاجه بتحصل ما بينا
انا جيت اتكلم و ادافع عن نفسي لقيت الوليه عامله زى راس الحيه و بناتها عاملين زى الديول من وراها
و انتهت المعركه بعد وصله الردح اللى استمرت حوالى ربع ساعه الى انها قالت غورى يلا على فوق و حسك عينك تجيبي سيرتى بعد كدا
طبعا انا مصدقت اسمع كلمه غورى و طلعت جرى على السلم بعد ما كنت واقفه زى طالب خيبان قدام مدرسه
طلعت فوق و فضلت اعيط و استنيت جوزى المحترم أنه يطلع مطلعش ....امه وصته أنه يأدبنى و ينام بعيد عنى اسبوع و الا اتنين كدا عشان أحرم اغلط فى الذات الملكيه
و قعدت اسبوع انام لوحدى و كنت زمان بخاف اوى من النوم لوحدى ....لانى طول عمرى متونسه باخواتى
بعد الاسبوع جوزى خد أمر من امه يطلع ينام فى شقته لكن فى اوضه و انا فى اوضه
اول ما سمعته بيفتح باب الشقه فرحت (منا كنت صغيره و هبله ) قلت اكيد هيجى يصالحنى
لكن للاسف مجاش و لقيته راح نام فى الاوضه التانيه سابنى شهر على الحال ده
و طبعا طول المده دى انا بخدم تحت عادى جدا و مكنتش اقدر اتقمص و لا ابان زعلانه
بعد كدا جوزى جه صالحنى و لما عاتبته قالى انتى عارفه مقدرش اعصى امى ...دا رضا الوالدين من رضا الله
المهم عدت الايام كلها شبه بعضها ....مرمطه من اول النهار لاخره ...دا غير بقا أن الاكل طول الاسبوع قرديحى مفيش غير يوم الخميس اللى كانت حماتى تخلينا نجيب ٣ فرخات أو بطه و فرختين ندبحهم و نطبخهم مع حله محشي
حماتى كنت تتسوق يوم الجمعه تجيب شويه طماطم تطبخهم للاسبوع كله .... شويه بتنجان لو مش زارعين فى الغيط ...شويه برتقال ...حاجات بسيطه يا دوب تمشي
انا فى الفتره دى جسمى ضعف اوى ...اولا من كتر الشغل ثانيا من قلة الاكل الكويس ...و بعد ما كنت زى الورده المفتحه بقيت دبلانه و على طول دايخه
كانوا لما يشوفونى دايخه يتريقوا على و يقولوا بين المدام حامل
و كان لى سلفه عقربه فى الطلعه و النزله تنبط على بالكلام مش سايبانى فى حالى ...و انا كنت بطنش و اعمل نفسي مش واخده بالى عشان معملش مشاكل مع حماتى
بعد حوالى سنه من الجواز حماتى نادت على و قالت لى
ايه يا نجلاء ...مفيش حمل و الا حكايتك ايه ؟؟
ربنا يرزق يا اما
انتى لازمن تروحى للدكتوره تشوف فيكى ايه ؟ انا مش هفضل مستنيه كتير ....سلايفك الاتنين من اول شهر حملوا على طول
و فعلا رحت للدكتوره مع اخت جوزى و طبعا الفلوس كانت معاها انا ممنوع اشيل قرش فى ايدى
الدكتوره قالت انتى يا بنتى زى الفل مفكيش اى حاجه....مستعجله ليه انتى لسه صغيره اوى يدوب ١٨ و الا ١٩ سنه مش كبيره
روحنا و حكينا الكلام لحماتى ....ردت و قالت انا مينفعنيش الكلام ده قدامك لآخر السنه لو محملتيش هجوز ابنى ....اظن انا كدا عدانى العيب و محدش يقدر يغلطنى
استنى يا نجلاء ...و فين اهلك من دا كله ؟؟
اهلى مين يا دكتور ...اهلى ما صدقوا رمونى و كنت لو يصادف و اشتكى لحد فيهم لما يجيلى فى العيد و الا حاجه كانوا يغلطونى و يجوا على و يقولولى عيشي ...معندناش بنات تغضب ..معندناش بنات تطلق
بقيت ادعى ربنا ليل نهار انى احمل عشان جوزى ميتجوزش على ...خاصه أن سلفى الصغير فى خلال السنه كان اتجوز و مراته حامل
و انا كنت مسار السخريه و التلقيح بالكلام على طول
و فى يوم كنت نازله عشان اشوف شغل الدار حسيت بدوخه بس المره دى كانت شديده شويه لدرجه ان الدنيا اسودت حواليا و لقيتنى بقع من طولى
جوزى اخدنى ودانى الوحده الصحيه عشان يقيسوا لى نسبه الانيميا و هناك الدكتوره طلبت انى اعمل اختبار حمل
و عملت الاختبار و قعدت استنى على نار لحد ما طلع التمرجى ينادى على الاسامى
و اول ما وصل لاسمى قلبى اترعش
نجلاء محمد ابراهيم
ايوه
اتفضلى
بصيت فى التحليل و لقيت نفسي حامل ....مكنتش مصدقه نفسي من الفرحه بقى هاين على انزل أسجد على الأرض حمد و شكر لله
جوزى هو كمان فرح اوى و دخلنا كشفنا و الدكتوره عملت لى كارت متابعه و ادتنى شويه فيتامينات و نصحتنى انى ارتاح خاصه فى التلات شهور الأولى عشان الجنين يثبت
طبعا انا ماشيه طول السكه و عماله احلم انى هرتاح زى سلفتى اللى حملت و حماتى ريحتها على الاخر
اول ما دخلنا و جوزى قالها على الخبر فرحت و قالت كويس ...انا كنت ناويالك على نيه سودا
يلا يا اختى شوفى اللى وراكى
بصيت لها و لجوزى كدا ...اللى هو ازاى يعنى ؟؟
حماده رد و قالها اصل الدكتوره قالت لها تستريح يا اما
نعم يا عين امك ...ليه هو احنا محملناش و كنا بنشتغل قدها عشر مرات ...بلا دلع مرق ...يلا يا اختى عشان تنزحى الحوض و تغسلى المواعين
و لاول مره ارد عليها و اقولها و اشمعنى محاسن سلفتى انتى مريحاها من اول شهر
ضحكت ضحكه مستفزه جدا و قالت ..هو انتى بتقارنى نفسك بمحاسن ؟؟؟ محاسن يا حبيبتى بنت ناس ...هو انتى مش شايفه اهلها داخلين خارجين عليها ازاى و جايبين لها اللى الحلو كله ...انتى بقا يا حبيبتى اهلك فين ؟ مبنشوفهمش الا من العيد للعيد و امك بتدخل عليكى بايه ٣ كيلو فاكهه 😏😏
فوقى لنفسك يا سنيوره و متبصيش لحد و يلا على شغلك يا اختى ...
قمت من قدامها وطبعا جوزى مقدرش ينطق و انا بقول فى نفسك منك لله يا بعيده 😔😭😭
#انتحار ( مستوحاه من قصه حقيقيه )
# الجزء_الخامس
فوقى لنفسك يا سنيوره و متبصيش لحد و يلا على شغلك يا اختى ...
قمت من قدامها وطبعا جوزى مقدرش ينطق و انا بقول فى نفسى منك لله يا بعيده 😔😭😭
مرت الايام و يوم عن يوم بتعب اكتر و حماتى مفيش فى قلبها رحمه ....كل ما تلاقينى دايخه و الا قاعده استريح شويه تتريق على و تقولى يا اختى على كهن النسوان ....انت عارف يا دكتور انا مكنتش اعرف معنى كلمه كهن دى اصلا ....
و فى يوم من الايام صحينا الصبح على صوت عالى و دوشه جوزى نزل جرى و انا نزلت وراه لقينا حماتى عماله تندب حظها و تقول اتسرقنا ....تقبوا الحيطه و سرقونا
سرقوا البهائم يا حماده ....الحق يا علوان ...الحق يا احمد الحقوا يا اولاد
طبعا جوزى و اخواته ركبوا عربيه سلفى النص نقل و طاروا يدوروا زى المجانين يمكن يلاقوا الحراميه لسه ماشيين فى السكه
انا كنت ساعتها فى الشهر الرابع و كنت تعبانه اوى ....و مع ذلك حماتى الظالمه حكمت على انقل معاهم و مع سلايفى طوب و رمل و زلط عشان نبنى الزريبه بطوب احمر بدل ما كانت معموله بالطين أو الطوب النى و الحراميه عرفوا يفتحوا فيها فتحه بسهوله من غير ما نسمعهم
بقيت اشيل مقطف الرمل و انا حاسه انى هموت ....و مش قادره اقولها لا..... هتشن على الحرب خاصه انها شايطه من حكايه السرقه ....
بعد شويه لقيت جالى مغص جامد جدا و خبط فى ضهرى شديد اوى ....وقفت و رميت الرمل من ايدى
لقيت حماتى بصت كدا و لسه هتزعق لقيت حاجه دافيه نازله على رجليا ببص لقتها دم
انا اول ماشفت الدم جالى هلع ....حماتى بصت كدا و قالت اقعدى....لا لا تعالى نامى على ضهرك
سلفتى قالت لها دى لازم تروح المستشفى شكلها بتسقط يا اما
و لا بتسقط و لا حاجه هما حبة دم نزلوا و خلاص
قعدت حوالى نص ساعه و الدم نازل منى زى الحنفيه و مش راضى يقف ...و بقيت صفرا زى اللمونه ....حمايا لما شاف كدا قالها
يا حاجه البت عماله تنزف ....البت هتموت ...لازم تروح المستشفى
و ماله يا حنين ...نسيب مصالحنا بقا و نلف ع المستشفيات
حرام يا حاجه البت اصفرت خالص و مغرقه الدنيا دم
ما خلاص يا راجل ....قوم يا اخويا وديها
طب هاتى فلوس عشان اوديها و اجيب لها الدوا
فلوس ؟؟ فلوس منين يا حبيبي ؟؟ انت مش معاك باقى معاشك اصرفه يلا يا اخويا على السنيوره
يا باى عليكى ....هصرفه يا اختى ...امال اسيب البت تموت
يلا يا بنتى جهزى نفسك و انا هروح اجيب عربيه عبدالحميد ابن عمى و نطلع على المستشفى
و فعلا طلعت انا و حمايا على المستشفى و هناك اجهضت الجنين 😔😔
طبعا الجنين كان متخلق و عمره يزيد عن الاربع شهور ...حمايا لما شافه قعد يعيط و سماه يزيد و اخده بعد ما وصلنى البيت و راح دفنه هو و جوزى فى الترب الخاصه بيهم
انا بقا روحت و انا هموت من الزعل ...ابنى ضنايا فقدته عشان واحده معندهاش ضمير ....هى اللى حرمتنى من ابنى .....منها لله
قعدت نايمه اسبوع فى سريري حالتى صعبه جدا و كنت خلاص قربت على الموت
امى و ابويا جم زارونى زى الغرب قعدوا ساعه معايا و امى قعدت تصبر فى شويه و مشيت
******************
بعد شويه اتعافيت و بدأت انزل تحت مره تانيه و بدأت المرمطه من تانى ....مفيش شهر و سلفتى محاسن ولدت ولد ....
و متعرفش بقا يا دكتور اد ايه الفرحه اللى كانت حماتى فيها ...بقت تزغرط و ترقص و تشيل الواد و تبوسه و كأن دا اول حفيد لها ....بقت تبالغ اوى و تقولها ربنا جبر بخاطرك يا محاسن عشان انتى بنت حلال و نيتك حلوه
كنت بسمع الكلام و قلبى بيتقطع عارفه انها بتلقح على و قلبى محروق على ابنى اللى مات بسببها و فى الاخر بتتهمنى انا انى نيتى وحشه عشان كدا ابنى مات
ساعتها يا دكتور دعيت عليها من حر قلبى و قلت تشوفيه فى بناتك يارب ....ربنا يسامحنى بقا على الدعوه دى ...بس من حرقتى و ظلمها لى
و كأن باب السما كان مفتوح .....لما جوزت بنتها بقت تحمل و تسقط ....حملت كذا مره و فى كل مره العيل ميكملش شهرين و ينزل ....لفت بيها على الدكاتره و على الشيوخ و كانت هتموت و تعالجها
بعد كدا حملت مره تانيه فى ابنى ياسين و بقيت المره دى اقوى من الاولى ...لما كانت تبقى عاوزه تحمل على فى شيئ كنت ارفض و اقولها لا ...انا مش هفقد ده زى اللى فات كفايه واحد مات منى
مرت شهور الحمل على نفس الوضع شويه كدا و شويه كدا
وولدت ياسين ابنى ....و مشوفتش الفرحه فى عنيها اللى كنت شايفاها لما سلفتى ولدت
حتى لما بقولها عاوزين نعمله سبوع حلو قالت
يلا يا اختى شدى حيلك انتى و امك السبوع عندنا على ام الواحده هى اللى بتجيب السبوع و اظن انتى شفتى أهل محاسن كانوا جايبين ايه و عملوا ايه ...يلا ورونا شطارتكم....انا عاوزه اوزع على البلد كلها
طبعا ساعتها بلمت ....احنا معندناش النظام كدا ....السبوع عندنا على الاب يعنى هو يخلف و حماته هى اللى تجيب ؟..دا ايه المنطق العجيب ده
كلمت امى من تليفون جوزى و قلت لها على موضوع السبوع ده
امى قالت منين يا بنتى ما انتى عارفه انى بجهز اخواتك البنات و يدوب اللى جاى على اد اللى رايح
يا اما ابوس ايدك حماتى هتبهدلنى لو مجبتليش سبوع ...سيرتى هتكون على كل لسان ....كفايه حكايه المواسم و الاعياد اللى كل شويه تسم بدنى انكم مبتجوش و لا تجيبوهالى
يا بنتى منا لو معايا مش هتاخر عليكى و الله
يا اما اتصرفى ....طب اقولك استلفى اى فلوس من اى حد و انا لما تيجى هديكى الخاتم الصغير بتاعى تبعيه و تسدى الفلوس اللى استلفتيها دى ....بس متكسفنيش قدام الناس بالله عليكى
حاضر يا بنتى هستلف لك ٥٠٠ جنيه من عمك رضوان و هقوله انى هجيبهمله الاسبوع الجاى
لا يا اما ٥٠٠ جنيه مش هيكفوا ....هاتى منه الف و نص عشان كمان تجبيلى شويه فراخ و شويه حاجات كدا قدام حماتى و سلايفى ب ٥٠٠ ....و تجيبي سبوع بالف جنيه
طب و الخاتم هجيب التمن دا يا نجلاء؟
ايوا يا امى دا ٤ جرام هيجيب و يزيد كمان
طيب يا بنتى ...بس يارب عمك رضوان يكون معاه المبلغ ده
إن شاء الله هيكون معاه ....و النبى ما تتاخرى على يا اما بكرا تكونى عندى
حاضر يا بنتى هقوم دلوقتى اجيب الحاجه كلها و اجهزها و من النجمه هكون عندك باذن الله
تانى يوم لقيت امى جايبه لى كل اللى قلت لها عليه
طبعا حماتى فرحت بالحاجه اوى و بقت ترحب بامى على غير العاده
لما امى انفردت بى قالت لى هاتى يا نجلاء الخاتم بقا عشان ابيعه و أدى للراجل حقه قبل ما انسي يا بنتى و امشي من غير ما اخده
قلت لها حاضر يا اما و قمت دخلت الاوضه اجيبه لها و ادتهولها و قلت لها خبيه بقا يا اما اوعى حد يشوفه
امى حطت الخاتم فى البوك بتاعها و قعدت شويه و قالت هقوم انا بقا عشان خاطر اخواتك و ابوكى
ايه دا هو انتى مش هتباتى معايا 🥺؟؟
لا مقدرش ... اخواتك ميعرفوش يتصرفوا من غيري
امى نزلت من عندى و انا بعيط على حالى ....دلوقتى حماتى هتبهدلنى ...دا محاسن امها قعدت معاها تخدمها لحد ما شمت نفسها و قامت زى القرد ....دلوقتى حماتى تمرمط بى الأرض و تقولى يا اللى امك سالتك و انتى بدمك مقعدتش معاكى 😔😔😔 ....بس يمكن الحاجه اللى امى جابتها تخليها تسكت شويه و متزعقش اوى
كل دا كان بيدور فى دماغى و مكنتش حاسبه حساب الداهيه اللى هتقع فوق دماغى بعد كدا 🥺😭😭😭
#انتحار ( مستوحاه من قصه حقيقيه )
# الجزء_السادس
دلوقتى حماتى تمرمط بى الأرض و تقولى يا اللى امك سابتك و انتى بدمك مقعدتش معاكى 😔😔😔 ....بس يمكن الحاجه اللى امى جابتها تخليها تسكت شويه و متزعقش اوى
كل دا كان بيدور فى دماغى و مكنتش حاسبه حساب الداهيه اللى هتقع فوق دماغى بعد كدا 🥺😭😭😭
بعد ما امى نزلت بدقايق دخلت ارتاح على سريري و فجأه لقيت حماتى و جوزى و بناتها الاربعه اللى كانوا بالصدفه كلهم مجتمعين تحت عندها ( لأجل حظى المنيل )
بفتح عينى لقيت كأن زبانيه جهنم واقفين فوق راسي
و لقيت الحيه الكبيره بتقول قومى يا حراميه ...قومى يا بنت الكلب يا جربوعه ...قومى ياللى ملكيش كاسر ...ياللى اهلك شحاتين يا حراميه
و بناتها يردوا عليها ....البت دى لازم تغور دلوقتى من البيت ...دى حراميه ملهاش امان
و انا مش فاهمه اى حاجه ...هما بيقولوا كدا ليه بقيت ابص لجوزى يمكن افهم منه اى حاجه بس كان واقف زعلان و بس مفيش اى رد فعل غير كدا
استجمعت شجاعتى و قلت فيه ايه يا اما انا عملت لكم ايه ؟؟
ردت الوليه:
امك مين يا حراميه انتى و امك ؟؟ اوعى حسك عينك تنطقى كلمة امى دى على لسانك
طب انا عملت ايه بس فهمينى
بقا يا بت بتقرطسينا و بتضحكى علينا و تخلى امك تجيب الحاجه بفلوسي و فلوس ابنى
طبعا انا سمعت كدا و كأن جردل ميه وقع على دماغى مكنتش عارفه ارد ...كل اللى جه فى دماغى ساعتها انى أنكر و بس
قلت محصلش ....و الله ما حصل
اخرصى متجبيش سيره ربنا على لسانك ....و كمان بتحلفى كدب ....اه صحيح ما انتى حراميه و تعملى اكتر من كدا
انا مسرقتش حاجه و الله ...طب مين قالك كدا ؟
اه يا ام عين بجحه يا قادره ...و كمان بتنكرى ؟ شهد بنت ابنى عمرها ما تكدب على ...سمعتك يا اختى و انتى بتدى
امك الخاتم اللى انا جايباه
طبعا انا اتخرصت و معرفتش انطق ...اتارى البت كانت فى المطبخ و انا بتكلم مع امى و مكنتش واخده بالى منها
طبعا حماتى لما لقتنى سكت زادت فيها هى و بناتها اكتر و اكتر لدرجة أنهم ابتدوا يشدو فى من على السرير و يقومونى و يقولوا لجوزى طلقها ....طلقها الحراميه بنت الحراميه دى ....و انا بدأت اعيط و ابص لجوزى استحلفه أنه يخلصنى من بين اديهم و ميسمعش كلامهم
لكن للاسف جوزى وقف زى التمثال كأنه بيتفرج على مسرحيه و ملوش اى دور فيها
بدأت اصرخ و اقولها خلاص و النبى سامحينى معنتش هعملها تانى
ردت و قالت و هو انا هستنى لما تعمليها تانى ...بت يا زينات افتحى الدولاب و هاتى الدهب اللى جايبينوا دا بتاعنا لتسرقوا الحراميه
بنتها فتحت الدولاب و اخدت الدهب كله و لقت جلابيتين جداد كان جوزى جايبهم لى بالقسط من ورا امه و لسه فى كيستهم ...راحت مطلعاهم و قالت لامها اتفرجى يا اما شوفى ابنك جايبلها ايه ؟؟
امه شافت الجلاليب و جن جنونها ...انت ازاى تجيب لها من ورايا ؟؟ هو البيت ده ملوش نظام و الا ايه ؟ منا بجيب لبس لكم و لنسوان اخواتك و عمر اخ من اخواتك ما عمل اللى عملته دا ...خدوهم يا بنات حلال عليكم عشان يتأدب بعد كدا و ميجيش حاجه من ورايا
طبعا حماتى اخدت دهبى و نزلت و هو ده اللى كانت طالعه عشانه
و كنت اشوف دهبى فى ايدها بعد كدا و كانت تغيظنى بيه و تقول نسوان مش وش نعمه
بعد الموقف ده يا دكتور انكسر جوايا شئ كبير اوى من ناحيه حماده جوزى .....حسيت انه مقدرش يحمينى و انا عيله مكسوره الجناح و ضعيفه لسه والده....يعنى لو كانوا ضربونى كنت مت....كمان ساب امه تاخد دهبى اللى هو حقى و سكت ...بقيت عايشه معاه زى ما يكون واحد غريب عنى ...
بعد الموقف ده أهل جوزى كلهم بقوا يتكلموا على و حماتى الله يسامحها بقت تقول على حراميه و انى كنت بسرق الاكل و بسرق حاجات كتير منها و هى مكنتش مديانى خوانه ...
عشت فى ذل و قهر كتير اوى و استحملت كتير اوى و بقى الكل يخاف منى علشان طبعا حراميه
قلت ما يهمنيش مدام بينى و بين ربنا عمار و مسرقتش حاجه يبقى خلاص .....انا اما اتصرفت فى الخاتم دا علشان كنت فاكره أنه بتاعى يعنى مأخدتش حاجه من جيب حد ....لكن منها لله فضحتنى و هى اللى سرقتنى
طب و اهلك يا نجلاء متدخلوش لما لقوهم خدوا الدهب ؟؟
اهلى ....اهلى مين يا دكتور منا قلت لك على اللى فيها و بعدين بعد الموضوع ده بشهرين ابويا مات
و طبعا محدش راح العزا غير حمايا و جوزى بس و راحوا زى الغرب قعدوا شويه و مشيوا و قبل ما جوزى يمشي نادى على و قالى هتباتى و الا هتيجى معايا ؟؟
قلت هبات عشان هنزور ابويا الصبح
قال خلاص يبقى تزورى و متتاخريش على الضهر تكونى عندى ...و مشي و سابنى حتى مدنيش حق المواصلات اللى هركبها و اروح له بيها .....اخدتها من اخويا
طبعا موت ابويا كسر ضهرى و اللى قهرنى أن حماتى معبرتنيش و لا كأنى كلبه ...و كان ميعاد جواز بنتها الاخيره بعد موت ابويا بعشر ايام
عملت الفرح عادى جدا حتى مجتش تقولى كلمه واحده تطيب بيها خاطرى
بقيت سامعه اصوات الاغانى و بدعى عليها انها متفرحش و زى ما كسرت نفسي ربنا يكسر نفسها البعيده
بعد كدا مرت الايام و امى تعبت اوى و جالها جلطه و كان اخواتى كلهم اتجوزوا و اتفقوا مع بعض أن كل واحد فينا يروح يقعد بيها يومين لحد ما تخف
و لما جيت اقول لجوزى على الكلام ده قالى مليش دعوه قولى لامى
طبعا انا كنت خايفه منها ...و قلت له هو يقولها
لقتها لما نزلت تحت بتقولى عاوزه تروحى فين يا سنيوره ؟ يومين ايه اللى عاوزه كل اسبوع تمشيهم ؟؟ و المصاريف بتاعه المرواح و المجى دى هتكون على مين أن شاء الله ؟؟ ....و بعدين يا اختى هى امك كانت قعدت معاكى و انتى والده عشان تروحى تقعدى معاها ؟؟
اسمعى أما اقولك عاوزه تروحى لامك اتفضلى الباب يفوت جمل ....لكن هتروح لوحدك من غير ابنك ومترجعيش هنا تانى فاهمه و الا مش فاهمه؟
و للاسف كنت جبانه و خفت امشي لمرجعش تانى و خفت مشوفش ابنى تانى و ياخدوا منى
قعدت و بعد اسبوع جالى خبر وفاة امى
طبعا اخواتى منسيوش لى الموقف ده و حاولت ابرر لهم انى معملتش كدا بخاطرى محدش فيهم سامحنى
و بقوا بعد كدا يتعاملوا معايا زى الغريب حتى زياره العيد مبقوش يجولى
بعد كدا مرت الايام و ياسين ابنى وصل تلات سنين و نص ...و فى يوم و احنا شغالين فى البيت حمايا جاله تليفون بعدها لقيت حماتى بتصرخ و اخوات جوزى و لقيت البيت كله اتقلب صريخ و عويل و لطم كنت ساعتها فى الزريبه بعلف البهايم ...جريت اشوف فى ايه و لقيت ..
#انتحار ( مستوحاه من قصه حقيقيه )
# الجزء_السابع
بعد كدا مرت الايام و ياسين ابنى وصل تلات سنين و نص ...و فى يوم و احنا شغالين فى البيت حمايا جاله تليفون بعدها لقيت حماتى بتصرخ و اخوات جوزى و لقيت البيت كله اتقلب صريخ و عويل و لطم كنت ساعتها فى الزريبه بعلف البهايم ...جريت اشوف فى ايه و لقيت
حماتى و اخوات جوزى كلهم بيصرخوا و بيقولوا علوان مات ....علوان ده سلفى الصغير اخر ولد عند حماتى و كان اتجوز بعدى و معاه عيلين
طبعا البيت اتقلب لمحزنه ....و صراحه انا كمان زعلت عليه و كنت خايفه أن تكون دى دعوتى علي امه بكسرة قلبها ....انا صراحه يا دكتور كنت بدعى الدعوه دى ليل نهار عليها زى ما هى كاسره نفسي و حاطانى فى دماغها دونا عن بقيه سلايفى .....بس برده مكنتش اتمنى أن الدعوه تيجى في سلفى دا
حماتى قعدت تصرخ لحد ما وقعت من طولها ....نسوان ولادها و اولادها اتلموا عليها يقوموها و يفوقوها و أن الوحيده اللى مقربتش منها و لا صعبت على ...بالعكس كنت بتمنى متقومش منها و تحصل ابنها
اللى عرفناه بعد كدا أن علوان مات فى حادثه قطر ...كان بيعدى السكه الحديد و قطر خبطه و طبعا كانت موته صعبه اوى و خاصه لشاب عنده حوالى ٢٢ سنه و صاحب عيال
طبعا عملوا عزا كبير و البلد كلها كانت حزينه على علوان
مرات علوان بعد العزا كانت عاوزه تمشي و تروح عند اهلها
حماتى استحلفتها و بقت هتبوس رجلها انها متمشيش و تاخد اولادها معاها لانهم بيفكروها بابوهم الله يرحمه
بعد حوالى شهرين من الحادثه دى لقيت حماتى بتنادى جوزى و تقوله تعالى عاوزاك
جوزى نزل اتكلم معاها حوالى ساعه و طلع مبلم
فى ايه مالك يا حماده ؟؟
مفيش
اما قالت لك حاجه زعلتك ؟
لأ .....يا ستى انا مش زعلان هتزعلينى بالعافيه ؟
بعد كدا بقا فى حركه مش عاديه فى البيت و حسيت ان الكل بيخطط لحاجه انا الوحيده اللى مش فاهماها و عامله زى الاطرش فى الزفه
و بقيت الاقى سلفتى محاسن الارمله دى قاعده تحت و معاها جوزى و امه كتير اوى بس مكنتش باخد فى بالى و لا خيالى خيلى انها على طول كدا نقلت العطا و فكرت فى حد تانى غير جوزها
و فى يوم و انا نازله سمعت حماتى بتتفق مع جوزى و حمايا و بتقولهم...
انهارده اخر يوم فى عدة محاسن ....بكرا باذن الله زى ما اتفقنا هتاخد ابوك و محاسن و ابو محاسن للماذون و تكتب عليها سكيتى كدا
طب مش هقول لمراتى يا اما
يوووووو ....هنقول يا سيدى بس هنحطها قدام الأمر الواقع ...احنا مش ناقصين نكد ...و أنت أولى تربى ولاد اخوك و تقعد على فرشه بدل ما واحد غريب ياخد الجمل بما حمل ...اخوك حاجته كلها جديده و خساره يا ابنى ....غير كمان أن محاسن اهلها حالتهم مرتاحه و هتورث شيئ و شويات مش زى مراتك الكحيانه ....انت يا حبيبي اولى
سمعت الكلام مكنتش قادره اقف على رجلى .....ياااا انتى لسه متهدتيش ...و مصممه تاخدى كل حاجه منى حتى جوزى ....مش كفايه دهبى و هدومى ....مش كفايه لقب حراميه اللى طلعتيه عليه 😔🥺🥺
فكرت لثوانى ادخل عليهم و اشتمهم بس خفت ...خفت منهم ..انا وحدانيه هروح فين لو مشتنى ....هعمل ايه ؟؟
استنيت لما جوزى طلع و قلت له انى سمعت كل حاجه
قعد يزعق و يقول انتى بتتصنتى علينا ....و بعدين انتى مال اهلك انتى ؟دى حاجه متخصكيش و لا لكى فيها و بعدين دا شرع ربنا هتعترضى كمان على شرع ربنا ؟
هو انت متعرفش فى الشرع الا ده ؟؟... طب و اشمعنى انت ؟؟ ليه مش اى حد تانى من اخواتك ؟
و لسه بقوله كدا لقيت حماتى واقفه قدامى طلعت على صوت جوزى و قالت لى
هقولك يا حلوه اشمعنى هو ....لان كل واحده من نسوان ولادى لها أهل و عزوه لكن انتى ملكيش حد يسال عليكى ...كمان انتى مش نازلالى من زور من اول ما دخلتى على ...و لا بقبل ابنك عشان شبهك
هى قالت لى كدا يا دكتور و انا انفجرت معرفش كنت بقول الكلام ازاى :
انتى ظالمه ربنا يهدك يا شيخه ....ايه يا شيخه دا ابنك مات فى ثانيه مبتفكريش انك ممكن تموتى فى ثانيه كدا و تقابلى ربنا ....هتقوليله ايه يا ظالمه ؟ منك لله منك لله ربنا يخلص منك اللى عملتيه فى و ظلمك لى
انا قلت كدا يا دكتور و عينك ما تشوف الا النور ....لقيت حماتى و جوزى هجموا على و بقوا يرزعوا فى زى ما اكون مرتبه وقعت فى ايد منجد عفى 😂 .... بقيت أحاول أجرى منهم و هما ورايا ....جوزى جابنى من شعرى و بقا يقولى بتشتمى امى يا بنت الكلب و هى كمان تشتم و فى الاخر زقونى وقعت على تربيزه الانتريه الازاز .....رحت كسره الازاز ووقعت جوه الترابيزه ....طبعا مكنتش قادره اقوم من الضرب جسمى كله ازرق و عنيا قفلت و ازرقت و ازاز التربيزه عورنى و هدومى اتقطعت
راحت حماتى قايله لجوزى البت دى متفضلش على ذمتك لحظه ......قوم أرمى بنت الكلب دى فى الشارع
صرخت و قلت لا مش ماشيه ....مش همشي إلا و ابنى معايا
قالت غورى انتى و ابنك فى ستين داهيه مش عاوزين حاجه من قطرك
و راح جوزى شاددنى من وسط التربيزه من شعرى و قعد يزق فى لغايه ما خرجنى بره البيت و رمانى على الطريق مضروبه و هدومى مقطعه و رمالى ابنى جنبى و قالى انتى طالق
و سابنى يا دكتور مرميه مش قادره اقوم من مكاني ....ناس ولاد حلال لما شافونى كدا سترونى بجلابيه و ادونى فلوس اروح بيها لاخواتى
ياااااا معقوله فى ناس بالوحشيه دى ؟
كنت زيك كدا مش مصدقه .... بس اللى شفته بعينى يقول أن فى ناس قلوبها اقسى من الحجر
روحت لاخواتى الولاد منا يتيمه ام و اب .....و بدأ فصل جديد من العذاب
مقابله وحشه بالرغم من الحاله اللى انا رايحلهم بيها ...مرات اخويا سالتنى يعنى انتى اتطلقتى و هتقعدى فين ؟؟
قلت لها هنا فى بيت امى
(اخويا كان خد الشقه بعد موت امى لانه كان متجوز معاها فيها و كانت ايجار قديم )
قالت لأ يا حبيبتى الشقه دلوقتى مبقتش بتاعه امك الشقه بقت بتاعتنا و معانا عقد بكدا و بندفع ايجارها
قلت لها يعنى ايه ؟؟ اترمى فى الشارع ؟؟ و انتى يا اخويا يا ابن امى و ابويا موافق على الكلام ده ؟؟
يا نجلاء انتى شايفه الحال و انا على أدى ....و مش هقدر على مصاريفك انتى و ابنك ....انتى ممكن تقعدى معانا كام يوم لحد ما تدبرى امورك
متشكرين يا ابن ابويا كتر خيرك
و اخدت ابنى و رحت لاختى مريم و صراحه استقبلتني احسن من اخويا و داوت جروحى و قعدت معاها فتره و ابتديت ادور على شغل علشان اصرف على نفسي انا و ابنى و قولت اطلع معاش ابويا بما انى مطلقه اهو حاجه تعينى على تربيه ابنى
و فعلا رحت اسال على الاوراق المطلوبه و اللى كان من بينها شهاده الطلاق ....كنت محتاره اجيبها منين
فى ناس ولاد حلال قالولى تقدرى تطلعى شهاده بالكمبيوتر و فعلا رحت السجل المدنى طلعت شهاده و شهاده ميلاد لابنى بالكمبيوتر
بعدها طلعت على الصحه علشان اطلع لابنى الكراسه بتاعه الصحه لأنهم بقوا يطلبوها فى التقديم للحضانه و هناك عرفت جوزى عمرو ....و شرحت له انى ممعيش اوراق و عاوزه أقدم لابنى و هو وعدنى أنه هيساعدنى و ادانى رقم تليفونه ....و انا كنت جبت تليفون مستعمل صغير من شغلى علشان امشي شغلى بيه
ابتدى عمرو يكلمنى و يتطمن على و فعلا خلص لى الورق اللى كنت عاوزاه و جرى معايا فى ورق معاش ابويا الله يرحمه و كان له معارف كتير اوى نفعونى و خلصولى ورقى بسرعه ....كنت حاسه ان ربنا بعتهولى نجده و حنن قلبه على و أنه الوحيد اللى مد لى ايده و وقف جنبى
و فى يوم رجعت من شغلى و كانت اختى بره بتجيب طلبات ...لقيت جوزها دخل على الاوضه و بيقولى هو مين اللى انتى رايحه جايه معاه ده ؟ و عماله تكلميه فى التليفون ؟
دا واحد بيساعدنى و بيخلص لى ورق المعاش
طب منا اولى من الغريب .....هو انتى مش حاسه بى ؟
انت بتقول ايه ؟ انت اتجننت ؟؟
و ابتدى يقرب منى ...رحت لطشاه على وشه بالقلم
راح زققنى و قالى انتى فاكره نفسك ايه ؟
فى اللحظه دى اختى دخلت ....و سمعت جوزها بيقول انتى فاكره نفسك ايه ؟
قالت فى ايه ؟ ايه اللى حصل ؟
انا سكت ...لكن هو رد و قال اختك المحترمه بتتمسح فى .... استغفر الله العظيم يارب
اختى بصت لى كدا بذهول
قلت لها انتى هتصدقيه ؟ دا هو اللى كان بيتحرش بى
راح هو رد بسرعه طب على الطلاق ما انتى قاعده فيها دقيقه واحده و يلا خدى ابنك و غورى فى داهيه ...دا جزاتى انى فتحت لك بيتى و قعدتك معايا صحيح مبيطمرش فيكى حاجه
اختى بقا وقفت منطقتش و سابتنى امشي بابنى من غير ما تقول كلمه واحده
خرجت فى الشارع مش عارفه اروح فين و لا اجى منين
منك لله يا حماده ...منك لله يا عبدالله ...يا رب اروح فين ؟
#انتحار ( مستوحاه من قصه حقيقيه )
# الجزء_الثامن
خرجت فى الشارع مش عارفه اروح فين و لا اجى منين
منك لله يا حماده ...منك لله يا عبدالله ...يا رب اروح فين ؟
بقيت الف على رجليا انا و ابنى مش لاقيه اى حاجه مناسبه و على اد الفلوس اللى معايا ..فكرت اروح اقعد بابنى فى اى جامع لحد ما ربنا يدبرها
و فجأه لقيت موبيلى بيرن و لقيت عمرو بيكلمنى ... مقدرتش امسك نفسي و صعبت على روحى اوى و روحت معيطه
هو انزعج جدا و كنت حاسه أنه خايف على بجد
فى ايه مالك ؟ بتعيطى ليه بس
مفيش يا عمرو
لا بالله عليكى قوليلى فيكى ايه ؟
مفيش انا خرجت من عند اختى و مش عارفه اروح فين بابنى
خرجتى ليه من بيت اختك ؟
مشكله كدا حصلت بينى و بينها
طب انتى فين دلوقتى ؟؟
انا ماشيه فى الشارع مش عارفه اعمل ايه ؟
طب تعرفى تروحى محطه مترو الشهداء ؟
ايوه اعرف ... بس ليه
طيب هستناكى هناك و اول ما توصلى رنى على
عارفه انك هتغلطنى يا دكتور و تقولى ازاى تروحى لواحد غريب... ....بس صدقنى انا ساعتها دماغى اتشلت و معرفتش افكر ....هو الوحيد اللى مد لى ايده ....حتى اخواتى اتخلوا عنى و مبقوش يسألوا على و لا على ابنى
ركبت و رحت عند محطة المترو و رنيت عليه كان هو وصل قبل منى وواقف مستنينى ....ثوانى و لقيته واقف قدام عنيا
الدنيا كانت ليلت ساعتها و ابنى نام على كتفى و كنا من الصبح ما أكلناش حاجه و لا حطينا لقمه فى بطننا
اخد ابنى من على دراعى واخدنا أكلنا فى محل اكل و لقيته بيتصل بواحد صاحبه و بيقوله أنه هيجى يبات معاه يومين
بعدها جاب شويه حاجات من السوبر ماركت .... زبادى و لبن و جبنه و عيش فينو و اخدنى ودانى شقته اللى قاعد فيها ...شقه صغيره اوضتين و صاله و سابنى من على الباب وقالى ادخلى نامى دلوقتى انتى و ابنك على ما أدبر لك سكن .... و اقفلى على نفسك كويس المفتاح اهو ...عاوزه حاجه تانى ؟
لا كتر خيرك مش عارفه اشكرك ازاى و الله
لا شكر على واجب ...اى حد مكانى كان هيعمل كدا...بكرا باذن الله هفوت عليكى فى شغلك عشان نتكلم كلمتين سوا
هزيت راسي و قلت حاضر ....مع السلامه
قمت تانى يوم ركبت المترو و وديت ابنى الحضانه و رحت على شغلى ....و على اخر اليوم عمرو اتصل على و قالى أنه واقف بره مستنينى
خرجت لقيته واقف ماسك الموبيل و بيتكلم مع واحده و بيزعق و بيقولها انا زهقت يا شيخه ....يعنى طفشت و سبت لك البلد كلها و برده مش نافع ...الله يخربيت قرفك
قفل السكه و هو متضايق اوى ..و بدأ يدخن بطريقه عصبيه اوى ...بقا ينفخ دخان السيجاره كأنه بيطلع زهقه فيها
مشيت معاه شويه لحد ما وصلنا حضانه ياسين ابنى و اخدت الولد و خرجت ....كل ده و انا منطقتش بكلمه
و لما قربنا على محطة المترو لقيته بيقولى ما تيجى نقعد فى حته ...انا مخنوق و مش عايز اروح دلوقتى
قلت له ماشي بس بشرط تقولى ايه مزعلك اوى كدا انا اول مره اشوفك فى الحاله ده
حاضر هقولك لما نوصل ......
مشينا شويه لحد ما وصلنا جنينه حلوه فيها مراجيح للاطفال ....ابنى اول ما شافها فرح اوى و بقا يتنطط
عمرو كان بيعامل ابنى معامله احسن ما أبوه كان بيعامله ...اول ما شاف ياسين فرحان اخده و قعد يمرجحه على كل مرجيحه شويه و اشتراله كوره و الواد قعد يلعب بيها
عمرو جاب لنا حاجه ساقعه ....و اول ما قعد قالى
تتجوزينى ؟؟
اتجوزك ازاى ؟؟ انت بتقول ايه انت مش متجوز ؟؟
ايوه متجوز بس تعبان في حياتى ....مراتى دى بنت خالتى و امى هى اللى جوزتهالى و انا مكنتش عاوزها ...بس امى حلفت على و زعلت منى لما رفضتها و قالت لى يا ابنى دى من لحمى و دمى و ستر و غطا علينا ...و اضطريت اتجوزها ...خلفت منها عيلين بس مش مريحانى طول النهار نقار و خناقات ......زهقت منها نقلت شغلى القاهره عشان ابعد عن وشها و كنت كل شهر انزل يومين عشان اشوف ابويا و امى و اولادى ....و بالرغم من كدا مش سايبانى فى حالى و بتنكد على كل شويه فى التليفون
يعنى هى اللى كانت بتكلمك من شويه ؟؟؟
ايوه هى ....
طب و كانت عاوزه ايه ؟؟
عماله تشتكيلى من امى اللى هى خالتها و اللى هى سبب فى الجوازه دى من الاول ....امى ست مريضه مبتقومش من سريرها الا تروح الحمام ...فأنا قلت لها من اول يوم دى خالتك قبل ما تكون حماتك يعنى زى امك و محتاجاكى و معدش لها غيري لانى اختى مسافره بره مع جوزها .
طيب فين المشكله ؟؟
المشكله يا ستى أن الوضع ده مش عاجبها و من اول ما اتجوزنا و هى عماله تزن و عايزه تنفصل عن امى و تقولى انت مش جايبنى خدامه عندها
يا بنتى عيب عليكى تقولى كدا ....دا إنسانيا حتى لو لكى جاره مريضه ملهاش حد هتشوف طلباتها
و بعدين حقوده و دايما تحسد فى اختى و تقول هى مستريحه و متهنيه هناك و انا اللى شغاله خدامه عند امك هنا
بصى يا نجلاء انتى محتاجانى و انا محتاجك ...انا من اول ما شفتك و انا حاسس انى مشدود ليكى ... حاسس انى اعرفك من زمان ...حاسس انك من دمى
انا كنت بسمع الكلام ده و مش مصدقه نفسي معقوله لقيت اللى يحبنى و يعاملنى كأنسانه ....معقوله هعيش عيشه طبيعية زى كل الناس ....معقوله هفرح بعد الشقا اللى شفته ده ...
عمرو قطع تفكيرى و قالى انا هسيبك تفكرى لبكرا .... و صدقينى مهما يكون قرارك انا برده هقف جنبك و مش هسيبك ابدا
بس انت عارف يا عمرو انى ابتديت اخد معاش ابويا ..و كمان اخاف اتجوز طليقى ياخد ابنى منى
منا كنت عاوز اقولك على كدا برده بس كنت مستنى موافقتك الاول و بعدين نتكلم فى التفاصيل ...انا برده بظروفى دى مينفعش اتجوز و الناس عندى فى البلد تعرف لأن زى ما قلت لك مراتى بنت خالتى و هى اللى بتاخد بالها من امى برده ...و لو عرفت هتقلب الدنيا ...و امى كمان ممكن تزعل منى
طب يبقى كدا مش هينفع نتجوز يا عمرو ...احنا الاتنين عندنا ظروف تمنعنا من الجواز
يعنى انتى مبدئيا كدا موافقه و الا لأ ؟
انا ....انا يعنى
طب بصى مترديش دلوقتى ....بس موضوع جوازنا ده ممكن يتحل بأننا نتجوز عرفى
عرفى ايه ؟ لا لا لا .... عرفى لا ....دا حرام
يا ستى مش حرام و لا حاجه مدام متوافر فيه شروط عقد الزواج يبقى خلاص .....انتى موافقه و ،هتقولى لاخواتك و الناس اللى حوالينا كلهم هيكونوا عارفين انك مراتى و هنجيب اتنين شهود ....يبقى كدا شروط العقد كلها متوافره و بكدا مش هيكون حرام
مين اللى قالك كدا يا عمرو ؟
يا بنتى هو ايام زمان كانوا بيكتبوا ورق ؟؟ و الا كان الزواج بيتم بمجرد توافر شروط الزواج
طب ما هنا هينقص الولى اللى يجوزنى
يا ستى انتى ثيب....بعض الفقهاء بيقولوا أن الثيب ممكن تجوز نفسها و على العموم لو عايزه اخوكى يجى و يكون وليك معنديش أى مانع
طيب يا عمرو انا هقول لاخواتى و ارد عليك
تمام اتصلى عليهم أو روحيلهم و ردى على
. ******************
بعد كدا اتصلت على اخواتى الولاد و قلت لهم انى جايلهم ....و روحت حكيت لهم على عمرو و أنه عاوز يتجوزنى عرفى عشان المعاش و عشان ابنى ميتخدش منى ....اخواتى سكتوا ...و اللى رد زوجاتهم و قالوا
و ماله يا حبيبتى مدام حلال خلاص ....هو انتى هتعملى ايه يعنى ....ما هو لازم تكونى فى رقبة راجل برده
يعنى انتوا موافقين ؟
رد اخويا اللى عاوزاه اعمليه يا نجلاء انتى ثيب زى ما قالك ....يعنى مش عيله لسه
طب مفيش حد منكم يجى معايا يجوزنى ؟
لا روحى لوحدك احنا ملناش فيه
متشكرين يا اخواتى ....الف شكر
و طلعت من عندهم و بعد ما كنت مترددة و مش عارفه اقبل و الا ارفض ...طلعت و انا خلاص موافقه
اتصلت على عمرو و قلت له ايوه يا عمرو انا خلاص موافقه 😔
#انتحار ( مستوحاه من قصه حقيقيه )
# الجزء_التاسع
و طلعت من عند اخواتى و بعد ما كنت مترددة و مش عارفه اقبل و الا ارفض ...طلعت و انا خلاص موافقه
اتصلت على عمرو و قلت له ايوه يا عمرو انا خلاص موافقه 😔
عمرو فرح اوى قالى بكرا بإذن الله هاخدك و نروح لمحامى صاحبى نكتب الورق
و فعلا تانى يوم رحنا لمحامى و كان عمرو محضر اتنين زمايله شهود على العقد
و اتجوزت و كنت فاكره انى خلاص ارتحت و خلاص جالى اللى هيعوضنى عن الايام السودا اللى شفتها فى حياتى ....عشت شهر مع عمرو و انا مش مصدقه نفسي من الفرحه ...اخيرا ربنا عوضنى و ادانى الزوج اللى كنت بحلم بيه من زمان
و فى يوم لقيت عمرو داخل على زعلان و قاعد يدخن بشراهة
مالك يا عمرو ؟؟ زعلان ليه ؟
مفيش يا نجلاء
اخص عليك بتخبى على نجلاء حبيبتك
لا ابدا يا حبيبتى مبخبيش و لا حاجه ...بس امى تعبت شويه و الدكتور قال عندها جلطه و محتاجه اشعه و علاج كتير و انا ممعييش ....و حاولت استلف من حد من زمايلى ملقتش حد يسلفنى
هو انت عاوز كام ؟؟
اى مبلغ ان شالله الف جنيه بس ...عشان اعرف اعملها الاشعه المطلوبه و اجيب لها الدوا
طب استنى .....و قمت يا دكتور بخيبتى جبت الالف جنيه اللى حيلتى و اللى كنت بقالى كام شهر بحوش فيها و اديتهاله
هو شاف الفلوس و عينه لمعت و عمل فى الاول أنه مش هياخدهم
و انا بهبلى كنت مصدقه و عماله أحلف عليه أنه لازم ياخدهم لازعل منه و عيب كدا ميصحش ..هو انت عامل فرق بينى و بينك و الا ايه ؟
و فى الاخر و بعد محايله كتير اخدهم منى و راح بايس ايدى و قالى ربنا يخليكى لى يا حبيبتى ....دا لو مراتى الاولانيه متعملش كدا ابدا ....انتى فعلا جدعه و بمية راجل ....هقوم انا دلوقتى عشان الحق اروح اشوف الحاجه و هقعد يومين باذن الله و اجيلك
مع السلامه يا حبيبي ...ابقى طمنى عليها
حاضر يا حبيبتى ...لما أخرج فى اى حته بره هبقى اتصل عليكى عشان محدش يحس بس
منا فاهمه طبعا ....يلا لا اله الا الله
محمد رسول الله
و مشي عمرو و قعد بدل اليومين اسبوع و فضل كل ما يكلمنى يقول اصل امى تعبانه لسه اصلى رايح اوديها اصل رايح اجيبها ....و انا اصدق
بعد كدا المواقف كترت و بقى كل يوم و التانى يطلع بحجه ياخد بيها فلوسي ...و انا كنت بحبه و بديله فلوسي بكل سماحة نفس
و فى يوم تعبت شويه و حسيت بدوخه جامده...طلعت من شغلى رحت كشفت و الدكتور طلب منى اعمل اختبار حمل فى الدم ...و عملت و قعدت استنى شويه و عرفت انى حامل ...طبعا فرحت اوى و كنت متخيله أن عمرو هيفرح هو كمان لما يعرف انى حامل ...
رجعت البيت و انا طايره و فاكره انى عاملاله مفاجأه
لما رجع البيت و قلت له سهم و سكت مقالش حتى مبروك
هو انت زعلان انى حامل ؟؟
لا ... ابدا
اومال مش باين عليك الفرحه ليه ؟دا حتى مقولتليش مبروك
مفيش حاجه يا نجلاء على العموم مبروك
يااا ... هو انت مكنتش عاوز تخلف منى و الا ايه؟
لا ابدا ...انتى بتخرفى ..يلا عشان نتغدى
بعد الموقف ده بكام يوم حسيت بمغصه جامده فى بطنى ....مغصه انا عارفها و جربتها قبل كدا ...جريت على اقرب مستوصف انا و جوزى و لقيت نفسي باجهض الجنين
و لقيت عمرو مزعلش و لا كأن اللى فى بطنى دا كان ابنه ....بالعكس لقيت علامات الفرح على وشه
و لما ضايقنى موقفه دا أنكر و قالى أنه بيتهيألى
بعدها بشهرين حملت مره تانيه و اتكرر موضوع الإجهاض ده و كنت محتاره ليه كل ما احمل ابنى يموت فى بطنى و ميكملش ....و فى نفس الوقت عمرو و لا على باله
نفسيتى تعبت اوى و بقيت خايفه انى مخلفش مره تانيه
عمرو قعد يقولى كفايه ياسين علينا ...و انا كمان عندى عيلين و الحمد لله على كده
قلت له هو انت مش عاوز تخلف منى ؟
قالى تانى يا نجلاء ؟؟ تانى بتقولى الكلام ده ؟ يعنى دا جزاتى انى بخفف عنك
معلش يا عمرو انا اعصابى تعبانه شويه و حكايه الإجهاض المتكرر دى هتجننى خايفه يكون حد عملى سحر او حصلى حاجه مخليانى مش قادره اكمل الحمل
يا شيخه سحر ايه و كلام فارغ ايه ؟
دا نصيب و قدر ...لو ربنا كاتب لك هتشوفى ...مش كاتب بقا يبقى الحمد لله على كل حال
بعد كدا حاولت مركزش كتير فى حكايه الخلفه دى عشان متعبش نفسي و قلت الحمد لله على ياسين و خلاص ...بس بعد كام شهر اكتشفت انى حامل مره تالته و المره دى بقا كنت حريصه اوى إن الحمل ميحصلوش زى اللى قبله
اول ما عرفت انى حامل المره دى معرفش جه فى دماغى انى مقولش لجوزى ....يمكن عشان كنت خايفه للجنين دا ميكملش زى اللى قبله و يتكرر زعلى و خناقى معاه
رحت لدكتور كبير اتابع معاه و قلت له انى مؤخرا اجهضت مرتين
الدكتور سألنى عن السبب ...هل كان شغلى مرهق أو شلت حاجه تقيله أو تعاطيت ادويه اثناء فتره الحمل
قلت بالعكس يا دكتور انا شغلى مش مرهق خالص و كنت اول ما اعرف انى حامل كنت باخد بالى جدا
و بالنسبه للادويه جوزى شغال فى الصحه و كان بيجيب لى فيتامينات من هناك كنت باخدها من اول شهر
فيتامينات ايه دى ؟
اهى انا جايباها معايا علشان اوريها لحضرتك و اعرف منك اخدها و الا لا .....اتفضل اهم
ايه دا ؟؟ مين قالك أن دا فيتامين ؟
امال ايه يا دكتور ؟؟
دا شريط بنديه للى عايزه تنزل الجنين ....هو مين اللى كتب لك على ده ؟
محدش كتب لى دا جوزى جابهولى و قالى أنه لتغذيه الجنين و عشان يبقى افضل و كنت باخد منه تلات مرات فى اليوم
يا خبر ابيض ....دا هو ده سبب الإجهاض ...اوعى تاخديه تانى دا لو عاوزه الحمل دا يكمل
طبعا يا دكتور عاوزاه يكمل امال انا جيت انهارده ليه
الدكتور كتب لى على مثبت و حمض الفوليك و قالى تعاليلى فى الاعاده و تكونى عاملالى صوره دم كامله
حاضر حاضر يا دكتور
بقيت ماشيه فى الشارع مش مصدقه نفسي ...معقوله عمرو يعمل فى كدا ؟؟.....دا كدا كان ممكن يموتنى
طب و هان عليه ابنه و الا بنته اللى فى بطنى ...انا مش مصدقه
دخلت اجيب الدوا من الصيدليه اللى كتبوا لى الدكتور و قلت لنفسي لما اسال الصيدلى يمكن دكتور النسا غلطان
طلعت الشريط ووريته للصيدلى قالى نفس كلام الدكتور
روحت البيت و بعد شويه عمرو دخل
سلام عليكم يا حبيبتى
و عليكم السلام يا ابو احمد
يااا اول مره تقوليها يعنى ؟
هو انت مش ابو احمد برده ؟
ايوا بس انا عمرو حبيبك
اه بالمناسبه يا عمرو يا حبيبي مش انا حامل ؟؟
و الله ...طب الف مبروك ...هبقى اجيب لك الفيتامين بقا و انا جاى بكرا من الشغل
ياااا على حنيه قلبك و الله من غيرك معرفش انا كنت عملت ايه....بس اقولك متتعبش نفسك انا عندى اهو باقى الشريطين اللى جبتهوملى قبل كدا
طب كويس خدى منهم بقا من انهارده
انا بجد مش مصدقه نفسي ....ليه تعمل كدا
اعمل ايه يا بنتى ؟؟؟؟؟؟
انت طلعت العن من جوزى الاولانى .... حماده كان جبان اه و ابن امه بس انت مش بنى ادم ...انت قاتل
ايه الهبل اللى بتقوليه دا يا نجلاء ؟ اتظبطى فى الكلام كدا
قاتل ايه و هبل ايه ؟
انت عارف انا بتكلم على ايه كويس اوى ....بتدينى برشام يسقطنى يا قاتل ولادك ؟؟
برشام ايه و نيله ايه ...انتى اكيد اتجننتى
ايوا اتجننت لما كنت بتخلينى أجهض و انت عامل نفسك متعرفش حاجه ....و انت بتشوفنى بموت و لا كان بيهمك
اتجننت لما وثقت فيك و اديتك كل فلوسي ...اتجننت لما افتكرت انك حقيقى بتحبنى
طبعا عمرو مكنش عارف يرد على ....و انا قعدت اعيط على حالى
عمرو دخل حضر شنطة هدوم و اخدها فى ايده و مشي من غير و لا كلمه
و انا بقا قعدت اعيط على حالى 😔🥺 و بختى المايل فى جوزاتى الاتنين 😭😭😭
#انتحار ( مستوحاه من قصه حقيقيه )
# الجزء_العاشر
عمرو دخل حضر شنطة هدوم و اخدها فى ايده و مشي من غير و لا كلمه
و انا بقا قعدت اعيط على حالى 😔🥺 و بختى المايل فى جوزاتى الاتنين 😭😭😭
قعدت شهر معرفش عنه حاجه و صراحه مكنتش طايقه اسمع عنه اى حاجه
و فى يوم و انا قاعده فى بيتى بعد ما خلصت شغلى جالى تليفون من رقم غريب
الو
الو مين معايا ؟
انا عمك ابو عمرو
ابو عمرو مين ؟
ابو عمرو جوزك مش انتى نجلاء ؟
ايوا انا نجلاء ....اهلا بيك يا عمى
اهلا بيكى يا بنتى ....عمرو حكالى على كل حاجه و انا بعتذر لك بالنيابه عنه و عاوزكم ترجعوا لبعض
يا عمى انا هتجنن ازاى هو كان بيعمل كدا معايا و لما هو مش بيحبنى و مش عاوز يعيش معايا بيتجوزنى ليه من الاول ؟
يا بنتى عمرو بيحبك بس هو مخه قاله العيل اللى هيجى ده هيتكتب ازاى و انتوا متجوزين عرفى و فى نفس الوقت محبش يزعلك و يقولك نزليه ...انا عارف أنه غلطان طبعا بس هو ندمان و بيحبك يا بنتى
طيب يا عمى انا اعمل ايه دلوقتى ؟...ما يمكن يجى يعمل فى حاجه تانى عشان أسقط
لا لا متخافيش انا هجيبه و اجى نقعد سوا كلنا و نتكلم و اوعدك أنه مش هيعمل حاجه تضايقك تانى ابدا
طيب يا عمى ماشي
يعنى موافقه ؟؟؟ طيب بكره الجمعه هجيبه و نيجى نصلى الجمعه فى الجامع اللى قدام البيت و بعدها هاجى معاه عشان اتغدا عندك و اشوف طبيخك الحلو ....عمرو بيشكرلى فى أكلك اوى و لازم اجرب بنفسي 😁
عنيا يا عمى ....تشرف و الله
قفلت السكه و بدأت أفكر هل انا اتسرعت انى وافقت أن عمرو يرجع مره تانيه ؟ و الا خلاص المفروض أنه حسب كلام أبوه ندم و خلاص
و صراحه يا دكتور انا كنت محتاجاه برده فى حياتى ...منا مليش حد غيره زى ما قلت لك ...و لما اختفى من حياتى حسيت ان حياتى اسودت و كل الالوان اللى فيها راحت
تانى يوم قمت من بدرى جبت كرنبه و بطه و حمام و عملت محشي و مكرونه باشميل و كفته و سمبوسه و جهزت صنيه بسبوسه بالقشطه و ظبطت سفره جميله لان دى اول مره حمايا يدخل على و يشوفنى
بعد الجمعه لقيت الباب بيخبط فتحت لقيت حمايا ... راجل كبير فى السن حوالى ٦٥ سنه شبه عمرو جوزى بس شعره ابيض و لابس نضاره و لقيت عمرو جوزى واقف جنبه و حاطط وشه فى الارض دقنه طويله و خاسس اوى ....شكله صعب على اوى
المهم دخلوا و أبوه صالحنا على بعض و اتغدينا سوا كلنا
و أبوه سابنا و مشي بعد ما نبه على عمرو أنه ميزعلنيش تانى و قالى نمرتى معاكى يا بنتى ...فى اى وقت عمرو يزعلك اتصلى على ...يلا اسيبكم انا بقا
حمايا مشي و عمرو قام باس ايدى و راسي و قالى حقك على
مرت الايام و عدت شهور الحمل و كنت طول الفتره دى بتواصل مع أبوه من وقت للتانى ...و كان خلاص فاضل على ميعاد ولادتى ايام
دخل على عمرو و لقيته دخل على الدولاب و جاب الشنطه اللى بيسافر بيها و عمال يحط فيها هدوم
ايه دا انت بتعمل ايه؟
زى ما انتى شايفه بحضر شنطه هدومى
منا عارفه انك بتحضر شنطة هدومك بس ليه؟
ايه هو انتى نسيتى أن لى بيت تانى و الا ايه ؟
لا منستش و لا حاجه بس اشمعنى دلوقتى ؟
ولادى وحشونى يا ستى .....ايه فيها حاجه دى ؟؟
هو فى ايه ؟ انت بتكلمنى كدا ليه ؟ هو انا قلت لك متروحش لولادك ما انت بقالك شهرين منزلتش حبكت تنزل دلوقتى؟
أدى انتى قولتيها بنفسك اهو ...بقالى شهرين مشفتش ولادى و امى و ابويا ..يبقى لما اروح لهم دلوقتى تبقى حاجه طبيعيه
طب و انا ...انت مش عارف انى خلاص قربت أولد ...اعمل ايه لو تعبت بالليل و ملقتكش جنبى و انت عارف انى مليش حد
يا ستى هو اسبوع اللى هقعده ..خلاص يعنى ظابطه نفسك انك تولدى دلوقتى ؟
هو ايه اللى ظابطه نفسي ...هو مش دا ميعادى؟ هو انا هخترع يعنى ؟
بقولك ايه متوجعيش دماغى و بطلى زن ....انا مش عارف الانانيه اللى انتى فيها دى ... انا هسافر غصب عنك و أعلى ما فى خيلك اركبيه
انت بتقول ايه ؟؟ انت عاوز تتخانق بقا ؟
ايوا عاوز اتخانق .....طب اقولك على الطلاق منا حاضر لك ولاده و يلا غورى بقا ...هسيبهالك مخضره
و مشي و هو عمال يبرطم و يقول الله يخربيت الجواز على اللى عاوز يتجوز انا ايه اللى عملته فى نفسي دا
انا بقا كنت مذهوله ....اد كدا اتجوزت بنى ادم جبان مش عاوز يتحمل مسؤليه؟؟ كان لازم اعرف كدا من الاول من ساعه ما ساب مراته و ساب مسؤليه امه عليها
مش بعيد كل اللى حكهولى عن مراته ده يكون كدب و افترا ....و أن تكون المشكله فيه هو ... أنه مش قادر يتحمل المسؤولية 😔
بعد الموضوع ده بيومين حسيت بآلام الوضع ...اتصلت على واحده زميلتى فى الشغل و قلت لها انى تعبانه و محتاجاها تيجى معايا المستشفى و كمان عشان تخلى بالها من ياسين ابنى
و فعلا البت كانت جدعه اوى و جت معايا ووقفت جنبى و لا الاخوات و اخدت ياسين جابت له كيسه حلويات كبيره و قالت له النونه جايبالك دى بمناسبه خروجها من بطن ماما
صاحبتى باتت معايا فى المستشفى و خرجت وقفت لى تاكسي و سندتنى لحد ما دخلتنى سريري
و دخلت على المطبخ طلعت فرخه من التلاجه و عملتهالى و عملت جنبها شويه لسان عصفور
اكلتنى و اكلت ابنى ...و اخدت النونه حمتها و غيرتلها و قالت بنتك باين عليها عندها صفرا ....ابن اختى كان عامل زيها كدا
قلت صفرا ؟؟؟ طب هعمل ايه انا مش هقدر اوديها و انا تعبانه كدا
عيب عليكى يا بت يا نوجا انا هوديها لدكتور اطفال كويس علشان الصفرا دى و هاخدها يا ستى اطعمهالك
بس انتى اتصلتى على ابوها عشان يجى يأيدها و الا لأ ؟؟
لا متصلتش
لا مينفعش لازم البت تتأيد بسرعه عشان تطعيماتها
حاضر يا دعاء هتصل عليه .....معلش يا دعاء تقلت عليكى
لا أخص عليكى ....هزعل منك و الله انا قايله لامى انى هقعد معاكى يومين تلاته لحد ما تشمى نفسك و تقومى بالف سلامه
ربنا يخليكى يا دعاء ...اردهالك و انتى والده و متهنيه فى بيت العدل يا رب
يا رب يا اختى يا رب ....ايوا ادعيلى كدا يمكن ربنا يستجيب منك 😂 و يلا هروح اغسل الاطباق دى على ما تتصلى بجوزك عشان يجى يطلع شهادة ميلاد للبت
حاضر هتصل دلوقتى .......مسكت تليفونى و اتصلت على أبوه و قلت له انى ولدت و عايزه عمرو يجى يأيد المولوده الراجل بارك لى وقالى حاضر هخلى عمرو يكلمك يا بنتى
استنيت أن عمرو يكلمنى مكلمنيش .....
تانى يوم لقيته بيرن و بيقولى حمدالله على السلامه
الله يسلمك ...كنت عاوزاك تيجى تأيد البنت
أيدها ازاى بقا بالعقد العرفى ؟؟
ليه هو مينفعش ؟؟
اه طبعا مينفعش
طب و بعدين هنعمل ايه ؟؟
انا اقولك هنعمل ايه ؟؟
#انتحار ( مستوحاه من قصه حقيقيه )
# الجزء_الحادى_عشر_والاخير
استنيت أن عمرو يكلمنى مكلمنيش .....
تانى يوم لقيته بيرن و بيقولى حمدالله على السلامه
الله يسلمك ...كنت عاوزاك تيجى تأيد البنت
أيدها ازاى بقا بالعقد العرفى ؟؟
ليه هو مينفعش ؟؟
اه طبعا مينفعش
طب و بعدين هنعمل ايه ؟؟
انا اقولك هنعمل ايه ؟؟
انا لازم اكتب عليكى رسمى عشان نقدر نأيدها
تكتب على رسمى ؟؟طب و مراتك ؟
طب هعمل ايه بس ...ما هو دا الحل الوحيد
طيب خلاص هتيجى امتى نكتب كتابنا ؟
كمان يومين كدا
طيب تمام بس عشان نأيد البنت بسرعه
متقلقيش من حكايه التقييد دى ...انتى ناسيه انى شغال فى الصحه
بعد يومين استنيته مجاش ....اتصلت عليه
مجتش ليه يا عمرو ؟
صراحه ممعيش فلوس خالص
طب مش انت قلت هتيجى تكتب على رسمى انهارده
ايوه طبعا ما أنا كنت جاى بس حكايه الفلوس دى هى اللى عطلتنى
طب تعالى يا عمرو و انا اديلك اللى انت عاوزه
طيب تمام انا جاى بكرا
تانى يوم عمرو كان عندى و اخد منى الفلوس و قال هروح مشوار كدا و جايلك على طول نطلع ع المأذون
استنيته لقيته اتاخر جدا ....اتصل عليه قافل تليفونه
مجاش الا نص الليل و قعد يألف لى حكايات أنه قابل جماعه صحابه كان سالف منهم فلوس و مسكوا فيه علشان يدفع لهم فلوسهم و اتخانق معاهم و راحوا القسم و هناك الظابط كان هيعمل له محضر لولا دفع لهم المبلغ اللى معاه و كتب على نفسه وصل امانه بباقى المبلغ
سألته : و كام الباقى دا يا عمرو ؟
الفين جنيه
ايه الفين جنيه ...و دول كنت واخدهم ليه و بتعمل بيهم ايه
كنت سالفهم عشان اصرف على امى و اخواتى يا نجلاء خلاص استريحتى
طب انا معايا الف جنيه ...و خد حلقى اهو اللى كان ابويا جايبهولى بيعه و هيتبقى معاك مبلغ نكتب الكتاب
ماشي يا نجلاء ...هاتى يلا الحلق عشان بكرا الضهر اروح ابيعه و نبقى اخر النهار نروح نكتب
طبعا انا كنت عارفه أنه بيضحك على بس كنت بديله و اسايسه عشان يكتب على رسمى و خلاص
تانى يوم اخدنى و رحنا كتبنا كتابنا ...و فرحت أن خلاص مشكله بنتى هتتحل
مبروك يا عروسه
عروسه ايه بس ؟؟ المهم اول ما تطلع قسيمة الجواز تروح تقييد البت على طول
حاضر ...طبعا اومال كتبنا رسمى ليه
بعدها كل ما أقوله فين شهاده ميلاد البنت يقولى لسه القسيمه مطلعتش ....
اتصلت على المأذون و سألته قال إنه ادى القسيمه لجوزى بعد كتب الكتاب بتلات اسابيع
لما جه عمرو سألته عن القسيمه
هو القسيمه لسه مطلعتش يا عمرو ؟
لا لسه بس هروح للماذون انهارده اشوفه عمل ايه و متأخر ليه ؟
و بتكدب ليه يا عمرو مش انت اللى قلت نتجوز رسمى عشان تكتب البنت ؟؟ اما انت مش عاوز ايه اللى رجعك مره تانيه ؟ انا سألت المأذون و قالى أنه سلمك القسيمه من زمان ...ليه يا عمرو ؟؟؟
بصى يا نجلاء انا دلوقتى ظروفى منيله....ازاى هكتب طفله زى دى باسمى و تكون مسؤله منى و انا مش قادر اصرف عليها ؟
يعنى ايه ؟ مش فاهمه؟
يعنى من النهايه كدا و على بلاطه انا محتاج منك مبلغ اعمل مشروع
مبلغ ايه و مشروع ايه ؟ و اجيب لك فلوس منين انا ؟
ما انتى عامله جمعيه بعشرين ألف جنيه و هتقبضيها الشهر الجاى ...انا عاوزها الجمعيه دى هعمل مشروع و نعيش بقا
انت باصص للجمعيه اللى بقالى سنه بدفع فيها ؟؟
انت ايه يا شيخ ؟؟ انا عملت فى نفسي ايه يارب ؟؟ ازاى صدقتك ؟ ازاى ائتمنتك على نفسي و على ابنى ؟؟ ازاى ؟
هو انتى كنتى تطولى ؟ فوقى لنفسك يا ماما ...دا انتى كنتى زى الكلبه المرميه فى الشارع مش لاقيه متوى و لا حد قابلك فى بيته حتى اخواتك طردوكى و محدش منهم طاقك ....دا انتى يا بت مقطوعه ملكيش كبير و لا صغير ...دا جزاتى انى لميتك من الشوارع و اديتك أسمى ؟ انا غلطان كنت سبتك انتى و ابنك الكلاب تاكلك
انت بتعايرنى انك ساعدتنى ؟؟
ما انت اخدت تمن مساعدتك لى ....انت خلصت فلوسي على مزاجك و على الحشيش اللى بتشربه ....منك لله ...منك لله
و بتدعى على كمان يا بنت الكلب ...و قام يا دكتور على ضربنى علقه دغدغ جسمى فيها ...بقى يخبطنى فى الحيطه اقع على الأرض يقوم يجيبنى من شعرى ....و ضرب بالأقلام و الشلاليط و انا دا كله عماله اصرخ ...و فى الاخر فتح باب الشقه و بقى يطردنى و يزقنى على السلم
الجيران اتلمت و قعدوا يغلطوا فيه و يقولوا له حرام عليك ....الرجاله اتلمت عليه و اخدوه بعيد
و انا دخل معايا اتنين من جاراتى لمولى شعرى و عملولى لمون و قعدوا يهدوا فى
بعد ما جيرانى مشيوا اتصلت على اخويا و قلت له ال عمله عمرو معايا علشان مش لاقى حد واقف جنبى
اخويا قالى و انتى عايزه ايه منى دلوقتى ؟
قلت روحله يكتب البت باسمه و مش عاوزه منه اى حاجه بعد كدا هتنازله عن كل حاجه نفقتى و مؤخرى بس يكتب البنت
اخويا طبعا كان متضايق و قالى انا مش عاوز مشاكل يا نجلاء ...انا هروح بس مليش دعوه بحاجه بعد كدا
و فعلا تانى يوم اخويا راح له و قاله انا عاوز اعرف ايه المشكله و مش عاوز تكتب البت باسمك ليه ؟....
راح بمنتهى البجاحه طلع له شهاده ميلاد للبنت من الدرج بأسم طليقى و قاله اكتب ايه ؟ اكتب بت مش بنتى ؟؟
اخويا جه قالى كنت هتهبل ...ازاى عمل كدا و ازاى كتبها باسم طليقى ؟؟
بس عشان هو شغال فى الصحه الموضوع كان سهل بالنسبة له
رحت لمحامى و رفعت عليه قواضى نفقه و قايمه و إثبات نسب ...و هو اتصل على علشان اتنازل عن القواضى قلت له هتنازل بس اكتب البنت باسمك ...طبعا عمال يلاوع في ...و البنت دلوقتى وصلت خمس شهور و ملهاش شهاده ميلاد باسم ابوها الحقيقى
تعبت اوى يا دكتور و الدنيا اسودت فى وشي ...الكل أتخلى عنى و محدش واقف جنبى حتى الإنسان اللى افتكرته حبنى و قلت هيعوضنى طلع العن منهم كلهم ... ملقتش حل الا انى انتحر و اتخلص من حياتى اللى كلها شقا دى 😔😔
حكايتك صعبه يا نجلاء بس انتى نسيتى أن ربنا سبحانه و تعالى لا يكلف نفس الا وسعها و مفيش مشكله ملهاش حل ....و الابتلاء على قدر مكانتك عند الله
ربنا بيختبرك و اداكى امتحان صعب بس انتى اعترضتى و مصبرتيش ...ليه باصه دايما على الوحش اللى فى حياتك ؟ ليه مش باصه مثلا أن ربنا رزقك بالبنت و الولد اللى فى غيرك كتير يتمنوهم ...ليه مش باصه أن ربنا رزقك بالصحه اللى فى غيرك كتير محرومين منها ...ليه مش باصه أن ربنا رزقك بمصدر شغل و معاش والدك و فى غيرك بياكلوا من الزباله
ليه مخليه وجود راجل فى حياتك هو محور حياتك كلها ؟؟
انتى بتقولى انك عامله جمعيه و معاكى فلوس ...ليه متاخديش الفلوس دى و تفتحى بيها اى مشروع ...ليه متشوفيش حرفه زى خياطه أو كروشيه و تعملى ورشه صغيره كدا و تعيشي و تعيشى ولادك
و إن كان على مشكله بنتك فده سهله و اكيد القضاء هينصفك و هيطلع لها شهاده ميلاد اكيد
الدنيا سهله يا نجلاء بس احنا اللى بنصعبها على نفسنا ... حاولى تاخدى الأمور ببساطه و اتعاملى أن اى شيئ يحصل لك بيكون فى ميزان حسناتك و بيرفع درجتك عند ربنا
و نعم بالله يا دكتور ...عندك حق
يعنى خلاص اقتنعتى بكلامى؟؟
ايوه يا دكتور
طب اوعدينى انك متكرريش اللى عملتيه دا تانى و دايما تحطى ولادك قدام عينك ...تخيلى كدا لو كنتى متى كان حصل ايه لاولادك دول ؟؟ خاصة البنت اللى ابوها مش راضى يعترف بيها دى ؟؟ اقل حاجه كانت هتترمى فى ملجأ ...و ابنك كان فى أحسن الظروف هيروح لابوه و شوفى بقا كان هيتعامل ازاى من حماتك السابقه
عندك حق يا دكتور انا مفكرتش فى الحاجات دى خالص
اوعدك انى مش هفكر اعمل كدا ابدا .... اشكرك جدا يا دكتور
لا شكر على واجب يا نجلاء ...و مش عاوزين نشوفك هنا تانى الا زياره بس
حاضر يا دكتور ....كتر الف خيرك 😍
تمت .
ارجو أن القصه تنال اعجابكم ...و اذا عجبتكم القصه ارجو الدعاء لوالدى رحمه الله عليه و لسائر موتى المسلمين
#قصص_وحكايات_د_جيهان_عادل
 # الجزء_الاول دكتور فوزى حالة الانتحار فاقت انتحار ايه يا فوزى ؟؟ و الله يا دكتور علاء دى حا…){kind=link}
تعليقات
إرسال تعليق