#سهير
#الجزء_الاول
سهير فتاه احلام كل رجال الحى ، تلك الفتاه ذات العشرين ربيعا تخطو بخطوات تشبه خطوات غزال شارد يهفو لها قلوب الرجال
لطالما ارتدت سهير الملايه اللف و البرقع و أعلى رأسها منديل مطرز ينسدل من خلاله شعرها الأسود الطويل الناعم
تجلس من بعيد المعلمه هانم تدخن الأرجيلة و تراقب عيون الرجال و هم ينظرون إلى تلك الساحره المتحركه نحوها
تتذكر هانم شبابها عندما ترى ابنتها ورثت منها ذلك الجمال الأخاذ و شغف كل من يراها
تبتسم هانم فى مكر و تحدث نفسها تلك ابنتى ...ورقتى الرابحه و التى سأحقق بها ما لم استطع تحقيقه لنفسي
تتذكر هانم رغم تهافت الرجال عليها إلا أنها سلمت للمعلم سيد ....ذلك الشاب مفتول العضلات حلو اللسان آنذاك ..و بالرغم من أن سيد ترك لها إدارة حياته و أمواله فقد كان يعشق التراب التى تمشي عليه و لا يستطيع أن يعصى لها أمرا ...بالرغم من ذلك كانت دائما تلوم نفسها بأنها كانت تستحق الافضل وأنها لو انتظرت أكثر لكانت فرصتها ستكون أكبر فى اصطياد زوج بمواصفات افضل
و لكن الفرصه لم تنتهى يا هانم لديك ابنتك الجميله سهير ستحقق احلامك
قطع تفكير هانم صوت رقيق كرقه انسياب الماء من مكان مرتفع
سالخير يا اما
مسا النور يا سهير ....تعالى يا حبيبتى اقعدى جنبى
حاضر يا اما
ايه اللى جابك ؟
مفيش قلت اجى اقعد معاكى شويه زهقت م القعده لوحدى
حبيبتى يا بنتى ...اطلبلك ايه تشربيه؟
لا يا اما مش عاوزه ...لسه شاربه فى البيت قبل ما اجى
يدنو المعلم فرج عند رؤيته لسهير و يلقى التحيه عليهم
تضحك هانم لأنها تعلم أن فرج هو بدايه الغيث و أن الكثير من رجال الحى سيتوافدون عليهم يلقون التحيه و يعرضون خدماتهم
بعد دقائق صدق حدث هانم و توافد الرجال عليهم يحاولون الحديث بأى موضوع
حضر المعلم سيد و رأى ما ساءه من وقوف رجال الحاره حول زوجته و ابنته
مساء الخير يا جماعه
مساء الخير يا معلم سيد
خير فى حاجه ايه اللمه دى ؟؟
خير ان شاء الله مفيش حاجه احنا بس بنسلم على الاموره الصغيره
طيب و سلمتوا و الا لسه ؟؟
ايوا ايوا خلاص
انصرف الجميع و نظر سيد إلى زوجته نظرة عتاب
تانى يا هانم ...جايبه البت تفرجى عليها الناس
انا يا سيد ؟؟ طب و هعمل كدا ليه ؟ البت هى اللى جت تقعد معايا و تهوى عن نفسها شويه
مع انى مش مصدقك بس خلاص قومى يا سهير من هنا و متبقيش تيجى تقعدى القعده دى تانى
حاضر يا أبا
انصرفت سهير و انصرف معها نظرات الرجال
شايفه يا وليه الرجاله عمالين يبصوا على بنتك ازاى ...هايكلوها بعنيهم ...عاجبك كدا ؟
ايوه عاجبنى ...بنتى حلوه يا اخويا و هداريها من ايه ؟؟ بذمتك يا سيد مش بتفكرك بى و انا فى شبابى ؟؟؟
فشر ....انتى كنتى احلى منها بكتير ....دا انتى كنتى زى حوريه خارجه من الميه ...انا لحد ما اتجوزتك مكنتش مصدق نفسي انك رضيتى بى و اتجوزتينى
و لا انا كمان 😂
ايه بتقولى ايه ؟؟
لأ قصدى مكنتش مصدقه انى اتجوزت سيد المعلمين 😁
تسلميلى يا هنومه قلبى
طب يلا قوم شوف حسابات المحل ...الواد دقدق م الصبح عمال يخرف فيها و كل شويه امسك عليه غلطه
انا مش عارف الواد دا مخه فين ...انا لولا المرحوم أبوه وصانى عليه قبل ما يموت كنت مشيته من زمان
معلش يا معلم دا واد غلبان برده و انت زى أبوه
يعجبنى فيكى قلبك الطيب دا يا هنومتى 😘😘 ...طب اطلبيلى بقا حجر شيشه و فنجان قهوه عشان اعدل دماغى
عنيا يا سيد المعلمين ...واد يا سلامه شيشه و قهوه مظبوط هنا للمعلم
من عنيا يا معلمه
****************
سهير تصل منزلها و تصعد درجات السلم ...ترفع البرقع لتطل الشمس من وجهها ...تخرج مفتاحها و تديره فى الباب ...تدلف إلى الداخل تخلع الملايه ليظهر فستان برتقالي مزركش بنصف كم يظهر منه البياض الناصع المزين للفستان ........و تنادى
مشمش ....مشمششششش
ينزل مشمش من على الأريكة متجها إلى سهير يلف حولها يتمسح بها ...تحمله سهير بين يديها و تملس على شعره الابيض الناعم و تقبله قائله
وحشتنى يا مشمش .....تعالى يلا انا محضرالك الاكل ...يلا اقعد كل عقبال ما اغسل الهدوم و اطلع انشرهم ع السطح و اجيلك
دلفت سهير إلى داخل الحمام حيث يوجد طشت الغسيل جلست سهير مشمره يديها لتغسل كميه كبيره من الغسيل
انتهت سهير من غسيل الملابس ووضعتها فى سله الغسيل و صعدت أعلى البيت لتنعم ملابسها و ملابس أسرتها بضوء الشمس
بدأت سهير فى نشر الغسيل إلى أن سمعت صوت غريب يصدر من الحجره المغلقه الموجوده فوق البيت
تسائلت فى نفسها ما هذا الصوت ؟؟ انا اعرف ان الحجره مغلقه من سنين من بعد موت السيده العجوز بها
و من وقتها يخشي الناس أن يسكنوا فيها لان العجوز قتلت بها بطريقه بشعه
اقتربت سهير لباب الحجره سمعت صوت جميل و اله موسيقيه غالبا ما تكون العود
تراجعت سهير للخلف و قالت فى نفسها
اكيد دا عفريت ...سلام قول من رب رحيم
و فجأه توقف صوت الموسيقى و انفتح الباب لترى أمامها .......
#سهير
#الجزء_الثانى
اقتربت سهير لباب الحجره سمعت صوت جميل و اله موسيقيه غالبا ما تكون العود
تراجعت سهير للخلف و قالت فى نفسها
اكيد دا عفريت ...سلام قول من رب رحيم
و فجأه توقف صوت الموسيقى و انفتح الباب لترى أمامها
شاب طويل اسمر اللون ذو شارب و لحيه خفيفه
خير يا آنسه فى حاجه ؟؟
انت مين يا جدع انت ؟؟ و ايه جابك هنا ؟؟
انا حافظ طالب فى كليه الزراعه الساكن الجديد
و مين دلك على هنا يا سيدنا الافندى ؟
واحد ابن حلال قالى على الاوضه هنا ...لما سألته عن حاجه سعرها حنين شويه
واضح أنه ابن حلال اوى
مش فاهم تقصدى ايه ؟؟
مفيش يا عم ....حلال عليك الاوضه بس ابقى خد بالك بقا
اخد بالى من ايه بالظبط ؟؟
انت اكيد متعلم و بتعرف تقرا قران ؟ صح ؟
ايوه الحمد لله ...بس فهمينى فى ايه ؟
مفيش حاجه يا سيدنا الافندى متخافش
مين قالك انى بخاف ...مفيش حاجه فى الدنيا دى تقدر تخوفنى
كدا ....طب خد بالك بقا الاوضه اللى انت قاعد فيها دى كلها عفاريت و الناس كلها عارفه الكلام ده و عشان كدا محدش بيرضى يسكن فيها
عفاريت ايه و كلام فارغ ايه ؟؟ما عفريت الا بنى ادم ....و بعدين العفاريت هتسيب الدنيا كلها و تيجى تسكن هنا ليه ؟
ما انت غشيم ...متعرفش أن فى واحده مقتوله هنا قبل كدا
اعوذ بالله مقتوله ؟؟؟مين قتلها و قتلها ليه ؟
دى كانت ست كبيره عايشه لوحدها هنا .... الناس كانت بتعطف عليها و تديها فلوس و اكل لغايه ما واد ابن حرام اسمو ماندوا دخل عليها و خنقها عشان يسرق فلوسها ....و ملقاش معاها بعد ما قتلها الا حته حلق صغير و ٣ جنيه
طبعا عشان الست كانت قاعده لوحدها و مكنش فى حد بيسأل عليها ....محدش اكتشف موتها الا اما الله يحفظنا ريحتها طلعت ....و كان منظرها بشع
البوليس جه و النيابه حققت و فى الاخر مسكوا الواد ماندوا و اعترف على كل حاجه
الله يرحمها
الله يرحمها كدا عادى ؟؟ يعنى مخفتش من اللى حكتهولك ؟
و هخاف من ايه ؟
اصل انت مش واخد بالك يا سيدنا الافندى عفريت الست دى بيطلع كل ليله عشان ينتقم من اى حد يشوفه أو يسكن مطرحها هنا
يا سلااااام و بينتقم ازاى بقا عفريتها دا ؟
انت بتتريق على يا سيدنا الافندى ؟؟
لا ابدا و الله ...بس عاوز اعرف عفريتها بيطلع ازاى عشان اخد بالى بعد كدا
هقولك انا بعد الحادثه دى جه راجل كبير سكن فى الاوضه هوب بعدها باسبوع واحد لقوه ميت جواها و لولا جماعه قرايبه كانوا جايين يزروه كان عمل زى الست و عفن من غير ما حد يعرف عنه حاجه
بعدها ....جت عيله متكونه من راجل و مراته كان بيتهم اتهد على حاجتهم و اترموا فى الشارع ...جم هنا و كانوا فرحانين اوى لأن الاوضه زى ما انت شايف صاحب البيت فارشها و حاطط فيها كل حاجه من بعد ما الست العجوزه ماتت فيها ...الجماعه دول كانوا مبسوطين اوى بالاوضه لأنها مفروشه و سعرها حنين زى ما بتقول ....لكن مفيش يومين تلاته لقيناهم خدوا بعضهم و مشيوا من غير اى سبب كدا ...الناس بقا ساعتها قالت اكيد عفريت ام عباس هو اللى طفشهم
ام عباس مين ؟
الله... ما تركز معايا يا سيدنا الافندى ام عباس الست اللى بحكيلك عليها م الصبح
************************
بت يا سهييييييير ....يا سهييييييير
يا لهوى امى بتندهه على انا لازم انزل حالا لتطين عيشتى سلام يا استاذ
سلام يا سهير
نزلت سهير تتعثر على السلم رافعة صوتها حاضر يا اما انا جاييه
دخلت سهير لتضع سلة الغسيل فى المطبخ و تذكرت حافظ ذلك الشاب مفتول العضلات الشجاع الذى لا يخاف من العفاريت و تذكرت الموسيقى التى كانت تنبعث من حجرته و تقول فى نفسها
يووو جتك ايه يا سهير قعدتى تتكلمى تتكلمى و مسبتش فرصه للجدع ينطق بكلمه و لا يقول اى حاجه ...بس حلو الافندى اللى مبيخافش دا ؟؟ ياترى ام عباس هتعمل فيه ايه ؟؟
قطع حبل أفكارها صوت امها يلا يا سهير حضرى الغدا بسرعه ابوكى زمانه طالع و ميت من الجوع
حاضر يا اما ثوانى و يكون جاهز
توجهت سهير إلى الاوانى المرصوصه و بدأت فى سكب الطعام فى الاطباق
دخلت الام على سهير قائله : عاملالنا ايه انهارده ع الغدا يا سهير ؟
عاملالكم بصاره تستاهل بقك يا اما و بتنجان مخلل و بطاطس مقليه و سلطه بابا غنوج
تسلم ايدك يا حبيبتى ...بكرا بقا هجيب لك كرنب و ملوخيه و بط و فراخ و حمام تعمليلنا غدا محترم كدا
ليه كل دا ؟
اصل جايلنا ضيوف على الغدا بكرا
ضيوف ...ضيوف مين يا اما ؟
المعلم سعاده معزوم عندنا بكرا ع الغدا
و دا ايه هيجيبه عندنا ؟؟ دا راجل دمه تقيل اوى يا ساتر عليه
يا بت متقوليش كدا دا المعلم سعاده ده اكبر تاجر مانى فاتوره فيكى يا بلد
طب و احنا مالنا يا اما اكبر و الا أصغر دا يهمنا فى ايه ؟
يا بنتى الراجل جالى و قالى أنه عازم نفسه ع الغدا عندنا بكرا ...أقوله لا يعنى
يا باى على الثقاله ...هو فى حد بيعزم نفسه عند حد كدا ....كنتى قوليله مش فاضيين
عيب يا سهير ميصحش يا بنتى ....و بعدين يا ستى لو الحاجه كتير عليكى انا هساعدك .....مش نازله المحل بكرا و هقعد اساعدك فى عمايل الاكل
هو عمايل الاكل هتاخد ايه يعنى ؟؟ بس هو الراجل دا اللى مبينزليش من زور
لا ما انا عاوزاكى تتوضبى كدا و تلبسي حاجه كويسه و توضبى البيت برده
و ليه بقا ؟؟؟ مش فاهمه ؟
اصل حسيت من كلامه كدا إنه جاى عشانك
عشانى ازاى يعنى ؟؟؟
قصدى جاى عشان يخطبك لابنه ....انتى متعرفيش أنه عنده ابن شغال معاه فى المحلات بتاعته
لا معرفش و لا عاوزه اعرف ....يا اما انا بقولك مبقبلش الراجل ده تقومى تقوليلى اتجوزى ابنه
يا بنتى انا معرفش هو جاى لكدا و الا لا ...دا مجرد ظن منى
يا رب يخيب ظنك يا اما
بقا كدا يا سهير ...اصلك مش وش نعمه زى ابوكى
الا صحيح يا اما ...مش الاوضه اللى فوق السطوح سكنت
اوضه مين ؟ بتاعه ام عباس ؟
ايوه ....
و مين العبيط اللى اتضحك عليه و رضى يسكن الاوضه اللى مليانه عفاريت دى ؟؟ اكيد راجل كبير و الا ست غلبانه
لا يا اما دا جدع طول بعرض تبارك الخلاق فيما خلق
بت يا سهير احترمى نفسك يا بت
يووو هو انا قلت حاجه يا اما ...مش انتى اللى بتسالى
طب خلاص ملناش دعوه بيه ....هو يومين و هيغور من هنا ...عفريت ام عباس مش هيخليه يقعد
لا ما هو مبيخافش ...دا قلبه حديد يا اما
مالك يا بت بتقولى قلبه حديد يا اما.. بسهوكه كدا اتعدلى يا بت ...هو انتى اتكلمتى معاه
يعنى اااا. ااا..... كلمتين كدا
سهير مش عاوزه لسانك يخاطب لسان الجدع ده انتى فاهمه
حاضر يا اما
دخلت سهير حجره الطعام لترص الاطباق و تنتظر وصول والدها
وضعت هانم طرحه خفيفه على شعرها و صعدت السلم لترى هذا الشاب الذى تتحدث عنه ابنتها بكل شغف
نظرت هانم على حافظ من خلال الشرفه المفتوحه وجدته شاب مفتول العضلات وسيم الشكل يقوم ببعض التمرينات الرياضيه و التى جعلت العرق يتصبب من جبينه كحبات اللؤلؤ
تأملت النظر فيه طويلا و قالت فى نفسها الا ليت الشباب يعود يوما لاخبره بما فعل المشيب
هنا انتبه حافظ لوجود ام سهير و نظر إليها قائلا
اهلا و سهلا يا هانم ....
#سهير
#الجزء_الثالث
وضعت هانم طرحه خفيفه على شعرها و صعدت السلم لترى هذا الشاب الذى تتحدث عنه ابنتها بكل شغف
نظرت هانم على حافظ من خلال الشرفه المفتوحه وجدته شاب مفتول العضلات وسيم الشكل يقوم ببعض التمرينات الرياضيه و التى جعلت العرق يتصبب من جبينه كحبات اللؤلؤ
تأملت النظر فيه طويلا و قالت فى نفسها الا ليت الشباب يعود يوما لاخبره بما فعل المشيب
هنا انتبه حافظ لوجود ام سهير و نظر إليها قائلا
اهلا و سهلا يا هانم
ايه دا انت عارف أسمى منين ؟؟
لانه اسم على مسمى ...انتى هانم فعلا
لا محسوبتك المعلمه هانم صاحبه محل الاقمشه اللى على باب الشارع
اهلا و سهلا يا معلمه و لو انى شايفك هانم من هوانم القصور .... ملكه من ملكات مصر ...حوريه من حوريات الجنه ....خساره الجمال دا كله يسكن فى حاره زى دى
أصاب الخجل وجه هانم و عادت بها كلمات حافظ إلى سن الستة عشر عاما عندما كان يغازلها الرجال ....
صفنت هانم لبعض الوقت فى أحلامها و شعرت بسعاده غامره كعصا سحريه إعادتها لسن الشباب ثم تذكرت انها مازالت تقف أمام حافظ....فحاولت أن تدارى شرودها الذى ظهر على وجهها بشده قائلة :
ايه الكلام الحلو دا يا استاذ ....شكلك ابن ناس و متعلم كويس
أسمى حافظ ....حافظ أمين
تشرفنا يا سي حافظ ....انا بس طلعت اقولك لو محتاج ايوتها حاجه متتكسفش احنا هنا اهلك
طبعا طبعا يا ست الحسن و الجمال
الله ....و بعدين معاك بقا ؟؟؟ ما بلاش الكلام ده
انا اسف بس مقدرش اشوف الجمال دا كله و معبرش عن اللى شايفه قدامى
احمر وجه هانم مره اخرى و حاولت تغيير الموضوع قائله
الا صحيح يا استاذ انت من اى بلد ؟
انا من بلد صغيره كدا تبع كفر الشيخ
يا اهلا و سهلا .....و بتدرس بقا على كدا و الا بتشتغل ؟
ايه عندك لى شغل ؟؟؟
ليه هو انت خالى شغل ؟
لا انا طالب فى كليه الزراعه بس بحب اعتمد على نفسي ، بشتغل اى حاجه اجيب منها قرش اصرف على نفسي منه علشان محملش ابويا اكتر من اللى هو شايله
تصدق صوعبت على يا أفندى ....طب انا ممكن اشغلك معايا فى المحل بعد الضهر لما تخلص كليتك
يا سلام تبقى خدمتينى خدمه العمر و انا مستعد اشتغل اى حاجه حتى لو هكنس المحل و امسحه
لا يا سيدى لا هخليك تمسحه و لا تكنسه انا همسكك الحسابات ...الواد دقدق اللى شغال معايا ساقط ابتدائيه و كل شويه يلخبط لى فى الحسابات
لا من ناحية الحسابات متخافيش هظبطهالك ظبطه متقوليش لعدوك عليها
أما نشوف ...استأذن انا بقا
ما بدرى يا معلمه
بدرى من عمرك يا سي حافظ ....سلام دلوقتى و بكرا تبقى عندى فى المحل بعد العصر
عنيا يا معلمه
تركت هانم حافظ و قلبها يطير فرحا بصدرها فقد حصلت للتو على شاب متعلم يعمل لديها يسمعها بين الحين و الآخر ما افتقدت إليه منذ زمن بعيد
كنتى فين يا هانم ...عصافير بطنى صوصوت
مفيش يا سيد كنت واقفه مع مرات صاحب البيت و قالت لى أن فى جدع ابن حلال سكن فى اوضه ام عباس ...طالب غلبان بيدور على شغلانه بعد الضهر قمت فكرت أنه ممكن ينفعنا و يمسك لنا الحسابات بدل المنيل دقدق ما هو مبهدلهالنا كدا
طب و دقدق هنمشيه ؟؟؟
لا يا اخويا ...الجدع ده هيجى بعد الضهر بس يظبط الحسابات انما دقدق بقا زى ما هو هينضف المحل و يجيب لنا الطلبات
طيب تمام اللى تشوفيه يا معلمه ....يلا بقا عشان نتغدى ريحه البصاره اللى البت عاملاها هتجننى
سلامتك م الجنان يا معلم
فى اليوم التالى احضرت هانم طلبات عزومه المعلم سعاده من بط و حمام و دجاج و خضار و جلست مع سهير لتعد طعام الغداء
و فور الانتهاء من إعداد الغداء طلبت هانم من سهير أن تدخل لتبديل ملابسها و تلبس فستانها الجديد الذى احضرته لها الأسبوع الماضى
تزمرت سهير و ضمت حاجبيها فى غضب قائله
و البسه ليه يا اما ....انا اصلا مش داخله على الراجل ده
عيب يا سهير متكسفنيش مع الراجل ....اعملى اللى بقولك عليه ربنا يهديكى يا بنتى
طب هطلع الم الغسيل فى الاول
لا لا هبقى ألمه انا ....مش انا قلت لك متطلعيش فوق تانى
حاضر يا اما ....هدخل اغير بس مش هلبس الفستان الجديد
اسمعى الكلام يا سهير و البسي اللى قلت لك عليه
حاضر يا اما
دخلت سهير ترتدى ثوبها الجديد بينما وجدت هانم فرصه لتصعد و ترى حافظ
أخذت هانم سلة الغسيل و صعدت الدرج بعد أن وضعت طرحه خفيفه على شعرها تظهر أكثر ما تخفى
هانم تلبس اساور من الذهب بطول ذراعيها و ترتدى فستان يظهر مفاتنها ....يتدلى من رقبتها سلسه كبيره تنتهى بمصحف ضخم من الذهب الخالص ....ترتدى فى قدميها خلخال من الذهب له رنين جميل عندما تخطو
صعدت هانم و بدأت تصدر بعض الاصوات لتجذب انتباه حافظ لعله يخرج و يسمعها بعض من كلماته العذبه
و بالفعل تنبه حافظ إلى وجود هانم و نظر إليها مندهشا
هو انتى اخت سهير ؟؟
يووو جتك ايه يا أفندى سهير تبقى بنتى
لأ لأ مش ممكن .... سهير بنتك ازاى ؟ خلفتيها و انتى عندك عشر سنين و الا ايه
ضحكت هانم و قالت لا مش للدرجه
لا للدرجه ....انا مدكيش اكتر من تلاتين سنه و يمكن اقل كمان
تلاتين سنه ؟؟؟ربنا يحظك يا سيدنا الافندى
ايه حكايه الافندى اللى مسكهالى دى ...انا حافظ ...حافظ و بس
ماشى يا سي حافظ
من غير سي من فضلك
حاضر يا حافظ
ميعادنا انهارده بعد العصر ....انا بس عندى عزومه انهارده و هنزل اسلمك الشغل بعد العصر
عندك عزومه ؟؟؟ يا بختكوا
ضحكت هانم و قالت له متخفش مش ناسيك عامله حسابك معانا
تسلمى يا ست الكل
بص عندك فى الاوضه بتاعتك سبت بحبل اول ما أنزل دلدله من هنا هينزل عندى فى البلكونه هحط لك الاكل فيه و ترفعه على طول
منحرمش من ذوقك يا معلمه يارب
نزلت هانم و دخلت المطبخ احضرت طبق كبير وضعت به ما لذ و طاب من طعام و ذهبت للشرفه فوجدت السبت منتظر وضعت به الطعام و نظرت لأعلى مشيره بيدها ليرفع الحبل
دخلت هانم على سهير و هى ترتدى الفستان الجديد ...فستان باللون البمبى لا يفرق لونه عن لون وجه سهير مكشوف بعض الشئ ...بنصف كم و تحت الركبه مباشره
اللهم صلى على النبى ايه القمر دا ...يا ارض احفظى ما عليكى ....ايوا كدا هى دى بنتى الحلوه اللى طالعه لامها ...اللى بتسمع كلام امها ....امها اللى عارفه مصلحتها
متكسفنيش بقا يا ماما
دق جرس الباب و فتح المعلم سيد قائلا اتفضل يا معلم سعاده....اتفضل البيت بيتك
يارب يا ساتر
دخل المعلم سعاده مرتديا عبايه انيقه تحتها جلباب فاخر ...يحمل بيده عصا ارابيسك فاخره و من خلفه أحد صبيانه يحمل كميه كبيره من الهدايا لدرجه انه يختفى خلفها
يا معلمه هانم .....يا معلمه
ايوا يا معلم انا جايه اهو
اتفضل ....اتفضل ارتاح يا معلم سعاده
يزيد فضلك يا معلم سيد
اهلا اهلا بسيد المعلمين
اهلا بيكى يا معلمه
دا احنا زارنا النبى انهارده
متشكرين يا معلمه دا من ذوقك و الله
طب يلا يا معلم الغدا جاهز ....اتفضل
جلس المعلم سعاده ليلتهم كميه كبيره من الطعام قائلا الاكل طعم اوى تسلم ايدين اللى عمله
دا سهير بنتى هى اللى عملت الاكل كله و انا يدوب ساعدتها
صراحه مدوقتش اكل طعم بالطريقه دى
بالف هنا على قلبك يا معلم
انتهى المعلم من الغداء و طلب سيد من ابنته أن تعد القهوه
ذهبت سهير لتعد القهوه و المعلم سعاده ينظر لها و يبرم فى جانب من جوانب شاربه رافعا حاجبه إلى أن خرجت و اختفت بالمطبخ
هانم تلاحظ نظراته و تقطعها بكلمه : شرفتنا يا معلم
الشرف لى يا معلمه هانم
بقولك ايه يا معلم سيد
ايوا يا معلم سعاده
انا هجيبهالك دوغرى كدا لانك عارفنى مبحبش اللف و لا الدوران
ايوا طبعا يا معلم
انا طالب القرب منك فى المزمزيل سهير
ردت هانم قائله ... يا سلام دا احنا نشورها ونجيبهالكم لحد عندكم هو احنا هنلاقى احسن من حموده فين ؟
حموده مين ؟؟
حموده ابنك يا معلم
لا انا مبطلبهاش لحموده ابنى ....انا طالبها لنفسي
ايه ؟؟؟؟ لنفسك؟؟؟؟؟
#سهير
#الجزء_الرابع
انا طالب القرب منك فى المزمزيل سهير
ردت هانم قائله ... يا سلام دا احنا نشورها ونجيبهالكم لحد عندكم هو احنا هنلاقى احسن من حموده فين ؟
حموده مين ؟؟
حموده ابنك يا معلم
لا انا مبطلبهاش لحموده ابنى ....انا طالبها لنفسي
ايه ؟؟؟؟ لنفسك؟؟؟؟؟
ايوه لنفسي هو انا مش اد المقام و الا ايه ؟
لا اااا ابدا انت اد الدنيا بس انت فاجأتنا بالموضوع ده
و فاجأتكم ليه بقا ...منا ملمح لكى امبارح و قايلك انى جاى عشان السنيوره الصغيره
بس اللى اعرفه يا معلم انك متجوز اتنين
طب و ماله الشرع محللى اربعه و مدام انا مقتدر يبقى فيها ايه ؟؟؟ و بعدين انا لا هكلفكم ابيض و لا اسود هكتب لها عماره من عماراتى زى نسوانى الاتنين و هعملها شقه متشطبه من مجاميعها هجيب لها الغساله اللى بالكهربا اللى بيقولوا عليها و اجبلها بوتجاز بعنين مش وابور و كافة لوازمها من شوار و خلافه انا متكفل بيها يعنى مش هتغرموا مليم احمر ....قلتوا ايه بقا ؟؟؟
و الله يا معلم الرأى رأى البنت احنا هناخد رأيها و نرد عليك
طب و هى مش هتوافق ليه ؟؟ دا انا ههننها و ادلعها اخر دلع هعيشها برنسيسه
و بعدين ما احنا فيها نادى عليها خدى رأيها دلوقتى
لا لا ما ينفعش يا معلم ... معلش ادينا وقتنا اسبوع واحد و نرد عليك
لا اسبوع كتير يا معلمه ....انا كان عندى امل اتجوز اخر الاسبوع
معلش يا معلم استحملنا اسبوع و انا بنفسي هاجى ارد عليك
و هو كذلك ....... مع أن اسبوع كتير اوى بس نقول إيه ما باليد حيله ......استأذن انا بقا
ما بدرى يا معلم ....مش هتشرب القهوه ؟
نشربها شربات باذن الله المره الجايه
خرج المعلم سعاده و جلست هانم تفكر فى العرض الذى قدمه لابنتها ....أنه حلم من أحلام حياتها فالرجل يعرض دون طلب منه عماره و شقه مجهزه و باستطاعتنا أن نطلب منه أكثر من ذلك فيمكنناان نطلب خادمه لخدمة ابنتى ....لما لا يحضر لسهير سياره حديثه ؟...ابنتى جميله و لا تقل عن هوانم الاحياء الراقيه
لماذا لا اطلب منه شبكه كيلو او نصف كيلو ذهب مثلا ....أظنه لن يتأخر ..... و بقليل من الدلع تستطيع ابنتى جعله كقطعه العجين فى يدها تطلب منه يؤمن مستقبلها و يكتب لها إحدى محلاته .......هذه هى الزيجه التى كنت أتمناها لابنتى ...حياه رغده سعيده ستعيش كملكه متوجه
قطع تفكير هانم صوت المعلم سيد قائلا
الراجل اتجنن و الا ايه ؟ دا اكبر منى .....دا فى مقام جدها
هو فاكر انى هبيع بنتى عشان شويه فلوس ...دا بيحلم
انا لولا أنه فى بيتى كنت طردته بس انتى اتصرفتى كويس لما قلتى له أننا هنرد عليه بعد اسبوع ...
بعد اسبوع بقا هروحله و أقوله كل شيء قسمه ونصيب
انت اتجننت يا سيد ؟؟
اه و الله ما هى حاجه تجن ....ازاى يفكر أن يجوز بنت اد حفيدته
لا انا مبتكلمش عن كدا ....المعلم سعاده الف مين يتمناه و بعدين انت بتقول اهو أنه راجل كبير يعنى كام سنه و هيتكل على الله و بنتك تورث ميراث محترم دا غير اللى هيكتبه لها فى حياة عينه .... بنتك نغشه و تعرف تاخد عنيه
انتى بتتكلمى بجد يا هانم ؟؟؟ يعنى انتى موافقه على طلب الراجل الخرفان ده ؟؟؟
خرفان ليه يا اخويا فلوسه تخليه يتجوز بنت السلطان
بس انا مش موافق يا هانم انتى كدا هتميلى بخت البت
هميله ايه يا راجل بالعكس دا انا هعدله اسكت انت مش فاهم حاجه
البت مش هتوافق ....دى تطيق العما و لا تطيقوش
ملكش دعوة بالبت انا هعرف أقنعها ازاى
طيب انتى حره فى بنتك بس مترجعيش تعيطى بعدين
لا متخافش ....بكرا تعرف انى عندى حق فى كل اللى قلته
انا هدخل للبت اتكلم معاها و لو جت سألتك عن رأيك تقولها ايه ؟؟
هقولها مش موافق طبعا
لا ....لا يا سيد ...تقولها انك موافق و أن دى فرصه مش هتتعوض فاهم ؟؟
زمجر سيد و قام من امام هانم و هو يحدث نفسه بكلمات غير مفهومه
برطم يا اخويا برطم ....انت مش فالح الا فى كدا
قامت هانم هى الأخرى و دخلت غرفة سهير وجدتها جالسه على السرير تضع طلاء الاظافر ذو اللون الاحمر اللامع
حلو اللون دا يا اما ؟؟ و الا البمبى الخفيف
كله حلو عليكى يا سهير ....انتى قمر و اى حاجه بتليق عليكى .....شوفتى الهدايا اللى جابها المعلم سعاده ؟؟
لا ...انا دخلتها اوضتك لكن مفتحتش حاجه
طب ما تيجى نفتحهم سوا يلا
طب استنى هكمل المونوكير فاضلى رجل واحده
يا ستى كمليها بعدين ...يلا بقا عشان نتفرج جايبلك ايه ؟
جايبلى انا ؟؟
ايوه يا حبيبتى هو قالى أن الهدايا دى كلها لسهير
طب و جايب لى الهدايا دى كلها ليه يا اما ...انا مش هتجوز ابنه العبيط ده
لا لا ابنه ايه .... انا كمان مرضاش تتجوزيه ....دا واد سخيف كدا و دمه تقيل
تعالى بس نشوف الحاجات الجديده
دخلت هانم و سهير للغرفه ووجدت سيد نائم على السرير
اتحرك كدا يا سيد عشان نفرد الهدايا على السرير...... هاتى يا سهير العلب
فتحت هانم العلبه الاولى وجدت فستان احمر رائع الجمال
شفتى ...بصى يا سهير الفستان عامل ازاى؟ الله دا هياكل من جسمك حته
حلو اوى يا اما
و الا بصى على دا كمان ....الله الله دا بقى لبنى و احلى من الاحمر كمان
عندك حق يا اما
لا لا لا بصى على دا ....لونه بصلى جميل ....الله كلهم احلى من بعض
و دا ايه دا راخر ؟؟.... بصى يا سهير دسته قمصان نوم...... كل الالوان حرير اصلى
و ايه العلبه الصغيره دى فيها ايه ؟؟
يا خبر ...دا طقم دهب ...خدى كدا البسيه
الله هياكل من رقبتك حته
ورينى بقا العلبه دى ......يا سلام سلم دى علبه مكياج شكلها مش من هنا دى ....فيها كل الانواع من مجاميعه
و النبى المعلم سعاده ده ابن حلال و يستاهل كل خير و اللى هتتجوزه يا سعدها يا هناها
تتجوز مين يا اما دا عنده يجى خمسه و ستين سنه و بعدين ما هو متجوز ...هو لسه هيتجوز تانى ؟
ايوه يا بنتى و ماله ... الراجل ميعبوش الا جيبه و هو مقتدر و يتجوز بدل الواحده اربعه
يتجوز بقا و الا ميتجوزش مليش دعوه
لا ليكى
ليا ازاى مش فاهمه ؟؟
بصريح العباره كدا المعلم سعاده عاوز يتجوزك ...طلبك من ابوكى دلوقتى
ايه يتجوزنى انا ؟؟؟ طب و ابويا رأيه ايه ؟
ابوكى موافق هو هيلاقى عريس احسن من كدا فين ؟
انت صحيح موافق يا أبا ؟؟
سيد ...سيد رد ع البت متعملش نفسك نايم
عايزه ايه يا هانم سبينى انام
قول للبت رايك الاول و بعدين نام
انا مليش رأى .....شوفوا انتوا عايزين ايه و اعملوه
اتعدل يا سيد و قول رايك للبت بصراحه
منا بقول اهو ....المعلم سعاده راجل ميتعيبش الف مين تتمناه ....ارتاحتى يا ستى
ايوا كدا ....شفتى بقا يا سهير زى ما قلت لك اهو و كمان هيكتبلك عماره و هيجبلك شقه فيها كل الاجهزه الحديثه ....هتعيشي برنسيسه يا بت
لا يا اما ...لا ...حتى لو جاب لى مال الدنيا كله لا
لا ليه بقا يا عين امك ؟؟
مش عارفه ليه؟؟ لا عشان انا مش هبيع نفسي بالفلوس ....انا نفسي احب و اتحب نفسي ابنى حياتى مع شريك حياتى خطوه خطوه.... طوبه طوبه مش ابتديها مع واحد خلاص رجله و القبر
ما دى ميزه يا هبله بكرا يموت و تورثيه
يا وارث مين يورثك ....برده لأ يا اما انا مش موافقه
طب ايه رايك هتتجوزيه و رجلك فوق رقبتك ....هتتجوزيه غصب عنك و عن ابوكى اللى قاعد ده
#سهير
#الجزء_الخامس
انا نفسي احب و اتحب نفسي ابنى حياتى مع شريك حياتى خطوه خطوه.... طوبه طوبه مش ابتديها مع واحد خلاص رجله و القبر
ما دى ميزه يا هبله بكرا يموت و تورثيه
يا وارث مين يورثك ....برده لأ يا اما انا مش موافقه
طب ايه رايك هتتجوزيه و رجلك فوق رقبتك ....هتتجوزيه غصب عنك و عن ابوكى اللى قاعد ده ....و يلا يا اختى على اوضتك
ذهبت سهير إلى حجرتها و هى تبكى و تنتحب
بينما اصيبت هانم بالغيظ الشديد و بدأت تلكز سيد فى كتفه قائله :
يلا يا راجل مش هتنزل المحل ...
كنت عاوز اريح ساعه كدا
بلا تريح ...يلا يا راجل خلينا نشوف الموظف الجديد
اه صحيح انا نسيته ...قايم اهو
ارتدت هانم ملابسها جلباب بلدى مقلم بقلم حرير و على رأسها منديل مطرز ...رسمت الكحل بعينيها فأصبحت كعيون الغزال ...وضعت احمر الشفاه و بعض العطر
نظر إليها سيد نظره اعجاب قائلا
دا ايه الحلاوة دى ؟
طول عمرى حلوه
طبعا يا جميل ....بقولك ايه ما تيجى مننزلش المحل انهارده
يووو طب و الشغل يا راجل ؟؟؟
يندعق الشغل لاجل عيون الجميل ...الواد دقدق ما هو هناك
بطل دلع يا سيد و يلا بينا ...دقدق دا ايه راخر ؟؟
وصلت هانم و المعلم سيد لمحل بيع الاقمشه و جلست على كرسيها بداخل المحل
واد يا سلامه اتنين شيشه هنا لى و للمعلم سيد حالا ..و هات كوبايتين شاى معاهم
عنيا يا معلمه
جلست هانم تنتظر وصول حافظ بفارغ الصبر و بدا عليها القلق و التوتر حتى لاحظها المعلم سيد فقال لها
مالك يا معلمه ؟ شايفك مش على بعضك
لا ابدا يا سيد بس موضوع البت دا معصبنى
ذم سيد شفتاه و نظر باتجاه الشارع حتى لا يفتح الحديث مع المعلمه مره اخرى
فى ذلك الوقت كانت سهير تقف حزينه فى شباك حجرتها تحدث نفسها ....
و كتاب الله لو غصبتنى على الجوازه السوده دى لاولع فى روحى ..دا انا اطيق العما و لا اطيقوش...منك لله يا سعاده
انا كان مستخبيلى فين دا كله ياربى
فى هذه اللحظه لاحظت سهير دخول حافظ إلى البيت مسرعا قفذت إلى رأسها فكره بأن تذهب و تقابله على السلم
مسحت سهير دموعها بسرعه و اتجهت إلى باب الشقه و خرجت فجأه فوجدت حافظ أمام عينها
بسم الله الرحمن الرحيم ايه دا خضتنى يا فندى
سهير ....ازيك يا قمر .... معلش اصلى مستعجل شويه
و مستعجل على ايه بقا ؟؟
على ميعادى مع المعلمه اصل اتاخرت انهارده عليها ...كنت بشترى كتاب من الاسبكيه و غلبت على ما لاقيته
معلمه مين ؟؟
امك المعلمه هانم هى مقالتش لكى انى خلاص هشتغل معاهم
لا مقلتش ...و هتشتغل ايه بقا و انت لسه تلميذ كدا ؟
همسك حسابات المحل
ااه ...طب كنت عاوزه اتكلم معاك كلمتين كدا بس شكلك مستعجل
انا تحت امرك ...طب مينفعش لما ارجع من المحل أو بكرا الصبح
بعد المحل هيكون صعب الوقت هيبقى متاخر اوى ....طب خلاص هجيلك الصبح بعد ما امى و ابويا ينزلوا و الا انت عندك كليه بدرى
لا ...اول محاضره الساعه ١٠
طيب تمام هجيلك الساعه ٨ و نص
تمام هسيبك بقا اطلع اغير هدومى و احط الكتب دى و أجرى على المحل بسرعه ....المعلمه هتقول على ايه من اول يوم
مع السلامه يا سي الاستاذ
دخلت سهير و اغلقت بابها ....وقفت ورائه و أغمضت عينها و قالت فى نفسها لما لا اتزوج مثل هذا الشاب المثقف اى نعم انا غير متعلمه لكن جميله و جمالى قد يشفع لى لديه ....اااه يا امى انتى لا تفهمينى و لن تفهمينى...تريدين تزويجى بهذا الخرف عديم الاسنان و لا تبالى بمشاعرى و لا أحاسيسي
دخلت سهير على المطبخ لتجد تلال من الأطباق و الاوانى و المعالق و كميات كبيره من الطعام ...بدأت فى غسل الصحون و تنظيف الاوانى و جمع الطعام المتبقى ...نظفت المطبخ و اتجهت لغرفه الطعام نظفت اى بقايا للطعام و نظفت الارضيه
دخلت سهير إلى حجرتها تفكر فى لقائها بحافظ و لماذا طلبت التحدث معه ...انها المره الاولى التى تجرؤ على الحديث مع أحد الشباب رغم تحذير امها لها
و لكنها كانت تقول فى نفسها لولا أن امى عرفت انه شاب كويس مكنتش شغلته معاها
********************************
اسرع حافظ إلى المحل فوجد المعلمه جالسه تدخن الارجيله و يظهر على وجهها علامات الضيق
السلام عليكم
و عليكم السلام يا سيدنا الافندى ...اتاخرت ليه كدا ؟؟ لأ انا مينفعنيش الشغل ده من اول يوم كدا
معلش يا معلمه حقك على ...كنت بجيب كتاب محتاجه من عند سور الاسبكيه لان الدكتور طالبه ضروري
طيب خلاص حصل خير ......يا معلم سيد ...يا سيد .....تعالى الشاب اللى قلت لك عليه جه اهو
يا اهلا و سهلا ....اسم الكريم ايه ؟
أسمى حافظ يا معلم طالب فى السنه النهائيه بكليه الزراعه
يا اهلا يا استاذ حافظ ....تعالى يلا اوريك الشغل احسن الواد دقدق مبهدلى الحسابات خالص
تحت امرك يا معلم
أخذت هانم تنظر إلى حافظ و هو بجانب سيد و تعقد بداخل نفسها مقارنه و تقول فى نفسها
الواد شباب و حلو ....عليه شويه شعر ...حرير يا سلام يا بت يا هانم لو انتى متجوزه واد حلو كدا زى دا .....ايه دا اللى بفكر فيه دا ؟؟ استغفر الله العظيم ...فوقى لنفسك يا اختى انتى عندك بنت اده ....طب و ماله منا مخلفاها و انا صغيره اوى يعنى هما كلهم ١٢ - ١٥ سنه اللى بينى و بينه
مش فرق كبير يعنى ......انتى بتفكرى فى ايه يا مجنونه انتى ست متجوزه و جوزك واقف قدامك اهو ....بلا نيله دا جوز جزم ...جوز شرباط ....جوز ملوش شخصيه ...عامل زى ما يكون اختى بلا نيله .....بختى منيل ...انا كنت استاهل شب صغير كدا يدلعنى .....اومال يا بت عاوزه تجوزى بنتك للراجل الكبير دا ليه ؟؟
بنتى انا عاوزه أضمن مستقبلها و اعيشها فى مستوى عالى طول عمرها ....منا اخدت الفقير اللى بحبه حصل ايه يعنى ؟؟ الفقر موت الحب و خرجه م الشباك ...طول عمرى عايشه معاه فى فقر و لولا وقفتى معاه و اللم عليه من هنا و من هنا و بيع دهبى مكنش عمره هيكون له محل و لا يبقى معلم .....انا بقى مش عاوزه بنتى تمر باللى انا مريت بيه دا ....مش عاوزاها تدوق الفقر مع شاب ادها يطفحها الدم و يكرهها فى عيشتها و فى الاخر الحب اللى هى متجوزه عشانه هيروح و مش هيفضل لها إلا الفقر ....بس البت مش فاهمه و فاكره انى بأذيها متعرفش انى قلبى على مصلحتها و لو مشيت على اللى مخططاه لها هتكسب دنيا و اخره
قطع تفكير المعلمه صوت سيد قائلا
الجدع ده باين عليه ابن حلال و بيفهم ...اول ما شرحت له الشغل لقطه على طول و بقى زى اللهلوبه ، مش زى الواد دقدق خالص
مش بقولك يا معلم دا واحد متعلم تعليم عالى انت هتقارنه باللى اسمه دقدق دا .....الا صحيح المخفى دا راح فين ؟؟
بعته يجيب بضاعه انتى عاوزاه فى حاجه ؟
لا هعوزه فى ايه ؟؟
طيب انا هروح اقعد مع المعلم صلاح شويه فى المحل بتاعه
طب متنساش تقوله على البضاعه اللى عاوزين نجيبها شركه معاه من بره
منا رايح عشان كدا ...هفاتحه فى الموضوع و ربنا يسهل
طيب يا اخويا ربنا معاك
ذهب المعلم سيد للمعلم صلاح ...انتظرت هانم إلى أن اختفى من امامها و قامت من على الكرسي متوجهه إلى داخل المحل حيث يجلس حافظ بين الدفاتر و لفات القماش
عندما اقتربت هانم من حافظ رفع بصره و قال العطر اللى انتى حاطه دا يا معلمه انا شامه من على باب الشارع ...عمرى ما شميت عطر بالجمال ده
ما هو مش من هنا صحيح ....انا ببعت مع جماعه حبايبي يجيبهولى من بره
بس جميل اوى
تسلم يا سي حافظ .....بس عاوزه اقولك بعد كدا حاول متتاخرش عشان انا موتى و سمى اللى يتأخر على ميعاده
معلش يا معلمه انا اسف اوعدك مش هتتكرر تانى ...بس ...بس
بتبسبس ليه يا سيدنا الافندى
اصل كنت جايب لك هديه كدا عجبتنى ...و عايز اديهالك انا عارف انها مش اد المقام بس حاجه كدا على ادى
طب و الهديه دى بمناسبه ايه ان شاء الله ؟
بمناسبه انك شغلتينى عندك ...انتى متعرفيش انا مبسوط اد ايه انى هكون جنبك ....ااا قصدى شغال عندك
ابتسمت هانم فى مكر و شعرت أن كلمات حافظ ترضى غرورها كأنثى و انها مازالت تتمتع بجمالها بدليل كلمات حافظ لها
طب و فين الهديه اللى بتقول عليها دى ؟
اهى.... يارب ذوقى يعجبك
ايه دا ؟؟؟ خلخال فضه ؟؟؟ انت عرفت منين انى بحب الخلاخيل
منا امبارح لاحظت انك لابسه واحد بس دا طبعا مش اد المقام
لا دا جميل اوى و رقيق اوى اوى ....
رفعت هانم رجلها البيضاء و كشفت أسفل ساقها و قالت لحافظ ............... يلا لبسهولى .
#سهير
#الجزء_السادس
طب و فين الهديه اللى بتقول عليها دى ؟
اهى.... يارب ذوقى يعجبك
ايه دا ؟؟؟ خلخال فضه ؟؟؟ انت عرفت منين انى بحب الخلاخيل
منا امبارح لاحظت انك لابسه واحد بس دا طبعا مش اد المقام
لا دا جميل اوى و رقيق اوى اوى ....
رفعت هانم رجلها البيضاء و كشفت أسفل ساقها و قالت لحافظ ............... يلا لبسهولى .
شعر حافظ باندهاش بالعاً ريقه بصعوبه ...يداه ترتعشان و العرق يتصبب من جبينه و هو يقترب ليلبسها الخلخال
و هانم تبتسم ابتسامة المنتصر .....فاضطراب حافظ أمام جمالها يشبع غرورها
اوعى كدا........ دا انت لخمه ع الآخر ....بس تسلم ايدك ....ايه رايك فيه و هو فى رجلى ؟
أخرج حافظ منديلا من جيبه ليمسح عرقه المتصبب و قال باضطراب ...دى اجمل حاجه شفتها في حياتي
ضحكت هانم ضحكه خليعه ارتجف معها قلب حافظ
تركته و ذهبت لتجلس على كرسيها المنصوب أمام المحل و تدخن الشيشه
ولا يا سلامه ....تعالى يا واد غير لى حجر الشيشه ده أصله اتطفى
من عنيا يا ست الكل
سلام عليكم يا معلمه
و عليكم ....توّك ما افتكرت يا سي دقدق ....كنت فين ياض بقالك ساعتين بره
كنت بجيب بضاعه من المخزن يا معلمه و المعلم كلفنى و انا راجع افوت على المعلم حامد عشان احصل منه فاتوره عليه
و حصلتها ؟؟
لأ ملقتوش فى المحل
وشك فقر .....طب يلا يا اخويا ادخل رص البضاعه و أدى للاستاذ حافظ ورقه بالحاجات اللى جبتها انهارده عشان يأيدها فى الدفاتر
حاضر يا معلمه
يحضرلك الخير يا اخويا
دخل دقدق على حافظ فوجده منهمك فى الحسابات و يعمل بكل جد ....شعر دقدق بقليل من الغيره محدثا نفسه
بقى الجدع ده اللى جاى ياخد مكانك يا واد يا دقدق ؟؟ اتحدف علينا من أنهى داهيه دا ......بس شكله تلميذ و شايف نفسه اوى .....و ادى المعلمه عماله تزعق ...بركاتك يا سي حافظ
اتفضل يا حافظ أفندى ...دى البضاعه اللى جبتها دلوقتى المعلمه بتقولك أيدها فى الدفاتر
حاضر ...هات
بتعرف تأيدهم و الا اجى أعلمك تأيدهم ازاى ؟؟
لا كتر خيرك المعلم ورانى كل حاجه
طيب انا قلت اخدم بس
لا متشكر اوى
بعد قليل اقبل المعلم سيد متهلل الوجه و دخل بحماس على المعلمه هانم
سلام عليكم يا معلمه ؟؟
و عليكم السلام يا معلم شايفه كدا فى عنيك اخبار حلوه
هى حلوه بعقل ؟؟ دى حلوه اوى يا هانم
قول و فرحنى بسرعه
المعلم صلاح وافق يشاركنا و هنجيب بضاعه مستورده من بره و قالى أنه عارف ناس فى الجمارك هيخلصوولنا كل حاجه ....و عارف تجار بره كان بيتعامل معاهم زمان قبل ما يتعب بس فى مشكله صغيره
ايه هى بقا المشكله دى يا سيد ؟؟
المشكله انك زى ما انتى عارفه بعد الحادثه اللى حصلت للمعلم صلاح و رجله اللى بقى يمشي عليها بالعافيه بقت حكايه السفر دى صعبه عليه ...فقالى انا هكلملك الناس هناك و انت تسافر انت و مروان ابنى و تروحوا تقابلوهم و تخلصوا معاهم
طب و ايه المشكله فى كدا يا سيد ؟؟
المشكله حكاية السفر دى يا هانم ....مكنتش عاوز اسيبك انتى و البت و اسافر
يا راجل دا انا قلت أن فى مشكله كبيره ...تقوم تطلع مشكله هايفه زى دى .....يو جتك خيبه راجل ...ايه هو احنا هايكلنا العفاريت هنا و الا ايه ....اتنحرر يا راجل خلينا نقب على وش الدنيا كدا
يعنى انتى شايفه كدا يا هانم ؟؟؟
طبعا شايفه كدا....هو فى كلام غير كدا .....
خلاص يا معلمه اللى تشوفيه ....بكرا بمشيئه الله هنروح للمحامى عشان نعمل عقد الشراكه ما بينك و بين المعلم صلاح عشان الورق دا لازم يتقدم فى الجمارك عشان احنا هنمشي رسمى
تمام يا معلم ....يارب تبقى فاتحه خير علينا كلنا
************** ★★★ ****************
فى اليوم التالى انتظرت سهير نزول سيد و هانم إلى المحل و صعدت درجات السلم و قلبها يخفق بشده خشية أن يراها احد
أخذت تقرع الباب بعصبيه قرعات خفيفه
استيقظ حافظ من النوم و اتجه إلى الباب مسرعا غير مدرك أنه يلبس فانله حمالات تظهر منها عضلاته فقد كان رياضى يحافظ دائما على لياقته
فتح حافظ الباب فإذا بسهير تشعر بالحرج و توجه وجهها إلى الجانب الآخر و تقول
صباح الخير يا سى حافظ ....انا اسفه صحيتك
يا صباح القشطه بالعسل الابيض ....لا ابدا ...معلش انا اللى اتأخرت فى النوم انهارده ...كويس انك صحتينى ...بعد اذنك ثانيه واحده البس جاكتة البيجامه اصل الدنيا بتبقى حر اوى مببقاش عارف انام بالليل
دخل حافظ و ارتدى النصف العلوى من البيجامه و خرج لسهير
ها يا ستى كنتى عاوزانى فى ايه ؟؟ انا تحت امرك
مفيش ...كنت متضايقه شويه و مش عارفه افضفض مع مين ....انا مليش اخوات و لا أصحاب و من اول ما شفتك عدتك اخويا
و متضايقه من ايه قوليلى ؟؟ و لو فى اى حاجه اقدر اعملهالك هعملهالك
مفيش.... امى جايبالى عريس
كدا طب الف مبروك
لا مبروك ايه بس ؟؟ انا مش عاوزاه
طب و ليه ؟ ما يمكن راجل كويس ...اكيد المعلمه عارفه مصلحتك كويس
لا ما هو انت مش فاهم ...العريس دا راجل كبير معدى الستين سنه و عنده اولاد اكبر منى و كمان متجوز اتنين
معقوله ؟؟ طب و ليه المعلمه توافق على واحد زى دا ؟
عشان غنى ....هو أغنى واحد عندنا فى الحى هنا
ااه طب يعنى مش ممكن تدى لنفسك فرصه كدا و تقعدى معاه يمكن ترضى بيه
لا طبعا انا عمرى ما اقبل بيه حتى لو قعدت معاه ستين سنه ....انا نفسي اتجوز حد أحبه ....واحد نبنى حياتنا سوا انا و هو ...عارف انا نفسي اتجوز واحد متعلم كان نفسي اتعلم اوى و اتجوز واحد متعلم
هو انتى مش متعلمه يا سهير ؟؟
لأ للاسف ابويا كان بيخاف على اوى و مرضيش يخرجنى للمدرسه
يا خساره بقا الجمال دا كله مش متعلم ....و الله انتى اجمل من بنات كتير عندنا بالجامعه
اعمل ايه فى بختى يا سيدنا الافندى
انتى لسه فيها... اتعلمى
اتعلم ازاى ؟؟؟ بعد ما شاب ودوا الكتاب
طب و ايه يعنى ؟؟ و بعدين شاب ايه و بتاع ايه انتى لسه صغيره و تقدرى تاخدى محو اميه و تمتحنى الابتدائيه و البكالوريا و تدخلى الجامعه كمان
يااا الجامعه مره واحده
ايوه و ليه لأ هما اللى دخلوا الجامعه دول احسن منك فى ايه يعنى ؟
طب و امى ؟؟ هعمل ايه فى حكايه العريس دى ؟
ارفضى
بالسهولة دى ؟؟؟ اصل انت متعرفش امى لما بتحط موضوع فى دماغها يبقى خلاص مفيش فايده
طب و ابوكى رأيه ايه فى الموضوع ده ؟
ابويا شكله مش عاجبه الموضوع بس ميقدرش يقول لامى لأ ...بيخاف على زعلها اوى
خلاص يبقى انتى اللى لازم تصممى على رايك و ترفضى العريس اللى متقدم لك ده
مش عارفه هعرف اعمل كدا و الا لأ...عارف يا سي حافظ لو غصبتنى عليه هولع فى نفسي و الا اطفش من البيت
لأ لأ انتى بتقولى ايه ؟؟ انتى اتكلمى مع ابوكى و قوليله انك مش موافقه ...و صممى على موقفك مهما حصل
حاضر انا هعمل زى ما قلت لى ...بس عاوزه اطلب منك طلب كمان معلش اذا كان فيها رزاله يعنى
انا تحت امرك يا ستى
انا عاوزا..............
#سهير
#الجزء_السابع
مش عارفه هعرف اعمل كدا و الا لأ...عارف يا سي حافظ لو غصبتنى عليه هولع فى نفسي و الا اطفش من البيت
لأ لأ انتى بتقولى ايه ؟؟ انتى اتكلمى مع ابوكى و قوليله انك مش موافقه ...و صممى على موقفك مهما حصل
حاضر انا هعمل زى ما قلت لى ...بس عاوزه اطلب منك طلب كمان معلش اذا كان فيها رزاله يعنى
انا تحت امرك يا ستى
انا عاوزاك تعلمنى القرايه و الكتابه لو ينفع يعنى
ياااا دى حاجه بسيطه اوى عنيا ليكى يا قمر
تسلملى عنيك يا سي حافظ ...اتفضل
ايه دا يا سهير ؟؟
دى لقمه كدا على ما قوسم ....عارفه انك وحدانى و اكيد بتنزل من غير فطار
فعلا و الله انا بنزل من غير فطار ....كتر خيرك يا سوسو
ابتسمت سهير و شعرت ببعض الخجل و انطلقت مسرعه إلى أسفل حيث دخلت حجرتها و استلقت على سريرها وتذكرت كلمات حافظ خاصه كلمه يا (سوسو )
و اخذت تحدث نفسها بانه شاب لطيف ....ماذا لو كان هو الآخر معجب بها مثلما اعجبت هى به ؟؟ ماذا لو تطور الاعجاب و صار حباً ....ماذا اذا جاء يطلبنى من امى ؟؟هل سترضى ؟؟ و لما لا فهو يعمل عندها و لابد أن يكون شخص جيد لتوافق بأن يعمل عندها
لا تسبقى الأحداث يا سوسو فالايام القادمه ستطلعك على ما خفى عنكى
نهضت سهير من على سريرها و احضرت كراسا و قلما و خبأتهم تحت وسادتها
شعرت سهير بسعاده بالغه فحلمها فى التعليم سيتحقق كمان انها فرصه جيده لتكون قريبه من حافظ
ثم قامت لتنظر لنفسها فى المرآة و تستعرض جمالها أمامها و تقول لنفسها
ايه الجمال ده يا بت يا سهير ...و النبى عسل
بعد ذلك اتجهت سهير إلى المطبخ لتعد الغداء و قد طلبت منها امها قبل الخروج اعداد الكشري المصرى اللذيذ
احضرت سهير البصل و قامت بتحميره و اخذت زيت التحمير لعمل الارز و الجزء الآخر لعمل المكرونه ، ثم قامت بعمل الصلصه الحاره و الدقه و الشطه ....أعدت طبق من الباذنجان المخلل...سلقت الحمص و حمرت الخبز الشامى فى السمن
و عند وصول والديها سكبت لكل منهم طبق من الكشرى اللذيذ مزين بوردات البصل المحمر و الحمص و الخبز المحمر
جلس الاب و الام يتناولون الكشرى باستمتاع
تسلم ايدك يا سهير ....شويه كشري اخر حلاوة
بالف هنا و شفا يا أبا ....و انتى يا اما عجبك الكشرى ؟
طبعا يا حبيبتى مش تعليمى ....دا جوزك هيشكرنى على شطارتك و حلاوتك ده ...يا بخته المعلم سعاده
نظرت سهير إلى أمها بحزن و لم تنطق لاحظتها هانم و لكنها لم تعرها انتباها و اتجهت بالحديث إلى سيد قائله
بس حلو الاتفاق اللى عملناه مع المعلم صلاح انهارده
اه طبعا ....الموضوع ده لو مشي هيكون فاتحه خير جامده اوى علينا ....انتى عارفه العمارتين اللى عند المعلم صلاح دول من حكايه التجاره فى المستورد ده
ياااا معقوله ؟؟
ايوا طبعا .... البضاعه دى ليها زبونها و مش اى حد بيشتريها
حقا يا سيد لو الموضوع مشي ...ساعتها نشتريلنا أو حتى نأجر محل فى وسط البلد و نبيع فيه البضاعه دى و نقب بقا على وش الدنيا... ونسيب الحاره المعفنه دى
أن شاء الله هيشتغل و كل حاجه هتبقى تمام
طب هتسافر امتى ؟
اول ما المحامى يجهز الورق و انا هطلع بسبورت و هنتكل على طول انا و ابن المعلم صلاح
ربنا يسهل ....ايه مبتكلش ليه ؟
خلصت الحمد لله ..
خلصت ايه ؟ انت كلت حاجه
دا كله و مكلتش ...دا انا بطنى هتفرقع خلاص ...اهى الاكله الحلوه دى عاوزالها كوبايه شاى بالنعناع معتبره كدا
حاضر يا أبا هقوم اعمل
طب اقعدى كملى أكلك يا سهير
لا منا شبعت الحمد لله
طب شيلى يا سهير الاكل معاكى يلا ...احنا خلصنا خلاص
حاضر يا اما
قامت سهير لعمل الشاى و نظر سيد لهانم معاتبا
و ايه لزومه تسمى بدن البت كدا و تقوليها على حكايه الزفت سعاده ده
زفت ؟؟ زفت ايه يا راجل ؟؟ بتقول على السعد اللى جاى لبنتك زفت ....اما انت صحيح مش وش نعمه لا انت و لا بنتك
طب رايحه فين طيب ؟
هغور من وشك ....هدخل امدد على السرير شويه
دخلت هانم و أغلقت باب حجرتها بقوه فى وجه سيد
دخلت سهير بثلاث اكواب من الشاى
هى فين امى يا أبا ؟؟
امك دخلت تريح شويه
طب و مش هتشرب الشاى ؟
لا شكلها كدا اتقمصت منى
و اتقمصت ليه ؟ انت قلت لها ايه ؟؟
متشغليش بالك يا سهير
طب عاوزه اطلب منك طلب يا أبا
طلب ايه يا سهير ؟؟ عاوزه فلوس يا بنتى ؟؟
لا يا أبا ...هو انت مخلينى عاوزه حاجه
اومال ؟ عاوزه ايه ؟؟
انحنت سهير و نزلت تحت اقدام ابيها قائله
ابوس رجلك يا أبا متجوزنيش اللى اسمه سعاده ده ...انا هموت نفسي لو اتجوزته
قومى يا بنتى م الأرض ميصحش كدا ....و تموتى نفسك ليه بس ؟؟و عشان ايه
بالله عليك يا ابا ....لو انا غاليه عندك ما تجوزنى لسعاده
يا بنتى بس امك موافقه و انتى عارفه امك لما بيعجبها موضوع محدش يقدر يتكلم معاها
يا أبا ابوس ايدك اقف جنبى فى الموضوع ده بس ...و الله لو امى غصبتنى لاموت نفسي و هيكون ذنبى فى رقبتكم
لا اله الا الله ...طلعى الأفكار الوحشه دى من دماغك بلا تموتى نفسك بلا تولعى فى نفسك ....خلاص انا هكلمها تانى مع انى عارف ردها مقدما ....هاتى الشاى دا أما ادخل اشوفها لسه صاحيه و الا لأ
دخل سيد على زوجته غرفتهما و انتظرت سهير نتيجه مباحثاتهما فى غرفتها على احر من الجمر
هانم ...يا معلمه ...انتى صاحيه و اللى نمتى
صاحيه يا سيد
طب قومى اشربى الشاى ...البت عامله شويه شاى فشر شاى الواد سلامه
هات يا سيد
بقولك ايه يا معلمه ...انتى زعلتى ليه لما قلت لك على حكايه سعاده دى ؟
ما انت بتقول كلام يفور الدم يا سيد ....و هتخن ودن الحمار بقولة شي
حمار ايه اللى هتخن ودنه يا هانم ؟
البت ...البت يا سيد لما تسمعك بتتكلم كدا هترفضه و ترفض السعد و الهنا اللى جايين لها
طب و اذا قلت لك أن البت من غير ما تسمع كلمتنى و قالت لى انها مش عاوزه الجوازه دى و انها هتموت نفسها لو غصبتيها على كدا
نعم نعم ....هى قالت لك كدا ....و الله عال ....طييييب ...بت يا سهييييييير ...يا سهيييييير
عاوزاها ليه بس دلوقتى ؟
ملكش دعوه انت خالص متتدخلش بينى و بين بنتى
فزعت سهير من صوت هانم و أسرعت إلى غرفتها
نننننعم يا اما
بقا انتى يا بت بتقولى انك هتموتى نفسك لو اتجوزتى سعاده ؟؟طب ايه رايك انك هتتجوزيه ؟؟ و يلا ورينى هتموتى نفسك ازاى بقا ؟؟ انا بكرا هروح لسعاده أقوله إن احنا موافقين و هتكونى فى بيته قبل ما يمر الاسبوع
#سهير
#الجزء_الثامن
بقا انتى يا بت بتقولى انك هتموتى نفسك لو اتجوزتى سعاده ؟؟طب ايه رايك انك هتتجوزيه ؟؟ و يلا ورينى هتموتى نفسك ازاى بقا ؟؟ انا بكرا هروح لسعاده أقوله إن احنا موافقين و هتكونى فى بيته قبل ما يمر الاسبوع
أصاب سهير الكثير من الالم ...فهى لا تجد داع لكل هذه القسوه التى تعاملها بها امها ...لماذا تصر على اذلالى ؟ لماذا تصر على تعاستى ...انا لا اجد مبرر غير أنها لا تحبنى ...لماذا ؟ اننى ابنتها الوحيده فلماذا تتعامل بهذه القسوه
لم تنطق سهير ...و خرجت من حجره امها إلى حجرتها و الدموع تملأ وجهها الجميل
كانت تحدث نفسها بأنها لا تستطيع أن تعيش تلك الحياه الزائفه التى تريدها امها
كانت تفكر أن ابوها الذى استنجدت به ليخرجها من هذا المأذق قد ردخ و صمت أمام صراخ امها و توعدها
كانت تفكر فى حافظ و أنه بمقارنه بسيطه بينه و بين سعاده ستختار امها سعاده طبعا ...فحافظ مازال تلميذ بائس يعمل لينفق على نفسه بينما سعاده بنك متحرك على الأرض
إذن لمن اعيش ؟ ...اعيش لرجل يغتصبنى تحت مسمى الزواج ؟
اعاشر رجلا لا احمل له سوا الكراهيه و البغضاء لمجرد ورقه ...ورقه تكتب
لا ...لا اريد تلك الحياه و لا أستطيع أن اخطو بها خطوه واحده ...إذا كانت امى تصر على زواجى من سعاده فمازال الوقت لدى و القدره على عدم إتمام هذه الزيجه البائسه ....سأقتل نفسي و ليسامحنى ربى على ما فعلت بنفسي ....لا أجد غير هذا الحل لحل مشكلتي
انتظرت سهير إلى أن نام والداها و ذهبت إلى المطبخ حيث يوجد سم للفئران قد أحضره والدها قبل أيام لقتل فأر هاجم الشقه منذ عدة أيام
تناولت سهير السم و دخلت غرفتها و بعد قليل شعرت بألم شديد فى معدتها .....حاولت ألا تتألم بصوت مرتفع حتى لا يسمعها أحد .....كانت تضع طرف الغطاء بين أسنانها لتكتم صراخها فيه ....لحظات يا سهير و تتخلصى من ذلك البؤس الذى تشعرين به ....لحظات و تتخلصى من سعاده و زيجته المشؤمه
ااااااه ....الالم شديد لا يحتمل و لكن الم الزواج من سعاده أشد إيلاما ....ااااااه لم اعد احتمل ...اوصالى تتقطع
سامحنى يارب ...انا هسيب الدنيا دى و متاكده انك هترحمنى ...انت ارحم على من اى انسان ...انا بشتكيلك يا رب من الدنيا الوحشه دى ...مش عاوزه اعيش فيها ....بس عاوزه رحمتك بى ...خلصنى من عذابى يارب
فى هذه الاثناء خرج المعلم سيد ليذهب إلى الحمام........ فداء السكرى لا يهنئه على النوم ساعتين متواصلتين دون الذهاب إلى هناك
دخل سيد للحمام و خرج فسمع انين مكتوم يخرج من حجره سهير
تعجب سيد لهذا الصوت و فتح الباب ليرى ابنته قد قاربت على مفارقه الحياه ...العرق يتصبب من جبينها و الدموع تملأ وجهها و الرغاء الابيض يخرج من فمها ...
سهييير سهيييير عملتى فى نفسك ايه يا بنتى ؟؟ يا هانم يا هانم ....الحقى يا هانم ...الحقى سهير ....سهير بتموت يا هانم
حضرت هانم مسرعه
ايه دا ؟؟ ايه اللى حصل ؟؟ سهير سهير ردى على يا بنتى سهير سهير
حمل سيد أبنته و أسرع إلى الشارع.....لحقته هانم بعد أن احضرت كل ما تملك من نقود فى الدولاب ....اوقفوا سياره تاكسي و توجهوا إلى المستشفى
بسرعه الله يخليك بنتى بتموت
اسرع سائق التاكسي إلى أقرب مستشفى و هناك قام الطبيب بعمل غسيل معده ووضعها تحت الملاحظه حتى صباح اليوم التالى
توجه الطبيب إلى سيد قائلا
الحاله دى تبعك ؟؟
ايوا يا دكتور
انت تقرب لها ايه ؟؟
انا ابوها يا دكتور و دى امها
و مين عمل فيها كدا ؟؟
محدش يا دكتور ..تلاقيها اكلت اكل بايظ و الا حاجه
اكل بايظ ايه ؟؟ البنت مسمومه و انا لازم ابلغ البوليس لتكون انت اللى كنت عاوز تسمها
و اسمها ليه بس يا دكتور ؟دى بنتى معنديش غيرها فى الدنيا
ردت هانم و هيسمها ليه يا دكتور؟ ما تقف عوج و تتكلم عدل
يبقى انتى بقا اللى عملتى فيها كدا ؟؟
أما غريبه و الله ...هو انت عاوز تلبس اى واحد فينا تهمه و خلاص ....بقولك ايه اتمسي و قول يا مسي
لا انا هتمسي فعلا ...انا غلطان انى بتكلم مع ناس زيكم انا هبلغ البوليس يجى يشوف مين عمل كدا فى البنت المسكينه
ما تبلغ انت هتهددنا ؟؟ و الا تكونش هتهددنا
انصرف الطبيب ليتصل بالقسم الخاص بالمستشفى لابلاغهم بالواقعه
نظر سيد إلى هانم معاتبا
لزوموا ايه بس تقولى كدا للدكتور ؟؟ اهو خلتيه يروح يبلغ اهو
الله ما يبلغ يا راجل ...هو احنا صحيح اللى سمناها؟؟ انت خايف من ايه يعنى ؟؟
خايف من كلام الناس ...الناس هيقولوا ايه اما يعرفوا أن بنتك حاولت تنتحر
ناس مين ؟؟ و لا يهمنى حد ....المهم هى تقوم بالسلامه و خلاص
و لما البوليس يا فالحه يسألك هى حاولت الانتحار ليه هتقوليله ليه ؟
هقوله معرفش ...هى دى محتاجه مفهوميه
بقولك ايه يا هانم. البت كانت هتروح منا بسبب اللى اسمه سعاده ده...... اصرفى نظر بقا عن الموضوع ده
هو انا يا سيد ماسكه فى الموضوع ده ليه ؟ مش عشان مصلحتها ؟ هو انا يهمنى ايه فى الدنيا الا سعادتها ؟
هو انت فاكرنى مبسوطه باللى حصل ؟؟ انا كنت فاكره البت بتهوشنا بس و مكنتش أتخيل انها تعمل كدا بحق و حقيقى....هو انا عندى غيرها ؟؟ مكنتش هسامح نفسي ابدا لو كان حصلها حاجه
يبقى خلاص مدام هى مش عاوزه متغصبهاش .....المره دى ربنا سترها المره الجايه ربك أعلم ممكن يحصل ايه
طيب خلاص يا سيد ....انا هروح لسعاده و أقوله البت مش موافقه
ايوواااااا كدا الله يرضى عليكى ....سهير لما تعرف هتفرح اوى
بعد قليل حضر شاويش من القسم ليفتح محضر بالواقعة
فتح الشاويش المحضر و اخذ اقوال سيد و هانم الذين أنكروا تماما معرفتهم بما حدث لسهير و انها من المؤكد أنها تناولت طعام فاسد و هو ما سبب لها ذلك المغص الشديد
بينما أكد الطبيب أن المذكوره حضرت للمستشفى و يظهر عليها علامات التسمم بسم الفئران ...و قد قام الطبيب على الفور بعمل غسيل معده و اعطاء الدواء المناسب للحاله
طلب الشاويش اخذ اقوال سهير لكن الطبيب أخبره بأنها نائمه و لن تستيقظ الا فى الصباح
انصرف الشاويش على أن يعود فى الصباح لأخذ اقوال سهير
نظر الطبيب إلى سيد و هانم قائلا
اوعوا تفتكروا أن الخطر خلاص زال من على بنتكم ..حكايه سم الفئران دى هتأثر عليها فتره و هتفضل مده تعبانه و لازم ما تهملوش العلاج
حاضر يا دكتور هنعمل اللى تقوله بس مكنش فى داعى تتصل بالبوليس
دا واجبى يا معلم و لازم أاديه على أكمل وجه ....و لازم يتعرف مين عمل كدا فى بنتكم
ما خلاص يا سيدنا الافندى ...هى قصه ؟؟ عمال تعيد و تزيد فيها ؟
انا مبتكلمش معاكى يا ست انتى انا كلامى للمعلم
ست ؟؟؟ ست مين يا دكتور ؟؟انا المعلمه هانم على سن و رمح.....
نظر لها الطبيب نظره سخريه و تركها و انصرف
#سهير
#الجزء_التاسع
فى الصباح حضر الشاويش و قام بسؤال سهير عن سبب وصولها للمستشفى بتلك الحاله
أجابت قائله
انا ...انا اخدته و انا معرفش أنه سم .....السم ده ابويا جابه و قالى عليه بس مخدتش بالى و هو كان شبه السمسم و انا بحب السمسم اوى اول ما شوفته اكلت منه ....بعدها لقيت بطنى بتتقطع
يعنى محدش حاول يسمك؟؟
لا ابدا يا شاويش هو مين دا اللى هيعمل كدا
طيب يا بنتى الف سلامه عليكى انا هقفل المحضر و أن شاء الله خير
دخل المعلم سيد و هانم بعد خروج الشاويش و نظر إلى ابنته نظره شفقه قائلا
حمدالله على السلامه يا سهير يا بنتى ....بقا كدا عاوزه تموتى نفسك ؟
ردت هانم
عاوزه تحرقى قلبى عليكى ليه يا سهير ؟
زى ما انتى عاوزه تحرقى قلبى انا كمان يا اما
انا يا بنتى عاوزه أحرق قلبك ؟؟ ربنا عالم انا بحبك اد ايه و بحبلك الخير ازاى
هنا قاطعها سيد قائلا
ما خلاص يا هانم ....احنا خلصنا من الكلام ده ...خلاص يا سهير يا بنتى امك هتروح لسعاده و تقوله انك مش موافقه
صحيح يا أبا
ايوا صحيح ....هو احنا عندنا اعز منك يا بنتى
ربنا يخليكى لى يا اما ربنا يخليك لى يا أبا ....طب كنت عاوزه اطلب منك طلب كمان
اطلبى يا حبيبتى ...اللى تشاورى عليه هجيبهولك
انا نفسي اتعلم و اخد شهاده
تتعلمى ؟؟ تتعلمى ازاى ؟
يعنى اخد شهادة محو الاميه و اقدم للابتدائيه و بعدها البكالوريا و يمكن كمان الجامعه
ياااا الجامعه مره واحده ...انتى مين دخل فى دماغك الكلام ده ؟؟
مفيش يا أبا ...انا اللى فكرت فيه بنفسي ...انا لما بشوف البنات و هى رايحه المدارس الحسره بتنزل فى قلبى
سلامة قلبك من الحسره يا حبيبتى
هنا ردت هانم يا بنتى البت ملهاش الا بيتها و جوزها علام ايه اللى عاوزه تتعلميه؟
طب افك الخط حتى يا اما .....انتى و ابويا بتفكوا الخط
خلاص نشوفلك خوجه يجى يعلمك عشان تقرى و تكتبى بس
و خوجه ليه يا معلمه ؟ ما احنا عندنا جارنا الجديد الأستاذ حافظ ممكن يساعدها فى التعليم
هنا أصاب هانم مشاعر متناقضة هل توافق على كلام سيد ليكون حافظ اقرب و يستطيع الدخول للبيت بشكل طبيعى ام ترفض لأن حافظ بإعطائه الدروس لابنتها سيجعله اقرب لابنتها الشابه الجميله و التى ستفوز بالتأكيد فى اى مقارنه يعقدها بينهما
ايه يا معلمه سرحتى فى ايه ؟؟
مفيش بس هتدخل شاب زى دا على بنتك ازاى يا سيد ؟؟
يا ستى هو هيدخل و هى لوحدها ؟ ما انتى هتكونى موجوده برده ....و بعدين الجدع باين عليه مؤدب و عينه مبتترفعش من الأرض
هنا لمعت عين هانم و ابتسمت قائله:
اللى تشوفه يا معلم
تابعت سهير حديث والدها و هى تشعر بارتياح شديد فهذا ما كانت تحلم به ....لعل القادم احسن يا سهير
خرجت سهير من المستشفى و هى مازالت تشعر بشيء من التعب ....
وصل المعلم و المعلمه بابنتهم البيت و كانت سهير تستند على كتف ابيها
تجمع عدد من سكان الحى
الف سلامه عليها يا معلم سيد ....خير مالها ؟؟
الله يسلمكوا....مفيش حاجه يا جماعه كان عندها مغص كلوى و الحمد لله اخدت حقنه و كله تمام
لا الف سلامه على نواره حارتنا
الله يسلمكم جميعا متشكرين
صعد المعلم سيد و هانم بابنتهما و ادخلاها سريرها ووضعوا الدواء بالقرب من سريرها
قامت هانم بعمل شوربه خضار لسهير حسب أوامر الطبيب
بعد قليل دق جرس الباب
فتحت هانم الباب لتجد حافظ يقف أمامها بطلته البهيه
مساء الخير ما معلمه
مسا النور على عيونك يا حافظ
انا عرفت أن الهانم الصغيره تعبانه شويه
ايوا ....دى حاجه بسيطه كدا اتفضل يا سي حافظ اتفضل
يزيد فضلك يا ست الكل
و مكلف نفسك ليه بس ؟؟
و لا مكلف نفسي و لا حاجه دى حاجه بسيطه مش اد المقام
هنا خرج المعلم سيد على صوت حافظ
يا اهلا يا بشمهندس ....
اهلا بيك يا معلم الف سلامه على الانسه سهير
الله يسلمك يا هندسه .....اعملى يا هانم كوبايتين شاى
لا يا معلم انا همشي على طول
يوووو و دى تيجى يا سيدنا الافندى انا هعملهم حالا
تصدق يا بشمهندس انت ابن حلال مصفى ....كنت لسه بفكر فيك دلوقتى ..و عايز منك خدمه
الله يكرمك يا معلم ....اى خدمة انا تحت امرك
الأمر لله وحده .....كنت عاوزك لو عندك وقت يعنى تعلم سهير القرايه و الكتابه و متخفش اى حاجه هتقول عليها انا تحت امرك من جنيه لميه
دى حاجه مفيش اسهل منها يا معلم و من غير اى حاجه ....الانسه سهير زى اختى برده
لا معلش الشرط نور ...هتديها درس هتاخد قدامه فلوس دى مفيهاش ايتوها حاجه
خلاص يا معلم اللى تشوفه
طيب انت فاضى امتى ؟؟
انا فاضى بعد الشغل فى المحل
طيب تمام انا هبقى اخليك تمشي ساعه بدرى و اخلى هانم ترجع بدرى برده و تدى البت الدرس ....انت عارف طبعا أنه ميصحش تديها و هى لوحدها فى البيت
طبعا طبعا يا معلم دى اصول و مقدرش اتعداها
يبقى كدا خلاص استبينا
بعد ما البت تشم نفسها كدا ....تبدأ معاها باذن الله
كانت هانم تسمع الحديث و هى فى منتهى السعاده فدخول حافظ البيت أصبح شرعيا
بعد أيام تعافت سهير و عاد لوجهها رونقه ...و طلبت من أبيها أن ينفذ وعده لها بتعليمها القراءه و الكتابه
وعدها ابوها أنه اليوم سيحضر حافظ لاعطائها الدرس
فرحت سهير و دخلت لحجرتها ..فتحت دولابها و وقفت فى حيره ....تريد أن تختار فستان يبهر حافظ
اختار أنهى واحد ؟؟؟ الاحمر و الا اللبنى و الا الاصفررررر ؟ الفستان النبيتى اللى عليه الورد ده بيبقى جميل على بيخلينى شبه سندريلا ....خلاص هلبسه و احط فى شعرى الورده دى ....يا ترى هعجبه ؟؟ عاوزه احط كمان شويه روج بس خايفه امى تلاحظ ....خلاص بلاش روج ...انا اصلا مش محتاجه
و عندما حل الليل و اصبحت الساعه السابعه و النصف مساء طلب المعلم سيد من هانم أن تذهب إلى البيت استعدادا لوصول حافظ على الثامنه ليبدأ مع ابنته اولى دروس القراءه و الكتابه
أسرعت هانم إلى البيت و دخلت لتبدل ملابسها ...اختارت جلابيه بلدى تجسم مفاتنها ....لبست كردان كبير من الذهب على صدرها العارى ...ارتدت حلق طاره كبير فى أذنها ....وضعت المساحيق لتخفى علامات الزمن ...و اخيرا وضعت عطرها المفضل و انتظرت وصول حافظ
اخيرا دق جرس الباب ارتجف له قلبى الام و ابنتها
جلست المعلمه و لم يتحرك لها ساكن بينما جرت سهير على الباب و فتحته بسرعه لتجد من يقول لها
زباله ....
لا مفيش زباله
أغلقت سهير الباب و هى تشعر بالامتعاض و تقول فى نفسها .....زباله ايه اللى جاى يسأل عليها دلوقتى ؟ هو ده وقته
دق جرس الباب مره اخرى هرولت سهير الى الباب و فتحت لتجد أمامها حافظ بكامل هيئته ...يلبس بدله انيقه و طربوش ....ورده بيضاء تزين جيبه العلوى
سلام عليكم يا انسه سهير
و عليكم السلام يا استاذ حافظ ...اتفضل
يزيد فضلك يا ست العرايس
تعالى يا حافظ ادخل هنا فى الصالون
حاضر يا معلمه انا جاى اهو ....فستانك حلو اوى يا سهير
ان شالله تسلم يا سي حافظ
يااارب يا ساتر
ادخل يا حافظ تعالى ....روحى يا سهير اعملى حاجه لحافظ يشربها و الا اقولك هاتيله لقمه
لا كتر خيرك ...مش عاوز اكل ..لو ممكن كوبايه شاى بس بعد اذنك
عنيا يا استاذ
ذهبت سهير لإعداد الشاى
اقعد يا حافظ على ما البت تعملك الشاى
هقعد بس ايه الجمال دا كله يا معلمه ؟
صحيح ....عجبتك ؟؟
الا عجبتينى ...دا انتى تعجبى الباشا
#سهير
#الجزء_العاشر
ذهبت سهير لإعداد الشاى
اقعد يا حافظ على ما البت تعملك الشاى
هقعد بس ايه الجمال دا كله يا معلمه ؟
صحيح ....عجبتك ؟؟
الا عجبتينى ...دا انتى تعجبى الباشا ....انا شايف قمر قاعد معايا فى الاوضه
شعرت هانم بالفرحة فقد ارضت كلمات حافظ غرورها و أرادت أن تغير الموضوع قائله
انت مكلمتنيش عن نفسك يا حافظ يعنى امك و ابوك و اخواتك و كدا
انا يا معلمه من كفر الشيخ زى ما قلت لك ...ابن ناس غلابه على ادّهم ..... بس من صغرى و انا بعتمد على نفسي و بعرف اكسب الفلوس اللى بحتاجها و اللى بتخلينى أظهر بمظهر كويس
امى و ابويا عايشين فى قريه صغيره عندهم حتة ارض بيزرعوها و ياكلوا من خيرها و عندى اخين صغيرين و أختين بنات دول متجوزين
هنا دخلت سهير حامله صينيه الشاى و فى يدها الأخرى كراسه و قلم و كتاب لمحو الاميه
اتفضل يا استاذ الشاى
متشكر ...يلا بقا نبدأ اول درس ....انتى تعرفى الحروف و الا لأ
لا معرفش انا مرحتش فى اى حته لا كتاب ولا مدرسه
طيب بسيطه ..انا هديلك دلوقتى شويه حروف تحفظيها و تكتبيها .....دا يا ستى حرف الالف ( أ ) عامل زى العصايه و فوق راسها بورنيطه أو همزه
الف ...ايوا سهل اوى
و دى يا ستى به أو باء (ب) عامله زى الطبق و تحته نقطه
الله دى كمان سهله اوى
امسكى القلم و حاولى كدا تكتبيهم .....ايوا كدا برافو عليكى ...انتى استجابتك حلوه اوى
يلا بقا نكمل باقى الحروف
و بدأ حافظ فى تلقين سهير باقى الحروف و كلما أعطاها حرف كانت تستجيب له بشكل كبير فيشجعها حافظ
كل ذلك و هانم تجلس مراقبه لحافظ و تعبيرات وجهه
الى أن انتهى الدرس الاول على كلمه حافظ
هايل يا سهير ... انتى كدا خلصتى نص الحروف فى حصه واحده و لو استمريتى بالمعدل ده اوعدك انك قريب اوى هتعرفى تقرى و تكتبى كويس جدا
صحيح يا استاذ حافظ ...يارب ...دا امل حياتى
متشكرين يا سي الاستاذ تعبناك معانا
تعبك راحه يا معلمه ....استأذن انا
اتفضل
ذهبت سهير لايصال حافظ للباب
مع السلامه يا حافظ
الله يسلمك يا سهير احفظى بقا اللى اديتهولك هسمعه لكى بكرا
حاضر يا سي حافظ
دخلت سهير إلى حجرتها تحفظ الحروف لتكون عند حسن ظن استاذها...ثم ما لبست أن سمعت صوت ابوها بالخارج
خرجت سهير فرحه مستقبله ابيها
شوف يا أبا ...شوف خدت ايه ....شوف خطى
الله الله دا اداكى نص الحروف ...مش كتير عليكى دا يا سهير ...
لا يا أبا كتير ايه دا انا كنت عاوزاه يدينى الحروف كلها بس هو مرضيش
ردت هانم سهير شاطره و يجى منها
طب عال ...شدى حيلك بقا يا بنتى
حاضر يا أبا
تتعشي يا سيد ؟؟
ايوا هاتيلى لقمه اصلى عملت كذا مشوار كدا و جعت اوى انهارده
بت يا سهير ....هاتى لابوكى ياكل
دخلت سهير المطبخ و هى تبرطم
أما هى بتساله و تقوله تتعشي ؟ مبتقومش هى ليه تجيبله ؟ انا عاوزه الحق احفظ الحروف و اكتبها زى ما حافظ قالى
احضرت سهير العشاء ووضعته على المنضده بالقرب من امها و ابيها
ايه يا سهير مش هتتعشي معانا
لأ يا أبا انا ورايا مذاكره
دخلت سهير لتستذكر حروفها الاولى إلى أن نامت و هى تحمل كراستها بين يديها ...
دخلت سهير بحلم جميل فقد رأت نفسها ترتدى فستان ابيض و تحمل كتبا و تذهب الى الجامعه و فى طريقها ترى حافظ يمسك بيدها إلى أن وصلت منتصف المسافه تركها و انصرف عنها ....وقفت بمنتصف الطريق حزينه لكنها وجدت يد تمتد لها لا تعلم صاحبها
استيقظت سهير من الحلم و جلست على سريرها مندهشه و لكنها لم تبالى لتفسير حلمها واعتبرته مجرد أضغاث احلام
توالت الايام و سهير تتقدم فى تعليمها و تجتاز كل الصعوبات التى يجدها غيرها فى التعليم
لم يمر شهر إلا و سهير قد أتقنت الكتابه و القراءه و بعض العمليات الحسابيه كالضرب و الجمع و الطرح و القسمه
طوال تلك الفتره كانت هانم تجالس حافظ و سهير و هى فى كامل أناقتها و كانت تلاحظ نظرات حافظ المختلسه لها بين الحين و الاخر
ذات مساء عندما عاد سيد إلى البيت فاجأته سهير بمستواها الذى تقدم بسرعه فى القراءه و الكتابه
فرح سيد بسهير جدا ووصفها أن مخها نضيف زى مخه
طلبت سهير من ابوها أن تقدم لشهاده محو الاميه و منها للابتدائيه
و أمام الفرحه الكبيره التى رآها سيد فى عيون ابنته وافق
رمقته هانم بعينها و انتظرت دخول سهير لغرفتها
ايه يا سيد علام ايه اللى عاوز بنتك تكمله ؟؟ هو احنا مش قولنا تفك الخط و خلاص .....لزومو ايه حكايه محو الاميه دى
هو انتى مش شايفه البت فرحانه ازاى يا هانم ؟؟ انا مشوفتهاش فرحانه كدا من زمان
يا سيد البت ملهاش الا بيتها و جوزها و انا كل يوم و التانى حد بيجى يكلمنى عليها بس انا مش داخل دماغى اى واحد منهم ...كلهم كحيانين و مش لاقيين اللضا
طيب أدى انتى قولتى مفيش حد فيهم كويس يبقى البت تتعلم يمكن ربنا يكرمها بواحد متعلم زيها ....انتى عارفه يا هانم الواد حافظ ده واد محترم اوى و عاجبنى اوى اخلاقه ........ يا سلام لو بقى من نصيبها
نننننننعم أخلاق مين و حافظ مين ؟؟ بقولك ايه يا معلم اوعى تجيب الكلام ده على لسانك ....حافظ ايه اللى بيكمل عشاه نوم ده ؟ و بعدين على اخر الزمن هجوز بنتى لواحد شغال عندى ؟؟
بس الواد له مستقبل و هيبقى مهندس اد الدنيا متبصيلوش دلوقتى يا معلمه ....
مستقبل ايه يا ابو مستقبل انت ؟ بقولك ايه الكلام ده ميجيش فى خيالك مره تانيه و لو انطبقت السما ع الأرض عمرى ما اجوزه لبنتى
خلاص زى ما تشوفى ...بس اللى خلانى اقول كدا انى حسيت ان الواد و البت مايلين لبعض
نعم نعم ....نعمممم مايلين ايه و عدلين ايه ؟ انت بتخرف يا راجل انت ... هو انا ببقى قاعده خيال مآاته ......مفيش الكلام اللى بتقول عليه دا
طب خلاص خلاص بالراحه انتى مالك طلعتى زى القطر كدا ؟؟ انا غلطان يا ستى و حقك على
طب متبقاش تغلط تانى ...فورت دمى
طب خلاص هروق لك دمك ....عندى خبر حلو عشانك
قول يا اخويا
المعلم صلاح كان لسه عندى من شويه و بيقولى أن المحامى خلص كل الورق و إن احنا ممكن نسافر الاسبوع الجاى
صحيح يا سيد .... ايوا كدا خبر يفرح ده
طب حضريلنا الفلوس بقا يا معلمه اللى هنجيب بيها البضاعه
محضراها يا معلم بس انت لازم تاخد بالك من كل حاجه ....اصل احنا مش هنفضل مشاركيين صلاح على طول
يعنى ايه يا هانم مش فاهم
يعنى تعرف كل حاجه متبقاش زى الاطرش فى الزفه.....و تاخد ارقام تليفونات التجار و تبقى مصحصح كدا ......عشان بعد كدا تبقى تسافر لوحدك
ازاى يا هانم ؟ هو ده ينفع برده ؟
يا راجل بطل الهبل اللى انت فيه ده .....صلاح ده عباره عن سكه و الا سلمه بنخطى عليها عشان نوصل إلى احنا عاوزينه
يا خرابى ....دا انتى طلعتى داهيه
و لا داهيه و لا حاجه انت اللى على نياتك .....قوم يلا غير هدومك و نام
و انتى مش هتنامى ؟؟
شويه كدا و هاجى وراك
طيب يا معلمه تصبحى على خير
و انت من اهله يا معلم
انتظرت هانم إلى أن دخل زوجها غرفته و سمعت صوت شخيره العالى و اطمأنت أنه قد نام .....فقد الهبها كلماته عن إعجاب حافظ بأبنتها و قررت أن تصعد اليه و تواجهه
يتبع ......
#قصص_وحكايات_د_جيهان_عادل
تعليقات
إرسال تعليق