عنبر خمسه الجزء الثامن

#عنبر_خمسه

#الجزء_الثامن

الساعه اربعه الفجر بالظبط فتحت ساره عينيها 

 ‏ انتبهت جدا و قمت قعدت على سريري علشان اشوف ساره هتعمل ايه  اول ما تشوف الصور و الورد ؟؟؟

 ‏ساره قامت من على سريرها اول ما عينها وقعت وقعت على صوره والدها و هو حاضنها 

 ‏ساره وقفت تبص للصوره كأنها مش فاكره أو مستغربه 

 ‏ساره قربت من الصوره و ابتدت تحاول تلمس طرفها اللى يدوب أيدها تطوله 

 ‏ابتدت ساره تنط عاوزه توصل لوش ابوها و تلمسه بأى طريقه 

 ‏بصت حواليها ملقتش غير سريرها 

 ‏ساره راحت على السرير و ابتدت تجر فيه ناحية الحيطه 

 ‏وقفت ساره على السرير و بقى وشها مقابل وش ابوها 

 ‏ابتدت تلمس الوش اللى فى الصوره و تحاول تحضنه نامت على كتفه 

 ‏ساره وقفت شويه كتير على الحال ده 

 ‏بصت حواليها لقت صور تانيه 

 ‏نزلت بسرعه و جرت سريرها على كل صوره و ابتدت تتلمسهم كأنها بتقول انا عارفاكم 

 ‏ساره عينها وقعت على الورد و الشيكولاته و الباتيه 

 ‏نزلت بسرعه و خدت الورد فى حضنها و قعدت تشم فيه زى ما يكون ريحته بتفكرها بذكريات هى نسيتها من زمان 

 ‏ساره خدت الشيكولاته و الباتيه و الورد و نامت و هى حضناهم على سريرها وواخده وضعيه الجنين 

 ‏بعد شويه ابتدت ساره تاكل و اخدت الشيكولاته و اكلتها و اترسم على وشها ابتسامه حلوه 

 ‏حلو اوى رد الفعل ده يا ساره و احسن ما كنت متوقع كمان 

 ‏من بكرا هبدأ معاكى فى العلاج اللى كتبهولى دكتور ماجد و يارب خير 

 ‏حطيت موبايلى جنب منى و عينى على ساره لحد ما رحت فى النوم 

 ‏تانى يوم قمت على خبط الباب 

 ‏قمت بسرعه ببص فى موبيلى لقيت ساره قاعده  و رجليها قدامها و أيدها محاوطه رجليها تحت صوره ابوها و هو حاضنها على شط البحر و باصه لها مبتنزلش عينها من عليها .

 ‏يا دكتور احمد 

 ‏ايوه يا شعبان 

 ‏انا جاى اصحيك عشان المرور 

 ‏حاضر يا شعبان انا جاى وراك اسبقنى و حضر لى قهوه على مكتبى 

 ‏قهوه ع الريق كدا ؟؟

 ‏اعمل اللى بقولك عليه يا شعبان 

 ‏حاضر امرك يا رياسه 

 ‏مشيت شعبان بسرعه و مسمحتش له يدخل عليا لانى كنت براقب ساره 

 ‏بس ساره مبتتحركش نهائى 

 ‏الله ..دا الورد فى حضنها ...كويس اوى 

 ‏قمت بسرعه غسلت وشى و لبست هدومى و رحت على مكتبى لقيت شعبان عاملى القهوه زى ماطلبت 

 ‏بقولك ايه يا شعبان 

 ‏نعم يا دكتور 

 ‏انا عاوزك تجيب فطار كويس لساره 

 ‏فطار كويس اللى هو ايه يعنى ؟؟ ما احنا بنحطلها اكل المستشفى و فى الغالب يا بتدلقه يا بترجعه 

 ‏منا عشان كدا بقولك عاوزين نجيب حاجه تانيه ...سارة دى اكيد كانت متعوده على أكل معين 

 ‏معين ازاى يعنى ؟ قصدك فول و طعميه و براطس ؟؟

 ‏براطس ؟؟؟ ايه براطس دى ؟؟ شعبان اسكت خالص متتكلمش كلامك بينرفزنى 

 ‏انا عاوزك دلوقتى تاخد فلوس منى و تطلع تجيب لها قشطه و مربى و جبنه و بيض و عيش توست 

 ‏ايه دا كله يا دكتره ؟؟ و انت هتلاحق بقا على الكلام ده كل يوم ؟؟ 

 ‏ملكش دعوه يا شعبان قلت لك متتكلمش خالص 

 ‏و انا مالى.... ال على رأى المثل اربط الحمار مطرح ما يقول صاحبه 

 ‏خد يا شعبان الفلوس اهى و اطلع على الهايبر اللى فى اخر الشارع هات الطلبات منه و تعالى 

 ‏طب اعمل حسابك فى الطلبات ؟؟

 ‏لا 

 ‏طب اعمل حسابى فى الطلبات ؟؟

 ‏يخربيت سماجتك ...امشي يا شعبان 

 ‏حاضر ...بهزر معاك يا دكتره انت مالك حمقى كدا ليه ؟؟

بعد شويه شعبان جه و جاب الطلبات 

جبت صنيه و حطيت فيها الفطار و قلت له يروح يوديها 

شعبان بص لى كأنى بشتمه 

أودى ايه و لا مؤاخذه ؟؟

تودى الاكل على ما امر على العنابر 

طب و الدوا اللى كنا بندوبه فى الاكل ؟؟

لا الدوا مش دلوقتى 

ازاى يعنى ؟ ما احنا لو محطناش لها الدوا فى الاكل مش هترضى تاخده 

ملكش دعوه يا شعبان انا هديها العلاج بنفسي 

يا صلاة النبى ...و كمان بنفسك ؟؟ انا لله و انا اليه راجعون و الله كنت دكتور طيب يا دكتور احمد 

بطل رغى كتير انت مبتزهقش ...يلا روح حط الصنيه لساره 

حاضر أوامرك 

و راح شعبان و دخل الصنيه من الفتحه بتاعة الاكل و قفل بسرعه 

انا بقا كنت براقب بالكاميرا و بشوف رد فعلها هيكون ايه 

ساره كانت لسه قاعده تحت الصوره و بتبص لها و اول ما دخل الاكل بصت باستغراب زى ما يكون مشفتش اكل من زمان 

ساره قربت بخوف شديد و مسكت الاكل و قعدت تشم فيه 

بعدها بدأت تاكل بنهم كبير لدرجه انها خلصت كل الاكل اللى على الصنيه

لما شفتها استجابت للفطار فرحت و حسيت أن مهمتى هتكون اسهل مما كنت اتوقع ..

ساره خلصت اكل و رجعت تقعد تحت الصوره مره تانيه 

انا بقا قمت رحت أمر على العنابر و بعدين رجعت 

الجوله دى خدت منى حوالى ساعه ..كنت متلهف انى ارجع بسرعه لمكتبى عشان اشوف ساره عامله ايه 

و فعلا اول ما دخلت فتحت موبايلى و بصيت لقيتها قاعده تعيط 

اخدت الدوا اللى كتبهولها ماجد و رحت على عنبر خمسه 

قربت من الباب خبطت خبطتين صغيرين 

اول ما سمعت الخبط انكمشت فى نفسها و اتكومت فى ركن من أركان الاوضه 

ابتديت انادى عليها 

ساره ...ساره ...ساتو ( و دا اسم الدلع اللى كان والدها بيناديها بيه ) 

اول ما سمعت  كلمة ساتو قامت بسرعه و جت ناحيه الباب و قالت بابا ؟؟؟

لا انا مش بابا انا الدكتور أحمد 

اول ما قلت كدا جريت قعدت على سريرها ( كل تحركاتها انا شايفها فى الكاميرا )

قعدت ساره على السرير ضامه رجليها لصدرها و بقت تهز جسمها بطريقه هستريه 

أهدى يا ساتو ...انا مش هأذيكى اعتبرينى صديقك و اوعدك انى هكون صديق كويس اوى ليكى 

ساره وقفت هز و ابتدت تبص ناحية الباب 

يعنى مش هتكهربنى ؟؟؟

لا ...اوعدك انى مخليش حد يكهربك تانى 

انت مين ؟؟

انا دكتور جديد فى المستشفى و عاوز اعالجك..

لا مش عاوزه ...انا مش مجنونه 

عارف انك مش مجنونه 

عارف منين ؟؟

انا عارف عنك كل حاجه 

انت اللى دهنت الاوضه و حطيت الصور و الورد ؟؟

ايوه ...( كويس  اوى انها منتبهه بالشكل ده )

عرفت منين انى بحب القرنفل ؟؟

من البوم صورك ...الصور معايا 

معاك ؟؟؟ عاوزه اشوفهم 

انا معايا اربع صور بس اللى كانوا فى جيبي و الباقى فى البيت تحبى تاخديهم ؟؟

ايوه من فضلك 

بس على شرط 

شرط ايه ؟؟

تاخدى معاهم الحبيتين دول 

لا انتوا هتنيمونى عشان تودونى جلسه الكهربا 

لا ابدا انا وعدتك انى مش هوديكى هناك ابدا 

انت بتكدب عليا كلكم كدابين كلكم كدابين ...حتى اقرب الناس ليا 

خلاص يا ساره مدام مش مصدقانى انا همشي 

لا استنى ...انا عاوزه الصور 

هتاخدى العلاج ؟؟؟

هاخد بس هات الصور 

فتحت الفتحه اللى فى الباب اللى من فوق و بكل حذر ...

هى بقا اول ما سمعت باب الفتحه جريت وقفت على السرير 

خدى يا ساره العلاج ده 

انا شفتك قبل كدا 

ايوه انا كنت هنا من يومين 

لا ...انا شفتك فى الحلم 

شفتى ايه ؟؟؟؟

#دجيهان_عادل

يتبع

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ...