#سهير
#الجزء_الحادى_عشر
انتظرت هانم إلى أن دخل زوجها غرفته و سمعت صوت شخيره العالى و اطمأنت أنه قد نام .....فقد الهبها كلماته عن إعجاب حافظ بأبنتها و قررت أن تصعد اليه و تواجهه
صعدت هانم درجات السلم و هى تنظر حولها مخافة أن يراها احد من سكان البيت و لكن لهيب قلبها كان أقوى من اى خوف تشعر به
طرقت هانم الباب فتح لها حافظ و هو بالملابس الداخليه
سالخير يا حافظ
مساء النور يا معلمه ...خير فى حاجه
لأ ابدا ...دا انا كنت عاوزه اكلمك فى موضوع كدا و مكنتش عاوزه حد من البيت عندنا يسمعنى
اتفضلى يا معلمه ادخلى ....انا تحت امرك
الأمر لله وحده ......دا ايه الاوضه بتاعتك دى ؟؟
مالها يا معلمه ....معلش مكركبه شويه
مكركبه و بس ؟؟؟ دى لمؤاخذه عامله زى زريبه البهايم .... ليه كدا سايبها بالشكل ده
اصلى معنديش وقت انضف خالص .... يدوب بروح الجامعه و اطلع على المحل بعدها أدى الدرس للانسه سهير و بعدها اطلع اذاكر شويه و انام ....مبلحقش اعمل اى حاجه
صحيح يا حافظ بمناسبه الانسه سهير ...كنت عاوزه اسالك
اتفضلى يا معلمه
هو انت اللى دخلت فى دماغها حكايه دخول الجامعه دى ؟
انا فعلا اتكلمت معاها فى الموضوع ده لأنها فعلا شاطره و يجى منها
شاطره ؟؟؟ و ايه كمان ؟؟
لأ مش فاهم يا معلمه قصدك ايه ؟؟
يعنى بالعربى كدا انت بتحرضها ليه تدخل الجامعه ؟ تكونش جايب لها عريس م الجامعه ؟؟
عريس ؟؟؟...عريس ايه يا معلمه ؟؟ و انا هجيب لها عريس منين و ازاى ؟
ليه هى مش اد المقام و الا ايه ؟؟
لا العفو بس انا مليش علاقه بحد و معرفش اى حد
طب و انت ؟؟؟؟؟
انا ....انا مالى يا معلمه ؟؟
مش يمكن البت عاجباك و نفسك تتعلم عشان تليق بيك
هنا أدرك حافظ مغزى السؤال ...و التقط ما يجرى بعقل هانم فضحك قائلا
عاجبانى ايه بس يا معلمه ؟؟ سهير دى اختى الصغيره طب عارفه انا بعتبرها زى ابتسام اختى بالظبط و لما ببقى قاعد معاها كأنى شايف ابتسام اختى قدامى ....و بعدين يا معلمه انا فين و الجواز فين ؟؟؟ دا انا عقبال ما اجى اتجوز هتكون سهير معاها عيلين ... كمان مع احترامى طبعا للانسه سهير بس مش هى اللى تدخل دماغى ....انا نفسي اتجوز واحده عقلها كبير يوزن بلد مش عيله صغيره متعرفش الدنيا
ابتسمت هانم و اردفت قائله
طيب يا سي حافظ بكرا تبقى تسيبلى مفتاح الاوضه عشان ابعت الواد دقدق ينضفهالك
لا متشكر يا معلمه انا هبقى انضفها
يا شيخ اتنيل ...انت لا بتعرف تنضف و لا بتعرف تعمل حاجه خالص ....يلا بالاذن انا بقا
ما بدرى يا معلمه
بدرى من عمرك يا سيدنا الافندى
خرجت هانم من حجره حافظ فرحه بما سمعته ....بينما أخذ حافظ يحدث نفسه قائلا
ايوووه هو دا الشغل يا واد يا حافظ ...بقا انتى طالعالى فى الوقت ده عشان تسالينى عن تعليم بنتك ؟؟ و الا طالعه تطمنى انى مش معجب بيها ؟ على العموم اللى عملته دلوقتى دا خطوة أولى بعد كدا هيبدأ الشغل اللى على كبير .... أنا لازم استغل الفرصه دى ...الفرصه مبتجيش الا مره واحده ....ست خرفانه متصابيه فاكره نفسها ياما هنا و ياما هناك متجوزه راجل دلدول لا بيهش و لا بينش و بنتها عيله ساذجه ممكن اى حد يضحك عليها
بس انا عارف انا هركز على مين و مصلحتى مع مين
فى اليوم التالى ذهبت سهير مع والدها لمعرفه الإجراءات الخاصه للحصول على شهاده محو الاميه ....و كم كان الحظ حليف سهير و علمت أن الامتحان فى الأسبوع القادم و انها باستطاعتها بعد ذلك التقديم للابتدائيه
عادت سهير و الفرحه بقلبها و عقلها فقريبا ستحصل على اول شهاده فى حياتها ....بعدها سيتحقق حلمها الذى طالما حلمت به
صعدت سهير إلى كتبها و كراساتها و اخذت تستذكر دروسها استعدادا للامتحان
أما حافظ فقد عاد من كليته على المحل لتطلب منه هانم المفتاح و تعطيه لدقدق
خد يا واد يا دقدق
ايه دا يا معلمه
دا مفتاح اوضة الاستاذ حافظ عاوزاك تروح تنضفهاله و تخليها على سنجة عشره
و انا انضف له الاوضه ليه ؟؟ كان من بقيه عيلتى ؟
يا واد بطل مقاوحه و اسمع الكلام
لأ معلش يا معلمه انا مش خدام عنده ....انا لى شغلى هنا فى المكان و بس
طب ما المكان مكانى و انا بطلب منك طلب اعملهولى بقا
طلبك على عينى يا معلمه بس جوه المكان مش بره
بقا كدا يا دقدق .....طييييب ...روح شوف شغلك
دلف دقدق لداخل المحل و ترك هانم مغتاظه و تقول فى نفسها لك روقه معايا يا دقدق
فكرت قليلا ثم قامت لتذهب هى إلى حجره حافظ ....و اشترت بعض الأشياء فى طريقها للحجره .....كما قامت بعمل نسخه على المفتاح و احتفظت بها لنفسها
دخلت هانم الحجره لتجد الكتب ملقاه على السرير و على المنضده ....اطباق متسخه ملقاه فى كل مكان ....اوراق مبعثره على الأرض ...ملابس غير نظيفه مبعثره على السرير و على الأرض
الارض مليئه بالأتربة ...
شمرت هانم ذراعيها و بدأت بلم الملابس ووضعها فى طبق مليئ بالماء و الصابون لغسلها
بدأت ترتب الكتب .... أزاحت الملايه المهترأه ووضعت ملايه جديده على السرير .....مفرش جديد على المنضده و زينتها ببعض الازهار ..كنست الأرض.....و مسحتها و قامت بإعداد وجبه من الطعام اللذيذ لحافظ غسلت الملابس و نشرتها .....تركت له بيجامتين مغلفتين على السرير و تركت الغرفه و قد اختلف شكلها تماما عن ذى قبل
نزلت هانم إلى شقتها متربه متسخه الملابس اخذت حمام و لبست ملابس نظيفه و جلست لتنتظر مجيئ حافظ لإعطاء الدرس لابنتها
عندما دخل حافظ أمرت هانم سهير أن تعد له الشاى
همست هانم
خد يا حافظ المفتاح اهو ....انا وضبت لك الاوضه بنفسي
و ليه التعب دا يا معلمه
و لا تعب و لا حاجه ما انت كمان بتتعب معانا .... بس بقولك ايه انا مش عاوزه حد يعرف انى انا اللى طلعت روقت لك الاوضه
حاضر .....حاضر يا معلمه
دخلت سهير و أخبرت حافظ عن الامتحان و احضرت الكتاب الذى تسلمته لتريه إياه
حافظ نظر فى الكتاب و قال لها ان دروسه سهله بالنسبه لكى ....انتى اخذتى الاصعب و خلال أيام ستكونى ملمه بكل ما فيه
بدأ حافظ مع سهير فى تدريس بعض دروس الكتاب ثم استأذن للصعود إلى غرفته
دخل حافظ الغرفه و لم يصدق ما رأى ....فالغرفه شديدة النظافه ذات رائحه عطره ....السرير مفروش بفرش نظيف غير مهترئ ....الملابس مغسوله و الطعام معد
ضحك حافظ و هو يتذوق الطعام و يقول
و الله وقعتى فى الفخ يا هانم و لا حدش سمى عليكى
#سهير
#الجزء_الثانى_عشر
مر الاسبوع حدثت به كثير من التطورات فقد دخلت سهير الامتحان ، أنهى سيد إجراءات سفره مع مروان ابن المعلم صلاح ، بينما هانم تصعد كل يومين لإعداد وجبه طعام تعدها مخصوصا لحافظ و تعيد ترتيب الغرفه أثناء وجوده بالمحل
بعد أيام ظهرت نتيجه سهير بالنجاح
فرحت سهير كثيرا و ذهبت لوالدها فى المحل ليفرح معها ....وجدت سهير رجل يجلس مع والدها فتراجعت خطوتين للوراء
تعالى يا سهير واقفه كدا ليه يا بنتى
معلش يا أبا مكنتش اعرف ان معاك حد
لا دا مش غريب دا مروان ابن عمك صلاح ...جاى بيتفق معايا عشان السفر بكرا زى ما انتى عارفه
ايوه ...اهلا و سهلا
اهلا بيكى يا انسه
كنتى عاوزه حاجه يا سهير ؟
ايوه كنت عاوزه اقولك انى نجحت و خدت شهادة محو الاميه يا أبا ...... و عاوزه بقا أقدم فى الابتدائيه
كدا طب الف مبروك .... واد يا دقدق روح للواد سلامه خليه يوزع شربات على الحاره كلها بمناسبه الشهاده بتاعه الست سهير
عنيا ليكى يا ست سهير ...بكرا قبل ما اسافر هروح معاكى المدرسه و اشوف الإجراءات
لا متتعبش نفسك يا أبا انا عارفه السكه كويس
طب خلاص يا بنتى خدى حافظ معاكى عشان الورق و كدا
ماشى يا أبا هقوله انهارده لما يجيلنا بالليل
فى اليوم التالى ذهبت سهير و حافظ لتقديم أوراقها للمدرسه للتقدم للشهاده الابتدائيه
انا فرحانه اوى يا سي حافظ ....معقوله بعد كام اسبوع هيبقى معايا الابتدائيه ؟؟؟
انتى طيبه و تستاهلى كل خير يا سهير
و الله يا سي حافظ الفضل لله ثم ليك انت من بعده
متقوليش كدا يا سهير ...انتى فعلا كويسه و ذكيه جدا
ربنا يخليك لى ....مش عارفه من غيرك كنت عملت ايه
و يخليكى لى يا سهير و اشوفك فى الكليه يا رب
يارب يا سي حافظ يا رب ....علشان اليق باللى بحبه
الله ...و هو مين سعيد الحظ اللى بتحبيه دا ؟
واحد مش واخد باله منى خالص و لا حاططنى فى دماغه يمكن عشان انا مش متعلمه زيه
ما يمكن واخد باله بس مش قادر يتكلم
و مش قادر يتكلم ليه بس ؟
كل واحد و له ظروفه يا سهير ...الله اعلم بيها
صمتت سهير و لم تجد ما ترد به على كلمات حافظ بينما حافظ كان يعى كل كلمه يقولها لسهير جيدا
عادت سهير إلى البيت لتجد ابوها قد حزم امتعته و يستعد للخروج ....سلمت عليه و قبلته و لم تستطع أن تمنع دموعها من النزول
ربط سيد على كتف ابنته
مالك يا سهير ..بتعيطى ليه بس دول هما كلهم اسبوعين تلاته و اجيلك ....و هجيبلك معايا حاجات حلوه اوى من بره
انا مش عاوزه حاجه يا أبا ....المهم ترجع لنا بالف سلامه
الله يسلمك يا حبيبتى ...و انتى يا هانم عاوزانى اجيب لك ايه من هناك
عاوزاك تجيب لى شويه بواريك من هناك انا سمعت أن عندهم بواريك حلوه اوى
بواريك ايه دى ؟
البواريك يا راجل ...الشعر اللى بيحطوه الستات الا فرنكه على شعرهم
ااااه عرفتها ...طيب حاضر من عنيا
سافر سيد مع مروان و انتهز حافظ الفرصه للتقرب للمعلمه و لسهير
بدأ حافظ فى اقناع هانم ببعض التغيرات فى شكلها و فى المحل
وصادف هذا التغيير هوا عند هانم ...فبحد تعبير حافظ هى هانم و تستحق أن تكون هانم بحق و انها فى الفتره القادمه ستدخل لمرحله جديده من التجاره و لابد لها أن تجارى المرحله
فنصحها أن تشترى الفساتين الغاليه من وسط البلد و أن تعتنى بنفسها كما تفعل الهوانم
ذهبت هانم إلى مصفف الشعر قصت شعرها و صبغته ، قامت بطلاء أظافرها ...وضعت المساحيق على وجهها
لبست فستان قصير فوق الركبه ...ليست حذاء ذو كعب طويل
كما أقنعها بتغيرات فى المحل ...حيث أشار عليها باعاده تنظيم المحل بعد دهان الحوائط و وضع رفوف أكثر بطريقه أكثر تنظيما ....عمل سجلات جديده منظمه بطريقه افضل
اعجبت هانم بالتغيير و شعرت أن الدماء تتجدد فى عروقها
عاد سيد بعد عشرين يوما ..... لم يعرف زوجته للوهله الاولى
لو سمحتى فين المعلمه هانم
الله منا اهو قدامك يا سيد
ايه دا ؟؟ ايه اللى عملاه فى نفسك ده ؟
ايه رايك ؟ مش كدا احسن
انا معرفتكيش انتى صغرتى عشرين سنه
الله منا صغيره يا سيد هو انت فاكرنى كبيره
لا كبيرة ايه ...دا انتى غلبتى سهير بنتك ...بقيتى اصغر منها ......و ايه اللى عملتيه فى المحل ده كله ؟
ايه رايك ؟؟
رايى ....دا حلو اوى المحل شكله اتغير خالص ...دا انا لولا الواد دقدق مكنتش عرفته ....بس ليه التغيير دا كله؟ ايه السبب يعنى ؟
الله مش احنا داخلين على مرحله جديده و لازم نكون مستعدين لها يا سيد ....الا صحيح عملت ايه فى السفريه بتاعتك ؟
السفريه كانت عال العال كل شئ عملته زى ما اتفقنا بالظبط و أدى يا ستى ارقام التجار زى ما طلبتى منى
و البضاعه ....البضاعه فين يا سيد ؟
البضاعه شحنتها و جايه فى السكه ....كلها يومين و نروح نستلمها
طب جبت لى البواريك اللى قلت لك عليها
ايوه طبعا جبتها شويه بواريك هتعجبك اوى ...خليت مروان اللى يجيبهم انتى عارفه انى مبفهمش فى الحاجات دى اوى
طيب لما اشوف ....يلا بينا بقا على البيت زمانك جعان اوى
ايوه فعلا انا ميت من الجوع
طب يلا سهير عاملالك الاكل اللى بتحبه كله
سهير ...صحيح سهير عامله ايه ؟؟ و المذاكره عامله معاها ايه ؟
حلوة يا اخويا ...انا عارفه انتوا طلعتولى بحكايه المذاكره دى من فين ؟ البت طول الليل و النهار ممققه عنيها فى الكتب
طب و ماله يا هانم مش مستقبلها ؟
مستقبل ايه يا سيد ...هى البت لها إلا بيتها و جوزها
خلاص بقا يا هانم ...بس انتى وحشتينى اوى يا هنومه
و انت كمان يا سيد
وصل سيد للبيت ليجد سهير فى استقباله ...... فألقت نفسها فى أحضانه و اخذت فى البكاء
وحشتنى اوى يا أبا
و انتى كمان وحشتينى اوى يا سهير يا بنتى ...ايه يا سهير هو امشي تعيطى اجى تعيطى ؟؟
لأ دى دموع الفرحه يا أبا
طب تعالى بقا اوريكى جبت لك ايه معايا ...حاجات هتخليكى سنيوره الحاره كلها
ربنا يخليك لى يا أبا و ميحرمنيش منك ابدا
و انتى عامله ايه فى دراستك ؟؟
انا الحمد لله و سي حافظ مش سايبنى مع أن عنده امتحانات الايام دى
ااااه عشان كدا مشفتوش فى المحل
ايوا ما هو امى مدياه اجازه اليومين دول من الشغل عشان امتحاناته و كمان هو تعب معاها اوى فى توضيب المحل
ايوه ايوه ...فعلا المحل شكله اتغير خالص
طب يلا يا سهير بطلى كلام شويه و ادخلى هاتى الاكل ابوكى جعان
حاضر يا اما ...حالا
مرت الايام ووصلت البضاعه و توسع سيد و هانم فى تجارتهم بشكل كبير
امتحنت سهير و حصلت على الابتدائيه و قررت التقدم لشهاده البكالوريا
و بعد أن قاربت البضاعه على النفاذ و أمام المكسب الكبير الذى اكتسبته هانم ....طلبت هانم من سيد الاتصال بالتجار فى الخارج و عمل صفقه جديده
و فعلا اتفق سيد على صفقه بضعف ثمن الصفقه السابقه
أنهى سيد إجراءات سفره و طلب من زوجته ايقاظه فى الرابعه صباحا حتى يستطيع الذهاب للمطار مبكرا لأن طائرته فى الثامنه صباحا
لم تنم هانم ليلتها و باتت تحسب المكسب الذى ستكتسبه من صفقتها الجديده
و عندما حلت الساعه الرابعه صباحا دخلت هانم لإيقاظ سيد كما طلب منها
سيد ...سيد ...قوم يلا عشان تلحق الطياره ...سيد
سييييييييييييييد !!!!!
#سهير
#الجزء_الثالث_عشر
أنهى سيد إجراءات سفره و طلب من زوجته ايقاظه فى الرابعه صباحا حتى يستطيع الذهاب للمطار مبكرا لأن طائرته فى الثامنه صباحا
لم تنم هانم ليلتها و باتت تحسب المكسب الذى ستكتسبه من صفقتها الجديده
و عندما حلت الساعه الرابعه صباحا دخلت هانم لإيقاظ سيد كما طلب منها
سيد ...سيد ...قوم يلا عشان تلحق الطياره ...سيد
سييييييييييييييد !!!!!
رد عليا يا سيد .....يا لهوى ...سيد
يا سهيييير يا سهييير الحقى ابوكى يا سهير
جاءت سهير مسرعه
ماله يا اما ؟؟
ابوكى مبينطقش ....عماله اصحى فيه مبيصحاش
أبا ...أبا ...رد عليا يا أبا ...رد عليا.... لأ يا أبا اوعى تسيبنى ....انا مليش غيرك ....اصحى عشان خاطرى
الحقى يا اما ابويا...ابويا مات
اخذت سهير تصرخ على موت والدها بينما هانم لم ينزل من عينها دمعه واحده ....فقد كانت تفكر فى أمر آخر
تجمع الجيران على صراخ سهير .... بدأت السيدات بتهدئه سهير و اخذها بعيدا عن والدها بينما الرجال قاموا بالاجراءات التى تتخذ عند الموت
تم تغسيل سيد و تكفينه ....ثم صلوا عليه الجنازه بعد الظهر و تم دفنه بعد ذلك
كانت سهير تتألم كعصفوره على صفيح ساخن بينما كانت هانم صامته بشكل مريپ
بعد أخذ العزاء و انصراف الجميع فيما عدا حافظ و دقدق
مش عاوزه منى حاجه يا معلمه
لا متشكرين يا دقدق ....استنى يا حافظ عاوزاك
تحت امرك يا معلمه
انت عارف طبعا أن بعد موت المعلم مبقاش لنا حد ...و الحى ابقى من الميت
ايوه يا معلمه
انت عندك بسبورت ؟؟؟
لا معنديش بس ليه ؟؟
انا و المرحوم كنا متفقين على صفقه كبيره مع تجار بره لكن ربنا مأردش بقا أنه يكمل ....فأنا عاوزه اسافر و اخدك معايا نروح نشحن البضاعه و نرجع ....قلت ايه
هقول ايه بعد قولك يا معلمه
طب خلاص بكرا من النجمه نروح سوا نعمل باسبورتات مستعجله و نسافر على طول اول ما تطلع
و هو كذلك يا معلمه ....عاوزانى فى حاجه تانيه ؟؟
اقعد اتعشي معانا
لأ متشكر يا معلمه ....انا لسه واكل من شويه
طيب خلاص اطلع استريح انت .....انت تعبت معانا انهارده
طب بالإذن انا بقا
مع السلامه
فى اليوم التالى أنهت هانم و حافظ جواز السفر الخاص بكل منهما ....
بعد يومين استلموا جوازات السفر ....
طلبت هانم من حافظ حجز تذكرتين سفر فى أقرب وقت
و بعد اسبوع من موت سيد كانت هانم و حافظ على متن الطائره .....تاركه سهير غارقه فى حزنها على والدها
اتفقت المعلمه على الصفقه الجديده ، دفعت النقود ، شحنت البضاعه ، طلبت من حافظ حجز تذاكر للعوده الى ابنتها سريعا
فى هذه الفتره تقرب حافظ لهانم بشكل كبير
انا خلاص يا معلمه حجزت فى طياره بعد بكرا
ليه يا حافظ مكنش فى تذكره بكرا
لا ....بس دى فرصه نتفسح شويه و نشوف اماكن جديده
نتفسح ازاى بس يا حافظ ؟؟
ما انتى قلتى يا معلمه الحى ابقى من الميت ....و انا عملت لك بروجرام حلو اوى هنقضى طول اليوم بره ...عاوزه تشترى اى حاجه هوديكى السوق و هنروح ناكل فى محل مشهور اوى هنا ....بالليل هاخدك اسهرك فى مكان حلو اوى
انت عرفت الحاجات دى كلها منين ؟؟
اللى يسأل ميتوهش يا معلمه ...و انا سألت و اتقصيت على الأماكن الحلوه هنا و عرفتها و قررت افرحك و اطلعك من اللى انتى فيه
فى اليوم التالى ....ذهبت هانم مع حافظ لتتنزه و كم كانت مرعوبه و هى تركب معه التلفريك ...
انبهرت هانم بالسوق و بالاشياء التى لم ترها فى حياتها ، فواكه مختلفه ، ملابس جميله، اكسسورات ... احضرت هدايا لها و لسهير و لحافظ
ذهبوا إلى محل اسماك فاخر ...حيث يختارون السمك الطازج و يتم إعداده خصيصا لكل زبون
بعد ذلك ذهبوا إلى الملاهى ....ركبت هانم الالعاب لاول مره فى عمرها
عند منتصف الليل عاد حافظ و هانم إلى الفندق المقيمين فيه....نظرت هانم لحافظ و قالت
متشكره اوى يا حافظ ...انت ورتنى اللى عمرى ما كنت احلم انى اشوفه ....فرحتنى اوى
لا عيب متشكرنيش ....انا تحت امرك
لأ بجد انت مفيش زيك
و انتى كمان يا معلمه عمرى ما شفت زيك ابدا
ما بلاش معلمه دى .....لما نكون لوحدنا قولى يا هانم
حاضر يا هانم
الله حلوة اوى من بقك يا سي حافظ
حلوة عشان اسمك يا هنومه
بس بقا بتكسف
يا خرااااشي اموت انا فى الكسوف ده
طب يلا تصبح على خير بقا
و انتى من اهل الخير يا ......يا حبيبتى
شعرت هانم بسعاده بالغه ....دخلت غرفتها وقفت أمام مرآتها تنظر إليها محدثه نفسها
ايه اللى بتعمليه دا يا هانم ؟؟ معقوله تفكرى بالشكل ده ؟؟ طب و سيد ؟؟ سيد الله يرحمه بقا و الحى ابقى من الميت ....بس الواد صغير و حلو .....و ايه يعنى منا كمان لسه فى عزى ....الواد متعلم ...برده و ماله اما يكون متعلم دا كدا هيفدنى اكتر فى شغلى ....اهو انا شفته و هو بيتعامل مع التجار زى ما يكون مولود تاجر ....شاطر اوى
طب و بعدين يا بت هتفاتحيه ازاى ؟ منا لو استنيت أنه يتكلم عمره ما هيتكلم هيخاف اكيد .....خلاص انا لما عدتى تقرب تخلص هعرض عليه و اشوف رأيه ايه ....طب افرض الواد مقبلش هتعملى ايه يا هانم ؟؟
ميقبلش ازاى ؟؟؟ هو يطول ...
جلست هانم على سريرها تحلم باليوم الذى تكون فيه مع زوجها الجديد حافظ .....إلى أن دخلت فى النوم
فى الصباح التالى قامت هانم على طرقات الباب
فتحت لتجد أمامها حافظ يقف متأنق بإحدى البدل التى اشترتها له بالأمس
نمتى كويس يا هانم
ايوا نمت كويس اوى الحمد لله
طيب يلا استعدى عشان هنطلع على المطار بعد ساعه
حاضر ....انا مجهزه كل حاجه
طب محتاجه اساعدك فى اى حاجه ؟
لا كتر خيرك يا حافظ
انتى تؤمرينى بس يا نونه
نونه .... ههههههههه يو جتك ايه يا حافظ انا نونه ؟؟
ايوه طبعا انتى نونه و نونه جميله كمان ...انا شايفك كدا انا حر يا ستى
صحيح يا حافظ ...يعنى انت مش شايفنى كبيره ؟؟
كبيره ايه بس ؟ طب اقولك على سر
قول
انتى عارفه انا اول ما شفتك افتكرتك مش متجوزه اصلا ...كنت فاكرك اكبر من سهير بسنتين تلاته و اتفاجأت لما قولتيلى انك امها
كلامك حلو اوى يا حافظ ...انت متعرفش الكلام ده بيعمل ايه في
طب يلا جهزى شنطك عشان اجى انزلهالك و هنبقى نفطر تحت فى المطعم سوا قبل ما نروح المطار
***************************
وصل حافظ و هانم إلى مصر و استقبلتهم سهير بفرح شديد فقد كانت وحيده بدونهما
وصلت البضاعه بعد يومين و بدأ حافظ فى تطوير التجاره و فتح أسواق جديده فى عدة مناطق ...حاول التقرب بكل الاشكال لهانم
يوم عن يوم كانت ثقه هانم تزداد فى حافظ ...إلى أن صارحته فى يوم من الايام قرب انتهاء عدتها انها تريده زوجا لها .... انتهز حافظ الفرصه و أبدى سعاده غير طبيعيه لطلب هانم
و اتفقا سويا على كتب كتابهم فور انتهاء العدة
اصبح حافظ يذهب للعشاء يوميا مع سهير و هانم
سهير كانت تظن أنه يحضر من أجلها ...و حبه كان يملأ قلبها يوما بعد يوم
و فى يوم من الأيام قامت سهير لرفع الاطباق بعد العشاءو عمل الشاى انتهز حافظ الفرصه و قرب من المعلمه يريد تقبيلها
ايه يا حافظ ...عاوز ايه
انتى عارفه عاوز ايه ؟؟
لأ لأ .... مينفعش
ليه مينفعش انا خطيبك و كتب كتابنا بعد بكرا ...
قرب حافظ لهانم بشكل كبير ...و ضمها لصدره فى هذه اللحظه دخلت سهير لترى امها و حافظ فى هذا الوضع المزرى.
#سهير
#الجزء_الرابع_عشر
و فى يوم من الأيام قامت سهير لرفع الاطباق بعد العشاءو عمل الشاى انتهز حافظ الفرصه و قرب من المعلمه يريد تقبيلها
ايه يا حافظ ...عاوز ايه
انتى عارفه عاوز ايه ؟؟
لأ لأ .... مينفعش
ليه مينفعش انا خطيبك و كتب كتابنا بعد بكرا ...
قرب حافظ لهانم بشكل كبير ...و ضمها لصدره فى هذه اللحظه دخلت سهير لترى امها و حافظ فى هذا الوضع المزرى
سقطت أكواب الشاى من يد سهير ....ايه اللى انا شايفه
ده ؟؟؟ انتوا بتعملوا ايه ؟؟
اضطربت هانم و اضطرب حافظ و قام من مكانه
تمالكت هانم أعصابها قائله ايه..... فى ايه ؟
الكلب دا لازم يطلع بره البيت
يطلع دا ايه ؟ دا خطيبي و هنتجوز بعد بكرا
خطيبك ...؟؟؟؟؟ خطيبك ازاى يعنى ؟؟؟ طب و ابويا ؟
ابوكى الله يرحمه ....ميت من اربع شهور ...ايه هموت نفسي من بعده؟؟ و الا عاوزانى اترهبن عشان ابوكى ينبسط ؟
انتى بتقولى ايه ؟؟؟ انا مش مصدقه ودانى
لا صدقى يا حبيبتى صدقى ....حافظ من هنا و رايح هيبقى راجل البيت
هتتجوزى واحد اد ابنك ؟؟؟
اخرصى اد ابنى دا ايه ؟.....دا هما كلهم ١٢ سنه فرق بينى و بينه
ايوه ايوه ....و انا اقول التغيير اللى حصلك ده كان لازمته ايه ؟؟ انا دلوقتى عرفت ....عرفت انك كنتى بتخونى ابويا و هو حى و كنتى عاملانى كوبرى عشان حبيب القلب
هنا رفعت هانم يدها و صفعت سهير صفعه قويه جعلت الدماء تنزل من فمها
اخرصى يا بنت الكلب دا انا ديل جلابيتى يرفرف على بلدكم كلها
ابويا مش كلب ....ابويا هو السبب فى كل اللى انتى فيه دلوقتى
ابوكى مين دا يا عنيا ؟؟ دا كان شرابه خرج ....كل اللى عندى ده بسبب مخى النور و تفكيرى ...هو ابوكى دا من غيرى كان عرف يعمل اى حاجه ؟؟
انتى ايه يا شيخه ؟؟؟ انا مش مصدقه انك امى
عنك ما صدقتى يا ضنايا ....و يلا غورى على اوضتك لاخلى ليلتك سودا و مش هتعدى على خير
و دينى منا قاعدالك فى البيت
هتروحى فين يا روح امك ؟؟ لاهل ابوكى الكحيانين ؟؟؟
و انتى مالك انا همشي من البيت القذر ده
و همت سهير بالخروج و توجهت نحو الباب مسرعه
أمسكها يا حافظ على ما اجيب حبل
كتفها حافظ و ادخلها حجرتها .... احضرت هانم حبل ضخم و قامت بربطها فى السرير
أخذت سهير تصرخ
هات يا حافظ ايشارب بسرعه من الدرج اللى هناك ده
ربطت هانم فم سهير حتى لا تستطيع الصراخ
أخذت سهير فى البكاء الشديد تركتها هانم و أغلقت عليها الباب بالمفتاح
و بعدين يا معلمه هنعمل ايه معاها ؟؟
و لا يهمك دى بنتى و اعرف اتصرف معاها كويس
فى هذه الليله ظلت سهير مربوطه و اخذت تتذكر والدها الحنون و تبكى حظها و تتمنى انها تموت و لا ترى أمها تفعل بها ذلك
تركتها هانم لليوم التالى بعد اذان الظهر...ثم دخلت عليها بصنيه الاكل
يلا يا سهير عشان تاكليلك لقمه
هزت سهير رأسها بالرفض
متنشفيش راسك ....انتى الخسرانه فى الموضوع ده ....هتدنك لامتى من غير اكل ؟؟ يوم يومين و فى الاخر هتاكلى برده
هزت سهير رأسها لهانم و اشاحت بوجهها بعيدا عنها
طيب يا سهير على شوقك ....انا هسيبك براحتك و لما تعوزينى نادى على
خرجت هانم و أغلقت الباب على سهير و جلست لتفكر ماذا تفعل معها محدثه نفسها :
البت دماغها ناشفه اوى ...و يمكن تفضحنى لازم تاخديها على اد عقلها لحد ما الجوازه دى تتم يا هانم ...طيب يا سهير طيب ....لو انتى عنيده فأنا اعند منك بكتير
دق حافظ جرس الباب...
قامت هانم لتفتح الباب ........ ادخل يا حافظ تعالى
عملتى ايه يا هانم مع سهير
عملها اسود البعيده ....مخها انشف من الحجر الصوان بس انا هعرف ازاى اكسرلها نافوخها
بالراحه يا هانم احنا مش عاوزين شوشره
و لا شوشره و لا حاجه دى بنتى و انا عارفاها هى شويه كدا لما يقرصها الجوع و العطش هترضى و تخشع
طيب انا نازل المحل دلوقتى وورايا كام مشوار كدا و هبقى امر عليكى بعد ما اخلص
طب متنساش تفوت على المأذون تتفق معاه على الميعاد
لا متخافيش دا اول مشوار هعمله ....سلام مؤقت دلوقتى
مع السلامه
بعد حوالى ساعه سمعت هانم صوت ابنتها تأن و تصدر صوتا مرتفعا
دخلت عليها قائله
ايه معقلتيش ؟؟
شاورت سهير انها تريد الذهاب للحمام
و النبى صحيح ؟؟ لا يا حبيبتى مفيش حمام
بدات سهير بالبكاء و التلوى يمينا و يسارا ..
هخليكى تروحى الحمام بس تعقلى كدا و تسمعى كلامى
هزت سهير رأسها بالموافقه
رفعت هانم الكمامه من على فم سهير قائله
يا سهير يا بنتى انتى لازم تسمعينى....و بالرغم انى زعلانه من الكلمه اللى قلتيها على بس خلاص انا مسامحاكى
انتى عارفه أن احنا بعد موت ابوكى بقينا وحدانين ملناش حد ....كلاب السكك بقت تطمع فينا ....انتى متحسيش بالكلام ده عشان قاعده فى البيت لكن أنا اللى بتعامل مع الناس و عارفه بقولك ايه كويس
حافظ احنا عرفناه و عاشرناه بقالنا اكتر من سنه اهو ...الجدع طيب و ابن حلال و متنسيش إنه وقف جنبك و بسببه خلاص اهو هتاخدى البكالوريا و يمكن تدخلى الجامعه و تحققى املك ...و ساعتها بقا هيجيلك عريس محترم مش اى كلام
و انتى عايزه منى ايه دلوقتى يا معلمه ؟
معلمه ؟؟؟ بردو كدا يا سهير ؟ ....انا مش عاوزه حاجه انا عاوزاكى بس تكونى راضيه و مبسوطه انى هجيب لنا راجل يحمينا
هتجبيه فين يا معلمه ؟؟
هجيبه هنا معانا فى شقتنا
هنا ؟؟؟ و على فرشة ابويا ؟؟؟
طب و ماله يا بنتى هو انا بعمل حاجه حرام ....كله بشرع الله
طيب يا اما انا موافقه بس على شرط
و انا موافقه على شرطك قبل ما تقوليه ....ايه هو شرطك يا حبيبتى ؟؟؟؟
انا .......
#سهير
#الجزء_الخامس_عشر
طيب يا اما انا موافقه بس على شرط
و انا موافقه على شرطك قبل ما تقوليه ....ايه هو شرطك يا حبيبتى ؟؟؟؟
انتى دلوقتى ربنا فتحها عليكى و بقا عندك بدل المحل تلاته
ايوه يا بنتى فضل و نعمه من ربنا
طيب ....و البيت هنا مبقاش اد المقام ...انا موافقه على جوازك من حافظ بس ميقعدش فى الشقه هنا ....مينامش على سرير ابويا الله يرحمه انتى تقدرى تجيبي شقه فى اى مكان و احسن من دى الف مره
يعنى انتى شايفه كدا يا سهير. ؟؟؟ حاضر يا بنتى
و ليا كمان طلب عندك
طلب ايه تانى ؟؟
عاوزاكى تسيبيلى محل ابويا هقف فيه انا ....عارفه أنه باسمك عاوزاكى تكتبهولى بيع و شرا هو و الشقه دى و مش عاوزه منك اى حاجه تانى
طب و الشقه دى هتعوزيها فى ايه يا سهير ؟ ما انتى هتيجى تقعدى معانا فى الشقه الجديده
لا يا اما انا مش هاجى اقعد معاكوا ....مينفعش اقعد معاكى و مع اللى حبيته من كل قلبى و متمنتش غيره فى بيت واحد
انتى بتقولى ايه ؟؟ انتى بتحبى حافظ ؟؟؟
قصدك كنت بحبه ....انا كرهته دلوقتى اد الحب اللى كنت بحبه له.....
هو يعنى كان وعدك بحاجه ؟؟
متشغليش بالك بالكلام ده يا معلمه دلوقتى ....ها موافقه على شروطى و الا لا ؟؟
موافقه بس انا مش هلحق اجيب شقه دا كتب الكتاب بكرا يا سهير
مليش فيه ..... أخرّى كتب الكتاب اسبوع و الا اتجوزى فى فندق و الا شقه مفروشه المهم أن البنى ادم ده مينمش مطرح ابويا
طيب يا بنتى حاضر ...عاوزه حاجه تانى
بكرا هنروح الشهر العقاري سوا نسجل المحل و الشقه
حاضر يا سهير ....قومى يلا ادخلى الحمام و كليلك لقمه
هاكل و هشرب و هعيش متخافيش على
فكرت سهير بأن امها لن تتراجع عن زواجها بحافظ مهما فعلت ...و انها يجب أن تحافظ على ما تبقى من أثر والدها رحمه الله و لا تتركه لمثل هذا الجبان
سهير ليست قليلة الحيله لقد ورثت القوه و القدره من هانم ...تعرف كيف و متى تصل لأهدافها بمنتهى الذكاء
*****************************************
فى المساء حضر حافظ ليطمئن على الوضع
طمأنته المعلمه أن سهير قد وافقت مع بعض الشروط الصغيره
سألها حافظ و ما تلك الشروط يا هانم ؟؟
اخبرته انها تريدهما أن ينتقلا إلى شقه فى مكان آخر و أن تترك لها محل ابوها
و انتى وافقتى على الكلام ده يا هانم
ايوا وافقت ...عشان البت متعملناش شوشره ...و هى شويه كدا و هتهدى و هتيجى تعيش معانا
طب و ازاى تعيش لوحدها ؟؟ و ازاى تكتبى لها المحل...دا ده المحل الرئيسى يعنى فيه بضاعه بالافات ...ازاى هتسيبى لها كل ده ؟؟
طب اومال اعمل ايه؟
و بعدين هنتجوز فين ؟ دا انا لسه جاى من عند المأذون دلوقتى و اخدت منه ميعاد بعد العصر بكرا ...الكلام ده بقا هيخلينا نأجل الموضوع شويه
لا مش هنأجل و لا حاجه ....استنى ثوانى
دخلت هانم إلى حجرتها و احضرت معها رزمه نقود وضعتها أمام حافظ قائله
بكرا من النجمه روح شوف لنا شقه مفروشه فى حته كويسه كدا فى وسط البلد ...على ما اروح الشهر العقاري مع سهير اسجل لها الشقه و المحل
يووووو ....برده يا هانم ...بقى حتة عيله زى دى هتضحك عليكى يا معلمه يا كبيره
شششششش ...وطى صوتك لتسمعك ...تضحك عليا ليه ؟؟ هو انت ناسي انها بنتى و كل ما املك ليها و بعدين المحل و الشقه دول ورثها من ابوها و دا حقها ....و انت عارف كويس اوى احنا كسبنا من وراهم اد ايه .....يعنى تمنهم ميجيش حاجه فى اللى معانا
طب و البضاعه اللى فيه هتعملى فيها ايه ؟؟
هعمل فيها ايه يعنى ؟
دى بضاعه كتير اوى ....انتى لازم تاخدى منها و تسيبلها شويه يدوب يمشوا الشغل معاها
خلاص الصبح خلى الواد دقدق ياخد شويه بضاعه على العربيه و يوديهم المحل التانى
حاضر يا هانم
عرفت هتعمل ايه ؟؟؟
ايوه هخلى دقدق ينقل جزء من البضاعه و اسيبه و اروح ادور على شقه مفروشه ...على ما ترجعى نكتب كتابنا و نطلع على شقتنا
شاطر يا حافظ
فى اليوم التالى ذهبت هانم و سهير لتسجيل المحل و الشقه و عندما عادوا طلبت سهير من امها مفاتيح الشقه و المحل
ايه يا سهير هتاخدى منى مفاتيح الشقه كمان؟؟
و ماله يا اما ما انتى دلوقتى بقالك شقه تانيه و بيت جديد
يعنى ايه يا بنتى ؟؟ يعنى معدش لى مكان عندك ؟
و الله يا معلمه انتى اللى اخترتى و لازم تتحملى نتيجه اختيارك .....و متخافيش هتاخدى شنطة هدومك اللى محضراها عند الباب .....انا هعمل بيها ايه يعنى
بقى كدا يا سهير ؟؟
ايوه كدا و تعالى يلا سلمينى المحل و الدفاتر عشان اشوف الحاجه اللى فيها
حاضر يا بنتى ...يلا بينا
ذهبت سهير و هانم إلى المحل لتجده خاويا تماما من البضاعه الا من بعض القطع الصغيره الملقاه على الرفوف
تفاجأت هانم و بدا عليها الاضطراب
ايه دا يا اما ؟؟؟فين البضاعه
البضاعه ......واد يا دقدق فين البضاعه يا واد ؟؟
البضاعه جبنا عربيه و نقلناها كلها زى ما سي حافظ أمر
انت يا واد مبتفهمش ؟ اكيد حافظ مقلكش تنقل البضاعه كلها ...اكيد فهمت غلط ما انت مخك تخين
لا و الله يا معلمه.... دا هو اللى قالى شيل البضاعه كلها و جاب حبة البضاعه الموجوده دول على جنب و قالى ابقى رصهم بعد ما تنقل البضاعه
اخرص يا واد ...غور من قدامى
لا استنى يا دقدق
نعمين يا ست سهير
فين سجلات المحل ؟؟
ما هو سي حافظ اخدها معاه
عجبك كدا يا معلمه ؟؟ اخد السجلات و الدفاتر ليه ؟؟ الا لو كان حرامى و خايف اكشفه
لا عيب يا سهير تقولى كدا ....و بعدين انتى طلبتى اكتب لك المحل و كتبته ليكى ملكيش دعوه بقا بالبضاعه اللى فيه و لا السجلات بتاعته
بقا كدا يا اما ؟؟؟ الف مبروك عليكى البضاعه و العريس يا معلمه
هنا حضر حافظ .... أخذته هانم على جنب
تعالى هنا يا حافظ ....ايه اللى عملته دا ؟؟
عملت ايه ؟ منا نفذت اللى طلبتيه منى .... أجرت لك حتة شقه بس ايه هايله على النيل مباشرة هى ايجارها حراق شويه بس تستاهل و الله
لا مبتكلمش عن الشقه ...انت خليت الواد دقدق يعزل المحل كله و اخدت السجلات كمان ؟
ايوه ...دا شقانا يا معلمه ...البضاعه اللى فى المحل دى بنتك متعرفش قيمتها و لا تعرف عنها حاجه ....البضاعه دى من حقك انتى ....انتى اللى تعبتى و جبتيها و مع احترامى بقا للمعلم الله يرحمه مكنش يقدر يجيب زيها يعنى هى ملهاش تورث فيها ....اما السجلات فده متخصهاش برده ...تمن البضاعه و هامش الربح دى خصوصيات تخصك انتى لوحدك هى تعرفها ليه ؟
طب خلاص متزعلش هنروح للمأذون امتى ؟
بعد العصر زى ما قلت لك
طيب كويس هبعت الواد دقدق ياخد شنطة هدومى انا محضراها جنب الباب و تروح توديها الشقه على ما اروح الكوافير اوضب نفسي ....بعدها نطلع على المأذون على طول
تمام يا معلمه .
#سهير
#الجزء_السادس_عشر
طيب كويس هبعت الواد دقدق ياخد شنطة هدومى انا محضراها جنب الباب و تروح توديها الشقه على ما اروح الكوافير اوضب نفسي ....بعدها نطلع على المأذون على طول
تمام يا معلمه .
انصرفت هانم و تركت سهير بالمحل تجلس حزينه بين الرفوف الخاويه محدثه نفسها
بقا كدا يا اما ؟ بعتينى عشان اللى اسمه حافظ ده ؟ الله يرحمك يا أبا ياريتك انت اللى فضلت لى ...اتصرف ازاى دلوقتى و اجيب بضاعه منين ؟
هنا قطع تفكيرها كلمة دقدق ...الحمد لله أنه غار و مش هيرجع هنا تانى ...الجدع ده مبينزليش من زور من اول ما رجله خطت المحل
خلاص يا دقدق معدش له دعوه بينا .... بس انا مش عارفه اتصرف ازاى ... انتوا بتجيبوا بضاعه منين ؟
يووو البضاعه على قفا من يشيل يا ست البنات بس المهم ان مستوانا مينزلش عن المستوى اللى وصلت له المعلمه
يعنى ايه ؟ مش فاهمه
يعنى هى كانت بتتاجر فى المستورد و ليها زبونها اللى بيجى مخصوص عشان البضاعه دى
طب و انا هجيب المستورد دة منين ؟؟ دى شغلانه كبيره و سفر و انا معرفش طريق الكلام ده
فاهم ...بس انا اعرفلك اللى يعرف و اللى ممكن نجيب منه بضاعه على ما تعرفى حدوته السفر دى
مين دا يا دقدق ؟؟
المعلم صلاح ما هو ده اللى ورى لابوكى الطريق و كان عامل شركه معاه....لكن ابوكى الله يرحمه بقا فض الشركه بعد اول سفريه
طب و ليه ابويا عمل كدا ؟؟
معرفش بس الظاهر أنه عشان عرف الطريق و مبقاش محتاجله
طب ما يمكن المعلم صلاح يكون زعلان من الحركه دى و ميرضاش يساعدني
لا دا المعلم صلاح ده اطيب خلق الله ...تعالى بس نروحلوا سوا و انتى هتشوفى
انا خايفه يحرجنى يا دقدق
و الله ما هيحرجك و لا حاجه و بعدين لو افترضنا أنه مرضيش يساعدك يبقى برده مخسرتيش حاجه
طيب خلاص انا موافقه ...يلا بينا
ذهبت سهير مع دقدق لتجد المعلم صلاح جالس خلف مكتبه ...رجل كبير بالسن عندما رأته تذكرت والدها رحمة الله عليه ... يجلس أمامه ابنه الاستاذ مروان ..هى تعرفه جيدا فقد رأته يجلس مع ابوها يوم نجاحها
بادر دقدق بالكلام
سلام عليكم يا معلم صلاح ...اهلا استاذ مروان
و عليكم السلام يا دقدق اتفضلوا
يزيد فضلك يا معلم ....دى الست سهير بنت المعلم سيد الله يرحمه
الله يرحمه يارب يا اهلا و سهلا
اهلا بيك يا معلم ...الست سهير كانت قاصداك فى خدمه كدا ...
انا تحت امرك يا سهير يا بنتى فى اى خدمه ...انا واكل مع ابوكى عيش و ملح برده
ربنا يخليك يا عمى ..انا كنت عاوزه شويه بضاعه كدا
بضاعة ايه ؟؟ دا الست والدتك ملكه السوق كله فى حكاية البضاعه دى
لا منا انفصلت عنها و عاوزه ابدأ لوحدى و لما سالت دقدق قالى انك مش هتتاخر على
طبعا يا بنتى مقدرش اتاخر عليكى ابدا ....قوم يا مروان روح مع دقدق و سهير المخزن و شوف هى عايزه ايه ...اديها البضاعه اللى تشاور عليها
طب معلش يا معلم بالنسبه للفلوس و كدا ؟
متشغليش بالك انتى بحكايه الفلوس دى ...خدى اللى عاوزاه و بعدين نتكلم
انا مش عارفه اشكرك ازاى يا معلم
عيب عليكى ...تشكرينى دا ايه ؟؟ هو انا مش فى مقام المرحوم والدك ؟
ايوا طبعا يا عمى ......ربنا يخليك
يلا يا مروان مع الانسه
حاضر يا بابا
ذهبت سهير مع مروان شاب ابيض اللون طويل ذو عيون عسليه ..شعر كستنائى ناعم ...يلبس نظاره شمس انيقه
تولى دقدق أمر البضاعه بينما وقف مروان يتحدث مع سهير
انتى فى سنه كام دلوقتى ؟؟
ايه دا انت عارف انى لسه بتعلم ؟؟
ايوا انا فاكر كويس اوى لما جيتى للمعلم سيد و انتى ناجحه و الفرحه مكنتش سايعاكى
ايوه و يومها ابويا الله يرحمه وزع شربات على الشارع كله
الله يرحمه
انا دلوقتى بستعد عشان امتحن البكالوريا
عظيم انتى ماشيه بسرعه ما شاء الله
الحمد لله انا فعلا كل اللى بيشوف مستوايا بيقول انى يعنى.... ذكيه
طب و بتقوليها و انتى مكسوفه كدا ليه ؟ دى حاجه تفرح على فكره
منا عارفه بس مبيشكرش فى نفسه إلا ابليس
ههههههه لا يا ستى و لا ابليس و لا حاجه....طيب مش محتاجه مساعده ؟؟ انا معايا بكالوريوس تجاره و اقدر اساعدك فى اى حاجه عاوزاها
لا كتر خيرك ....مش عاوزه اتعبك
لا لا متقوليش كدا .....بصى انا هجيلك المحل كل يوم ساعتين بعد العصر اساعدك فى اى حاجه محتاجاها
لا كدا هتعبك
لا يا ستى مفيش تعب و لا حاجه ...دى اكتر حاجه بحبها المذاكره ...طب تصدقى انا زعلت لما خلصت دراسه عشان مش هذاكر تانى
طيب خلاص اتفقنا با استاذ مروان
لا أسمى مروان و بس ...و الا عاوزانى اقولك يا استاذه سهير
لا ...سهير و خلاص
طيب يبقى انا كمان مروان و خلاص
حاضر يا مروان
شكرت سهير مروان و توجهت هى و دقدق و معه عربيه اليد يحمل عليها البضاعه التى اختارها و قام مروان بحصرها و تأييد ثمنها و إعطائه الفاتوره ....و عندما وصلت سهير للمحل أخبرت دقدق بأنها ستذهب مشوار عشر دقائق و طلبت منه رص البضاعه
ذهبت سهير إلى محل الصاغه الموجود على اول الشارع و باعت سلسلتها و خاتم و حلق و زوج من الاساور
عادت سهير بالنقود و اعطتها لدقدق و قالت له
وصل الفلوس دى للمعلم صلاح من تحت الحساب
جبتى الفلوس دى منين يا ست سهير ؟؟
اتصرفت يا دقدق ...متشغلش بالك انت بس
ذهب دقدق للمعلم صلاح و جلست سهير تحصر البضاعه و تضع هامش الربح المناسب
************🌹🌹🌹🌹🌹🌹*************
ذهبت هانم إلى الكوافير و منه إلى المأذون ...قبل الدخول إلى المأذون اخرجت هانم رزمه نقود ورقيه دستها فى جيب حافظ
و عند كتب الكتاب سأل المأذون عن مؤخر الصداق نطقت هانم مسرعه خمسين ألف جنيه يا عم الشيخ
صدم حافظ و قال بنفسه ...خمسين ألف جنيه عليكى انتى ؟؟ امال لو بنت صغيره كنتى عملتى ايه ؟؟ على العموم و ماله يا ست هانم ان شالله تخليهم مية الف و لا يهمنى ....أما نشوف مين هيضحك فى الاخر
انتهى المأذون من كتب الكتاب و فى طريقهم لشقتهم الجديده سالت هانم حافظ
انت زعلت انى خليت المؤخر خمسين ألف
لأ و هزعل من ايه ؟؟
اصلى شفتك بلمت كدا و سرحت
لا ابدا يا حبيبتى ...انتى بيتهيالك بس ...دا انا كنت بفكر أن بعد ثوانى هتبقى مراتى حبيبتى
صحيح يا حافظ ؟
صحيح ياقلب حافظ
فرحت هانم بالشقه فهى على النيل مباشره واسعه جدا ...لها بلكونه كبيره تطل على النيل ... مفروشه بفرش انيق جدا
أبدى حافظ إعجابه بهانم و فستانها الأبيض الجميل
شعرت هانم بالسعاده و أحست انها بدأت حياتها من جديد
هانم فى الاربعين من عمرها و لكنها تشعر أنها فتاه صغيره بالضفائر اخذها امير الاحلام على حصانه الابيض ...تناست حياتها السابقه تناست وجود ابنه لها ...تناست انها المعلمه هانم ...تذكرت فقط انها اخيرا وصلت إلى ما كانت تتمناه منذ أن وقعت عيناها على فارسها
نورتى بيتك يا عروسه
منور باصحابه يا سي حافظ
#سهير
#الجزء_السابع_عشر
سهير تلك الجميله الوحيده ...القويه العنيده تلك المتمرده على وضعها ....لقد بدى على سهير قوة لم تكن تظن أنها تملكها
عندما علم أهل الحى بنزول سهير المحل توافد إليها عدد كبير من الرجال لكى يخطبوا ودها
نفذت البضاعه فى يومين فقط و بهامش ربح جيد
طلبت سهير بضاعه أخرى من مروان و دفعت ثمن البضاعه الاولى كاملة و دفعت جزء من ثمن البضاعه الجديده
سهير لم تنسي دراستها فى خضم الأحداث ...و بدأت تستذكر دروسها غير ملتفته لأى عائق يعوق أحلامها
مروان أصبح له دور كبير فى حيات سهير خاصه بعد معرفته لحكايتها ...أصبحت لا تخاف بوجوده
بعد مرور عدة أشهرصارحها مروان بحبه ....هى أيضا تحبه و لكن لا تريد تكرار الخطأ الاول فقلبها لا يحتمل جرحين
انا بحبك يا سهير ...و عايز اعرف انتى بتبادلنى نفس الشعور و الا لأ ؟
انت يا مروان دلوقتى اهم حد فى حياتى لكن ...
لكن ايه ؟؟ انتى مبتحبنيش ؟؟
لا مش كدا بس انا لازم اكون صريحه معاك يا مروان ...بعد اللى حكيته لك عن حافظ و اعجابى بيه.
انتى لسه بتحبيه يا سهير ؟؟
لا ..ابدا و الله دا اكتر انسان انا بكرهه على وش الأرض ..سبنى بس اكمل كلامى و هتفهم كل حاجه
حافظ هو أول شخص اتفتح قلبى عليه ....كنت حاطه فيه امل كبير اوى فوق ما تتخيل ....حافظ مش بس اول انسان فى حياتى دا كمان استاذى اللى علمنى القرايه و الكتابه ...كنت لما اعمل شئ كويس أو احاول انجح فى شئ كان يبقى هدفى رضا حافظ عنى ..كنت بعمل كل حاجه حلوه عشانه لكن للاسف انا كنت بتعامل بمنتهى البراءه و هو كان بيتعامل بمنتهى الخبث ...كتير لمحت قدامه انى معجبه بيه و هو عمره ما صدنى بل بالعكس كان بيتكلم معايا على أنه فاهم بس الظروف اللى مخلياه مش قادر يتكلم
كنت اقعد افكر كتير اوى انى لازم ادخل الجامعه عشان اوصل لمستواه و يحبنى اكتر ...و مع أن مستواه المادى أقل من مستوانا بس برده دا عمره ما كان عائق بالنسبالي و كنت دايما اقول لو امى رفضته عشان الفلوس انا هصر على موقفى و عمرى ما هتجوز غيره
تخيل بقا كل اللى بحكيهولك ده اتقلب العكس بمجرد انى شفت امى فى حضنه ....مش قادره اوصفلك حسيت بأيه ؟؟؟ حسيت ان النار مسكت فى قلبى ....لا مسكت فى جسمى كله ...كنت حاسه ان عقلى هيطير ...امى طول عمرها الست العاقله الراسيه اللى اجدع شنب مكنش يهز فيها شعره ..الاقيها فى حضن حتة عيل من دور ولادها ؟ طب ازاى و امتى حصل كدا ؟؟ و انا كنت فين من ده كله ؟؟ اسئله كتير جت فى مخى لحظتها و انا مشوشه مش عارفه اجاوب على اى سؤال ...ساعتها لو قلت لك انى حسيت انى مجنونه مش هتصدقنى
انت طبعا دلوقتى بتقول طيب انا مالى بالقصه دى كلها صح ؟؟
ايوه ...صراحه كنت هقولك كدا ...انا بقولك بحبك ايه يخليكى تربطى بين كلامى و بين اللى حصل لك قبل كدا ؟
لان كله مرتبط بكله يا مروان .... بص يا مروان انا مش عاوزه اظلمك معايا ...بالرغم انى ابان قدامك كدا قويه و متماسكه الا انى اخر الليل كل يوم بجيب صورة ابويا و اقعد اعيط قدامها ....صعبان على نفسي اوى و كل اللى حصلى ده مكنتش أتخيل أنه يحصل معايا
انا حاسه بضعف يا مروان و مش عاوزه تكون مجرد مسكن أو انسان دخل حياتى فى لحظه ضعف فحل محل عيلتى كلها و لما اتعافى الاقى نفسي مش راضيه بالوضع اللى حطيت نفسي فيه
يعنى ايه يا سهير ؟؟ افهم من كلامك انك مبتحبنيش ؟
لا متفهمش من كلامى اى حاجه خالص ...اللى عاوزه أقوله لك انك تدينى فرصه انى اختبر مشاعرى الحقيقيه ..انى احقق ذاتى و اوصل للى انا عاوزاه و ساعتها انا اللى هجيلك و اقولك يلا نتجوز
بس كلامك ده صعب على يا سهير ...انتى كدا حاطانى على رف لحد ما يجى مزاجك و تنزلينى
لا يا مروان انا مقصدتش كدا و الله ...انا بس مش عاوزه اظلمك زى ما قلت لك .
خلاص يا سهير ردك وصلنى ...بس متخافيش انا واقف جنبك للنهايه و لحد ما ادخلك الجامعه بايدى
يا مروان افهمنى بس
انا فهمت خلاص يا سهير كل حاجه مفيش داعى تبررى موقفك
************★***************★************
هانم تلك المتصابيه تعيش فى الاحلام و يفرش لها حافظ الطريق بالورد و الياسمين ...يدللها كطفله صغيره و هى تحدث نفسها انها لم تكن تعيش قبل ذلك ....تشعر أنها لم تتزوج من قبل فحافظ يختلف عن زوجها الاول فى كل شئ ...يعاملها كأميره
لقد دعت لكى امك يا هانم لكى تنعمى بهذه الحياه
عاشت هانم فى الشقه المفروشه قرابه الشهرين بعدها انتقلت إلى شقتها الجديده فى الزمالك ..شقه كبيره واسعه مفروشه بأغلى الاثاث
فى هذه الفتره تركت هانم إدارة كل شئ لحافظ و تفرغت لفرش الشقه على أكمل وجه
بعد شهر من انتقال حافظ و هانم إلى الشقه دخل حافظ على غير عادته صامت يظهر عليه الضيق الشديد
مالك يا حافظ ...شكلك متضايق اوى
مفيش يا هانم ..مفيش
لا اخص عليك هتخبى على هانم حبيبتك
مفيش يا ستى من ساعة من نقلنا سكنا هنا و انا متبهدل فى المواصلات ...تعبت اوى و دايما اوصل متأخر..... من شويه قلت اركب تاكسي عشان اجيلك على طول ....الراجل بعد ما وصلنى بقوله الحساب كام بيقولى ١١ جنيه ...ليه يا عم ؟؟ هو انا اشتريت العربيه ؟ اتخانقت معاه و مسكنا فى بعض و كنت هوديه القسم لولا اولاد الحلال ادخلوا و فضوا الموضوع
طب و ليه كدا يا حافظ ؟؟ ما تديله اللى هو عاوزه
ليه الافترا ده يا هانم دا العربيه تمنها ٥٠٠ جنيه ...هو بقا عاوز ياخد فى مشوار واحد ١١ جنيه ؟
طيب خلاص متزعلش نفسك انا يا سيدى هشتريلك عربيه ترحمك من المواصلات و قرف المواصلات
لأ عربيه ايه بس ؟ هو انا بقولك كدا عشان تقوليلى هشتريلك عربيه .... لأ لأ يا هانم احنا لسه موضبين البيت و واخد منا مبالغ كبيره
و ماله يا حبيبي ما ياخد زى ما ياخد ...و انت ميهمكش اى حاجه ......هننزل سوا بكرا نشترى اجدعها عربيه فيكى يا مصر للاستاذ حافظ على سن و رمح و لا تزعل نفسك
تسلميلى يا حبيبتى ....ربنا يخليكى لى يارب
اشترت هانم عربيه اخر موديل لحافظ ....تعلم حافظ القياده و اصبح من ذوى السيارات
طلبت هانم من حافظ النزول للشغل و متابعه العمل معه
تهرب حافظ من طلبها متعللا أنه يريد راحتها و أنه لا داعى لنزولها و تعبها
ظلت هانم فى البيت تنعم بالحياه الهادئه و تتذكر فى بعض الأحيان ابنتها سهير و تحدث نفسها
البت وحشتنى اوى ...بس انا موحشتهاش مفكرتش تسال على و لا تيجى تزورنى ...هو انا مش امها برده ؟؟ هو انا كنت عملت ايه يعنى ؟ انا اتجوزت على سنة الله و رسوله ...طب هى تكرهلى السعاده ليه بس ؟؟ دا انا امها و المفروض سعادتى سعادتها ...انا متاكده انها بخير ...دى بنت امها ...معلمه بنت معلمه بس برده وحشتنى اوى
انا ممكن اروح المحل لحافظ و ابعت صبى من الصبيان ينده لى الواد دقدق و أسأله عليها من غير ما تعرف ....و الله فكره حلوه يا هانم ..انا هقوم البس
ارتدت هانم ملابسها ...أشارت لتاكسى اوصلها للمحل .... سألته عن الاجره أجاب
جنيه ونص يا هانم
تعجبت هانم ...جنيه و نص ازاى ؟؟ امال الراجل المجنون اللى طلب من حافظ ١١ جنيه دا ايه ؟؟
دخلت هانم المحل رحب صبيان المحل بها بينما كان حافظ مشغول مع إحدى الزبائن ...يحدثها بهمس و تضحك ضحكه خليعه
لم تتدارك هانم الموقف و قالت
حافظ ....يا معلم
أصاب حافظ اضطراب شديد ...و هرول مسرعا اهلا اهلا بالمعلمه ....دى خطوة عزيزه يا معلمه
يعز مقدارك يا معلم ....ايه عطلتك ؟؟
لا ابدا ....دى زبونه بس تقيله اوى لما بتيجى بتشترى حاجات كتير اوى و عشان كدا بتوصى بيها شويه
ايوه ..ايوه ما هو واضح .... زبووون...نه
مالك يا هانم ؟؟؟؟
انا دايخه اوى الدنيا بتلف بى
طب اقعدى استريحى يا معلمه ....واد يا رضا كوبايه لمون بسرعه من القهوة للمعلمه
لا لا ...انا حاسه انى هيغمى على ...رجليا مش شايلانى
طب يلا تعالى هسندك و نطلع على اقرب دكتور
ذهبت هانم و حافظ للطبيب ... سألها الطبيب عن الأعراض التى تشعر بها .....شك الطبيب فى شئ و طلب منها عمل بعض التحليلات
قامت هانم بعمل التحليل و هى قلقه ........دخلت للطبيب لعرض التحليل عليه
نظر الطبيب فى التحليل و ابتسم قائلا
زى ما توقعت بالظبط ....مبروك يا ستى انتى حامل
ايه حااااااااامل ؟؟؟؟؟؟؟
#سهير
#الجزء_الثامن_عشر
قامت هانم بعمل التحليل و هى قلقه ........دخلت للطبيب لعرض التحليل عليه
نظر الطبيب فى التحليل و ابتسم قائلا
زى ما توقعت بالظبط ....مبروك يا ستى انتى حامل
ايه حااااااااامل ؟؟؟ انت بتقول ايه يا دكتور ؟
مش انا اللى بقول يا استاذ .. التحاليل هى اللى بتقول
معقوله يا دكتور ؟ دا انا مخلفتش من عشرين سنه و كنت بقول خلاص مستحيل احمل تانى
مفيش حاجه اسمها مستحيل يا ستى ...الخلفه دى هبه يهبها الله لمن يشاء و بعدين انتى مش كبيره اوى يعنى ...انا اعرف ناس اكبر منك و بيخلفوا
سبحان الله يا دكتور ...اهى الحكايه دى لا كانت على بال و لا على خاطر
لا استعدى يا ستى للمولود الجديد ...انا بكتب لك شويه فيتامينات كدا على ما تعمليلى التحاليل ده
حاضر يا دكتور ...متشكرين اوى
خرج حافظ و هانم من العياده يحملون كثير من المشاعر المتناقضة فهانم تفكر انها كبيره ..متى ستربى هذا الطفل و لكنها سعيده فهو سيكون ونيسها و جليسها ...هو من سيعوضها غياب ابنتها عنها هو عوض الله بحق
أما حافظ فيفكر فى شئ مختلف تماما
انا كنت فاكر انها كام سنه كدا و تتكل و بعد كدا اورث فلوسها و اعيش حياتى ..كدا هى بوظت لى كل خططى كدا هيبقى فى طفل يربطها بى اكتر ...انا لازم اتخلص من الطفل ده .....وجود الطفل ده هيبوظ كل حاجه ...و لا هيبوظ و لا حاجه بالعكس يا واد يا حافظ دا هيوصلك اسرع لهدفك ....لما تبقى ام ابنك تقدر تطلب منها بسهوله تعملك توكيل عام بعدها تقدر تنقل كل أملاكها باسمك و حكايه الواد دى مقدور عليها بعدين
قطعت هانم تفكير حافظ قائله :
ايه يا حافظ انت زعلت انى حامل و الا ايه ؟
انا .........لا ابدا يا حبيبتى
اصلك من اول ما طلعنا من عند الدكتور و انت سرحان كدا
لا ابدا يا هانم ...بس خايف عليكى
يا حبيبي يا حافظ ...انت خايف يجرالى حاجه بسبب الحمل ده ؟؟
بصراحه ايوه يا هانم و عشان كدا عمال افكر اننا لازم نتابع مع دكتور كبير عشان يديكى فيتامينات و ادويه و كدا
يا سلام ...انا لو لفيت الدنيا مكنتش هلاقى حد يحبنى ادك يا حافظ ...ربنا يخليك لى يارب
و يخليكى لى يا حبيبتى و يقومك بالسلامه
مضت الأيام و مرت شهور من حمل هانم ...كانت هانم تعانى كثيرا بحملها خاصة أنها تعرضت لنزيف فى الشهر الثانى و طلب منها الطبيب أن تنام على ظهرها و مر الحادث بسلام
طلب حافظ من هانم عمل توكيل رسمى عام لاداره مصالحها و للتعامل مع البنوك ....وعدت هانم حافظ انها فى اقرب فرصه ستذهب إلى الشهر العقارى و تلبى طلبه
لم يلح حافظ كثيرا فى طلبه حتى لا تشك المعلمه
مرت الايام و لاحظت هانم غياب حافظ المتكرر و رجوعه البيت فى وقت متأخر كل ليله ....فقد تمضى ايام لا تراه إلا فى اليوم الثانى لأنها تنام مبكرا حسب أوامر الطبيب
و عندما سأمت من الوضع قررت هانم انتظاره و لم تنم فى تلك الليله
انتى لسه صاحيه لغايه دلوقتى ليه يا معلمه ؟؟
و انت ايه اللى بيجيبك متأخر كدا يا سي حافظ ؟؟
الشغل طبعا ...هو انتى متعرفيش انى بشتغل و بلف على المحلات بتاعتك ...بتفق مع تجار ...و بتفق مع الناس اللى بتسافر تجيب لنا البضاعه من بره ....بعانى و انا بلف اخلص ورقه و ادفع رشاوى اد كدا عشان حضرتك مخونانى و مش عاوزه تعمليلى التوكيل اللى طلبته منك ....على العموم براحتك خالص ...انا مش هطلبه منك تانى ...و لو عايزه تنزلى تباشرى شغلك بنفسك اتفضلى
هو فيه ايه ؟؟ انت مالك طلعت فى كدا زى القطر ؟ انا بسالك مجرد سؤال انا مكفرتش يا اخى انى بسألك ....و بعدين ايه حكايه مخوناك دى ؟؟ يعنى بعد دا كله بتقول مخوناك ....مخوناك و سايبالك مالى و محتالى كدا ازاى ؟؟
قول كلام عاقل شويه
اومال معناه ايه انك لغاية دلوقتى معملتليش التوكيل ؟
مش معناه اى حاجه. انت عارف إن من ساعه النزيف و انا خايفه اتحرك و اخرج كتير ....هى دى الحكايه
طب ما خلاص انتى قربتى تولدى اهو
حاضر يا حافظ حاضر ....هروح اعملك التوكيل
براحتك يا هانم ....لتفتكرى أن لى مصلحه و الا حاجه
فى اليوم التالى قامت هانم من النوم فى العاشره صباحا و لم تجد حافظ بجانبها لانه ينزل فى التاسعه صباحا
قامت هانم لترتدى ملابسها و تذهب للشهر العقارى فهى لا تريد أن يغضب منها حافظ
ارتدت هانم ملابسها و تذكرت انها لابد أن تحضر بطاقتها لعمل التوكيل ....بحثت هانم عن بطاقتها و لكنها لم تجدها فى حقيبتها
تذكرت هانم انها تركتها مع حافظ يوم كتب الكتاب ....جلست هانم و هى تشعر بالحيره .....فجأتها فكره ان تتصل بحافظ تليفونيا و تسأله عن مكان البطاقه
اتصلت هانم بالمحل رد عليها رضا العامل بالمحل
الو ...ايوا يا رضا ازيك
يا اهلا و سهلا يا معلمه
ادينى الأستاذ حافظ بسرعه
لا الاستاذ لسه مجاش
ليه كدا ؟؟ هو فى اى شغل فى المحلات التانيه و الا ايه ؟؟
محلات تانيه ايه بس .....لا يا معلمه هو كدا ...بقاله مده مبيجيش غير ساعتين ياخد الايراد و يمشي و سايب كل الشغل على راسي
انت بتقول ايه يا رضا ؟؟
زى ما بقولك كدا يا معلمه ....و الله يا معلمه كان نفسي اتصل بيكى من زمان و اقولك على اللى بيحصل اصل ده ميرضيش ربنا برده
طيب يا رضا خلاص انا هتصرف.... متقولش انى اتصلت بيك و لا انى عرفت حاجه
لا عيب يا معلمه ...دا انا اللى كنت هقولك متقوليلوش عشان ميقطعش عيشي
أغلقت هانم الخط و شعرت إن الدنيا تدور بها
جلست تفكر لماذا يكذب حافظ ؟؟اين يذهب يوميا ؟؟
قامت هانم لتبحث عن بطاقتها فى دولاب حافظ بحثت و بحثت وجدت البطاقه مع قسيمه الزواج ....اخذتها بسرعه و لاحظت وجود شريط حبوب شكله غريب لم تره من قبل
أمسكت هانم الشريط و تبادر إلى ذهنها أنه مخدرات
أخذت هانم الشريط و ذهبت إلى الصيدليه لتسأل الصيدلى عن الشريط
سلام عليكم يا دكتور
و عليكم السلام ...ايوه اتفضلى
لو سمحت يا دكتور كنت عاوزه اسال عن الدوا ده ... هل ده مخدرات ؟
ضحك الدكتور و قال لا لا مخدرات ايه بس ...انتى جبتيه منين دا ؟
لقيته عندى ...طب الحمد لله أنه مطلعش مخدرات امال ده بتاع ايه يا دكتور ؟؟
دا يا ستى بتستعمله بعض الستات عشان و العياذ بالله تجهض نفسها
تجهض نفسها ازاى يا دكتور ؟؟
يعنى بيعمل انقباضات فى الرحم و نزيف ...اوعى تكونى عاوزه تعملى كدا .....انا شايف انك قربتى تولدى و دا خطر جدا على حياتك
لا و انا هعمل كدا ليه ؟؟ متشكره اوى يا دكتور
خرجت هانم من الصيدليه و قد فهمت كل شئ .....تذكرت هانم كيف كذب عليها حافظ فى اجره التاكسي لانه يعلم أن ردها الطبيعى له انها تشترى له سياره ...تذكرت السيده التى كان يهمس بأذنها و هى تضحك عند زيارتها له فجاه
تذكرت كذبه عليها بشأن الشغل .....تأكدت أنه كان يضع لها تلك الحبوب لها فى الشهور الاولى ليتخلص من حملها
ياااااه معقوله كنت مخدوعه كدا ؟؟ معقوله انا عايشه مع الشيطان ده ؟؟ يااا يا حافظ
احست هانم بالتعب الشديد لدرجه انها جلست على الرصيف لتستريح بعض الشئ و لكنها ضغطت على نفسها و أشارت إلى تاكسي لتذهب فى مشوار مهم
🌹🌹🌹🌹🌹🌹🌹🌹🌹🌹🌹🌹🌹🌹🌹
سهير انهت دراستها و نجحت فى البكالوريا و فرقت الشربات على الحى كله
ذهب مروان لتهنئه سهير
الف مبروك يا سهير
الله يبارك فيك يا مروان
انا فرحت لك اوى ...من كل قلبى
ربنا يخليك لى يا مروان
ها ....ناويه على كليه ايه أن شاء الله
انا ...انا بفكر اكتفى بالبكالوريا يا مروان
و ليه كدا يا سهير ...انتى مش كان املك انك توصلى للكليه و اهو خلاص بينك و بينها خطوه واحده بس
انا خايفه يا مروان لمكنش اد الجامعه ...انت عارف انى كنت بمتحن الشهادات اللى فاتت من منازلهم ..خايفه بقى ادخل الجامعه مقدرش عليها
انتى بتقولى ايه يا سهير انتى تقدرى و تقدرى كمان انتى ذكيه جدا ....بلاش دلع و قوليلى عاوزه تدخلى ايه ؟ انا هروح معاكى بكرا نسحب الورق و انا اللى هكتب لك ورق التنسيق بايدى
يا مروان بسسسس
مبسش.... ها ...عاوزه تدخلى ايه ؟؟
عاوزه ادخل تجاره زيك
الله اكبر ....عظيم جدا ...و لكى علىّ يا ستى افهمك اى حاجه مش فاهماها فى المناهج ....يا بنتى انتى جيتى فى ملعبى
انا فى ملعبك من زمان يا مروان و انت مش واخد بالك
#سهير
#الجزء_التاسع_عشر
عاوزه ادخل تجاره زيك
الله اكبر ....عظيم جدا ...و لكى علىّ يا ستى افهمك اى حاجه مش فاهماها فى المناهج ....يا بنتى انتى جيتى فى ملعبى
انا فى ملعبك من زمان يا مروان و انت مش واخد بالك
صحيح يا سهير ؟؟
انت شايف ايه ؟؟
انا مش شايف حاجه ...انا كل ما اقول خلاص أننا قربنا اوى من بعض الاقيكى بتبعدى من تانى
خلاص يا مروان مفيش هروب تانى
و لو انى كنت زعلان منك لكن حبى ليكى فوق كل حاجه
حقك على يا مروان متزعلش منى ...انا فعلا كنت غير منتظمه فى الفتره اللى كلمتنى فيها بس دلوقتى بقيت افضل كتير الحمد لله
فى اليوم التالى ذهبت سهير و مروان لسحب الاوراق و كتابه الرغبات
دخلت سهير كليه التجاره ...رافقها مروان فى أول يوم
كانت تشعر بسعاده كبيره و تذكرت حلمها من سنين و علمت أن مروان هو من مد يده لها فى الحلم و تيقنت أنه فارس أحلامها
بعد أيام طلب مروان أن يتم زواجه من سهير ...صمتت سهير بعض الشئ
ايه يا سهير هترفضينى تانى و الا ايه ؟؟
لا يا مروان ....بس انا بفكر فى حاجه تانيه خالص
بتفكرى فى ايه؟ ...فكرى معايا بصوت عالى
بفكر لو ابويا معايا دلوقتى مش كنت طلبتنى منه ؟؟
طب ما والدتك موجوده ... ممكن اروح اطلبك منها
امى ...هى سالت على من يوم ما اتجوزت ؟
طب و انتى سالتى عليها يا سهير ؟؟
انا برده اللى هسال عليها يا مروان ؟ هو انا اللى روحت اتجوزت واحد اد ولادى يضحك على و ياخد فلوسي
انا عاوز اسالك سؤال يا سهير
اتفضل
اللى والدتك عملته دا حلال و الا حرام ؟؟
حلال بس غير لائق
و غير لائق دى من وجهه نظر مين ؟؟
من وجهه نظر العرف و التقاليد و المجتمع
و العرف و التقاليد دول مش قانون الهى و لا تشريع من عند ربنا ....
يعنى ايه يا مروان ؟؟
يعنى احنا اللى بنحط العرف و التقاليد دى ... ساعات بتبقى كويسه و مفيده و ساعات بتبقى غلط و لازم نقاومها
و انت فى وجهه نظرك جواز ست كبيره من عيل اد اولادها دا صح ؟؟
ممكن اتكلم معاكى بصراحه يا سهير و من غير زعل ؟
طبعا اتفضل ....انت عارف انى مقدرش ازعل منك ابدا
انتى نفسك يا سهير انخدعتى فى اللى اسمه حافظ ده ، و يمكن كرهك الشديد و حساسيتك للموضوع ده لانك حسيتى أنه خدعك و لعب بيكى بكلامه اللى كان بيحتوى على اكتر من معنى
يمكن يا مروان...بس انا برده زعلانه منها اوى ...ازاى قدرت تسيبنى عشانه ؟
يا حبيبتى انتى اللى سبتيها مش هى اللى سابتك ... انتى اللى شرطى عليها تسيبلك بيت ابوكى و تمشي
منا مقدرتش اشوف راجل تانى نايم على فرشة ابويا
طيب ماشي انا فاهم طبعا ...بس انا عاوز اقولك أن والدتك مش كبيره عشان تقعد من غير جواز ...هى فى المرحله السنيه دى بالذات محتاجه راجل جنبها
طب ما فى ستات كتير زيها مبيتجوزوش بعد ازواجهم ما بيموتوا
دى قدرات يا سهير ....كل واحده و لها قدره و كل انسان بيختلف عن التانى
صمتت سهير و لم تستطيع الرد ...أردف مروان قائلا
بكرا ان شاء الله انا هروح لوالدتك المحل اطلبك منها ...هى دى الاصول يا سهير و انتى ست العارفين
هزت سهير رأسها بالموافقه دون أن تنطق بكلمه واحده
فى اليوم التالى ذهب مروان إلى محل المعلمه و لم يجد غير العمال
السلام عليكم
و عليكم السلام يا استاذ
فين المعلمه هانم من فضلك
لا المعلمه معدتش بتيجى المحل الا كل فين و فين
طب ممكن تدينى العنوان من فضلك
حضرتك عاوزها ليه و لمؤاخذه
موضوع شخصى
طيب انا هتصل عليها و اسالها لو قالت لى اديك العنوان هديهولك
طيب قولها مروان ابن المعلم صلاح جايلك من طرف سهير وعاوزك فى حاجه شخصيه
اتصل رضا بالمعلمه و أخبرها أن مروان يريد عنوانها ...فرحت هانم كثيرا قائله
اديله العنوان يا رضا ....اطلع وقف له تاكسي و خليه يجى على طول انا مستنياه
حاضر يا معلمه
خرج رضا مع مروان و اوقف التاكسي و أخبره بالعنوان
وصل مروان أمام العماره التى تسكن بها هانم فوجدها تنتظره فى الشباك
عندما رأته نادت عليه ....اطلع يا مروان انا مستنياك
صعد مروان إلى الدور الثالث ليجد هانم تفتح له الباب و بطنها مرتفعه أمامها
اندهش مروان و لكنه اخفى اندهاشه قائلا
سلام عليكم يا معلمه
و عليكم السلام يا مروان ......اتفضل
انا هخش دوغرى فى الموضوع
استنى الاول تشرب ايه ؟
لا متشكر انا همشي على طول ...انا طالب القرب منك فى الانسه سهير
سهير ؟؟ انت بتشوفها ؟ عامله ايه ؟ و خلصت البكالوريا و الا لا ؟
سهير بخير و الحمد لله و نجحت فى البكالوريا و دخلت كليه التجاره كمان
صحيح ؟؟يا الف نهار مبروك
طب و هى عارفه انك جايلى هنا تطلبها منى ؟
ايوا طبعا دى اصول و لا يمكن نتعداها ...انا قلت اجى اخد رايك الاول قبل ما اجيب ابويا المعلم صلاح و نيجى نطلبها رسمى
انا يا ابنى معنديش مانع نسب المعلم صلاح محدش يقدر يقول فيه كلمه ...و انت كمان انا عارفاك و عارفه أن اخلاقك عاليه بس لازم سهير تكون موافقه الاول
هى موافقه ...انا مجتش هنا الا بعد موافقتها
حيث كدا بقا يبقى انا كمان موافقه ...الف مبروك يا ابنى
الله يبارك فيكى يا معلمه ...هقوم انا بقا عشان افرح سهير
لأ استنى يا مروان عاوزه منك خدمه
انا تحت امرك يا معلمه
استنانى ثوانى ....
#سهير
#الجزء_العشرين_والاخير
هقوم انا بقا عشان افرح سهير
لأ استنى يا مروان عاوزه منك خدمه
انا تحت امرك يا معلمه
استنانى ثوانى ....
قامت هانم و احضرت صندوق ارابيسك و أعطته لمروان
خد يا مروان يا ابنى الصندوق ده و خد مفتاحه اهو معاك
ايه دا يا معلمه ؟
دى امانه بأمنك عليها و عارفه انك ادها و ادود ...اللى يقف جنب بنتى و يعرف الأصول زيك كدا يا مروان آمنه على سري زى ما هأمنه على بنتى ....بس عاوزه منك طلب
تحت امرك يا معلمه
الصندوق ده زى ما قلتلك امانه عندك هرجع اخده منك بعد ما أولد
ايوه صحيح الف مبروك على الحمل
الله يبارك فيك ...بس زى ما انت شايف انا خلاص قربت أولد يمكن يومين و الا حاجه ...و محدش ضامن الموت من الحيا و انا خايفه يجرالى حاجه و انا بولد
بعد الشر عليكى يا معلمه ...أن شاء الله تقوميلنا بالف سلامه
الله يسلمك بس انت عارف أن ده أمر وارد أنه يحصل ...انا عاوزاك لو جرالى حاجه تدى الصندوق ده لبنتى سهير ...و اذا قمت بالسلامه هاخده منك تانى و هبقى اديهولها بنفسي
طب ما تيجى معايا دلوقتى يا معلمه اصالحكم على بعض و تديهولها بنفسك
انت شايفنى تعبانه ازاى ....انا واثقه فيك يا مروان و الصندوق معاك زى ما يكون معايا بالظبط
حاضر يا معلمه
اول ما تمشي من هنا و قبل ما تروح لسهير خد الصندوق و عينه عندك فى بيتك ....متاخدوش معاك و انت رايح لسهير
حاضر يا معلمه ....اى خدمه تانيه ؟
لأ كتر خيرك يا ابنى ...سلملى على سهير اوى و قولها إنها وحشتنى
من عنيا يا معلمه ....سلام عليكم
و عليكم السلام يا ابنى
ذهب مروان إلى بيته و دس الصندوق داخل دولابه ثم توجه إلى سهير
فى هذه الفتره أحست هانم بآلام شديده فى اسفل بطنها و ظهرها فأخذت حقيبه المولود و ذهبت إلى المستشفى
أخبرها الطبيب بعد الكشف عليها انها ولاده و انها لابد أن تلد قيصرية لأن الطفل فى وضع غير طبيعى
استاذنت هانم الطبيب أن يجعل احدى الممرضات تتصل بابنتها و أعطته رقم تليفون المحل
اتصلت الممرضه بسهير ...و كانت تجلس مع مروان
الو
انتى سهير بنت مدام هانم ؟؟
ايوه انا
طب والدتك معانا هنا فى مستشفى السلام و دخلت اوضة العمليات
عمليات ايه ؟؟ امى فيها ايه ؟
متخافيش ...دى بتولد هو انتى متعرفيش انها حامل ؟؟
بتولد ؟؟؟
هز مروان رأسه لسهير كأنه يقول ساخبرك لاحقا
طيب انا جايه حالا
أغلقت سهير الخط مندهشه ....امى بتولد ؟؟ هى كانت حامل ؟
ايوه يا سهير انا كنت لسه هقولك ...امك حامل و فى اخر شهر و كان نفسها تيجى معايا بس مكنتش قادره لان كان واضح عليها التعب اوى ...و هى بتسلم عليكى اوى و موافقه على جوازنا
طب يلا بينا يا مروان
ذهبت سهير و مروان إلى المستشفى لتجد امها تخرج من غرفة العمليات على الترولى و بجانبها طفل صغير ...جرت سهير إلى أمها و تبعتها الى الغرفه
أما ...اما ...الف سلامه عليكى يا اما
سهير ؟ انتى جيتى يا بنتى ؟؟
ايوا جيت يا اما حمدالله على سلامتك
الله يسلمك يا حبيبتى ...انا جبت ايه يا سهير ؟؟ ولد و الا بنت ؟؟
هشوف ...ولد زى القمر اهو
وريهولى يا بنتى
الله ....دا جميل اوى ...خدى بالك منه يا سهير متخديهوش بذنبى ....سميه سيد على اسم ابوكى الله يرحمه
يا اما متقوليش كدا ...ربنا يخليكى و انتى اللى تربيه و تسميه زى ما انتى عاوزه
سامحينى يا بنتى
مسمحاكى يا اما مسمحاكى
لكى امانه مع مروان هيدهالك ....اشهد ان لا اله الا الله و اشهد ان محمدا رسول الله
اما .....اما ....ردى على يا اما ....اما
اسرع مروان لاستدعاء الطبيب ....حضر الطبيب و كشف على هانم و قال البقاء لله
صرخت سهير و هى تحمل أخاها الذى تيتم و لم يرى امه، اخذها مروان فى حضنه و اخذ يربت على كتفها
اخذت سهير اخوها و انهى مروان إجراءات المستشفى اتصل على حافظ ليخبره أن هانم توفت
حضر حافظ مسرعا إلى المستشفى و اخذها هو و مروان إلى المقابر ...
اقامت سهير سرادق كبير للعزاء و جاء الحى بأكمله للعزاء
بعد العزاء دخل مروان على سهير و أخبرها أن حافظ كان يريد التحدث معها و أنه أخبره أن الوقت غير مناسب و أنه يجب أن ينتظر يومين حتى تهدئ
و دا عاوز منى ايه دا ؟؟
معرفش بس اكيد هيتكلم فى موضوع الميراث او ممكن يكون عاوز ياخد ابنه
ابنه ؟؟؟ هو سأل عنه اصلا ؟
طيب انا معايا الامانه اللى والدتك ادتهالى و قالت لى انى اديهالك لو جرالها حاجه
امانه ايه بس يا مروان ؟؟
يا سهير دى امانه و لازم اديهالك ....اتفضلى
ايه ده ؟ دا صندوق دهب امى
و أدى المفتاح بتاعه ...استأذن انا بقا عشان تفتحيه براحتك
لا استنى يا مروان ...انا هفتحه و انت معايا
فتحت سهير الصندوق لتجد أمامها كل ذهب المعلمه ...اوراق ....دفاتر ... مفاتيح ....خطاب مغلق مكتوب عليه إلى ابنتى سهير
فتحت سهير الخطاب لتجد مكتوب فيه :
ابنتى سهير
اذا كنتى بتقرى جوابى ده هكون كدا رحت عند اللى خالقنى .... عاوزاكى تسامحينى يا سهير ...سامحينى انى كسرت قلبك و اتجوزت من الشخص اللى كنتى بتحبيه ...سامحينى انى محترمش كونى ام و جريت اتجوزت ولد اد ولادى و سبتك لوحدك ...كنت انانيه مهمنيش الا مصلحتى
بس خلاص انا فهمت الحقيقه و حاولت أكفر عن اللى عملته لما عرفت أن حافظ كان بيسرقنى و حاول يجهض جنينى و ادانى حبوب تعملى نزيف و انا فى الشهر التانى للحمل ...عرفت دا بالصدفه لما كنت بدور على بطاقتى عشان انزل اعمله توكيل عام و لقيت شريط الحبوب مخبيه فى دولابه
ساعتها جريت على المحلات و اخدت الدفاتر عشان اتاكد من حاجه تانيه و فعلا اللى توقعته لقيته ...سرقه بالهبل فى الدفاتر ...اخدتها و قلت للعمال محدش يقوله انى اخدتها و هما قالوا إنه مبيسالش عنها إلا كل اسبوع و الا اتنين
بعدها طلعت على الشهر العقارى كتبت كل حاجه باسمك يا سهير ...المحلات، الشقه بما فيها، حتى العربيه اللى راكبها حافظ كتبتها باسمك ....و هتلاقى نسخه من مفاتيح الشقه و العربيه و المحلات عندك فى الصندوق
انا عارفه انك مش هتظلمى اختك و الا اخوكى بس انا أتمنى يكون اخ عشان يكون ضهر ليكى اللى مشفتهوش لسه ...عاوزاكى لما يكبر تديله حقه بما يرضى الله و انا متاكده انك هتعملى كدا لانك حقانيه
سامحينى يا سهير و متحكيش لابنى على اى كلام وحش ...قوليله انى كان نفسي اشوفه اوى و اخده فى حضنى ...قوليله أن أمه كانت طول عمرها ست جدعه
مع السلامه يا سهير
قرات سهير خطاب امها و الدموع تتساقط من عينيها
يا حبيبتى يا اما ...مسمحاكى يا حبيبتى
اهدى يا سهير ...أهدى ....هتعملى ايه دلوقتى ؟؟
هعمل اللى امى كانت عاوزاه ....لو سمحت يا مروان اتصلى بحافظ دلوقتى و قوله انى عاوزاه الصبح الساعه عشره
حاضر يا سهير
انا نازله اشوف دقدق لسه تحت و الا روح
طب استنى هشوفو من البلكونه ...انا كنت سايبه بيحاسب عمال الفراشه وواقف معاهم و هما بيشيلوا الكراسي و الحاجه
دخل مروان البلكونه و نادى على دقدق .... تعال يا دقدق كلم الست سهير
حاضر يا استاذ مروان
صعد دقدق إلى شقه سهير ...يارب يا ساتر
ادخل يا دقدق ...البقاء لله يا ست سهير
و نعم بالله يا دقدق ...انا عاوزاك يا دقدق تروح دلوقتى لرضا و سلامه اللى شغالين فى محلات المعلمه و تقولهم ميفتحوش بكره المحلات و خليهم يجولى هنا من النجمه
حاضر يا انسه سهير من عنيا
متطنش يا دقدق ...حالا دلوقتى تروح لهم و تخليهم يجيبوا مفاتيح المحلات معاهم
حاضر ...طيران ...عاوزه اى حاجه تانى
لا اتكل انت على الله
اتصل مروان بحافظ و أخبره بالحضور فى العاشره صباحا لمقابله سهير
بعد أن أغلق مروان الخط طلبت منه سهير أن يحضر مبكرا ليكون معها فى هذا اللقاء
فى اليوم التالى حضر رضا و سلامه و معهم مفاتيح المحلات
اتفضلوا يا رجاله ....طبعا انتوا كنتوا عارفين كل اللى كان بيحصل من اللى اسمه حافظ ده و السرقه اللى كان بيسرقها للمعلمه ؟؟
ايوه عارفين يا انسه سهير و كانت فى بلاوى تانيه مقلناش للمعلمه عليها عشان متزعلش
بلاوى زى ايه بقا ؟؟
كانت بتجيله فى المحل ستات و لمؤاخذه شمال و كان بيطلع لهم بضاعه بالهبل من غير اى فلوس و لما كنت ازن عليه هيأيد الحاجات دى ازاى كان يزور فى اتمان الهدوم التانيه و يضيف تمن الحاجات دى ليها ...دا غير أنه كان بياخد فلوس كتير اوى و يصلح فى الحسابات
ايوووه ...انا شفت الكلام ده فى الدفاتر بعينى و عشان كدا انا عاوزه منكم خدمه
تحت امرك يا ست سهير
خدوا دا مفتاح شقه امى الله يرحمها عاوزاكوا تروحوا تجيبوا معاكم كالون جديد للشقه و كوالين للمحلات و تجيبوا نجار و تطلعوا على الشقه تدخلوا تلموا هدوم اللى اسمه حافظ ده _و لو انها خساره فيه_ على ما النجار يخلص شغله ...بعدها واحد منكم ياخد النجار و يطلع على المحلات جرى و التانى يجى على هنا يدينى مفتاح الشقه الجديد و الهدوم
وجب يا معلمه
بس خدوا بالكم يا رجاله حافظ هيجيلى هنا على عشره يعنى انتوا تروحوا تقفوا قدام العماره من غير ما يشوفكم على الساعه تسعه و نص كدا و اول ما تشوفوه خارج تطلعوا على فوق
حاضر يا معلمه
انصرف رضا و سلامه لتنفيذ اوامر سهير ....بعد قليل حضر مروان و بعدها فى العاشره تماما كان حافظ أمام باب شقه سهير يضرب الجرس
دخل حافظ ليجد سهير تضع رجل على رجل و تنتظره
البقاء لله يا سهير
و نعم بالله ....كنت قلت لمروان انك عاوزنى خير ان شاء الله
لا ابدا انتى طبعا عارفه أن المرحومه كانت مراتى ...و كنت عاوز اتكلم فى إجراءات الورث و كدا
مبتضيعش وقت انت ...طول عمرك بتحب تنتهز الفرصه
لا اله الا الله ...هو ده مش حق ربنا يا سهير
انا لى ربع التركه و ابنى له ضعفك انتى عشان ولد لمؤاخذه و طبعا انا الوصى على ابنى ...يبقى نقدر حقك كام و اديهولك لانك كدا هتاخدى حوالى التلت بعد خصم حقى طبعا
ياااا دا انت حاسبهم كويس اوى
انتى ناسيه أن دى بقت شغلتى ...انا بقالى سنين ماسك الحسابات
اه صحيح ...بس انا منستش يا حافظ ...و عارفه كل البلاوى اللى عملتها و السرقه اللى سرقتها للمعلمه
انتى اتجننتى ...سرقه ايه اللى سرقتها ؟
لا انا متجننتش و لا حاجه كل الدفاتر عندى و لو قدمتها للنيابه احبسك الصبح
انتى عاوزه ايه يا سهير
هنا دق جرس الباب ...طلبت سهير من مروان أن يخرج و ياتى لها بما طلبته ممن يدق على الباب
خرج مروان و عاد بمفاتيح و حقيبه ملابس كبيره
وضع الحقيبه على الأرض و أعطى المفاتيح لسهير
ايوه يا حافظ كنا بنقول ايه ؟؟
بقولك انتى عاوزه ايه يا سهير
انا عاوزاك تاخد شنطه هدومك دى و تجيب مفاتيح عربيتى و تغور من مطرح ما جيت
انتى بتقولى ايه عربيتك ايه و شنطة ايه اللى اخدها
ااه ...هو انا مقلتلكش مش امى الله يرحمها عرفت انك حرامى و كنت عاوز تسقطها و كتبت لى كل حاجه باسمى حتى العربيه اللى انت راكبها دى بتاعتى
انتى بتقولى ايه انتى اتجننتى ؟؟
لا متجننتش و كنت عارفه انك مش هتصدق ...خد ...مش بتعرف تقرا برده ....دى صوره من العقود اللى بتقول أن كل حاجه بقت باسمى كفايه اللى سرقته منها
طب و ابنى ؟؟ ابنى هيطلع من المولد بلا حمص
يا بجاحتك يا اخى ....انت فاكر الناس كلها حراميه زيك ...ابنك ده اخويا انا و هيفضل معايا و لما يكبر باذن الله هديله حقه
انا مش ممكن اسيبلك ابنى
لا هتسيبه غصب عنك يا اما هسجنك بالورق اللى معايا
هب حافظ واقفا و حمل حقيبته
استنى ...هات المفاتيح
القى حافظ المفاتيح على الطاوله أمام سهير
اه ...نسيت اقولك انا غيرت مفاتيح الشقه عشان متتعبش نفسك بس و تروح هناك تانى
نظر حافظ لسهير بغيظ شديد و تركها و مضى
ضحك مروان قائلا .... لأ معلمه معلمه يعنى
اومال ...دا انا اعجبك اوى ...انت فاكر أن حتة عيل زى دا هيضحك علينا؟؟
طب ايه ؟
ايه ؟عاوز ايه؟
موضوعنا هتعملى فيه ايه ؟
متقلقش يا مروان ....بس شويه كدا لأنى حزينه اوى على امى و كمان مسؤليه سيد اللى سبتهولى ده
منا عشان كدا يا سهير عاوز نتمم جوازنا بسرعه عشان أشيل معاكى
حاضر يا مروان بس يعدى كام شهر كدا و نتجوز على الضيق كدا عشان برده ميصحش اعمل فرح و امى مكملتش سنه فى التربه
زى ما تحبى يا ست العرايس ...انا مستنى و هفضل مستنيكى لآخر العمر
تسلملى يا مروان يا حبيبي ربنا يخليك لى
تمت.
اذا أعجبتكم القصه ارجو الدعاء لوالدى رحمه الله و لسائر موتى المسلمين
#قصص_وحكايات_د_جيهان_عادل
تعليقات
إرسال تعليق