#زوجة_أبى
#الجزء_الاول
ازيكم
انا عاوزه احكيلكم حكايتى مع زوجه أبى و انقلكم احساسي اللى عشت معاه سنين و سنين ...عذاب معنوى و مادى ....مش هطول عليكم و هدخل فى الموضوع على طول ...
انا سندس ٣٨ سنه متزوجه و عندى طفلين حمزه و عمر
زوجى راجل طيب لكن تجربتى و اللى حصلى فى حياتى بيخلينى اتعامل معاه بمنتهى الحذر و للاسف مش قادره اثق فيه ابدا بالرغم أنه مبيعملش اى حاجه تخلينى اشك فيه ...بس اللى حصل مع امى من اكتر من ٣١سنه خلانى احس أن كل الرجاله زى ابويا ملهمش امان
طبعا انتوا مش فاهمين انا قصدى ايه ...انا هفهمكم
من حوالى ٤٠سنه ابويا اتجوز امى
امى كانت ست طيبه اوى ست بيت من الناس القديمه اللى كانت بتعامل زوجها بكل حب و احترام بتعتبره هو محور حياتها ....
انا فاكره و انا صغيره ازاى كانت امى بتكون حريصه اوى انها توفر الجو المناسب لوالدى و أنه لما يجى البيت يكون البيت مترتب و ريحته حلوه ...هدومه نضيفه و مكويه ..اكله جاهز ...و كانت بتخليله احسن اكل و كنت الاحظ كتير انها تفضله عن نفسها و تديله نايبها فى اللحمه و الفراخ و كانت بتعمل كدا بكل نفس راضيه
امى كانت يدوب بتعرف تفك الخط لكن كان عندها مفهوميه مش موجوده عند ناس كتير متعلمه
امى كانت حريصه اوى على تعليمنا انا و اخواتى
اه نسيت اقولكم انى كان عندى اخ و اخت اصغر منى
كنا نرجع من المدرسه كانت امى بكل حب و حنيه تاخدنا فى حضنها و تبوس فينا و تبقى محضره لنا أكلنا و تخلينا بعد ما ناكل نقعد على الطبليه نكتب واجبتنا انا و اختى لأن اخويا ساعتها مكنش لسه دخل المدرسه
كل شئ كان ماشي هادى اوى و زى اى بيت ساعات ابويا يزعق لامى على حاجه عملتها من غير قصد و هى كانت تحاول تسترضيه بكل طريقه
لغايه اليوم المشؤم اللى جه ابويا من شغله و كان بيشتغل عطار و عنده محل صغير كدا بيبيع فيه عطاره و مستلزمات السبوع و الحبوب من رز و عدس و دره و خلافه ..
فى اليوم ده رجعت من مدرستى و كنت فى سنه تانيه ابتدائي و اختى سعاد كانت فى أولى ابتدائي
امى حطت لنا أكلنا و اتغدينا و قعدنا نكتب واجباتنا
لقينا ابويا داخل علينا على غير العاده فى الوقت ده
امى اول ما شافته داخل فرحت اوى و قالت له
حمد الله على سلامتك يا سي عبده ..البيت نور و الله
الله يسلمك يا رتيبه
انا مجهزه الغدا و لسه سخن ...فى ثوانى هجيبهولك
لأ استنى يا رتيبه عاوزك فى موضوع كدا
خير يا سي عبده موضوع ايه ؟؟
خير ان شاء الله ..... انا هتجوز يا رتيبه
ايه ؟؟؟؟ انت بتقول ايه ؟؟ تتجوز ازاى يعنى ؟؟؟ و ليه؟
هتجوز زى ما الناس بتتجوز
هو انا قصرت معاك فى حاجه ؟ هو انا عملت فيك حاجه ؟؟
يا ستى انتى لا قصرتى و لا نيله الموضوع و ما فيه ....
و مدام مقصرتش معاك فى اى حاجه زى ما بتقول ليه عاوز تعمل فى كدا ؟؟ ليه عاوز تكسر قلبى و تكسرنى ؟؟
شرع ربنا يا رتيبه ...هو انتى كمان هتعترضى على شرع ربنا ؟؟
هو انت متعرفش فى الشرع الا الجواز يا عبده ؟؟حرام عليك دا انا بحرم نفسي من اللقمه الحلوه و اخليهالك ....دا انا بفضلك عن نفسي و عن عيالى
محدش قالك تحرمى نفسك ...انتى بتعملى كدا بخوطرك محدش اجبرك عليه
يا سلام يعنى انا دلوقتى الغلطانه..انا اللى الحق على😔
يا ستى و لا غلطانه و لا حاجه ...دا حق من حقوقى و انا بقولك للعلم بس مش بستأذن منك
طب قولى ليه عاوز تعمل فى كدا ؟؟ ليه عاوز تجيب لى ضره ؟؟ ليه؟؟
طب لو انا عملت لك اى حاجه زعلتك حقك على ...
يا رتيبه انتى مزعلتنيش و لا حاجه بس زى ما قلت لك دا حقى
طب و فين حقى انا عليك ؟؟
حقك موجود و انا مش هأثر معاكى و هصرف على البيت و على العيال زى ما أنا و هقسم الايام بالعدل ما بينك و بينها
هنا صرخت امى صرخه حسيت انها طالعه من جوه قلبها
لاااااا حرام عليك دا انا مبيغمضش لى جفن طول ما انت بره البيت ....ازاى عاوز تبعد عنى و تبات فى حضن واحده تانيه
ازاى هتاخدها فى حضنك و تقولها الكلام اللى بتقولوا لى
ازاى هتنام على كتفك زى ما بنام انا ......انا مبعرفش انام الا على كتفك ...حرام عليك تعمل فى كدا
ابوس ايدك يا عبده متعملش فى كدا.... انا مليش حد غيرك انا يتيمه اب و ام ...مليش فى الدنيا حد اتسند عليه غيرك
و انا مش هتخلى عنك يا رتيبه ...انتى ام ولادى برده
امال عاوز تتجوز ليه ؟؟ طب هى احلى منى ؟؟ طب اصغر منى ؟؟ ...و بدأت امى تعيط بصوت عالى عياط هستيري و احنا واقفين نتفرج على المشهد اللى عمرنا ما هننساه ابدا 😔
اهدى يا رتيبه و انا هفهمك كل حاجه
فهمنى..... فهمنى يا اخويا
الست اللى عاوز اتجوزها دى ارمله واحد صاحبى...ست وحدانيه و ملهاش حد ...صاحبى دا كان عنده محل كبير للعطاره برده مات و سابها وحيده و مش عارفه تتصرف فى المحل و حساباته ... لجأت لى من فتره كدا و انا وعدتها انى اساعدها
و طبعا الست وحدانيه و مينفعش افضل داخل خارج عليها كدا ...الناس تقول ايه ؟؟ رحت فاتحتها فى الجواز و هى الصراحه وافقت على طول لانها عارفه انى راجل محترم.
و عارفه انك متجوز يا اخويا ؟؟؟ و عندك عيال ؟؟ و الا نسيت تقولها ؟؟
رتيبه عيب لما تتكلمى معايا بالشكل دا ....ايوا عارفه انا مفهمها كل حاجه و عارفه أن عندى تلات ولاد ...و ان شاء الله لما تيجى تقعد هنا مش هتسبب لك اى مشاكل
ايه ؟؟؟؟ انت بتقول ايه ؟؟؟؟؟؟؟؟؟؟؟؟ تقعد فين ؟؟
بقول تقعد هنا فى الدور اللى فوقك ....هو دا مش بيتى و الا ايه؟؟
و بيتى انا كمان ...انا بعت دهبى و حطيت فيه ورثى و ربطت على بطنى عشان اعمل معاك البيت ده ...مفكرتش فى نفسي و كنت اقول و ماله ما هو كله لأولادنا ...ازاى عاوز تجيبها فى بيتى شقايا و عمرى
بقولك ايه يا رتيبه الكلام ده مش عاوز اسمعه منك تانى ..البيت بيتى و انتى هنا زى اى حاجه موجوده فى البيت و انا ممكن ارميكى فى الشارع لكن هعمل بأصلى برده و هبقى عليكى
انا هوضب الشقه اللى فوق و هتجوز فيها اول ما سنيه تخلص عدتها ...و مش عاوز اى كلام فى الموضوع ده تانى
طبعا عاوزين تعرفوا ابويا عمل ايه بعد كدا و امى حصل لها ايه ؟؟ دا اللى هتعرفوه فى الجزء التانى 😔
يتبع ........🤫
#د.جيهان_عادل🤗
#زوجة_أبى
#الجزء_الثانى
البيت بيتى و انتى هنا زى اى حاجه موجوده فى البيت و انا ممكن ارميكى فى الشارع لكن هعمل بأصلى برده و هبقى عليكى
انا هوضب الشقه اللى فوق و هتجوز فيها اول ما سنيه تخلص عدتها ...و مش عاوز اى كلام فى الموضوع ده تانى
ابويا خرج و راح شغله و امى قعدت تعيط و احنا نطبطب عليها
انا عمرى ما شفت امى فى الحاله دى قبل كدا حتى لما جدتى ماتت زعلت اه بس مش بالشكل ده
امى تقريبا دخلت فى دور اكتئاب جامد معنتش بشوف ابتسامتها الحلوه ...بقت ساكته طول الوقت ..مكسوره حزينه
ابويا كان عامل نفسه مش واخد باله أو مش عاوز يتكلم عشان ميفتحش على نفسه موشح تانى
طول عمرى كنت اشوف ابويا ده قوى الشخصيه معرفش ليه ...بس يمكن علشان امى هى اللى كانت بتديله الهاله دى و دايما كانت عاملاله هيبه كدا و رعب
الموضوع ده اتغير تماما بعد ما ابويا اتجوز التانيه دى حسيت اد ايه هو ضعيف الشخصيه جدا و مكنش بيستقوى الا على امى الله يرحمها .
المهم ....ابويا كان بيجهز الشقه اللى هيتجوز فيها و طبعا كان بيشطبها أعلى تشطيب و لقناه جاب عفش جديد و حاجات كتير امى كان نفسها فيها و مجرئتش تطلبها منه
امى كانت بتشوف الحاجه طالعه و كانت ساكته خالص مسهمه زى ما يكون دى حاجه متخصهاش
بعد ما ابويا جهز الشقه لقناه جاب العروسه و داخل علينا بيها
شابه عامله زى الفرسه شعر طويل عيون عسليه ..طويله ..لونها خمرى ...حواجبها مرسومه بدقه عمرى ما شفت حواجب امى كدا ....حاطه مكياج كامل ...لابسه فستان تل أبيض مطرز من غير طرحه شكله تحفه ..ريحه عطرها صارخ
ابويا دخل بيها على امى ....امى مرفعتش عينها تبصلها
اتفضلى يا سنيه بيتك و مطرحك ...دى اختك رتيبه ..مراتى و ام الولاد
دى سندس و دى سعاد و الصغير ده سعيد
العروسه ضحكت ضحكه صفرا كدا و قالت اهلا اهلا و راحت على امى علشان تسلم عليها و تبوسها
امى طبعا مرفعتش رأسها و كانت مقهوره اخر قهره
العروسه اتحرجت من رد فعل امى و زعلت لاقيناها نتشت روحها و راحت طالعه على فوق
ابويا قعد يزعق لامى و يقولها ايه اللى عملتيه دا ؟؟ الست داخله تسلم عليكى و انتى برده مبيطمرش فيكى حاجه
و امى تبص له و متردش عليه ....زى ما يكون عاوزه تقوله انت عاوز تجلدنى و مقولش اه ؟؟
ابويا طلع جرى ورا مراته ...باب الشقه كان مفتوح
طلعت وراه و من غير ما يشوفنى شفت ابويا عمال يراضى فيها زى ما يكون طفل صغير غلط فى حق امه و هى تتعوج و عامله نفسها بتعيط و قعد يحايل فيها لدرجه انه ركع تحت رجليها و قعد يبوس فيها
انا شفت كدا و اتصدمت ...امال فين ابويا الاسد اللى مبشوفوش الا بيزعق و يشخط و ينطر
نزلت جرى لامى لقيتها نايمه على سريرها الدموع نازله من عنيها من غير صوت قعدت جنبها اطبطب عليها انا و اختى سعاد لغايه ما رحنا فى النوم جنبها
ابويا فضل اسبوع فوق عند مراته التانيه مينزلش خالص و كنا نسمع صوت ضحكتها تجلجل البيت و كنت ساعات اطلع عشان اتفرج عليها و الاقى ابويا يقولها اتدلع يا جمل
كنت استغرب هو بيقولها جمل ليه دى اسمها سنيه 😂
مرات ابويا كان لها حركات انا كطفله مكنتش فاهماها و للاسف فهمتها بعد كدا
كانت مثلا قدام ابويا تقولى تعالى يا سندس يا حبيبتى و تدينى فاكهه حلويات ...و اول ما ابويا يتلفت أو يدخل جوه الاقيها كشرت فى وشى و تزق فى و ساعات كانت تقرصنى و انا كنت اخاف اقول لابويا لأنه طبعا مش هيصدقنى لانه بيشوف المعامله الحلوه قدام عينه
مر الاسبوع و ابويا نزل شغله و الست جمل بدأت تضايق امى
بقت ترزع و تخبط و تجرجر فى العفش ...و امى ساكته مبتتكلمش
بقت تكنس شقتها و السلم و تجيب الزباله تحطها قدام شقه امى ...و امى ساكته متتكلمش
بقت تتحين فرصه أن امى تغسل غسيل و تكون ناشراه و تقوم منفضه عليه سجاده أو غاسله و منقطه عليه
كانت بتتعمد دايما تضايق امى و تحاول تبين غير كدا 😔
امى لما زهقت من عمايلها دى اشتكت لابويا و طبعا ابويا مصدقهاش و قالها انتى بس اللى حطاها فى دماغك و غيرانه منها
امى بقت تدبل قدامنا زى الورده و احنا مش قادرين نعملها حاجه
تطورت مضايقات الست جمل لامى لما لقت ان اللى بتعمله ده مجبش نتيجه معاها
بدأت تطلب من ابويا تنزل تقعد معانا و نأكل كلنا سوا بدل ما اهى قاعده فوق لوحدها مش لاقيه حد تكلمه
ابويا طبعا فرح اوى و كان معتبرها ملاك مفيش زيها
بدأت سنيه تنزل و تعتبر أن الشقه شقتها ..بقت تدخل اى مكان بدون اى استاذان كانت بتتعامل بمنتهى البجاحه
و بقت تدلع على ابويا و تأكله فى بقه قدام امى عشان تغيظها ....و امى دا كله كاتمه فى نفسها
معرفش امى جابت الصبر دا كله منين 😔
كنت ساعات اشوفها بترش حاجات قدام عتبه البيت و حاجات فى الاكل بس مكنتش فاهمه كطفله ايه الحاجات دى ....
بعدها كنت الاقى ابويا مقلوب على امى و دايما بيتلكك لها على اى غلطه هايفه ....و بالعكس بقا مع الست جمل بيبقى عامل زى الطفل الصغير فى أيدها كلمه توديه و كلمه تجيبه
و يا سلام بقا لو الست جمل زعلت منه بيبقى يوم مش معدى البيت كله بيبقى متكهرب و بيبقى مش طايق حد يكلمه لغايه ما الست ترضى عنه
و فى يوم من الايام اخويا سعيد سخن جدا ...امى طلعت تخبط علي ابويا يوديه المستشفى لأن الوقت كان متأخر
فتحت لها سنيه و رفعت حاجبها( و كانت لابسه قميص احمر و حاطه مكياج كامل و مسيبه شعرها الطويل على ضهرها )
خير يا رتيبه جايه تخبطى على فى الوقت ده ليه 😏
انا جايه اخبط على جوزى مش عليكى ...لو سمحتى ناديهولى
اناديهولك دا ايه ؟؟؟ الراجل نايم ....ايه عايزانى اصحهولك مخصوص عشان جنابك
لو سمحتى ادخلى صحيه ابنه تعبان و عاوزاه يوديه المستشفى
و النبى صحيح ؟؟؟ و المفروض بقا اصدقك و اصحيلك جوزى ....العبى غيرها يا حلوه ..عارفه أن الغيره واكله قلبك و مش طايقه تسبيه يبات عندى
و لا غيره و لا حاجه صحيه الولد بيموت تحت
مش مصحياه و اتلمى يا رتيبه و انزلى شقتك
و راحت رازعه الباب فى وش امى
امى نزلت جرى ع السلم و دموعها على خدها و شالت اخويا و طلعت تجرى على اقرب مستشفى
الدكتور كشف على اخويا و لاقى أن عنده تيفود و حرارته مرتفعه جدا و حجز اخويا فى المستشفى
ابويا لما عرف أن امى فى المستشفى جه هو و سنيه
اول ما شاف امى قالها
انتى ازاى تخرجى م البيت فى وقت متأخر كدا و تيجى المستشفى فى انصاص الليالى ؟؟
ابنى كان تعبان و بيموت اعمل ايه يعنى ؟؟
ما يموت و الا يتنيل ما كنتى استنيتى للصبح و الا كنتى صحتينى
منا طلعت اصحيك و مراتك مرضيتش
هنا ردت سنيه كداااابه محصلش ..أخص عليكى مرا كدابه
انتى بتقولى ايه انا جت لك و فضلت اتحايل عليكى تصحيه انا اللى كدابه؟؟؟؟ يا شيخه حرام عليكى دا انتى اللى كدابه و ستين كدابه
اخرصى يا شايبه يا خرفانه شوفى بقا كنتى عايزه تخرجى فى نص الليل تروحى فين و الا تقابلى مين ؟؟
انتى مجنونه يا ست انتى ؟؟ أقابل مين و ابنى عيان و بيموت فى ايدى ؟؟ انت يرضيك كدا الكلام اللى بتقوله دا يا عبده ؟؟ هو انا بتاعه الكلام ده ؟
ما انتى لو ست محترمه برده و بتحترمى جوزك مكنتيش خرجتى من غير اذنى و كنتى استنيتى للصبح
انا مش مصدقه إلى بسمعه منك 🥺 دا اللى قدرك عليه ربنا ...جاى تزعق لى و سايب مراتك تتهمنى فى شرفى و مش هاين عليك تقولها انتى غلطانه ليه مصحتنيش
و الله انت ظالم و ما تعرف ريحه العدل
ابويا لما سمع امى بتكلمه بالطريقه دى و كانت اول مره تكلمه بالحده دى رفع ايده و رزعها قلم على وشها من قوته الدم بقى ينزل من بقها
و قالها اخرصى يا سافله ...على الطلاق منك بالتلاته ما انتى قاعده فى المستشفى دى و لازم ترجعى البيت بالواد حالا
طبعا سنيه واقفه وراه و كل عنيا فرحه و شماته فى امى
امى لما لقته قال كدا بقت تبوس فى ايده و تقوله معلش الولد لو طلع هيموت ..الولد حالته حرجه ..بالله عليك متخرجهوش ابنى هيموت
و هو يزيد فيها و يقولها انا خلاص حلفت عاوزه تقعدى يبقى تشوفيلك حته تانيه تخرجى من المستشفى عليها
اروح فين يا اخويا ..انت عارف انى مليش حد فى الدنيا غيرك
يبقى تخرصى و تحطى لسانك فى بقك و تشيلى الواد و يلا على البيت
امى شالت اخويا سعيد و اخدت ادويته ...الدكتور شافهم خارجين قالها راحه فين يا ست ؟؟
قالت مروحه بابنى يا دكتور
مروحه ازاى ؟ من دماغك كدا ؟؟؟ الولد حالته خطيره و حرارته مرتفعه
انا هديله العلاج فى البيت يا دكتور
ازاى يا ستى الكلام اللى بتقوليه ده مينفعش
معلش يا دكتور بيتى هيتخرب لو ممشتش دلوقتى
ايه التخلف ده بقولك ابنك حياته فى خطر تقولى بيتى
معلش يا دكتور انا مش قادره اعمل حاجه
طيب انتى حره بس لو الولد جاله تشنجات من الحراره لازم تيجى بيه بسرعه ..و خدى بالك من الادويه فى المواعيد المحدده
حاضر حاضر يا دكتور
طبعا ابويا و سنيه كانوا خرجوا و مستنين امى فى الحنتور بره ...و امى اخدت اخويا و خرجت ركبت معاهم و هى فى منتهى القهر . سنيه كل شويه تقرص امى من جنبها و تعمل نفسها قاعده مبتعملش حاجه ...و. امى ساكته و اغلب من الغلب لانها عارفه لو نطقت ابويا هيكدبها و يصدق سنيه
امى روحت البيت و حطت اخويا على سريره ...اخويا كان وشه اصفر زى اللمونه و كان قاطع الاكل و حرارته مرتفعه ووشه احمر مزنهر
امى بقت تعمله كمادات و تديله الدوا و الحراره مش راضيه تنزل لغاية ما اخويا جاله تشنجات و جسمه بقى ينتفض و يتشنج و عنيه تبيض
امى صرخت و قعدت تنادى على ابويا
الحقنى يا سيد الواد متشنج ...الواد هيموت
ابويا خرج هو و سنيه و حتى مكلفش خاطره ينزل يشوف فى ايه
سنيه ردت...اهى بدأت اهى ....هى مش هتهدى الا اما تنزلها يا عبده ....انزل و امرك لله احسن نارها قايده كل شويه تجيلنا بحوار
و طبعا ابويا عام على عومها و قال لامى
مش هنخلص بقا من سيره المستشفى دى ...انتى غاويه تخرجى و تجرى هنا و هنا ...امشي اعملى للواد كمادات ميه بخل هتنزل الحراره على طول
ميه بخل ايه بقولك الواد متشنج و بيموت
ابويا بص لها كدا كأنه مش مصدقها و دخل و قفل الباب
امى دخلت جرى على اخويا ....سمعنا صرختها سعييييييد
#د.جيهان_عادل 🤗😭
#زوجة_أبى
#الجزء_الثالث
ابويا بص لها كدا كأنه مش مصدقها و دخل و قفل الباب
امى دخلت جرى على اخويا ....سمعنا صرختها سعييييييد
دخلنا جرى انا و اختى على صوتها لقينا سعيد بين ايديها
مغمض عنيه و جسمه سايب اديه مدلدله و امى عماله تحضن فيه و تصرخ و تقوله متموتش يا سعيد متموتش يا سعيد ...احنا شفنا كدا بقينا نصرخ انا و اختى
ابويا و مراته نزلوا على الصوت جرى
اول ما ابويا دخل على امى الاوضه و احنا واقفين كلنا نصرخ
ايه فى ايه ؟؟
امى بصت له كدا نظره عمرى ما شفتها فى عنيها قبل كدا
نظره مليانه حقد و غل و قهره و قالت له
منك لله ...ابنى مات و انت السبب ...حسبي الله و نعم الوكيل فيك و فى العقربه دى
و لقيت امى هاجت و قعدت تزق فى سنيه و فى ابويا بره الاوضه ...منكوا لله يا بعده ..اشوف فيكم يوم
فى وسط ذهول رهيب من ابويا زى ما يكون كان فى غيبوبه و لسه فايق منها ....مش مستوعب ايه اللى بيحصل
و الغريبه بقا انى توقعت أن ابويا هيزعق لامى لما مسكت فيه كدا( لأنها طبعا اول مره تعمل كدا ) لكن ابويا معملش اى رد فعل خالص غير أنه طاوعها و هى بتزقه لبره ووقف دقيقه كدا و دخل لوحده على سعيد شاله بين اديه و خده و طلع يجرى ....امى طلعت تجرى وراه
واحد من جيرانا معاه عربيه لما شاف كدا اخدهم و راحوا المستشفى و هناك كشفوا عليه و لقوه فعلا مات
ابويا استخرج تصريح الدفن و كمل الإجراءات و راح دفن سعيد ...
أما امى بقا فكانت ساكته خالص مبتنطقش اى حد يجى من جيرانا عشان يعزيها مكنتش بترد عليه
طبعا سنيه استغلت الفرصه ده و بدأت تظهر قدام الجيران انها مرات الاب الجدعه القايمه بالواجب و مخليه بالها من العيال ...و بقت تيجى قدام الناس و تبين لهم اد ايه هى زعلانه على امى و على سعيد ..و هى فى الأساس كانت سبب من اسباب موته 😔
أما ابويا بقا..... الحزن كان واخده لاحساسه بالذنب طبعا و أنه يمكن لو مكنش طلع سعيد من المستشفى كان هيكون ما بينا دلوقتى
طبعا ابويا كان بيتحاشي الكلام مع امى نهائيا زى ما يكون ملوش عين يكلمها
فات اسبوع على وفاة سعيد و البيت كله غم فى غم
امى ساكته و شارده طول الوقت و احنا قاعدين جنبها
ابويا كان ينزلنا الاكل من عند سنيه فوق
بس امى فى الأسبوع ده مشفتهاش حطت لقمه فى بطنها
كانت بتشرب بق الميه بالعافيه
لغايه ما وقعت من طولها من كتر الزعل و قلة الاكل
ابويا اخدها وداها المستشفى و الدكتور قاله دى حاله ضعف عام و سأله اخر مره اكلت امتى ؟؟
ابويا قاله من أسبوع يا دكتور
ايه من أسبوع ازاى ؟؟ انتوا بتستهبلوا سايبنها تنتحر بالبطيئ...
الدكتور ركب لامى محاليل و فضلت فى المستشفى يومين
امى رجعت من المستشفى كأنها جسد بلا روح ...عايشه معانا كدا زى الميته لا بتعمل اكل و لا بتنضف البيت و لا بتخلينا نذاكر و لا اى حاجه خالص
كانت ساكته و خلاص و كل شويه ادخل الاقيها حاضنه هدوم سعيد و قاعده تعيط
بقيت شايفه امى كدا و مش عارفه اعملها حاجه ...كنت بحاول اساعدها و احضر اى حاجه للاكل ..احاول اغسل الاطباق المتكومه فى الحوض ..احاول اكنس و اظبط شكل الشقه ...بس على أدى لانى كنت صغيره برده
امى بقت حالتها تسوء يوم عن يوم و ضعفت جدا و بعد ما كانت زى البطه على رأى ابويا بقت نحيله جدا و ضعيفه جدا 😣
طبعا الست جمل كانت كل شويه تنزل و ميهونش عليها تعمل اى حاجه لامى ...كانت شاطره بس قدام ابويا تقوله انا هنزل اشوف طلبات رتيبه ما هى اختى برده
و ابويا يقولها اصيله يا سنيه و كان بيشوف أن اى حاجه سنيه تعملها و لو حتى هايفه انها حاجه عظيمه
استمر الحال دا حوالى شهر بعد وفاة سعيد لغايه اليوم الاسود اللى دخلت اصحى امى علشان ابوسها قبل ما اروح المدرسه و لقيتها مبتردش على
ماما ...ماما ردى على ...فيكى ايه يا ماما ... ماما ردى على
و امى مبتردش 😔
طلعت جرى اخبط على ابويا فتحت لى سنيه
ابويا فين يا مرات ابويا ؟؟
فى ايه يا بت مالك مسروعه كدا ؟؟
عايزه ابويا
ابوكى جوه لسه نايم ادخليله
دخلت لقيت ابويا لابس بيجامه حمرا و نايم و دى كانت اول مره فى حياتى اشوف ابويا لابس بيجامه ...لا و كمان حمرا ...كنت دايما اشوفه لابس الجلابيه البيضا أو الالوان
حسيت أن ده مش ابويا ..بس اعمل ايه مش هعرف اتصرف لوحدى
بابا بابا
ايه دا ...فى ايه يا سندس ؟ مرحتيش المدرسه ليه ؟؟
ماما يا بابا بصحيها مبتردش على
يمكن نايمه و مش سامعاكى يا سندس
لا يا بابا انا كنت اول ما اقولها يا ماما كانت تصحى على طول لكن المره دى مش راضيه بقالى نص ساعه بصحى فيها و مش راضيه تصحى
نص ساعه ازاى ؟؟
ابويا قام من على سريره و سنيه مربعه اديها وواقفاله على باب الاوضه
ابويا بص لها كدا باضطراب و قالها هنزل اشوف فى ايه و اطلع على طول
سنيه عوجت بقها زى ما يكون مش عاجبها 😏
ابويا لبس جلابيته و نزل معايا يصحى امى
لكن امى مصحيتش ...امى ماتت و كانت على وشها ابتسامه كأنها فرحانه انها اتخلصت من الدنيا دى ...الدنيا اللى شافت فيها الذل و القهره بجواز جوزها عليها و موت ابنها ...امى استريحت من سنيه و من حركاتها اللى كانت من تحت لتحت ...امى راحت للى احن عليها من اى حد فى الدنيا..... راحت للى هيرحمها 😔😔
ابويا نادى على سنيه بسرعه و قالها انزلى
نزلت سنيه و شفت ابويا بيقولها رتيبه ماتت ...لقتها خبطت على صدرها باديها و قالت يا حبيبتى يا اختى ...مكنش يومك يا غاليه ... حبيبة اختك يا اختى
و انا دا كله واقفه دموعى مغرقه وشي و كأنى بتفرج على فيلم عربى ردئ حتى الممثله اللى فيه ممثله فاشله
ابويا خلص اجراءات الدفن و لتانى مره فى خلال شهر الناس تيجى تعزينا و سنيه تلبس السواد على امى
السواد اللى هى ورتهولها و قهرتها و موتتها بقهرتها
التلات أيام بتوع العزا خلصوا و لقيت ابويا بينده على انا و اختى سعاد و طبعا فى وجود سنيه و بيقولنا ....
طبعا عاوزين تعرفوا ابويا قالنا ايه ؟؟
دا اللى هتعرفوه فى الجزء الرابع بإذن الله
يتبع ......🤗
#د.جيهان_عادل🤗
#زوجة_أبى
#الجزء_الرابع
التلات أيام بتوع العزا خلصوا و لقيت ابويا بينده على انا و اختى سعاد و طبعا فى وجود سنيه و بيقولنا
تعالى يا سندس انتى و سعاد
طبعا سنيه قاعده على الكرسي عامله نفسها غلبانه و كأنها معملتش اى حاجه لابسه جلابيه سودا ال يعنى زعلانه على امى 😏
انتوا يا اولاد عارفين أن بعد موت امكم الله يرحمها مبقاش لكم حد غيري و غير امكم سنيه
سنيه من هنا و رايح هتبقى امكم و عايزكم تقولولها يا اما
بصيت له كدا و قلت له امى ماتت يا بابا انا مكنش لى غير ام واحده بس
راح رزعنى بالقلم على وشي و قالى اخرسي يا بنت الكلب اللى اقول عليه هو اللى يمشي
سنيه بقا قامت قدامه و قعدت تطبطب على و تقوله ليه كدا يا عبده خليها براحتها ...خليها تقول اللى يريحها قولى يا ابلتى يا سندس
طبعا اختى سعاد واقفه خايفه من القلم اللى بابا ادهولى
بعدها لقيت سنيه داخله تنام فى اوضه امى الله يرحمها
بقيت نفسي ادخل اولع فيها و هى نايمه
طب ليه تنامى على سرير امى و انتى عندك شقتك و عفشك فوق اللى احسن من عفش امى بكتير
تانى يوم ابويا راح الشغل و لبست و رحنا المدرسه انا و سعاد ....
رجعت من المدرسه لقيت سنيه قالبه شقه امى و راميه هدومها بره قدام البيت زى الزباله و كل حاجتها مرميه و لقيت صور امى مرميه مع الحاجه أخدتها من الزباله دخلتها شنطتى و لقيت سنيه بتتفق مع بتاع الروبابكيا يجى ياخد كل حاجه الكنب و السراير و المواعين ...
اول ما دخلت و شوفت المنظر صرخت فى وشها و قلت لها انتى بتعملى ايه فى حاجة امى ...انتى ملكيش تعملى كدا فيها انتى لكى شقتك فوق اعملى فيها اللى عاوزاه
و لاول مره الاقى سنيه تظهر على حقيقتها و راحت مسكانى من شعرى و قالت لى
بت انتى ...بقولك ايه انا مش ناقصاكى انا اعمل اللى اعمله و لا اتخن تخين فى البيت ده يقدر يفتح بقه
لو عاوزه تعيشي هنا تبقى تحطى جزمه فى بقك و تخرصى خالص مسمعش صوتك
انتى ازاى بتكلمينى كدا ؟؟
زى الناس يا عين امك و اضربك كمان على بقك عشان تحترمى نفسك ...رتيبه معرفتش تربيكى انا بقا هعيد تربيتك من أول و جديد
اسكتى متجبيش سيرة امى على لسانك
امك ...امك مين دى الشايبه الكركوبه بقولك ايه يا بت متطلعيش زرابينى لاحسن و دينى اجيب الشبشب و انتفه عليكى
و راحت سايبه شعرى و زقانى على الأرض انا بقا قمت دخلت على اوضتى و مسكت صورة امى و قعدت اعيط و سعاد اختى تطبطب على و تقولى اسمعى كلامها يا سندس عشان متضربكيش
صعبت على نفسي و اخدت سعاد فى حضنى ...سعاد هى اللى باقيالى من ريحة امى و هى شبيه امى اوى
بعد خمس دقائق لقيت سنيه فتحت الباب و قالت
الله الله انتى قاعدالى انتى و هى عاملين هوانم و الا ايه؟؟
قومى يا اختى انتى و هى فزى اشتغلوا معايا
الشقه زريبه و لسه فيها شغل كتير اوى
بصيت لها كدا و كان نفسي اقتلها
مالك يا بت بتبصيلى كدا ليه ؟؟ هتصورينى يا روح امك
قومى فزى يلا ع المطبخ
بصيت فى الارض و مرضتش ابص لها
سنيه اتغاظت جدا و قالت حااااضر انا بقا هربيكى يا عديمه التربيه
و طلعت جرى من الاوضه....لقيت سعاد اختى جالها ذعر و بقت تقولى و النبى يا سندس قومى الله يخليكى هتضربك
و فعلا لقيت سنيه جايبه خرطوم الحمام و خرجت اختى بره الأوضه و قفلت على بالترباس و نزلت بيه على جسمى بمنتهى القسوه و عدم الرحمه كأنها بتنتقم من واحد إسرائيلى... الخرطوم كان بينزل على جسمى يعوره
سنيه كانت عامله زى التور الهايج بقت تجرى ورايا فى الاوضه و انا اصرخ و راحت ماسكه شعرى...و كان طويل و زقانى على الأرض
وقعت على الأرض راحت وقفت عليه برجلها فبقيت مش قادره اقوم أو اتحرك من تحتها و بقت تضرب فى
بعد كدا راحت حاطه رجلها على صدرى ووقفت عليه بقت تضغط على صدرى و تقولى انا بقا هموتك يا بنت الكلب انهارده ....و انا اصرخ و اقولها خلاص خلاص و النبى مش هعمل كدا تانى خلاص
قعدت حوالى ربع ساعه تضرب فى.. مروا على زى ما يكونوا سنه الوقت كان بيمر ببطئ شديد
و كنت بتمنى فى كل لحظه أنها تقف أو تتعب عن ضربى
و طبعا مكنش عندى امل ان حد يلحقنى لأنها قافله على بالترباس يعنى حتى لو حد من الجيران سمع و حب يدخل يحوش مش هيعرف للاسف 😔
سنيه بقت تنهج من كتر ضربها لى و لقيتها بتقولى قومى يا بنت الكلب يلا على المطبخ عايزه المطبخ بيلمع تنضفى الارضيه و الحيطان ...و مسمعش حسك ...و عارفه لو قلتى لابوكى على العلقه دى شوفى هعمل فيكى ايه انتى حره ...قومى فزى
قمت من على الأرض و جسمى كله بيترعش اعصابى بايظه و مش قادره اقف على رجلى
سنيه فتحت الباب و لقيت سعاد واقفه بره مرعوبه و عماله تعيط على صريخى و عياطى اللى كانت سمعاه
سنيه اول ما عينها وقعت على سعاد قالت لها و انتى يا بت يا ام شكل وحش انتى يلا على الحمام امسحيه و نضفيه اجى الاقيه فل لأحسن تاخديلك علقه زى الحلوه
دخلت المطبخ و جسمى كله بيترعش و ايدى وارمه من الضرب ... شعرى متنتف و منكوش ...الخرطوم معلم على جسمى كله دراعاتى و رجلى ...كل ضربه خرطوم معلمه بالدم ...
سنيه دخلت ورايا و جابت لى الكلور و الصابون و سلك المواعين و قالت بت ..يلا عايزه استلم منك المطبخ دا كان الراجل لسه سايبه من نص ساعه تنضفى السيراميك و بين السيراميك ..ملقيش حاجه مش نضيفه
بقيت واقفه اغسل و دموعى مغرقه وشي .. مكنتش شايفه من كتر العياط ..بس كنت خايفه منها ..
انا عمر ما امى ضربتنى بالطريقه دى ...امى اللى كانت بتخاف على من الهوا الطاير انا و اخواتى ...امى اللى كنا نرجع نلاقيها عامله لنا أكلنا و شربنا و ميهمهاش الا مذاكرتنا و بس ....يااااااااه يا امى يا ريتنى مت معاكى ياريتك ما سبتينا ....سبتينا لمين يا امى 😢
يارب ارحم امى زى ما كانت رحيمه بينا
قعدت اكلم نفسي زى الهبله و اقول فى نفسي اكيد لما ابويا هيجى و يشوف حالتى كدا هيسالنى و انا هقوله على كل اللى مراته عملته فى
سنيه طلعت فوق تعمل الاكل لابويا و نزلت بعد ساعه تشوفنا خلصنا انا و اختى و الا لا
طبعا احنا كنا عيال و امى عمرها ما خلتنا نعمل حاجه ......معجبهاش شغلنا راحت لطشانى قلم على وشى و لطشت سعاد بالقلم و قالت يلا على اوضتكم محرومين من الاكل
دخلنا اوضتنا انا و سعاد و قعدنا نعيط و نحضن فى بعض
بعد حوالى ساعتين كنا رحنا فى النوم من كتر التعب و الجوع
الغريبه بقا أن ابويا جه و سال علينا ...مراته قالت له أنهم اتعشوا و ناموا و هو صدقها و مهنش عليه يدخل يطمن علينا و لا يعرف أكلنا و الا لا
و طلع هو و الجمل بتاعه على فوق يتعشوا و سمعت ضحكها مجلجل اد كدا ...و مشغله المسجل على اغنيه لأم كلثوم و لا كأن امى ميته من اربع ايام 😰
سعاد صحيت من النوم و قالت لى انا جعانه يا سندس
و انا كمان يا سعاد بس هنجيب اكل منين ؟؟
اطلع اقول لبابا يا سندس ؟؟
تطلعى ازاى ؟؟ انتى عاوزه سنيه تضربك 😔
انا هتصرف ....😣😣😣
#د.جيهان_عادل🤗
#زوجة_أبى
#الجزء_الخامس
سعاد صحيت من النوم و قالت لى انا جعانه يا سندس
و انا كمان يا سعاد بس هنجيب اكل منين ؟؟
اطلع اقول لبابا يا سندس ؟؟
تطلعى ازاى ؟؟ انتى عاوزه سنيه تضربك 😔
انا هتصرف ....😣😣😣
قمت جبت كرسي و حطيت عليه المخده ووقفت عليه
و مديت ايدى لماسورة الستاره و نزلتها
كنت بشوف امى الله يرحمها تعمل جمعيات و تحوش فيها و تجيب حاجه للبيت ...مره حوشت و جابت السيراميك و مره جابت طوب الدور التانى و مره جابت اسمنت السقف و العمدان
جبت الماسوره و لقيت فيها ١٠٠٠ جنيه و دا مبلغ كبير فى الوقت ده ... سعاد لما شافت الفلوس قالت لى
ايه دا يا سندس الفلوس دى بتاعه مين ؟؟
دى بتاعه ماما الله يرحمها يا سعاد
طب و احنا هنعمل بيها ايه ؟؟ المفروض نديها لبابا يا سندس .
نديها لبابا عشان يديها للست سنيه بتاعته انتى مش شفتى خاتم ماما الله يرحمها فى أيدها انهارده ؟
طب و هنعمل ايه بالفلوس دى كلها يا سندس ؟
هنعينها يا سعاد و نجيب لنا اكل لما سنيه تحرمنا من الاكل ....بصى انا هقوم دلوقتى انزل اجيب جبنه و حلاوه و عيش عشان نتعشي و ناخد بكرا سندوتشات معانا المدرسه
طب خدينى معاكى يا سندس انا خايفه اقعد لوحدى هنا
لا خليكى متخافيش ...انا هاجى على طول
اخدت عشره جنيه من الفلوس و نزلت جبت جبنه و حلاوه و عيش و قطعتين كنافه كدا
و طلعت أكلنا انا و اختى و حلينا كمان
و رجعت فلوس امى مطرحهم...بس لما فكرت شويه لقيت أن سنيه ممكن تلاقى الفلوس ..لأنها قالبه البيت الايام دى و ممكن ارجع من المدرسه الاقيها اخدتهم
طب اعمل ايه او اتصرف ازاى ..هى بتدخل اى حته فى الشقه و تقدر تلاقيهم فى اى مكان فيها
افتكرت عشه الفراخ اللى فوق السطح ...دى عشه كدا عباره عن اوضه امى الله يرحمها كانت بتربى فيها فراخ و حمام ارضى على بطتين كدا ياخدوا حسنة البيت على رأى امى
و كنت انا فى الايام الاخيره و قبل وفاتها انا اللى بطلع لهم الاكل ...دى فكره حلوه سنيه مبتطلعش فوق خالص
خلاص لما اصحى الصبح و اطلع عشان اكل الطيور هبقى اخبيهم هناك
و فعلا نمنا انا و اختى و صحيت حطيت اكل للفراخ و خبيت الفلوس فى صفيحه من الصفايح اللى امى كانت عاملاها للحمام
رحت المدرسه انا و سعاد و رجعنا لقيت سنيه فعلا قالبه باقى البيت ورميه الستائر بمواسيرها بره الشقه ...زى ما يكون عايزه تمحى أى أثر لامى فى الشقه
و لقيتها مطلعه هدومنا و سرايرنا فى الصاله
اختى سعاد سألتها :
ايه دا يا ابلتى انتى هتودى هدومنا و سرايرنا فين ؟؟
هطلعهم فوق فى شقتى يا سعاد ما هو مش هينفع تفضلوا هنا لوحدكم ...انا اتكلمت مع ابوكم و قالى طلعيهم هنا معانا
رحت سألتها طب و شقه امى ؟؟
قالت شقه امك الله يرحمها بقا مبقتش شقة امك ...البيت كله بقا بتاعى يا عنيا ابوكى كتبهولى بيع و شرا
و الشقه بقا أجرها .. اعملها مخزن لسه و الله مفكرتش هعمل فيها ايه
وقفت بصيت لها كدا و الدموع فى عنيا 🥺
قالت مالك يا ست سندس هتصورينى و الا ايه ؟؟ يلا يا اختى انتى و هى طلعوا حاجتكم دى فى الاوضه الفاضيه اللى فوق
طبعا منطقناش لا أنا و لا اختى ...و فضلنا نحول فى الحاجات بتاعتنا لغاية ما متنا من التعب 😔
بعدها لقينا سنيه جايبه لنا شويه رز بايتين و شويه سلطه و قالت كلى يا اختى انتى و هى عشان توضبوا الزريبه اللى قاعدين فيها دى
اكلنا لأننا كنا ميتين من الجوع و قمنا نرص حاجتنا و سنيه نصبت السراير و قعدت اذاكر شويه و بعدين نمت أو بالأصح عملت نفسي نايمه
ابويا جه بعد شويه و سأل علينا
هما البنات فين يا سنيه ؟؟
البنات يا اخويا ذاكروا و اتعشوا و دخلتهم ناموا
معلش يا سنيه انا عارف إن الحمل عليكى تقيل بس دول يتامى و هتاخدى ثوابهم
اخص عليك يا عبده متقولش كدا ...دول بناتى ..حمل ايه اللى بتتكلم عليه دول اعز من عيالى
اصيله يا سنيه ربنا يخليكى لى ....و النبى تنفع اغنيه 😂😂😂😂😂😂
يو..... جتك ايه يا عبده ...يلا بقا عاملالك حمام محشي بالفريك يستاهل بقك و صنيه كوارع بجوزة الطيب حكايه
اموت انا فى الكوارع ...حلاوتك يا جمل
انا محضره كل حاجه .... هجيب الاكل حالا
سنيه حطت الصنيه و كان عليها الحمام اللى امى مربياه خلتنى اطلع اجيب لها تلات اجواز ..و عامله صنيه كوارع بورق العنب كانت ريحتها مفحفحه اوى
اول ما قعدت يلا يا عبده تعالى
انا جيت اهو يا روح عبده ...ريحه الاكل جميله
بالف هنا على قلبك يا معلم
من بقك لباب السما يا سنيه نفسي اكون معلم اد الدنيا و محلى يبقى اكبر محل عطار فى البلد
ان شاء الله يا اخويا ...بس اسمع كلامى بس انت و انت هتكبر و تبقى اد الدنيا
منا بسمع كلامك اهو و كتبت لك البيت ..مع انك مرضتيش تكتبيلى المحل بتاعك
الله هنعيده تانى يا عبده منا قلت لك مقدرش أتنازل عن محل المرحوم دا دى الحاجه اللى بقيالى من ريحته و بعدين هى مش فلوسي هى فلوسك و انا سيبالك إدارة كل شئ و لا بحاسبك و لا بقولك دا راح فين و لا دا جه منين
منا عارف يا سنيه هو انا قلت حاجه
طب خلاص امشي ورايا هتكسب...انا خلاص فضيت الدور الارضى كله هنبيع بقا المحل بتاعك و نشترى بفلوسه بضاعه هنخزنها هنا فى الشقه اللى تحت و توسع تجارتك و تبقى سيد المعلمين
بس حكايه بيع المحل دى يا سنيه خايف منها ..بقولك ايه ما تيجى منبعش المحل و ادينى الدهب اللى معاكى نجيب بيه البضاعه
نععععععم دهب ايه ؟؟؟؟.دا بدل ما تزودهولى يا اخويا عاوز تاخده ....لا يا عنيا مفيش جرام واحد هيتباع
طب منا كتبت لكى البيت يا سنيه و انتى لسه قايله فلوسي هى فلوسك
ايوه قلت بس مكنتش اتوقع تطلب منى طلب زى دا ..انا متجوزاك تصرف على مش انا اللى اصرف عليك
الله عيب كدا يا سنيه ..ايه تصرفى على دى
حقك على يا عبودى ....مش قصدى ....بقولك ايه انا عندى فكره تجيب بضاعه و فى نفس الوقت متخسرش المحل
الحقينى بأفكارك الجهنمية يا جمل انت يا جمل ....
عنيا يا روح الحمل هئ هئ هئ هئ😂
طبعا عاوزين تعرفوا فكره سنيه المستخبيه ايه 😂😂
دا اللى هتعرفوا فى الجزء السادس بإذن الله .
يتبع ......😍
#د.جيهان_عادل🤗
#زوجة_أبى
#الجزء_السادس
بقولك ايه يا عبده انا عندى فكره تجيب بضاعه و فى نفس الوقت متخسرش المحل
الحقينى بأفكارك الجهنمية يا جمل انت يا جمل ....
عنيا يا روح الحمل هئ هئ هئ هئ😂
ايه رايك تاخد قرض بضمان المحل ...تجيب بضاعه و فى نفس الوقت متكونش خسرت المحل و الفلوس اللى هتجيلك هتسدد منها القرض و تحتفظ بالمحل
و الله فكره حلوه يا سنيه بس انا عمرى ما اتعاملت مع بنوك و لا اعرف القرض دا بيتاخد ازاى
يا اخويا سهله انا لى ابن خالتى الاستاذ صالح شغال فى البنك هروح له بكرا و أسأله و اعرف لك التفاصيل
خلاص ماشي ..
يلا بقا الحمام برد ...دوق كدا عمايل اديا
تسلم اديكى يا جملى
تانى يوم سنيه قامت لبست و راحت البنك لابن خالتها و عرفت منه الإجراءات و لما ابويا جه بالليل حكت له على اللى صالح قالهولها و أنهم هيبعتوا لجنه تقييم المحل بالبضاعه اللى فيه و بعدين يحددوا قيمه القرض على أساس تمن المحل
ابويا انبسط من الكلام و مكنش عارف إن سنيه عماله تغرزه فى ديون و بلاوى هو مش قدها
و بالفعل ابويا قام تانى يوم و راح البنك و قدم على طلب بالقرض و خلص الإجراءات
احنا بقا انا و اختى كان عندنا امل نفرح امنا و نحقق لها اللى كانت بتتمناه إن إحنا نجيب مجموع كويس و نتعلم تعليم عالى ....
كنا نيجى من المدرسه لو سنيه ادتنا اكل بايت كنا نأكله و لو مدتناش كنت اخليها تنام و انزل اشترى اكل لى و لاختى من فلوس امى الله يرحمها ....بعد كدا كنا نقعد نذاكر و طبعا سنيه مكنتش بتسيبنا فى حالنا ..كانت كل شويه تضايق فينا و تسيبنا المذاكره علشان ننضف لها الشقه أو نغسل المواعين
و كانت كتير تطرد فينا علشان حاجات هايفه ...فى مره بعتت سعاد اختى تجيب لها عيش و ادتها جنيه ...سعاد اختى غلبانه فى نفسها جدا و للاسف وقعت الجنيه و قعدت تدور عليه كتير لأنها كانت خايفه من سنيه
و لما تعبت من التدوير رجعت .... سألتها سنيه عن العيش
ردت سعاد مجبتش
طب فين الجنيه ؟؟
وقع منى ملقتوش
نعععععععم وقع منك ازاى ...نهار اللى جابوكى اسود
سنيه جابت الخرطوم و نزلت ضرب فى سعاد و سعاد تصرخ و انا طلعت قدام الباب اشوف اى حد يجى يلحق اختى من ادين سنيه
جت واحده جارتنا ست طيبه كانت بتحب امى اوى و دخلت على الصريخ
الحقينى يا خالتى مرات ابويا هتموت اختى
الست طلعت جرى على فوق و مسكت ايد سنيه و هى عماله تضرب اختى و الخرطوم معلم فى كل حته فى جسمها ...و قعدت تقولها حرام عليكى يا كافره ..ازاى تضربى بنت صغيره الضرب دا كله ...عملت لك ايه ؟؟
سنيه التفتت لها و زى ما يكون تنين مجنح بيستعد يطلع من بقه كتل من اللهب أو بركان على وشك الانفجار
و انتى مالك يا وليه يا خرفانه انتى ؟؟؟ انتى ايه اللى دخلك بيتى اصلا و ايه اللى طلعك هنا ؟؟
نهارك اسود ..دا انا هوديكى فى داهيه دلوقتى
و راحت سنيه مصوته و مقطعه هدومها و خابطه دماغها فى الحيطه و لمت الشارع عليها و قالت ظبطها جايه تسرق و لما مسكتها مسكت فى قطعت لى هدومى و كانت عاوزه تموتنى.
طبعا الست قعدت تعيط و تحلف انها كدابه
و سنيه مصممه على كلامها و مصممه توديها النقطه
و الناس تحاول تهدى فى سنيه و هى ابدا ..مش راضيه
و فعلا سنيه خدت بعضها و طلعت على المستشفى عملت تقرير طبى بالعلاج اكتر من ٢١ يوم و اخدت التقرير و طلعت ع النقطه و عملت محضر فى الست
الظابط بعت لجارتنا و اتحولت للنيابه
و الموضوع كبر اوى ...و جه زوج الست يتحايل على ابويا و على الست سنيه انها تتنازل عن المحضر
ابويا كان مصدق سنيه طبعا و بقا يقول لازم مراتك تتأدب علشان بعد كدا تعرف أن كل بيت له حرمه
و الراجل يعتذر و يقوله طب انا مستعد اعمل اى حاجه بس المدام تتنازل عن القضيه
و ابويا يقوله لااااا مينفعش ابدا
هنا تدخلت سنيه و هى رابطه رأسها شبه الكوره الكفر و قالت خلاص تدفعولى الفين جنيه و انا أتنازل
الراجل انزعج جدا ....الفين جنيه كتير اوى يا ست سنيه
خلاص خلى مراتك تتحبس .انا سالت المحامى و هو قالى دى جنحه ممكن تاخد فيها من ٣ إلى ٧ سنين
بس انا ممعيش المبلغ دا كله
و انا مالى اتصرف ...عشان مراتك بعد كدا متدخلش فى اللى ملهاش فيه
طب مينفعش الف جنيه ...انا و الله هبيع اللى قدامى و اللى ورايا عشان اجيب لك الألف جنيه دى
انت بتفاصل فى طماطم يا راجل ...هما الألفين زى ما قلت ....دا لو عايز مراتك تطلع يعنى
ابويا بقا كان قاعد مدلدل ودانه لان الست احرجته بعد ما كان عمال يقول للراجل ابدا و مينفعش نتنازل
وبعد ما الراجل نزل قالها :
بس انتى احرجتينى يا سنيه
ما عاش اللى يحرجك يا اخويا ....مكنش قصدى انا جت لى الفكره لما لقيت الراجل عمال يقول أنا مستعد لاى طلب
قلت خلاص نطلع منه بقرشين نوسع بيهم المحل
يخربيت دماغك يا سنيه ...و لا خطرت لى الفكره دى على دماغ
امال انت فاكر ايه ؟؟ اللى جوه هنا مخ مش مهلبيه يا روح سنيه 🤣
حاولت اقول لابويا على الحقيقه لكن لقيت سنيه بتبرق لى و دخلت المطبخ و ندت على و راحت قرصانى من خدى و قالت انا شفتك عاوزه تقولى لابوكى ع اللى حصل ...اياكى ..عارفه لو نطقتى هتشوفى هعمل فيكى ايه
طبعا انا اترعبت و هزيت لها راسي انى مش هتكلم خالص
بعدها بيومين لقينا الراجل زوج الست جارتنا جايب الفلوس و جاى يديها لسنيه
الفلوس اهيه يا ست سنيه و الله بعت دهب مراتى و عفش بيتى و استلفت عليهم كمان عشان ادبرلك الفلوس دى
مليش فيه يا عنيه ....اللى غلط يتأدب
و انا قلت حاجه ... بس عاوزك تروحى تتنازلى عن المحضر.
بكرا الصبح أن شاء الله هروح أتنازل عشان خاطرك انت بس الراجل نزل ع السلم و سمعته و هو عمال يقول حسبي الله و نعم الوكيل فيكى يا شيخه يارب تصرفيهم على مرض لا تلاقى لكى طب و لا دوا
سنيه بعد ما الراجل نزل كانت فرحانه اوى زى ما يكون انتصرت فى موقعه حربيه
دخلت على ابويا و قالت له شوفت يا عبده ذكائى ؟؟
خد الألفين جنيه أهم هات البضاعه اللى نفسك فيها
تسلم دماغك يا سنسونتى يا حلوه
طبعا كلكم عايزين تعرفوا سنسونه و عبده عملوا ايه بعد كدا ؟؟...استنونى فى الجزء السابع بإذن الله
يتبع .........☺️
#د.جيهان_عادل🤗
أزال المؤلف هذا التعليق.
ردحذف