مشيت و سبت عبده و انا دماغى هتنفجر ..اما اللى جالى امبارح ده مش عبده امال مين ؟؟؟؟
طب لو الكلام ده صحيح مين اللى ولع النار فى مطبخى ؟؟ انا متأكد انى مسبتش النار مفتوحه
اااه دى بقا قرصه الودن اللى قالى عليها ...بس الحمد لله عبده جه انقذنى مع أنه مش فاكر
اليوم مر عليا عادى جدا كأى مدرس لغه انجليزيه محترم و كان جدولى الحصه الاولى للصف الثانى الاعدادى و الحصه الاخيره للصف الاول الاعدادى
محاولتش افكر تانى فى جنابور اصل انا مش ناقص المره دى قرص ودنى أنه ولعلى فى كرسى المره الجايه هيولع فيا انا شخصيا
البنات ابتدت تقف و تقول على اسمها و انا مستنى بفارغ الصبر انى اوصل للبنت اللى شبه آيه دى
جبنا لها شيوخ كتير و محدش قدر عليه . كمان كنت سامعاه بيتكلم عن حد قريبك اسمه حسن أنه عاوز يخلص منك
مشيت و انا بكلم نفسي وكبرت فى دماغى هو الحج جنابور ده حاططنى فى دماغه ليه ؟؟ و ايه حكايه حسن اللى عاوز يأذينى ده ؟؟ معروف أن الجن بيكدب و ممكن تكون دى تأليفه من دماغه
طب و انت كنت عاوز العنوان ليه يا سي عمر ؟؟ هتروح تعملهم ايه ؟؟ خليك فى حالك و حيات ابوك
ايوه ...بعد ما مرات خالك ماتت بخمس سنين كدا خالك الاستاذ حسن أجر الشقه لراجل و مراته الناس دى كانت كويسه اوى و الراجل كان ايده سخيه ابويا كان حكيلى لانه هو اللى كان ماسك العماره ساعتها
و فى يوم صحيوا على أن الست قطعت شرايين أيدها و لولا جوزها لحقها كانت راحت فيها ...بعد كدا الراجل خد مراته و مشي على طول و كان فى كلام ساعتها أن اى حد بيسكن الشقه دى بيأذى نفسه
و النعمه ما حصل دا انا كنت بكلم نفسي بس ...روحى يا مايس روحى الله يرضى عليكى زمرده بتنده عليكى
هقولك انا ......عارف ال........
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧
#الجزء_الحادى_عشر
عمر انا احبك
يا صلاة النبى احسن ...حبتك العافيه و الفطيره الدافيه يا اختى ...روحى الله يسترك
طب و مش عاوز تعرف الحكايه يا عمر ؟؟
اه عاوز بس هعرفها ازاى ؟
هقولك انا
و انا ايه اللى يأكد لى كلامك ..ما انتى وعدتينى قبل كدا انك هتمشي و ممشتيش
لا انا خلاص انتهى اقترانى بالمكان فعلا لكن بالأشخاص لا
مش فاهم
يعنى كما قلت لك احبك عمر
بقولك ايه يا مايس هو انتى عندك كام سنه ؟؟
٤٠٥ سنه فقط
فقط ؟؟ دا انتى صغنونه اوى ...هى ليله سودا انا عارف
لماذا ؟
متاخديش فى بالك ...طب انا عاوز اسالك عن الراجل و الست اللى جم سكنوا هنا فاكراهم ؟؟
اى نعم
الست بقا فعلا قطعت شرايين أيدها ؟؟
اى نعم
و ليه بقا ؟؟ ايه اللى حصل يعنى ؟؟
لقد وسوست لها
يا حلاوتك يا جمالك خليتى للحلوين ايه ...ووسوستى لها ليه بقا يا ست مايس
لانى لا اريدها
كلمينى بالعاميه يا اختى انتى محسسانى انى قاعد مع مذيعه فى قناة النيل الثقافيه
عاوز ايه يا عنيا ؟ يعجبك كدا ؟
ايواااا كدا كلمينى زى ما بكلمك ...ليه بقا انتى مكنتيش عاوزاها ؟؟
خالك أجر الشقه دى مفروشه يعنى بنفس العفش اللى فيها ده بس كان شايل صور خالك و مراته فوق الدولاب ...هو بقا راح أجرها لراجل و ست و انا الصراحه مبحبش الستات و الست دى كانت بتتدلع على جوزها اوى ..و هو كان يحبها اوى غيرت من معاملته لها
ايه دا ؟؟ هو انتوا بتغيروا زينا ؟؟
ايوه طبعا و غيرتنا ناااار
يا صلاه النبى ...كملى يا اختى كملى
مفيش الست كانت مريضه و زوجها كان بيسهر طول الليل جنبها و كان زعلان اوى عشانها بدأت اوسوس لها انها عبء عليه و انها هتفضل مريضه كدا لمده طويله و أنها لازم متكونش انانيه و تسيبه يعيش حياته و جبت لها كذا فكره انتحار فى دماغها و سهلت لها اكتر انى جبت موس من امواس حلاقة زوجها حطيته جنبها على الكومودينو ....خليت حالتها النفسيه سيئه جدا لحد ما قطعت شرايينها
بعد ما مشيوا نزلت الصوره الكبيره اللى موجوده فى اوضه نوم خالك و علقتها مره تانيه.... لان دى صوره سيدتى و هى سبب وجودى هنا
و بعد كدا منعت اى ست تسكن الشقه دى لغايه ما جيت انت
اعوذ بالله منك ....طب و مرات خالى ؟؟
لا مرات خالك لها قصه مش هتصدقها
و مش هصدقها ليه يا اختى ؟؟ هتكون اكتر من اللى بتحكيه دا يعنى ؟
عمر عاوزه اطلب منك طلب قبل ما اتكلم
اتفضلى يا مايس
ملكش دعوه بجنابور خالص ...متقربش لآيه نهائى
انتى هتغيرى عليا و الا ايه ؟؟
لا يا عمر الموضوع اكبر من انى اغير عليك
ليه يعنى ؟؟
انت عارف سبب رجوعى لك ايه ؟؟
لا مش عارف
سبب رجوعى أن جنابور كان هيولع فى الشقه
اه منا عارف بس عبده الله يستره لحقنى
عبده كان نايم يا عمر
نعم ...امال مين اللى جه انقذنى ...اوعى تقولى انتى يا مايس
ايوه يا عمر انا اللى انقذتك و خبطت عليك عشان افوقك من النوم و تلحق الشقه قبل ما تولع
كنتى خايفه ع الشقه و الا عليا ؟؟ قولى الصراحه يا بت
كنت خايفه عليك طبعا
انا متشكر اوى يا مايس مكنتش اعرف انك بالنبل ده
لانى احبك عمر
ما علينا ...محكتليش بقى عن مرات خالى
لا انا مش هحكيلك انا هخليك تشوف بعنيك
لا يا مايس ارجوكى
ترجونى ليه ؟؟
لا مش عاوز اموت
و ايه اللى جاب سيرة الموت دلوقتى يا عمر؟؟
مرات خالى دى ميته و انتى بتقولى هتخلينى اشوف بعينى
هههههههههه لا انت فهمت غلط انا قصدى هخليك تعرف الحكايه منها
يا خبر اسوح لا الله يخليكى
مالك يا عمر ؟؟
يعنى هتخلى عفريت مرات خالى يحضر ...و انا الصراحه بخاف من العفاريت
لا و الله ...امال اللى قدامك دى تبقى ايه ؟؟ اكونش خنفسه و انا مش عارفه
خنفسه ؟؟ انتى كمان عرفتى الخنفسه ؟ دا انتى طلعتى عفريته صايعه بقا
بتقول ايه ؟؟
مبقولش يا ست خنفسه قصدى يا ست مايس
يا عمر افهم... انا مش هحضر عفريت مرات خالك زى ما بتقول انا هخليك تقرا اللى هى كاتباه بخط أيدها و حاكيه فيه كل حكايتها لحد قبل ما تموت على طول
ااااه طب مش تقولى كدا يا شيخه ..سيبتى ركبى الله يسيب مفاصلك
نعم ؟
بهزر ...متعرفيش الهزار ؟فين بقا المذكرات اللى بتقولى عليها دى ؟ و ازاى محدش لقاها رغم مرور السنين دى كلها ؟
محدش لاقاها لأن ببساطه مرات خالك كانت مخبياها علشان عارفه انها لو وقعت فى ايد حد معين هيحرقها و مش هيكون لها أثر
طب و ليه مرات خالى تعمل كدا ؟
من مذكراتها هتفهم كل حاجه
فين المذكرات دى يا مايس ؟؟
المذكرات كانت جنب كتاب سحر الاسحار فى الفتحه اللى تحت المرايه فى السقف
لا طبعا انا جبت الكتاب و مكنش فى حاجه جنبه
لا موجوده بس هى جوه شويه و انت مأخدتش بالك منها لانك كنت مشغول اوى بصرفى
صراحه ايوه انا كنت عاوز اخلص منك بأى طريقه
كدا يا عمر ؟؟
اكدب يعنى ؟؟ هى دى الحقيقه
طب خلاص روح هات المذكرات و هسيبك تقراهم لوحدك ..سلام يا عمر
سلام و رحمة الله و بركاته يا اختى
مايس مشيت و انا جبت كرسي بسرعه و طلعت حركت المرايه و لقيت فعلا اجنده محطوطه جوه اوى
مديت ايدى مكنتش طايلها ..نزلت اخدت عصايه المقشه و قعدت احركها لحد ما قربت منى و وقعت فى ايدى
الأجندة كانت مليانه تراب و عنكبوت وورقها اصفر اوى
اخدت المذكرات و نزلت من على الكرسي و عملت كوبايه شاى و فتحتها عشان اقرا اللى فيها
طبعا كلكم دلوقتى عاوزين تعرفوا ايه اللى مكتوب فى المذكرات دى ؟
دا اللى هتعرفوه بكرا باذن الله تعالى
يتبع 😎
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧
#الجزء_الثانى_عشر
اخدت المذكرات و نزلت من على الكرسي و عملت كوبايه شاى و فتحتها عشان اقرا اللى فيها
الكلام المكتوب فى الاجنده كان بقلم جاف ازرق بس اللون بهت اوى و بعض الأوراق اتقطعت من كتر الركنه
فتحت اول صفحه لقيت مكتوب فيها
انا صفيه احمد المرجوشي
غالبا يا من تقرأ كلامى الان ستقرأه و قد انتقلت الى رحمه الله
انا بس عاوزه اكتب اللى بيحصلى
اللى بيحصل لى حاجات غريبه اوى ...مش عارفه هى بتحصل ليه ؟
بس اللى اعرفه انى حاسه انى هموت قريب اوى
حاساهم حواليا فى كل مكان ...فى أوضة النوم ، فى المطبخ ، فى الحمام
انا خلاص هتجنن ، مش عارفه اتصرف
ياريتك ما سبتنى يا مصطفى
و مصطفى موجود مكنش حاجه تجرؤ انها تدخل هنا .بس دلوقتى لا
لو اقولكم على اللى بشوفوا هتموتوا فى جلدكم
انا بشوف حاجات كتير اوى مرعبه و اعصابى خلاص معدتش مستحمله
الحكايه بدأت بعد موت مصطفى جوزى
تعبت جدا و كنت حاسه ان دى نهايه العالم
مصطفى مكنش جوزى و بس
مصطفى كان ابنى اللى مخلفتوش ، ابويا اللى ربانى ، صاحبى و حبيبي
انا اعرف مصطفى من و انا عندى ١٤ سنه
من اول ما فتحت عينى على الدنيا مشفتش غيره قدامى
انا اتربيت على ايده و علمنى كل حاجه
كنت بشوف الدنيا بعينه هو
مصطفى سفرنى معاه بلاد كتير اوى و فرحنى الفرح اللى محدش فرحه لحد لدرجه ان القريب كان بيحسدنا قبل الغريب على سعادتنا دى
انا اتجوزت مصطفى و انا عندى ١٧ سنه ، قضيت معاه احلى عشر سنين شفتهم فى حياتى
كأنى كنت بحلم ...مش ممكن مصطفى ده يكون انسان عادى دا اكيد كان ملاك عايش ما بينا
صدمتى فى وفاة مصطفى متتوصفش
مصطفى كانت صحته كويسه جدا و كان بيخطط ازاى هنسافر سوا لبنان علشان نقضى عيد جوازنا العاشر هناك
دخل عليا مصطفى و انا بحضر الشنط
فى اليوم ده مصطفى فاجأنى بمفاجاه مكنتش اتخيلها
تعالى يا صفصف لما اقولك
نعم يا صاصا ...انا جهزت كل حاجه و جاهزه على السفر غدا صباحا بمشيئه الله
كل سنه و انتى طيبه يا حبيبتى
و انت طيب يا حبيبي
سعيده معايا يا صفيه ؟؟
كلمه سعيده دى تعتبر كلمه صغيره اوى على اللى حاساه يا مصطفى انا ابقى ظلمتك لو قلت انى سعيده و بس
طيب الحمد لله شهادتك دى مهمه اوى قدام ربنا سبحانه و تعالى لما اروح عنده
اخص عليك يا مصطفى متجبش سيره الكلام الوحش ده على لسانك
خلاص يا ستى متزعليش
اوعدنى يا مصطفى انك هتفضل معايا لاخر العمر
اوعدك يا ستى انى هكون معاكى لآخر عمرى
برافو عليك انا كدا حبيتك اكتر
حبتينى اكتر ؟ طب اتفضلى يا ستى
ايه دا يا مصطفى ؟؟
دا عقد الشقه بتاعتنا دى انا كتبتها باسمك
ايه ؟؟ ازاى كدا ؟؟ ليه تعمل كدا ؟؟
مالك بس اهدى ..انتى مالك يا ستى دى شقتى و انا حر فيها
بس دا شقى عمرك كله حطيته فيها يا مصطفى ازاى تكتبها باسمى ؟
طب امسكى دا كمان
ايه دا كمان ؟
دى الأرض اللى ورثتها كتبتها باسمك هى كمان ؟
انت ازاى تعمل كدا يا مصطفى ؟ انا مش عاوزه حاجه من دا كله ..انت عندى بالدنيا
بقولك ايه يا صفيه هو مش احنا الاتنين واحد برده ؟؟
طبعا يا مصطفى
طب خلاص مكبره الموضوع ليه بقا
يا مصطفى انا لسه مخلفتش
انتى مجنونه ؟؟ و مال الخلفه باللى انا عملته دا ؟
يعنى يا مصطفى يمكن مخلفش و تتجوز و تخلف ساعتها هتندم على اللى عملته ده
خدى يا بت هنا ...انتى بتقولى ايه ؟؟ انا اتجوز عليكى انتى يا عبيطه ؟؟ و بعدين يا بت ما انتى بنتى ..دا انا اللى مربيكى على ايدى
ربنا يخليك ليا يا مصطفى و ميحرمنيش منك ابدا بس يمكن لو اخواتك عرفوا يزعلوا
و هما مالهم يا صفيه دى فلوسي و انا حر فيها و بعدين ما انتى عارفه انى سبت كتير من حقى عشان خاطر ابويا الله يرحمه و الحمد لله ربنا عوضنى بيكى انتى عندى بالدنيا كلها .......يلا بقا عشان ننام عشان هنقوم الفجر
نمنا الليله دى و صحيت الفجر على صوت المنبه
قوم يا طاطا المنبه عمال يضرب بقاله خمس دقايق ...قوم يا كسلان ميعاد الطياره هيروح علينا
مصطفى مصطفى
و كانت صدمتى متتوصفش بقيت أجرى فى الشقه كلها زى المجنونه
هو ليه مبيردش عليا ؟؟؟ هو اكيد تعبان شويه بس مش ممكن يكون ...لا لا لا
صرخت بأعلى صوت
فتحت باب الشقه و بقيت اخبط على الجيران زى المجنونه
الجيران اتلمت و كان لنا جار دكتور دخل جرى يشوفه و لقيته بيقولى البقاء لله
انت بتقول ايه ؟؟ مصطفى ممتش انت مجنون ؟؟ اطلع بره ...اوعى تقول مات
مصطفى ممتش مش ممكن يموت لا
هو قالى أنه مش هيسبنى ...قوم يا مصطفى قولهم انك مش هتسبنى
قوم قولهم إن إحنا رايحين لبنان
قوم قوم
و للاسف مصطفى مقمش و سابنى و راح
مش هسامحك ابدا يا مصطفى انك سبتنى و مشيت انت وعدتنى و خلفت
طبعا بعد كدا جالى انهيار عصبى و دخلت المستشفى و قعدت فيها شهرين
رجعت شقتى بعد الشهرين و كل حته فيها بتفكرنى بيه
هنا كنا بنضحك ..هنا كان بيساعدنى فى المطبخ ...هنا كان محضرلى الفطار
تعبت اوى اول ما دخلت الشقه ..و افتكرت كلام الدكتور بتاعى أنه قالى لو حسيتى بتوتر خدى من العلاج ده
طلعت المهدئ اللى كتبهولى الدكتور و اخدته
بعد شويه كنت قاعده مطرحى على كرسي الانتريه و اعصابى هاديه بس عنيا بتنزل منها الدموع من غير اى صوت
شفته ...شفت مصطفى واقف قدامى فى الصاله عند الباب
اول ما شفته قمت اتنطرت من مكانى و فرحت اوى و جريت ناحيه الباب لكنه اختفى
و فجأة سمعت جرس الباب بيرن
مين اللى هيجيلى ؟؟ دا انا خلاص معدش ليا حد بيسأل عليا
فتحت الباب لقيت حسن اخو مصطفى
مساء الخير يا صفيه
مساء الخير يا حسن اتفضل
البقاء لله ..معلش معرفتش اعزيكى لأنهم نقلوكى على المستشفى على طول ..بس انا كنت بتابع بالتليفون و عرفت انك خرجتى انهارده
البقاء لله يا حسن
المرحوم قطع فينا اوى يا صفيه
المرحوم ؟؟ قصدك مصطفى ؟؟ مصطفى ممتش انا لسه شايفاه دلوقتى قبل ما انت تيجى على طول ...كان واقف هناك
لا حول و لا قوة الا بالله
مش مصدقنى ؟؟ بقولك مصطفى كان هنا انا شفته بعينى
شفتيه ازاى بس و انا دافنه بايدى
متقولش كدا ...يلا قوم قوم روح ايه جايبك هنا عندى ..قوم
انا لولا مراعى الحاله اللى انتى فيها كنت زعلت دلوقتى بس معلش علشان خاطر عضم التربه
تربه ايه ؟؟ بقولك قوم يلا ....مصطفى زمانه جاى
ايه اللى قوم قوم ..انتى ناسيه يا حلوه انى ليا انا و اختى تلات اربع الشقه دى ...انتى يدوب لكى الربع بس يعنى انا اللى اقول مين يقوم و مين يقعد
انت بتقول ايه ؟؟
زى ما سمعتى كدا ...و أن كنتوا اخوات اتحاسبوا
امشي اطلع بره
انتى بتطردينى عشان بطالب بحقى ؟؟
انت راجل معندكش دم
هو اللى يطلب حقه فى الزمن ده يكون معندوش دم ؟؟؟ انا هوريكى يا صفيه يا بنت المرجوشي...إن ما خرجتك منها من غير حاجه ميكونش انا حسن و شنبى دا مش هيكون على راجل لو منفذتش
بره ... بره
خرج حسن و انا منهاره و جسمى كله بيترعش
انا عرفت دلوقتى بس مصطفى عمل ليه كدا و كتب كل حاجه باسمى...كان عندك حق يا مصطفى 😢.
يتبع 😎
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧
#الجزء_الثالث_عشر
خرج حسن و انا منهاره و جسمى كله بيترعش
انا عرفت دلوقتى بس مصطفى عمل ليه كدا و كتب كل حاجه باسمى...كان عندك حق يا مصطفى 😢.
ايه الكلام المكتوب ده ؟؟؟ لما الشقه باسم مرات خالى ازاى خالى حسن أدى لامى حقها فى الشقه ؟؟؟
لا كدا الموضوع عاوزله فنجان قهوه عشان اعرف اصحصح قبل ما اكمل المذكرات دى
قمت عملت القهوه و خدت المذكرات و قعدت على السرير و ابتديت أكمل قرايه :
بعد ما حسن سابنى و مشي باسبوع جالى محضر بإعلام وراثه على الشقه و اتحددت جلسه لحصر أملاك مصطفى الله يرحمه
فى الفتره دى اتصل بيا حسن اكتر من مره و كان عاوز يساومنى و بقى يجر ناعم معرفش ليه ...يمكن عرف أن اخوه كتب كل حاجه باسمى أو لا... الله اعلم
جه يوم الجلسه و قدمت الاوراق اللى تثبت ان الارض و الشقه باسمى انا
فى اليوم ده شفت فى عين حسن نظره عمرى ما شفتها قبل كدا
نظره زى ما يكون عاوز يقتلنى
روحت البيت و جوايا شعور سيئ أن فى حاجه هتحصل بس مش عارفه ايه هى
تانى يوم كنت قاعده كعادتى من يوم ما مات مصطفى على الكرسي الهزاز بتاعه و فى ايدى صورنا سوا بتفرج عليها للمره الالف و بفتكر مع كل صوره مناسبتها و اقعد اضحك على كلامه اللى كان بيقولهولى وقت الصوره
فجأه سمعت جرس الباب بيضرب افتكرته البواب لانى كنت باعتاه يجيب لى شويه طلبات
فتحت الباب لقيت حسن قدامى
اول ما شفته معرفش ليه قلبى انقبض و حسيت أن ملك الموت جاى يخطف روحى
ممكن ادخل يا صفيه ؟؟
اتفضل
انا جاى اعتذر عن اللى حصل منى بس انتى مفهمتنيش أن المرحوم كتب لك كل حاجه
و لا يهمك خلاص ....انا مش زعلانه
انا كان ممكن اطعن فى الورق اللى انتى مقدماه و اعمل معاكى مشاكل برده بس انا مرضتش اعمل كدا
و ماله عاوز تطعن اتفضل اخوك بايع لى كل حاجه و موثق ده فى الشهر العقارى بنفسه
لا انا مش هطعن و لا حاجه انا عاوز نبقى حبايب و اعتبرينى زى مصطفى
اعتبرك زى مصطفى ازاى يعنى ؟؟
يعنى لو عوزتى اى حاجه انا تحت امرك
كتر خيرك انا مش محتاجه حاجه من حد
سكت حسن شويه و قالى طب مش هتعمليلى حاجه تضايفينى انا عارف انك كريمه
حاضر ...تشرب ايه
فنجان قهوه من فضلك
قمت عملت القهوه و رجعت حسيت بحركه كدا من حسن زى ما يكون قام و قعد تانى بسرعه اول ما حس انى جايه
مجاش فى بالى ساعتها هو ممكن يكون عمل ايه ..أو قام ليه
المهم قدمت القهوه و قعدت لقيته بيفاتحنى فى موضوع مخطرش على بالى ابدا
بقولك ايه يا صفيه
نعم يا حسن
انا عاوز افاتحك فى حاجه كدا بس متفهمنيش غلط
و افهمك غلط ليه ؟
انا عاوز اتجوزك على سنة الله و رسوله
نعم انت بتقول ايه ؟؟ دا اخوك مبقلهوش اربع شهور ميت
الحى ابقى من الميت يا صفيه و بعدين عشان خاطر اخويا انا عاوز أحافظ عليكى و مش عاوز اى راجل غريب بعده يبهدلك
و مين قالك انى هتجوز بعد مصطفى اصلا
بلاش شغل الافلام ده يا صفيه انتى لسه صغيره و اكيد هتحتاجى راجل فى حياتك
و الراجل ده انت يا حسن ؟؟؟
ايوه و ليه لأ
طب و مراتك و اولادك ؟؟
و ايه يمنع انى اتجوز على مراتى و تكونوا انتوا الاتنين على ذمتى
لا و الله ...و هتقول لمراتك بقا على كدا ؟ و الا هتعملها من وراها
لو عاوزانى اقولها اقولها ...بس انا رايى انها متعرفش حاجه ...دا لمصلحتنا جميعا
قصدك لمصلحتك انت ..قلت مطلعليش ورث من اخويا اما أورث مراته و هى حيه
انا ؟؟؟؟ لاحظى أن كلامك جارح
جارح ايه و زفت ايه يا اخى ...دا انا لحم اخوك ...عاوز تعض فى لحم اخوك ؟؟...و على العموم ريح نفسك يا حسن اللى هيورث مصطفى ابنه اللى من صلبه
ابنه ؟؟؟؟ انتى حامل ؟؟؟
ايوه حامل و أن شاء الله ابنه هو اللى هيحافظ على مال أبوه
حامل ؟؟ يعنى قعدتى مع اخويا عشر سنين و بعد ما مات جايه تقولى حامل ؟؟
اخرس يا كلب .. انا حامل فى الخامس يعنى كنت حامل شهر لما مصطفى مات و انا معرفش
لا و الله و انا بقا مفروض اصدق الكلام ده ؟
امشي اطلع بره مشوفكش هنا تانى تصدق و الا عنك ما تصدق يلا غور فى داهيه
بتطردينى تانى يا صفيه ؟؟؟ حااااااااضر و دينى و ما أعبد لاخليكى يا صفيه تتمنى الموت و متلاقيهوش
بعد اليوم ده اتقلبت حياتى لجحيم معرفش بقا هو عمل ايه ؟؟ أن كان سحر و الا غيره الله اعلم بس بقيت اشوف حاجات بشعه و يحصلى حاجات غير طبيعيه
الموضوع بدأ ..
🌺🌺🌺🌺
للاسف نمت و انا بقرا المذكرات و صحيت من النوم متأخر قمت لبست و جريت على المدرسه لقيت المدير واقف قرب الباب
متأخر ليه يا مستر عمر
معلش يا فندم راحت عليا نومه
بعد كدا ابقى اظبط منبه التليفون يا مستر و متتكررش مره تانيه من فضلك
حاضر ...انا اسف
دخلت المدرسه و كان عندى الحصه الاولى فى فصل آيه
بقيت داخل اقول انا مليش دعوه بالبت دى ...اما مش هاجى جنبها خالص و لا حتى هسألها اى سؤال
دخلت الفصل ...عينى وقعت على ايه مباشره لان شكلها كان غريب اوى وشها وارم و منفوخ و لونه مزرق عينيها تقريبا مقفوله ...شكلها فظيع زى ما يكون اتوبيس داس على وشها
انا شفتها كدا و تنحت معرفتش انطق
البت ابتدت تعيط بس مكنش بينزل من عينها دموع زى دموع البنى ادمين العاديه دى لا دا كان نازل منها دم
اه و الله زى ما بقولكم كدا
البنات اللى حواليها اول ما شافوا كدا بدأوا يصرخوا و يجروا بره الفصل
و مفضلش غيرى انا و هى فى الفصل لوحدنا
فجأة لقيت آيه بقت قدامى فى لمح البصر معرفش ازاى ...المفروض هى قاعده فى اخر الفصل يعنى تاخد لها ربع و الا نص دقيقه كدا على ما توصلى
لا بقا ...دا انا لقيتها قدامى تقولش مصاص الدماء اللى بنشوفه فى الافلام ده و حركته سريعه 🤔
يخربيت ابوكى قطعتى خلفى ...انا لولا الملامه و لولا مسكت نفسي كان ممكن اعمل حاجه معملتهاش من سنين كتير من ايام ما كنت طفل رضيع فى حضن الحاجه الله يمسيها بالخير
البت قربت وشها من وشي و سمعت صوت تخين جدا بيقولى خاف على حياتك و متقربش منها
استجمعت شجاعتى و قلت له ......
يتبع 😎
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧
#الجزء_الرابع_عشر
البت قربت وشها من وشي و سمعت صوت تخين جدا بيقولى خاف على حياتك و متقربش منها
استجمعت شجاعتى و قلت له مش عاوز حياتى دى
انا قلت كدا و لقيت قلم نزل على وشي من قوته افتكرت أن ودنى طارت ..حاجه كدا خلت ودانى تصفر
من قوه القلم وقعت على المكتب اللى ورايا
عقبال ما ملكت نفسي و قمت مره تانيه ملقتش البت قدامى
قمت اتطمن على نفسي و على صف سنانى سليم ؟؟؟ ....اه سليم الحمد لله
اخدت كتبى و خرجت بره الفصل و انا حاسس ان الدنيا بتلف بيا ...لقيت واحده من بنات الفصل جايه عليا و بتقولى المدير عاوزك يا مستر
رحت للمدير لقيت بنات الفصل كلهم واقفين عنده و بيشتكولوه أنهم خايفين من ايه و لازم ينقلها فصل تانى أو تسيب المدرسه خالص
المدير سألنى عن اللى حصل و انا حكيت له اللى شفته بس طبعا مقلتلوش على القلم عشان منظرى قدام البنات
المدير هدى البنات و قالهم هنشوف موضوع آيه ده
خرجت من عند المدير و انا حاسس انى مش مظبوط عاوز ظبط زوايا و عجل 😂
قابلتنى سما عند البوابه
يا مستر يا مستر
سلام قول من رب رحيم
انا سما يا مستر
عاوزه ايه يا ست سما مش كفايه اختك
اختى مسكينه يا مستر
امال مش مسكينه ؟؟ و مين اللى عمل فى وشها كدا ؟؟
هيكون مين يا مستر هو بيغير عليها و دايما يخلى شكلها وحش عشان محدش يبص لها
و الله ؟؟ طيب انتى عاوزه منى ايه دلوقتى ؟؟
عاوزه اقولك أنه خايف منك
يا سلام ...خايف منى ؟؟ ( دا لسه رازعنى قلم دلوقتى تولنى )
اه و الله يا مستر انا سامعه اختى و هى بتكلمه بالليل و بتقوله انت خايف من عمر ده كدا ليه ؟؟
ها ...و رد عليها ؟؟
ايوه بيرد بس جواها انا مبسمعوش
بت انتى بلاش مناخوليا انا مش ناقصك انتى و اختك ابعدوا عنى
سبت البت و مشيت و قعدت افكر فى كلامها
معقول جنابور ده خايف منى ؟؟
ممكن كلام سما يكون حقيقه لانه لولا خايف منى مكنش جه عشان يحذرنى و مكنش رزعنى القلم المعتبر ده .
وصلت البيت و انا كلى شوق انى اكمل مذكرات مرات خالى
انا حاسس ان مرات خالى دى وراها سر كبير ...و بعدين انا امبارح قريت انها حامل طب فين ابن خالى ده ؟؟؟
اكيد هعرف من المذكرات اقوم بس اكل لقمه كدا و اعملى كوبايه شاى و اقعد اقرا على رواقه بقا
🌺🌺🌺🌺
انا وقفت لغايه فين ؟؟؟ ايوه لغايه ما بقت تشوف حاجات غير طبيعيه🤔
بعد اليوم ده اتقلبت حياتى لجحيم معرفش بقا هو عمل ايه ؟؟ أن كان سحر و الا غيره الله اعلم بس بقيت اشوف حاجات بشعه و يحصلى حاجات غير طبيعيه
👇👇👇
الموضوع بدأ لما دخلت الحمام فجأه و انا باخد دش و مغمضه عنيا بفتح لقيت كوره شعر سودا ضخمه جدا ملهاش ملامح واققه قدامى ..اول ما شفتها فضلت اصرخ لغايه ما وقعت من طولى
فوقت بعد دقايق لقيت اديا كلها دم معرفش الدم ده جه منين غسلت اديا بسرعه و خرجت من الحمام و انا بجرى دخلت اوضتى و انكمشت على نفسي فى سريرى و انا مش مصدقه اللى شوفته بعينى
للاسف انا يتيمه و مليش حد اتكلم معاه
ابتديت اشغل قرآن و افتح انوار الشقه كلها و كنت خايفه انام
كل شويه اتخايل بحد ماشى فى الصاله اغطى وشى بسرعه و اقرى كل اللى حافظاه من القرآن
بعد كدا اتطورت الاعتداءات و بقيت اصحى الاقى جسمى متعور ...خربشات كبيره زى ما يكون بمخالب فى كل جسمى
انا كنت خايفه على ابنى اللى فى بطنى اكتر من خوفى على نفسي ...كنت خايفه يأذوه و معرفش احميه
الموضوع زاد اكتر لما قمت من نومى فى يوم على صوت تحت سريرى
الصوت عامل زى ما يكون حاجه بتقرض زى الفار بس بصوت عالى جدا
بصيت و انا خايفه اوى شفت منظر عمرى ما انساه فى حياتى
شفت جثه اه و الله جثه بطنها مفتوح و طالع كل أحشائها الداخليه لبره و لمحت دود ابيض كبير منتشر فوقها و لقيت اتنين شكلهم بشع جدا جدا ساندين على أيديهم و بياكلوا من الجثه دى اول ما حسوا انى ببص عليهم سابوا الجثه و بدأوا يزحفوا و يطلعولى من تحت السرير
انا شفت كدا و طرت من مكانى و جريت على الباب
خرجت بسرعه و بقيت اصرخ اصرخ الجيران اتلمت و سالونى حكيت لهم على اللى شفته طبعا كلهم بقوا يعوجوا بوقهم و مش مصدقين و بقيت اسمعهم بيهمسوا لبعض انى اعصابى تعبت بعد موت جوزى
قلت لهم طب ادخلوا شوفوا بنفسكم
اتنين من جيرانى الرجاله دخلوا معايا يشوفوا اللى بحكى عليه
دخلت وراهم و انا بشاور لهم على الاوضه و بقولهم تحت السرير هناك
واحد منهم رفع الملايه ملقاش اى شئ
و ساعتها بصولى كأنى فعلا اتجننت
خرجوا بره و سمعتهم بيقولوا لبقيه الجيران أن مفيش حاجه جوه ...و انها اكيد كانت بتحلم
معقوله كنت بحلم ؟؟؟ لا انا متأكده انى شفتهم بعينى ...انا خايفه انام فى الاوضه دى
اخدت بعضى و رحت الاوضه التانيه
قعدت فتره طويله اوى على ما عينى غمضت
الايام دى مبقتش اكل و لا اشرب و بقت حالتى صعبه جدا و كمان انا حامل يعنى كنت فى منتهى الضعف
بعد اسبوع واحد من الحادثه دى و بعد ما كنت مش قادره اقوم من على سريري من قلة النوم و قلة الاكل
عينى زى ما يكون راحت فى النوم ...مش قادره لحد دلوقتى احدد هل انا كنت نايمه فعلا و الا لا
بس لقيت النور قطع مره واحده و لقيت باب الاوضه بيتفتح
انا اتجمدت فى مكانى و لقيت الاتنين اللى شفتهم تحت سريرى بيزحفوا على الأرض و شكلهم بشع
وشهم زى وش الهيكل العظمى شعورهم طويله و نازله على جزء من وشهم لسانهم طويل جدا و بيلعب زى ما يكون تعبان
حاولت اقوم من مكانى مقدرتش حسيت انى متكتفه
كنت هموت من الرعب و انا شايفاهم جايين ناحيتى
حاولت اصرخ مقدرتش
بيقربوا ...بيقربوا اكتر ...وصلوا السرير ..بيتسلقوا
واحده من الناحيه دى و واحده من الناحيه التانيه
عاوزه اصرخ مش قادره
واحده منهم خبطت على بطنى...بطنى اتفتحت قدامى
يا الله ...انا شايفه ابنى
التانيه مدت ايدها جوه بطنى و طلعوا ابنى
ابتدوا الاتنين ينهشوا فيه كأنه فريسه
ابنى ...لااااااا ....ابنى
فجاه فتحت عنيا لقيت بطنى مقفوله و مفيش حد حواليا حمدت ربنا و قلت اكيد كنت بحلم
حاولت اقوم لقيتنى غرقانه فى بركه من الدم ...السرير كله غرقان دم ....صرخت صرخت منا مش فاهمه الدم ده جه منين
الجيران قعدت تخبط عليا
قمت و انا هدومى كلها دم و بجرجر فى رجليا فتحت الباب
اول ما فتحت وقعت من كتر النزيف و من قلة الاكل
الجيران نقلونى المستشفى بسرعه و هناك قرر الطبيب أن دى حاله اجهاض
طبعا حالتى كانت خطيره جدا و كنت خلاص بين الحيا و الموت
قعدت فى غيبوبه تلات ايام بعدها فقت و حطونى تحت الملاحظه اسبوع لحد ما بدأت اتعافى مره تانيه
الصراحه انا مكنتش عاوزه اتعافى و لا ارجع للشقه مره تانيه و خصوصا بعد ما فقدت اخر حته ليا من مصطفى 😔
يتبع 😎
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧
#الجزء_الخامس_عشر
قعدت فى غيبوبه تلات ايام بعدها فقت و حطونى تحت الملاحظه اسبوع لحد ما بدأت اتعافى مره تانيه
الصراحه انا مكنتش عاوزه اتعافى و لا ارجع للشقه مره تانيه و خصوصا بعد ما فقدت اخر حته ليا من مصطفى 😔
رجعت البيت و انا كلى حزن ..خلاص معدش ليا حد فى الدنيا دى ...انا وحيده
و مع ذلك الحاجات اللى بتظهر لى دى مش راضيه ترحمنى ..كل شويه اشوف حد منهم واقف أو قاعد قدامى
بقيت بشوفهم فى كل مكان ...فكرت اتخلص منهم ازاى ؟ بس انا لما قلت إن فى حاجات من دى الناس مصدقونيش يبقى انا لازم اتصرف بنفسي
رحت سور الازبكيه و قعدت اسال عن كتب قديمه عن السحر
قعدت الف كتير اوى لحد ما دلونى على بياع عجوز عنده كتب تراث و كتب قديمه جدا
سألته عن كتاب سحر بص لى من فوق لتحت من تحت نضارته و قالى عاوزاه ليه ؟؟
قلت له عاوزاه و خلاص
معنديش
طب الاقيه فين من فضلك
معرفش
يعنى مدورش ؟؟
و انا مالى ..دا مش شغلى يا مدام
متشكره جدا
مشيت خطوتين و سمعت البياع العجوز بينادى عليا مره تانيه
مقلتليش عاوزاه ليه ؟؟؟
عندى مشكله و عاوزه احلها
و هو كتاب السحر بيحل مشاكل
امال ؟؟
دا بيعقدها اكتر
بس الاقيه
عندى الكتاب اللى انتى عايزاه
صحيح ؟؟ هو فين ؟؟
عندى فى المخزن بس لازم أحذرك علشان تحضير الجان ده مش حاجه سهله
و لازم تبقى عارفه الصرف قبل التحضير لانك ممكن تتسببي لنفسك فى مشكله كبيره
منا عايشه فيها هو انا لسه هسبب لنفسي مشكله ...بكام الكتاب من فضلك
كتاب سحر الاسحار دا معدش فيه منه غير نسخه واحده و عشان كدا سعره غالى حبتين
كام يعنى ؟؟
الف جنيه
اتفضل الفلوس اهى و هات الكتاب
ثوانى اجيبهولك من المخزن
الراجل راح يجيب الكتاب و انا قعدت افكر فى كلامه الغريب هو ايه الصرف و التحضير ده
بس كان عندى امل انى لما امسك الكتاب اعرف منه الطرق كلها و افهم الكلام اللى بيقول عليه ده
خلى بالك يا مدام
ايوه
متقريش فى الكتاب ده بصوت عالى أو تحركى شفايفك و انتى بتقرى احسن يحضروا و انتى مش واخده بالك
حاضر حاضر ...هو ده الكتاب ؟؟
ايوه هو
ياااا دا قديم اوى
بس ورقه سليم
ايوا ...واضح انك كنت محافظ عليه اوى
طبعا ...الكتاب ده معايا من سنين و عمرى ما فكرت ابيعه بس شكلك كدا بيقول أن عندك مشكله كبيره و انا حبيت اساعد
متشكره اوى يا عمى ...سلام عليكم
اخدت الكتاب و روحت البيت
حطيته جنبى و كنت خايفه اقرا فيه كلام الراجل خوفنى جدا بس برده انا عندى مشكله كبيره و مش عارفه احلها
الكتاب مكتوب باللغه العربيه بس مكتوب بطريقه غريبه حروف و ارقام و رسومات شكلها عجيب و بعض الرموز الغير مفهومه.
طب و بعدين انا مش فاهمه اى حاجه من المكتوب ده و لا فاهمه ازاى أنهى وجود الحاجات اللى حواليا دى
الكتاب كان متقسم ابواب اخر باب من الكتاب كان عباره عن وصفات أو تعويزات لتحضير اسماء مشهوره من الجن
زى تحضير نائله ذات الشعور المائله و تحضير بنت ابليس و تحضير مايس وصيفه زمرده بنت الملك الاحمر
طب انتى يا صفيه عاوزه تحضرى واحده من دول ليه ؟؟؟
انا عاوزه أحضر حد قوى يكون مخلص ليا و يطرد العفاريت الموجوده فى البيت دى
كلهم مطلوب لتحضير هم حاجات غريبه و بخور معين و طلبات عجيبه مش هعرف اجيبها
بس فى تعويزه اهى ممكن اقراها و اشوف
ابتديت اقرا و أردد اجزاء من التعويزه زى ما مكتوب بالظبط
كنت بعمل التعويزه و انا مرعوبه و متصوره هيظهر قدامى جنيه بس مظهرش اى حاجه خالص
قفلت الكتاب بعد ما جالى احباط شديد انا مش عارفه اعمل حاجه بالكتاب ده و لا فاهمه فيه
عدت ايام و انا اعصابى بتبوظ اكتر و اكتر ...مش قادره اتحمل حياتى دى
انا حاسه ان فى اصوات كتير بتتكلم جوه عقلى و بتقولى سنتتهى المأسآه بانتهاء الروح...ستنتهى المأسآه بانتهاء الروح
فعلا هو ده الحل ...انا لازم اتخلص من روحى
انا بكتب كل اللى حصلى قبل ما اتخلص من حياتى فى المذكره دى عشان الناس تعرف الحقيقه بعد موتى و هحط الكتاب اللى اشتريته مع المذكرات و اللى هيلاقى الكتاب هيلاقى المذكرات و ساعتها انا بأمنك يا اللى هتلاقى مذكراتى امانه ....بالله عليك أنك تجيب لى حقى اللى معرفتش اجيبه حتى لو أنك تفضح الشخص اللى عمل فيا كدا
انا دلوقتى هروح لمصطفى و لابنى و هكون معاهم ...مفيش حد هيفرقنا مره تانيه
صفيه احمد المرجوشي
٢٣/ ٤ / ٢٠٠٤
ااه انا كدا فهمت ...كدا مرات خالى حضرت مايس و هى متعرفش و مايس بعد كدا بدأت توسوس لها لسبب انا مش فاهمه و خلتها تموت نفسها
طب و معقول خالى حسن الطيب عمل كدا ؟؟؟ انا طول عمرى اعرف أنه راجل بيعرف ربنا و ملوش فى اى شيئ يغضبه
ازاى واحد يكون بالتناقد ده ؟؟ ازاى يظهر عكس ما يبطن ؟؟ معقول هو عمل كدا ؟؟؟
الست دى اتظلمت كتير اوى و انا لازم اجيب لها حقها ...على الاقل اقول للناس اللى عمله فيها زى ما هى امنتنى ...انا لازم اسافر البلد و اواجهه
يااا الصبح طلع ..انا لازم اروح المدرسه هروح اخد دش و اشرب كوبايه شاى و البس و انزل و بعدها اطلع على البلد اشوف حكايه خالى ده ...بس لازم اعمل حسابى فى سكن تانى طبعا ما هو مش معقول بعد ما هظهره على حقيقته هيسبنى قاعد فى الشقه هنا
انا هسال زمايلى و أن شاء الله هلاقى حل و لو ملقتش هسيب الشغل خالص انا خلاص زهقت و قرفت من المشاكل
لبست و رحت مدرستى ...بعد ما دخلت لسنه تانيه لقيت الفراش جاى يقولى المدير عاوزك
رحت لقيت المدير بيقولى انت عندك سنه تالته امتى ؟
قلت له الحصه الجايه يا مستر
قال كويس عشان تطمن البنات و تقولهم أن مشكله آية خلاص اتحلت
اتحلت ازاى ؟؟؟
ابوها جه من شويه و طلب نقلها من المدرسه هى و اختها بعد ما اتصلت بيه امبارح و كلمته عن اللى حصل
طب و هى كدا اتحلت يا مستر ؟؟
بالنسبه لنا احنا اتحلت ...مشكلتها التانيه دى احنا ملناش فيها ...يلا يا مستر على حصتك
دخلت الفصل بصيت بعينى على مكان آيه لقيته فاضى معرفش صعبت عليا اوى و خاصه بعد ما عرفت اللى كان بيحصل مع مرات خالى ...يمكن البنت دى تكون مشكلتها اكبر ..بس انا مش فى ايدى اعملها اى حاجه ...ربنا معاها
خلصت الحصص و خرجت على محطه القطر و انا معايا مذكرات صفيه ...انا جايلك يا حسن
يتبع 😎
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧
#الجزء_السادس_عشر
خلصت الحصص و خرجت على محطه القطر و انا معايا مذكرات صفيه ...انا جايلك يا حسن
وصلت البلد بعد العصر امى اول ما شافتنى فرحت اوى و قالت لى انت مقلتش انك جاى ليه يا حبيبي كنت عملت لك الاكل اللى بتحبه
معلش يا ماما انا لسه قاعد معاكى جمعه و سبت و بعدين انا نازل مخصوص عشان خالى حسن
اخص عليك يا عمر نازل عشان حسن طب و انا ؟؟
طبعا و انتى يا ماما بس انا عاوز خالى فى حاجه مهمه
خير يا رب حاجه ايه دى ؟؟ اوعى يكون موضوع يارا ؟؟
لا يا ماما موضوع يارا مش دلوقتى خالص و بعدين كلامك صح انا لسه قدامى بدرى اوى على ما ارتبط و هى ربنا يرزقها باللى احسن منى يا رب
مالك يا عمر ؟؟ انا عمرى ما شفتك بالشكل دا قبل كدا ؟؟
هتفهمى كل حاجه يا ماما لما تيجى معايا انتى و بابا عند خالى
انت قلقتنى يا ابنى ...طب ما تفهمنى فى ايه ؟؟
هتعرفى كل حاجه هناك يا ماما ...
طيب يا ابنى هدخل اصحى ابوك يسلم عليك و نروح ...طب مش تتغدى الاول ؟
انا اكلت و انا جاى يا ماما ...مش جعان خالص
طيب يا ابنى براحتك ثوانى اصحى ابوك
ابويا صحى و سلم عليا و سألنى عن سر الزياره بس برده مقلتلوش كنت خايف أن قلت لهم و فضحت سره قدامهم يقولولى خلاص متروحش و اسكت و متتكلمش
عشان كدا مرضتش احكى الا و الكل قاعد و اخليهم يعرفوا و يشوفوا رد فعله من غير ما يلحق يألف كدبه أو ينكر الكلام المكتوب ده
اول ما وصلنا و خبطنا على الباب خالى فتح
اول ما شافنى ابتسم اوى و قالى
اهلا اهلا ازيك يا عمر ...و ازاى سمكك و رنجتك ؟؟؟ و قعد يضحك
امى بصت لى كدا مستغربه كلام خالى و زى ما يكون عاوزه تسال ايه الحكايه
قلت له بيسلموا عليك يا خالى و عفاريت الشقه كلها بتسلم عليك
امى اتخضت عفاريت ايه يا عمر اللى بتتكلم عنها
أسألى خالى يا ماما
عفاريت ايه يا حسن ؟
انا عارف يا سهام ؟؟ ابنك كل شويه يتصل بيا و يقولى الاكل بيختفى و مره البنطلون ضاع منه معرفش ايه اللى بيتكلم عنه ده
لا تعرف يا خالى كويس اوى
طب ما تفهمنا يا عمر يا ابنى
هفهمكم يا بابا .....بصوا دى مذكرات مرات خالى مصطفى الله يرحمها
لقيتها فين دى ؟؟ الشقه مكنش فيها اى مذكرات
ايووووه ما هى خبتها بعد ما كتبت كل اللى عملته فيها و انا لقيتها و قريت اد ايه هى اتعذبت بسببك يا خالى ...مكنتش اتخيل انك تعمل كدا
اتعذبت بسببي؟؟ ليه انا عملت لها ايه ؟
عملتلها سحر اسود و خلتها تجهض الجنين اللى فى بطنها علشان عرفت أن خالى كتب لها كل حاجه باسمها ...كل ده عشان شويه فلوس ملهومش لازمه ...راح فين صاحب الفلوس ..الكفن ملوش جيوب يا خالى
انا عملت لصفيه سحر و اجهضتها ؟؟؟ انا اخدت شقتها بالسحر ده ؟؟
ايوه كل ده مكتوب بخط أيدها فى المذكرات دى
انا مش هرد عليك انا هخلى امك اللى ترد عليك
انت جبت الكلام ده منين يا عمر ؟؟؟
كل ده مكتوب يا ماما ...و مكتوب أن خالى كان هياخدها و يسافروا لبنان عشان عيد جوازهم و هى كانت حامل و متعرفش لكن القدر أنه يموت ليله سفرهم
الكلام ده غلط يا عمر ....خالك حسن معملش كدا
لا يا ماما حصل بس انتى متعرفيش انتى تقريبا كنتى فى الصعيد فى الوقت ده
انا فعلا كنت فى الصعيد بس جيت حضرت موت خالك و عارفه هو مات ازاى ؟؟
استنى يا سهام انا هدخل اجيب له كل حاجه من جوه
خالى دخل و انا سكتت و لقيت امى دموعها نازله
بتعيطى ليه يا ماما ؟
قلبت عليا المواجع يا عمر يا ابنى
مش كنت سألتنا قبل ما تتكلم بالكلام ده يا عمر ؟؟
يا بابا المذكرات اهى و بخط أيدها ...
استنوا يا جماعه ...تعالى يا عمر خد الاوراق دى
ايه الاوراق دى ؟
دى الاوراق اللى تبين لك الحقيقه كامله عن سبب وفاة خالك و عن ابنه اللى بتقول عليه
خالك فعلا هو و مراته كانوا مسافرين بس على حد علمى مكنتش لبنان ...بيتهيالى بلد ساحليه ...و للاسف عملوا حادثه كبيره جدا مات على اثرها خالك الله يرحمه و ادى شهادة وفاته مكتوب فيها سبب الوفاه اتفضل اقرا
صحيح دا مكتوب حدثت الوفاه نتيجه كسر فى العمود الفقرى و نزيف داخلى
الله امال هى كتبت أنه مات ليه فى البيت و ايه حكايه ابنها ده ؟
مرات خالك كانت فعلا حامل و للاسف الحادثه اجهضتها و كمان جالها نزيف شديد جدا و شالوا لها الرحم يومها و دا تقرير من المستشفى بالكلام اللى بقوله لك ده
دا صحيح ...معقوله ؟؟؟
و بعدين انت بتقول أن خالك مصطفى كتب لها ورثه الكلام ده محصلش و ده اعلام الوراثه عملته بعد موتها بص على التاريخ قدامك اهو و فيه أن الأرض و الشقه كانوا باسمه هو
طب و ليه هى كتبت كدا يا خالى ؟؟
مرات خالك بعد فقدها لجوزها و ابنها فى ليله واحده جالها انهيار عصبى شديد جدا و قعدت كذا شهر فى المصحه و أدى ورق المصحه اللى كانت قاعده فيها و انا كنت بدفع لها مصاريف المصحه دى
و لما حالتها اتحسنت شويه خرجت من المصحه و طبعا انا متكلمتش معاها فى اى شئ عن ورث و لا ارض و ده لسببين
اولا أن حالتها النفسيه مكنتش تستحمل و مكنتش عاوزها تتنكس و دا إكراما لعضم التربه
ثانيا لانى طبعا مش هطلعها من شقتها عشان أورث فيها و أرمى مرات اخويا فى الشارع و إن كان على الأرض فهى تحت تصرفى يعنى كدا كدا انا مش محتاج اعمل معاها مشاكل .
بس للاسف خروجها و قعدتها لوحدها خلاها تقريبا منفصله عن العالم ...بقى بيتهيألها حاجات و بقت تتصل عليا فى نص الليل و تقولى انا خلاص هحضر روح مصطفى ...مصطفى هيرجع يبقى معايا مره تانيه ...
و كلام كتير اوى و ياما الجيران اشتكوا منها و من تصرفاتها و صريخها فى نص الليل و كانوا يتصلوا عليا يقولولى بالله عليك رجعها تانى المصحه دى حالتها اتدهورت اوى
و فعلا روحت لها و طلبت منها انى اخدها المصحه و كان معايا مراتى ...راحت طردانا و اتهمتنى انى بسحر لها و انها خلاص اكتشفت الحقيقه و هتفسد كل خططى دى
طبعا انا عذرتها عشان حالتها الصحيه و بعد الموقف ده بكام يوم لقيت الجيران بيقولولى أنهم شاميين ريحه بشعه خارجه من الشقه
لبست و رحت و كسرت الباب انا و البواب قدام كل الجيران و دخلنا لقيناها شنقه نفسها فى حبل معلقاه فى جنش فى اوضه من الاوض ...و تقريبا كدا كانت بقالها كام يوم جثتها اتنفخت و فرقعت و طلعت الريحه اللى مكنش حد طايق يشمها
اتصلنا على البوليس و جم اخدوا الجثه على المشرحه و الطب الشرعى أقر أن دى حاله انتحار و ادى شهاده وفاتها اللى بتثبت الكلام ده
بعد ما ماتت عملت اعلام وراثه و طلع لها ربع أملاك اخويا بحكم انها مراته دورت على قرايبها اللى يورثوها و هى كانت يتيمه و ملهاش اخوات ...اللى ورثها ولاد عمها و اديتهم ورثها و أدى العقود اللى بتثبت صحه كلامى كله
انا اسف يا خالى
عارف يا عمر انا زعلت منك انك صدقت فيا الكلام ده ...معقوله هكون راجل بصلى و حاجج بيت الله و اعمل كدا ؟؟ و كل ده عشان ايه يعنى ؟ عشان شويه فلوس ؟؟ اخسر دنيتى و اخرتى عشانهم ؟؟
انا اسف يا خالى بس العفريته هى اللى دلتنى على المذكرات دى و على كتاب سحر كان موجود فى سقف الاوضه مع المذكرات .
عفريته ؟؟؟
ايوه عفريته كانت حضرتها مرات خالى و معرفتش بيها و لا طلبت منها حاجه و مصرفتهاش و هى اللى وسوست لها و خلتها تموت نفسها
و انت صدقت العفريته دى يا عمر ؟؟
صراحه ايوه يا خالى
انت متعرفش أن حرفتهم الكدب
عارف يا خالى ...و انا بتأسف لك مره تانيه
خلاص يا عمر انا مش زعلان منك يا ابنى بس قبل ما تصدق اى شئ بعد كدا لازم تتبين منه زى ما ربنا وصانا
يقول تعالى ( يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُوا عَلَىٰ مَا فَعَلْتُمْ نَادِمِينَ )
صدق الله العظيم
تمت
🥀🥀🥀🥀🥀🥀🥀🥀🥀🥀🥀
انا عاوزه اقول بس كلمه مينفعش نسمع و نحكم من طرف واحد ...دايما اللى بيحكى الحكايه لازم يطلع نفسه مظلوم
علشان نبقى عادلين فى حكمنا لازم نسمع من الطرفين .
جاء رجل إلى عمر بن الخطاب رضي الله عنه، وقد فُقئت عينه يشتكي مَن فعل به هذا، وقد أشفق الصحابة رضوان الله
عليهم على هذا الرجل، وتوقعوا أن يحكم عمر بن الخطاب رضي الله عنه له، ولكن عدل عمر بن الخطاب رضي الله عنه جعله يقول: انظروا لمن فقأ عينه فقد يكون قد فقئت عيناه!
لو كان المُخبَر عنه عدوًّا, أو بينك وبينه شحناء, فهذا لا يعفيك من فريضة التبين ولا يسوغ لك إهمالها.
التبين من الطرف الآخر لا يعني عدم ثقتك فيمن أخبرك، ولا تشكيكًا فيما قال، ولا تكذيبًا له، وإنما هو واجب شرعي تقوم به تعبدا لله تعالى لتقوم بواجبك ويطمئن قلبك❤️
ارجو أن القصه تكون نالت اعجابكم ...اذا عجبتكم القصه ارجو الدعاء لوالدى رحمه الله عليه و سائر موتى المسلمين
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
تعليقات
إرسال تعليق