#شقة٧٧(الجزء_الثانى)
#الحلقه_الاولى :
انا اسف يا خالى بس العفريته هى اللى دلتنى على المذكرات دى و على كتاب سحر كان موجود فى سقف الاوضه مع المذكرات .
عفريته ؟؟؟
ايوه عفريته كانت حضرتها مرات خالى و معرفتش بيها و لا طلبت منها حاجه و مصرفتهاش و هى اللى وسوست لها و خلتها تموت نفسها
و انت صدقت العفريته دى يا عمر ؟؟
صراحه ايوه يا خالى
انت متعرفش أن حرفتهم الكدب
عارف يا خالى ...و انا بتأسف لك مره تانيه
خلاص يا عمر انا مش زعلان منك يا ابنى بس قبل ما تصدق اى شئ بعد كدا لازم تتبين منه زى ما ربنا وصانا
يقول تعالى ( يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُوا عَلَىٰ مَا فَعَلْتُمْ نَادِمِينَ )
صدق الله العظيم
انا بتأسف مره تانيه
خلاص يا عمر انا مش زعلان منك
طب نستأذن احنا بقا يا حسن
ما انتوا قاعدين يا ابو عمر
لا معلش اصل عمر لسه جاى من السفر و عاوز يرتاح شويه ...سلام عليكم
و عليكم السلام
مشيت من بيت خالى و كأن حد دلق على دماغى جردل ميه سقعه كنت حاسس انى ماشي مبلول ...
امى و ابويا هما كمان كانوا ساكتين خالص مبيتكلموش زى ما يكون محروجين من اللى انا عملته مع خالى
اول ما دخلت البيت امى قعدت قدامى على الكنبه و بصت لى بزعل
ليه كدا يا عمر ؟؟ طب مش تسألنى يا ابنى قبل ما تحرجنا مع خالك كدا ؟؟ انت كدا عملت لى مشكله معاه
خلاص يا ماما منا اتأسفت له و الموضوع خلص
ماشى يا عمر ....اجيب لك تاكل
لا يا ماما ..انا هطلع انام
طلعت و دماغى عماله تلف كدا مايس ضحكت عليا ...طب ليه عملت كدا ؟؟
دخلت اوضتى و اترميت على سريرى بهدومى مقدرتش اغيرهم و قعدت افكر
غمضت عينى و مكنتش لسه دخلت فى النوم اوى لقيت الست مايس جايه ليا و بتضحك ضحكه عاليه اوى
بصيت لها بزعل و قلت لها ليه كدبتى عليا ؟؟
انا ؟
ايوه
ليه ؟
كدا
كدا يعنى ايه ؟؟؟
اقولك و متزعلش
قولى و متكدبيش
عشان تعمل مشكله مع خالك و متفكرش تتجوز بنته
و المذكرات دى مين اللى كتبها ؟
انا
انتى بتقولى ايه ؟؟ يعنى عملتى كل ده عشان تبعدينى عن يارا ؟
ايوه ...انا بحبك
تحبينى ازاى ؟؟
زى اى ست بتحب راجل
و انتى بتعتبرى نفسك ست ؟؟ انتى ضباب يا مايس و الحب ده مينفعش
لا ينفع يا عمر ...و مش ممكن اسيبك لبنت خالك دى و لا هسمح لها تاخدك منى
انتى ملكيش دعوه بيها و متجبيش سيرتها
انت بتزعقلى عشانها طيب يا عمر انا هوريك و هوريها
مايس ...مايس
قمت من النوم و انا عرقان و بنهج كأنى كنت بجرى بقالى ساعه ...مايس اختفت من قدامى بعد ما شفت الشر فى عنيها اول مره اشوفها بالشر ده عينيها حمرا و تكشيره وحشه جدا على وشها و زى ما يكون وشها اسود مره واحده
هو ممكن صحيح مايس تأذى يارا ؟؟
اكيد بتهددنى و خلاص
فى اللحظه دى تليفونى رن ..خرجته من جيبي لقيت يارا
ازيك يا عمر
الله يسلمك يا يارا ...عامله ايه ؟
الحمد لله ...بقى كدا تيجى و تمشي من غير ما اشوفك؟
منا استنيتك تطلعى مطلعتيش
انا كنت فى مشوار كدا و بحمد ربنا انى رجعت البيت
ليه كدا ؟
العربيه اللى كنا راكبينها ظهر قدامها كلب اسود فجأه فى نص الطريق منعرفش جه منين ..السواق كسر بالميكروباص يمين و فرمل على اخر لحظه كنا هنقع فى الترعه و الحمد لله عدت
طب و الكلب راح فين ؟؟
ههههههههه انت بتسال على الكلب ؟ دا بدل ما تسال عليا انا ؟؟
لا مش قصدى ...طب انتى كويسه ؟
أنا مكنتش قادره اتلم على اعصابى و قعدت اعيط تخيل كان بينى و بين الموت لحظه
بعد الشر عنك يا حبيبتى ...طب و الكلب راح فين ؟؟
ههههههههه تانى يا عمر ؟؟ الكلب معرفش انا مخدتش بالى جرى راح فين
طيب خلاص حمدالله على سلامتك يا حبيبتى
طب مش هشوفك ؟؟؟
هقابلك بكرا العصر تحت شجره التين بتاعتنا
ماشي يا عمر تصبح على خير
و انتى من اهل الخير يا يارا
قفلت مع يارا و انا قلقان ...معقول الكلب ده يكون مايس ؟؟
لا اكيد دا كلب حقيقى و خرج من اى حته قدام الميكروباص ...انت يا عمر شكاك اوى و حكايه مايس دى هتلخبطك على الاخر
مايس متقدرش تعمل ليارا حاجه و لو فكرت تأذيها انا اللى هقف لها و مش هسمح لها بكدا ابدا
فى الليله دى معرفتش انام كنت كل ما اغمض عينى اشوف كوابيس ... اشوف يارا بتجرى و كلاب سودا بتجرى وراها اصحى مفزوع
انام مره تانيه الاقيها متكتفه و بتصرخ و انا مش قادر اقرب لها بحاول و احاول بس حاسس أن جسمى تقييييل و صوتها فى ودانى رهييييب
صحيت من النوم مفزوع و لقيت الفجر بيأذن
قمت اتوضيت و صليت الفجر و لقيت الحاجه جايه لى بكوبايه لبن دافيه و معاها شويه قرص و قراقيش من اللى هى عملاهم
تقبل الله يا عمر يا ابنى
منا و منكم يا امى
تعالى شق ريقك بكوباية اللين دى
مليش نفس يا ماما
لا عيب بقا كدا مينفعش اللى بتقوله ده ... اشرب و كل قراقيش امك و قولى ايه رايك
ما انتى عارفه رايى من زمان يا ست الحبايب هو فى زى أكلك ؟
اه يا بكاش
انا بكاش ؟؟ دا حتى انا مبعرفش ابكش نوهائى
ايه نوهائى دى يا واد ؟ جبتها منين دى ؟؟
ههههههههه معرفش سمعتها من واحد زميلى فى المدرسه
اه صحيح انت عامل ايه فى شغلك
الحمد لله بخير المدير راجل طيب و الدنيا هناك حلوه بس انا عاوز اشوف سكن تانى يا ماما
ليه كدا يا عمر ؟
انا مكسوف من الكلام اللى قلته لخالى ووشي منه فى الارض و عاوز اشيل الحرج عنه ...ممكن يكون متضايق من كلامى و بيقول يعنى قاعد فى شقتى و جاى بيتهمنى باللى مش فيا ؟
لا يا عمر خالك طيب يا ابنى و لا يمكن يفكر بالشكل ده و على العموم انا هبقى اتصل عليه تانى و اشوفه زعلان و الا لا
انا كمان يا ماما هروح اقابل يارا بكرا عشان اعرف بعد ما مشينا قال ايه و زعلان و الا لا ؟
تانى يا عمر ؟؟ رايح تقابلها تانى ؟
معلش يا ماما يارا وحشتنى و نفسي اشوفها
قول كدا بقا مش تقول عاوز تعرف خالك زعلان و الا لا ؟
دايما كشفانى يا حجه 😂
يا واد ...اللى ربى خير م اللى اشترى ..طب مش هتحكيلى حكايه العفاريت اللى خالك بيقول عليها دى ؟
بعدين يا ماما ...هقولك على كل حاجه
بعد العصر لبست جلابيتى البيضا و حطيت البرفان اللى يارا بتحبه و طبعا كنت حالق و مظبط نفسي و رحت علشان اقابل يارا
اول ما شفتها ......
يتبع
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧(الجزء_الثانى)
#الحلقه_الثانيه
بعد العصر لبست جلابيتى البيضا و حطيت البرفان اللى يارا بتحبه و طبعا كنت حالق و مظبط نفسي و رحت علشان اقابل يارا
اول ما شفتها كانت مديانى ضهرها و شعرها الطويل نازل على ضهرها ...حبيبتى لابسه فستان جديد جميل اوى لونه احمر شكلها فيه زى سندريلا
قربت منها و حطيت ايدى على عنيها
انا ميييييين ؟؟؟
بس اول ما لمستها حسيت أن كهربا مشيت فى جسمى كله ...اتنطرت بعيد و هى فى نفس اللحظه بصت لى
اتفزعت اكتر ...دى مش يارا
شكلها كان بشع ...ابتدت تظهرلى بشكلها الحقيقى
فى اللحظه اللى قلت فيها ايه دا ؟؟
رجعت للشكل المعتاد اللى بتظهرلى بيه كل مره
انتى ايه اللى جابك هنا ؟
عمر انا احبك
امشي من هنا يا مايس ..يارا زمانها جايه
يارا مش هتيجى يا عمر ...انت ليه مش حاسس بيا
يارا مش هتيجى ليه ؟؟ عملتى فيها ايه ؟
انا ؟؟؟؟ ههههههههه ههههههههه ههههههههه
ميس قعدت تضحك بصوت عالى و بشكل هستيرى و اختفت
انا بقا مكنتش عارف اعمل ايه
هدانى تفكيري انى اتصل على يارا
الو
الو ايوا يا عمر
ايوا يا طنط هى فين يارا ؟
يارا تعبانه اوى يا عمر معرفش حصلها ايه ...عماله تصرخ و مش فاهمين منها حاجه
طيب انا جاى يا طنط
تعالى يا ابنى انا عارفه انها بتعزك و يمكن تعرف تهديها
قفلت السكه و جريت زى المجنون
اول ما وصلت بيت خالى سمعت يارا عماله تصرخ
خبطت بسرعه فتحت لى مرات خالى و استأذنتها اطلع ليارا فى الدور التانى
مرات خالى قالت طبعا يا عمر اطلع يا ابنى خالك راح يجيب لها الدكتور
اخدت السلم جرى وورايا مرات خالى
اول ما دخلت على يارا لقيتها متكومه فى جنب من جوانب السرير لازقه ضهرها للحيطه و حاطه راسها بين رجليها و عماله تهز نفسها بشكل هستيري
ناديت عليها رفعت راسها و لقيت وشها شاحب مفيهوش نقطة دم
اول ما شافتنى جريت عليا و اترمت فى حضنى و قعدت تعيط
قعدت اطبطب عليها و اهدى فيها و طلبت من مرات خالى تجيب لها ليمون
فى ايه يا حبيبتى مالك ؟؟
أهدى بس
متعيطيش يا يارا
بصت لى و عيونها كلها دموع و قالت لى انا شفت حاجه رهيبه يا عمر
شفتى ايه يا يارا ؟
انت عارف إن اوضتى فى الدور التانى هنا كنت عاوزه اروح الحمام و كل اللى فى البيت كانوا تحت فى الدور الاول
كنت لسه سايباهم و قلت اطلع اخد دش عشان اجى اقابلك
نور الطرقه المؤدى للحمام لقيته بيطفى و ينور ...افتكرت أن النور بايظ مخدتش فى دماغى و مشيت لحد ما وصلت باب الحمام حسيت بحد واقف ورايا افتكرت سمير اخويا ما هو دايما بيعمل الحركات دى معايا
ببص ورايا يا عمر شفتها ...واحده سودا جدا زى الفحم و شعرها منكوش وواقف زى السلوك و شكلها بشع جدا
فى اللحظه دى صوتى مطلعش مكنتش قادره حتى انى اصرخ ...كل اللى عرفت اعمله انى جريت على اوضتى بسرعه و دخلت و قفلت على نفسي و قعدت على سريري زى منا قاعده كدا و غطيت وشى بالغطا و قعدت دقيقتين كدا على ما أهدى
بعدين شلت الغطا من على دماغى لقيتها قاعده جنبى و بتبص فى وشي و قريبه جدا يا عمر ...كنت شامه ريحة نفسها الكريهه ...اول ما قربت وشها من وشى حسيت بحراره عاليه حسيت أن مخى بيغلى جوه دماغى و فجأه الدنيا كلها اسودت و محستش بنفسي إلا و ماما بتفوقنى بعد ما سمعت صرختى
معلش يا يارا أهدى و بطلى عياط
الليمون يا ابنى
خدى يا يارا الليمون ده اشربيه
لا مش عاوزه حاجه مش عاوزه
طب أهدى
خالك جه اهو و معاه الدكتور
ازيك يا عمر
الله يسلمك يا خالى
اتفضل يا دكتور
دخل الدكتور عند يارا و خرجت انا و خالى من الاوضه
و طلع بعد شويه و قالنا أنه اداها حقنه مهدئة هتهديها و تنام للصبح و هى أن شاء الله هتبقى كويسه
شكرنا الدكتور ووصلته للعربيه و قعدت مع خالى شويه هو و مراته و اللى كان باين عليهم الزعل اوى
قطع سكوتنا صوت مرات خالى و هى بتقولى
كانت بتقولك ايه يا عمر يا ابنى ؟ ايه اللى حصلها ؟ دى كانت طالعه زى الفل و قالت هاخد دش و البس و اروح لواحده صاحبتى...معرفش ايه حصلها و سمعت صرختها جريت لقيتها فى الحاله الوحشه دى
مقلتش يا مرات خالى ...أن شاء الله هتكون زى الفل استأذن انا بقا
ما انت قاعد يا عمر
معلش يا خالى انا لازم اروح و بستأذنك اجى اتطمن على يارا بكرا
متتعبش نفسك يا عمر
و لا تعب و لا حاجه معلش سامحنى هاجى اتطمن حتى لو من على الباب
خلاص مدام مصمم تعالى انا مكنتش عاوز اتعبك بس
طيب سلام عليكم
و عليكم السلام
خرجت من عند خالى ووقفت اعدل رباط جزمتى سمعت مرات خالى بتقوله
و الله الجدع ابن حلال يا حسن انا مش عارفه انت ممانع ليه فى جوازته بالبت
احنا فى ايه و الا فى ايه يا حجه
و الله يا حسن لو شفته و هو جاى جرى و جسمه كله بيشر عرق و مش قادر يتلم على أعصابه كنت جوزته للبت من غير و لا كلمه
و مين اللى قاله ان يارا تعبانه ؟
صراحه انا
اه منا عارف انتى ميتبلش فى بقك فوله
هقوم الحق العصر احسن اتلهوجت فى البت و ملحقتش اصلى
تقبل الله يا حج
منا و منكم يا اختى
روحت البيت و انا متاكد أن مايس خلاص شنت الحرب عليا و دخلت لى من نقطة ضعفى ...يارا
حاضر يا مايس يا انا يا انتى
قعدت افكر كتير اوى ازاى اقدر احمى يارا من مايس
انا لازم أنصحها انها تحصن نفسها بالاذكار و سوره البقره و الرقيه الشرعيه
بس انا كمان لازم احاول اتصرف و اخلص من مايس دى
فجأه و انا قاعد افتكرت منسي...
منسي دا كان طالب زميلنا العيال كلها مبتحاولش تقرب منه لأن كان معروف عن أبوه أنه ساحر و له فى الأعمال السفليه و أن شغله دايما مؤذى و عشان كدا الكل كان بيتجنبه نهائى
بس يا ترى أبوه لسه عايش و الا مات ؟؟ انا هروح اسال امى عليه
يا مامااااا
يا ترى عمر هيلاقى ابو منسي دا لسه عايش ؟ طب و يا ترى اللى هيعمله دا صح ؟ اكيد لأ بس احنا بقا هنعرف باذن الله فى الحلقه الجايه عمر هيعمل ايه عشان ينقذ حبيبته
يتبع
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧(الجزء_الثانى)
#الحلقه_الثالثه
فجأه و انا قاعد افتكرت منسي...
منسي دا كان طالب زميلنا العيال كلها مبتحاولش تقرب منه لأن كان معروف عن أبوه أنه ساحر و له فى الأعمال السفليه و أن شغله دايما مؤذى و عشان كدا الكل كان بيتجنبه نهائى
بس يا ترى أبوه لسه عايش و الا مات ؟؟ انا هروح اسال امى عليه
يا مامااااا
نعم يا عمر
متعرفيش جابر الساحر لسه عايش و الا لأ ؟
قطع و قطعت أخباره بتسأل عليه ليه المخفى ده ؟
لا مفيش افتكرته بس و انا قاعد
اهو متلقح فى البيت اللى على اول البلد ربنا يبعدنا عنه و عن اذاه
يارب يا ماما ....طب انا خارج شويه و راجع
رايح فين يا عمر ؟
رايح اسلم على واحد صاحبى يا ماما
طيب متتأخرش يا ابنى انا مش لاحقه اقعد معاك خالص ...الا انت هترجع شغلك امتى ؟؟
يوم الاحد الصبح أن شاء الله
يعنى فاضل بكرا بس ؟ هو انت نازل تلات ايام بس ؟
يا ماما انا لسه مليش إجازات لانى جديد انا نازل خميس و جمعه و سبت و هرجع شغلى عادى يوم الأحد باذن الله
طيب يا عمر ...الا صحيح مش هتقولى على حكايه العفاريت اللى كان بيقول عليها خالك
بعدين يا ماما اما ارجع هحكيلك كل حاجه
بعدين امتى بس ؟ عارفه انك هترجع متاخر و هكون نمت
لو نمتى هصحيكى متخافيش
اوعى يا عمر تكون رايح للى اسمه جابر ده عشان حكايه العفاريت اللى قالنا عليها خالك ؟
لا يا ماما طبعا ...انتى بتقولى ايه ؟
الراجل دا مؤذى اوى يا ابنى و ياما اذى ناس و خرب بيوت ناس ...دا غير أنه عراف و اللى يروح لعراف و ميصدقوش عمله بيبطل اربعين يوم و اللى يصدقه بيكون كفر بما أنزل على محمد
متخافيش يا ماما ...همشي انا بقا عشان الحق صاحبى قبل ما ينام
معلش يا ماما عاوز مفاتيح العربيه بتاعه بابا
ليه هو بيت صاحبك ده فين ؟
قريب يا ماما بس هنلف شويه بالعربيه
طيب استنى هدخل اجيب لك المفاتيح من ابوك
دخلت امى تجيب المفاتيح و كلامها رعبنى انا عارف إن اللى هعمله ده حرام بس مش عارف اتصرف غير كدا
امى خرجت بعد دقيقتين و معاها المفاتيح و بتقولى ابوك بيقولك خلى بالك من العربيه دا لسه عاملاها عمره مش ناقص تخبطهاله
دا على أساس أنها عربيه مرسيدس و خايف عليها ؟ اش حال أنها عربيه فيت حقيره يعنى ؟
بتعيب على عربيه ابوك يا عمر ؟ اه لو سمعك هينفخك
لا خلاص انى اااسف ...سلام يا حبيبتى
مع السلامه يا ابنى
طلعت من البيت و انا مش عارف انا هروح للراجل ده أقوله ايه ...انا عارف انه دجال و ساحر و مؤذى بس اعمل ايه انا عاوز اخلص من مايس دى بأى طريقه
جابر ده ساكن فى أول البلد و بانى بيت فى ارض زراعيه تبعد عن العمران حوالى ١٢ كيلو يعنى منطقه مقطوعه تماااااما
و عشان كدا اخدت عربيه ابويا
رحت خبطت على الباب و انا برده مش عارف انا هقوله ايه بالظبط
لقيته بيقولى ادخل يا عمر يا ابن سهام
انا سمعت أسمى و اسم امى و ابتديت اعرق هو عرفنى منين ؟
ادخل يا عمر
دخلت البيت اللى كان عباره عن دور واحد مكون من غرفه واحده و مكان للقعده كبير ...لما دخلت لقيت بيت اثاثه بسيط اوى ...فيه دكتين قدام بعض شكلهم قديم اوى معمولين من خشب الشجر
و بين الدكتين فى كرسي خشب قديم قاعد عليه جابر و قدامه منقد مولع فيه بخور ريحته غريبه اوى اول مره اشمها
و قدام الكرسي و بين الدكتين فى حصيره قديمه من الحصر بتاعه زمان اللى بتتعمل من نبات السمر
قعدت على دكه من الدكتين بالقرب من كرسي جابر و انا مش قادر اتكلم
جابر ابتدى هو بالكلام و بدأ يقولى على تفاصيل دقيقه جدا فى حياتى لدرجه ان فى حاجات محدش يعرفها غيري لقيته بيقولهالى
كل ما جابر يحكى و يتكلم انا اترعب اكتر و اعرق اكتر و كنت بتمنى انى امشي عشان اخلص من الموقف اللى انا حطيت نفسي فيه دا
جابر ختم كلامه بأنه عارف انا جاي ليه ؟ و قال انى فكرت اجيله عشان اخلصه من مايس و طبعا ده عشان يارا
جابر سكت لحظه و قالى تحب تعرف خالك مش عاوز يجوزك بنته ليه ؟؟؟؟ و الا بلاش
لا انا عاوز افهم ...خالى بيرفض لسبب انا مش فاهمه نهائى و مش قادر افهمه
حكايه خالك دى سهله و ممكن اخليه يوافق بيك فى ثوانى ... دى مش مشكله كبيره ...و حكايه مايس دى حاجه سهله اوى برده مفيهاش اى مشكله ...مايس دى وصيفه زمرده بنت الملك الاحمر و انا ليا عهد مع الاميره زمرده و ممكن اخليها تسلسلها
بس انا قبل كدا رجعتها لمملكه الاميره زمرده بكتاب لقيته و برده رجعت تانى
لا انت فكيت عزيمه لما غرقت الكتاب و هى أوحت لك انها مشيت بس هى فى الحقيقه مسبتكش لحظه لأنها حبتك يا سيدى
بس انا مبحبهاش
محدش قالك حبها بس انت ممكن تستخدمها فى حاجات كتير
لا لا.... انا لا عاوز استخدمها و لا تقرب منى نهائى انا عاوز اخلص من الموضوع ده و خلاص
تمام مفيش مشكله انا ممكن اخلصك منه
طب ممكن تقولى ايه سبب رفض خالى ليا ؟
عاوزنى اقولك ؟؟
من فضلك
فى حاجات يا عمر عدم معرفتها بيبقى افضل لينا
بس انا من حقى اعرف السبب اللى مش عاوز يقوله و لا امى و ابويا عاوزين يقولوه و بيتحججوا بحجج فارغه
شكلك مضطرب يا عمر ...اشرب عصير البرتقال ده الاول و انا هحكيلك و اقولك على كل اللى عاوز تعرفه
و اخدت عصير البرتقال من ايده و شربته و ياريتنى ما شربته
بعد ما شربت العصير حسيت انى اتنومت تنويم مغناطيسي ...بقا جابر يكلمنى و انا اهز دماغى بالموافقه على كل اللى يقوله
بقى يقولى انت تجيلى فى اى وقت اطلبك فيه و انا اهز دماغى بالموافقه
و تنفذ كل اللى اطلبه منك
و انا اهز دماغى بالموافقه
و دلوقتى هقولك على السر اللى مخلى حسن مش قابل زواجك من بنته يارا
السر حاجه تتعلق بيك و بوالدك و بوالدتك
سر ايه دا ؟؟؟
هقولك بس اوعدنى أن ده يبقى سر بينى و بينك يعنى متروحش تقول لحد على اللى هقولهولك
اوعدك
يا ترى ايه السر اللى هيقوله جابر لعمر ؟؟؟ و يا ترى هيحصل ايه بعد كدا ؟
دا اللى هنعرفه فى الحلقه الجايه باذن الله تعالى
يتبع
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧(الجزء_الثانى)
#الحلقه_الرابعه
و دلوقتى هقولك على السر اللى مخلى حسن مش قابل زواجك من بنته يارا
السر حاجه تتعلق بيك و بوالدك و بوالدتك
سر ايه دا ؟؟؟
هقولك بس اوعدنى أن ده يبقى سر بينى و بينك يعنى متروحش تقول لحد على اللى هقولهولك
اوعدك
زمان لما سهام اتجوزت زوجها كانت صغيرة و قعدت خمس سنين من غير خلفه، زوجها راح كشف عليها ملقاش عندها اى شئ يمنع الخلفه ...الدكتور طلب منه أنه يعمل تحليل و للاسف الدكتور اللى حلل له اداله نتيجه غلط و افتكر انه مبيخلفش ...طبعا نفسيته بقت وحشه جدا و سهام حاولت تخفف عنه بالرغم من أنها كانت بتتمنى انها تخلف
و فى يوم و هما راجعين من عند ام سهام و كان معاها اخوها حسن رايح يوصلهم لقوا طفل لسه بدمه ملفوف يدوب فى حته قماشه و الحبل السرى لسه فيه
الولد زى ما يكون بقاله ثوانى فى المكان ده ....قعدوا يدوروا على اللى حاطه و طبعا معرفوش يوصلوا لحاجه
الغريب أن الطفل ده كان ساكت خالص مبيعيطش بالرغم أنه مرمى لوحده فى عز البرد فى حته مقطوعه و الدنيا كانت ابتدت تضلم
سهام لما شافت الولد دخل قلبها و لما ضمته على صدرها حست بحبه بصت لجوزها و فهم هى عاوزه تقول ايه
ساعتها حسن كان شاب صغير و طلب منهم يرحوا كلهم للشرطه يسلموا الطفل لكن سهام قالت له طيب يا حسن هنروح بس و بكرا هنوديه
سهام كانت بتدى لنفسها و لجوزها فرصه عشان يفكروا هيعملوا فى الولد ده ايه
رجعوا بيه و غيرت له هدومه بعد ما جوزها نزل مخصوص اشتراله هدوم
سهام و زوجها اتفقوا أنهم يقولوا أن الولد ده ابنهم و لكن خافوا من كلام الناس و للصدفه الحلوه كان شغل زوج سهام اتنقل للصعيد
اتفقوا أنهم يكتموا الموضوع و يسافروا بالطفل و لما يرجعوا يقولوا أن سهام ولدته فى الصعيد و انها كانت حامل و متعرفش
طبعا كان عندهم مشكله و هى معرفه حسن للموضوع ...سهام جابت حسن و استحلفته بكل عزيز و غالى أنه ميجبش سيره لحد عن الطفل ده و لما حسن اعترض و قالها ما يمكن الطفل دا من علاقه غير شرعيه عيطت سهام له و قالت له و الطفل ذنبه ايه يا حسن فى غلطه عملها أبوه أو أمه
و فعلا عرفت تقنعه و سكت حسن مع عدم موافقته طبعا على الموضوع ده
الطفل دا بقا طلع ....
انا ؟ مش كدا ؟
ايوه انت
و اهلى الحقيقين فين ؟
امك كانت بت صغيره ابوك ضحك عليها و خلفتك و رمتك عشان تتخلص من عارها و هو هرب و سافر بلد تانيه ..
و هى فين ؟ تقدر توصلنى لها ؟
لا هى ماتت خلاص بقالها سنتين
كلام جابر نزل عليا زى الداهيه اللى وقعت على دماغى و جه فى دماغى أن ليا اخوات و لقيت جابر بيقولى طبعا بتقول و اخواتى دول جم منين ؟ منا انا قلت لك أن التحليل كان غلط و سهام بعد سنين لقت نفسها حامل و مكنتش مصدقه نفسها من الفرحه
و كنت انت كبرت شويه و للاسف مكنش ينفع يستغنوا عنك أو يقولوا انك مش ابنهم و خصوصا أن اهلهم كلهم عرفوا أن لهم ولد اسمه عمر
انا كأنى بسمع فيلم عربى ...انا عمرى ما حسيت أن امى أو ابويا بيعاملونى معامله مختلفه ...الكلام ده انا مش قادر اصدقه ابدا
جابر قطع تفكيري و هو بيقولى
متفكرش كتير يا عمر ...انت دلوقتى تروح و تجينى بكرا
اجيلك امتى ؟
هتعرف لوحدك ...ساعه ما اعوزك هتعرف
مشيت من عند جابر و انا حاسس انى تايه
من لحظة ما شربت العصير و جابر أصبح ليه سلطة مطلقة عليا... مشيت من عنده و انا شبه متخدر... مش واعي للي حواليا و مش شايف قدامى غير عيون جابر المرعبة و السواد اللي تحتها.. بعدها بدأت سيطرة جابر عليا... بقي يستدعينى من غير أي وسيلة اتصال... بقيت اقوم فجأة من مكانى كأن حد بيحركنى و امشي اتناشر كيلو علي رجلى لحد ما اوصل لجابر... فيزعقلى انى اتأخرت...
بدأ جابر يتكلم معايا...
ادانى كتاب تعاويذ نسخة أصلية.. و بدأ يعلمنى طقوس معينة... أجبرنى مروحش شغلى و ابعد عن أي شئ يخص الدين...
بقيت زى المتخدر أعمل كل اللي ينطلب منى و انفذ تعليمات جابر و أقول تعاويذ الكتاب... و لكن مكانش فيه أي حاجة بتحصل ولا التعاويذ بتعمل شئ...
رحت لجابر كالعادة لما استدعانى و سألت جابر ليه التعاويذ مبتعملش أي حاجة... جابر قالى مش هتعمل إلا لما أديك الإذن و تدخل الخلوة...
يعنى ايه... ؟
رد جابر و قالى لازم تسلم نفسك ليا تماما... لازم تعاهدنى عهد انك خاضع تماما ليا و تنفذ أمري بدون مناقشة.. و أي مخالفة مصيرها الموت..
بعد تردد و لأنى مسلوب الإرادة... قلت له أعاهدك...
رد جابر بكل ثقة.... اسجدلي....
انا سمعت كلمه جابر مكنتش مصدق نفسي أخدت عشر ثوانى واقف... بعدين للاسف سجدت تحت رجل جابر...
جابر حط رجله علي راسى و ضغط عليها... أقسم بالله انى لما رفعت راسى كان وش جابر وش شيطان أسود و عنيه باااااارزة تماما للخارج و رقبته و صدره من فوق أحمر دم... كان منظره مرعب.. مرعب... لدرجة انى بقيت اخاف و اترعب منه و انفذ اوامره من غير و لا لحظة تفكير واحده... و بعضها أوامر قذره لا داعى لذكرها...
بعد فترة جابر قالى قول لأهلك انك رايح مكان لمدة خمستاشر يوم و تجيلي يوم ١٤ في الشهر العربي....
فسألته اجيب لبس معايا ؟
قالى لأ... متجيبش اي شئ
يوم ١٤ رحت لجابر بعد ما قلت لاهلى اللى قاله ليا جابر و طبعا اهلى فى الفتره دى كانوا مستغربين جدا من تصرفاتى و عدم رجوعى لشغلى و كانوا كل ما يسألونى اسيبهم و امشي و مردش عليهم
كنت اسمع بكاء امى على حالى و مكنش بيأثر فيا نهائى ...كل اللى كان يهمنى هو كلام جابر و ازاى مزعلوش و اعمل كل اللى يأمرنى بيه
لما رحت لجابر قالى انت هتدخل الخلوة النهاردة بالليل🙄
يا ترى عمر هيعمل ايه جوه الخلوه و يا ترى هيحصل ايه بعد كدا ؟
دا اللى هنعرفه فى الحلقه الجايه باذن الله تعالى
يتبع
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧(الجزء_الثانى)
#الحلقه_الخامسه
يوم ١٤ رحت لجابر بعد ما قلت لاهلى اللى قاله ليا جابر و طبعا اهلى فى الفتره دى كانوا مستغربين جدا من تصرفاتى و عدم رجوعى لشغلى و كانوا كل ما يسألونى اسيبهم و امشي و مردش عليهم
كنت اسمع بكاء امى على حالى و مكنش بيأثر فيا نهائى ...كل اللى كان يهمنى هو كلام جابر و ازاى مزعلوش و اعمل كل اللى يأمرنى بيه
لما رحت لجابر قالى انت هتدخل الخلوة النهاردة بالليل🙄
هزيت راسي بالموافقه منا مقدرش اعمل غير كدا
قبل ما نتحرك قلت له
ممكن اسالك على حاجه يا سيدنا
انا عارف عاوز تقول ايه يا عمر
طيب ممكن تقولى و تريحنى
انت ملاحظ ايه ؟؟؟
ملاحظ أن بقالها مده مظهرتش
خلاص يبقى خلاص اختفت
منا كنت عاوز افهم ايه اللى حصل معاها
مش انا قلت لك انى ليا عهد مع الاميره زمرده
ايوه قلتلى
انا بقا حضرتها و قلت لها على اللى بتعمله الوصيفه بناعتها و دا فى شرعهم جرم و إثم كبير و خلاص
خلاص ايه يعنى ؟ مايس راحت فين ؟
مايس انتهت ... الاميره زمرده سلسلتها بالسلاسل من راسها لحد رجليها و ربطتها و رمتها فى المحيط
يعنى مايس ماتت ؟؟
ايوه ..مش انت كنت عاوز تتخلص منها ؟
لا بس مش بالطريقه دى ...انا كنت عاوز أبعدها و بس
بلاش عواطف يا عمر شغلانتنا دى مفيهاش عواطف
طب و وو ....
قصدك يارا ؟؟؟؟ ههههههههه ......انت بعد الخلوه هيكون معاك قوه متتخيلهاش تقدر تتجوز يارا دى و اللى احسن من يارا دى مية مره
طب ممكن اسالك سؤال اخير ؟
اسئلتك كترت يا عمر
معلش اخر سؤال
اتفضل
ليه اخترتنى انا بالذات من ضمن مئات البشر اللى بتجيلك كل يوم عشان تشغلنى معاك و تدخلنى خلوه و تزودنى بخدمه
دا عشان انت زوهرى يا عمر و قليل اوى لما الاقى انسان زوهرى زيك
زوهرى ؟؟؟ يعنى ايه زوهرى ؟
الزوهرى هو الانسان اللى بيكون حلقة الوصل بين عالم الجن و عالم الانس ....دا اللى بيتفتح قدامه الكنوز ...الجن يخافه و لا يمكن يمسه ...بيكون وشك خير على اى حد تدخل عليه ...عندك قدرات لو استخدمتها صح ممكن تملك الدنيا
ازاى الكلام اللى بتقوله ده انا عمرى ما حسيت بانى مختلف
بص يا عمر الانسان الزوهرى له علامات كلها منطبقه عليك و بعدين انت ممكن تعيش طول عمرك متكتشفش انك مختلف و تعيش بين الناس كشخص عادى جدا ...طيب هقولك مسألتش نفسك مايس مقدرتش تعمل معاك اى شئ ليه ؟؟ و جنابور كان خايف منك ليه ؟؟
انت كمان عارف جنابور ؟
طبعا اعرفه
بس بيقولوا أنه شاه و معاه عشيره كبيره اوى و محدش يقدر عليه
لا ..انت بعد الخلوه هتقدر عليه و على عشيرته كلها
تمام انا كدا فهمت
خدنى جابر و مشي بيا فى حته مقطوعه تماما ...لحد الان معرفش المكان ده فين
اول ما وصلنا بص لى جابر و قالى
هتدخل الأوضة دى و هتتقفل عليك و هتكون ضلمة تماما... مش هتخرج من بابها إلا بعد ١١ يوم بالعدد.. انا هاجى افتحلك... هتاخد بس معاك تمر.. هديهولك... ٩٩ تمرة... كل يوم ٩ تمرات فقط لا غير...
و ازازتين مية... كل يوم كوباية فقط لا غير.
طب و الحمام؟
الحمام تعمله في أي ركن في الأوضة و ممنوع تغتسل بأي مية بعد الحمام طول مدة ال ١١ يوم
و ادالى آية قصيرة جدا في القرآن... و قالى طول الوقت و انتا صاحي تقرا الآية دى... لكن بالمقلوب...
طلب منى اعكس كلماتها... و علمنى اقولها ازاى... و قالى في آخر ليلة هيظهرلك الخدمة... اوعي تخاف... هيحاولو يخوفوك... اوعي تخاف لحد ميظهرلك الروحانى الملاك... هيعلمك كل شئ.. و أى حاجة يطلبها تقول موافق .. و انا هاجى افتحلك... بالليل...
جابر اخد منى موبايلى و قفله... و أدانى التمر و المية و دخلنى الأوضة اللي كانت ضلمة كحل من غير أي شباك... .. و قفل عليا بمفتاح و سابنى و مشي...
بدأت اعمل اللي قالهولي بالظبط حرفيا.. و اقول الآية بالمقلوب.. و آكل التمرات... و اشرب كوباية و مفيش اي غسل بعد الحمام و اقوم وانام لحد ما ريحتى و ريحة الأوضة أصبحت لا تطاق و كنت برجع التمر اللي باكله فازداد الموضوع سوء و قذارة... و مستنى آخر ليلة بفارغ الصبر... و معرفش اصلا فات أد ايه و انا في اليوم الكام.. .. لحد ما وصلتلها..
انا أكتر حاجة بخاف منها التعابين.. بترعب منها و فجأه و انا قاعد في ركن الأوضة كاره نفسي الأوضة كلها نورت نور عالى جدا.. و لقيت تعبان بحجم مهوول بيزحف ناحيتى و بيعمل صوت فحيح... كنت هاصرخ.. افتكرت كلام جابر :
اوعي تخاف
فضلت قاعد مكانى بتنفض و بحاول مركزش معاه... لحد ما وصل عندى و حرك راسه علي رجلي.. وانا قلبي هيقف... لكن فضلت متماسك... و فجأة اختفي... والأوضة نورت أكتر من الأول بكتير جدا... و ظهر في أخرها راجل جميل جدا جدا.. بملامح ملائكية.. وجه برئ.. و دقن بيضا رائعة.. و وجه كالقمر... و قاللي
السلام عليكم..
و عليكم السلام..
انا أخوك الملاك الروحانى طهطائيل و انت نلت خدمتنا ببركة سيدك جابر.. و قد حددت لك خمس أفراد للخدمة و سنتفق علي اشارة بيننا عندما تحتاج أحدهم أرسله لك...
الراجل بيتكلم بالعربية الفصحى بصوت هادى و مؤثر جدا.. خلانى فعلا اتأثرت بيه...
بعد كدا ادانى خاتم و قالى البسه و عندما تحتاج أحد لف الخاتم في إصبعك سيأتى إليك و ينفذ أوامرك و لن يراه غيرك ... ولكن بشرط أن نأخذ منك العهد أولا...
عهد ايه... ؟؟؟
من اليوم انت لست عمر ... انت اسمك الشيخ صابر و مطلوب منك أشياء تنفذها... أسقطنا عنك فريضة الصلاة.. فلا تصلي ابدا... و ان اضطررت للصلاة أمام أحد فصلي بدون وضوء.... و أسقطنا عنك فريضة الصوم فلا تصوم ابدا... و أحللنا لك جميع النساء حتى محارمك فيجوز لك التمتع بأي منهن... و مطلوب منك إفساد أي علاقة زوجية ما استطعت لأنها ليست شرعية و مبنية علي قوانين باطلة... فهل وافقت؟؟؟...
افتكرت كلام جابر بانى اوافق على اى حاجه تتقال فقلت وافقت...
هناك طلب أخير تنفذه الآن فإن نفذته بدأنا خدمتك و أخذت العهد...
ايه هو... ؟
يتبع
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧(الجزء_الثانى)
#الحلقه_السادسه
افتكرت كلام جابر بانى اوافق على اى حاجه تتقال فقلت وافقت...
هناك طلب أخير تنفذه الآن فإن نفذته بدأنا خدمتك و أخذت العهد...
ايه هو... ؟
خد المصحف ده و قطع ورقه و دوس عليه برجليك....
و عملت كده 😢
الآن نحن معك... اطلب تجاب... هل تود زيارة أي مكان... اختار أي مكان في العالم...
معقوله ؟ ممكن تودينى فى اى حته ؟
جرب بنفسك
طب انا عاوز اروح المغرب...
قوم تحرك ثلاث خطوات...
قمت اتحركت لقيت نفسى في المغرب في قلب الدار البيضاء و شايف كل شئ فيها و الناس مش شايفانى...
ارجع تلات خطوات لورا
رجعهتم فرجعت الأوضة تانى...
الآن أنت من أصحاب الخطوة و هذا أقل شئ... انظر إلي أعلي...
بصيت لقيت السما كلها مضيئة و مكتوب عليها حروف كتير لكن مش واضحة..
ايه ده ؟..
دا اللوح المحفوظ... و بعد فترة سأعلمك قراءة الغيب من عليه.. الخاتم معك لو احتجتنى... سأذهب الآن...
و مشي..
قعدت ليلتها في شعور غريب... علي أد ما انا كاره نفسي... علي أد ما انا كنت موهوم و حاسس انى ملكت الدنيا كلها و بقى معايا خدم يخدمونى في أي شئ ...
(عرفتوا بياخدوا الخدمة ازاى اللي بتقولو عليهم شيوخ روحانيين؟
دول كفرة اشتروا دنيتهم بأخرتهم..
اقروا الآية دى بكل جوارحكم... بكل قلوبكم... و انتوا تعرفو مين الملاك الروحانى اللي ظهر ليه
بسم الله الرحمن الرحيم
(واتبعوا ما تتلوا الشياطين على ملك سليمان وما كفر سليمان ولكن الشياطين كفروا يعلمون الناس السحر وما أنزل على الملكين ببابل هاروت وماروت وما يعلمان من أحد حتى يقولا إنما نحن فتنة فلا تكفر فيتعلمون منهما ما يفرقون به بين المرء وزوجه وما هم بضارين به من أحد إلا بإذن الله ويتعلمون ما يضرهم ولا ينفعهم ولقد علموا لمن اشتراه ما له في الآخرة من خلاق ولبئس ما شروا به أنفسهم لو كانوا يعلمون)، الآية 102 من سورة البقرة
صدق الله العظيم
عرفتوا مين؟
عرفتوا مصيرهم؟
و لبئس ما شروا به أنفسهم لو كانوا يعلمون.. )
الصبح جابر فتح عليا الباب..
كنت خارج ريحتى و ريحة ملابسى لا تطاق...
جابر خلانى اغتسل و ادالى لبس من عنده... و قعد معايا فضل يعلمنى أذى الناس ازاى..
اكيد دلوقتى كلكم عاوزين تسألونى عن يارا
يارا بقا حصل معاها موقف خلانى انتقمت منها هى كمان
لما احوالى اتغيرت و الكل لاحظ ده و لما غبت الاسبوعين دول و رجعت
طبعا لما رجعت كان شكلى متغير ....نحفت اوى ووشي بقا عليه غضب الله
امى لما شافتنى زى ما يكون معرفتنيش بقت تبص فى وشي كدا و هى مستغربه اوى
مالك بتبصيلى كدا ليه ؟
انت كنت فين يا عمر ؟ و شكلك متغير كدا ليه ؟؟
و انتى مالك انتى
انت بتكلم مين كدا ؟
بكلمك انتى هكون بكلم مين يعنى ؟ و اوعى من وشي بقا
امى جالها ذهول و طبعا خافت تقول لابويا يتخانق معايا ففكرت انها تجيب ليا اكتر شخص انا بحبه فى حياتى ...يارا بنت خالى
امى اتصلت على يارا و قالت لها تعالى عاوزاكى
و لما جت يارا حكت لها على كل اللى حصل منى فى الفتره اللى فاتت و طلبت منها أنها تطلع لى الاوضه عشان تفهم منى سر التغيير دا كله ؟
طبعا يارا مكدبتش خبر و طلعت لى
ازيك يا عمر
الله يسلمك ازيك انتى
انا الحمد لله ...خالتى بتقول انك متغير ...انا عاوزه اعرف انت متغير ليه ؟ و كنت فين الفتره اللى فاتت دى و كنت قافل تليفونك ليه ؟
يارا كانت بتتكلم قدامى و انا مش سامع هى بتقول ايه ...كل اللى جه فى عقلى ساعتها كلمه طهطائيل أن النساء كلها حلال ليا
قمت قربت منها و قعدت جنبها و حطيت ايدى على شعرها
يارا انزعجت جدا لان دى اول مره امد ايدى عليها
انت بتعمل ايه ؟؟
استنى بس افهمك
تفهمنى ايه انت اتجننت ؟
و راحت ضربانى بالقلم على وشي ال ايه عاوزه تفوقنى
رحت ماسكها بقوه و كتفتها هى بدأت تصرخ بصوت عالى بس انا مكنش هاممنى حد
امى جت على الصوت و شافتنى و انا ماسك يارا بقت تصرخ هى كمان و تشد فيا لحد ما عرفت تنفدها منى
يارا طلعت تجرى و شعرها منكوش و هدومها مقطعه
امى بقت تصرخ و تقولى انت حصلك ايه ؟؟
معرفش ساعتها حسيت أن الشيطان ركبنى اكتر و رحت زاقق امى مخرجها بره الاوضه لدرجة أنها انكفت على وشها
و بقيت سامعها بتقول حسبي الله و نعم الوكيل حسبي الله ونعم الوكيل
هنا غضبى زاد اكتر و اكتر ...رحت محرك الخاتم حضرلى واحد من الخدمه
قلت له انا عاوزك تنتقم لى من يارا و امها و ابوها
امرك ...ماذا تريد ؟؟
جنن لى امها ....عاوزها تمشي فى الشوارع الناس تتفرج عليها
يارا بقا عاوز يجيلها نزيف متعرفش تداويه و لا تلاقيله حل
أما حسن عاوزك تسيبه متعملوش حاجه كفايه حسرة قلبه على مراته و بنته
و من هنا بدأ انتقامى من كل اللى حواليا و حتى انتقامى من نفسي ...بقيت ااذى نفسي كتير
بعد كدا بقيت اتفنن في أذى الناس اللي ضايقونى في حياتى كلها.. باستخدام كتاب السحر و الخاتم و تعليمات جابر..
بدأت بحرق بيت واحد زميلى كان بيضايقنى كتير اوى و احنا فى المرحله الاعداديه و كان بيستقوى على العيال كلها مش عليا انا بس لان جسمه ضخم و كمان عيلته من أكبر العائلات فى البلد
دمرت لمصطفى حياته و دا كان معايا فى الثانوى و اخد منى كل صحابى بدمه الخفيف و جدعنته
االاذى موقفش لحد هنا كنت ساعات تضرب فى دماغى انى أجنن حد و بدأت بمرات خالى حسن زى ما قلت لكم
خليتها تجرى فى الشوراع تقطع فى هدومها و تنكش شعرها و خالى يجرى وراها بالمشوار و بعد ما كانت الست الكمل اللى مفيش فى عقلها جننتها على الاخر
طبعا هتسالونى ليه هى عملت لك ايه ؟ دى حتى كانت بتشكر فيك وواقفه جنبك
هقولكم أن هى نفسها مكنتش مضيقانى انا بس كنت عاوز احرق قلب حسن زى ما حرق قلبى و رفضنى لذنب انا معملتوش
لما مراته تتجنن و تفرج عليه الناس مش هيبقى قادر يرفع دماغه من العار و ميبقاش حد احسن من حد
طبعا هو انشغل بيها جدا و بقى يسافر يكشف عليها بعد ما يكتفها لان حالتها كانت صعبه اوى .
ابويا حاول هو كمان يكلمنى و يسالنى عن شغلى
ليه مبقتش تروح شغلك يا عمر ؟
و اروحه ليه ؟
سبحان الله هو الناس بتروح شغلها ليه ؟ مش عشان يكونوا نفسهم و يعملوا قرش ليهم و للزمن
انا مش محتاج فلوس معايا اللى مكفينى
لحد امتى هيكون معاك يا ابنى ؟
لحد اخر العمر و لو سمحت ملكش دعوه بيا ...لما اجى اقولك هات جنيه متبقاش تدينى
ابويا بصلى كدا و هو مش مصدق نفسه و شفت دمعه فى عينه حابسها بالعافيه عشان ميعيطش قدامى
ابويا قام خرج من الأوضة من غير و لا كلمه
بعد كدا ابويا و امى بدأوا يتجنبونى نهائى و ميتكلموش معايا خالص
فى الاول الوضع ده كان مريحنى بس بعد كدا زهقت و قررت انى ارجع القاهره و أوسع نشاطى منا دلوقتى بقيت الشيخ صابر .
يتبع
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧(الجزء_الثانى)
#الحلقه_السابعه
بعد كدا ابويا و امى بدأوا يتجنبونى نهائى و ميتكلموش معايا خالص
فى الاول الوضع ده كان مريحنى بس بعد كدا زهقت و قررت انى ارجع القاهره و أوسع نشاطى منا دلوقتى بقيت الشيخ صابر .
رجعت شقه خالى حسن فاكرينها ؟؟ ايووووه شقه ٧٧
طبعا فى الفتره دى كنت طولت دقنى و ابتديت البس جلاليب بيضا و عبايات
اول ما عبده شافنى استغرب كدا و قعد يشبه عليا
رحت هازز دماغى و قلت له ايوا انا
تعالى ورايا يا عبده
عبده طلع ورايا و هو مستغرب من الطريقه اللى بكلمه بيها طلعت الشقه و كان بقالها فتره مقفوله
قلت لعبده نضف لى الشقه دى يا عبده عاوزها بتلمع
عبده نضف الشقه على أمل انى هديله مبلغ محترم
قعد لبعد الضهر ينضف فيها و انا دا كله قاعد فى البلكونه
عبده خلص الشقه و قالى
اى خدمه تانى يا سي عمر بيه ؟
لا يا عبده اتفضل انت
اتفضل ...اتفضل ؟؟؟
ايه مالك واقف زى الصنم كدا ليه ؟؟
عاوز اجره النضافه
مفيش اجره للنضافه يا عبده
ازاى الكلام ده ؟؟ انت هتنصب عليا و الا ايه ؟ دا انا اتقطم وسطى فى شقتك دى
بقولك ايه يا عبده مترغيش كتير عشان مأذيكش
تأذينى يعنى ايه ؟؟ انت فاكرنى هخاف منك و الا ايه ؟؟
و متخافش منى ليه ؟؟
بقولك ايه ايدك على ميه جنيه و انا كدا كارمك لأجل العيش و الملح
عاوز مية جنيه؟؟ اتفضل
ايه دا ؟؟؟ الله يخليك يا سي عمر اعدلنى انت قلبتنى كدا ازاى ؟؟
عشان تتعلم الادب و انت بتتكلم مع سيدك صابر
سيدى صابر مين؟
انا
حرمت يا سيدى بس اعدلنى
هعدلك......بس تسمع الكلام
حاضر حاضر و الله هسمع حاضر
تعالى هنا
نعم يا سيدى
دلوقتى انت قلت لى أن عفاريت الشقه دى مسبوش حد الا اما اذوه صح ؟
ايوه صح
طيب انا بقا عاوزك تقولى على الناس التعبانه فى العماره هنا عشان اعالجهم و لو تعرف اى حاله تعبانه انا اعالجها
لا انا معرفش حد
اسلك يا عبده و لك عموله حلوه عن كل زبون تجيبهولى
بص هو انا اعرف حاله بس ملهاش دعوه بالعماره ...هى فى العماره اللى جنبنا كان سيد البواب زميلى بيقولى عليها و بيقولى أن أهلها داخوا بيها عند الشيوخ ملقوش لها علاج
حلو اوى ...انا بقا عاوز الحاله دى ...اسمها داليا صح ؟
اللهم صلى على النبى ...انت عرفت منين ؟؟؟
و انت مالك بقا .. المهم البنت دى تكون عندى هى و اهلها بكرا
حاضر انا هقول لسيد و هو يقولهم
لا يا عبده متدخلش سيد فى الموضوع انا عاوزك تطلع لهم دلوقتى و تقولهم انك لقيت شيخ كويس اوى هيعالج بنتهم بدون مقابل
نعم ...بدون مقابل ازاى ؟ طب و هاخد عمولتى منين ؟؟
ملكش دعوه بس قولهم كدا و عمولتك محفوظه
طب ما هم ممكن يقولولى عرفت منين أن بنتنا تعبانه ؟ انا رايى اخلى سيد هو اللى يقولهم
طب و ماله بس سيد اللى هياخد العموله
لا لا خلاص هروح ...بس انت متأكد يا سي عمر انك هتعرف تعالجها ؟
أسمى الشيخ صابر و لو غلطت مره تانيه انت عارف ممكن اعمل فيك ايه ؟
لا خلاص خلاص هروح لهم حاضر
نزل عبده و هو شاكك فيا و مش قادر يعرف سر التغيير دا كله
انا بقا الليله دى فرغت نفسي عشان اصطاد عفاريت الشقه
ما هو اكيد مايس مكنتش لوحدها
كنت جايب معايا صندوق رنجه منا عارف إن دى الطريقه اللى هتجيبهم و ليا سابقه معاهم فى المواضيع ده
قفلت النور و ضلمت الشقه خلتها كحل و قعدت على سرير مرات خالى فى الاوضه اللى شنقت فيها نفسها و دا بعد ما حطيت الصندوق قدامى على ترابيزه و كشفت الغطا
قعدت على السرير و معايا سبحتى اللى ادهالى جابر و علمنى اقول ايه عليها
و فجأة ابتدوا يهلوا واحد ورا التانى
مقدروش يقاوموا ريحة الرنجه
بعد أقل من خمس دقايق كانت الاوضه اتنطرت عفاريت ....
اول مره اشوف كميه عفاريت بالطريقه دى
عشيره بحالها واقفين كلهم طواااال و سود
بس كان فيهم واحد مميز شويه و على دماغه تاج و الكل مستنيه لما يوزع عليهم الاكل
تقريبا كدا ده الملك بتاعهم
اول ما دخل و شق صفوفهم و لسه بيقرب من الاكل كلمته
استنى ....انت بتعمل ايه ؟؟ و مين اداك الاذن تقرب من اكلى ؟
نعلم أنها وليمه اتفاق قد اعددتها لنا
يعنى انت عارف انى جايب الاكل ده لكم مخصوص ؟
اى نعم
طيب حلو اوى ...انا بقا عاوز عهد منك و من عشيرتك انكم تكونوا فى خدمتى
نحن بالفعل بخدمتك فقبولنا بطعامك يعنى أننا اصبحنا فى خدمتك
انت اسمك ايه ؟
أسمى مارك
طيب يا عم مارك هنتعاهد على الطاعه و الولاء ليا انت و عشيرتك كلها و قدام ده هقدم لكم السمك و الرنجه اللى تحتاجوها
امرك سيدى صابر
طيب انا عاوزك دلوقتى تعرف لى كل المعلومات عن اللى اسمها داليا دى و تجيبهالى فى ثوانى
امرك سيدى بمجرد ان تغمض عينك و تفتحها ستجد ما تريد
البنت اسمها داليا ....معها جن عاشق منذ صغرها
و جالها منين الجن العاشق ده ؟
من الحمام ...كانت تغنى و تصرخ فى الحمام و جذبت انتباههم لها ...انجذب إليها سابور من أعتى ملوك الجن و التبس داخل جسدها ...احدث لها كثير من الالم و التعب النفسي ...كان يجعلها تبدو كالقرد فى عيون خطابها ...فكرت فى الانتحار مئات المرات و حاولت بالفعل مرتين و لكن اهلها انقذوها
طب و ليه الشيوخ اللى قبل كدا معرفوش يعملوا معاه حاجه
سابور من الملوك القويه جدا و ليس من السهل التخلص منه
لا بس احنا هنتخلص منه
و لكنى لا أستطيع سيدى
انت دورك انتهى لحد كدا انا معايا اللى هيخلينا نتخلص منه
يلا حلال عليكم صندوق الرنجه ...انصرف انت و اللى معاك
امرك سيدى
تانى يوم بعد صلاة العصر لقيت عبده طالع لى و بيقولى الجماعه تحت و جايين لحضرتك عشان الموضوع اللى قلت لك عليه
طيب يا عبده خليهم يطلعوا
بعد دقايق دخلت بنت جميله و معاها ابوها و امها
البنت كانت مضطربه جدا و باين عليها القلق و بتفرك اديها فى بعضها
اتفضلوا اقعدوا
يتبع
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧(الجزء_الثانى)
#الحلقه_الثامنه
تانى يوم بعد صلاة العصر لقيت عبده طالع لى و بيقولى الجماعه تحت و جايين لحضرتك عشان الموضوع اللى قلت لك عليه
طيب يا عبده خليهم يطلعوا
بعد دقايق دخلت بنت جميله و معاها ابوها و امها
البنت كانت مضطربه جدا و باين عليها القلق و بتفرك اديها فى بعضها
اتفضلوا اقعدوا
مالك قلقانه ليه يا داليا ؟
هى تعبت يا شيخ و احنا تعبنا معاها
الامور بسيطه يا امى
تعالى هنا اقعدى قدامى
حطيت ايدى على داليا و كانت جميله فعلا شعرها بنى طويل عيونها واسعه و لونها اخضر ...مقدرتش امسك نفسي انى املس بايدى على الشعر الحرير ده اللى مشفتش زيه
البنت اخدت بالها لقيتها بتبعد بجسمها عنى
اضطربت منا المفروض شيخ قلت لامها
انتوا جايبنهالى من غير حجاب ليه ؟؟ انا عمال اقرا و مش نافعه القرايه استنوا هدخل اجيب لها حاجه تغطى شعرها
دخلت جوه جرى على اوضه نوم خالى و قلبى بيدق جامد ...ايه اللى بتعمله ده يا صابر ؟؟؟ هتخلى الناس تاخد عنك فكره وحشه كدا من اولها ؟؟؟ بس هو قالى أن النساء كلها حلال ليا يعنى انا مبعملش حاجه حرام
طب مش كدا ...اثبت بس جداره لحد ما الناس تثق فيك
خرجت من الاوضه و معايا ايشارب من بتوع مرات خالى و اديته لامها و قلت لها لبسبها
الست لبستها و بدأت اهمس كأنى بقرا قران و حركت الخاتم عشان واحد من الخدمه يحضر معايا
ابتدى سابور يظهر
البنت عنيها احولت و بدأ صوتها يبقى زى صوت الراجل و بدأ يهدد
انا هموتها ...هموتها و هموت اى حد يقرب منها
انت اسمك ايه يا شجيع السيما انت ؟
اتستهزئ بى ؟؟؟ سأحرقك و سأحرق اسرتك بالكامل
لا برافو ...ورينى هتحرقنى ازاى ؟ ادينى ادامك اهو ...يلا يا اخويا ورينى شطارتك
سأحرقك سأحرقك
ولااااا ...بطل شغل الهبل ده و قولى اسمك ايه
ساااابوووور
عندك كام سنه يا سابور ؟
الف عام
و مش عيب عليك راجل كبير كدا و تلبس عيله صغيره متجيش حفيده حفيده حفيدتك ؟
انى احبها
هو انت متعرفش أنه مينفعش ؟؟؟
و ما المانع ؟
المانع انك من عالم و هى من عالم تانى خالص
لن اتركهها
لا هتتركها بمزاجك أو غصب عنك
من سيجبرنى ؟؟
انا ....هتطلع و الا أحرقك ؟؟
لن تستطيع
انت ديانتك ايه يا سابور ؟
انا ؟...بلا ديانه
طب يلا يا حلو انا عاوزك تسلم
لا ..لا لا اريد
قول ورايا اشهد ان لا اله الا الله و ان محمد رسول الله
لا لا
لا هتقول و الا هحرقك
لا لن اقول
بسم الله الرحمن الرحيم (أن شجره الزقوم طعام الاثيم كالمهل يغلى فى البطون كغلى الحميم ....)
خلاص ...اشهد ان لا اله الا الله و اشهد ان محمد رسول الله
حلو اوى ..انت كدا عظمه ...فى حد تانى معاك جواها ؟؟
لا انا فقط
حلو انت تلم نفسك كدا و تخرج بكل هدوء ما هو مينفعش تبقى مسلم و تضر مسلمه معاك ...يلا هتخرج منين ؟؟
سأخرج من عينها
لا عينها لا ...انت عاوز تعملها عاهه
أخرج من بطنها
لا برده
من اين أخرج ؟
أخرج من الصابع الكبير لرجلها الشمال و انت خارج قول السلام عليكم
السلام عليكم
هنا صرخت البنت و اغمى عليها سندتها انا و ابوها و حطيتها على الكنبه
ابوها بص لى كدا و قالى هو كدا مشي يا شيخ ؟
ايوه
معقوله بالسهولة دى ؟
و ايه الغريب فى كدا ؟
اصل انت متعرفش احنا لفينا اد ايه ؟؟ و رحنا لكام شيخ
بص يا استاذى الجن اللى بيبقى متلبس الحاله لما بيشوف أن الشيخ قوى بالله مبيقدرش يعمل معاه شئ ...و بعدين كله بأمر الله و احنا مجرد اسباب
جزاك الله خيرا يا شيخ
فوقت البنت و كانت مش فاكره اى حاجه خالص قعدت اطبطب عليها و اقولها حمدالله على السلامه يا داليا
البنت بعدت شويه عنى لأنها كانت حاسه انى مقرب لها اوى ...لانها كانت تقريبا فى حضنى
تمالكت نفسي بسرعه و قمت وقفت
ابوها قالى عاوز كام يا شيخ ؟؟ اي حاجه تقول عليها انا موافق
لا انا مبخدش حاجه ( طبعا عبده واقف هيموت ...عاوزنى اطلب فلوس عشان عمولته )
ازاى يا شيخ ؟
زى الناس ...بس لازم تحيبوا لها مجموعه زيوت تدهنوا بيها جسمها لأن الجسم مفتح دلوقتى و ممكن اى حاجه تانيه تدخل ..
و ماله نجيب
بس لازم تكون زيوت اصليه و كمان هكتب لكم على عسل نحل اصلى و شويه بخور عشان التحصين
طب و هنجيب الحاجات الاصلى دى منين يا شيخ ؟
و الله زى ما تحبوا من اى مكان موثوق فيه
ما احنا منعرفش
خلاص مش مشكله انا ممكن اجيب لكم الحاجات دى ...متقلقوش
طب و هتكلف كام الحاجه دى ؟
مش كتير ...حسبه خمس الاف جنيه
ياااا .مش كتير يا شيخ ؟
يا ستى هو انا قلت لك هاخد حاجه لنفسي دا تمن الزيت و العسل و البخور و على العموم لو تقدروا تجيبوه انتوا جيبوه انا مضربتش حد على ايده
اسكتى يا ام داليا خلاص يا شيخ ...اتفضل الفين دلوقتى اهم و بكرا باذن الله هبعت لك الباقى مع عبده
تمام و انا هنزل اشتريلكم الحاجه و اقرا عليها و هى تدهن من الزيت و تاكل من العسل لمده سبع ايام بلياليها و بعدها تجيبوهالى عشان اتطمن عليها
متشكرين اوى يا شيخ جزاك الله خيرا
و اياكم يا ابو داليا
خرج الراجل و مراته و بنته و هما فى منتهى السعاده مفضلش غير عبده واقف يبص للفلوس المحطوطه على التربيزه و بيهرش فى طاقيته
خد. يا عبده انزل اشتريلى ازازه زيت زيتون و كيلو عسل و شويه البخور دول من العطار اللى على الناصيه
ايه دا ؟؟ هو انت مش قلت انك هتجيب لهم حاجه مخصوصة ؟؟
و انت مالك يا عبده ؟ انت هتدخل فى الكلام ده كمان ؟
خد المتين دول هات بيهم الحاجه و المتين التانين دول عشانك
من يد ما نعدمها ...حاضر فوريره
عبده راح جاب لى العسل و الزيت و البخور و قلت له تعالى بكرا خدهم على ما اقرا عليهم و تجيب لى بقيه الفلوس من الجماعه
فعلا تانى يوم عبده ودى لهم الحاجه و جاب لى الفلوس
بعد اسبوع جت داليا مره تانيه بس المره دى بقى شكلها احلى و ابتسامتها ملت وشها
قريت عليها و سألتها عن حالها قالت انها بقت الحمد لله احسن و مبقاش يجيلها كوابيس زى الاول و لا بقت تسمع النفس اللى كانت بتسمعه جنبها لما تيجى تنام و لا بقت تحس ان حد جنبها بيحضنها
طيب عظيم يا داليا انتى كدا خفيتى خالص ...لازم بعد كدا تصلى و تداومى على اذكار الصباح و المساء و ياريت لو تبطلى تسمعى اغانى و تتحجبى
حاضر يا شيخ
متشكرين اوى يا ابنى ...و الله ما عارفين نشكرك ازاى ؟
لا شكر على واجب يا ابو داليا ...الشكر لله
طب احنا جايبين لحضرتك هديه كدا مش اد المقام
لا لا متشكر
انت هتكسفنا دا النبى قبل الهديه
اللهم صلى عليه
اتفضل ...دى ساعه هديه لحضرتك
طيب متشكر يا ابو داليا هديه مقبوله
خرج الراجل و هو منبهر باللى عملته معاه و مع بنته و كنت متأكد أنه هيكون دعايه حلوه ليا
تانى يوم لقيت عبده طالع و هو بينهج و بيقولى الحقنا يا شيخ صابر 😲
يتبع
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧(الجزء_الثانى)
#الحلقه_التاسعه
تانى يوم لقيت عبده طالع و هو بينهج و بيقولى الحقنا يا شيخ صابر 😲
فى ايه يا عبده ؟
فى جدع اسمه انور زعل مع أبوه شويه و ساب له البيت ...قوم واحد صاحبه اخده قعده عنده فى اوضه قديمه كدا فى الدور الارضى فى بيت جده
الحكايه دى يجى من شهر كدا ...امبارح صحابه لقوه فى حاله وحشه اوى فى اوضته خدوه لابوه و الراجل تايهه يا ولداه كان عمال يدور زى المجنون عن اى شيخ فى الجامع اللى جنبنا و بيقول ابنى هيروح منى ... و انه بقاله كام ساعه بيلف على المساجد الموجوده فى الحته و محدش بيدله ....قمت انا لقطته بقا و قلت له انا عندى اللى يعالج ابنك باذن الله و جيت جرى عشان اقولك
و الراجل ده فين ؟؟ و ابنه معاه و الا لأ ؟
الراجل انا سايبه تحت قلت له استنى هنا على ما اشوف الشيخ فاضى و الا لا
جدع يا عبده
أما الواد بقا هما مكتفينه ايد و رجل عشان مش قادرين عليه
طيب استنى هلبس جلابيتى و عبايتى و انزل معاك
طب و عمولتى ؟
يخربيتك يا عبده هو احنا لسه اشتغلنا ؟
نزلت لقيت الراجل قاعد على الدكه اللى بيقعد عليها عبده و هم الدنيا كله مرسوم على وشه ....زى ما يكون مصيبه تقيله وقعت على دماغه
رحبت بالرجال و طمنته و قعدت اهزر معاه و قلت له ابنك فين دلوقتى يا حج
فى البيت يا شيخ صحابه اللى لقوه مكتفينه لأننا مش قادرين عليه و الكلام ده من امبارح الفجر
خير يا حج متقلقش
رحت مع الراجل لقيت الواد فعلا متكتف و مرمى فى اوضه و اتنين من صحابه قاعدين بره الاوضه
سلام عليكم يا شباب
و عليكم السلام يا شيخ
عاوز اعرف بالظبط ايه اللى حصل مع انور
حاضر يا شيخ ....امبارح اخدت صحابنا و اخدنا تليفزيون صغير و طاوله و رحنا على الساعه ١٢ بالليل كدا نسهر مع انور لانه قاعد لوحده بعد ما عم الحج طرده من البيت
قعدنا نخبط على الباب مكنش راضى يفتح
طبعا احنا عارفين أن انور مش بتاع سهر بره و بينام بدرى و كمان كنا سامعين صوت فى الاوضه
واحد مننا اقترح أننا نكسر الباب الخشب لكن واحد تانى جسمه صغير قال استنوا انا هنط من الشباك ده
كان فى فتحه كدا زى شباك فى الحيطه زميلنا ده دخل منها و بعد دقيقه لقيناه فتح الباب و طالع يجرى من الأوضه
دخلنا كلنا ولعت النور لقيت انور متعلق فى الحيطة كأن حاجة رافعاه ومكتفاه ومسمراه ....ساعتها ربنا الهمزة و قلت بسم الله الرحمن الرحيم لقيته اتهبد على الارض
اول ماوقع جرينا عليه نقوله مالك مبيردش وعمال يترعش قلتلهم خرجوه فى الهوا بره يا جدعان ،، خدناه وقعدنا على الرصيف نفوق فيه اكتر من ساعة وانا اكلمه واهزر معاه علشان يبدأ يتكلم ،، لحد مروق كده وخدته والشلة وطلعنا على القهوة جبتله لمون وقعدنا على ترابيزة فى ركن بعيد عن الناس وقلتله ايه اللى حصلك يا عم ده وازاى اتعلقت كده
بدأ يحكى ،، قال انا دخلت على الساعة ٩ ونص قلت انام بدرى اول مقعدت على السرير سمعت حد بيزعق وبيقول رجلى يا ابن ال.... ،، فقلتله انت فين وبتشتم ليه يا ابن ال..... ،، وطبعا لقى حاجة زى دخان نازله من السقف ودخان من على السرير اسود واتجمعوا جنب بعض على شكل راجل طويل وراجل اقصر منه وشهم احمر وجسمهم اسود عرايا والصغير بيقوله ده خبطنى كذا مرة ،، الواد طبعا اغمى عليه وفاق لقى نفسه متعلق وكل شوية يعدى خيال من قدامه يضربه بالقلم على وشه ويقوله هنفضل معلقينك لحد متموت ،، فضل ياعينى يحكى انه الساعتين دول اتبهدل فيهم وكان نفسه يغمى عليه لكن كل ميقفل عينه ياخد قلم على وشه ويسمع صوتهم بيقولوله مش هتنام ولا تغمض عينك لحد متموت يا ابن ال....
واحد صاحبنا قاله مصوتش ليه طيب عشان حد يسمعك ،، قاله انا كنت بصوت بعلو حسى وكأن حد حاطط ايده على بقى والصوت بيطلع زى همهمة ضعيفة ..
قلتله طب مقريتش قرأن او اى حاجة ،، قالى انا ملحقتش اعمل حاجة لأنى فوقت متكتف ومتعلق ومتكمم ..
طبعا حلف باليمين انه مش داخل الأوضة دى ،،
بعد كدا خدنا انور روحناه بيته وشرحنا لعم الحج على اللى حصله فأفتكرنا بنعمله حوار علشان يرجع البيت واحنا نحلفله وهوا راسه قافشة اننا بنكذب
والدته اول مافتحت باب اوضتها و كانت مشغله راديو على القرآن......اول ما سمع صوت القرأن لقينا الواد بيبرق وعمال يتشنج ويطلع كذا صوت ويشتم فينا كلنا ،،
عم الحج اتصدم لما لقى الواد كده طبعا لأنه مكانش متوقع ان ده كلام حقيقى حصله ،،
مسكنا الواد كلنا وكنا حوالى ٥ وأبوه ومش عارفين نكتفه لحد مربطنا ايده ورجله بحبال غسيل ،، وقلت لعم الحج وديه الجامع للشيخ يا عمى يقرأ عليه قرأن ،، والواد يصوت ويقولنا انا مش هسيبه ولا اخرج منه لو اللى معايا خرجوا وحسابكم كلكم معايا عسير ،، انا مش هخلى حد منكم ينام انا عيلتى كبيرة جدا ،، طبعا كلنا كنا مرعوبين ،، واضطرينا طبعا نسيبه متكتف فى اوضة القرأن شغال فيها لحد منام وشايفين السرير يطلع بيه وينزل ،،
وطبعا مشينا على الفجر وأبوه قال انا هروح اجيبله الشيخ من الجامع بكرا باذن الله
طبعا احنا مشينا و رجعنا من شويه عشان لو فى اى حاجه نساعد بيها
تمام يا شباب ....يلا بينا
طب يا شيخ هو مفيش خطر يعنى ؟؟ يعنى هما ممكن يأذونا فعلا ؟
هههههه انتوا خايفين ؟ امال جايين تساعدوا فى ايه ؟ طب خلاص خليكم هنا انا هدخله لوحدى .
يتبع
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧(الجزء_الثانى)
#الحلقه_العاشره
تمام يا شباب ....يلا بينا
طب يا شيخ هو مفيش خطر يعنى ؟؟ يعنى هما ممكن يأذونا فعلا ؟
هههههه انتوا خايفين ؟ امال جايين تساعدوا فى ايه ؟ طب خلاص خليكم هنا انا هدخله لوحدى .
هتيجى معايا انت كمان يا حج و الا هتخاف زيهم ؟؟؟
لا هاجى ...هاجى يا شيخ
دخلت على الولد لقيته شاب لسه مكملش عشرين سنه بالكتير ١٧ أو ١٨ سنه و لقيتهم مكتفينه و مشغلين جنبه القران على اذاعه القران الكريم .
شاورت لابوه يقفل الراديو و اول ما قعدت قدام الولد بصلى و قعد يضحك ويقولى مش هتحرقونى لأنى مش لوحدى وهعرفكم شغلكم بعدين ،،
طب أهدى على نفسك كدا ....انتوا اذيتوه ليه ؟؟
احنا حذرناه قبل كدا بالخبط و الزعيق و هو مسمعش الكلام و مش هنسيبه
بس دا عيل صغير و مكنش قصده يأذيكم
قصده و الا مش قصده هو كدا و خلاص
فضلت اتكلم معاهم و كل شويه يظهر لى صوت واحد مختلف عن اللى قبله
و كلهم بيستحلفوله لأنه اخد مكانهم و ازعجهم فى منزلهم على حد قولهم
ازاى بتقولوا دا منزلكم ؟
منزلنا اسكننا فيه درويش ( عرفت بعد كدا أن درويش ده كان راجل ساكن فى الاوضه دى و كان صحاب البيت بيسمعوه بيتكلم مع حد مش موجود و كان بيشغل بخور ريحته وحشه اوى و بالرغم من أن صحاب البيت كانوا عارفين دا كله الا انهم مكنوش يقدروا يخرجوه لانه كان بيدفع الايجار فى ميعاده ...الشخص ده فضل ساكن فى الاوضه دى لحد ما خرج فى يوم و مرجعش الجماعه صحاب البيت قفلوا الاوضه من ساعتها لحد ما انور جه و قعد فيها )
طيب انا قلت لكم انه ولد صغير و مكنش يقصد و لا يعرف بوجودكم
خلاص احنا هنسيبه بس يرضينا الاول ،، طلباتكم ايه ؟؟؟؟؟
ديك احمر دكر بعرف كبير ويتدبح عليه جوه الحمام ولما الدم ينزل عليه هنسيبه ،،
سكت شوية وبعدين قلت لهم ندبح بره الحمام ،،
لا هتدبح جوه علشان متسميش عليه ،،
و هتسبوه ؟؟؟؟؟
ايوه هنسيبه
طب و لو محصلش ؟
لا هيحصل بس اعمل اللى بنطلبه منك
تمام انا هخليهم يجيبوا الديك بس لو بتكدبوا هيكون حسابى معاكم كبير اوى
متهددناش ...احنا نقدر نأذيه و نأذى عيلته كلها كمان
اخدت ابو الولد على جنب و قلت له انت بنفسك سمعت اللى هما طالبينه لو حابب تنقذ ابنك يبقى لازم تنفذ لهم طلباتهم
الراجل هز دماغه لانه مغلوب على أمره
حاضر يا شيخ انا هنزل اجيب الديك اللى طلبوه
اوعى تنسى يا ابو انور ديك احمر بعرف كبير
حاضر يا شيخ هنزل اجيبه عشر دقايق بس على ما تشرب الشاى
سبت الواد فى الاوضه زى ما هو و طلعت قعدت فى الصاله و أبوه نزل جرى يشترى الديك و شويه بخور كدا طلبتهم منه ...
اول ما قعدت على كرسي من كراسي السفره لقيت امه قاعده تعيط
متزعليش نفسك يا حجه الواد هيكون زى الفل باذن الله
صحيح يا شيخ ؟؟
باذن الله ...بس هنحتاج منك حاجه صغيره كدا
ايه هى ؟؟ انا مستعده اعمل اى حاجه بس ابنى يخف
ابنك ساكنه اكتر من واحد و الصراحه حالته صعبه بس ان شاء الله هتتحل
يا حبيبي يا ابنى
جوزك نزل دلوقتى يجيب ديك مطلوب منك بقا دلوقتى تدخلى تلبسي حاجه خفيفه كدا و تفكى الطرحه اللى على شعرك دى و يدوب تحطيها كدا و يكون حته من شعرك باين و هتيجى تقفى معانا فى الحمام و احنا بندبح الديك على ابنك انتى اللى هتمسكيه قدامى
طب و البس خفيف ليه يا شيخ ؟
طلبات الاسياد يا ست ....هو انتى مش عاوزه ابنك يخف و الا ايه ؟
لا خلاص حاضر حاضر هعمل كل اللى تقولى عليه بس ابنى يرجع كويس زى ما كان
و فعلا الست دخلت لبست حاجه خفيفه و بينت نص شعرها و جوزها جه بالديك
طلبت من جوزها يولع لى فحمه كبيره عشان احط البخور عليها
شغلت البخور و اخدت السكينه و طلبت من الراجل يسند ابنه عشان يدخله الحمام و طلبت من الست تدخل و تقف قدامى و الواد يكون فى النص بالظبط ما بيننا
شاورت للراجل أنه يخلى ابنه يوطى دماغه شويه و يغطيه بملايه كنت طلبتها من امه
و جبت الديك و الست مسكته قدامى و رحت دابحه فوق جسم الولد
الدم غرق الولد و غرق وشه و الملايه
اول ما دبحت الديك على الواد لقينا اصوات بتضحك و الملاية طارت لحد السقف وبعدين نزلت والواد اغمى عليه
شاورت لابوه يرفعه معايا و نوديه على سريره و قعدت جنبه اهمس بكلام مش مفهوم و امه و أبوه واقفين هيموتوا من القلق عليه
الواد فتح عيونه و بص لى بدهشه و قالى
انا فين ؟ ،،
فى بيتكم يا عم ،،
ازاى ابويا دخلنى ،، ؟
انت مش فاكر حاجة خالص ،، ؟
انا فاكر انى شفت دخان فى الاوضة وبس وحسيت ان الحيطان بتقرب عليا لحد متفعصت وسطهم ..
انت قلت لصحابك ان اتنين طلعولك علقوك وقعدوا يضربوا فيك وحكيت لهم على القهوة ،،
لا انا مقلتش حاجة كده خالص ،،
يبقى دا اكيد الجن اللى عليك كانوا بيخوفوا اصحابك او بينبهوهم عشان ميدخلوش الاوضة .
طيب كدا انت بقيت تمام حمدالله على سلامتك
اول ما قلت كدا بقت امه تزغرط وابوه يحضنه ويبوسه والواد طبعا مش مصدق اللى بيحصل حواليه ومندهش جدا من اللى بيحصل ده
خرجت من الاوضه و الراجل مبقاش عارف يشكرنى ازاى لدرجه انه كان عاوز يوطى على ايدى يبوسها
لا العفو يا حج ميصحش كدا
مش عارف اشكرك ازاى يا شيخ ربنا يحازيك خير يارب
احنا معملناش حاجه يا حج
كل ده و معملتش ؟ دا انت أنقذت ابنى ..طلباتك يا شيخ
انا مليش طلبات
لا و الله ما ينفع
بجد مليش طلبات
هنا الست ردت و قالت يبقى تاخد هديه صغيره كدا و راحت قالعه غويشه من أيدها و حطيتها فى ايدى و قالت
اوعى تكسف ايدى
ما عاش اللى يكسف ايدك يا حجه و انا قبلت الهديه
طب مفيش اى حاجه تانيه نعملها يا شيخ ليرجعوا تانى ؟
لا متخافش مش هيرجعوا انتوا بس سيبوا الواد بالهدوم اللى عليها دم دى للصبح و بعدين يدخل يستحمى و يغير هدومه عادى
حاضر يا شيخ
...سلام عليكم
و عليكم السلام و رحمة الله و بركاته
خرجت و انا فرحان بنفسي و كنت عارف إن الناس دول هيجبولى زباين كتير و الغويشه اللى اخدتها من الست يجيلها عشرين جرام يعنى تقطع لها اكتر من عشر الاف جنيه
روحت البيت و لقيت عبده مستنينى ع الدكه بفارغ الصبر و عنيه بتلمع زى القطه اللى شافت سمكه و بيفرك فى اديه استعدادا للقبض
مستنى انت و جاهز ؟
طبعا
طب خد يا اخويا المتين جنيه دول عمولتك
من يد ما نعدمها يا سي عمر قصدى يا شيخ صابر
صحصح معايا يا عبده و انا هأكلك الشهد
من عنيا الاتنين
طلعت الشقه و حطيت الغويشه و الخمس آلاف جنيه اللى اخدتهم من ابو داليا قدامى و مبقتش مصدق أن فى خلال يومين بس جبت المبلغ ده كله
قعدت افكر أوسع نشاطى ازاى ؟ منا مش هعتمد على عبده لوحده لحد ما جتلى الفكره اللى متخيبش ابدا ....
يتبع
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧(الجزء_الثانى)
#الحلقه_الحادى_عشر
طلعت الشقه و حطيت الغويشه و الخمس آلاف جنيه اللى اخدتهم من ابو داليا قدامى و مبقتش مصدق أن فى خلال يومين بس جبت المبلغ ده كله
قعدت افكر أوسع نشاطى ازاى ؟ منا مش هعتمد على عبده لوحده لحد ما جتلى الفكره اللى متخيبش ابدا ....
ايه دلوقتى اسرع وسيله تواصل بين الناس ؟؟
طبعا الانترنت دلوقتى وسيله التواصل الاولى
ابتديت اعمل حساب على الفيسبوك باسم الشيخ صابر و ادخل فى جروبات كتير بتتكلم عن السحر و الاسحار و اعلق لاى حد محتاج مساعده انى ممكن اساعده
فى نفس الوقت مليت صفحتى منشورات من المنشورات اللى بيحبها الناس و ضميرهم بيستريح لها و هى منشورات الرقيه و الادعيه
كمان أنشئت قناه على اليوتيوب و سمتها قناة الشيخ صابر لعلاج السحر و الحسد و صورت فيها شويه دروس و ادعيه لزوم الشئ
فى الاول كان الموضوع هادى بعد كدا و أما ابتديت اتعرف عملت جروب خاص بيا و سميته علاج السحر و الحسد
ابتدى يبقى ليا رواد و كتير منهم كان بيتمنى بس انى ارد عليه
حالات كتير جاتلى عن طريق النت و ابتدت شهرتى تزيد و الفلوس تكتر
دخلت فى سكة الآثار و بقيت عشان اعاين المكان بس و اقول فيه اثار أو لا اخد عشر الاف جنيه قبل ما اتحرك من مكانى
لما الفلوس كترت معايا اشتريت بيت كبير خاص بيا و شغلت معايا ناس كتير لاستقبال الحالات اللى كانت بتبقى واقفه و مش لاقيه مكان من كتر الزحمه
طبعا الكشف بس كان له سعر و العلاج بسعر تانى
شهرتى كبرت اكتر و بقى يجيلى حالات من دول كتير اوى
عملت حاجه كانت مهمه برده و هى انى انضميت لأحد الطرق الصوفيه و بقيت احضر الموالد و اى مناسبات و بقيت من أكبر شيوخهم اللى بيفتخروا بيهم
و فى يوم و انا بعالج الحالات و كان فى ضغط شغل كتير اوى عندى لدرجة انى طلبت من المساعدين أنهم يحددوا مية حاله بس لانى تعبان و مش قادر اكمل
خلصت ٩٩ حاله و دخلت عليا الحاله الاخيره و كنت خلاص جبت أخرى
برفع نظرى لقيتها آيه .....
يااااا آيه الطالبه اللى كانت عندى ...سبحان الله الدنيا صغيره اوى
البت داخله مكسوره و معاها ابوها و امها
اول ما شفتها صحصحت و قلت لها أهلا ...تعالى كنت مستنيكى من زمان
البنت بصت لى باستغراب و معرفتنيش طبعا لان شكلى كان اتغير كتير طريقه لبسي و دقنى
و قعدت تشبه عليا
قلت لابوها اخرجوا استنونى بره
طب مش لما نقولك على اللى فى البنت يا شيخ ؟
لا متقوليش ...يلا على بره و لما هعوزك هنادى عليك
الاب و الام خرجوا و انا بقا بصيت لايه كدا و قلت لها
اهلا عم جنابور ...تعالالى فى حساب قديم بينى و بينك ... فاكر القلم ياض اللى ضربتهولى ؟؟؟
انا هدفعك تمن القلم ده غالى اوى
هنا البت عنيها احمرت اوى و طلع منها صوت رهيب ( بس طبعا مخوفنيش و لا هز فيا شعره )
دا انا اللى كنت مستنيك من زمان ...المره اللى فاتت ضربتك بس المره دى انا هشلك و أحرق لك بيتك اللى انت فرحان بيه ده
ههههههههه تصدق ضحكتنى ...اه و الله ضحكتنى ...تصدق بقالى كتير مضحكتش و انت جيت دلوقتى ضحكتنى ...انت متعرفش انا بقيت ازاى و لا معايا قوه اد ايه
مهما كان معاك من قوه عمرك ما هتقدر تغلب الشاه جنابور
و لا شاه و لا معزه ...انت فاكر انك هتخوفنى بالكلمتين بتوعك دول ؟؟ جرب كدا تعمل معايا حاجه ؟؟ انا عاوز اشوف
انا اقدر أحرق لك المكان فى الحال
طب من فضلك احرقهولى اصلى عاوز اغير الديكور ...يلا ورينى
انت بتستهزئ بيا ؟ متعرفش أن عشيرتى اكتر من مليون و ممكن يخسفوا بيك الأرض
يا عم منا قلت لك جرب كدا تعمل حاجه و نشوف مين فينا اللى كلامه صح
انا هوريك ...انت غشيم و متعافى
ايوه انا غشيم ورينى يا عم المحترف
فى اللحظه دى لقيت جنابور صرخ صرخه عظيمه زى ما يكون بيستدعى حد و لقيت المكان اتنطر تعابين و مش اى تعابين دى تعابين مولعه فى كل مكان
فى اللحظه دى حركت الخاتم خمس مرات و لفيته بسرعه حضرت الخدمه اللى معايا وشاورت لهم يتعاملوا
فى ثانيه واحده كانوا لموا كل التعابين دى و مسكوا جنابور ايدوه ساعتها الثبات راح والثقه راحت وابتدي الصراخ والزق وابتدي يخبي وشه بايده و بعد ما كان عمال يتحدانى بقى عامل زى الكلب بيترجاتى انى اسيبه
ههههههههه مين فينا بقا يا سي جنابور اللى طلع كلامه صحيح ؟؟
خلاص سبنى و اوعدك هبعد عن البنت
لاااا هو دخول الحمام كدا زى خروجه ...انت لازم تفهمنى الحكايه من الاول و دخلت للبت دى ازاى ؟
انها زوجتى
زوجتك ازاى يعنى ؟
انا في جسمها من وسنها ٩سنين وابوها ال عطيهالي
ابوها ؟؟؟؟
ايوه مقابل خدمه عملتهالوا وبقت ملكي .
ازاي؟؟؟
طلع ان الاب كان عنده كتب لتحضير الجن وكان بيستخدم الجن في امور حياته ساحر بقاا الله اعلم بيهبب بيهم ايه الله اعلم .
الجن ال كان موجود شاه وشاه يعني ملك ملوك اسمه جنابور عمره 160الف عام .
كان مملك او منصب علي عدد مليون و500جن وكانوا يعبدوه وهو من طلب بنت الرجل قربان له للاستمرار في خدمته واقنعه انه حامي ليها .
طيب كدا يا عم جنابور انا مضطر أحرقك
لا لا ارجوك اتركنى و سأرحل للابد
لا مينفعش اتركك لازم تموت
لا ارجوك انا مستعد اكون خادمك الأمين
خادمى الأمين ؟؟؟؟
اى نعم ...انا معايا اكتر من مليون جنى و كلهم تحت امرى و لو وافقت هيكونوا تحت امرك
حلو اوى ...و اللى يغدر ؟؟
مش فاهم
لا فاهم و بتستهبل ...الغدر جزائه الموت خلاص ؟
موافق
يلا ادينى العهد انك تكون من خدمتى اللى لو استدعيتك فى اى وقت تحضر
لك العهد منا
و تطلع من البت دلوقتى حالا و متقربش منها نهائى مره تانيه و لا اى حد من طرفك
امرك سيدى
سيبوه ...
و انت طالع قول سلام عليكم
سلام عليكم
اول ما خرج البت اغمى عليها فوقتها و قلت لها
حمدالله على السلامه يا ايه
حاسه بايه ؟
مصدعه شويه
متقلقيش هتكونى كويسه دلوقتى
ضربت الجرس للمساعد و قلت له طلع ايه بره ترتاح و ناديلى ابوها
اول ما الراجل دخل عامل فيها عم البرئ و بيقولى خير يا شيخ
عندى فى الخدمه واحد شديد اسمه ابو الطراطير و صراحه انا كنت متغاظ اوى من الراجل
رحت قايل : أيده يا ابو الطراطير
الراجل فى لحظه كانت اديه ورا ضهره كأن حد مكتفه
فى ايه يا شيخ ؟؟ انا عملت ايه ؟
بقى يا راجل يا عره تدى بنتك لواحد من الجن ...لا و مش اى جن
مكنش قصدى ...و الله ما كان قصدى
متحلفش ...انت مديلوه بنتك عشان يخدمك
صدقنى انا مكنتش اعرف أن ده اللى هيحصل
هو ايه بالظبط اللى حصل ؟؟
يتبع
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
 #الحلقه_الاولى : انا اسف يا خالى بس العفريته هى اللى دلتنى على المذكرات دى و على كتاب سحر كان موجود فى سقف…){kind=link}
تعليقات
إرسال تعليق