#شقة٧٧
#الجزء_الاول :
احب اعرفكم بنفسي انا عمر حاصل على ليسانس اداب قسم لغه انجليزيه عمرى ٢٤ سنه
من قريه صغيره من قرى محافظه الشرقيه
الحكايه بدأت لما فكرت انى انزل القاهره ادور على شغل
طبعا الحاجه فى البيت كانت معترضه انى ابعد عن حضنها و خصوصا انى ابنها الكبير اللى شافه قلبها قبل عينها زى ما دايما تقولى
أما الحج بقا فكان مأيدنى جدا و شايف انى لازم اتعب و ادور و انا شاب و كان يقول يعنى لو متعبتش و انت صغير هتتعب امتى امال
امى بقا مكنش بيعجبها الكلام ده و كانت بتتهم ابويا بأن قلبه جامد
امى لما ملقتش رجا معايا انا و ابويا اتصلت على خالى حسن عشان يعقلنى و يقنعنى انى مسافرش و اسيب البلد
خالى جه قعد معانا و للاسف اتفق رأيه مع رأينا انا و ابويا و بقينا تلاته ضد واحد
امى زعلت من خالى و قالت له
بقا كدا يا حسن ...جبتك يا عبد المعين تعينى لقيتك يا عبد المعين عاوز تتعان
ضحك خالى من كلام ماما و انفعالها اللى كان واضح جدا على وشها و قالها
دا مستقبله يا سهام و انتى لازم تفرحى أن ابنك راجل
خالى خرج من جيبه ميداليه مليانه مفاتيح و لقيته بيطلع مفتاح منها وبيقولى ...بقولك ايه يا واد يا عمر
خد المفتاح ده
مفتاح ايه دا يا خالى ؟
دا مفتاح شقة اخويا مصطفى الله يرحمه
بدل ما تنزل فى اوضه ايجار و الا بنسيون خد مفتاح الشقه و اقعد فيها هكتب لك العنوان فى ورقه
الشقه كانت فى مكان راقى ...و كنت اول مره اروح مكان زى ده
لما وصلت العماره قابلنى البواب على باب العماره سالنى
مين حضرتك ؟
قلت أنا طالع شقه ٧٧
شقه ٧٧ مش ساكنه ..مفيهاش حد
منا عارف يا سيدى دى شقة خالى مصطفى الله يرحمه
البواب بص لى بصى استنكار كدا و قالى خالك ازاى ؟
خالى زى الناس يا عم مالك ؟
و انا اش درانى انك لامؤاخذه مش حرامى
عيب عليك قدامك شاب زى الفل كدا مخلص كليه و جيش و لسه بشوكو و تقول حرامى؟
متأخذنيش يا سي الاستاذ الشقه مقفوله من زمان و انا عمرى ما شفتك هنا قبل كدا ..انا معرفش غير سي الاستاذ حسن
بسسسس ... انت عارف خالى حسن ؟ انا هتصلك بيه دلوقتى تسأله
و اتصلت بخالى و خليته كلمه و عرف انا مين
متأخذنيش يا سي عمر بيه اللى ميعرفك يجهلك
خلاص محصلش حاجه يا عم ...الا انت اسمك ايه ؟
محسوبك عبدالصمد
تشرفنا يا عم عبده
الشرف ليا يا عمر بيه
يا سيدى انا لا بيه و لا نيله ...انا على أدى
ازاى تقول كدا يا عمر بيه ؟
زى ما بقولك كدا يا عبده يا اخويا ...اخوالى هما اللى اغنيه إنما أنا ابويا على اد حاله و انا جاى هنا عشان ادور على شغل و اكل لقمه عيش بالحلال
اممممم طيب
طيب ايه ؟ مالك قلبت عليا كدا ليه يا عبده ؟
و لا قلبت و لا حاجه يا سي عمر
ااه هى كدا يعنى ؟ طب مش هتيجى تورينى الشقه فين ؟
الشقه فى الدور السابع متوهش 😡 يعنى ...هتلاقيها فى وش الاسانسير لزم
طب متشكرين يا عبده كتر خيرك
اول ما دخلت الشقه لقيت عفشها من النوع الفاخر ...بس مليه التراب
للاسف انا موعاش على خالى مصطفى صاحب الشقه و لا الله يرحمها مراته
اللى اعرفه انه مات من حوالى ١٥ سنه و بعدها بحوالى سنه ماتت مراته
و من يومها و الشقه مقفوله و محدش بيدخلها
دخلت قلعت هدومى و ابتديت انضف التراب الموجود فى كل حته
خلصت تقريبا بعد العشا ...بس خليت الشقه بتلمع
نزلت جبت اكل خفيف عيش و جبنه و طلعت عملت لى كوبايه شاى متينه و قعدت فى البلكونه و انا اخر رواقه
مش قادر اقولكم انا كنت مستمتع اد ايه ...الهوا اللى كان داخلى فى الشقه كان زى هوا البحر ..و دا مش غريب لأن الشقه فى الدور السابع و قدامها مكان كبير واسع
الشقه كانت عباره عن تلات اوض كبار جدا و ريسبشن واسع
دخلت أوضة النوم بتاعه خالى الله يرحمه و لقيت له صوره كبيره هو و المدام بتاعته متعلقه على الحيطه
قريت لهم الفاتحه و حطيت جنبى على السرير السفنج الطرى و نمت
اول ما غمضت عينى شفت قدامى راجل ضخم جدا جدا لونه اسود زى بتوع الحبشه، أنيابه بارزه ، عنيه حمرا، له قرنين صغيرين فى دماغه ، شعره اسود مكركت واقف قدام السرير و فى ايده ورقه مكتوب عليها طلاسم و بيشاورلى بأيده فوق و تحت
انا قمت من النوم مفزوع مش عارف اللى شفته دا حقيقه و الا خيال بس كان أقرب للحقيقه
يا خبر منيل النوم طار من عينى ... ايه اللى انا شفته دا ؟ و مين الراجل ده ؟ و ايه الورقه اللى كانت معاه دى ؟ و عاوز منى ايه الراجل ده ؟
يتبع 😎
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧
#الجزء_الثانى
انا قمت من النوم مفزوع مش عارف اللى شفته دا حقيقه و الا خيال بس كان أقرب للحقيقه
يا خبر منيل النوم طار من عينى
قمت من على السرير ..جريت على البلكونه عشان اشم شويه هوا
قعدت فى البلكونه و نمت و انا قاعد محستش بنفسي إلا و نور الشمس ضارب فى عينى
قمت من النوم دخلت اخدت دش و أكلت ساندوتش و شربت كوبايه شاى علشان استعد لللف على المدارس
طبعا كنت مصور ورقى كذا نسخه و كنت بسيب نسخه فى كل مدرسه ادخلها مع رقم تليفونى و عنوانى طبعا
فى مدارس حكوميه كتير عندها عجز فى المدرسين بس للاسف التعيين فيها مش حاجه سهله و محتاج مسابقات تنزلها الوزاره و شغلانه كدا
يا اما اشتغل بالحصه و دى طبعا متجبش تمن مواصلاتى
و عشان كدا انا كنت بقدم فى المدارس الخاصه و صراحه بالرغم انها خاصه الا أن المرتبات اللى بيعرضوها على المدرسين متدنيه جدا دا غير تحكماتهم الرهيبه لو المدرس أتأخر دقيقه يتخصم له يوم و لو أتأخر خمس دقائق يتخصم له اسبوع
حاجه كدا هبل و هما بيدوا للمدرس ملاليم اصلا
بس هعمل ايه مقدميش غير كدا
عملت مقابله فى كذا مدرسه اخر مدرسه دخلتها لاحظت أن مديرها أعجب بيا جدا و قالى احنا فعلا محتاجين مدرس لغة انجليزيه على اخر الشهر لان مدرسه الانجليزى اللى عندنا هتولد و هتاخد اجازه
شكرت الراجل لانه كان ذوق جدا بصراحه و روحت و انا روحى المعنويه عاليه جدا
فاضل اسبوع على اخر الشهر مش شغلانه يعنى
و انا برده هفضل ادور فى و اقدم يمكن الاقى فرصه افضل
و انا مروح كنت جعان جدا من كتر اللف و بصراحه اخوكم خيبه اوى فى عمايل الاكل ...مبعرفش اعمل غير بيض
قلت خلاص هات لك رنجه يا واد يا عمر و معاها رغفين عيش بلدى و فحلين بصل و طماطمتين و تحبس لك بكوبايه شاى فى الخمسينه و تبقى كدا اخر حلاوه
و فعلا يا جماعه مكدبتش خبر و اشتريت صندوق رنجه عشان يكفينى كام يوم و عيش بزياده برده و لقيت ست بتبيع بصل اخضر و ليمون جبت منها و كله اخر حلاوه
عديت على عبدالصمد لقيته بيبص لى انا و صندوق الرنجه باحتقار
ازيك يا عم عبده
شالله تسلم يا سي عمر
عامل ايه يا راجل يا طيب
الحمد لله بخير
تاخدلك رنجتين ؟؟
لا متشكرين
يا عم بس خدلك رنجتين انا مبعزمش ...انا شرقاوى يعنى أهل الكرم يعنى
كتر خيرك مباكلش الرنجه الدكتور محرج عليا
طب يا عم عبده ربنا يشفيك يا رب
متبقاش تسيب كيس الزباله اللى فيه بواقى الرنجه على السلم عشان القطط يا سي عمر
حاضر يا عم عبده هبقى اخده و انا نازل
طلعت و انا بستغرب الراجل ده بيعاملنى بغلاسه كدا ليه اكونش قتلت له قتيل 🤔
دخلت الشقه ، قلعت هدومى و دخلت صندوق الرنجه المطبخ
طلعت رنجينين و فتحتهم و حطيت عليهم شويه زيت و لمون و حطيتهم على التربيزه و دخلت المطبخ اغسل البصل و اقطع طماطم و رجعت
ادور على الرنجه ملقتهاش 😲
بسم الله الرحمن الرحيم ....تكونش قطه دخلت شالتها ؟
طب و القطه هتدخل منين ؟؟ انا مقفل الشقه كلها مفيهاش خرم ابره
بقيت هتجن ...ادور تحت الترابيزه ..تحت الكراسي مفيش فايده
و الله شكيت فى نفسي و قلت اكيد انى مطلعتهمش أو دخلتهم التلاجه تانى و انا مش واخد بالى
رحت اجيب لى اتنين تانين و المره دى مخلتهمش يغيبوا عن نظرى منا مش هيتضحك عليا تانى ...لمونك و بصلك بقا يا معلم و اضرب
خلصت اكل و عملت كوبايه شاى فى الخمسينه و قعدت شربتها و اخر تمام
انا لغايه كدا مكنش فى دماغى حكايه عفاريت و لا الكلام ده حتى الراجل اللى شفته اعتبرته مجرد كابوس من كتر تعبى فى السفر و تنضيف الشقه
مر تلات ايام و كل شئ كان ماشي عادى جدا
كنت الصبح اروح اقدم فى مدارس و اخر النهار ارجع كأى مواطن عادى لشقته
طبعا انا كان بقالى كذا يوم باكل رنجه لما نفسي جزعت ...و انا ماشي شميت ريحة سمك مشوي فكرنى بسمك الحاجه الله يمسيها بالخير
نقيت سمكتين كبار حلوين كدا و قلت للراجل يشويهوملى
اخدت السمك و ريحته كانت مفحفحه و اشتريت رغفين عيش مفقعين ...رجعت بسرعه و حطيتهم على التربيزه و دخلت الحمام غسلت وشى و اديا و خرجت بقا و انا كلى حماس لاكله السمك المعتبرة
و يدوب انا طالع من الحمام و ببص على التربيزه ملقتش السمك
ملقتش غير رغفين العيش المفقعين ...اه و الله كدا زى ما بحكيلكم
لا بقا ....دا ايه ده ؟؟ طب الرنجه قلت أنا غلطت و نسيت و مخدتش بالى و حطيتها فى التلاجه مره تانيه .... امال بقا ده ايه ؟ السمك راح فين ؟؟
اللى جه فى دماغى ساعتها أن دى اكيد قطه برده منا مش واخد خوانه بقا
و اللى عزز تفكيرى ده انى لقيت باب البلكونه مفتوح
قلت خلاص عليه العوض و منه العوض...هى اكيد قطه سهتنى و خطفت السمك ....منك لله يا قطه.... نرجع للرنجه تانى و أمرنا لله ...و قعدت اصبر نفسي أن السمك ده مكنش من نصيبي و يمكن لو كنت أكلته كان بطنى وجعتنى و كلام من اللى بيريح الضمير ده
بس اللى حصلى بعد كدا فى الليله دى خلانى اراجع تفكيرى و اعرف ان اختفاء السمك و الرنجه ده شئ مش طبيعى
يتبع 😎
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧
#الجزء_الثالث
بس اللى حصلى بعد كدا فى الليله دى خلانى اراجع تفكيرى و اعرف ان اختفاء السمك و الرنجه ده شئ مش طبيعى
انا فى الليله دى رحت انام كأى كائن حى طبيعى محتاج ياخد قسط وافى من النوم علشان يقدر يواصل فى اليوم التانى
كان عندى ترنج اديداس حلو كدا الحاجه كانت شريهولى من و انا فى الجيش ، كنت بحبه اوى الترنج ده
لبست الترنج الابيض و بقيت عامل فيه زى العريس .. افتكرت الحاجه اللى يمسيها بالخير قلت اتصل بيها اكلمها و اطمنها عليا
الو
الو ازيك يا عمر يا حبيبي
الله يسلمك يا اما ...عامله ايه يا حبيبتى
الحمد لله يا ضنايا انت اللى عامل ايه ؟
الحمد لله يا حاجه و الله بخير
عملت ايه فى الشغل ؟ لقيت حاجه ؟
و الله لسه بدور بس فى مدرسه محتاجه مدرس المدير بتاعها قالى هيتصل بيا على اخر الاسبوع ده أن شاء الله
ربنا يكتب لك فى كل خطوه سلامه يا ابنى و يوقف لك ولاد الحلال منين ما تروح يا عمر يا ابن سهام
ربنا يخليكى ليا يا امى يا حبيبتى
لسه معاك فلوس و الا فلوسك خلصت ؟
لا معايا الحمد لله متقلقيش عليا
قول بس متتكسفش انا عارفه أن نفسك عزيزه
لا و الله يا امى ابويا مدينى بزياده الحمد لله
و انت هتيجى امتى وحشتنى يا عمر
يا ماما هو انا لحقت اوحشك؟ دا هو اسبوع واحد مفيش غيره
لا تسع ايام يا واد انت
انتى حاسباهم بقا ؟
ايوه طبعا حاسباهم ...المهم خلى بالك من نفسك فى لسعه برد كدا فى الجو اتغطى و انت نايم ..انا عارفاك بتحب توقع الغطا
يا ماما هو انا عيل صغير ؟ انتى محسسانى انى فى تالته ابتدائى ...ناقص كمان تقوليلى اشرب اللبن قبل ما تنام
و ليه لأ ما انت لازم تشرب لبن هى دى فيها ايه يعنى ؟ مقولتليش هتيجى امتى عشان اعملك المكرونه بالبشاميل اللى بتحبها
اه و الله وحشنى أكلك يا حاجه ...دا انا عايش على الرنجه لما خلاص حاسس انى بقيت مملح
يا حبيبي يا ابنى ...منا قلت لك بلاش تبعد عن حضنى مسمعتش الكلام
خلاص بقا يا ماما مش هنعيد و نزيد فى الكلام ده تانى ...بقولك ايه يا ماما يارا بنت خالى عامله ايه ؟؟
كويسه يا عمر ...بتسال عليها ليه ؟
مفيش يا ماما بطمن عليها بس
يا عمر انا مش عاوزاك تتعلق فى حبال الهوا الدايبه ...خالك حسن بيحبك اه بس هو حاطط فى دماغه يجوز بنته لواحد غنى زيه ...انا لما لمحت له بجوازك من بنته قالى لا دا عمر لسه بدرى عليه ...دا عقبال ما يجى يتجوز هتكون يارا معاها عيلين
يا ماما بس انا و يارا بنحب بعض من زمان
بكرا تنساها يا عمر
مش ممكن يا ماما....انا احترمت رغبتك بس و مبقتش اكلمها بس اللى فى قلوبنا عمره ما يروح ابدا
خلاص يا عمر ..شوف مستقبلك بس الاول و أمسك لك وظيفه و بعد كدا نتكلم
ماشي يا ماما ...تصبحى على خير
و انت من اهل الخير يا حبيبي
قفلت السكه مع امى و حطيت التليفون و نمت
صحيت الصبح حسيت بشويه ساقعه كدا ...صدقتى يا ست الحبايب الجو فعلا برد بشد الغطا عليا لقيت نفسي مش لابس البنطلون
ربك و الحق انا اتفزعت
قمت قعدت و انا مش مستوعب هو فيه ايه؟
البنطلون راح فين ؟
بقيت ادور زى المجنون على السرير و تحت السرير طب يمكن واقع جنب السرير ؟
طب يمكن ملبستوش اصلا ؟
لأ ازاى انا متأكد انى كنت لابس الترنج كله كامل مكمل و حتى قعدت ابص لنفسي فى المرايه قبل ما اكلم امى و اقول ايه العسل ده يا واد يا عمر
لا كدا الموضوع مش طبيعى ابدا
خرجت بره الاوضه ادور على البنطلون
طب يمكن البنطلون راح الحمام لوحده ؟
مفيش برده
طب يمكن فى البلكونه اتخنق شويه و طلع يروح عن نفسه ؟
مفيش برده
طب يمكن هنا ..طب يمكن هنا ....
مفيش ....مفيش
قلبت الشقه كلها على البنطلون انى الاقيه ملقتوش
قعدت مذهول ...يبقى بقا حكايه الرنجه و السمك دى راخره مكنتش طبيعيه ؟
طب اتصل بخالى حسن أسأله يمكن يعرف حاجه عن الموضوع ده ؟
انتظرت لى ساعه كدا على ما خالى يصحى و اتصلت عليه
الو ...صباح الخير يا خالى
صباح الخير يا عمر عامل ايه يا ابنى
الحمد لله يا خالى
لقيت شغل و الا لسه ؟
ايوه لقيت و هروحه على اخر الاسبوع باذن الله
طب الحمد لله و الشقه حلوه ؟ مريحاك يعنى ؟
هى حلوه بس بيحصل فيها حاجات غريبه مش عارف تفسيرها ايه
حاجات غريبه زى ايه يعنى ؟
يعنى فى اكل بيختفى ؟
اكل ايه اللى بيختفى ؟ سلامة عقلك يا عمر
اه و الله يا خالى زى ما بقولك كدا
تلاقيك كلته و نسيت يا ابنى
طب بلاش الاكل انا انهارده كنت نايم بالترنج قمت لقتنى نايم من غير بنطلون
هههههههههه هههههههههه ازاى يا ابنى
اه و الله زى ما بقولك كدا يا خالى
تلاقيك قلعته هنا و الا هنا
لا و الله ما حصل ...انا قلبت عليه الشقه ملقتوش
بكرا يظهر متقلقش ...المهم أن انت تمام
قصدك ايه يعنى 🤨؟؟؟
لا مقصديش 😂
اه انا تمام يا خالى 🙄
طب خلاص الحمد لله
قفلت المكالمه و الشك ملى قلبى ...يا ترى خالى يعرف حاجه عن العفاريت دى و الا ميعرفش؟؟؟؟؟🙄🤔
طب اتصرف ازاى انا دلوقتى ؟
يتبع 😎
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧
#الجزء_الرابع
قفلت المكالمه و الشك ملى قلبى ...يا ترى خالى يعرف حاجه عن العفاريت دى و الا ميعرفش؟؟؟؟؟🙄🤔
طب اتصرف ازاى انا دلوقتى ؟
قطع تفكيرى صوت تليفونى ...رقم غريب
الو
الو الاستاذ عمر ؟؟
ايوه يا فندم انا عمر
انا الاستاذ شرنوبى مدير مدرسه الحضاره
ايوه اهلا بحضرتك يا استاذ شرنوبى
ممكن تشرفنا دلوقتى و معاك ورقك اصول من فضلك
طبعا ..حاضر ..مسافة السكه
قفلت مع المدير و انا طاير من الفرحه و نسيت البنطلون و موضوع البنطلون
لبست هدومى بسرعه و اخدت ورقى و نزلت جرى
وصلت المدرسه و سلمت ورقى و استلمت العمل
المدرس الاول ادانى كشاكيل تحضير للمدرسه اللى قبلى و طلب منى اشترى كشاكيل و اعمل زيها
دخلت الفصل و كانت الطلبه اللى بدرسلهم فى المرحله الاعداديه ... ولاجل حظى كانت اول حصه ليا للصف الثالث الاعدادى
دخلت الفصل و عرفتهم على نفسي و اتعرفت عليهم
دردشه معاهم شويه فى بعض القواعد و الكلمات ...الفصل عدده حوالى ٢٥ بنت معظمهم متجاوبين الا بنت واحده بس كانت قاعده فى اخر الفصل لوحدها و مفيش حد قاعد جنبها
سألت سؤال سهل كل البنات رفعت أيدها ما عدا البنت دى
رحت موقفها
انتى
انا ؟؟
ايوه ... قلتيلى اسمك ايه ؟
أسمى ايه
عارفه اجابه السؤال يا ايه ؟
ايوه عارفاه
طب و مبترفعيش ايدك زى زمايلك ليه ؟؟
عشان عارفه انك هتختارنى عشان اجاوب على السؤال
و عرفتى ازاى يا ام العريف ؟
هنا البنات ضحكت و لقيت البنت ظهر على وشها الضيق و قالت لى عارفه و اعرف الحاجه اللى ضاعت منك امبارح كمان راحت فين
انا سمعت كدا و جسمى ساب ...البت دى عرفت أن فى حاجه ضاعت منى ازاى ؟
طب يمكن هى بتقول اى كلام كدا
تمالكت اعصابى و سألتها ...طب قوليلى راحت فين ؟
هقولك بس لما تلاقيها هتيجى تقول انك لقيتها قدام الفصل ده كله
ماشي و انا موافق ...بس لو ملقتهاش هيكون الحال ازاى ؟؟
هتلاقيها ....انا بقولك هتلاقيها
هلاقيها فين ؟
هتلاقيها ورا مراية التسريحه
انا وقفت متنح مش عارف كلام البنت دى صح و الا غلط ...بس حاجه غريبه اوى انها تعرف أن فى حاجه ضاعت منى و طبعا مرضتش اسألها قدام العيال و اتأكد هى عارفه ايه بالظبط اللى ضاع منى لانى هيكون منظرى وحش اوى و العيال هتفهم غلط
طب اقعدى يا ايه
جرس الحصه ضرب ...اخدت حاجتى و لسه طالع من الفصل لقيت بنت من البنات جت جرى ورايا و قالت لى معلش يا مستر أصلها مخاويه
ايه مخاويه دى ؟؟
مخاويه يعنى معاها بسم الله الرحمن الرحيم حاجات من اللى تحت الارض و عشان كدا كلنا بنخاف منها و محدش بيرضى يقعد جنبها
طيب خلاص روحى انتى
مشيت و كل تفكيرى انى اروح البيت اشوف البنطلون فى المكان اللى البت قالت لى عليه و الا لا
روحت بسرعه و لقيت عبده قاعد على الباب كعادته لابس جلابيته الزرقا اللى مبيغيرهاش وحاطط رجل على رجل و باين من تحتها الكلسون البنى و قدامه شيشه عاملها ببرطمان ازاز
ازيك يا عبده
الله يسلمك.
ناولت عبده عشرين جنيه فى ايده ...لقيته هوب قام وقف و تهللت اساريره
ليه كدا بس يا عمر بيه ؟
لا دى حاجه بسيطه اصلى مسكت شغل انهارده
يا الف مبروك يا عمر باشا ....ربنا يجعله شغل الهنا يا رب ...اتفضل اتفضل هوصلك للاسانسير
دلوقتى هتوصلنى ؟ و بقيت عمر باشا ؟ اه منك اه
بتقول حاجه يا عمر باشا ؟؟؟
لا مبقولش
دخلت الشقه ...قلعت جزمتى بسرعه و رميت مفاتيحى على التربيزه و دخلت على طول على التسريحه ببص ورا المرايه لقيت البنطلون
انا بلمت 🥺😲
ايه اللى جاب البنطلون ده هنا ؟؟
و البت ايه دى عرفت مكانه منين ؟؟؟
سلام قول من رب رحيم
الموضوع كدا ميطمنش ابدا
طب خالى حسن لما سألته عمل فيها عم العبيط و مقليش حاجه طب اسال مين انا دلوقتى ؟؟؟؟
اااه مفيش غير عبده حبيبي هو ده اللى هيجيب ليا الفوله من اولها ...و خاصه انى لسه رازعه عششين جنيه و لسه مفعولها مرحش
خلاص انا اتغدى و انزل اساله
دخلت المطبخ سلقت لى بيضتين و فتحت كيس شيبسي و كوبايه شاى
خلصت اكل و لبست شبشبى ابو صوباع و جيت انزل ملقتش المفاتيح ...
الله الله ...المفاتيح كانت هنا
اااه اكيد ورا التسريحه ...ما هو ده المكان السحرى بقا
رحت دورت ورا التسريحه ملقتش ايتها حاجه
رجعت ادور تانى فى الصاله ... بضرب بعينى لقيتهم على التربيزه
الله الله ...الله يخربيتك عفريت هتجنن امى
خطفت المفاتيح و ركبت الاسانسير و نزلت لقيت عبده مكوع شويه و بينام على نفسه
عم عبده ...عم عبده
ايوه يا بيه ...فى حاجه ؟؟
عاوز اسالك على حاجه يا عم عبده
اتفضل يا باشا
هو الشقه اللى انا قاعد فيها دى فيها حاجه ؟
حاجه ايه يعنى ؟
حاجه يعنى مش طبيعيه ؟؟
لا انا مشفتش حاجه و لا اعرف حاجه و ابعد عنى الله يرضى عليك
متخافش يا عم عبده قولى بس هى الشقه اللى انا فيها دى فيها عفاريت ؟؟
هما طلعولك 😲؟؟؟؟؟؟؟؟
يتبع 😎
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧
#الجزء_الخامس
هو الشقه اللى انا قاعد فيها دى فيها حاجه ؟
حاجه ايه يعنى ؟
حاجه يعنى مش طبيعيه ؟؟
لا انا مشفتش حاجه و لا اعرف حاجه و ابعد عنى الله يرضى عليك
متخافش يا عم عبده قولى بس هى الشقه اللى انا فيها دى فيها عفاريت ؟؟
هما طلعولك 😲؟؟؟؟؟؟؟؟
هما مين اللى طلعولى ؟؟
لا مفيش
عبده يا اخويا ...عبده يا حبيبي فهمنى كدا بالراحه انت تقصد ايه ؟
مقصدش يا سي عمر
اااه انت رجعت لسي عمر تانى ؟؟؟ طب بص انا نسيت اديلك الخمسين جنيه دى
بتاعه ايه دى ؟
دى حلاوة الشغلانه الجديده
خيرك سابق يا عمر بيه ...ما انت لسه مدينى
ايوه و ماله بس ريحنى يا عبده الحاجات الغريبه اللى بتحصل عندى فى الشقه دى عندى انا بس ؟؟
قصدك العفاريت ؟؟؟ بسم الله الرحمن الرحيم يجعل كلامنا خفيف عليهم يا رب ...لا و الله يا بيه دول مبهدلين العماره كلها بس قاعدين فى الشقه اللى انت فيها دى بالذات و خصوصا العفريته دى اللى اسمها مايسه مسبتش راجل فى العماره الا لما حاولت تغريه
تغريه ؟؟؟ تغريه ازاى يا عبده ؟
تغريه يا بيه مش عارف تغريه ازاى ؟
كل رجاله العماره ؟ .....حتى انت يا عبده ؟؟
انا ؟؟ انا ايه يا بيه ؟؟
لا مفيش حاجه😂 ...طب العفريته دى جت منين ؟؟
انا معرفش لانى كنت لسه صغير بس بيقولوا أن العفريته دى ظهرت بعد موت مرات الاستاذ مصطفى خالك ...بيقولوا يا بيه انها عفرتيتها
طب و مالك بتوطى صوتك كدا ليه يا عبده ؟؟؟
الحيطان لها ودان يا بيه ، و اللى بيخاف من عفريت بيطلع له ، انا خايف تيجى على السيره
طب و ليه بيقولوا انها عفريتة مرات خالى ؟؟
هو انت متعرفش يا بيه أن مرات خالك لقوها شانقه نفسها و ميته فى الشقه دى ؟
لا اول مره اعرف الكلام ده
لا دا كل الناس عارفه أن الشقه اللى انت ساكن فيها دى معفرته و هى سبب البلاوى كلها
اممممم طيب متشكر يا عم عبده
طلعت الشقه و انا عمال اشتم فى خالى ...صحيح محدش بيعمل حاجه ببلاش....طب و الله لانا مكلمه تانى و اشوف هيقولى ايه
الو
الو ....ازيك يا عمر
الله يسلمك يا خالى ...بقولك ايه يا خالى هى مرات خالى مصطفى الله يرحمها ماتت ازاى ؟؟
و بتسئل ليه يا عمر ؟؟
مفيش سؤال جه فى دماغى كدا فجأه
مرات خالك الله يرحمها حالتها النفسيه ساءت جدا بعد موت اخويا مصطفى و خاصة أن مكنش عندها اولاد ...تعبت شويه و بعد كدا الجيران شموا الريحه و اتصلوا عليا ..جيت لقيتها ميته بقالها كام يوم
طبعا بعد كدا غيرت الاوضه اللى ماتت فيها كلها و غيرت العفش بتاعها و من يومها و الشقه مقفوله
طب و ليه يا خالى مفكرتش تقعد فى الشقه دى؟ مع انها شقه فخمه اوى
انت عارف يا عمر أن شغلى فى البلد هنا و مفيش مجال انى اسيبه و اجى اقعد عندك
ماشي يا خالى ...اسف لو ازعجتك
لا مفيش ازعاج و لا حاجه يا ابنى ...خلى بالك من نفسك
متخافش عليا يا خالى
ماشى يا عمر سلام
قفلت مع خالى و الشك بقى يقين ...اكيد خالى عارف إن الشقه معفرته ...بس السؤال هنا ليه هو بعتنى و هو عارف كدا ؟؟ و السؤال التانى هل امى عندها فكره عن الشقه و اللى حصل فيها ده ؟؟
انا لازم اكلم امى و احاول اعرف منها اى حاجه
اتصلت على ماما
ازيك يا ماما
الله يسلمك يا حبيبي
ايه انا صحيتك من النوم و الا ايه ؟؟
لا يا حبيبي انا صاحيه بس عينى غفلت كدا و انا قاعده على الكنبه بتفرج على التلفزيون
طب معلش يا ماما روحى نامى
لا يا حبيبي انا صاحيه انت عامل ايه؟
انا استلمت الشغل انهارده يا ماما
اللهم صلى على النبى ...الف مبروك يا حبيبي الف مبروك يا عمر
الله يبارك فيكى يا ماما ....كنت عاوزه اسالك على حاجه يا ماما ؟
خير يا ابنى
هو انتى تعرفى مرات خالى ماتت ازاى ؟؟
ماتت زى الناس ما بتموت يا عمر
لا يعنى كانت عيانه ؟ و الا فى حادثه ؟؟
اللى اعرفه انها ماتت من الحزن على خالك الله يرحمه و للاسف انا مكنتش هنا ساعة الوفاه لانى كنت فى الوقت ده مع ابوك فى الصعيد
طب و هو انتى مش لكى ورث فى شقة خالى دى يا ماما ؟؟
ايوه كان ليا بس خالك حسن اشتراه منى و بقت الشقه كلها بتاعته
ااه
هو فيه حاجه يا عمر ؟؟؟
لا مفيش يا ماما ...دا سؤال جه فى دماغى كدا
المهم انت كويس ؟؟
انا عال العال
طيب عاوزك تاخد بالك من نفسك كدا و من شغلك الجديد متهملش يا عمر عشان المدير يحبك
حاضر يا ماما ...تصبحى على خير
و انت من اهل الخير يا حبيبي
قفلت مع امى و موصلتش لحاجه برده ...طب لو كلام عبدالصمد ده حقيقى يبقى عفريتة مرات خالى دى بتطلع ليه اصلا ؟؟ هل دى قرينتها ؟ و الا دى جنيه و الا ايه بالظبط ؟؟
دخلت انام و المره دى خفت انام فى أوضة النوم بتاعت خالى ...اخدت بعضى و رحت الاوضه التانيه...الأوضاع دى تحس انها كئيبه شويه كدا مع أن دهانها ابيض سرير الأوضاع دى موجود جنب الحيطه
ضلمت الاوضه خلتها كحل عشان مشفوفش اى حاجه كدا و الا كدا
لبست بنطلونى و اتغطيت كويس اوى ما هو الواحد معدش ضامن حاجه اليومين دول🙄
نمت و استغرقت فى النوم و كان النوم لذيذ اوى ....و فجأه حسيت بنور شديد دخل عينى بفتح عينى لقيت واحده تبارك الله فى ما خلق مشعه إشعاع ذاتى.
...صاروخ ارض جو يا أبا
ايه دا ؟😲 مين دى ؟؟🙄
يتبع 😎
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧
#الجزء_السادس
نمت و استغرقت فى النوم و كان النوم لذيذ اوى ....و فجأه حسيت بنور شديد دخل عينى بفتح عينى لقيت واحده تبارك الله فى ما خلق مشعه إشعاع ذاتى.
...صاروخ ارض جو يا أبا ..... مقدرتش ابص لها من جمالها و من الهدوم اللى مش لابساها 🙈
رحت مودى وشى الناحيه التانيه و غطيت وشى بالغطا و كملت نومى عادى جدا
صحيت الصبح و انا مش مصدق اللى شفته بعينى
هو ده كان حلم و الا حقيقه ؟؟
قلت اتصل بخالى حسن تانى الله يحرقك يا خالى
ايوا يا خالى
ايوا يا عمر ...صباح الخير
صباح النور بس الخير هيجى منين بس ؟
ليه كدا ع الصبح ؟
انت متأكد يا خالى إن الشقه دى مفيهاش حاجه ؟؟
حاجة ايه يا عمر ؟
انا طلعلى نسوان فى الشقه في يا خالى
هههههههههه هههههههه نسوان ؟
اه و الله واحده من كتر ما هى بيضا بتنور فى الضلمه تقولش ايمان و تقوى بس هتجيب الايمان و التقوى منين دى كانت لامؤاخذه ....
هههههههههههه
انت بتضحك يا خالى ؟
امال هعمل ايه بس .....تكونش دى اللى اخدت البنطلون بتاعك اللى قلت لى أنه ضاع منك 😂؟
تقريبا كدا
طب مسألتهاش عليه ليه 😂؟
منا لقيته ورا التسريحه كانت مخبياه بنت الجزمه
هههههنهننن ههههههههههههه
قولى أتصرف معاها ازاى دى ؟
يا عم اتعامل
اتعامل ازاى بس ؟؟ مين دى و اهلها سايبنها كدا ليه تغوى فى شباب المسلمين
اسألها
اسال مين ؟ يعنى انت معندكش تصريف يا خالى ؟
لا و الله يا عمر
طيب متشكرين يا خالى يا ابو الواجب
قفلت مع خالى حسن و انا محتار طب اسيب الشقه الفقر دى و الا اعمل ايه يا ربى
الشقه قريبه من المدرسه و مبدفعش فيها حاجه ...... و كمان مش هلاقى شقه بالجمال ده بس برده ممكن اتلبس .
انت هتخاف و الا ايه يا واد يا عمر ؟ لا انت ادها و ادود ..انت طول عمرك قلبك قلب وحش ...العيال التوتو هى اللى تخاف مش انت 🤚💪
لا انا لازم احصن نفسي من بنت المجنونه دى لتقل عقلها و تعمل فيا حاجه تانيه و انا نايم
دخلت على النت و جبت اذكار الصباح و المساء و قريتهم
لبست هدومى و نزلت روحت مدرستى و لا كأنى سايب عفريته فى البيت
دخلت فصل تالته إعدادى و هنا افتكرت آيه
يخربيتك يا آيه البت دى بتبص لى و تضحك كدا ليه ؟؟ دلوقتى تسألنى لقيت الحاجه الضايعه و الا لا ؟؟ انا مش هسيب لها فرصه تسأل
انتى يا بنت
انا ؟؟
ايوا انتى يا اختى عماله تضحكى كدا ليه ؟؟ ايه شفتى اراجوز دخل عليكى الفصل ؟؟
انااااا لا لا......
اطلعى بره و استنينى بعد الحصه قدام باب أوضة الاستاذ شرنوبى
البنت قامت بكل هدوء و من غير ما تتكلم كلمه واحده بس بصت لى بصه بعينها خلتنى هموت فى جلدى
بعد ما خرجت البنت البنات التانيه قالولى ليه كدا يا مستر ؟؟ انت مالك و مالها بس ؟ دى ممكن تأذيك
تأذى مين بطلوا هبل
و الله يا مستر زى ما بنقولك كدا ...دا استاذ العلوم مره شخط فيها طلع لقى عربيته مولعه
يا سلام ... الحمد لله معنديش عربيه ، و بعدين مين قالكم أن هى اللى ولعت عربيته ؟
لا مش هى دا العفريت اللى معاها ...دا بيقولوا عفريت كبير اوى ملك من ملوك الجن اسمه جنابور و عمره ١٦٠ الف سنه و عنده مملكه هو الحاكم بتاعها فيها مليون و خمسميه ألف جنى
بطلوا عبط ....هو مين اللى قالكم الكلام الفارغ ده ؟
و الله يا استاذ الكلام صح و كل المدرسه هنا عارفه الكلام ده و محدش بيقرب من آيه دى نهائى
طب خلاص خلينا فى دروسنا و سيبكم من ايه دى و عفاريتها
ربكم و الحق كلام العيال ده قلقنى اوى و خلانى مش قادر أقف على رجليا ....بس مينفعش ابين انى خايف
كملت الحصه عادى و خرجت لقيت الانسه آيه واقفه قدام باب المدير
تعالى يا آيه ...انتى كنتى بتضحكى ليه يا حبيبتى ؟؟
لقيت البنطلون يا مستر ؟؟؟
بنطلون ايه ؟
البنطلون اللى كنت بتدور عليه ؟؟
اه لقيته
و طردتنى عشان متعترفش قدام البنات ؟
لا انا طردتك عشان بتضحكى و دا ميصحش
طب ابقى سلملى على مايس
مايس مين دى ؟؟
مايس اللى جت لك امبارح ....سلام يا مستر
البت سبتنى و انا واقف مطرحى زى ما يكون لسانى اتعقد ...مش قادر انطق
البت دى عرفت الكلام ده منين ؟؟
دخلت اوضه المدرسين و انا ما زلت مذهول ....شافنى مدرس العلوم الاستاذ مهدى
مالك يا مستر عمر ؟
انت تعرف البت ايه دى يا استاذ مهدى ؟؟
الا اعرفها الله يخربيت معرفتها السودا ...نصيحه منى متقربش للبت دى خالص
هو صحيح عربيتك اتحرقت بسببها ؟؟
و الله هى عربيتى اتحرقت بس معرفش بسببها و الا لأ ...اللى اعرفه انى زعقت لها من هنا و خرجت لقيت العربيه بتولع
طب ما يمكن حد رمى عليها حاجه خلالها تولع ؟
ما هو ده الغريب بقا أن الطب الشرعى ملقاش اى سبب فى الحريق ده و للاسف معرفتش اخد التأمين على السياره
يا خبر ...هى كانت ناقصاكى انتى كمان يا ست ايه ؟ مش كفايه مايس عليا ؟؟
بتقول حاجه يا مستر عمر ؟
لا دا انا بكلم نفسي ...صحيح البت دى معاها ملك اسمه جنابور
دا اللى سمعناه بس انا طبعا معرفش ...هستأذنك اصل عندى حصه دلوقتى سلام
قعدت لوحدى تفكيرى مشوش اوى بس قررت ادور و اشوف فى ملك اسمه جنابور صحيح ؟؟
فتحت الانترنت و بدأت اعمل بحث عن أسماء ملوك الجن و لقيت ......
يتبع 😎
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧
#الجزء_السابع
قعدت لوحدى تفكيرى مشوش اوى بس قررت ادور و اشوف فى ملك اسمه جنابور صحيح ؟؟
فتحت الانترنت و بدأت اعمل بحث عن أسماء ملوك الجن و لقيت اسامى كتير اوى غريبه
قعدت اقرا و كنت خلاص زهقت و لسه هقفل لقيت مقاله بعنوان الملك جنابور شاه الشاه
و الشاة دى معناها ملك الملوك
دخلت بسرعه اشوف ايه حكايه جنابور ده لقيت فعلا زى ما البنات قالولى أنه بيحكم عدد كبير جدا من الجن و عمره ١٦٠ الف سنه ....يا صلاة النبى يعنى لسه نونه
طب و بعدين ؟؟ ممكن البت آيه الصغيره دى يكون لابسها جن كبير زى ده ؟ طب و ليه اختار العيله دى ؟؟
طب و انت مالك يا عمر ؟ بتدخل نفسك فى اللى ملكش فيه ليه ؟؟ هى ايه دى من بقية عيلتك ؟؟؟
و بعدين خليك فى اللى عندك يا اخويا و شوف ست مايس دى راخره حكايتها ايه ؟
اه صحيح طب لما ادور كدا يمكن الاقى اى حاجه عن ست مايس دى هى كمان ..
مستر عمر
ايوه
استاذ شرنوبى طالبك فى مكتبه
حاضر انا رايحله .....
. 🥀🥀🥀🥀
سلام عليكم استاذ شرنوبى
و عليكم السلام يا عمر ....ها اخدت فكره عن الشغل ؟؟
ايوه مستر محمد ورانى الكشاكيل و انا اشتريت زيها و بحضر للدروس
انت هتدى التلات سنين اولى و تانيه و تالته إعدادى
منا عارف يا فندم متقلقش خالص مستر محمد فهمنى على كل حاجه
طيب عظيم اوى ...مش عاوز أنبه عليك أن ممنوع الضرب طبعا ...حاول يكون لك شخصيه فى الفصل اللى هى انك تخلى البنات تحبك و تخاف منك فى نفس الوقت
حاضر يا فندم أن شاء الله هكون عند حسن ظنك
باذن الله ..انا اول ما شفتك توسمت فيك الخير ....اه بقولك ايه يا عمر ؟
ايوه يا مستر
متبقاش تخلى البنت اللى اسمها آيه دى تجيلى تقف لى كدا عند باب اوضتى
ليه يا مستر
من غير ليه ؟؟ البت دى بالذات اتعامل معاها انت بأى طريقه على ما تعدى سنتها دى على خير
ليه حضرتك ؟ هو فى مشكله و الا ايه ؟
يا سيدى مفيش مشكله بس انا مبحبش اتعامل معاها تحس انها بت غريبه كدا و لها تبريقه عين وحشه اوى
يعنى انت خايف منها يا مستر ؟😂
يا سيدى و لا خايف و لا حاجه ...عمر عيب كدا 😡
خلاص انا اسف ....اى حاجه تانيه يا مستر ؟
لا روح انت دلوقتى
تمام ...سلام عليكم
و عليكم السلام
طلعت من المدرسه و انا عمال اضحك على حضرت المدير ...الراجل ده لو تشوفوه عامل زى ضرفة الباب طويل جدا و عنده شنب عظيم و لابس نضاره عظيمه و شكله كدا كان بيلعب كمال اجسام... الباى و التراى و الحاجات دى 😂
و مع ذلك خايف من حتة عيله متوصلش لنصه 😂😂
بعد ما طلعت من المدرسه حسيت انى جعان اوى طب هتاكل ايه يا واد يا عمر ؟؟؟ سمك تانى عشان المفجوعه تأكله ؟؟
لا انا اصلا زهقت من الأسماك انا هروح المطعم اللى هناك ده و اشتريلى فرخه مشويه و شويه رز و ادلع كرشي
انا هجيب فرخه كامله احسن تكون الطفسه بتحب الفراخ راخره و تبقى عاوزه تاكل معايا
جبت الفرخه و تحتها شويه الرز البسمتى المعتبرين و طلعت الشقه
دخلت حطيت المفاتيح فى جيبي ما هو الواحد معدش ضامن حاجه الايام دى
طب انا عاوز ادخل الحمام ...
انا خايف ادخل من هنا اطلع ملقيش الفرخه طب انا عندى فكره انا هجيب الكرسي ده احطه قدام باب الحمام و احط عليه الاكل و اخلى عينى عليه مش هشيلها
هتضحكى على مين يا مايس جالك العبقرى ؟؟ كان غيرك اشطر يا اختى
و فعلا عملت كدا و طلعت لقيت الفرخه الحمد لله زى ما هيا
قعدت اضحك و اقولها مش هتعرفى تعملى معايا حاجه 😂😂
حطيت الفرخه و قعدت اكل
الاكل لذيذ اوى خلصت اول ورك فى ثوانى و دخلت على التانى ...و لسه بقطم فيه لقيت نفسي زورت و كانت روحى هتطلع
قمت جرى اجيب كوبايه مية ...شربت بسرعه و رجعت ملقتش بقية الفرخه
و سمعت ضحكه لبشت جسمى
نهارك اسوح يا مايس ...
رفعت صوتى و قلت لها ..على فكره انا كنت عامل حسابك فى الاكل متفتكريش انك اخدتى الاكل غصب عنى ...بس انتى مصبرتيش على رزقك يا طفسه 😡
طلعت البلكونه بعد ما عملت لى كوبايه شاى و انا دمى محروق ...العفريته بنت الجزمه دى مش مهنيانى على لقمه ...اول مره اعرف ان العفاريت طفسه كدا
يا خبر 😲 ..انا نسيت ادور على أصل العفريته دى
دخلت بسرعه جبت موبايلى و طلعت فى البلكونه تانى و عملت بحث على جوجل و كتبت فيه
العفريته مايس
ملقتش اى نتايج قلت طب اغير الكلمه
الجنيه مايس
لقيت ظهر لى تعريفها
حلاوتك يا مايس
مكتوب انها وصيفه الملكه زمرده بنت الملك الاحمر
وصيفه ؟؟؟ طب و ايه اللى هيجيب الوصيفه دى عندنا هنا فى الشقه ؟؟
و جايه تعمل ايه ست وصيفه دى ؟؟
دخلت الشقه و رفعت صوتى فى الشقه
انتى يا مايس ...انتى عاوزه منى ايه ؟؟
لو جدعه اظهريلى
انا مش خايف منك على فكره
طبعا المكان كان هس هس مفيش اى حاجه و لا حركه
حسيت انى قربت اتجنن ...الله يخربيتك يا مايس يا بنت ام مايس
طب انا لسه جعان ملحقتش اكل ...اروح بقا اعملى شويه بيض شكشوكه اكله و امرى لله
رحت عشان اعمل البيض و قاعد اقلب و انا بدندن اغنيه الست ..صعبان عليا جفاك ترريرم تتييراااررم ...صعبان عليا جفاك ..
و الاقيلك يا مسلم اللى بيخبط على كتفى و يقولى فى ودنى بطريقه الهمس كدا
انت نادتنى ؟؟؟؟؟
انا ؟؟😲
يتبع 😎
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#شقة٧٧
#الجزء_الثامن
انا بدندن اغنيه الست ..صعبان عليا جفاك ترريرم تتييراااررم ...صعبان عليا جفاك ..
و الاقيلك يا مسلم اللى بيخبط على كتفى و يقولى فى ودنى بطريقه الهمس كدا
انت نادتنى ؟؟؟؟؟
انا ؟؟😲
ايوه
نادتنى ليه ؟؟
انا ؟
ايوه
انتى مين ؟
انا مايس
تشرفنا يا فندم
مايس مسكت كتفى كأنها لقت حتى لحمه
تاكلى يا مايس ؟؟
مبتردش
طب اعملك عصير ؟؟
برده مبتردش
مالك يا عم التنك بالراحه علينا شويه
مايس كان وشها زى ضباب ملوش ملامح بس هى اعتبرت نفسها واحده ست و خلاص
كان فى جماعه جايين لك هنا و انا مشتهم
مين دول ؟؟ اهلى من البلد جم يزورونى ؟
لا دول اتباع الملك جنابور بيقولوا انك اذيت حد تبعهم
انا ؟؟؟ شالله خليك يا مايس يا اختى و ربنا يعملك كل حاجه حلوه يا رب
انت عملت ايه ؟ و ليه كانوا عاوزين يأذوك ؟
انا ؟؟؟
ايوه
معملتش ....ناس أشرار بقا الله يسامحهم
انت نادتنى ليه ؟؟
انا ؟
ايوه انت
عبيط بعيد عنك ....انتى هنا ليه ؟
ساكنه هنا
بيتك يعنى ؟؟
ايوا
مين اللى ادهولك ؟؟
سيدتى
مين سيدتك دى ؟؟؟؟
سيدتى صفيه
فين سيدتك دى ؟
ماتت
مين موتها
انا
ازاي
اقنعتها انها لازم تموت وفضلت اوسوس لها بالموت
ماشاء الله عليكي وعلي ال حواليكي .
انتي مرتبطه يا مايس
يعني ايه ؟
حد متكلم عليكي حد متجوزك الحاجات دي ؟؟؟
لا
عازبه ؟
نعم
يابركه دعاكي يامه
لما سيدتك ماتت مامشتيش ليه ؟
ماينفعش امشي
ليه ؟
مقترن وجودي بالمكان
يعني افهم انك مجبره علي التواجد هنا ؟
ايوه
انتي ليكي اهل ؟
انا من حاشيه الملكه زمرده وصيفتها .
زمرده ملكه البحور بنت الملك الاحمر ؟
ايوه تعرفها ؟
لا
حد حضرك يا مايس ؟
نعم
مين حضرك يا مايس ؟
سيدتى
وحضرتك ليه ؟
ليس لدي علم فانا لم اتواصل معاها
ازي يعني ؟
حضرتني فقط ولم تامرني بشيء ولم تطلب مني شيء .
هبله وحضرت هبله
نعم
لا بهزر.... وربنا بهزر
والملكه زمرده عامله ايه ؟
بخير ......وحشتني
مين ؟؟؟؟
امي واخواتي
اتحضرتي في اي مكان هنا
هنا في هذه الغرفه( شاورت علي اوضه تانيه ).
اسمحيلي ادخلها
دخلت اوضه جميله سقفها يعتبر مسمر شويه .
معمول ديكورات وشغل جامد فيها اوي .
في مرايه في السقف .
في سقف معلق .
في جبس في الجوانب
اوضه جميله بس تحسها كدا بتاعه حد كئيب مابيفتحش النور ...معتمه مع انها مدهونه ابيض .
حد كان هربان من الدنيا وحابس العالم بره اوضته واوضته بالنسباله العالم كله وعايش فيها
متحضره من كتاب يا مايس ؟
قالت تعويزه
التعويزه في كتاب ؟؟
اه
موجود هنا ؟؟؟
اه
وال يحررك وترجعي مملكتك ؟؟ توافقي ؟
لا
ليه
انا هنا سيده
هناك عبده
بس مكانك مش هنا ...مكانك مملكتك .ارجعي لاهلك وحياتك ...هنا حياتك مالهاش طعم ولا هدف .ساعديني ارجعك وبترجعي باذن الله .الكتاب فين ؟
الكتاب فوق في السقف ....فتحه في السقف ترفع المرايه تلاقي الكتاب علي جنب .الكتاب اسمه سحر الاسحار .
ده سبب وجودك ؟؟؟
ايوه
نتخلص منه ازاي ونفك اقترانك بيه ازاى ؟
قالت بنهايته ينتهي وجودى
طب ازاي يا مايس مقترن وجودك بالكتاب ؟
زي ما انت مقترن وجودك باهلك واسمك منسوب لابوك ...الكتاب سبب جلبي وتحضيري .
طب ننهيه ازاي ؟؟؟ بحرقه ؟؟
لا ....بالماء
ازاي ؟؟؟
نقعه بالماء او ترميه في النيل او البحر .
حااااااااضر
احلي جردل ميه للست مايس و صلحه ....نقعت فيه الكتاب .
وانتهي الموضوع و الحمد لله و مايس رجعت للملكه زمرده .
و الله هتوحشينى يا مايس يا اختى
يتبع 😎
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
تعليقات
إرسال تعليق