#المتسوله
#الجزء_الاول
بت يا هنااااااء
نعم يا اما
نزلتى الاكل يا بت لخالتك ام سعيد ؟
لا لسه يا اما ...انا مش عارفه يا اما انتى كل يوم تصممى انزلها اكل ليه الوليه دى ؟
يا بنتى الست غلبانه و ملهاش حد
يا اما دا انتى اللى غلبانه ..دى بتشحت و بيجيلها فلوس اد كدا على قلبها
يا بنتى عيب كدا ...حرام عليكى انتى مش شايفه حالها دا كفايه انها عايشه وحيده كدا مفيش حد يكلمها و لا بتكلم حد
يعنى هى بتقعد يا اما ؟ دى طول النهار تلف فى الشوارع
يا بنتى غلبانه و مبتلاقيش حد يعملها لقمه
ما هى عشان بخيله بتستخسر تطبخ و بتستسهل أننا بنعملها الاكل
لله يا بنتى انتى مبتعمليش لله ابدا
اعمل يا اما بس لحد يستاهل
طب بطلى كلام و نزلى الاكل يلا
انا رجليا تعبانى و مش قادره انزل
بقا كدا يا هناء ؟؟ انا هنزل اوديلها الاكل بنفسي
لا خلاص نازله اهو ....انا مش عارفه الوليه دى هتدنها طالعالنا فى البخت لحد امتى ؟؟
بتبرطمى تقولى ايه يا بت ؟
مبقولش يا اما ...اخدت طبق العدس و نازله اهو
.................. ........................
خالة ام سعييييييييد
ادخلى يا هناء
خدى يا خالتى غدا انهارده اهو
ايه داااا ؟؟؟ عدس ؟؟؟
ايه مش عاجبك ؟؟؟
انتى يا بنتى مش جايبالى فول امبارح ؟
ايوه
و بصاره اول امبارح ؟
ايوه
و كشرى اول اول ؟؟
ايوه ....اللهم صلى على النبى ذاكرتك حديد
ايه يا بنتى مفيش حتة زفر كدا و الا حته لحمه اعض فيها ؟؟
تعضى فيها ؟؟؟ هو انتى فيكى اسنان لسه عشان تعض يا خالتى ؟؟
ايوا طبعا انا عندى طقم سنان معتبر ورثاه من امى الله يرحمها
نعم ؟؟؟ هو اطقم السنان كمان بتتورث ؟؟
ايوه طبعا هو انا هرمى حاجه من ريحة امى الله يرحمها ؟ و بعدين هى يا حبيبتى ملحقتش تستعمله الا سبع سنين بس
نعم ؟؟؟ سبع سنين ؟ و لسه عايش ؟
ايوه طبعا ما هو الاطقم القديمه دى كانت معموله بذمه امال انا محتفظه بيه ليه بس ؟
و معاكى بقاله كام سنه دا يا خالتى ؟؟
مش كتير حوالى عشر سنين
ايه ايه عشر سنين ازاى ؟؟ يعنى عاوزه تفهمينى أن الطقم اللى معاكى ده عمره ١٧ سنه يعنى من سنى 😂؟؟
ايوه يا بت مستغربه ليه ؟ منا مبهلكوش على طول يعنى بلبسه فى المناسبات
لا و الله و هو ده كمان له مناسبات ؟؟
ايوه امال الاكل اللى بيحتاج شد و عض زى اللحمه الفراخ اما بقى باقى الاكل بحاول اكل حاجات سايله عشان محتاجش المضغ
ازاى بقا ؟؟ يعنى مثلا الكشرى اللى جبتهولك بتسيليه ازاى دا ؟؟
عادى يا بنتى بحط عليه صلصه كتير لما يكون زى الميه و ازلطه
تزلطيه ؟؟ يا خبر ...طب و العيش بتعملى فيه ايه ؟
لا العيش دا اسهل ما يكون
ازاى بقا ؟؟
بحط عليه ميه لغايه ما يبوش خالص و بعدها اكله
قصدك تزلطيه راخر ....بتاكلى عيش مبلول زى البط يا خالة ام سعيد ؟؟
و ماله يا بنتى منا ست كبيره اعمل ايه يعنى ؟؟
متعمليش ...انتى عندك كام سنه يا خالتى ؟؟
و النبى يا بنتى منا عارفه
ازاى ؟ انتى مش عندك شهادة ميلاد
ايوه كانت عندى بس معرفش راحت فين
طب مش معاكى بطاقه ؟
طبعا معايا ...لانى بحتاجها كتير مع المخبرين اللى يجازيهم
طب ما هو البطاقه مكتوب فيها تاريخ ميلادك
صحيح ؟؟؟ انتى عارفه انى مبعرفش لا أقرأ و لا اكتب
طب ورينى البطاقه كدا ؟؟
ليه يا بت انتى مخبر ؟؟
هههههههههه لا عشان اعرف عندك كام سنه
خدى اهى بصى فيها و هاتيها على طول احسن انساها
لا متخافيش ....يااااا
ايه يا بت مالك ؟
انتى مواليد ١٩٣٩ يعنى عندك ٨٠ سنه ؟؟
الله اكبر فى عنيكى مالك يا بت هتحسدينى و الا ايه ؟؟
لا احسدك على ايه ؟؟ دا انتى اللى زيك ماتوا من زمان ؟؟
بتقولى ايه يا بت ؟
بقول عاوزه حاجه تانيه ؟؟
ايوه قولى لامك تطبخ حاجه حلوه كدا و تبطل بخل شويه
امى برده اللى بخيله ؟؟؟
و النبى تلاقيكوا بتعملوا اكل حلو و بتنزلولى الاكل القرديحى ده
طب أن شالله اعدمك يا خالتى ما بيحصل ...اللى بناكل منه هو اللى بننزلك منه
طب خلاص يا بت انا بهزر معاكى بس قولى لامك انى نفسي اكل ارانب و ملوخيه
نعم ارنب؟؟ هو انتى عارفه الأرنب بكام دلوقتى ؟؟
زى ما يكون ...بقولك نفسي فيه يا بت يا اللى ما عندك دم
انا برده اللى معنديش دم ؟؟😏
قولى بس لامك و ملكيش دعوه
الا قوليلى يا خالة ام سعيد تكونش امى مديونالك و انا معرفش ؟🤔
امشى يا بت بلاش مياعه
حاضر ......ال ارانب ال ....🤨
#المتسوله
#الجزء_الثانى
قولى بس لامك و ملكيش دعوه
الا قوليلى يا خالة ام سعيد تكونش امى مديونالك و انا معرفش ؟🤔
امشى يا بت بلاش مياعه
حاضر ......ال ارانب ال ....😏😏
..........................
اتاخرتى كدا ليه يا بت ؟؟
الله....... و لا اتاخرت و لا حاجه يا اما ...يدوب اديت للوليه طبق العدس و جيت على طول
كل ده و جيتى على طول ؟ دا انتى بقالك ساعه تحت
الله يا اما ؟؟ يعنى منزلش تزعلى ..انزل تزعلى ؟؟
لا مش زعلانه بس مش عاوزاكى تبقى تقيله و تركنى فى كل حته تروحيها
حاضر يا اما
ها ... خالتك ام سعيد خدت العدس ؟؟
ايوه اخدته بس مكنش عاجبها
ليه ؟؟ دا انا حتى عاملاه زى كل مره
لا هى مش معترضه على الطريقه هى معترضه على الموضوع نفسه
موضوع ايه يا بت ؟
الست الخاله ام سعيد مش عاجبها الاكل القرديحى بتاعنا و عاوزه تاكل ارانب
بتتكلمى بجد يا هناء ؟؟
ايوه و الله يا اما ...هى قالت لى خلى امك تبطل بخل و تجيب ارنب و تعملهولى على ملوخيه
هههههههههه هههههههههه
انتى بتضحكى يا اما ؟؟
ايوه يا هناء ...انتى عارفه اخر مره اكلت ارانب امتى ؟؟؟
امتى يا اما
ليله موت ابوكى الله يرحمه
ياااا يعنى من عشر سنين ؟؟
ايوه
و من يومها مجبتيش ارانب خالص ؟
خالص
ليه ؟ اتعقدتى ؟
حاجه زى كدا ....ابوكى الله يرحمه كان فاتح نفسي على الدنيا و كان مأكلنى الحلو كله ...مكنش حارمنى من حاجه ...كان اسطى سواق اد الدنيا فى شركه كبيره اوى
الله يرحمه يا اما.....احكيلى بقا على اخر ارنب فى حيات ابويا كان عامل ازاى ؟
هو ايه اللى كان عامل ازاى ؟
الارنب يا اما 🙄 هيكون ابويا يعنى ؟؟؟
كان ارنب اسود و فى دماغه اشاره بيضا
لا مش بسألك عن شكله بسألك عن طلب ابويا له كان ازاى ؟
زى الناس يا بنتى ...ابوكى قام يومها و قالى انا نفسي فى الأرانب يا حفيظه
قلت له عيون حفيظه يا سى صبحى .. النهارده يكون عندك اجدعها ارنب فى المنطقه كلها
تسلميلى يا حفظفظ
حفظفظ ؟؟
ايوه يا بت مستغربه ليه هو اما كان يحب يدلعنى كان يقولى يا حفظفظ
طب كملى يا حفظفظ
عنها و قمت رحت لخالتك ام عبده بتاعه الفراخ
ام عبده ؟؟
ايوه يا بت متوعيش عليها انتى ...بقولك ايه بطلى تقفيلى ع الواحده كدا
حاضر ...كملى
رحت لها و قلت لها هاتيلى ارنب متع كدا يا ام عبده الراجل نفسه فى الأرانب
الوليه مكدبتش خبر و جابت لى ارنب وزنه حوالى تلاته كيلو و دبحته و نضفته و خدته منها بعد ما اشتريت الملوخيه و روحت عملت الاكل و ابوكى اكل و تمام التمام
ايوه ...و بعدين ؟؟
مفيش هو خلص اكل من هنا و قالى
تسلم ايدك يا حفظفظ الارنب دا كان طعم اوى
تسلملى يا صبوحى يا حبيبي
اعمليلنا بقا كوبيتين شاى نحبس الارنب الحلو ده
عنيا ليك يا سيد الرجال
و قلتيله سيد الرجال 🤔؟؟؟؟
ايوه يا بت ...فى ايه ؟
مفيش كملى بس
مفيش دخلت عملت الشاى و لسه خارجه فى الصاله لقيت الراجل مقلوب على جنبه افتكرت الارنب كبس على مراوحه🙄
سي صبحى ...سي صبحى قوم عملت لك الشاى .....شمال يمين اقلب فى الراجل طب ساكت 😲
اممممم انا عرفت هو مات ليه🤔 ؟؟
ليه يا فالحه ؟
من سيد الرجال اللى قلتيهاله دى ...الراجل مصدقش نفسه م الفرحه 😂
هههههههههه يو جتك ايه بت
جبتى اجل الراجل يا حفظفظ ؟؟
عيب يا بت هو انا ملك الموت و الا ايه ؟ أن كان عليا كنت افديه بعنيا ...دا كان راجلى و سندى و ضهرى فى الدنيا دى ...الست من غير راجل يا بنتى عامله زى القشايه اللى بتبقى فى مهب الريح
ماسكه نفسها اه بس برده ضعيفه
سيدى يا سيدى ايه الكلام الحلو ده كله ....فينك يا أبا تسمع الكلام ده
الله يرحمه يا بنتى
طب مفكرتيش تتجوزى بعده ؟؟ ابويا سابك صغيره اوى و انا يدوب كنت سبع سنين
بصى انا جالى كتير اوى و لحد دلوقتى فى ناس بتكلمنى و الجواز حلال مش عيب و لا حرام بس انا مش قادره اتخيل نفسي انى ابقى مرات حد تانى غير ابوكى ...حاسه انه كان نصى التانى شبهى اوى ...كان بيقرا عنيا
عارفه لو كان يشوف عيونى بس متعكره بشويه زعل كان يلاحظها فورا و يحاول يعرف ايه اللى فيا و يطبطب على قلبى ...كان يجيب لى الحاجه قبل اوانها معرفش ازاى ...البطيخ ده قبل ما يطلع الاقيه داخل عليا بيه ....يخلينى نايمه كدا و يحط لى حاجه مسكره فى بقى و يقولى كلى دى يا حبيبتى ...لما كان يجيله اى فلوس كان مينسنيش كان يدخل عليا بأى حاجه و لو حتى بسيطه مره ايشارب مره جلابيه مره سلسله ....كان بيحبنى اوى و هو اللى علمنى يعنى ايه حنيه
الله يا اما ...يا ريت ابويا كان فضل معانا
يا ريت يا بنتى ...ابوكى ده مكنش فى حد زيه فى الدنيا دى كلها
منا فاكره برده شويه حاجات كان بيعملهالى كدا ....فاكره لما اخدنى عشان يجيب لى حاجه حلوه من الدكان و كنت ساعتها تقريبا خمس سنين و الواد ادهم خبطنى بالعجله بتاعته ....ابويا يوميها بهدل الدنيا و خدنى و رحنا لابوه على القهوه و اشتكاله
و ابوه قعد يقول لابويا حقك عليا ....و طبطب عليا و باس دماغى و قالى متزعليش يا خطيبة ابنى 😍...و خلى ادهم يجى يعتذر لى و يقولى متزعليش منى يا نوئه مكنش قصدى 😍😍
مالك يا بت ما تتعدلى كدا ...مالك بتتكلمى بسهتنه كدا ؟؟
سهتنة ؟؟؟ سهتننة ايه يا اما ؟؟ ااااا الا قوليلى هتعملى ايه فى حكايه الارنب اللى طالباه ام سعيد ده ؟؟؟
بتوهى على الكلام يا بنت حفيظه ؟؟؟ على العموم بشوقك ...الارنب اه هنزل اشترى ارنب و اطبخه و ابعتلها منه
انتى معاكى فلوس يا اما ؟؟
ايوه يا بنتى منا لسه واخده المعاش و كمان طلع لنا جوزين حمام من اللى بنربيهم هبيعهم و اجيب للوليه اللى نفسها فيه
يا اما هى كانت من بقية عيلتنا ؟؟
يا بنتى ست كبيره و نفسها فى الحاجه ما يمكن يكون دا اخر ارنب تاكله فى حياتها
هههههههههه هههههههههه ايوه و انتى ليكى سابقه فى الموضوع ده قبل كدا يا حفظفظ سرك باتع فى حكايه الارانب بالملوخيه دى 😂😂😂😂
اخص عليكى يا بت انا قصدى انها ست كبيره فى السن مش قصدى اموتها
منا فاهمه خلاص 😂 انا لله و انا اليه راجعون كانت ست طيبه بالرغم من أنها بخيله جلده 😂
هى مين دى يا بت ؟
الست ام سعيد اكله الارانب
امشي يا بت ...امشي شوفى اللى ورانا
حاضر يا حفظفظ 😂
#المتسوله
#الجزء_الثالث
يا اماااا يا اماااا
ايه يا بت مسروعه كدا ليه؟؟
الارنب اللى بتعمليه دا خلص ؟؟
ايوه خلاص اهو ليه عاوزه ايه ؟؟
اصل ريحته هتجننى ..و الا الملوخيه انا خلاص هنتحر ايه الريحه دى؟
اصلى بحمره فى معلقه سمن بلدى
الله الله انا عرفت ابويا مات ليه 🤔
اسكتى يا هناء و يلا عشان تاخدى الطبق بتاع خالتك ام سعيد تدهولها
نعم نعم لا مليش دعوه لازم اكل الاول
يا بت الاكل هايبرد حرام عليكى
لا دا يبقى حرام عليا لو سبت الاكل ده و نزلت ....اماااا بقولك ايه متحاوليش هاكل الارنب يعنى هاكل الارنب
كدا يا هناء ....خلاص هنزل انا انزلهولها
و لا انتى هتنزلى ...انتى ازاى قادره تقاومى الريحه دى ...بصى انا هاكل فى خمس دقايق و انزلها الطبق متخافيش مش هيلحق يبرد ...و يلا بقا عاوزه اكل
طب اقعدى يا فالحه كلى
الله الله ....دا طعمه جميل اوى يا اما
ايه يا بت مالك كدا عامله زى المحرومه زى ما يكون اول مره اعملكم ارانب 🤔
ايوه طبعا اول مره
اول مره ازاى ؟ اشحال انى حكايالك حكاية ابوكى و انتى يومها اكلتى معاه
حكايه ابويا دى من عشر سنين يا اما ...عارفه يعنى ايه عشر سنين يا حفظفظ
طب يلا خلصى.... اكل الوليه هيبرد
حاضر خلصت اهو
،،،،،،،،،،،،،،،
خالت ام سعييييييد .... ام سعيييييد
ايه يا بت ؟ ....مش تخبطى قبل ما تدخلى يا اللى تتشكى ؟
اتشك ؟؟؟ ما انتى لو عرفتى انا جايبالك ايه معايا مكنتيش قولتى كدا
جايبالى ايه يعنى تلاقيه فول و الا عدس
عدس ؟؟ صحيح ما هو اللى ميعرفش يقول عدس
جايبالى ايه ؟ هاتى
لا مش هديكى الطبق الا اما تقوليلى الفلوس اللى كنتى بتعدى فيها و دخلتيها اول ما دخلت دول كام ؟؟
فلوس ؟؟؟ فلوس ايه يا بت انتى اتجننتى
ايوه الفلوس اللى زحتيهم تحت الكنبه انا شفتك
لا انتى فهمتى غلط ...دا دا دا هما عشرين جنيه بس فكه واحده ست حبيبيه كدا زى امك ادتهوملى
اممممم عشرين جنيه بس ؟؟
ايوه عشرين و بعدين انتى مالك يا بت ؟؟
مليش كنت بطمن عليكى بس و على مستقبلك يا خالة ام سعيد
اطمنى يا اختى انا حلوه
واضح جدا انك حلوه اوى
الله اكبر فى عنيكى
الا قوليلى يا طنط ام سعيد بتكسبي كتير من الموضوع ده ؟؟
بكسب ايه بس ؟؟ دى حتى الناس مبقتش زى الاول ...الناس بقت خايفه تطلع الجنيه زى ما يكون الجنيه ده هو اللى هيحييهم
يا شيخه ؟؟؟ طب عينك فى عينى كدا
عين ايه و بطيخ ايه يا بت ...هاتى يلا الطبق اللى فى ايدك ده انا شامه ريحه حلوه و حاسه أنه اللى فى بالى
قبل ما اديكى الطبق قوليلى بتكسبي كام تقريبا فى اليوم
انتى مالك يا بت بالكلام ده ؟
اصلى بفكر اجى اشتغل معاكى
تشتغلى معايا ازاى ؟؟ مش انتى متعلمه
ايوه انا معايا دبلوم بس انتى عارفه أن مفيش شغل دلوقتى
بس دى شغلانه صعبه عليكى ...
صعبه ازاى يعنى ؟ هو فى اسهل من مد الايد
لا طبعا ما هو مش اى مد
يا سللاااام ....طب ما ترسينى يا خبرة انتى
انتى صحيح يا بت عاوزه تشتغلى معايا ؟
ايوه صحيح ...هو انا ههزر معاكى و الا ايه ؟
و امك عارفه بالكلام ده ؟
لا طبعا مش هقولها
امال هتقوليلها بتروحى فين ؟؟
هقولها نزلت اشتغلت فى محل و هى هتصدق ...بس المهم قوليلى بتكسب الشغلانه دى و جايبه همها و الا لا ؟
لا منا مش هفهمك ببلاش
يعنى ايه مش فاهمه ؟
قصدى انى هعلمك الموضوع على أصوله و هخليكى تاكلى الشهد بس كله بحسابه
بحسابه ازاى بقا و لا مؤاخذه ؟
يعنى هاخد نص اللى هتجبيه
نعم نعم نعم يعنى انا الف و اتعب و انتى تيجى تاخدى النص كدا ع الجاهز ؟
لا مش ع الجاهز ...انا هعلمك نبرة الصوت اللى تشحتى بيها و هلبسك لبس من عندى و هحدد لك اوقات و اماكن الناس فيها ممكن يعطفوا عليكى و على حالك فيها و يدوكى فلوس كتير اوى ...يبقى بقا انا استحق النص لانك من غيري مش هتعرفى تجيبي الفلوس دى
يخربيت دماغك انتى ست كبيره اهو بس داهيه
هو انتى يا بت فاكره انى عندى ٨٠ سنه زى ما قلتيلى ؟؟
امال ؟؟؟ ما بطاقتك اللى بتقول كدا
لا البطاقه دى و الكلام المكتوب فيها غلط
غلط ازاى يعنى؟
زمان كانوا بيسننونا بدرى عشان يجوزونا و كانوا بيكتبوا سن غلط فى الشهاده ...انا اصغر من المكتوب ده بعشر سنين كدا
يا سلام ...يعنى انتى على كلامك ده سبعين سنه بقا ؟
ايوه
بس بسم الله ما شاء الله اللى يشوفك يقول خمسين
الله اكبر الله اكبر ...يخربيت عينك
متخافيش يا خالتى عينى عليكى بارده
طب هاتى يا اختى الاكل اللى فى ايدك ده و روحى هاتى الصندوق الخشب اللى هناك ده
الصندوق الجربان ده ؟؟
جربان ؟؟؟ دا صندوق جوازى يا هبله
يا خبر اسوح يعنى الصندوق ده عمره كدا حوالى ٦٠ سنه 😜🤔🤔
اخرسى يا بت يا ام لسان طويل و هاتى الصندوق يلا ....ايه دا 😲 ارانب و ملوخيه ؟؟
ايوا شفتى المفاجأة 😂
طب هاتى ..هاتى طقم السنان اللى على التربيزه ده بسرعه
هو فين الطقم ده مفيش غير كراكيب على التربيزه
يا بت الورقه الملفوفه دى ...اللى جنب الكيس الاسود ...ايوه هى دى هاتيها
خدى ...قلتيلى بقا صندوق الهدوم بتاعك ده فيه ايه ؟؟
خالتى
خالتى ؟؟
خالتى
مالك يا بت ؟ انتى لكاكه كدا ليه ؟؟
مالك انتى مبترديش ليه ؟؟
يخربيتك بت سبينى اكل
اااه طيب كلى براحتك و انا هجيب الصندوق
يااااا دا تقيل اوى
ما هو خشب زان معتبر
انتى حاطه فيه ايه دا
افتحى و انتى تشوفى
#المتسوله
#الجزء_الرابع
يخربيتك بت سبينى اكل
اااه طيب كلى براحتك و انا هجيب الصندوق
يااااا دا تقيل اوى
ما هو خشب زان معتبر
انتى حاطه فيه ايه دا
افتحى و انتى تشوفى و الا اقولك استنى انا هفتحه انا عشان متبوظيش حاجه
ليه هو فيه ايه ؟؟
اصبرى على رزقك
اكيد الصندوق ده مليان فلوس
اتوكسي يا بت و خدى الكوبايه دى امليها ميه من حنفية المطبخ
حاضر بس اوعى تكونى عاوزه توزعينى و تخبى الفلوس ؟؟
امشى يا هناء فلوس ايه الله يهديكى
خلاص هروح اجيب لك الميه بس انا باصه عليكى اهو 😂
..........
الميه أهيه
هاتى
مش هتقومى تغسلى ايدك يا خالتى ؟؟
لا اغسلها من نعمة ربنا ؟ ...انتى هبله يا بت ؟
طب ما انتى هتوسخى الحاجات اللى هتطلعيها من الصندوق
هوسخها ايه يا اللى تنقرصى هو انا ايدى فيها ايه ؟؟ دا يدوب ريحتها سمنه بلدى من اللى امك محمره بيها الارنب
و عرفتى كمان أن امى محمراه فى سمنه بلدى ؟
طبعا يا بت هو انا غشيمه ؟ يلا يلا عشان نفتح الصندوق
يلا يا خالتى يكش نلاقى فيه كنز و الا حاجه تكونى ناسياه
ايه دا ؟؟؟؟؟ ايه الحاجات اللى فيه دى ؟ و ايه الريحه دى ؟
مالك يا بت اتسرعتى كدا ليه ؟؟
يا نهار اسوح و انا اللى عماله اقول هلاقى كنز
مالك يا بت ؟ فى ايه ؟؟
تقدرى تفهمينى انتى دى ايه ؟؟؟؟
دى جزمة عمك ابو سعيد الله يرحمه
دى جزمه دى ؟؟ دى جر شكل ...دى اكيد جزمه من الحرب العالمية الأولى ....طب و ايه دا ؟؟
دى هدومى و انا عروسه
يا خبر .....هدوم ايه دى ؟؟؟ انتى كنتى بتلبسي دا ؟؟
ايوه يا بت هو انا كان فى حد زيى فى حلاوتى و شياكتى
لا واضح اوى
و ايه الازايز و العلب الفاضيه دى ؟
دى الحاجات اللى كنت بحطها لعمك ابو سعيد عشان يشوفنى حلوه
طب و محتفظه بيها ليه دى ؟
الله ...امال هرميها ما يمكن احتاج علبه و الا ازازه احط فيها حاجه
و ايه البؤجه الكبيره دى فيها ايه ؟
لا ملكيش دعوه بالبؤجه دى ..حطيها هنا على جنب
حاضر ...يا خبر ...ايه كميه الجلاليب القديمه دى و الايشاربات المقطعه دى ؟؟ و شباشب ؟؟ دى شباشب من ايام الحمله الفرنسيه على مصر دى
بس يا بت
صدقينى ...لو قلبتى الشبشب هتلاقى توقيع نابليون بونابرت عليه من تحت
بونابرته مين دا ؟
لا متاخديش فى بالك 😂
دى كانت عدة الشغل يا هبله
كانت ؟؟ طب و دلوقتى ؟
لا منا معنتش بلبس الحاجات دى بحكم السن و كمان من ساعة ما مات سعيد ابنى مبقتش البس الا السواد
لا حول و لا قوة الا بالله هو ابنك مات ؟؟
ايوه من عشرين سنه
دا انا فاكراه مسافر أو متجوز فى مكان بعيد
لا ...مات
انا اسفه يا خالتى انى قلبت عليكى المواجع
لا ابدا انا عايشه فيها
طب ممكن تحكيلى عن حياتك و ازاى بقيتى بتشحتى ؟؟
احكيلك انا ورايا ايه يعنى ؟ بس امك مش هتقلق عليكى ؟
لا امى زمانها نامت بعد ما اكلت الارنب انا سايباها و هى داخله السرير
طب صلى على النبى يا بنتى
عليه الصلاة و السلام
انا كنت واحده زى اى واحده ست بسيطه فلاحه من قريه تبع المنوفيه ...ابويا كان راجل غلبان صاحب عيال و مكفى على لقمة عيشه
كان عنده من العيال عشره انا اكبرهم
ما شاء الله ... عشره مره واحده ؟؟
زمان الناس كانت بتخلف كتير عشان المرض و الموت كان كتير و كمان عشان العيال دى تعتبر العزوه و اللى بتساعدهم بعد كدا و تجيب لهم القرش
يعنى انتى عندك تسع اخوات غيرك ؟؟
الله يرحم الجميع بقا
هما كلهم ماتوا ؟؟
ايوه
و مفضلش غيرك ؟؟؟😂
ايوه ....تقصدى ايه يا بت ؟
لا مقصدش كملى
ابويا جوزنى لأول واحد دق على بابى ..البنات بالنسباله كانت هم و عاوز يخلص منها بأى طريقه
انتوا كنتوا كام بنت ؟؟
كنا سبع بنات و تلات جدعان
تمام ...و بعدين ؟؟
ابويا جوزنى و انا معرفش يعنى ايه جواز ...كل اللى كنت اعرفه ان العروسه دى بتلبس فستان ابيض و بيحطولولها شويه حمره فى وشها و يفضلوا يهيصوا لها و خلاص
كنت فرحانه بالجلابيتين على القميصين البتطستا اللى امى نزلت اشترت قماشهم و فصلتهم عند جارتنا ام ابانوب
امى كمان جبت لى ملايه سرير و حلتين و كام طبق و كام معلقه ووابور جاز و بستله لتخزين الميه و طشت كبير عشان الغسيل و الحما
دا كان جهازك ؟؟؟
ايوه
ياااا دا الدنيا كانت سهله اوى زمان
احنا كنا زمان بنتجوز فى اوضه فى بيت عيله و يدوب بيبقى فيها حاجات بسيطه
طب و جوزك كان جايب ايه ؟؟
جوزى بقا أبوه كان يعتبر راجل مقتدر عندنا فى البلد جاب لى سرير و الصندوق اللى انتى شايفاه ده و حصيره من السمار فرش ليا بيها الاوضه
و فين هى الحصيره دى مش شايفاها يعنى ؟🤔😂
حماتى الله يجازيها سرقتها منى بعد موت ابو سعيد الله يرحمه
المهم ...كملى
جوازتى تمت فى شهر ...من اول ما حمايا الله يرحمه جه لابويا يطلب ايدى و لحد ما خلصوا توضيب المقعد اللى هنقعد فيه
استنى ...يعنى ايه مقعد ؟؟
يعنى الاوضه ...كانوا زمان لما يحبوا يجوزوا ولد من ولادهم كانوا يضربوا شويه طوب و يبنوا بيه
يضربوا ليه ؟؟
لا مش يضربوا بالعصايه يا هبله ...ضرب الطوب يعنى يجيبوا تراب و مايه و يعجنوه بالتبن - بيسموها معجنه- و بعدين يحطوا الطينه دى جوه قالب خشب على شكل طوبه و يسبوه فى الشمس لحد ما ينشف بعد كدا يبنوا بيه
ااااه ..و بعدين
و بعدين بقا جه يوم فرحى ...انا فاكره يوميها كنت بلعب مع بنات صحابى جبه
جبه اي دى ؟؟؟؟
جبه دى لعبه كدا بحاجه زى الزلط أو حتت طين ناشفه بس متساويه و شكلها حلو كنا نسميها ايلان ...و كنا نلعب بيها بأننا نحدفها فى الهوا مع لم بقية الايلان من الأرض بسرعه و الشاطره بقا اللى متوقعش و لا طوبه و هى دى اللى تكسب
ها ...و بعدين ؟
و بعدين لقيت امى بتنادى عليا و تقولى تعالى عشان احميكى يا عروسه و تلبسي الفستان الجديد
سبت العيال و جريت على امى ...و كنت فرحانه اوى ...امى يوميها حمتنى بصابون مستورد كانوا مهربينه من ايام الإنجليز بس كانت ريحته ايه؟ جميله اوى
ممعكيش ورقه من ورق الصابون دا يا خالتى ؟
اه هتلاقى مع العلب الفاضيه كام ورقه كدا كنت محتفظه بيهم
ههههههه يا لهوى دا انا كنت بهزر
اسمعى لما اقولك كل حاجه ليها فايده و اكيد هيجى يوم و تستعمليها مره تانيه
و انا هستعمل ورق الصابون فى ايه يعنى ؟
انا كنت بحتفظ بيه بين الهدوم عشان يخلى ريحتها حلوه و كمان الصابون فى وسط الهدوم ميخليهاش تعت
تعت يعنى ايه ؟
يعنى تيجى فيها العتة يا بت ...و تنقر
اه يا بنت اللعيبه ...طب كملى كملى لما امك نادتك و حمتك عملتى ايه بعد كدا ؟
بعد كدا يا ستى .....
#المتسوله
#الجزء_الخامس
يعنى تيجى فيها العتة يا بت ...و تنقر
اه يا بنت اللعيبه ...طب كملى كملى لما امك نادتك و حمتك عملتى ايه بعد كدا ؟
بعد كدا يا ستى لقيت واحد و لا اعرفه و لا هو يعرفنى بيقولوا عليه جوزى
ابويا حط ايده فى ايد أبوه و جه الشيخ مأذون كتب كتابى بشهادة التسنين اللى كان ابويا مطلعهالى من الصحه انى عندى عشرين سنه و انا كنت ساعتها مجبش ١١ سنه
المهم اتجوزت جوزى ده و انا مش فاهمه حاجه خالص و لا اعرف يعنى ايه راجل و يعنى ايه جواز
لقيت حماتى كانت ست شديده دخلت عليا و قالت لى انتى خلاص مبقتيش عيله انتى بقيتى واحده ست و بقا لكى راجلك اللى لازم تشوفى طلباته
و انا اسمع و اهز دماغى ...مع انى مش فاهمه قصدها ايه بطلباته دى
من تانى يوم بقا حماتى بقت تشغلنى بلقمتى جوزى بقا يروح الغيط و انا طول النهار اشتغل فى الدار
جوزى كان الكبير بتاعها و اتاريها جوزته بسرعه و هو ١٨ سنه عشان تجيب اللى تخدمها
و كنت أنا الخدامه الجديده اللى بلا اجره
بقيت أسرق الاكل من وراها عشان بس اشبع لأنها كانت ترميلى لقمتين و تشغلنى عليهم النهار بطوله
طب و مقلتيش لاهلك ليه ؟؟
اهلى مين يا بنتى ؟ دول ما صدقوا خلصوا منى ...وراهم تسعه غيري مش فاضيين لى
طب كنتى قولى لجوزك
ههههههه جوزى كان عيل قليل الحيله ميقدرش يقول لامه غير نعم و حاضر
طبعا بقيت فى المرار ده سنين و عشان كنت صغيره محملتش إلا بعد حوالى خمس سنين من جوازى ...
و طبعا فى الفتره دى حماتى مكنتش سايبانى و كل شويه تلقح بالكلام عليا
لما حملت فى سعيد ابنى كانت الفرحه مش سايعانى و قلت خلاص اكيد الوليه هتخف عليا ...لكن ابدا اللى فيه طبع مبيسلهوش
بقت تدايق فيا و انا اعيط
جوزى ساعتها كان خلص جيش بقاله سنتين و حمايا شاف له شغلانه فى المركز بتاعنا فراش فى مدرسه
بقى يروح الصبح المدرسه و يرجع على الغيط اوديله حتتين الجبنه الحادقه على عودين السريس أو الجعضيض و يتغدى
اما الزفر بقا مكناش نشوفه الا من الاسبوع للاسبوع و ياريت كانت تدينى حته كويسه
دى كانت تقسم الاكل عليها و على اولادها و تدينى رقبه أو جناح و تقولى الزفر للرجاله عشان بيشقوا و يتعبوا
و لما سعيد بدأ ياكل بقت تديله الجناح بتاعى أو الرقبه و تقولى ابنك خد منابك
كتت ساعات اروح لامى اعيطلها و كانت امى تأكلنى ...و ساعات كانت تبعت لى ورك فرخه فى رغيف مع حد من اخواتى لانها عارفه انى مبشوفش الحاجات دى
و مرت الايام و ابتدت حماتى تجوز سلايفى و ابتدأ يظهر اوى انها بتفرق فى المعامله ما بينا خاصه مرات سلفى التانى لأنها كانت بتشتغل خياطه و كانت حماتى مبتقولهاش تعمل اى حاجه بل بالعكس كنت أنا اللى اخدمها و اخدم عيالها و لما كنت أسأل حماتى ليه مش بتقسمى الشغل علينا بما يرضى الله ؟
تقولى هى بتشتغل و بتدخل قرش انتى بقا بتدخلى ايه ؟
بقيت احط جزمه فى بقى و اسكت منا هعمل ايه جوزى غلبان و ميقدرش يأجر لى بره ..امه كانت بهدلته لو فكر فى كدا بس
لحد ما فى يوم كنت عاوزه أودى الغدا لجوزى زى العاده ضربت فى دماغى أن اعمله حاجه جنب الجبنه الحادقه دى اللى نشفت قلبه
جبت بتنجنتين و قلت اقليهم و احطهم مع الجبنه
حماتى مكنتش فى البيت ....اول ما دخلت و لقتنى بقلى البتنجان فى اوضتى على وابورى ....جن جنونها و شالت الطاسه بالزيت و طوحته بعيد
و قعدت تزعق ...هو كل مره منكم هتعملى واحده ست و تعملى اكل لوحدها ؟؟؟ و بقت تشتم فيا بالام و بالأب
انا اخدت على خاطرى و جبت أخرى منها رحت سايبالها البيت و رحت على امى و للاسف سبت سعيد و كان عمره حوالى خمس سنين او اربعه مش فاكره
قعدت عند اهلى شهر ....طبعا كان قلبى بيتقطع على ابنى و اللى زاد عليا انى قابلت واحده من جيرانى هناك و قالت لى ابنك وقع فى الترعه و لولا ستر ربنا كنت معديه و لحقت طلعته
قلبى بعد الحكايه دى بقا مولع و بقيت بعيط بدل الدموع دم
ابويا لما شاف حالى كدا بعت لجوزى و أبوه ....و طبعا الكلام مش معاهم ...حماتى هى اللى كان فى أيدها كل حاجه و هى قالت له سيبها تتربى فى بيت اهلها شويه عشان تعرف أن الله حق
ابويا قاله طب هات الواد لأمه تشوفوه
حمايا رد و قاله و الله احنا مخدناش منها الواد هى اللى سبته بمزاجها و بعدين الحجه زعلانه منها اوى و من اللى عملته
انا كنت واقفه على الباب و سامعه اللى بيتقال و شايفه أن ابويا مش عارف ياخد معاهم حق و لا باطل و انا اللى فى الاخر هتحرم من ابنى ...رحت داخله عليهم و موطيه على ايد حمايا بوستها و قلت له انا عاوزه ابنى ابوس رجلك انا عاوزه ابنى
الكلام مش معايا يا بنتى الحجه مصممه انك تطلقى
لا ابوس ايدك ...و ايد الحجه انا مش عاوزه اتطلق و لا عاوزه ابعد عن ابنى ....انا مستعده اجى معاك و اعتذرلها و ابوس رجلها قدامكم كلكم
ابويا كان واقف بيتفرج عليا و منطقش بكلمه ما هو عارف انى هموت على ابنى ...و فعلا حماتى كانت بتخطط انها تطلقنى و تجوز جوزى و عرفت بعد كدا انها راحت اتفقت مع ناس فعلا انها تجوزه
يااااا ....ايه القهرة دى كلها ؟ ليه تعملى فى نفسك كدا يا خالتى ؟؟
عشان ضنايا يا بنتى كنت مستعده اعمل اى حاجه لو قالت لى اقلع عين من عنيكى كنت وافقت
طب و بعدين عملتى ايه لما رحتى لها ؟
حمايا و جوزى اخدونى و كنت ماشيه معاهم كأنى رايحه لعشماوى بقى جسمى يترعش و رجليا تلف حوالين بعض و جوزى ساكت خالص كأن الموضوع ميخصوش
طبعا ابويا سابنى امشى معاهم لانه مكنش عاوز يخرب عليا ...لكن امى بقى بقت تعيط لانها عارفه اللى هيجرى ليا لما اروح اتذلل لحماتى بالطريقه دى
دخلت على حماتى اللى كانت قاعده على حصيره على الأرض و قدامها راكية نار بتتدفى عليها عشان كنا فى الشتا و الجو متلج و المطره مغرقه الشوراع و الارض كلها طين
دخلت عليها و اول ما شافتنى .......
#المتسوله
#الجزء_السادس
دخلت على حماتى اللى كانت قاعده على حصيره على الأرض و قدامها راكية نار بتتدفى عليها عشان كنا فى الشتا و الجو متلج و المطره مغرقه الشوراع و الارض كلها طين
دخلت عليها و اول ما شافتنى ودت وشها الناحيه التانيه
حمايا قالها منال جايه تعتذر لك يا حاجه
منال مين ؟؟
انا يا به
انتى اسمك منال ؟
ايوه ...مستغربه ليه يعنى ؟
لا مش مستغربه بس اول مره اعرف ... كملى يا خالتى منال 😂
طبعا حماتى هاجت و زعقت مع حمايا و ايه اللى جاب البت دى هنا ؟
و حمايا يقولها معلش يا حجه هى عرفت غلطتها و مش هتعمل كدا تانى ... تعالى يا منال بوسي ايد الحجه
و نزلت على أيدها بوستها و بعد محايلات كتير رضيت انى ادخل اوضتى
دخلت لقيت الحصيره اتاخدت و هدومى مبقاش فيها حاجه كله اتاخد و اديتهم لبناتها و بقوا يلبسوها قدامى عادى جدا و انا مقدرش انطق
كنت اغسل جلابيتى و استنى لما تنشف شويه و اروح لابساها ...لحد ما امى اديتنى جلابيتين قدام اغير فيهم
مرت الايام و ابنى كبر و بقا عنده ١٥ سنه و طبعا و لا اتعلم و لا حاجه
حاولت ادخله المدرسه لكن حماتى كان لها رأى تانى ...كانت عاوزاه يزامل مع الجيران و يجيب لها قرش
يزامل يعنى ايه يا خالتى !؟
يعنى يشتغل مع الجيران فى أرضهم و هما يجوا يشتغلوا معاه قدام شغله ده عشان متدفعش أجرة انفار
و طبعا كانت بتكرهه فى المدرسه لحد ما الواد كرهها فعلا و مبقاش يطيق يسمع سيرتها
لما ابنى كان عنده ١٥ سنه اخو حماتى تعب اوى و كان بيموت
راحت عشان تزوره و قعدت جنبه ...الراجل قالها سامحيني يا اختى
ردت هى و قالت مسمحاك يا اخويا بس على ايه ؟
قال اصل انا كتبت أرضك باسمى
ازاى كتبت ارضى باسمك ؟؟
اخدت مراتى و قلت للموظف أن دى انتى و ختمتها قدامه
انت بتقول ايه ؟؟؟ يا لهوووووى
و بقت حماتى تصرخ و بعد ما كانت بتدعيله بالشفا بقت تدعى عليه أنه لا يكسب و لا يربح
بعدها اخوها مات و هى من ساعة الحكايه دى و الحسره نزلت فى قلبها و من يومها و هى اتبدل حالها لحد ما ماتت من كتر الزعل
ياااا ...دا ايه اللى بتحكيه دا ؟؟
الدنيا مليانه يا بنتى و الظلمه كتير
اكيد انتى بقى ارتحتى لما حماتك ماتت
تصدقى يا هناء انى زعلت عليها
ياااا ازاى بعد اللى عملته فيكى دا ؟
بصى الست دى اتربت على كدا و كانت فاهمه انها بكدا بتحكم بيتها و عيالها ...و كمان انا مكنتش اعرف معنى الحقد و لا الكره
وبعدين كملى
بعد كدا حمايا اتجوز بت صغيره بقت تكيد فى نسوان البيت كلهم لحد ما الحياه بقت مستحيله فى الدار
قلت لجوزى يشوفلنا أن شاالله اوضه جنب شغله فى المركز و نبعد عن البلد و اللى فيها
جوزى مكنش موافق طبعا لان مرتبه مش هيتحمل ايجار و اكل و شرب بس انا قعدت ازن على دماغه و أقوله سعيد هيشتغل و هيساعدك لحد ما وافق و شاف لنا اوضه فوق سطوح رحنا قعدنا فيها و كنت فرحانه و فاكره أن خلاص ربنا تاب عليا من المشاكل و جوزى هيبقى ليا لوحدى
لكن سبحان الله الحظ المايل بيفضل مايل و عمك ابو سعيد قامت حريقه فى المدرسه اللى كان فراش فيها و بقا يدخل فى وسط النار عشان ينقذ الاطفال ....يومها انقذ ٢٢ عيل و لكن للاسف فى اخر عيل النار مسكت فى هدومه راح رامى الواد على طول دراعه و هو مرجعش منه غير جزمته اللى انتى شوفتيها دى
طبعا انا مبقاش ليا الا سعيد ...بقى الولا اكمنه مش متعلم بقى يشتغل اى حاجه يوم فى صبة اسمنت ...يوم صبى ممحر ...يوم صبى مبلط
الواد تعب و قالى يا اما احنا عاوزين نسيب البلد دى و نطلع على مصر
ليه يا سعيد ؟ البلد اللى نعرفها احسن من اللى منعرفهاش
لا يا اما البلد دى مش احسن ...مصر فيها الرزق واسع ...هتعب هلاقى قصاد تعبى لكن هنا اللى جاى على اد اللى رايح
و طلعنا على مصر و أجرنا اوضه و الواد اشتغل فى محل كشري و الحاله كانت كويسه
و فى يوم رجعلى و هو ماسك جنبه و بيحفر فى الارض من كتر الوجع
خدته و طلعنا على المستشفى الدكتور قالى أن عنده التهاب جامد فى الكلى و أنه مشتبه أن يكون فى حصوات
طبعا الواد بقا نايم و حالته بقت تدهور و انا بقى حاولت ادور على اى شغل لكن للاسف انا مبعرفش اشتغل اى شغل
حاولت اخدم فى البيوت لقيت ناس كتير طمعانه فيا
مديت ايدى لاول مره فى حياتى لما الدكتور قرر أنه حصل فشل كلوي و أن ابنى لازم يغسل كلى
و بقيت اسيبه و انزل اشحت ...و هو كان بيغسل مرتين فى الاسبوع و كان بيتعب اوى من الغسيل ده
قعدت على الحال ده عشر سنين و بعدها ابنى مات الله يرحمه بعد ما تعب اوى و حمدت ربنا أنه استريح من العذاب اللى كان بيتعذبه
يااااا ...طب مرجعتيش لاهلك ليه يا خالتى بعد موت ابنك ؟
ارجع لمين يا بنتى ...ابويا و امى كانوا ماتوا و مفضلش غير اخواتى و كل واحد كان له بيته و حاله المشغول بيه
قصتك دى تنفع تتعمل فيلم يا خالتى
يوووو ...فى زيى كتير يا بنتى و قصصهم اكتر من قصصى كمان ...الدنيا مليانه زى ما قلت لك ....المهم هتشتغلى معايا و الا لأ
انا يا خالتى .......
#المتسوله
#الجزء_السابع
قصتك دى تنفع تتعمل فيلم يا خالتى
يوووو ...فى زيى كتير يا بنتى و قصصهم اكتر من قصصى كمان ...الدنيا مليانه زى ما قلت لك ....المهم هتشتغلى معايا و الا لأ
انا يا خالتى كنت بهزر معاكى ...بناغشك يعنى
بقا كدا يا بت انتى ؟؟ خلتينى احكيلك و اوريلك صندوق الشغل و فى الاخر تضحكى عليا ؟
معلش بقا يا خالتى ...انا هطلع زمان امى قلقت عليا
روحى يا اختى بس فكرى الموضوع ده هيجيب لك قرش حلو
حاضر هفكر
................. ... .................... ...
هو انتى يا بت مش هتبطلى الركنه اللى بتركنيها عند الناس دى
فى ايه يا اما ؟؟
فى ايه؟ ايه ؟ دا انا نمت و صحيت و انتى تحت
طب مندتيش عليا ليه ؟
قلت اما اشوف اخرتها و سمعاكى عماله دودو دددو دووودوودو مع ام سعيد بتتكلموا فى ايه دا كله ؟
اسكتى يا اما دا حكايتها تشيب
اممم
اممم ايه مش هتسالينى عن حكايتها ؟
لا
لا ليه؟؟؟
عشان انا عارفاها
اااه عشان كدا بقا
عشان كدا ايه يا بت ؟
عشان كدا بتنزلى لها اكل كل يوم
ايوه الست غلبانه و من ساعة ما سمعت حكايتها و هى قطعت فى قلبى و خدت عهد على نفسي أن كل أكل اعمله اكون عامله حسابها فيه
هى حكايتها صعبه بس مش غلبانه زى ما انتى فاهمه
انا مليش دعوه معاها فلوس و الا ممعهاش انا بعمل كدا حاجه لله على روح ابوكى الله يرحمه
الله يرحمه ....طب بقولك ايه خالتى منال جايبالى شغل
خالتك منال مين ؟
هههههههههه الله مش بتقولى عارفه حكايتها ؟؟؟؟
ااه اه افتكرت ...أصلها كانت حكايالى من زمااان و نسيت أن اسمها منال ...طب و شغلانة ايه اللى جيبهالك ام سعيد ؟
لا دى شغله كدا فى محل بس بتشكر فى صاحبته اوى و بتقول عليها ست اميره و بتدى مرتبات حلوه اوى
بجد ؟؟ طب يا ريت ...على الأقل تعمليلك قرش اجهزك بيه انتى عارفه الحال على اده
يعنى اقولها انك موافقه ؟؟؟
مش هى متأكده من الست صاحبة المحل و الا اروح معاكى اشوفها ؟؟
لا تروحى فين ؟ هو انا لسه فى حضانه و رايحه تقدميلى ؟؟ لا انا من بكرا هنزل مع ام سعيد الشغل ....قصدى المحل يعنى
.........،،،،،،،،،.........،،،،،،،،،........،،،،،،،،،
ام سعييييييد ...كويس انى لحقتك قبل ما تنزلى
عاوزه ايه يا بت ؟ متعطلنيش عن لقمة عيشى الصبح ده بيبقى رزقته حلوه
مش هعطلك انا خلاص وافقت اشتغل معاكى بس بشرط
انتى هتتشرطى كمان يا بت ؟
لا مش شرط هو رجاء يعنى
قولى عاوزه ايه خلصينى
اولا اشتغل فى حتة بعيد عن المنطقه عشان محدش يعرفنى فيها
سهله ...انا كنت هعمل كدا اصلا
ثانيا ملبسش هدوم الشغل هنا عشان منظرى يعنى
برده سهله هلبسك فى جامع انا عارفاه
ثالثا
هو لسه فيه ثالثا ؟؟؟
ايوه ...انا عاوزه اشتغل باليوميه مش بالنص زى ما قلتيلى
طب و ليه بقا ؟؟؟
عشان ارجع كل يوم بقرش لامى
طب ما النص احسن يا هبله
افرض محدش ادانى هرجع لها بايه ؟؟
طيب خلاص هديكى فى اليوم عشرين جنيه
ايه ايه عشرين مين ؟؟؟
ايه يا بت مش عاجبينك ؟
ايوا مش عاجبنى انا عاوزه خمسين فى اليوم
خمسين حته واحده ؟؟؟😲😲
ايوه امال حتتين ؟؟
طب مش أما اشوف شغلك الاول ؟
يا ستى لو معجبكيش شغلى ابقى اطردينى 😂
طيب خلاص انا موافقه بس مترجعيش انتى فى كلامك و تقولى عاوزه النص
لا مش هرجع ...بس متحمرقيش انتى بس و لو مجبتش فلوس تقولى مش هديكى يوميه
لا ما انتى لازم تشدى حيلك معايا ...مفيش حاجه اسمها ترجعى من غير فلوس
حاضر هشد حاضر ...يلا بقا شوفى هتلبسينى ايه ؟؟
استنى .....ايووووه الجلابيه دى حلوه اوى
ايه 😲؟؟؟ دى دى مقطعه و مترقعه ستين رقعه
امال عاوزه جلابيه من التوحيد و النور يا روح امك ؟؟؟ ما هى دى جلابيه الشغل
لا بالله عليكى بلاش الجلابيه دى بالذات ...دا الجلابيه دى لما شفتها امبارح كنت هرجع الارنب اللى انا كلته
يا بت دا الجلابيه دى ياما عملت معايا شغل زمان
لا شوفيلى غيرها
طب دى ...اهى حلوه اهيه
لا لا دى انيل من اللى فاتت
بت انتى ...مش عاوزه دلع احنا مش رايحين عرض ازياء
طب شوفيلى حاجه غامقه زيك
خلاص خدى الجلابيه السودا دى مفيهاش غير اربع رقع بس
فين طرحتها دى ؟
طرحة مين يا بت ؟... خدى الايشارب المقطع ده حطيه على راسك
يا لهوى دا ايشارب دا ؟؟؟ دا اكنه طالع من بق كلب
كلب لما يعضك يا هبله ...كل ما الحاجه تكون قديمه و مكسره تصعبى على الناس اكتر
طب خلاص ...هاتى كيسه نحط فيها اللبس ده
كيسه ؟؟ انتى اتجننتى ؟ كيسه ايه اللى عاوزاها ؟
تصدقى انا كنت عارفه انك هتستخسري الكيس مع أن عندك اكياس اد الجبل تحت السرير ...انا جايبه كيسه سودا معايا ...هاتى
اوعى للحاجه يا هناء ...و حسك عينك تضيعيها
و هو انتى فاكره انها لو ضاعت حد هيرضى ياخدها دى كفايه ريحتها
ريحة ايه يا بت ؟؟ دا انا غسلاها من خمستاشر سنه و حطه فى قلبها صابونه
يا نهار اسوح خمستاشر سنه ؟؟؟
طب يلا يا اختى بطلى لكاعه عشان نلحق الموظفين قبل ما يروحوا الشغل
يلا يا خالتى
..... 🌹🌹🌹🌹
يا لهوى انتى مشتينا كتير اوى
مش انتى اللى عاوزه تبعدى
ايوه صح بس رجليا وجعتنى
بلاش دلع يا بت منا ماشيه معاكى اهو
ما انتى صحتك اللهم صلى على النبى
الله اكبر ..انتى هترقعينى عين يا اللى متتسميش ؟
لا ابدا بس هنوصل امتى ؟؟
اهو الجامع اللى قلت لك عليه ...يلا ادخلى غيرى هدومك فى ثوانى و اطلعى
حاضر
.
.
يا لهوى على منظرى يا خالتى
ماله منظرك يا بت ؟؟ ما انتى حلوه اهو
حلوه النيله
استنى
ايه اللى بتطلعيه ده يا خالتى
اصبرى على رزقك ....دى حاجه لزوم الشغل
يا لهوى ....لا لا
استنى يا بت
لا ابدا ...على جثتى
يا ترى ايه اللى طلعته ام سعيد و هناء
#المتسوله
#الجزء_الثامن
استنى
ايه اللى بتطلعيه ده يا خالتى
اصبرى على رزقك ....دى حاجه لزوم الشغل
يا لهوى ....لا لا
استنى يا بت
لا ابدا ...على جثتى
بت انتى ...انتى لازم تسمعى الكلام عشان تصعبى على الناس و تلمى فلوس حلوه
جايبالى تراب وورنيش جزم و عاوزه تدهنى وشى بيهم و عاوزانى اسكت و بعدين ايه حتة الشاشه المعفنه اللى فى ايدك دى ؟
دى هربط لك بيها عينك
لا لا ...هو مينفعش اشحت و انا كدا و خلاص
لا محدش هيديكى حاجه ...اسمعى كلامى بس و حاولى تعوجى ايدك
نعم
ايوا كأنك مشلوله يعنى
يا خبر اسوح انا ايه اللى خلانى اعمل كدا ...انا لو اعرف انك هتعملى فيا كدا مكنتش جيت معاكى
اعملى اللى بقولك عليه من سكات انا قلت لك اهو
هربط عينى بس ...مش هحط التراب و الورنيش دول
يا بت اسمعى كلامى طول ما شكلك نضيف كدا مش هتصعبى على حد
إن شالله ما عنى صعبت على حد يا ستى
شكلك مش هتنفعى فى الشغلانه دى يا بت يا هناء
فعلا و انا شايفه كدا برده ...انا هدخل اغير هدومى و اروح
بقا كدا يا هناء ....هو كلام عيال و الا ايه ؟
ايوه انا عيله
طب استنى لآخر النهار و خلاص متشتغليش تانى .....اقعدى هنا جنبى و مدى ايدك بس
خالت ام سعييييد
ايوا يا سماره
العيال اهى ...هاتى اجرتهم بقا
الله ...هو كل يوم الموال ده ؟ هو احنا لسه كسبنا جنيه ع الصبح ...روحى هديكى الاجره اخر النهار و انتى جايه تاخديهم
ماشى يا خالتى
مين دول يا خالتى ام سعيد ؟؟
دول عيال بأجرهم اشحت بيهم
يا لهوى هى العيال كمان بتتأجر ؟؟؟
انتى على نياتك يا هناء طبعا بتتأجر و بتتباع كمان
بتتباع ازاى هو فى حد يبيع ضناه ؟
لا مبيبقوش ولادهم
امال بيبقوا ولاد مين ؟
بيبقوا مخطوفين
يا لهوى ...ازاى الكلام ده ؟
زى ما بقولك ..و لولا انى مش عاوزه اتحمل مسؤليه عيال صغيره كنت اشتريت لى عيلين كان هيبقى ارخص لى من التأجير ده
يعنى العيال اللى بنشوفها فى الشارع دى متأجره؟؟
لا طبعا فى ناس بتشغل عيالهم و يكسبوا من وراهم الشهد
ياااا ...دا الشارع ده عالم تانى
خديلك عيل حطيه على رجلك هتصعبى على الناس اكتر ...خديه و مش هاخد أجرته منك
هى أجرته كام ؟؟
عشرين جنيه
يااا عشرين جنيه ليه دا عيل عنده سنتين
ما هو أهله بيشغلوه و يكسبوا
............ .............. ............
احنا هنروح امتى يا خالتى الساعه بقت سته
كمان ساعه كدا متقلقيش قوليلى جمعتى كام لحد دلوقتى ؟
مش عارفه ...اهم فى الكيس اهم
طب هاتى انا هعدهم من غير ما حد ياخد باله واحد ...اتنين....تلاته ....عشره ...خمسه و عشرين خمسه و أربعين .....ميه و خمسه و تلاتين ....بس ؟؟؟؟
طب ما حلو انتى عاوزه اكتر من كدا ايه ؟
لا كدا شويه دا انتى شايله على رجلك عيل أجرته عشرين جنيه لوحده و أجرة الهدوم اللى لابساها ...
بقولك ايه انا مليش فى الكلام ده انتى هتدينى الخمسين جنيه بتاعتى و مليش دعوه بالهرى اللى بتقوليه ده
حاضر هدهوملك مالك يا بت ؟ بس هقبضك بالاسبوع
لااااا احنا متفقناش على كدا انتى تدينى اجرتى انهارده ...ما يمكن انا مش عاوزه اشتغل معاكى تانى
لا هتشتغلى ....لما تلاقى القرش جرى فى ايدك هتحبى الشغلانه
المهم هاتى الخمسين جنيه و نبقى نشوف الموضوع ده بعدين
خدى ...يا ستار دا انتى صعبه اوى
انا برده اللى صعبه ؟؟ انا هدخل اغير هدومى عشان نلحق نروح
ماشي روحى
............. .............. ..............
يلا يا هناء واقفه كدا ليه قدام محل الحلويات ده ؟؟
عاوزه اشترى حلويات لامى
اااه هتفرتكى الفلوس
و ماله ...نفسي ادخل عليها بحاجه تفرحها زى ما ابويا كان بيفرحها
يا بت اوعى لقرشك و سيبك من الكلام الخايب ده ...البطن مبتشكرش
اسكتى انتى يا خالتى و خليكى فى حالك و حيات ابوكى
خلاص انتى حره انا بوعيكى بس
طب استنى هدخل اجيب طبق مشكل و اخرج على طول
طب متنسيش تبقى تنزليلى منه طبق يا اللى تنقرصى ....مالك يا بت بتبصيلى كدا ليه ؟؟
لا مفيش ...🤨😏
🌹🌹🌹🌹🌹🌹
انتى جيتى يا هناء ؟؟؟ عملتى ايه فى الشغل انهارده ؟
الحمد لله بس الست اللى شغلتنى هدت حيلى انهارده و مدوقتنيش الاكل طول النهار
يا حبيبتى يا بنتى ...ثوانى هجيب لك الاكل
طب خدى
ايه دا ؟؟
شويه حلويات مشكله عشانك
يا حبيبتى ...ليه كدا يا هناء ؟
معلش بقا بمناسبه اول يوم شغل
بتفكرينى بابوكى الله يرحمه كان لما يجيله اى قرش مكنش يدخل بايده فاضيه ابدا
و خدى العشرين جنيه دى اللى فاضت من اليوميه بتاعتى
ماشى يا حبيبتى تعيشى و تجيبي ...انا هحوشلك الفلوس دى عشان اجهزك جهاز حلو أن شاء الله
اه صحيح يا اما متنسيش تعملى طبق حلويات معاكى لام سعيد
الله ...ايه الرضا دا ؟
ما هى اللى جابت لى الشغل برده
ماشى يا هناء هنزلها مع طبق المحشى اللى انا عاملاه
كلى يلا يا حبيبتى و انا نازله لام سعيد
طب استنى هاكل و انزلها الاكل انا
لا انتى شكلك تعبانه هنزل انا
ماشى يا اما
و بعدين يا بت يا هناء ؟؟ هتستمرى فى الشغل ده و الا لا ؟؟ انتى شفتى الفرحه كانت اد ايه على وش امك لما ادتيها الحلويات و الفلوس ؟؟ طب انا هجرب اسبوع كمان و اشوف الحال هيمشي ازاى ؟
#المتسوله
#الجزء_التاسع
و بعدين يا بت يا هناء ؟؟ هتستمرى فى الشغل ده و الا لا ؟؟ انتى شفتى الفرحه كانت اد ايه على وش امك لما ادتيها الحلويات و الفلوس ؟؟ طب انا هجرب اسبوع كمان و اشوف الحال هيمشي ازاى ؟
........ .......... ........ ........
يلا يا هناء عشان نروح
استنى شويه يا خالتى الوقت ده وقت حلو
يااا ...انتى اللى بقيتى تقولى استنى شويه ؟؟
ايوا طبعا مش عدلنا الاتفاق و بقيت باخد النص
ايوه انتى اروبه و مسكتينى من ايدى اللى بتوجعنى
و لا بتوجعك و لا حاجه ...شهرين أهم شغاله معاكى تنكرى انى كسبتك فيهم كتير ؟
لا صراحه منكرش انتى لهلوبه ...اللى يشوفك دلوقتى ميشوفكيش اول يوم
كنت هبله يا خالتى ...دا انا يوميتى دلوقتى بتجيب بالتلتميت و الربعميت جنيه يعنى اجدعها دكتور أهله صارفين عليه دم قلبهم ميجبش الكلام ده
طب يلا يا هناء اصلى تعبانه شويه و حاسه انى مش قادره اقعد
مالك يا وليه ؟ ما كنتى زى الفل من شويه ؟
معرفش مره واحده كدا حاسه انى هبطت و مش قادره اخد نفسي
يا لهوى ...اوعى تموتى يا خالتى
إن شاالله العدوين يا بت ...
الف مره يا خالتى ....هو انا اقدر استغنى عنك يا منولى يا قمر
عيب يا بت اختشي
طب بقولك ما تيجى اودىيكى المستشفى يقيسولك الضغط و يشوفوا فيكى ايه ؟
لا لا انا بخير ...يمكن من قلة الاكل
طب اروح اجيب لك سندوتش ؟؟
لا هنروح دلوقتى و زمان امك عملت لى المسقعه اللى طلبتها منها
يا وليه انتى مش قادره تمشي ...بصى هدخل اغير هدومى و اجى اوديكى المستشفى
لا لا يا هناء
يا وليه دا التذكره بتلاته جنيه ...يا لهوى هدفعهم انا ...استنى بس
...... ...... .................. ...... .....
و النبى يا اخويا عاوزه تذكره
عشره جنيه يا ست
الله مش تلاته جنيه ؟
لا دى الصبح التذكره المدعمه لكن دلوقتى انتى فى العياده الخارجيه
يلا يا هناء انا بقولك انا كويسه
استنى يا خالتى بس
طب هات تذكره يا عم ...خد العشره جنيه اهم
ايه الفكه دى كلها ؟؟ دا احنا عندنا اذمه فكه على طول
عاوز تفك كام ....معايا فكه كتير
معاكى فكة ميه جنيه ؟؟
ايوا معايا ...الكيس ده ميه
طب استنى لما أعده
يا جدع عيب عليك انا عداهم كويس هات الميه جنيه و احنا داخلين عد على راحتك و لو نقص جنيه ابقى خده و انا طالعه
ماشي يا ستى خدى ...متشكرين
يلا يا خالتى
ليه كدا يا هناء ؟؟ عشره جنيه بحالها ؟؟
و ماله يا خالتى فضلت خيرك
و النبى يا انسه فين الدكتور ؟؟
الاوضه دى
شالله يخليكى يا حبيبتى
تعالى يا خالتى
سلام عليكم يا دكتور
و عليكم السلام ...خير
الحجه تعبانه شويه و نفسها طابق عليها
الف سلامه عليكى يا حجه... حاسه بايه ؟؟
بتقول مش قادره تقف و ....
لو سمحتى انا مش بسألك انتى ...ها يا حجه حاسه بايه ؟
يا ابنى حاسه انى هبطانه و مش قادره اقف و نفسي مكروش
طب اتفضلى على السرير اكشف عليكى ...خدى نفس كدا ....
طيب هل فى امراض مزمنة ضغط سكر ؟؟
لا معرفش يا ابنى
طيب يا امى انا هقيس لك الضغط دلوقتى و هكتب لك على تحليل سكر تعمليه
غالى التحليل ده يا دكتور ؟
لا يا امى مش غالى حوالى ١٥ جنيه
يااا ١٥ جنيه ؟؟
و ماله يا خالتى تدفعهم ...اكتب يا دكتور
بصى يا حجه انا قست الضغط لقيت ضغطك واطى شويه هكتب لك على دوا و تتغذى كويس و تستريحى فى السرير
إن شاء الله يا دكتور ....يلا يا خالتى
اه يا نارى ...الدكتور ده غاظنى اوى
ليه يا بنتى ؟ دا حتى شكله ابن ناس و طيب
انتى مش شفتى كلمنى برخامه ازاى ؟؟
و لا رخامه و لا حاجه الراجل عاوز يشوف شغله بس
لا و الله ...طب يلا اعملك تحليل السكر و نروحله تانى ...مش عارفه عاوزه اتخانق معاه
يا بنتى اسكتى تتخانقى ايه بس ؟ و بعدين انا مش هعمل التحليل ابو ١٥ جنيه ده
يا خالتى فكى الكيس شويه دا احنا انهارده طالعلنا سوا و لا ٧٠٠ جنيه
اسكتى يا بت وطى صوتك ...يلا يلا هنروح
طب مش هنجيب العلاج ؟
و لا علاج و لا حاجه انا لما اكل المسقعه هكون زى الفل
يعنى كشفنا ع الفاضى ؟؟
انا مقلتلكيش اكشفى ...انتى اللى عملتى فيها فلوكه و جيتى دفعتى
بقا كدا يعنى ؟؟؟ انا اللى طلعت غلطانه فى الاخر ؟؟؟ طب يلا يا ستى
يلا يا بنتى
يا لهوى انتى مش قادره تمشي خالص ...بقولك ايه انا هجيب لك الدوا من الصيدليه اللى قدام المستشفى و هنوقف تاكسي و نروح
لا لا تاكسي ايه بس
اسكتى انتى ملكيش دعوه مش هدفعك حاجه
إن كان كدا معلش
يا لهوى عليكى
طب و تحليل السكر ؟؟؟
عاوزه تحللى ؟ يا وليه انتى هتجننينى ؟؟ يلا تعالى هحللك الاول
................
اتفضل يا دكتور تحليل السكر اهو
الف سلامه يا حجه السكر زى ما توقعت عالى اوى
عالى ازاى يا دكتور
متقلقيش بس... بالدوا أن شاء الله كله هيكون تمام ...هكتب لك على دوا كويس اوى تجبيه
يا دكتور مش انتوا يتصرفوا دوا السكر من هنا من المستشفى ؟؟
ايوا بس لازم تيجى الصبح و تعملي إقرار وزارة و بعد كدا تصرفى
خلاص يا خالتى احنا مش محتاجين الإقرار الوزارى ...لو دواكى بألف جنيه هجيبهولك ....متشكرين يا دكتور
........
مالك يا بت بتبصى للدكتور بغل كدا ليه ؟ و بعدين الف جنيه ايه يا هبله ؟
اسكتى يا خالتى انا متغاظه منه شفتيه بيتعامل ازاى
بيتعامل ازاى ؟ الجدع كويس و مقلش اى حاجه
استنى انا لازم اعرف اسمه ايه الدكتور ده
لو سمحتى يا انسه هو الدكتور اللى جوه ده اسمه ايه ؟
اسمه د. احمد الشوبكى
شكرا يا حبيبتى
الله بتسالى على اسمه ليه يا بت ؟
مفيش يا خالتى .... هجيب لك الدوا و اوقف تاكسي اقعدى هنا استنينى
يلا يا خالتى
...... ....... .......
اكلتى خالتك و ادتيها الدوا يا هناء ؟
ايوا يا اما بس شكلها تعبان اوى
ربنا يسترها يا بنتى الست كبيره و اول مره الاقيها عامله كدا
ربنا يسترها أن شاء الله انا مش هنزل الشغل بكرا و هقعد معاها
و ليه كدا يا بنتى ؟ منا هقعد معاها انا
لا يا اما انتى تعبانه و الغضروف مبهدلك انا هقعد بيها اسندها اوديها الحمام ...اروق لها الحته
ماشي يا بنتى ربنا يرضى عليكى
....... ....... ............
حمدالله على السلامه يا خالتى
الله يسلمك يا هناء
ياااا انتى بقالك اسبوع رايحه راس فى رأس انا قلت الوليه خلاص هتفيص ...بس الحمد لله انتى زى الفل اهو
ايه اللى متعلق فى دراعى ده ؟
ما احنا جبنالك الدكتور لما رحتى فى الغيبوبه و هو اللى ركب لك المحاليل دى
كتر خيرك يا بنتى ...انا لو ليا بنت مكنتش هتعمل كدا
ازاى بتقولى كدا ...الناس لبعضيها يا خالتى
انا عاوزه اقولك على سر يا هناء
سر ايه يا وليه ؟؟ انتى عندك اسرار
ايوا يا هناء ..انا خلاص حاسه انى هموت و مفيش غيرك أقوله السر ده
بعد الشر عنك ...خير يا خالتى قلقتينى
انا يا بنتى ....
#المتسوله
#الجزء_العاشر
انا عاوزه اقولك على سر يا هناء
سر ايه يا وليه ؟؟ انتى عندك اسرار
ايوا يا هناء ..انا خلاص حاسه انى هموت و مفيش غيرك أقوله السر ده
بعد الشر عنك ...خير يا خالتى قلقتينى
انا يا بنتى كنت محوشه قرشين كدا للزمن بس شكلى مش هلحق اصرفهم
بعد الشر عليكى يا وليه ...دا انتى زى الفل
لا يا بنتى انا حاسه بنفسي و كمان حلمت بسعيد جاى ياخدنى و بيقولى وحشتينى يا اما ...يلا بقا قمت ضحكت له و قلت له حاضر يا حبيبي انا جايه اهو ...و لقيت ابو سعيد جاى من بعيد شكله حلو زى العريس لابس بدله حلوه اوى و ماسك فى ايده ورد بلدى احمر و بمبى شكلهم حلو اوى اول ما شفته قمت من مكانى فراح مادد ايده و اخد ايدى و لقيت نفسي لابسه فستان ابيض زى العروسه و مشينا فى طريق كله ورد و شجر فل و ياسمين ..
دا حلم حلو يا خالتى مش معناه انك هتموتى يعنى
متكدبيش عليا يا هناء ...انا عارفه و مش خايفه ..دا انا فرحانه انى خلاص هشوف ابنى و جوزى و اكون معاهم انا تعبت اوى فى الدنيا دى يا بنتى
الف بعد الشر عليكى يا غاليه
دا انتى اللى غاليه و عشان كدا انا هقولك على سرى و عارفه انك هتنفذى اللى هقولك عليه
انا تحت امرك يا خالتى
بصى انا عاوزاكى لما اموت و تدفنينى ترجعى تشدى السرير اللى انا نايمه عليه ده
هتلاقى بلاطتين بيتحركوا من مكانهم هترفعيهم هتلاقى باب خشب فيه حلقه
شدى الباب من الحلقه دى هتلاقيه اتفتح بس ابقى خدى معاكى حاجه تنور لك لأن الدنيا ضلمه تحت
هتنزلى تلات سلمات هتبقى فى البدروم اللى تحت البيت
هتنزلى هتلاقى صندوق كبير فيه فلوس كتير اوى و دهب سبايك كنت كل ما اجمع مبلغ اروح اشترى سبيكه كيلو او اتنين و احطهم لانى كنت بخاف الفيران تأكل الفلوس
الفلوس دى عاوزكى تاخديها تعمليلى صدقه جاريه على روحى تبنيلى جامع أو تحطيهم فى حاجه خيريه
جزء من الفلوس تاخديها و توديها لاولاد اخواتى هما فى بلد اسمها سبك الضحاك تبع المنوفيه.... تروحى و تسالى عن عيله سعد ابو بكر توديلهم ميه الف من الفلوس هيفرحوا بيها و انتى حلال عليكى الباقى
طب و ليه كدا يا خالتى ؟؟ هما حقهم فلوسك كلها
بصى يا هناء دى فلوسي و انا حره فيها و بعدين انتوا عملتوا معايا اللى أهلى معملهوش معايا ...انتى عارفه امك بقالها كام سنه بتأكلنى ؟؟؟ سنين كتير اوى كنتوا انتوا عزوتى و سندى ...لو كان يجيلى صداع كنت الاقى امك لاحقانى بالدوا من قبل ما اقول ...مكنتش تعمل حاجه حلوه الا اما تنزلى منها ....كل ده انا مش ناسياه و لا اقدر انساه و عارفه انى لما اموت هتفضلوا تدعولى كأنى واحده منكم بالظبط ...لكن اولاد اخواتى عمرهم ما سألوا عليا بالرغم أنهم عارفين مكانى و عارفين انى عايشه لوحدى بعد موت ابنى و حتى قبل ما سعيد يموت و كنت الف اشحت عشانه مكنش حد من اخواتى يفكر أنه يساعدنى ببرشامه لابنى
الفلوس اللى هدهلهم دى من باب الفضل بس و صله الرحم اللى هما قطعوها من زمان
حاضر يا خالتى ..بس ارتاحى انتى
انا مرتاحه يا بنتى و ارتحت اكتر لما قلت لك على وصيتى....حاجه اخيره عاوزاها منك
خير يا خالتى تحت امرك
نفسي اشوف حفيظه امك روحى ناديهالى
حاضر يا خالتى ثوانى
يا اما يا اما
فى ايه يا هناء مالك مسروعه كدا ليه ؟
خالتى ام سعيد فاقت و عاوزه تشوفك بسرعه
حاضر ...حاضر
........... ........... ........
خالتى ....امى جت اهى عشان تشوفك
تعالى يا حفيظه
حمدالله على سلامتك يا حبيبتى
الله يسلمك يا بنتى ...انا فهمت هناء على كل حاجه و عاوزاكى تعملى زى ما قلت لها
حاجه ايه يا هناء ؟
هفهمك بعدين يا اما
هاتيلى اشرب يا هناء
حاضر يا خالتى
اتفضلى يا خالتى الميه اهيه من حنفيه المطبخ ...خالتى خالتى 😲😲😭😭
لا حول و لا قوة الا بالله الست مبتنطقش
الحقى يا اما بينها دخلت الغيبوبه تانى انا هجرى اجيب لها الدكتور
........ .......... ................ .........
خير يا دكتور ؟؟
البقاء لله
ماتت ؟؟؟ لا يا دكتور دى فى غيبوبه
لا يا ستى هو انا مش هعرف الغيبوبه من الموت ...البقاء لله
يا حبيبتى يا ام سعيد ....دا انتى كنتى امى
معلش يا اما متعيطيش ربنا يرحمها يارب
بصى يا اما وشها منور ازاى و بتضحك هى راحت للى احن عليها من الدنيا و ما فيها
هروح اشتريلها الكفن و انادى خالتى ام عبدالحميد عشان تيجى تغسلها
طب مش هنشوف اهلها يا هناء نقولهم
احنا اهلها يا اما و هندفها فى تربنا جنب ابويا الله يرحمه
...............فى اليوم التالى ...........
ام سعيد قطعت بيا اوى يا هناء ...البيت وحش اوى من غيرها
مين سمعك يا اما انا كمان قطعت بيا اوى
بس كانت على الغسل زى ما يكون عندها ٣٠ سنه و كانت بتضحك
الست دى طول عمرها يا اما شايله الهم و قابلت فى حياتها كتير و عمرها ما ضرت حد
ايوه يا بنتى انا جارتها من سنين عمرى ما شفت منها حاجه وحشه بل بالعكس دى كانت ساعات بتساعدنى
بتساعدك ازاى يا اما ؟؟
كانت بتدينى مبلغ كل شهر و كانت محلفانى انى مقلش لاى حد
يااااا يا اما ...و ليه مقلتليش ؟
هى كانت موصيانى عشان انتى متعرفيش و تضايقى و كانت بتدينى فلوس كمان شهريا لكذا بيت فى الشارع هنا على اد حالهم و كانت بتقولى اوعى تقولى لحد أن الفلوس دى منى
يا حبيبتى يا خالتى ..دا انا كنت ظالماكى
صحيح يا هناء ...هو ايه اللى قالتهولك ام سعيد و انتى قلتيلى هبقى افهمك يا اما
كانت بتوصينى على فلوسها يا اما
هى عندها فلوس ؟؟ دا انا بيتهيالى انها كانت بتشحت عشان تصرف على الناس الغلابه
ايوه يا اما معاها فلوس و فلوس كتير اوى و محدش يعرف مكانها غيري
يا خبر بس الفلوس دى مش من حقنا يا هناء
انا هنفذ وصيتها يا اما زى ما قالتلى دى امانه
طب هى فين الفلوس دى ؟ دى اوضتها كلها مترين فى مترين
تعالى يا اما انا هوريلك الفلوس
......... ......... .............
شدى معايا السرير ده
السرير ؟؟ مفيش حاجه تحت السرير انا كنت لسه كانسه تحته قبل ما تموت بيومين
استنى بس يا اما ....بصى شايفه البلاطتين اللى بيتلخلخوا دول
ايوه
ارفعى معايا
ايه دا ؟ دا باب خشب
ايوه و تحته سلم
ايوه صحيح ....ايه دا ؟
دى سلالم موديه على البدروم ..استنى لما انور نور الموبيل ....انزلى ورايا بالراحه اوعى تقعى
يا خبررررر ايه دا كله 😲😲
#المتسوله
#الجزء_الحادى_عشر
ارفعى معايا
ايه دا ؟ دا باب خشب
ايوه و تحته سلم
ايوه صحيح ....ايه دا ؟
دى سلالم موديه على البدروم ..استنى لما انور نور الموبيل ....انزلى ورايا بالراحه اوعى تقعى
يا خبررررر ايه دا كله 😲😲😲😲
دى سبايك دهب يا اما
دى كتير اوى يا بنتى ...و الصندوق ده فيه ايه ؟؟؟؟ يا خبر ...كل دى فلوس ؟؟ دى فلوس ملهاش عدد
ايدك معايا يا اما عشان نطلع الحاجه دى عندنا فى الشقه و نشوف هنعمل فيها ايه
نعمل ايه ؟ الفلوس دى مش بتاعتنا يا هناء
الفلوس دى متقسمه يا اما و خالتى منال قالت لى على تقسيمتها زى ما قالت لك
طيب مدام انتى عارفه خلاص ...يلا هنشيل الصندوق الاول مع بعض و بعدين نبقى ننزل نجيب السبايك دى على مهلنا
..................
احنا كدا نقلنا كل حاجه و معدش فى اي حاجه فى البدروم نهائى
انتى متأكده يا هناء ؟
ايوا يا اما ....احنا عاوزين نعد السبايك دى و نشوف الدهب ده اد ايه
قبل ما نعد خالتك ام سعيد قالت لك تعملى ايه فى الفلوس دى كلها ؟
خالتى قالت انى اعملها صدقه زى جامع أو كدا و اروح اسال عن اولاد اخواتها و اديهم مئة ألف جنيه و الباقى بتاعنا
نعم ....بتاعنا ازاى ؟ هو احنا كنا من بقية عيلتها يا بنتى ؟
يا اما دى رغبتها و لما سألتها قالت أننا عندها احسن من أهلها
اوعى يكون الدهب زغلل عنيكى يا هناء
ابدا يا اما ....دى الوصيه و انا هنفذها
طيب احنا هنعمل ايه دلوقتى ؟؟
اول حاجه لازم نسيب البيت ده و ندور لنا على شقه حلوه كدا فى مكان حلو ...بصى انا كان شغلى فى منطقه بعيده شويه عن هنا بس منطقه حلوه اوى هنروح و نشوف لنا شقه فى المكان ده
طب و بعدين ؟؟
لازم نجيب لبس كويس و هتعلم السواقه و نشترى عربيه
طب و الفلوس و الدهب هنوديهم فين ؟؟
احنا هنحط جزء فى البنك لأننا طبعا منقدرش نحط الفلوس دى كلها مره واحده البنك هيطالبنا أننا نديله مصدر الفلوس دى
طب ما البنك هيطلب مننا مصدر اى فلوس هنحطها و لو حتى عشر الاف جنيه دا النظام الجديد
منا عارفه و عشان كدا احنا لازم نقدم للبنك عقد بيع و شرا مكتوب على ايد محامى و يكون متسجل فى الشهر العقارى
طب و هتعملى العقد ده ازاى يا فالحه؟
لا دى سهله ..انتى نسيتى أن بقى معانا فلوس ...كل حاجه بالفلوس تتحل ..و بعدين احنا ممكن تشترى شقتين بمبلغ محترم شقه نعيش فيها و التانيه نسقعها شويه و ننام على الخميره اللى معانا و بعد كدا نبيع الشقه دى و نقدم للبنك عقد بيع الشقه مع زياده تمنها حبتين
طب و بعد كدا ؟؟
بعد كدا هنبتدى نسحب و نحط فى البنك و نقدم اوراق أننا بنتاجر فى أراضى و دى مكاسبنا منها
يخربيتك يا هناء انتى يا بت عرفتى الكلام ده منين ؟
دا اسمه غسيل اموال يا اما ...انتى مبتسمعيش افلام ؟؟
لا مبسمعش و مش عاوزه اسمع ...انا حاسه ان اللى بنعمله ده حرام
حرام ليه يا اما ؟ هو احنا سرقناهم منها ؟ هى اللى سابتهم لنا بمحض إرادتها
طب ما تيجى نبلغ الحكومه و هى تتصرف
لا و الله ؟؟ طب و ايه ضمنك أن الحكومه متقبضش عليكى و تقولك فين بقيه الحاجه و ايه اللى خلاكى تنقليها مدام نيتك انك تبلغى ؟دا احنا ممكن نتحبس فيها دى
يا لهوى ؟؟ نتحبس ؟؟ لا خلاص
بصى احنا هنشترى الشقتين و نفرش واحده منهم فرش حلو كدا و بعد كدا هفكر نعمل ايه فى الصدقه اللى طلبتها خالتى انى اعملهالها
طب و فلوس ولاد اخواتها ؟؟
هوديهالهم يا اما بس اصبرى عليا
يعنى امتى يعنى ؟
بعد شهر كدا و الا اتنين اكون رتبت امورى
خلاص زى ما تشوفى يا هناء
أن شاء الله خير يا اما
................بعد شهرين .....................
الحمد لله نفذت جزء كبير من اللى خططت له
انتى ...دا انتى مش سهله اللى يشوفك دلوقتى ميقولش عليكى البت هناء اللى من شهرين بس كانت بتمشي فى الشارع بشبشب مقطوع
يا اما انسي بقا خلاص احنا بقينا من سكان مصر الجديده و بقا عندنا عربيه و فرش اخر ابهه و رصيد فى البنك و دهب متلتل لسه تحت السرير اهو
صحيح يا هناء هتروحى لقرايب ام سعيد امتى ؟
يوووو يا اما انتى كل يوم تسالينى ؟؟
يا بنتى انا خايفه عليكى ؟
و خايفه من ايه بقا ؟
خايفه تطمعى ..الإنسان طماع و ده حق و لازم يروح لصحابه
متخافيش يا اما انا لا هطمع و لا نيله و هوديلهم فلوسهم
ادينى ميعاد تروحى لهم فيه
حاضر يا اما ...بس انا مستنيه اسجل بس ارض المستشفى اللى قلت لك عليها
برده مصممه انك تعملى مستشفى ؟ هو احنا يا بنتى دكاتره و الا نفهم فى حكايه المستشفيات دى ايه بس ؟
يا اما انا قلت لك مية مره أن المستشفيات دلوقتى بقت تكسب جامد و كمان انا هعمل فيها جزء خيرى لغسيل الكلى على روح ام سعيد و ابنها باذن الله
و هتسجلى العقد امتى ؟؟
باذن الله انا متفقه مع البايع على يوم الخميس الجاى و هناخد الاستاذ محسن المحامى معانا عشان يخلص لنا كل حاجه
ربنا يوفقك يا بنتى ...يبقى خلاص يوم الجمعه ننزل نودى الفلوس لأهل ام سعيد
انا مش عارفه انتى مستعجله كدا ليه ؟
يا بنتى خايفه انك تصرفى الفلوس كلها فى المستشفى و متديهمش حقهم
خلاص يا اما انا هروح اسال عليهم و اديلهم فلوسهم يوم الجمعه الجايه باذن الله
هاجى معاكى
تعالى يا ستى تشرفى و تنورى ..انتى مخونانى و الا ايه يا حفظفظ ؟؟
لا يا بنتى بس مش عاوزه اسيبك تروحى لوحدك المشوار ده
ماشى يا مامى
مامى دى ايه يا بت ؟
انتى من هنا و رايح هتبقى مامى ظاظا لازم بقى نترقى شويه
جاك خيبه على ترقيتك يا اختى 😏
........... ............ .................
ادى احنا رايحين اهو على بلد ام سعيد يا ستى
اسمها ايه البلد دى ؟
اسمها سبك الضحاك متخافيش انا ماشيه على خريطه جوجل
جوجل مين دا راخر ؟
دا واحد صاحبى متعرفوش ...بصى قدامنا ربع ساعه بالظبط و نوصل أن شاء الله
.................
لو سمحت ممكن اعرف فين بيت سعد ابو بكر ؟؟
عاوزه مين هناك يا ابله ؟
اى حد عندهم
البيت مش بعيد هاتمشي طوالى لحد ما تقابلك ساقيه قديمه كدا اكسرى يمين و تمشى حوالى مئة متر كدا هتلاقى بيت متلون اخضر كدا هو ده بيت سعد ابو بكر الله يرحمه
متشكره اوى
......... .......... ........
اهو وصلنا البيت اللى الراجل قال عليه اهو
سلام عليكم
و عليكم السلام يا ابله ..عاوزه مين ؟
عاوزه ورثه المرحومه منال سعد ابو بكر
منال مين ؟؟
بنت سعد ابو بكر
ااااه ...عمه منال ؟ هى ماتت ؟
ايوا الله يرحمها
تعالى اتفضلى احنا ولاد اخواتها سعيد و محمد و دا فوزى ابن عمى و فى تانى بس فى الغيط دلوقتى
عمتكم كانت سايبه لكم امانه معايا
أمانة ايه دى ؟
ميه الف جنيه ...اهم
يا حلاوه ميه الف جنيه حته واحده ؟
اسكت يا فوزى ....و مين بقا يضمن لنا يا ابله أن عمتنا مكنتش سايبه اكتر من الفلوس دى ؟؟؟
انت بتقول ايه يا سعيد
اسكت يا محمد ...ما تردى يا ابله فين بقيه فلوس عمتى ؟؟؟؟
طبعا كلكم عاوزين تعرفوا هناء و امها هيتصرفوا ازاى فى الموقف ده ؟
دا اللى هتعرفوه فى الجزء الجاى باذن الله تعالى
يتبع
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
تعليقات
إرسال تعليق