#المتسوله
#الجزء_الثانى_عشر
ميه الف جنيه ...اهم
يا حلاوه ميه الف جنيه حته واحده ؟
اسكت يا فوزى ....و مين بقا يضمن لنا يا ابله أن عمتنا مكنتش سايبه اكتر من الفلوس دى ؟؟؟
انت بتقول ايه يا سعيد
اسكت يا محمد ...ما تردى يا ابله فين بقيه فلوس عمتى ؟؟؟؟
محدش يضمن حاجه فى الزمن ده
يعنى ايه يعنى ؟
يعنى دا المتاح و لو مش عاجبك اضرب دماغك فى اتخن حيطه
انتى جايه تشتمينا فى بيتنا و الا ايه ؟؟
لا انت اللى بتشكر فيا فى بيتكم ...دا انا جايه اوصل امانه مطلعنى حراميه
ايوه صحيح يا سعيد هى لو حراميه مكنتش جت و جابت الفلوس من أصله
قوله ..اظاهر أنه مبيفهمش فى الأصول
الله الله عيب كدا يا ابله
انت خليت فيها عيب ؟؟ كنتوا فين لما الست بقالها سنين قاعده لوحدها و محدش بيسأل عليها ؟ سألتوا مره عنها ؟ أن كانت جعانه و الا شبعانه ؟ أن كانت مريضه أو لا ؟ بلاش دا كله مسألتش هى جابت لكم الفلوس دى منين ؟ و الا كل اللى هامك انك تعرف فى باقى و الا لا ؟
اه صحيح ...هى جابت الفلوس دى كلها منين ؟؟؟
ابقى روح اسالها .... سلام عليكم
طب استنوا بس نعمل معاكم الواجب
واجبكم وصل خلاص
احنا متأسفين يا ست ... متشرفناش باسمك الكريم
هناء ...
انعم و اكرم ...طب اتفضلى يا ست هناء نتغدى سوا
لا معلش انا مستعجله سلام عليكم
.......... ...... ......... ...... ..........
البت دى اكيد وراها سر
سر ايه يا سعيد ؟ انت دايما شكاك كدا يا اخى ؟
لازم اشك ....البت دى مش سهله و ردودها جاهزه و اكيد اكيد فى حاجه انا مش مستريح للموضوع ده
يعنى هى لو حراميه كانت جت من الأساس ؟؟ ما تعقل الكلام يا سعيد
منا عشان عاقل الكلام بقولكم أن مش دى الفلوس الوحيده اللى سابتها عمتكم دى اكيد مجرد جزء منها
و ايه دليلك على الكلام ده ؟
معنديش دليل بس لازم اعرف
و انت هتعرف منين يا فالح ؟؟ هتروح لعمتك الله يرحمها تسألها زى البت ما قالت لك ههههههههه ههههههههه
انتوا بتضحكوا ؟؟؟ طب هتشوفوا
هنشوف ايه ؟ خيبتك ؟؟ ههههههههه ههههههههه
لا هتشوفوا خبيتكم لما تعرفوا أن البت دى ضحكت عليكم و لهفت ميراثكم
أن كان المتكلم مجنون فالمستمع عاقل ...عمتك هتجيب الفلوس الكتير اوى اللى بتتكلم عنها دى منين ؟
و عمتك جابت منين اصلا المية الف جنيه دى ؟
و الله مش عارف بس اللى بنسمعه انها كانت بتشحت فى مصر
ايوووه ....واحده بتشحت من اكتر من خمسين سنه و ملهاش و لا عيل و لا تيل ودت الفلوس دى كلها فين ؟؟؟؟و انا اسمع أن الناس فى مصر بتدى فلوس جامده
يعنى حتى لو كلامك صحيح هتعمل ايه يعنى ؟؟؟
لااااا ما هى مش حتة بت زى دى تيجى تدينا على قفانا و تمشي ...انا لازم انزل الحته اللى كانت ساكنه فيها عمتى و أسأل عليها و اكيد هعرف حاجه
الله يعينك بقا ..احنا بقا ملناش دعوه باللى عاوز تعمله ده ...احنا هنقسم المئة الف دول حسب الشرع
مفيش فلوس هتتقسم الا اما نشوف بقيه الفلوس و نبقى فى الاخر نقسم
لا لا شوف لما اقولك احنا ملناش فى الكلام الخايب اللى بتقوله ده ...احنا عاوزين فلوسنا
فلوسكم ؟؟؟ جتكم ستين خيبه ....يعنى افهم من كدا أن اى فلوس هجيبها ملكوش فيها بقا ؟
مش لما تجيب فى الاول
هجيب و بكرا تشوفوا
ابقى ورينا يا اخويا ....انت اصلا تعرف حاجه عن عمتك دى و الا ساكنه فين من الأساس ؟؟؟
امك عارفه ..كانت قالت لى انها راحت عزت عمتك مع ابوك الله يرحمه لما سعيد مات ...انا هعرف منها العنوان و اوصل
...................... ......................
يا لهوى يا هناء انا قلبى وقع فى رجليا
ليه يا ماما ؟؟
لما الواد ده هجم عليكى بالكلام كدا ...بس مكنتش متوقعه انك هتردى كدا ...
امال عاوزانى اتلجلج ؟؟؟ عشان مكنوش طلعونا من البيت ؟؟
انا لو حد فيهم كان وجه لى سؤال كنت اعترفت من اول قلم 😂
لا يا ماما مينفعش دى وصيه و لو منفذتهاش يبقى حرام عليا ...انتى مش شايفه أنهم حتى مسألوش عن عمتهم اتدفنت فين ؟؟ دى مش هماهم و لا هى حيه و لا هى ميته ...كل اللى هاممهم الفلوس وبس
دا حال الدنيا يا بنتى الناس دلوقتى مبقتش تدور الا على الفلوس
عارفه لو الجماعه دول كانوا خدوا الفلوس كلها و قولت لهم اعملوا صدقه على روح عمتكم بيتهيالى مكنوش هيعملوا و لا نيله
الله اعلم يا بنتى
انا بقولك الحقيقه ...انا مش عارفه أن سعيد الله يرحمها سابت لهم المئة الف جنيه دى ليه ؟؟ و الله ما يستحقوها اصلا
يا بنتى دا ورث و دا حقهم
جتهم كسر حقهم عالم بجحه
......... ............. ........
يا امااااا
تعالى يا سعيد
انا عاوز اسالك على حاجه يا اما
أسأل يا ضنايا
عارفه عمتى ام سعيد الله يرحمها
هى عمتك ماتت ؟؟
ايوه من شهرين
و لا عرفنا ...مين اللى قالك الكلام ده ؟
جت لنا واحده كدا و جايبالنا معاها فلوس و بتقولنا دى فلوس عمتكم سايبها لكم
فلوس ؟؟؟ كام يعنى ؟؟
جايبالنا ميه الف جنيه
ميه الف جنيه ؟؟؟ و جابت منين الفلوس دى كلها ؟ اللى اعرفه انها كانت شحاته و عشان كدا ابوك و اعمامك و عماتك كانوا متبريين منها
مش انتى يا اما رحتى عزيتى فى ابنها ؟
ايوه يا ابنى بس مكناش نعرف انها بتشحت ...بس فى كذا واحد من البلد شافها قاعده بتشحت و فضحتنا هنا و عشان كدا الكل قاطعها
مليش دعوه هى كانت بتشحت و الا لا ...اللى عاوز اعرفه عمتى دى كانت ساكنه فين فى مصر ؟
و انت عاوز تعرف ليه يا سعيد ؟
عاوز اعرف و خلاص يا اما
لا فهمنى على اللى فى دماغك عشان ادلك
البت اللى جابت الفلوس دى انا شاكك فيها
شاكك فيها ازاى ؟
يعنى بيتهيالى عمتى سايبه فلوس اكتر من كدا بكتير
بطل هبل يا سعيد ...فلوس ايه اللى سايبها بقولك كانت شحاته و مش لاقيه تاكل
طب اعقلى الكلام كدا يا اما ازاى مش لاقيه تاكل و باعته مئة ألف جنيه ؟؟
هى صحيح غريبه بس يمكن دى تحويشه عمرها
مش عارف انا مش مستريح و لازم ادور على الموضوع ده بنفسي ...المهم قوليلى لسه فاكره العنوان و الا لا ؟؟
لا طبعا يا ابنى ....انا لا يمكن افتكر و بعدين انا معرفش اسامى الشوارع ... احنا ركبنا القطر و نزلنا ركبنا مواصلتين و وصلنا
طب مش فاكره حتى اسم المنطقه اللى كانت فيها ؟؟
تقريبا كدا يا ابنى كانت فى حتة اسمها شبرا .....ااه افتكرت
افتكرتى ايه يا اما ؟؟
سالم ابن عم ابوك كان معانا لما رحنا نعزى و هو كان عارف المكان كويس لانه راح لها بعد ابنها ما مات بشهر و كان عاوز يتجوزها بس هى طردته و رجع يومها قفاه يقمر عيش و بقى مش طايقها و يقول دى شحاته خلى كل اخواتها ميسألوش فيها
خلاص انا هروح لعمى سالم و أسأله
بس متقولوش يا سعيد على حكاية الميه الف دى ليمشي فى البلد بطبله و يفضحنا
متخافيش يا اما انا مش هجيب له سيره انا هقوله انى عاوز انزل اسال على عمتى و بس
ايوووه انت كدا جدع
هقوم انا بقا علشان ألحقه قبل ما ينام عشان اسافر من النجمه على مصر
و الله يا سعيد منا عارفه ...حاسه انك هتضيع وقتك و فلوسك على وهم
مش وهم يا اما و بكرا تشوفى ...سلام
مع السلامه يا ابنى
#المتسوله
#الجزء_الثالث_عشر
هقوم انا بقا علشان ألحقه قبل ما ينام عشان اسافر من النجمه على مصر
و الله يا سعيد منا عارفه ...حاسه انك هتضيع وقتك و فلوسك على وهم
مش وهم يا اما و بكرا تشوفى ...سلام
مع السلامه يا ابنى
........ ........ .......... .........
سلام عليكم يا أبا سالم
و عليكم السلام ....مين ؟
انا سعيد يا أبا سالم
سعيد مين ؟
سعيد ابن حسونه
حسونه مين ؟
يا نهار اسوح ...( بقا دا اللى جاى اساله عن العنوان ؟😏 ) حسونه ابن عمك
ااه ...معلش يا ابنى العتب على النظر
بقولك ايه يا أبا سالم انت فاكر عمتى منال
منال منال ...ايوه طبعا فاكرها مش دى اختك ؟
يا خبر منيل ...اختى ايه بس ؟؟ بقولك عمتى ..عمتى اخت ابويا حسونه
ايوه ايوه افتكرت ...منال ام سعيد
ايووووه ام سعيد
بس سعيد مات
منا عارف يا عمى ...عارف بس كنت عاوز اسالك عن عنوانها ...عاوز ازورها
عشان تعزى ؟
اعزى فى مين يا عمى ؟
تعزى فى سعيد منا رحت انا و ابوك عزينا
ابويا مات من عشر سنين يا عمى
مات ازاى ؟؟
مش مهم مات ازاى ؟ المهم انت تعرف العنوان ؟
عنوان مين ؟؟
يوووو يا خبر اسوح انت مالك ايه اللى حصلك ؟
هو على الحال ده من شهرين يا سعيد
ازاى يا مرات عمى ؟؟ و مرحتوش بيه للدكتور ؟؟
رحنا يا ابنى و الدكتور بيقول عنده البتاع ده اللى اسمه الزهايمر
اااه ...يا حلاوه يا حلاوه يعنى مش هيعرف يقولى على العنوان ؟
لا هو بيفتكر الحاجات البعيده لكن القريبه لا ممكن ينساها فى ثانيه
طب حلو اوى ....أبا سالم اوصفلى عنوان عمتى منال
منال ؟؟؟ عنوان ايه ؟ ما هى ساكنه مع اهل جوزها و حماتها مبهدلاها
هى مين دى يا عمى ؟؟ يا لهوى الطم ...
تلطم ليه ؟ هو فى حد مات ؟؟
ركز يا عمى معايا انت عرفت أن سعيد مات ازاى ؟؟
لا اله الا الله ...ما هو كان مريض يا ابنى
منا عارف ...مين اللى قالكم يعنى ؟
عمتك بعتت تلغراف لابوك و انا كنت معاه
حلو اوى مش فاكر بقا العنوان اللى كان مكتوب فى التلغراف ده ؟؟
لا مش فاكر لأن حسونه هو اللى كان معاه الورقه و عمال يلف بينا شمال و يمين و يومها توهنا و خلانا نلف حوالين بعضنا
طب متشكرين يا عمى ...سلام عليكم
وعليكم السلام قلتلى انت مين ؟؟؟
انا اللى امه دعت عليه النهارده يا أبا سالم ....انا قايم و من غير سلام خالص
........ .................. ................
ها يا سعيد عمك قالك على العنوان ؟
عمى مين يا اما ؟ دا دماغه بقت اخر ترللى خالص
ترللى ازاى يا ابنى ؟؟
عنده زهايمر يا اما و مش فاكر حاجه و مش فاكرانى و لا فاكر ابويا و لاعمتى ...ال كل اللى فاكره أن ابويا جاله تلغراف من عمتى ....شفتى اللى انا فيه
تلغراف ؟؟؟ استنى استنى انا خلاص هجيب لك العنوان
صحيح يا اما ؟ ازاى ؟
ابوك الله يرحمه مكنش يرمى اى ورقه ...كانت عاده منيله فيه ..كان زاحم لى الدنيا بالورق و لو ورقه نقصت والا رميتها كان يسود عيشتى
طب و ابويا كان يحتفظ بتلغراف ؟؟
اه طبعا ..إذا كان كان بيحتفظ بتذاكر القطر و الاتوبيس مش هيحتفظ بتلغراف مهم زى ده
طب فين أوراق ابويا دى يا اما ؟؟
بعد ما ابوك مات لمتهم كلهم و حطيتهم فى شوالين و حطيتهم فوق السطح فى الاوضه بتاعه الكراكيب
شوالين ؟؟؟ و انا هدور فى شوالين ورق ؟
ايوه يا ابنى اكيد هتلاقى الورقه اللى عاوزها فيهم
يا سنه سودا يا اولاااا ....انا هطلع اجيبهم و افرزهم ورقه ورقه
اطلع يا ابنى ربنا يعطرك فيها
.........................🥀.......................
الشوالين اهم يا اما ...بس دول فيهم ورق ياما
معلش دور بالراحة كدا
طب و مولعتيش فى ام الورق دا كله بعد ما ابويا مات ليه يا اما ؟
منا خفت يا ابنى يكون فيهم ورق مهم كدا و الا كدا ؟
ورق مهم و بترميهم فى اوضه الكراكيب ؟ امال لو مش مهم كنتى عملتى ايه ؟
الله كنت بوسع يا ابنى الحته ابوك كان حاطط الورق ده فى كل الادراج و ضرف الدولاب و التسريحه و الكومودينو
يا خبر على كميه التذااااكر ...ايه دا كله ؟؟؟
وصلات نور
وصلات ميه
شهادات مدارسنا
صور شهادات ميلاد
كررايس فاضيه
نسخ ورق كتيره اوى لحجه البيت و الارض
ايه دا ؟...مفيش يا اما تلغرافات خالص الشوال الاولانى خلص و ملقتش حاجه
طب دور بالراحه فى الشوال التانى كدا أن شاءالله هتلاقيها
ايه دا يا اما ورقه جواز عرفى ؟؟
جواز مين يا ولا ؟؟
لا لا مفيش دى ورقه فاضيه
فاضيه مين ؟؟ قول يا ولا ابوك كان متجوز عليا ؟؟؟
لا يا اما لا
واد يا سعيد انا عارفاك يا واد و انت بتكدب ...هات يا واد الورقه دى هخلى حد من احفادى يقرهالى
لا لا يا اما مفيش داعى للفضايح ..ايوه ابويا كان متجوز
يا خبر اسوح و منيل ....بعد العمر دا كله اعرف أنه متجوز ؟؟ عشان كدا كل شويه و التانيه انا نازل المركز يا ثريا ...انا رايح اجيب طلبات للماكينه يا ثريا ..انا هبات عند جماعه اصحابى يا ثريا ....و ثريا زى الهبله مصدقه ... منك لله يا حسونه يا ابن بهانه
خلاص يا اما ابويا مات دلوقتى و ميجوزش عليه إلا الرحمه
ربنا ينتقم منه يا اخويا ...الفلاتى ابو عين زايغه
خلاص يا اما أهدى بالله عليكى ( انا ايه اللى خلانى انطق بس )
كنت عاوز تخبى عليا يا سعيد ؟ مش كفايه ابوك
خلاص يا اما بقا ...خلينى اشوف الورقه الزفته دى
ورق البيت
ورق قواضى
جوابات قديمه
من مين الجوابات دى ؟؟ اكيد من حبيبه القلب ؟
لا يا اما دى من رجاله بس مش فى مصر ..جوابات مكتوب عليها السعوديه و العراق
ايوه دول صحابه وولاد عمه
اهيه ...لقيتها ....
بجد يا سعيد ؟
ايوا يا اما بجد
احضر حالا ابنى توفى
. المرسل منال احمد سعيد
العنوان ٥ شارع طلبه الدور الاول شبرا
الحمد لله لقيته ...فعلا كان عندك حق يا اما ...انا من بكرا هطير على العنوان ده
طير يا ابنى طير و سبنى اتحسبن على ابوك شويه
..........................🥀......................
سلام عليكم يا حج
و عليكم السلام يا ابنى
متعرفش العنوان ده فين من فضلك ؟
ايوه يا ابنى شارع طلبه دا جوه شويه هتمشيلك كدا بتاع ربع ساعه على طول على طول هتوصل ...هناك بقا هتلاقى بيت نمره خمسه
متشكرين يا حج
........................🥀.........................
بقالى ربع ساعه ماشى .....ايوا الشارع اهو مكتوب عليه شارع طلبه
انا هبص على ارقام البيوت .....اهو بيت خمسه اهو
الحمد لله
سلام عليكم يا اما
عليكم السلام يا ابنى عاوز فجل و الا جرجير ؟
لا يا اما انا عاوز صاحب البيت ده
ما اليافطه قدامك اهى عليها رقمه
ايه دا ؟ هو عنده شقتين عاوزين يتأجروا ؟
ايوا شقه فى الدور الارضى بتاعه ام سعيد الله يرحمها و شقه بتاعه ام هناء اللى عزلت بعد موت ام سعيد على طول
عزلت ليه يعنى ؟
و الله يا ابنى ما اعرف ...بس اللى بنسمعه أنهم اخدوا فلوس الوليه بعد ما ماتت ...الناس كلها بتقول كدا
و ليه بقا الناس بتقول كدا ؟
اصلهم بان عليهم النعمه على طول و فى اكتر من جدع هنا شافهم راكبين عربيه و نضفوا اوى
اااه ..طب متشكر اوى يا حجه
........... .................. ...........
زى ما توقعت بالظبط ...سرقوا عمتى الحراميه ...انا لازم اتصل بصاحب البيت ده و اعرف اصل الحكايه
الو ...الحج محمد خطاب ؟
ايوه
كنت عاوز أجر الشقه اللى فى الدور الارضى يا حج ..
#المتسوله
#الجزء_الرابع_عشر
زى ما توقعت بالظبط ...سرقوا عمتى الحراميه ...انا لازم اتصل بصاحب البيت ده و اعرف اصل الحكايه
الو ...الحج محمد خطاب ؟
ايوه
كنت عاوز أجر الشقه اللى فى الدور الارضى يا حج....انا واقف قدام البيت اهو
حاضر يا ابنى عشر دقايق و اكون عندك
......
أما نشوف بقا يا ست هناء انتى عملتى ايه و سرقتى عمتى ازاى ؟؟
يااا ابنى ...يا جدع
ايوه يا خاله
اهو ...الحج محمد صاحب البيت اللى كنت بتسأل عليه هو اللى جاى هناك دا
متشكر يا خاله
العفو يا ابنى ....مش عاوز جرجير ؟
لا مش عاوز يا خاله بس لو أجرت هنا اوعدك انى هاخد منك كل يوم جرجير
انت عاوز تأجر هنا ؟
ايوه
انت عايش لوحدك ؟
ايوه
و فين مراتك و اولادك ؟
لا انا مش متجوز
يبقى الحج محمد مش هيرضى يأجرلك
ليه بقا ؟
عشان مبيأجرش شققه لعزاب
طب و الحل ؟
الحل بقا متقولوش انك هتسكن لوحدك يعنى قوله هجيب والدتى معايا ...مش امك عايشه ؟
ايوا عايشه
خلاص قوله هسكن فيها انا و امى
خلاص ماشي
يا حج محمد ...الجدع ده بيسأل عليك
ماشي يا ام سميحه متشكرين
سلام عليكم يا حج
و عليكم السلام يا ابنى...انت اللى عاوز تأجر الشقه ؟
ايوه
اتفضل يا ابنى اوريك الشقه
.
يا خبر ايه كمية الكراكيب دى كلها ؟
معلش يا استاذ كانت ساكنه فيها ست كبيره و كانت على ادها و للاسف كانت مبهدلاها كدا و انا لو اتفقنا هجيب حد يشيل الزباله دى كلها و ينضف لك الشقه
طب و السرير و العفش ده ؟
كلها حاجات قديمه و مكسره هبيعها لبتاع الروبابيكيا ...الست ميته من شهرين و كنت مستنى يمكن حد من قرايبها يظهر و يقول فين حاجة قريبتى لكن الظاهر كدا ملهاش حد
ازاى يا حج فى حد ملوش حد ؟
ما هو دا اللى ظاهر لنا يا ابنى ...الست كانت كبيره اوى و محدش كان بيسال فيها غير جيران لها كانوا ساكنين فوقها و سبحان الله بعد ما الست ماتت هما كمان عزلوا تالت يوم ماتت فيه
اه منا سمعت انهم سرقوها
لا استغفر الله العظيم ...حرام يا ابنى الست ام هناء و بنتها كانوا ناس محترمه و انا كنت أعرف جوزها الاسطى صبحى كان راجل محترم و لا يعملوش كدا ابدا
امال الناس بتقول كدا ليه ؟
هى الناس وراها الا اللت و العجن ...اهو اى كلام بيقولوه و خلاص
امال بيقولوا أن ام هناء و بنتها بان عليهم النعمه و جابوا عربيه منين ؟
هما مين اللى بيقولوا ؟
الناس يا عم الحج
الله و انت شاغل نفسك بالموضوع ده ليه يا ابنى ؟؟
لا ابدا ...دا انا باخد و بدى معاك فى الكلام بس
المهم الشقه عجبتك و الا لا ؟
اه عجبتنى و خلاص هأجرها
طيب هجيب الناس تنضفهالك انهارده
لااااا ...انا عاوزها كدا
امرك غريب يا ابنى عاوزها كدا تعمل بيها ايه ؟
قصدى يعنى انت هتجيب حد بالفلوس ينضفها ؟
ايوه
طيب انا هوفر عليك الفلوس اللى هتدفعها دى بس تكرمنى بقا فى الايجار
ااااه طيب تمام ...انا هعملك عقد سنه نجرب بعض
لا دا سنه كتير
كتير ؟؟؟ ليه هو انت عاوز الشقه دى اد ايه ؟ هو انت هتسكن لوحدك و الا ايه ؟
لا ..لا .. والدتى معايا
اه بحسب اصلى مبأجرش لعزاب عشان العماره كلها عائلات ...طب يلا تعالى معايا نروح نشترى عقدين و نقعد على القهوه نملاهم
يلا يا حج
....................
خد يا ابنى العقد اهو و المفتاح ربنا يجعلها قدم الخير عليك يا رب
يا رب يا عم الحج
بس انت مقولتليش ايه اللى جايبك من المنوفيه تقعد هنا ؟
عرفت منين انى من المنوفيه ؟
الله ...من بطاقتك يا ابنى
اه صحيح ....اصلى جاى ادور على شغل هنا
انت معاك دبلوم ؟
ايوه عرفت منين ؟
لا اله الا الله من بطاقتك يا ابنى و احنا بنكتب العقد
اه معلش اصل دماغى مشغوله شويه
مشغوله بأيه ؟
لا مفيش
طب انت لقيت شغل يعنى ؟
لا و الله يا حج لسه هدور
و انت عاوز تشتغل ايه ؟؟
اى حاجه يا حج.. انا ممكن اشتغل اى حاجه
طيب يا ابنى ربنا يوفقك ...انا مش هاخد منك الايجار مقدم عشان تكون اشتغلت و هاخده منك اخر الشهر
ربنا يخليك يا حج و الله مش عارف اقولك ايه
متقولش هقوم انا دلوقتى و انت بقا لو عاوز تنضف الشقه أو تستنى والدتك انت حر
لا انا هروح حالا عشان الم الكراكيب اللى فيها دى قبل ما اجيب امى
طيب سلام عليكم
طب و مين اللى هيحاسب على الشاى اللى شربته دا يا حج ؟
انا يا ابنى اللى هحاسب ( اعوذ بالله )
.........................🥀......................
اخيرا دخلت الشقه و هدور على اى حاجه توصلنى
ايه الصندوق اللى هناك ده ؟ اكيد الصندوق ده فيه حاجه
ايه دا ؟؟ دا هدوم قديمه و مقطعه و زباله
طب يمكن فى حاجه فى النمليه اللى هناك دى ؟
لا دا ايه دا ؟؟ عيش ناشف و طباق مكسره
طب يمكن عاينه حاجه فى المرتبه دى
هجيب سكينه و افتحها اشوف فيها ايه
فين سكاكينك يا عمتى ؟؟؟؟؟
اهيه ....اففففف ايه المرتبه دى ؟ دا ريحتها نتنه .....مفيهاش إلا قطن اسود
امال الوليه دى كانت مخبيه فلوسها فين بس ؟؟؟
ايه داااا 🤨😲😲
بلاط متحرك ؟ تكونش كانت عايناهم تحت البلاطه ؟؟
الله الله و دا ايه دا كمان ؟؟؟؟؟ باب خشب ؟؟؟
بس خلاص انا كدا وصلت
يااا الدنيا كحل اوى تحت ....هولع الولاعه اللى معايا
ايه المكان ده ؟؟؟؟
دا فى صندوق اهو
تؤ ...الولاعه دى مش نافعه عماله تطفى لوحدها مع انها مليانه ...اولع كشاف الموبيل ...الريحه هنا وحشه اوى نفسي اتكتم
انا مش شايف اى حاجه غير الصندوق...بس دا فاضى
طب و ايه الكراكيب اللى هناك دى
مش عارف حاسس ان فى حد معايا ...انا حاسس ان فى حد بيتنفس فى قفايا 😲
ايه دا ؟؟ نسمه الهوا اللى جت جنب ودنى دى جايه منين ؟ المكان مقفول مفيش اى منفذ للهوا
لااااا انا لازم أخرج من هنا بسرعه
ايه دا ؟؟؟ الباب اتقفل ..... مين قفل الباب ؟؟؟
الباب مش راضى يفتح
مين ؟؟؟ مين هنا ؟؟؟؟
الحقوووووونى
🤷🤷
#المتسوله
#الجزء_الخامس_عشر
مش عارف حاسس ان فى حد معايا ...انا حاسس ان فى حد بيتنفس فى قفايا 😲
ايه دا ؟؟ نسمه الهوا اللى جت جنب ودنى دى جايه منين ؟ المكان مقفول مفيش اى منفذ للهوا
لااااا انا لازم أخرج من هنا بسرعه
ايه دا ؟؟؟ الباب اتقفل ..... مين قفل الباب ؟؟؟
الباب مش راضى يفتح
مين ؟؟؟ مين هنا ؟؟؟؟
الحقوووووونى
الموبيل قرب يفصل ...بسم الله الرحمن الرحيم سلام قول من رب رحيم
الباب مقفول قفله زى ما يكون حد قفله بقفل
اكيد فى باب تانى و الا حاجه هنا
يا اما ...ايه الصوت ده ؟؟
الحقوووونى ...محدش سامعنى ؟؟
يا ناس يا اللى براااا
الحقوووونى
محدشششش هيلحقك
بسسسم الله ...ميييين ؟ مين بيتكلم ؟
انا ...مش عارفنى ؟؟
لا مش عارفك انتى مين ؟
انا اللى جاى تدور على فلوسها
عمتى منال ؟؟؟؟ مش انتى متى ؟؟
ايوا
طب ازاى بتكلمينى ؟؟؟
زى الناس ...انت ايه اللى جابك هنا ؟ و بتدور على اللى مش من حقك ليه ؟؟
انا ...انا
انت ايه ؟
انا اسف سبينى و انا هخرج من هنا و مش هرجع تانى
لا اسيبك ايه ؟ انت ضيفى انهارده
ضيفك ايه بس ؟؟ انا مش عاوز أكون ضيفك
أمال كنت عاوز تورثنى ليه ؟؟ ليه مفتكرتونيش لما قعدت لوحدى اكتر من اربعين سنه ؟ ليه محدش فيكم سأل فيا و لا عليا ؟ ليه ابوك و اعمامك و عماتك اتبروا منى ؟
انا مليش دعوه
طب و ليه انت مسألتش انا مدفونه فين ؟ و لا حتى سألت انا مت ازاى ؟
انا انا ...معرفش سبينى بالله عليكى
لا مش هسيبك الا اما أعلمك الادب الاول
لا بالله عليكى ...انا بخاف ..حرمت و الله مش هعمل كدا تانى
ملكش دعوه بهناء اوعى حسك عينك تدور وراها مره تانيه
حاااضر حاضر
الباب اتفتح ...الحمد لله يا رب ...انا هاخد ديلى فى اسنانى و امشي من هنا اعوذ بالله ...هى حصلت للعفاريت كمان ؟
.
.
................. 🥀..............🥀.............
يخربيت عقلك يا هناء ..دا انتى داهيه
امال ايه يا عم الحج هو احنا بنلعب
بس ازاى عرفتى أنه هيجى يأجر منى شقة عمته الله يرحمها
بص يا حج محمد اللى زى ده طماع و كنت متأكدة أنه هيدور و مش هيسيب الموضوع ده يمر بالساهل كدا ...و انت من الاول معانا و عارف الست موصيه بايه ...واحد زى ده عمره ما كان هيعمل بالوصيه ابدا ...انا يا عم الحج زى ما انت عارف اشتريت ارض للمستشفى و هبنى جزء خيرى فيه للغسيل الكلوى باسم الحجه منال
كمان عملت مرتبات للناس الغلابه اللى كانت بتساعدهم عشان منقطعش الخير اللى كانت بتعمله و زودت كمان حوالى عشرين اسره
عارف يا بنتى و عارف إن انتوا ناس محترمه
ربنا يخليك يا حج
بس مستغرب برده انتى عرفتى ازاى أنه هيلاقى البدروم و حطتيله الميكروفونات فى البدروم بالطريقه دى ؟
انا من اول ما رجعت من عندهم و عارفه أن الشخص ده هيجى ورايا و هيدور و هيوصل للمكان ده و عشان كدا استأذنتك انى اجى و ازرع كاميرا و ميكروفون تحت فى البدروم و لما جه و انت اتصلت عليا جيت بسرعه و استنيت لما نزل قفلت عليه منا كنت شايفاه فى الكاميرا بيعمل ايه
و ابتديت ازاوله زى ما شفت
الواد اتسرع فعلا انا بيتهيالى أنه قطع الخلف ههههههههه
هو عبيط هو فى حد بيأجر لحد شقه و مياخدش حتى أجرة شهر مقدم بس اكمنه طماع و انانى و بخيل مخدش باله أن دى حاجه مستحيله أن الواحد يأجر لواحد ميعرفوش و يديله مفتاح شقته من غير و لا مليم
ايوه عندك حق ...طب و هتعملى ايه بعد كدا ؟
مفيش انا هبدأ بقا فى بنا المستشفى و أن شاء الله تخلص على خير
طيب محسن ابنى كويس و الا تاعبك معاه ؟
لا الاستاذ محسن دا اجدع اخ و اجدع محامى فى الدنيا كلها ربنا يحفظه يا رب
لو عمل لك اى حاجه قوليلى
لا دا مفيش زى الاستاذ محسن فى الدنيا
...................🥀🥀🥀...............
شايفينك رجعت على طول يا سعيد ؟؟ ايه ملقتش العنوان ؟
ملكش دعوه يا فوزى
اسكت يا فوزى انت مش شايف الخيبه التقيله المرسومه على وشه هههههه
اي و الله صحيح يا محمد دا خيبه بالالوان
ما تخرسوا بقا خيبه لما تاخدكم انتوا كمان
ههههههههه ههههههههه
تعالى يا سعيد
نعم يا اما
عملت ايه يا ابنى
استنى أما اقفل الباب الاول عشان الحمير اللى بره دول ميسمعوش
عملت ايه طمنى ...وصلت لبيت عمتك ؟؟
ايوه يا اما وصلت و ياريتنى ما وصلت
ليه يا ولا ؟؟ ايه اللى حصل
عفريته عمتى طلعت لى يا اما
انت بتقول ايه يا سعيد ؟
زى ما بقولك كدا يا اما عفريتة عمتى طلعت لى و قفلت عليا و كنت هموت تحت لوحدى
تحت فين يا ولا ؟
عمتى يا اما كان عندها اوضه ضلمه تحت السرير بباب خشب
طب و دى بتعمل بيها ايه الاوضه دى ؟
معرفش يا اما بس لقيت فيها صندوق كبير فاضى و شويه كراكيب و فجأه الباب اتقفل احاول افتح فيه معرفتش و ابتدت بعد كدا تكلمنى كأنها واقفه قدامى بس طبعا مفيش حد بقيت ابص حواليا زى المجنون و كنت خايف اتلبس يا اما
جتك خيبه يا سعيد
انتى كمان بتقولى جتك خيبه يا اما ؟
طول عمرك قلبك خفيف و خواف ... بتخاف من خيالك
بقولك سمعتها يا اما و قفلت عليا الباب
و انت بقا تعرف صوت عمتك منين ؟
لا انا معرفش صوت عمتى دى
و لا عمرك شفتها اصلا
ايوا صحيح انا عمرى ما شفتها ....قصدك ايه يا اما ؟؟
قصدى انك خدت على قفاك يا ضنايا ...عرفوا يضحكوا عليك و رجعوك قفاك يقمر عيش
لا يا اما متقوليش كدا
لا هو كدا ...و انا برده استغربت و قلت ايه الشجاعه اللى نزلت عليك مره واحده كدا ...طول عمرك جبان و بتخاف لو صرصار عدى قدامك
تفتكرى يا اما أن البت دى هى اللى عملت فيا كدا ؟؟؟
مش افتكر دا انا متأكده ...و اى عيل صغير هيسمع الحكايه دى مش هتخيل عليه
نهارك منيل بنيله يا هناء يا بنت ام هناء
اتزرر و اسكت بقا جتك ستين نيله انت
لا يا اما البت دى لتانى مره تعلم عليا و الله لاوريها البت دى مكنش انا سعيد ابن ام سعيد أن مردتلهاش الطاق عشره 😬
#المتسوله
#الجزء_السادس_عشر
مش افتكر دا انا متأكده ...و اى عيل صغير هيسمع الحكايه دى مش هتخيل عليه
نهارك منيل بنيله يا هناء يا بنت ام هناء
اتزرر و اسكت بقا جتك ستين نيله انت
لا يا اما البت دى لتانى مره تعلم عليا و الله لاوريها البت دى مكنش انا سعيد ابن ام سعيد أن مردتلهاش الطاق عشره 😬
يا اخويا اتهد بقا و اسكت ...خدو الفلوس اللى سابتها عمتك و اعملوا بيها مشروع انت و اخواتك و اولاد عمك
لا يا اما ابدا انا لازم اأدب البت دى و اخد منها فلوسنا اللى سرقتها
بقولك ايه يا سعيد هى البت دى حلوه ؟
لهطه قشطه يا اما
طب ايه رايك يا ولاااا تروح تخطبها ؟
و هى هترضى يا اما ؟؟ انتى مشوفتيش العربيه اللى هى ركباها شكلها ايه ؟
طب ما تجرب هتخسر ايه ...انت تدخل عليها بطقم حنيه يمكن البت تميل
لا يا اما البت دى مش سهله و لا هبله انتى مش شايفه عملت فيا ايه؟
خلاص بقا يا سعيد فضها سيره و شوف اللى وراك
ربنا يسهل يا اما ...انا هروح اقعد ع القهوه عاوزه حاجه ؟
اهو ده اللى انت فالح فيه ...و الغيط يا سعيد ؟
بعدين يا اما بعدين
.......................... 🥀.....................
اهلاااااا ...ازيك يا سعيد
الله يسلمك يا حماده عامل ايه ؟
هعمل ايه يعنى ادينى عايش
انت شغال فين دلوقتى ؟
و الله يا سعيد يا اخويا انا زى المثل اللى بيقول سبع صنايع و البخت ضايع كل شويه اروح شغلانه اشتغل فيها كام يوم و يحصل اى ظرف و يستغنوا عنى ... مفيش حاجه ثابته
طب و دلوقتى ؟؟
لا حاليا انا عاطل معندكش شغل ليا
شغل ؟ كنت نفعت نفسي يا اخويا
بس انا شايفك زعلان كدا ...خير مالك
مفيش يا حماده موضوع كدا حارق دمى و مش مخلينى عارف انام
ليه ؟؟ احكيلى يا صاحبى
لا ملوش لزوم
عيب عليك هو انا مش اخوك يا جدع ؟
طبعا ...هى عشره يوم ؟ احنا عشرة سنين
طب احكيلى بقا
أصله موضوع محرج شويه
اااه مدام قلت محرج يبقى الموضوع فيه واحده ست
هو فيه بس مش اللى جه فى دماغك
امال ايه ؟
هى بت كدا علمت عليا و على عيلتى كلها و عاوز انتقم منها
علمت على عيلتك كلها ؟؟ ازاى يا جدع
هحكيلك على كل حاجه يمكن تدينى حل
شوف يا سيدى انا كان ليا عمه عايشه فى مصر عرفت بعد كدا انها كانت لامؤاخذه بتشحت هناك و طبعا بقالها سنين و سنين
المهم عمتى دى ماتت و لقيت بت جارتها جتلنا و جايبالنا معاها شنطه ال ايه عمتى سايبه مئة ألف جنيه
اه ...حلو اوى
لا مش حلو و لا حاجه
ليه بقا ؟؟
لانى شكيت أن ممكن عمتى تكون سايبه فلوس اكتر و فعلا بحثت ورا البت دى و عرفت انها كانت عايشه فى شقه مع امها و بعد موت عمتى عزلت و سابت الحته و اشترت عربيه و شقه بعد ما كانت مش لاقيه تاكل
طب و ده معناه ايه يعنى ؟؟
اصحى معايا يا حماده دا معناه أن البت دى هبرت هبره كبيره اوى من عمتى و جت رمت لنا الفتافيت
فرضا كلامك ده مظبوط
لا هو مظبوط
ماشي ماشي اصبر عليا بس ...فرضا انها فعلا سرقت عمتك ايه يثبت الكلام اللى بتقوله ده ؟ انت ممعكش اى إثبات و لا كان فى شهود على الكلام ده
فعلا البت بجحه و لما سألتها عن بقيه فلوس عمتى أنكرت
طبعا لازم تنكر
طب و الحل ؟
الحل بقا يا تسيبها فى حالها
لا لا يمكن أبدا
يا اما بقا ....
يا اما ايه يا حماده ؟
يا اما تروح و تحاول تدور وراها يمكن تعرف عنها حاجه تقدر تهددها بيها و تاخد حقك منها
و ايه دا اللى هلاقيه اقدر اهددها بيه يعنى ؟
و الله مش عارف انا بفكر معاك بصوت عالى بس
بس انا مينفعش اظهر فى الصوره مره تانيه البت دى عارفانى و ممكن تعمل فيا اى حاجه
اد كدا هى شرانيه ؟؟
مخها سم ...
على نفسها مش علينا
طب ايه رايك لو تسافر معايا و ندور سوا علشان مظهرش انا فى الصوره
انا تحت امرك يا صاحبى
طب خلاص الاسبوع الجاى نطلع على مصر
طب و هنقعد فين ؟
منا أجرت شقة عمتى هنروح نقعد فيها
تمام
و متخافش حقك محفوظ هيطلع لك قرشين حلوين فى الموضوع ده دا غير أكلك و شربك عليا
عيب عليك و من غير حاجه
طيب هقوم انا دلوقتى ابقى حاسب على المشاريب بقا يا حماده اصل ممعييش فكه
انا اللى احاسب 😏؟؟؟؟ ...حاضر يا سعيد ( و الله انا عارف انك هتلبسنى فى الحيط ال المصاريف عليك ال ....يخربيت النتانه )
.................بعد اسبوعين ..................
ها ...معرفتش حاجه عن البت يا حماده ؟ احنا بقالنا تلات ايام هنا و عمالين نلف حوالين نفسنا
عرفت و جبت لك اخبار حلوه كمان
بجد ؟؟ فرحنى
انا عرفت مكان البت بالظبط و عرفت انها اشترت شقه من قريب فى مصر الجديده و الجيران هنا بيقولوا أن ابوها كان سواق و مكنوش لاقيين يأكلوا
منا عارف كل ده يا حماده ايه الجديد بقا ؟
الجديد بقا أن البت دى بتبنى مستشفى و مشغله فيها ناس ياما و سمعت انها مستعجله عليها اوى و طالبه من المقاول يخلصها فى اسرع وقت ممكن
مستشفى ؟؟ من فلوس عمتى بنت الحراميه
المهم انا بقا رحت للمقاول و طلبت منه شغل عشان ابقى قريب و اعرف اللى بيحصل اول بأول
حلو اوى ...طب منا كمان عاوز اجى معاك
لا مينفعش انت مش بتقول أن البت تعرفك ؟
ايوه
يبقى خلاص مش هينفع انا سامع أن البت مبتسبهمش لا ليل و لا نهار واقفه فوق دماغ المقاول و متدخله فى كل كبيره وصغيره
طيب خلاص انا هشوف شغل تانى فى حتة تانيه و ربنا يسهل و انت شد حيلك يا حماده ...هما هيدولك يوميه كام ؟؟
لااا مش عارف
اطلع من دول يا حماده ....هتاخد كام ؟؟
٢٥٠ جنيه فى اليوم
حلاوتك يا حلو ....شفت بقا انا نفعتك ازاى ؟ مكنتش تحلم تاخد يوميه زى دى
خلاص يا سعيد انت هتذلنى و الا ايه ؟
لا بوريك بس أن مجيتك معايا بفايده
ماشي يا سيدى هو انا قلت حاجه ؟؟
و لسه يا واد يا حماده اما تعرف عنها اى حاجه و نعرف نطلع منها القرشين لك حلاوه كبيره زى ما قلت لك
ربنا يسهل يا سعيد ....انا هجيب لك قرارها باذن الله
#المتسوله
#الجزء_السابع_عشر
شفت بقا انا نفعتك ازاى ؟ مكنتش تحلم تاخد يوميه زى دى
خلاص يا سعيد انت هتذلنى و الا ايه ؟
لا بوريك بس أن مجيتك معايا بفايده
ماشي يا سيدى هو انا قلت حاجه ؟؟
و لسه يا واد يا حماده اما تعرف عنها اى حاجه و نعرف نطلع منها القرشين لك حلاوه كبيره زى ما قلت لك
ربنا يسهل يا سعيد ....انا هجيب لك قرارها باذن الله
.....................🌹🥀.................
انت جدع اوى يا حماده
تسلم يا معلم
لا بجد انت من الناس القليله اللى قابلتها و عندها همه و ضمير
الواحد لازم يعامل ضميره يا معلم حبشي
بجد انا مبسوط اوى انى عترت فيك و أن شاء الله دا مش هيكون اخر شغل بينا انت هتبقى دراعى اليمين من هنا و رايح
دا شرف ليا و الله يا معلم
بس احنا عاوزين نشد حيلنا عشان الست صاحبه المستشفى دى مستعجله عليها اوى زى ما انت شايف
ما احنا شادين اهو ...انا تقريبا مبقتش اروح و عامل ورديتين
عارف و الله يا حماده و أن شاء الله هكلم الهانم عنك تعملك مكافأه
انا مش عاوز مكافئه و لا حاجه المهم أن المستشفى تشتغل و تنفع الناس و متكونش من المستشفيات اللى بنسمع عنها اللى بتمص دم المريض
لا الست دى بتعمل خير كتير اوى و اللى فى ايدها مش ليها و سمعت انها هتعمل جزء كبير خيري عشان مرضى الكلى
ربنا يجازيها خير
سلام عليكم يا معلم
و عليكم السلام يا ست هناء ..لسه كنت جايب فى سيرتك مع حماده
خير أن شاء الله
طبعا خير هو انتى يجى من وراكى الا الخير ...كنت بحكيله عنك و عن الخير اللى بتعمليه
كتر خيرك يا معلم تعالى يلا ورينى عملت ايه فى الشغل عشان مستعجله و حدد لى هتخلص امتى عشان اتفق على الاجهزه و اول ما تخلص تكون وصلت باذن الله
طب معلش يا ست هناء انا رجلى شاده عليا شويه خدى حماده معاكى اهو و هو هيوريلك كل اللى عاوزه تشوفيه
طب و الاستلام امتى ؟؟
زى ما اتفقنا بعد شهر باذن الله
و ممكن قبل كدا يا معلم
لا يا حماده خلينا فى الوسع
استنى يا معلم ...ممكن تخلصوا فى اد ايه من فضلك ؟
ممكن بعون الله نخلص فى عشرين يوم بالظبط لو جبنا عمال اكتر مع الورديتين اللى احنا عاملينهم
طب يا ريت ...و اى تكلفه زياده انا مستعده بس المستشفى تخلص بسرعه
باذن الله هتخلص
طب تعالى معايا ورينى عملتوا ايه و فاضل ايه ؟
اتفضلى حضرتك
المبنى دا خلاص خلص بس فى التشطيبات الاخيره و العمال شغاله فيه اهو زى ما حضرتك شايفه النقاشين و السباكين و بتوع البلاط
اما المبنى ده لسه شويه و طبعا انتى شايفه أنهم بيصبوا سقف الرابع اهو
هو ده المبنى السبع ادوار صح ؟
ايوه يا فندم
طب ممكن اطلع اشوف الصبه من فوق
بس مفيش غير السقاله بيطلعوا عليها و انتى مش هتعرفى تطلعى
مين اللى قالك كدا ؟ انا لازم اتطمن على الشغل بنفسي
زى ما تحبى حضرتك بس انا شايف انها هتبقى صعبه عليكى و خصوصا مع الكعب اللى لابساه ده
و أدى يا سيدى الكعب ...يلا بينا
اتفضلى حضرتك قدامى
.
.
ياااا.....فعلا السقاله دى صعبه اوى
مش قلت لك ...طب ممكن حضرتك تنزلى ...من فضلك متكمليش
لا هكمل انا بحب التحدى
ربنا يسترها
ادى احنا وصلنا اهو يا سي ....
حماده أسمى حماده يا فندم
انت معاك مؤهل ايه يا حماده ؟
معايا بكالوريوس تجاره قسم محاسبه بتقدير عام جيد جدا و كنت التالت على دفعتى كمان
معقول ؟ طب و ايه شغلك عامل كدا ؟
نصيب ...يعنى هو انا لقيت شغل تانى و قلت لا
و الله خساره
مش خساره و لا حاجه ...العمل الشريف مش عيب
صح عندك حق
حاسبي ...حاسبي
ايه دا يا خبر 😲😲
الحمد لله لحقتك فى اخر لحظه
لوح الخشب ده جه منين ؟ انت لولا شدتنى كان زمانه وقع فوقى و كنت وقعت من على السقاله
الحمد لله انها جت على اد كدا
انا اعصابى باظت و رجليا مش شايلانى
طب اقعدى استريحى هنا
لا لا انا عاوزه انزل
متخافيش استريحى بس دقيقتين و انزلى
.
.
خلاص انا ارتحت عاوزه انزل
طب هاتى ايدك هنزلك
ياااا الحمد لله دا انا كان بينى و بين الموت لحظه واحده
بعد الشر عنك
اشكرك جدا يا حماده كتر الف خيرك
بتشكرينى على ايه بس دا واجبى و عشان كدا مكنتش عاوزك تطلعى فوق ...و إن كان على الشغل انا واخد بالى كويس و مسمحش بأى غش لان دى حاجه معموله لله
كتر خيرك و بشكرك مره تانيه
العفو حضرتك نورتينى
...................🥀.......................
شفتى يا اما مش كنت هموت انهارده
يا لهوى ليه ايه اللى حصل ؟
كنت طالعه على السقاله اشوف الشغل و فجأه لوح خشب تخن كدا لقيته جاى عليا معرفش منين لو كان طالنى كان وقعنى من الدور الرابع لولا جدع ابن حلال شدنى لقيت نفسي فى حضنه
و ايه اللى طلعك على السقاله ؟ و جدع مين دا ؟
جدع شغال مع المعلم حبشي بس باين عليه ابن ناس و لما سألته معاك شهادة ايه قالى أنه معاه بكالوريوس تجاره
لا حول و لا قوة الا بالله و ايه اللى يشغله الشغله دى ؟
الشغل مش عيب يا اما و هو شكله مكافح
ربنا يحفظه لشبابه و لامه و لمراته و عياله يارب
لا يا اما دا مش متجوز ..مش لابس دبله فى ايده
انتى لازم تكافئيه يا هناء
مش هيرضى يا اما دا شكله عنده عزة نفس بس انا بفكر أن بعد المستشفى ما تخلص امسكه حسابات المستشفى
و ماله يا بنتى مدام كويس زى ما بتقولى
هو كويس اوى و عنده ضمير و المعلم حبشى جاب سيرته كذا مره بس دى كانت اول مره اشوفه ...يلا هقوم انا بقا
رايحه فين يا هناء ؟ انتى كل يوم و التانى يا بنتى خارجه ؟
تانى يا اما ؟؟ منا قلت لك عندى شغل
شغل ايه دا اللى بتقعدى له لواحده و اتنين بالليل ؟ و بعدين هو انتى محتاجه فلوس ؟ ما فلوس ام سعيد كتير و الحمد لله
يا اما المستشفى هتاخد فلوس ياما و لسه كمان الاجهزه و الدكاتره و الممرضين ...لسه كتير اوى يا اما ...دا هم ما يتلم
منا قلت لك بلاش موضوع المستشفى دا ...حاجه مبنفهمش فيها و لا انتى دكتوره و لا تعرفى عنها حاجه ليه تدخلى نفسك فيها بقا ؟
اقولك الحقيقه يا اما
حقيقه ايه يا بت ؟ انتى مخبيه عليا ايه ؟
انا جت لى فكره المستشفى دى من حاجتين الاولانيه من حكايه ام سعيد و انها مكنتش لاقيه تعالج ابنها و ده خلاها شحتت عشان تعالجه
ايوه يا بنتى الله يرحمه و يرحمها يا رب
تانى حاجه بقا فى دكتور كان بيكشف على أم سعيد الله يرحمها ...دكتور شايف نفسه كدا و متعنظ و كل ما كنت أكلمه يعاملنى باحتقار فأنا فكرت انى ابنى مستشفى و اجيبه اشغله عندى عشان اجيب مناخيره الأرض و يفهم أننا كلنا ولاد تسعه
يا لهوى ؟؟؟ بقا تبنى مستشفى بحالها عشان السبب الهايف ده ؟ و الله انا مستغرباكى
و لا تستغربى و لا حاجه ساعات بعض الناس بيتعاملوا مع الناس اللى أقل منهم بتكبر و عنتظه لمجرد أنهم أقل منهم فى المستوى و بس...... انتى متعرفيش انا يومها اتغظت منه اد ايه و اتمنيت انى اتكبر عليه و اشربه من نفس الكاس زى ما عمل فيا و اكيد بيعمل كدا فى ناس كتير
و الله يا بنتى انتى مجنونه و بنت مجنونه كمان
قولى زى ما انتى عاوزه تقولى اهو ده اللى حصل و خلاص و سبينى بقا اروح شغلى
مش هتقوليلى بتشتغلى ايه ؟
منا قلت لك يا اما و انتى مش عاوزه تقتنعى
منا مش داخل دماغى حكايه انك شاركتى الست اللى كنتى بتشتغلى عندها دى
طب اقنعك ازاى بقا ؟
البس و اجى معاكى اشوف بنفسي
لا تيجى فين بس ؟؟
شفتى ؟؟ ليه كل ما اقولك اجى معاكى مبترضيش ؟؟؟
يا اما هو انا صغيره و هجيب ولية امرى معايا ؟؟
تكونيش بتستعرى منى يا بت ؟
لا طبعا انتى بتقولى ايه ؟؟ بصى اوعدك هاخدك فى يوم اوريكى المحل ..سبينى بقا يا اما عشان الحق شغلى
ماشي يا هناء روحى ربنا يوقف لك ولاد الحلال يا بنتى
ايووووه انا محتاجه الدعوه دى جدا ..افضلى ادعيهالى بقا لحد ما ارجع
#المتسوله
#الجزء_الثامن_عشر
ماشي يا هناء روحى ربنا يوقف لك ولاد الحلال يا بنتى
ايووووه انا محتاجه الدعوه دى جدا ..افضلى ادعيهالى بقا لحد ما ارجع
.................🥀🥀🥀🥀................
جبتى العيال اللى قلت لك عليهم يا سماره ؟؟
ايوه يا ابلتى ...جبتهم اهم واقفين على الكورنيش هناك اهم
طيب ناديلى عليهم و هاتيلى العيلين اللى على دراعك دول
بس عاوزين نتفق يا ابلتى قبل ما اناديهم
ايه يا سماره هو انتى مش عارفه النظام من ايام المرحومه و الا ايه ؟
ايام ام سعيد الله يرحمها كانت آخرها تاخد منى عيل او اتنين تحطهم على رجلها لكن انتى بسم الله ما شاء الله موسعه النشاط و عماله تطلبى فى عيال
و انتى مالك يا بت انتى لكى اكل و الا بحلقه ...العيل اللى هتجبيه بعشرين جنيه
نعم ؟؟ لا مينفعش العيال الكبيره دى بسعر تانى خالص
انا باخد منك جمله يا سماره مش عيل و الا اتنين و بعدين انتى كل يوم هتفاصلى فى الفلوس و الا ايه ؟ ما خلصنا بقا من القصه دى
الدنيا كل يوم بتغلى يا ابله
بقولك ايه يا سماره مش كل يومين تشغليلى الاسطوانه المشروخه دى ، الدنيا يا اختى مبتغلاش كل يومين
خلاص يا ابله زى ما تشوفى
ناديلى يلا على العيال دى
حاضر .....يا سيكااااا هات العيال اللى معاك و تعالى
تعالوا يا عيال ...سماره فهمتكم هتعملوا ايه صح ؟؟
ايوه يا ابله ..
طيب انا عاوزاكوا تقفوا فى حتت هحددهالكم و اخر الورديه هتيجوا هنا تسلمولى اللى لمتوه و اللى هيجيب فيكم مبلغ اكبر هيكون له عندى مكافأه حلوه اوى
حاضر يا ابله
.....................................................
بعد مرور شهرين
انا مش مصدقه نفسي يا حماده أن الافتتاح بكرا....... لا و كمان ايه السيد المحافظ بنفسه هو اللى هيفتتح المستشفى و معاه وكيل وزارة الصحه و ناس كتير اوى مناصب فى الدوله
انتى تستاهلى كل خير يا استاذه هناء
ما قلنا نشيل الألقاب بقا انت حماده و انا هناء و الا عاوزنى اقولك يا حضرت المحاسب
لا خلاص ... حاضر
انا عمرى ما هنسي وقفتك جنبى طول الفتره اللى فاتت دى يا حماده
متقوليش كدا ...دا واجبى ناحيتك انتى تستاهلى كل حاجه حلوه فى الدنيا دى
بس بجد انت تعبت معايا اوى انت تقريبا مبتروحش بيتك
ايوه انا بنام مع الغفير فى اوضته عشان فى حاجات بتبقى عايزه المتابعه و كنت لازم اكون هنا بعد الفجر مباشرة عشان اخلصها
كتر خيرك ...انا بقا هيريحك من التعب دا كله و هتمسكلى حسابات المستشفى
طب ما تعفينى انا من الموضوع ده و اهو الاستاذ محسن معاكى فى كل خطوه
محسن محامى ميفهمش فى الحسابات و بعدين هو انت مش عاوز تشتغل بشهادتك و الا ايه ؟
طبعا عاوز دا كان حلم حياتى اللى مكنتش مصدق انى هحققه
تبقى مش عاوز تشتغل معايا بقا ؟؟
لا ابدا بالعكس ربنا يعلم
طيب خلاص استعد من اول بكرا بقا و انا عملت لك مكتب حلو اوى يليق بيك
متشكر اوى يا هناء
العفو يا حماده
بس انا عاوز اطلب منك طلب
اتفضل
السكن اللى انا ساكن فيه بعيد اوى و كمان مش مريح انا عاوز اقعد فى اوضه هنا إن شالله بتاعه البواب على ما أدبر ليا شقه صغيره كدا على أدى
عيب عليك ...كل اوض المستشفى تحت امرك ...اوضة الاستراحه من هنا و رايح بقت بتاعتك ...ها ...فى اى خدمات تانى ؟
لا ...بس كنت عاوز اسال هتعملى ايه فى اصطف الدكاتره و الممرضين ؟
هو انا لسه هعمل انا فعلا نزلت اعلان فى تلات جرايد طلبت فيه دكاتره و ممرضات و عمال من اول امبارح و المقابله النهارده الساعه ١١ صباحا يعنى بعد ساعه بالظبط من دلوقتى.
انتى مفيش حاجه مبتفكريش فيها
طبعا يا استاذ ..امال ايه احنا بنلعب و الا ايه ؟؟ بس الصراحه فكرة الجرايد دى فكره الاستاذ محسن مش فكرتى
تمام هقوم انا بقا اروح السكن اجيب هدومى و حاجتى و ارجع تانى
اتفضل يا حماده
........................🥀.........................
يا اهلا يا اهلا بحماده باشا
اهلا بيك يا سعيد
انت بتعمل ايه ؟
زى ما انت شايف بلم هدومى عشان امشى من هنا
على فين العزم أن شاء الله ؟؟ هو انت فاكر أن دخول الحمام زى خروجه ؟؟؟
انت عاوز ايه يا سعيد ؟
عاوز ايه ؟؟ هو احنا مش فى بينا اتفاق و الا ايه ؟؟
ما تسيبها فى حالها يا سعيد و خليك فى حالك و انت بسم الله ما شاء الله اشتغلت مع ناس كويسه و شايف القرش جرى فى ايدك
ملكش دعوه بيا ...انا بينى و بينك اتفاق و انت خلفته
اتفاق ايه يا سعيد ؟
انت ناسي ؟ و الا عامل نفسك ناسي ؟ كان لازم تجيبلى اخبار البت دى زى ما اتفقنا لكن انت وقعت فى حب السنيوره و مش طايق عليها كلمه
حب ايه و زفت ايه ؟ انت بتخرف يا سعيد ؟؟
خلاص أثبت لى انى غلطان و مش بخرف
و اثبت لك ازاى يعنى ؟
تقولى كل حاجه عرفتها عنها
صدقنى يا سعيد انا معرفش حاجه غير انها ست كويسه و بتعمل خير كتير اوى و مش حراميه زى ما انت فاهم
و مين قالك انها مش حراميه ؟
باين عليها
يعنى هى يبان عليها انها شحاته ؟؟؟
شحاتة ؟ شحاته ايه ؟
الست هانم ولية نعمتك بتشتغل شحاته و مسرحه عيال يشحتوا معاها
انت بتقول ايه ؟؟ انت اكيد بتخرف ...جبت الكلام ده منين ؟
مش بقولك حبتها .....على العموم ده مش تخريف و لا حاجه و معايا اثبتات على كدا و ناوى افضح امها بكرا قدام المحافظ اللى هيا عزماه
انا مش مصدق اللى بتقوله دا ...انت كداب
انا كداب ؟؟ طب اتفضل
ايه دا 😲؟؟؟؟؟
#المتسوله
#الجزء_التاسع_عشر
مش بقولك حبتها .....على العموم ده مش تخريف و لا حاجه و معايا اثبتات على كدا و ناوى افضح امها بكرا قدام المحافظ اللى هيا عزماه
انا مش مصدق اللى بتقوله دا ...انت كداب
انا كداب ؟؟ طب اتفضل
ايه دا 😲؟؟؟؟؟
دى صور المحروسه و هى بتشحت ...بص اتفرج و ملى عينك
لا مش هى
لا هى ...اهى مصورينها من اول ما بتركن عربيتها الاخر موديل و تدخل الجامع تغير هدومها و تربط رأسها زى ما انت شايف كدا
و اهى صوره تانيه و هى بتوزع العيال على الشوارع و أدى صوره تانيه و هى بتجمع الغله من العيال
مين اللى صور الصور دى ؟
ملكش فيه
بجد يا سعيد مين اللى صورلك الصور دى
واحد من رجاله حماصه
حماصه دا اللى انت بتشتغل معاه صح ؟
ايوه صح
صحيح يا سعيد انت بتشتغل ايه مع حماصه ده ؟
بشتغل اللى بشتغله انت مالك انت
كدا يا سعيد ؟؟ هو احنا مش اخوات برده ؟
انت اللى بعت الاخوه دى يا حماده
يا عم انا اسف بس تعالى نتكلم بالعقل هتستفيد ايه لما تفضح هناء قدام المحافظ ؟؟ هل بكدا هترجع فلوس عمتك ؟؟
منا عشان مش عارف ارجع فلوس عمتى هضرها زى ما ضرتنى و خلاص
لا انت كدا بتفكر غلط يا سعيد ، انت فاكر انى خنتك و جيت مع هناء عليك صح ؟
ايوه صح
لكن دى مش الحقيقه
امال ايه هى الحقيقه ؟؟
الحقيقه انى طول الفتره اللى فاتت دى كنت بحاول اكسب ثقتها و فعلا قدرت اعمل كدا و مسكتنى حسابات المستشفى و هستلم الشغل من اول بكرا
سيدى يا سيدى خدنا على جناحك يا عم
منا واخدك على جناحى يا سعيد
جناح ايه و ريش ايه بقا ؟؟ ما خلاص
يا عبيط افهم ...احنا من مصلحتنا أن المستشفى دى تشتغل
قصدك من مصلحتك انت عشان الشغلانه اللوز اللى مسكتها و عشان حبيبه القلب
لا يا غبى .....انا لما امسك لها الحسابات اقدر اطلع مصلحه حلوه من وراها و كله هيبقى لينا احنا الاتنين
بجد يا حماده ؟؟
ايوه بجد و بعدين الصور اللى معاك دى ممكن نعمل بيها احلى شغل مش تقولى نفضحها و الشغل الاهبل بتاعك ده
احلى شغل اللى هو ازاى بقا ؟؟؟
ملكش دعوه بقا ...هاتهم انت بس و انا اتصرف
لااااا انت فاكرنى اهبل و هتضحك عليا بكلمتين و تلهف الصور منى
يا عم بطل هبل ...هو يعنى انت متعرفش تطلع غيرهم و الا حتى تصور غيرهم ؟
ايوه صح ...طب فهمنى هتعمل بيهم ايه ؟
هلاعبها بيهم
ازاى بقا ؟؟؟
يعنى بحكم انى شغال معاها فى المستشفى هيكون سهل عليا ادخل و اخرج اى اوضه من غير ما حد يقولى انت رايح فين
عظيم ....و بعدين ؟؟؟؟
و بعدين بقا اسيب لها كل يومين تلاته صوره و الا اتنين من دول مع رساله تهديد صغيره كدا و اطلب منها الفلوس اللى احنا عاوزينها
يا أبن الايه يا سعيد ...دا انت طلعت داهيه مسيحه من تحت الارض
امال انت فاكر ايه ؟؟؟ الشهاده اللى انا واخدها بتقدير جيد جدا دى جايه من الهوا ؟؟؟ دا ذكاء ملكش فيه يا اسطى
خلاص انا اقتنعت بكلامك و هديلك الصور بس مفيناش من خيانه يا حماده
يا جدع عيب عليك خيانه ايه و بتاع ايه ؟
انا مش بخونك بس بحذرك انا دلوقتى مبقتش سعيد الاهبل اللى بتقول عليه انا دلوقتى مبقتش لوحدى و بعدين انا كنت مخطط للبت دى مصائب سودا ... موضوع الفضيحه دى كانت اول حاجه و اهيف حاجه كنت هعملها فيها
ليه كنت عاوز تعمل فيها ايه تانى ؟؟
لا دى حاجات كبيره اوى عقلك ميجبهاش بس كنت هاخد منها اللى وراها و اللى قدامها
طب ما ترسينى يمكن طريقتك دى احسن و اسرع من طريقتى
هى أسرع بكتير بس خطرها كبير
لا انت كدا قلقتنى اوى
لا متقلقش الناس اللى معايا دول محترفين مش هواه
انت عرفت حماصه ده منين يا سعيد ؟
من على القهوه
اااه ....طب ما انا عاوز اتعرف عليه برده ...من كلامك واضح أنه راجل جدع
هو جدع اوى و صاحب صاحبه
شوقتنى و الله انى اشوفه
و ماله يا اخويا تعالى نروحله القهوه زمانه هناك دلوقتى
دلوقتى ؟؟ هو مبيروحش الشغل و الا ايه ؟
لا أصل شغله بالليل
اه ..طب يلا بينا
.........................🥀🥀....................
سلام عليكم يا معلم حماصه
و عليكم السلام يا سعده ...اتفضل
اخويا و صاحبى حماده
اه دا اللى قلتلى عليه ؟
ايوه هو
بس انا مبحبش الرجاله المش جدعه
الله الله و ليه الغلط ده يا معلم
استنى يا حماده ...المعلم فاهم غلط ...حماده يا معلم مخنيش زى ما كنت فاهم لا دا دخل فى زوارق البت و خلاها تعتمد عليه و شغلته فى الحسابات عندها كمان
لا و الله ...طب و مقلش ليه ؟
هو بقا كان عاوز يكسب ثقتها بأى طريقه عشان بعد كدا يقدر يلعب فى الحسابات زى ما هو عاوز
اممم ...طب و مشوار بكره ؟
لا مشوار بكره دا هنأجله شويه ..حماده عنده خطه احلى و خطرها أقل
طيب خلاص خلينا ماشيين ورا سي حماده اما نشوف اخرتها ...و حقك عليا لو زعلتك يا سى حماده
لا ابدا مزعلتش و لا حاجه سوء تفاهم بسيط
طب خلاص انت ضيفى انهارده ....واد يا صفصف هات شيشه للرجاله هنا و احلى كوبيتين شاى
كتر خيرك يا معلم
خلاص كدا صافى يا لبن ؟؟
حليب يا قشطه
فهمنى بقا يا عم سعيد على خطه الأستاذ حماده
شوف يا معلم .......
.
.
حلوه بس هتاخد وقت طويل احنا كنا هننجز على طول
ايوه بس البت كان ممكن يجرالها حاجه ...كدا أأمن لينا و مدام حماده معانا يبقى خلاص
لا و هنعوزه بعد كدا فى حاجات كبيره تانيه
زى ايه يا معلم
متشغلش بالك بكرا سعيد يفهمك على كل حاجه ...موضوع المستشفيات ده كنز كبير و عاوز اللى يغرف منه و يعبى
......................🥀🥀🥀.................
معقوله يا حماده ؟؟ كل ده تأخير ؟ انت مجتش امبارح ليه ؟
معلش كان عندى ظرف كدا
طب يلا بسرعه ..المحافظ على وصول و لسه قدامنا كذا حاجه عاوزين نعملها
حاضر يا هناء بس كنت عاوزك فى موضوع كدا
مش وقته يا حماده ...يلا بس و بعد الافتتاح هنقعد سوا و نتكلم كل الكلام اللى انت عاوزه
حاضر يا هناء
يا ترى حماده هيتصرف ازاى ؟ هيطلع ندل فعلا و ينفذ خطته مع سعيد ؟ و الا له خطه تانيه ؟؟؟
دا اللى هنعرفه فى الجزء الجاى باذن الله تعالى
#المتسوله
#الجزء_العشرين
حاضر يا هناء بس كنت عاوزك فى موضوع كدا
مش وقته يا حماده ...يلا بس و بعد الافتتاح هنقعد سوا و نتكلم كل الكلام اللى انت عاوزه
حاضر يا هناء
...................❤️❤️❤️..................
الحمد لله الافتتاح تم على خير و الناس كانت مبسوطه اوى
بس انتى شاطره عينتى امتى الاصطف دا كله؟؟
بص جزء كبير زى ما قلت لك من إعلان الجرايد لكن فى مجموعه كدا انا جايبها بالذات
اشمعنى يعنى ؟
شايف الدكتور اللى واقف هناك ده
ايوه ...اللى لابس نضاره ده
ايووووه ...دا بقا يا سيدى دكتور احمد الشوبكى
مين دكتور احمد الشوبكى ده ؟
دا دكتور كان ليا واحده جارتى اللى اسمها مكتوب على وحدة الكلى كان بيكشف عليها و عاملنى معامله وحشه اوى و من ساعتها و انا نفسي اذله زى ما ذلنى
ايه اللى بتقوليه ده ؟؟ المفروض انك بتختارى على أساس الكفاءه مش للانتقام الشخصى
لا ما هو دكتور كويس برده بعت له و المجموعه اللى معاه كلها و عينتهم عندى هنا .....ايه مالك بتبص لى كدا ليه ؟؟
مستغربك الصراحه ...بقولك ايه انتى محكتليش حكايه جارتك اللى انتى كتبتى مبنى كامل باسمها دى
هقولك بس دا سر بينا
طبعا
جارتى دى كانت بتشتغل متسوله و قبل ما تموت وصتنى انى اخد فلوسها ادفع منهم لاهلها مئة ألف جنيه و الباقى بقا اعملها صدقه بيهم على روحها و اخد الباقى ليا عشان انا و امى كنا بنخدمها و كنا لها اكتر من اهل
انا فعلا اشتريت من فلوسها شقه و عربيه بس بعد شويه ضميري انبنى و رجعت اشتغل مره تانيه علشان اسد الفلوس اللى اخدتها دى و بعد ما اسدها المستشفى كلها هتبقى خيريه بأجر رمزى عشان اطلع بس اجور الدكاتره و العماله و كله يعتبر صدقه على روح ام سعيد الله يرحمها
شغلك اللى هو ايه ؟؟
عندى محل ملابس كدا مشاركه واحده فيه
انتى متأكدة يا هناء ؟؟
و هكدب عليك ليه يعنى؟؟
مفيش يا هناء
طب مش هتقولى كنت عاوزنى فى ايه ؟؟
بعدين يا هناء ...بعدين استأذنك بس هروح السكن اللى كنت فيه نسيت حاجه هروح اجيبها و اجى على طول
متتأخرش زى امبارح
لا مش هتأخر باذن الله
....................❤️❤️❤️.................
خد يا صفصف مشفتش المعلم حماصه و سعيد ؟
اه كانوا هنا و لسه طالعين ع الشغل
هما بيشتغلوا ايه يا صفصف ؟
لا يا عم مليش دعوه انت عاوز تودينى فى داهيه و الا ايه ؟
متخفش يا صفصف ...بقولك ايه خد المتين جنيه دول و قولى
انا هقولك بس بالله عليك ما تجيب سيرتى فى حاجه
عيب عليك هو انا عيل صغير ؟
حماصه له كذا نشاط منها المخدرات و منها السرقه و الخطف ميضرش ...يعنى كل شغله شمال
طب و سعيد بيشتغل معاه فى ايه ؟؟
سعيد بيتهيالى كدا فى مخدرات و معرفش كانوا قاعدين من كام يوم و سمعت طراطيش كلام كده عن خطف واحده ...بس معرفش كانوا بيتكلموا عن ايه بالظبط
طب و متعرفش يا صفصف الاقيهم فين ؟
الله يخليك يا بيه ابعدنى عن الحوار ده
متخفش ...و الله ما هجيب سيرتك خالص
بص سعيد كنت اسمع أنه واقف عند كوبرى البحوث و بيبقى معاه اتنين نادورجيه يراقبوله الطريق ...المعلم بقا ملوش مكان معين بيقعد فيه بس مبيونش طول الليل يلف على رجالته و اى حد منهم بيتعرض لمشكله بيحلهاله فى ثانيه أصله معارفه كتير اوى و الناس اللى شغال معاها تقيله اوى
متشكر اوى يا صفصف سلام عليكم
و عليكم السلام
انا لازم اتأكد من الكلام ده الاول قبل ما اعمل اي حاجه
انا هروح و اشوف سعيد فعلا بيبيع مخدرات و الا الكلام ده غلط
على العموم كوبرى البحوث مش بعيد عن هنا هما ١٣ محطه بالمترو و اكون هناك
يا رب يكون كلام الواد ده غلط ...سعيد مهما كان صاحبى و ابن بلدى و متمناش أنه يكون بيعمل كدا
يا استاذ ... كنت بتقول انك نازل محطه البحوث ..هى اللى جايه دى
متشكر اوى
كوبرى البحوث هناك اهو ...فين سعيد بقا ؟؟
سعيد مش موجود ...اكيد كلام الواد صفصف دا غلط ...الحمد لله ...
ايه دا ؟؟
سعيد اهو طالع من محل عصير القصب
انا هراقبه من بعيد و اشوفه بيعمل ايه ؟؟
ايه دا ؟؟ دا فعلا معاه حاجه فى الكيس الاسود اللى فى ايده و كل شويه عربيه تهدى يناولها شريط برشام و ياخد منها فلوس
يبقى كلام الواد طلع صح ...يا خساره يا سعيد ...انا لازم اصور الكلام ده
انا هصور صور عاديه و فديو كمان
النادورجيه اهم بيشاورولوا....الله دا حماصه نفسه اهو و بيدى لسعيد حاجات
كل دا انا صورته
انا كدا معايا دليل على تجارتهم فى المخدرات ..انا لازم استخدم الصور دى فى انى ابعد سعيد نهائى عن هناء و اخليه يرجع البلد
انا هروح استناه فى السكن
.
.
........................🥀🥀..................
ازيك يا سعيد
اهلا انت جيت يا حماده ؟
ايوه جيت ...انت بقا كنت فين ؟
هكون فين يعنى كنت فى شغلى
اللى هو ايه الشغل ده يا سعيد ؟؟
و انت مالك يا حماده
عاوز اتطمن عليك يا صاحبى
اتطمن انا بيبيع و بشترى
بتبيع مخدرات صح ؟
مخدرات ايه اللى بتتكلم عليها ؟؟
المخدرات اللى كانت معاك متنكرش انا شفتك بنفسي و صورتك كمان
انت اكيد بتخرف ؟ صور ايه و مخدرات ايه ؟؟
انا مش بخرف و انت اللى علمتنى حكايه التصوير دى يا سعيد
انت بتكدب ....طب فين الصور دى ؟؟
اهى على موبيلى ...تحب تتفرج ؟
ورينى ....الله دا حماصه فيها هو كمان ؟
حظى بقا أنه جه و انا موجود
ايه هتبتزنى زى ما هتبتز هناء و الا ايه يا سعيد ؟صحيح انك وسخ
انا ؟؟ اخص عليك انااا...
انا بقى هتغدى بيك قبل ما تتعشى بيا
انت بتعمل ايه يا سعيد شيل المطوه دى من ايدك ... أهدى عشان نتكلم
أهدى مين يا روح ما بعدك روح
انت هتعمل ايه يا مجنون ...استنى
.
.
ايه دا ؟ الدنيا ضلمه اوى ...انا مش شايف اى حاجه ...انا متكتف مش قادر اتحرك ...انا فين ؟؟ ايه المكان ده ؟ انا اخر حاجه فاكرها أن سعيد فتح عليا المطوه و سحب من جنبه عصايه من بتاعه الفتوات دى و جاى عليا بيها بعد كدا محستش بأى حاجه ..دماغى وجعانى اوى
سعيد
سعيد
سعييييييد
#المتسوله
#الجزء_الواحد_والعشرون_والاخير
ايه دا ؟ الدنيا ضلمه اوى ...انا مش شايف اى حاجه ...انا متكتف مش قادر اتحرك ...انا فين ؟؟ ايه المكان ده ؟ انا اخر حاجه فاكرها أن سعيد فتح عليا المطوه و سحب من جنبه عصايه من بتاعه الفتوات دى و جاى عليا بيها بعد كدا محستش بأى حاجه ..دماغى وجعانى اوى
سعيد سعييييييد
اهو فاق اهو
تعالى ننزله يا سعيد
وجب يا معلم ..خد بالك و انت نازل البدروم
طب نورلى بس
اهو الكشاف اهو
يا اهلا يا سي حماده ...كنت عارف من الاول انك مش جدع انا نظرتى للناس متخيبش
انا مش جدع ؟؟؟ اللى مش جدع هو اللى يربط صاحبه و ابن بلده بالشكل ده و يضربه و يعوره كدا
و هو الصاحب يصور صاحبه و يجى عشان يهدده ؟؟
انا مهددتهوش يا حماصه
يااااا حماصه حاف كدا ؟ أسمى المعلم حماصه يلاااا
بص كدا حواليك هتلاقى بضاعه باكتر من مليون جنيه ...انت مش بتكلم اى حد انا ممكن ادفنك مكانك و اطلع اخد عزاك عادى
يا معلم حماصه انا مهددتهوش و لا حاجه و لا كان فى نيتى غدر ...انا لو عاوز اغدر كنت طلعت على الشرطه على طول
و بتصوره ليه من أصله ؟
انا كنت عاوز اوريله انى عرفت و كنت هقوله يسيبه من الشغل ده و يرجع البلد لأن الطريق ده آخرته وحشه
و مين ياض اداك الاذن تعمل كدا ؟
اعمل ايه ؟ هو انا عملت ايه ؟
اتعديت على شغلى و عاوز تخلع راجل من رجالتى بدون اذنى
و هو انا محتاج استأذنك فى الاول قبل ما انصح صاحبى ؟
طبعا ياض ...انا المعلم وشكلك كدا مش عارف انت بتعمل ايه
انا معملتش حاجه
لا عملت ...انت كدا لعبت فى عداد عمرك ...يا سعيد الواد ده بعد نص الليل تاخدوه و تحطوه فى شوال و تربطوه بحجر و ترموه فى النيل
بس يا معلم
مبسش اللى يصعب عليك يفقرك ... الواد ده بعد اللى حصل معاه ده لو خرج منها هيبلغ عنا و هنلاقى حبل المشنقه ملفوف حوالين رقابينا
حاضر يا معلم
يلا بينا
...............🌹🌹🌹...............
حماده مظهرش من امبارح يا استاذ محسن مش عارفه راح فين ...دا قالى أنه رايح يجيب حاجه من سكنه و راجع انا خايفه يكون جراله حاجه ...حتى تليفونه مقفول من امبارح ...قلبى مقبوض معرفش ليه
أن شاء الله مفيش حاجه ...طب متعرفيش عنوانه ؟
لا للاسف
طب مش عنوانه فى البطاقه ؟
ايوه بس اللى اعرفه انه مش من هنا يعنى اكيد العنوان فى البطاقه مختلف
يا ستى يمكن غيره اطلبى بس ملفه يمكن نعرف منه اى حاجه
حاضر ....الو لو سمحت يا استاذ محمود تجيب لى ملف الأستاذ حماده مدير الحسابات
.
.
اهو الملف بتاعه اهو
صوره بطاقته بتقول أنه من بلد اسمها سبك الضحاك
ايه ؟؟ انت بتقول ايه يا استاذ محسن ؟
ايه فى ايه يا هناء ؟
انت مش فاكر دى بلد مين ؟؟
مش واخد بالى
دى بلد ام سعيد الله يرحمها و بلد سعيد ابن اخوها
طب و فيها ايه يعنى ...يمكن صدفه
طب استنى
هتكلمى مين ؟
هكلم المقاول اللى بنالى المستشفى
الوو ازيك يا معلم
الله يسلمك يا هانم ...كله تمام و الحمد لله ؟
ايوه الحمد لله تمام كنت عاوزه اسالك بس عن عنوان حماده اصل فى شغل مهم عاوزاه يخلصه و هو قافل تليفونه
عنوان حماده ؟؟؟ اه افتكرت انا مره وصلته فى الشارع اللى قدام محطه مترو كليه الزراعه اللى فى شبرا
طب فى اى بيت لو تكرمت يا معلم ؟
مش فاكر الرقم بالظبط بس تقريبا كدا تالت بيت على ايدك اليمين و انتى داخله الشارع
طيب متشكره اوى يا معلم
شفت يا استاذ محسن ظنى طلع فى محله ...معقول فى ناس بوشين كدا ؟؟ الباشا تبع سعيد ابن اخت ام سعيد الله يرحمها و اكيد هو اللى خلاه يدخل عليا الدخله دى عشان اثق فيه بالشكل ده
ازاى اتضحك عليا كدا ؟؟ ازاى مخدتش بالى ؟ ازاى وثقت فى البنى ادم ده ؟؟
أهدى يا هناء مالك منفعله كدا ليه؟؟
انا مش قادره اصدق أنه ضحك عليا
استنى بس يا هناء متتسرعيش فى الحكم عليه
استنى ايه تانى ؟؟ لما يعمل ايه اكتر من كدا ؟
طب هقولك على فكره حلوه عشان و لا نظلمه و لا يظلمنا
لا يا استاذ محسن انا مش عاوزه اسمع سيرته ابدا
انا مستغربك اوى حتى لو تبع سعيد زى ما بتقولى الموضوع ميستحقش الثوره دى كلها
لا يستحق انا مبحبش الخيانه
انتى حبتيه يا هناء ؟؟؟
انا ؟؟؟ لا طبعا ..احب مين ؟
شكلك و طريقتك دلوقتى و قبل كدا بتقول انك بتحبيه و صراحه الواد جدع
جدع ايه دا خاين
طيب عشان نتأكد أنه خاين و منظلموش على الفاضى اسمحيلى بس اعمل مكالمه صغيره
اتفضل
الو ازيك يا حج
الله يسلمك يا محسن يا ابنى ازيك و ازاى ولادك ؟
و الله بخير يا حج الحمد لله
متعرفش يا بابا سعيد اللى مأجر شقه ام سعيد فى حد ساكن معاه و الا لا ؟؟
بيتهيالى لا يا محسن ..هو كان بيقول أنه هيجيب امه بس مجبهاش و لما سألته قال إنها تعبانه فى البلد و لما تخف هتيجى و أنه بيشتغل عشان يوفر لها العلاج لانه غالى
طب بقولك ايه يا حج عاوز منك خدمه معلش
طبعا يا محسن انا تحت امرك يا ابنى
انت فاكر الكاميرا و الميكرفون اللى هناء كانت حاطاهم فى شقه ام سعيد الله يرحمها
ايوه طبعا
انا عاوزك تنزل بسرعه دلوقتى على ما اجيلك و تطلع شقه هناء و تشغلهم و تسمع كل حاجه بتحصل
و ليه كدا يا محسن يا ابنى ؟؟ اللى اعرفه ان سعيد بعد خلاص عن هناء و لا عدش له دعوه بيها و عرفت أنه بقى بيشتغل و شغله حلو كمان بيجيب ليا الايجار قبل ميعاده
معلش يا بابا فى حاجه مهمه اوى عاوزين نعرفها
طيب خلاص خمس دقائق اكون هناك
و انا باذن الله مسافه السكه اكون عندك ..مع السلامه
انت عاوز تعمل ايه يا استاذ محسن ؟
عاوز اشوف حماده ساكن هناك و الا لا ؟ و لو ساكن هل بيتفق فعلا مع سعيد عليكى و الا ميعرفش حاجه عن الموضوع اللى بينكم
انت بتقول ايه ؟ اكيد يعرف طبعا
هنعرف اكيد لما نسمع و نشوف اللى بيجرى فى شقته
طب منا عاوزه اجى معاك
طب ما تيجى
ازاى ؟ لو لمحنى سعيد ممكن يفهم
خلاص هنعدى نجيب طرحه أو حاجه تغطى وشك و انتى داخله البيت
ماشي و لو انى عارفه اللى فيها من قبل ما اروح بس هثبت لك انك انت اللى حسن النيه زياده عن اللزوم
هنشوف يا ستى بس متسبقيش الأحداث
............فى شقه هناء ...........
ايه يا بابا سمعت أو شفت حاجه ؟؟
لا يا محسن كل شئ عادى و مفيش غير أن سعيد نايم على السرير كل شويه يتقلب و يولع سيجاره شرب يمكن عشرين سيجاره من ساعه ما جيت
بعد ساعتين ....
مفيش اى حاجه مش طبيعيه اهو يا هناء و حماده مش موجود هنا
يمكن راح اى مشوار ... بقولك ايه انا هقوم انا مش فاضيه اقعدلهم طول الليل انا مرحتش شغلى بسببهم ...كدا كدا لو ظهر اللى اسمه حماده ده انا هطرده
استنى يا هناء سعيد جاله مكالمه اهو
الو ..ايوا يا معلم
حاضر حاضر يا معلم انا مستنيه اهو
مع السلامه
.
شفت بيقول مستنيه تلاقيه الأستاذ حماده
طب اقعدى يا هناء و هنعرف كل حاجه دلوقتى
................🌹.............🌹...............
سلام عليكم يا سعيد
و عليكم ...جبت الشوال يا سيد
اهو معايا ....بس الواد ده ممكن يزعق و يفضحنا
متخفش انا مديله حقنه منيماه على الاخر عامل زى القتيل
هو الواد ده عمل ايه مخلى المعلم متغاظ منه كدا ؟
صورنى يا سيدى و انا ببيع الترامادول و جاى يقولى روح و ملكش دعوه بهناء تانى شكله كدا حبها
أما صحيح اهبل ...فاكر نفسه ناصح ؟ ميعرفش هو بيلعب مع مين ؟ طب يلا بقا ننزل نجيبه و نحطه فى الشوال و نروح نرميه زى ما المعلم أمر
..
..
يا خبر ...ايه اللى بنسمعه ده ؟؟
احنا لازم نتصرف يا هناء
هنعمل ايه يا محسن ؟
لازم نعطلهم على ما نتصل بالشرطه
و هنعطلهم ازاى ؟؟
انا هنزل اعطلهم ...اتصل انت بالشرطه يا محسن
طب خلى بالك من نفسك يا بابا
متخفش عليا ...ربنا معانا
.
ايه دا مين بيخبط على الباب دلوقتى ؟؟
مش عارف ...اقعد هنا جنب الشوال على ما اشوف مين
ماشى كلامك بس سيبلى الكشاف اصل الدنيا هنا كحل
سلام عليكم يا سعيد يا ابنى
و عليكم السلام يا عمى اتفضل
لا انا مش هعطلك ...انا كنت معدى من هنا و قلت اجى اخد الإيجار صحيح اول الشهر لسه مجاش بس انت معودنى تدهولى قبلها بكام يوم ... كل شهر و انت طيب يا ابنى
و انت طيب يا حج طب ادخل هتفضل واقف على الباب كدا ؟
يعنى هتشربنى شاى لو دخلت ؟
يا سلام احلى شاى ليك يا حج
اذا كان كدا بقا ادخل
يا رب يا ستار
ادخل يا حج مفيش حد هنا
افتكرت والدتك جت من البلد يا ابنى
لا لسه و الله يا حج اصلها تعبانه اوى ...اتفضل الايجار اهو
لو محتاجه يا ابنى خليه
لا خيرك سابق متشكر اوى
طب هتعملى شاى و الا امشي ؟
لا تمشي ازاى ثوانى هولع على الكاتل و اعملك
اتفضل احلى كوبايه شاى
حلوه بس عاوزه معلقتين سكر
هو انت مش بتشربه بمعلقه يا حج ؟
لا يا ابنى بشربه بتلات معالق
حاضر ثوانى
انت مالك كدا مش على بعضك حاسس انى زى ما اكون معطلك عن حاجه
لا ابدا بس مستنى واحد صاحبى طالعين شغل
ربنا يعينك يا ابنى انا مش هعطلك اكتر من كدا ..سلام عليكم
و عليكم السلام يا حج
اه بقولك ايه فى اى حاجه فى السباكه مضايقاك ؟
لا يا حج مفيش حاجه
مش كنت بتقول الشطاف بايظ
لا منا صلحته خلاص
طيب يا ابنى ...يعنى مفيش حاجه بتشتكى منها ؟
لا مفيش يا حج
إن شالله دايما يا ابنى ...طب استأذن انا بقا
اتفضل يا حضرت الظابط هو ده سعيد اللى بلغت عنه
ايه دا فى ايه ؟
هتعرف يا سي سعيد لما ننزل البدروم تحت
.............
فى اليوم التالى ( من داخل المستشفى )
حمدالله على سلامتك يا حماده
الله يسلمك يا هناء متشكر اوى يا هناء انا لولاكى انتى و الاستاذ محسن و الحج كان زمان السمك بياكلنى دلوقتى
الحمد لله اننا وصلنا فى الوقت المناسب
انا كنت عاوز اقولك من زمان بس خفت من رد فعلك
متتكلمش يا حماده انا عرفت كل حاجه ...سعيد اعترف بكل حاجه فى التحقيق و قال انك عطلته بعد ما كان عاوز يفضحنى يوم الافتتاح و كمان كان بيخطط لخطفى
ايوه و الله دا اللى حصل
يبقى كدا احنا الاتنين خالصين انت انقذتنى و انا انقذتك
يعنى مش زعلانه منى
لا ابدا
بس عاوز اطلب منك طلب يا هناء
عارفاه من قبل ما تقوله ...انا هبطل تسول و هشتغل هنا فى المستشفى معاك و هعمل مبنى للاطفال المتشرده اللى كنت بسرحهم و أعلمهم حرفه يستفيدوا منها
برافو عليكي هى دى هناء حبيبتى
احممم انت بتقول ايه ؟
بقول انك حبيبتى و نور عينى كمان و نفسي نكمل مشوار حياتنا سوا و تبقى مراتى
و انا موافقه يا حماده
الف مبروك يا حبيبتى
الله يبارك فيك يا حبيبي
تمت 🌻🌻🌻🌻
انا عاوزه اقول كلمه
التسول ظاهرة قبيحة تُسيء إلى سمعة المجتمع، وتُعكر صفوه وتُشوه صورته، وتجعل المتسول يظهر بصورة المحتاج والذليل، وقد نهى النبي صلى الله عليه وسلم أن يُذلّ المؤمن نفسه، قال صلى الهو عليه وسلم: (لَا يَنْبَغِي لِلْمُؤْمِنِ أَنْ يُذِلَّ نَفْسَهُ) أخرجه الترمذي.
وقد حذّر النبي صلى الله عليه وسلم من هذه المهنة ونفّر منها؛ لأن صاحبها يفقد كرامته في الدنيا ويسيء إلى آخرته؛ لما روى البخاري ومسلم أن النبي صلى الله عليه وسلم قال: (مَا يَزَالُ الرَّجُلُ يَسْأَلُ النَّاسَ، حَتَّى يَأْتِيَ يَوْمَ القِيَامَةِ لَيْسَ فِي وَجْهِهِ مُزْعَةُ لَحْمٍ).
🌺🌺🌺🌺🌺
ارجو أن القصه تكون نالت اعجابكم ...اذا عجبتكم القصه ارجو الدعاء لوالدى رحمه الله عليه و سائر موتى المسلمين
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
تعليقات
إرسال تعليق