عنبر خمسه الجزء السادس

#عنبر_خمسه

#الجزء_السادس

لما نزلت من عند والدة ساره كانت اسئله كتير بتدور فى دماغى لدرجه انى حسيت بصداع رهيب 

روحت اخدت دش و نمت شويه و قمت دخلت مكتبى اراجع بعض المراجع اللى ممكن تفيدنى فى حاله ساره

قريت كتير اوى لحد ما الساعه جت تلاته صباحا تقريبا

فتحت البوم الصور اللى اخدته من والدتها و قعدت اتفرج عليه بعنايه شديده 

اد ايه هى رقيقه و ضحكتها حلوه !! 

ازاى بنت بالبراءه دى تتحول لقاتله بالعنف ده ؟؟ اكيد فى سبب قوى حولها التحول ده كله 

جه فى دماغى واحد صديقى يعتبر استاذى لسه موجود فى ألمانيا 

حبيت استشيره فى حاله ساره و فعلا فتحت النت و بعت له على الماسنجر رساله انى عاوز اخد من وقته شويه لو فاضى يعنى 

صديقى البروفسير ماجد رد عليا بسرعه و قالى تحت امرك انا فاضى لمده ربع ساعه 

ابتديت اشرح له حاله ساره و التشخيص اللى هى متشخصاه و الادويه اللى بتاخدها و جلسات الكهربا الهايله 

دكتور ماجد استنكر جدا طريقه العلاج المتبعه دى و قالى اوقف جلسات الكهربا فورا 

و اول شئ لازم اعمله انى اركب كاميرات فى اوضة ساره عشان نراقبها و نشوف سلوكها اربعه و عشرين ساعه 

بس معرفش حكايه تركيب الكاميرات دى يا دكتور مسموح بيها هنا و الا لا ؟

دى حاجه ضروريه يا احمد ...

مريضه بالخطوره اللى بتتكلم عليها دى لازم تتراقب متتسابش كدا

تمام هحاول 

حاول معاها و ابتدى اسحب المهدئات الكتير اللى بتاخدها دى و دخلها بروتوكول تانى للعلاج انا هبعته لك دلوقتى 

تمام متشكر اوى يا دكتور 

العفو ...ابقى طمنى يا احمد 

حاضر باذن الله 

انا عاوزك تسجل كل خطوه تعملها مع البنت دى علشان الحاله دى ممكن نخرج منها ببحث علمى كويس اوى 

باذن الله يا دكتور 

قفلت مع دكتور ماجد و رحت ارتاح شويه و انا دماغى مشغوله جدا بموضوع ساره 

تانى يوم رحت شغلى و قابلت شريف زميلى 

ازيك يا دكتور احمد 

الله يسلمك يا شريف 

شعبان بيقولى انك شفت ساره و قررت تعالجها 

ايوه باذن الله ...بس كنت عاوز اعرف يا شريف هو مين اللى بيكتب لها المهدئات اللى بتاخدها دى ؟

مش انا و الله ...دى متوصى عليها يا ابنى المدير شخصيا هو اللى بيبعت لها علاجها بنفسه 

دكتور عبداللطيف ؟؟؟ 

ايوه 

و جلسات الكهربا ؟؟ مين اللى بيقول عليها 

هو برده و بيتهيألى لو عاوز تمسك حالتها لازم تروح تستأذن منه الاول

امممممم ...طب بقولك ايه يا شريف هو ممكن نحط كاميرات مراقبه فى اوضة ساره دى ؟

لا كاميرات ايه ؟ انت فاكر نفسك فى ألمانيا و الا ايه يا عم ؟؟ و حتى لو وافقوا الميزانيه لا تسمح بالكلام ده 

يا عم إن كان على الميزانيه انا مستعد اجيب كاميرتين على حسابى احطهم فى اوضتها 

و الله يا احمد انا بيتهيالى أن محدش هيسمح لك بكدا اصلا 

هو حد حاسس بيها و الا يعرف عنها حاجه ؟؟ دا حتى اللى بيحطلها الاكل بيحطه و يجرى 

صراحه عندهم حق ...انت مشفتش حالتها عامله ازاى ؟

انا هقوم اروح لدكتور عبداللطيف أقوله انى عاوز اعالج الحاله دى 

بس نصيحه متقولوش على حكايه الكاميرات دى 

ليه بقا ؟؟

لانه لا يمكن يوافق ...و ممكن بسبب الموضوع ده ميرضاش انك تعالج الحاله خالص .

تمام هقوم اشوف 

و رحت للمدير و استأذنته فى علاج الحاله فى الاول رفض و قال إنها صعبه و أنه هو متابعها بنفسه بس انا وعدته انى هعرض عليه خطة العلاج اول باول 

الراجل وافق على مضض و بعد ما كنت لسه عاوز أقوله على موضوع الكاميرات افتكرت كلام شريف فسكت خالص 

شكرت المدير و خرجت رحت على اوضتى و فكرت انى لازم اركب الكاميرات دى من غير ما حد يعرف

ناديت على شعبان و سألته عن ساره 

قالى أنه أداها منوم قوى و مش هتفوق قبل بكرا الصبح 

هنا جت لى الفكره انى لازم ابدا بسرعه و من غير اى تأخير 

خرجت بسرعه من المستشفى و رحت لشركه بتركب كاميرات المراقبه و بتوصلها بالموبيل و الفنى ممكن يركبها فى نص ساعه اتفقت معاه انى عاوز كاميرتين صغيرين اوى و انى هفوت عليه بعد العصر عشان يجى يركبهم لى 

بعد كدا طلعت على استوديو و طلبت منه يعملى اربع صور من صور ساره اخترتهم بعنايه بوسترات كبيره و اتفقت مع الفنى انى هاخدهم بعد العصر منه 

بعد كدا رحت لمحل دهانات و بويه و طلبت منه نمرة نقاش بس يكون سريع و نضيف علشان اعمل وش نضافه لاوضه واحده بس 

و فعلا الراجل ادانى رقم تليفون واحد اسمه رزق اتصلت عليه فورا و سألته على الخامات اللى اجيبها و طلبت منه أنه يجيلى عند محل الدهانات و لاجل حظى الحلو الراجل كان فاضى اليوم ده 

خمس دقائق و لقيته عندى و جايب معاه العده بتاعته سلم و رولا و فرش اشترينا الحاجات و جبت اللون بمبى و ده اللون اللى ساره بتحبه لأن معظم لبسها و حتى اوضتها اللى فى الصور كان لونها بمبى 

اخدت رزق و طلعت على المستشفى 

رزق اول ما شاف المستشفى خاف 

لا لا متفقناش على كدا يا استاذ 

متفقناش على ايه مش فاهم ؟

انت حضرتك جايبنى مستشفى المجانين ؟؟

طب و ايه يزعلك فى كدا ؟ انت لك انك هتدهن اوضه و خلاص 

بس ...

انت فى العاده بتاخد فى دهان الاوضه كام ؟

يعنى ...حوالى ٣٠٠ جنيه 

انا هديك خمسميه جنيه 

صحيح ؟؟؟ لا إذا كان كدا انا موافق ...توكلنا على الله مجانين مجانين بقا ..

دخلت و ناديت على شعبان و قلت له يجهز مفتاح اوضه ساره و يسبقنى على هناك 

و عاوز المفتاح ليه يا دكتور ؟

مترغيش كتير يا شعبان و اعمل اللى بقولك عليه 

حاضر ( قال على رأى المثل اربط الحمار مطرح ما يقولك صاحبه ) 

و سبقنى شعبان على اوضه ساره و طلبت من رزق أنه يجهز البلاستيك اللى هيدهن بيه الاوضه و يكون مستعد اول ما يدخلها على طول و ياريت يخلصها باسرع وقت ممكن 

رزق قالى متخفش يا دكتور دا انا فوريره فى شغلى ...دا انا شهرتى رزق فوريره 

حلو اوى ...يلا بينا

رحت لقيت شعبان واقف مبلم 

افتح يا شعبان 

ننننعم 

افتح بقولك من غير و لا كلمه 

فتح شعبان و ايده بتترعش و رزق واقف مذبهل من المنظر 

اول ما دخلنا الاوضه و شفنا ساره متكومه على السرير و الجروح ماليه جسمها و الدم على الحيطان كلها لقيت رزق شهق  و قال يا لهوى و طلع يجرى على بره ...

#دجيهان_عادل

يتبع

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ...