#هاله_قصه_حقيقيه
#الجزء_الثانى
خد ...بنت زى البدر تتربى فى عزك أن شاء الله
نعم ...بنت ؟؟؟؟؟ بنت ايه دى ؟؟؟
و راح ناطر ايد الست كنت هقع من ايدها لولا لحقتنى بسرعه
ابويا دخل على امى زى التور الهايج و مسكها من رقبتها
بقى كدا يا منال ؟؟؟ رايحه تجبيلى بت ؟؟؟
هو انا اللى بجيب يا اخويا ؟؟؟
امال امى اللى بتجيب ؟؟؟ عليا الطلاق ما انتى بايته فيها انهارده ....روحى و انتى طالق
ابويا مستكفاش أنه طلق امى ....دا قومها من على سريرها و هى لسه والده مبقلهاش عشر دقايق و بقى يزق فيها و يلطش فى اى حته تيجى تحت ايده و طرد كل الستات الموجودين فى البيت و اول ما امى وصلت للباب و هو وراها راح واخدنى من ايد الخاله فاطمه و رزعنى فى ايد امى و قالها
خديها معاكى انا مش عاوزها و لا هكتبها باسمى اصلا ...روحى أجرى شوفى حد يكتبها بأسمه
و خرجت امى و هى بتجر فى دمها و شايلانى على أيدها ... واحده من الستات اخدتنى و سندتها لحد ما وصلتها بيت ابوها
طبعا امى وصلت فى حاله وحشه اوى و بقى الناس يتكلموا عليها
فى منهم اللى تعاطف معاها و قال عليه حيوان و فى منهم اللى قال اكيد شاف عليها حاجه عشان ميرضاش يكتب البت باسمه
مرت شهور و امى غضبانه فى بيت اهلها و طبعا كان زمان يقدر اى حد يقيد المولود مش زى دلوقتى ...جدى راح ايدنى و سمانى هاله و عشت حوالى سنه مع والدتى فى بيت جدى لحد ما ابتديت اتعلم المشي و مكنتش شفت والدى نهائى
ناس كتير اتدخلت و حاولت تصلح خصوصا أن اخواتى الولاد كانوا متبهدلين جدا لان أعمارهم كانت صغيره اوى
اللى عرفته بعد كدا أن جدتى ام ابويا حاولت أنه يرجع امى مرضيش فقالت له خلاص اتجوز انا مش قادره على حمل التلات ولاد
ابويا رفض بشده و قالها اذا كان انا مكنتش عاوز الجوازه الاولانيه و انتى اللى دبستينى فيها عاوزانى اتجوز التانيه ؟ انا بكرهه جنس النسا كله و ما صدقت انها غارت
و اما انت بتكره جنس النسا بتخلف منها ليه اربع عيال ؟؟
انا كنت عاوزها تجيب صبيان مش بنات
و هو بايدها يا ابنى ؟؟؟
بقولك ايه يا اما انا مش قاعد لك فى البيت هغور من وشك عشان ترتاحى
استنى هنا يا واد ...انت زى ابوك بالظبط بتكره الستات ...كانوا عملولك ايه يا شملول ؟؟؟...مش الست دى اللى بتشيل همك و تعمل أكلك و تغسل هدمتك ؟؟
عاوزه ايه يا اما دلوقتى ايه لازمتها المحاضره دى ؟؟
عاوزك تروح ترد مراتك و تجيبها تربى عيالها
و ان قلت لأ
تبقى مش ابنى و لا اعرفك ..و تشوفلك بيت تانى غير ده
و رضى ابويا يرجع امى تحت ضغط جدتى و رجعت امى تتعامل زى الخدامه
ابويا اول ما دخلت قالها انا رجعتك بس عشان تخدمى التلات ولاد ...اما البت دى اوعى حسك عينك تقولى بنتك و الا تقولى عاوزه لها حاجه فاهمه و الا لا ؟
امى وطت دماغها و سكتت ...هى برده اتمرمطت من غير اخواتى و كانت هتموت عليهم
و مرت السنين و ابويا بيعاملنى معامله وحشه جدا
كنت اشوف نظرة الكره فى عنيه فى حين أنه بيحن على اخواتى الولاد و يدلعهم و يجيب لهم اى حاجه يشاوروا عليها
اما انا فأمى كانت بتشحت لى فساتين من الجيران و من قرايبها لأنه مكنش يرضى يجيب لى فستان
حتى الاكل كان ممنوع اقعد معاه هو و اخواتى الولاد على طبليه واحده و كنت دايما اكل مع امى فى اوضه تانيه او فى المطبخ ..
طبعا فى الاول مكنتش مدركه ليه بيعمل كدا و كنت أجرى عليه زى ما كنت بشوف البنات بتجرى على ابوها كان يزقنى يوقعنى على الأرض
لما بقيت اخاف منه جدا و مبقتش اقرب له نهائى
و جه الوقت اللى المفروض ادخل فيه المدرسه
و طبعا مكنش عاوزنى اتعلم ...الحكايه دى أعمامه اتدخلوا فيها و بقوا يتحايلوا عليه
ابويا وافق بعد عناء و بشرط أنه ميصرفش عليا مليم فى دراستى
امى وافقت و قالت له ملكش دعوه ربنا هيدبرها و هيسترها معانا زى ما سترها السنين اللى فاتت دى كلها
و فعلا امى بقت تاخد من جدى أو جدتى و تصرف على تعليمى و كانت توفر كام بيضه تبيعهم ...تعمل شويه جبنه شويه لبن و انا كانت احتياجاتى بسيطه و التعليم ببلاش ..مكنتش باخد دروس لانى كنت شاطره جدا
و كنت مطيعه اوى و الكل يشهد باخلاقى العاليه
مرت السنين و نجحت فى الثانويه العامه و كان املى انى ادخل الجامعه
ابويا وقف مره تانيه و قال كفايه كدا
امى وقفت له و قالت له ملكش دعوه بيها ...هو انت بتصرف عليها؟؟؟ بنتى هتدخل الجامعه اللى بتحلم بيها ...روح اتشطر على اولادك الصبيان اللى خيبتهم بدلعك الزايد فيهم كلهم دخلوا دبلومات
ابويا اتخانق مع امى خناقه كبيره بس هى و لاول مره كانت مصممه جدا على رابها لدرجة أنها قالت له لو فيها طلاقى هاخد بنتى و ادخلها الجامعه برده
انا كنت سامعه كل ده و عماله اعيط ...و خايفه على امى
ابويا كان اول مره يشوف امى بالقوة دى و استغرب جدا موقفها ده ...فى الاخر ابويا استسلم و دخلت الجامعه اللى كنت بحلم بيها
دخلت كليه العلوم و امى اشترت لى بالطو ابيض كنت ابقى فرحانه اوى و انا شايلاه على دراعى و ماشيه بيه
نجحت اول سنتين بتفوق الحمد لله و كنت راسمه لنفسي امال عريضه انى اتعين معيده بالكليه لكن للاسف القدر خد منى اغلى ما املك
خد منى امى 😔 ...و بقيت وحيده مليش حد ...القلب الحنين راح و فضلت انا ....يا ريتنى انا اللى مت يا امى مش انتى 😔😔😔😔😔
#دجيهان_عادل
يتبع
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
ياعينى دول اتعذبوا اوى 😔
ردحذف