عنبر خمسه الجزء السادس عشر

#عنبر_خمسه

#الجزء_السادس_عشر

و فى ثانيه كانت ساره طلعت الدور الخامس و لقيت الباب بيخبط 

فتحت لقيت التلاته قدام عينى 

بصيت لشعبان كدا ...وطى رأسه فى الارض 

الله دا حضرتك خفيتى و بقيتى تمشي اهو 

فين ساره يا دكتور ؟؟؟؟

ساره ؟؟ ساره مين ؟؟؟؟

احنا هنستهبل و الا ايه ؟؟؟ 

عيب يا دكتور تتكلم معايا بالشكل ده. 

بنتى فين يا دكتور ؟؟؟

انا معرفش انتى بتتكلمى عن ايه ؟؟

عن ساره يا دكتور ....ساره اللى جبتها معاك لحد هنا 

انت اخر حد كنت اتخيل أنه يخوننى يا شعبان 

ليه ؟؟ كنت جوز ام حضرتك و الا ايه ؟؟؟ و الا فاكر أن الشقه دى بتاعة ابن عمى صحيح ؟؟؟ دا انا أغنى واحد فى عيلتنا 

اااه يعنى الشقه بقا بتاعة الدكتور عبداللطيف 

لأ و انت الصادق الشقه دى انت مأجرها من صاحبها 

صاحبها مين دا ؟؟ انا مأجرتش حاجه من حد 

شوف بقا يا دكتور احمد احنا دلوقتى هنلعب على المكشوف ...انت بقيت خطر علينا كلنا بعد اللى عرفته عن ساره و كان لازم نتخلص منك و منها 

اه ...انا كدا فهمت كل حاجه ...انت بقا خفت اكشفك رحت ذاقق عليا شعبان عشان اطمن له و بعدين خليته يجبنى فى الشقه دى اللى بتقول انى اجرتها 

ايوه طبعا يا دكتور و انت ماضى على العقد كمان 

انا ممضتش على اى عقد

لا مضيت بس مخدتش بالك 

لا أنا متأكد انى ممضتش على اى حاجه 

لا مضيت مش فاكر  و انت بتمضى على المحضر اللى حققنا معاك فيه ؟؟ 

لا لا لا ...دا انا لازم اصقف لكم ...هايل .....دا و لا اجدع مخرج يخرج التمثيليه دى ....بجد شابووو ..

مرسيه 

كمل هتعملوا فيا ايه بقا ؟؟؟ اظن هتموتونى طبعا 

مش بقولك انت ذكى اوى ...دلوقتى انت خطفت مريضه من مستشفى الامراض العقليه حالتها خطيره  و متهمه فى جريمة قتل بشعه ....يا عينى البنت معندهاش عقل قتلتك و بعدها انتحرت و بكدا كل الأطراف ترتاح .

اااه طبعا و أولهم الست اعتدال اللى هى بالمناسبه مش امها و بالمناسبه كمان هى اللى قتلت جوزها و جوز بنتها ...و مش بعيد تكون انت شريكها يا دكتور

لا انت كدا فهمت اكتر من اللازم فعلا و انا بقا هيريحك قبل ما اموتك ...انا فعلا شريكها فى كل حاجه

و طبعا شعبان المنفذ 

برافو عليك شعبان ايدى اليمين فى كل حاجه  ...شعبان اللى نفذ و سلخ و قطع سامر و لف أحشائه على ايدين ساره و هى نايمه بعد ما أداها حقنه مخدره 

اه و قسمتوا بقا فلوس سامر و جوزها بينكم انتوا التلاته ؟؟ و الا ضحكوا عليك يا شعبان و ادوك الفتافيت ؟؟؟ 

بطل مرفعاتك دى يا دكتور ....انت دلوقتى هتموت نفس موتة سامر الله يرحمه ...معلش بقا انت اللى اخترت لما حشرت مناخيرك فى اللى ملكش فيه 

يلا يا شعبان 

استنوا ....انتوا هتموتونى ازاى ؟؟

متخافش مش هتحس بأى حاجه شعبان ايده خفيفه و ياما خلص ناس من حياتها قبل كدا 

لا مش قصدى ...بس انتوا بتقولوا انكم هتخلوا ساره تنتحر أو ترمى نفسها من الدور الرابع ؟؟

ايوه ...دا بعد ما تقتلك و جسمها كله يكون مدهون بدمك 

هو انا مقلتلكوش ؟؟؟ مش ساره هربت منى ؟؟؟ 

هربت ؟؟ انت كداب 

و انا هكدب عليكم ليه و بينى و بين الموت خطوه واحده ادخلوا دوروا عليها لو حابين 

ادخل يا شعبان شوف ساره فين ؟؟

و دخل شعبان و دور فى الاوض كلها و فى المطبخ و الحمام و فعلا ملقاش اى حد 

شعبان خرج مدلدل ودانه و قال 

ملقتش حاجه يا فندم 

ازاى ملقتش حاجه ....وديتها فين يا دكتور 

معرفش حضرتك يمكن هربت و راحت لك مش انتى زى امها برده ؟؟؟

انت ملكش دعوه بيا ...قولنا وديتها فين احسن لك 

بتهددينى يا اعتدال ؟ زى ما هددتى سامر ؟ بس سامر متخيلش انك ممكن تقتليه إنما أنا بقا ...عارف انكم كدا كدا هتموتونى .

فى اللحظه دى حصلت حاجه غريبه ، بس انا دايما بؤمن برسايل ربنا اللى بيبعتهالنا 

فى اللحظه دى النور قطع فجأه و المكان بقا كحل 

طبعا انا مكدبتش خبر و كنت خارج الشقه فى اقل من الثانيه 

نزلت جرى على السلم و سمعت رجليهم ورايا 

بقيت أجرى و خايف ابص ورايا و حظى الكويس أن المنطقه كلها كانت كحل 

قعدت أجرى لحد ما وصلت عماره حديثه تحت الانشاء 

طلعت بسرعه ...ووصلت لآخر دور فيها 

قعدت خايف مقطوع نفسي ...أنا متأكد لو شعبان لاقانى هيقتلنى مش هيبقوا عليا دقيقه واحده 

بعد شويه النور جه و ابتديت اشوف كل حاجه حواليا 

بصيت من جنب علشان احاول اشوفهم مشيوا و الا لأ 

لقيت شعبان و الدكتور بيدوروا فى كل مكان زى المجانين و الست اعتدال مستنياهم جنب العربيه 

طبعا فضلت فى مكانى واقف اراقب من بعيد لحد ما ابتدى شعبان يطلع العمارات اللى مش مسكونه ....ابتدى يدور فى كل دور و ينزل 

و جه الدور على العماره اللى انا مستخبى فيها و لسه هيطلع لقيت الدكتور عبداللطيف بينادى عليه و بيقوله تعالى يا شعبان ..هو اكيد مش فى العماره دى لأنها اعمده بس و لو فيها كان بان من هنا 

طب ما نتأكد يا دكتور 

لا ... عشان الناس متاخدش بالها ...انت اقعد هنا قدام العماره اكيد هيفكر يرجع ياخد عربيته على الأقل ...و لو جه انت عارف هتعمل ايه كويس 

 طبعا هى دى اول مره ؟؟؟ .....أمر جنابك 

و مشى الدكتور و اعتدال معاه و فضل شعبان قاعد يراقب و عنيه زى الصقر ...لو نزلت هيشوفنى اكيد ..

لازم الاقى ساره و الاقى المذكرات هو ده طريقى للنجاه 😔

#دجيهان_عادل

يتبع

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ...