#عنبر_خمسه
#الجزء_التاسع
فتحت الفتحه اللى فى الباب اللى من فوق و بكل حذر ...
هى بقا اول ما سمعت باب الفتحه جريت وقفت على السرير
خدى يا ساره العلاج ده
انا شفتك قبل كدا
ايوه انا كنت هنا من يومين
لا ...انا شفتك فى الحلم
شفتى ايه ؟؟؟؟
شفت انى واقعه فى بير غويط ضلمه و عماله اصرخ اصرخ و محدش سامعنى و فجأه لقيت النور ملى المكان و لقيتك واقف على البير من فوق و بتمد ليا ايدك بس انت كنت بعيد اوى ...قعدت تحاول و جبت حبل و كنت خلاص هتوصلى بس فى حد جه من وراك و ذقك بعيد و قفل عليا البير تانى و الدنيا ضلمت و رجعت اصرخ ..فقت لقيت الاوضه اتغيرت و لقيت بابا واقف قدامى
حلمك حلو يا ساره و معناه انى هساعدك و أن شاء الله هخرجك من هنا
صحيح ؟؟ انا نفسي اشوف الشمس يا....قلت لى اسمك ايه ؟؟
أسمى احمد و أن شاء الله هتشوفيها ...خدى يا ساره العلاج ده
حاضر
الصور اهى اتفضلى
خرجت من عند ساره و انا متفائل جدا ...حالتها عكس ما كنت متصور خالص ...هى واعيه لكل اللى بيحصلها بس يمكن الفصام اللى عندها بيخليها توصل للحاله اللى شفتها عليها اول مره
رحت على مكتبى و كلى حماس كتبت تقرير للدكتور عبداللطيف و خطة العلاج عشان ميزعلش
قدمت التقرير للسكرتير و مشيت
لما روحت البيت اتصلت على دكتور ماجد و قلت له على كل اللى حصل مع ساره
الدكتور ماجد فرح جدا و قال دا تطور خطير ..انت هايل يا احمد فكرة الصور اللى انت عملتها دى هايله و خلتها وثقت فيك اوى برافو يا احمد استمر بقا على العلاج و طمنى اول باول
قفلت مع ماجد و قلت ابص على ساره قبل ما انام
لقيتها قاعده على سريرها و مثبته عنيها على الصور و كل شويه تضمهم و تبوسهم
لغايه ما راحت فى النوم و انا كمان قفلت النت و نمت و انا مبسوط جدا
تانى يوم رحت شغلى ...لقيت شعبان داخل عليا بيقولى سيادت المدير عاوزك يا دكتور
حاضر هروح له
رحت لدكتور عبداللطيف لقيته قاعد مكشر
ايه يا دكتور الكلام اللى انت كاتبه فى التقرير ده ؟؟
ماله يا فندم
ازاى كاتب أن الحاله اتصرفت معاك بطبيعيه و حالتها كانت هاديه جدا
علشان دا اللى حصل يا فندم
و ايه العلاج اللى انت كاتبه ده ؟؟
دا خطة علاج الحاله زى ما حضرتك أمرت
هو انت فاهم نفسك بتفهم و الناس كلها مبتفهمش و الا ايه ؟؟
ليه حضرتك بتقول كدا ؟؟
كل اللى انت كاتبه ده غلط انا رحت للحاله بنفسي لما لقيت التقرير ده ...ملقتش اى حاجه من اللى انت كاتبها دى
ازاى يا فندم الكلام ده ؟؟
و الله اسأل نفسك ...الحاله دى ترجع تديها مهدئات تانى و مش عاوز اى حاجه من دماغك مره تانيه
بس دا شغلى يا دكتور
و انا رئيسك و لازم تسمع كلامى
حاضر
خرجت من عند دكتور عبداللطيف و انا مش مصدق نفسي هو ليه بيقول كدا ؟
جريت على عنبر خمسه اشوف ساره فيها ايه ؟
اول ما قربت سمعت صوت صريخ جامد و خرفشه جامده
قربت و فتحت الفتحه اللى فى الباب لقيتها واقفه بتخربش فى الحيط و معوره نفسها و عماله تصرخ
قفلت الفتحه و انا مش مصدق ايه اللى حصلها ده ؟؟ امبارح كانت فى منتهى العقل ليه رجعت تعمل كدا
رحت مكتبى و انا مستغرب جدا
الظاهر كلام دكتور عبداللطيف صح و البنت دى حالتها معقده اوى مش زى ما تخيلت ....طب و بعدين ؟؟؟
فتحت الكاميرا ابص عليها مره تانيه لقيتها زى ما هى ...نفس الوضع
حتى الصور الصغيره متقطعه و مرميه فى الاوضه....و الصور الكبيره متقطع حروفها من تحت بس
هنا جت فى دماغى حاجه ....ساره امبارح كانت بتوصل لمعظم الصوره لما كانت بتقف على السرير ..
طيب ما هى لو عايزه تقطع البوسترات كانت عملت كدا تانى ووقفت على السرير و قطعتهم هما كمان ؟؟؟
ساره مش ممكن تكون هى اللى عملت كدا ابدااا
افتكرت أن الفنى قالى أن الكاميرات دى بتسجل و عرفنى ازاى ارجع التسجيل
رجعت التسجيل من اول ما ساره نامت و الكلام ده كان حوالى واحده صباحا و ابتديت اسرع شويه بشويه علشان اشوف حالة الهياج جتلها امتى بالظبط
الساعه تلاته الفجر باب العنبر اتفتح و دخل اتنين ضخام ....واحد كتفها و التانى حط لها حبوب بالعافيه فى بوقها
الراجل اللى كتفها فضل واقف و هى بتصرخ و بتحاول تنفد من ايده
التانى مسك الصور قطعها و حاول يقطع البوسترات قطعها من تحت قطع الورد و رماه فى الارض
بعد ما خلصوا سابوا ساره مرميه على الأرض و خرجوا
ساره بعد شويه بدأت تصررررخ و تقطع فى جسمها و جت لها حالة الهياج مره تانيه
انا شفت كدا و حسيت أن دمى اتحبس ...جالى ذهول رهيب
ايه دا ؟؟ و مين دول ؟؟ و ايه مصلحتهم يعملوا فيها كدا ؟؟؟
اكيد حاله الهياج اللى جت لها دى بسبب الحبوب اللى اخدتها ....
انا لازم اروح لدكتور عبداللطيف و أقوله على الجريمه اللى بتحصل فى المستشفى دى ...اكيد هو ميعرفش ..معذور لما شاف تقريري و راح شافها بالشكل ده
انا كدا عرفت ليه هو كان متنرفز عليا ...عنده حق و الله
قمت من على مكتبى و رحت مكتب المدير
سالت السكرتير قال إنه لسه ماشي حالا
طلبت نمره تليفونه علشان أكلمه و أفهمه على الحقيقه
السكرتير ادانى النمره اخدتها و خرجت أكلمه من بره
قابلنى شعبان
دكتور احمد
نعم يا شعبان
كنت عاوزك فى موضوع كدا
مش وقته يا شعبان
خمس دقائق بس يا دكتور
طب تعالى معايا فى المكتب
لا مش هينفع فى المكتب
ليه مينفعش المكتب هو فى ايه ؟؟؟
اصل مش عاوز حد يسمع بالكلام اللى عاوز اقولهولك
طيب تعالى بره فى الجنينه
خرجت انا و شعبان و قعدنا تحت شجره تين كبيره
اتكلم يا شعبان انا مش فاضيلك
و الله يا دكتور احمد انا حبيتك و عشان كدا قلت اقولك
تقولى ايه ؟ اتكلم على طول يا شعبان
انا عاوزك تبعد عن حالة اللى اسمها ساره دى
و ليه بقا أن شاء الله ؟؟
حاله ميئوس منها و محدش هيسمح لك بعلاجها اصلا
انت بتقول ايه يا شعبان ؟؟ هو مين اللى مش هيسمح لى دا ؟؟؟
انا بقولك اللى اعرفه و حضرتك حر تصدقنى أو لا
لا انت لازم توضح كلامك
اللى اعرفه ان فى تلاته دكاتره قبل منك حاولوا يعالجوها و اتأذوا
اتأذوا ازاى يعنى ؟؟
يعنى فيه اللى مات فى حادثه و اللى بيقولوا انتحر و التالت لحق نفسه بدرى و قدم استقالته
انت بتقول ايه ؟؟ يعنى مين اللى ممكن يكون بيعمل كدا ؟ و بيعمل كدا ليه ؟؟
انا معرفش و لو حتى اعرف فأنا مقدرش اقولك اكتر من كدا ...لو اتكلمت هتأذى سامحنى
مين هيأذيك يا شعبان ؟؟؟
مقدرش يا دكتور و الله ما اقدر اقول اكتر من كدا سلام عليكم
خد هنا يا شعبان رايح فين ؟؟؟
شعبان سابنى و انا محتار اكتر و اكتر مين دول اللى مش هيسبونى اعالجها ؟ اكيد دول اللى شفتهم فى التسجيل ؟ يا ترى دول شغالين لحساب مين ؟؟؟
انا لازم اكلم دكتور عبداللطيف و اشوف الموضوع ده ..
#دجيهان_عادل
يتبع
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
هايل جدا كده بقى ممكن اقولك ان مامتها هى السبب فى اللى بيعملوه فيهم وبتدفع فلوس للمستشفى علشان يدوها العلاج ده اللى بيعملها الحالة دى
ردحذفهايل جدا كده بقى ممكن اقولك ان مامتها هى السبب فى اللى بيعملوه فيهم وبتدفع فلوس للمستشفى علشان يدوها العلاج ده اللى بيعملها الحالة دى
ردحذفقصة مشوقه و غريبة تسلم إيدك يا مبدعة 🌹 🌹 🌹 🌹 🌹
ردحذفجميلة ومشوقة
ردحذف❤❤❤❤❤❤❤❤❤❤❤❤❤❤
كملي بقي مش قادره استني بليييييييييييز كملي
ردحذف