المشرحه ( كامله )

المشرحه ( القصة كامله )

جزء 1 

أنا سالم 29 سنه من قريه تابعه لمحافظة سوهاج قصتي بدأت لما دورت على شغل كتير و ملقتش غير عامل باليوميه يوم آه و عشره لا 

قررت أنزل مصر و ادور على رزقى خاصة أن لى ابن عم شغال هناك فى مستشفى .

و فعلا خدت خلاجاتى و شهادة الدبلوم بتاعتى و شهادة الجيش و باقى الأوراق الخاصه بى و رحت لبكر ابن عمى 

بكر رحب بى الصراحه أول ما شافنى ما احنا ولاد عم بردك 

سلامات يا بكر وحشتنا يا خوى 

سلامات يا سالم كيفك و كيف الجماعه فى البلد ؟؟ 

كلاتهم زينين و الحمد لله و أنا جاى عشان ادور على لقمة عيش هنا

و عايز تشتغل ايه يا واد عمى ؟ 

أيتها حاجه يا بكر مهتفرجش كتيير 

تمام هشوف لك معانا اى شغلانه و خلاص 

تانى يوم بكر نزل شغله و اخدنى معاه و سأل لى على شغلانه قالوا مفيش حاجه فاضيه دلوقتى إلا فى المشرحه 

لقيت بكر خارج زعلان و مدلدل ودانه و قالى مفيش يا ابن عمى إلا فى المشرحه 

قلت و مالها المشرحه ياخوى؟ ؟ هنخاف إياك ؟؟

بس يا واد عمى احنا بنسمع عنها حاجات عفشه و عفاريت و حاجات من دى 

ما عفريت إلا بنى آدم يا واد عمى اتكل على الله انى مبخافش 

خلاص يا واد عمى أنت حر بس مترجعش تدعى على 

هههههههه لا يا واد عمى أنا هدعيلك مهدعيش عليك 

روحت قدمت اوراقى و عرفت انى هبات كمان 

قلت نعمه من الله أهو منها شغلانه و منها بياته لحد ما ادبر امورى 

أول يوم لى كانت النبطشيه بالليل استلمت المفاتيح و دخلت غيرت خلجاتى و لبست لبس المستشفى و لقيت إللى بيدينى المفتاح بيبص لى و يبتسم ابتسامه مكر اكده و بيقولى أنت جديد هنا أول مره أشوفك 

قلت أيوه جديد جديد لانج كمان 😂

قال طيب يا بوى ربنا معاك و سابنى و مشي 

دخلت لقيت المشرحه حجرتين كبار زى الثلاجه و الميتين سلام قول من رب رحيم نايمين فى حاجه كدا زى الإدراج و و جثتين على سراير التشريح عرفت أن الدكتور هيجى يشرحهم

أول ما دخلت قلت السلام عليكم و قريت الفاتحة و قعدت على الكرسي و سندت رأسي عشان أغفل شويه فجأه سمعت صوت ضحكه عاليه فى ودانى 

فتحت عينى  و بصيت حوالى ملقتش اى حاجه قلت فى نفسي أكيد بحلم

رحت نايم تانى و المره دى طولت يجى عشر دقايق كدا و سمعت صوت صرخه خرمت ودانى 

قمت مفزوع المرة أدى و لقيت نفسي خارج جرى على بره 😲😲

قابلت الحارس حدا الباب خبطت فيه من كتر ما كنت بجرى بسرعه 

قالى مالك يا ابنى أهدى أهدى فيه ايه 

 فى حاجات غريبه جوه يا عم الحج 

لقيت الراجل ضحك اوى اوى و قالى هو انت لسه شوفت حاجه يا ولدى 😨😨

المشرحه 

جزء 2

 جريت على بره و خبطت فى الحارس و قالى أهدى يا ابنى أنت لسه شفت حاجه 

قلت له هو فى عفاريت زى ما سمعت 

قالى مش عفاريت يعنى هى أرواح و حكايات كتيره 

بكرا تاخد عليهم و ياخدوا عليك 

كل إللى بيجى كدا فى الأول بيبقا متاخد شويه بس بعد شويه خلاص بيتعود و مبيخافش 

تعالى تعالى يا ابنى أشرب لك كوبايه شاى معايا لغاية ما الدكتور يجى ،

 اسم الكريم ايه ؟؟؟قلت له سالم أبو معوض من سوهاج 

قالى احسن ناس و أنا عمك عبده 

قعدت أشرب مع عم عبده الشاى و أنا دماغى عماله تودى و تجيب يا ترى ايه الأصوات دى 

أنا مش خايف بس دى حاجه غريبه برده طول عمرى بسمع عن العفاريت بس أول مره اسمعهم بجد 

عم عبده قالى متفكرش كتير و سيبها على الله متخفش أهو الدكتور وسيم جه أهو قوم يا ابنى ادخل عشان متاخدلكش كلمتين ملهومش لازمه الدكتور ده مبيسكتش و لسانه طويل 

بصيت على الدكتور و هو بيركن عربيته راجل فى الأربعينات ملامحه جامده اصلع و لابس نضارة كعب كوبايه قصير و تخين و شايل فى ايده شنطه سودا 

دخلت قعدت جوه لقيته جاى بيقولى أنت العامل الجديد ؟؟؟ قلت له أيوه يا دكتور 

قالى اسمك ايه ؟ قلت له سالم 

طيب هات الشنطه و تعالى ورايا يا سالم

دخل الدكتور على سرير التشريح و لقيته لبس البالطو و الجوانتى و اخد منى الشنطه و فتحها و قالى هات الأدوات من الاوتوكلاف 

قلت له ايه لامؤاخذه يا دكتور ايه الاوتوكلاف ده 

الاوتوكلاف يا بنى آدم الجهاز اللى هناك ده 

حاضر حاضر يا دكتور 

جبت له الأدوات مشارط على حجات كدا غريبه اوى و لقيته كشف الجثه اللى قدامه 

الجثه كانت لشاب فى التلاتينات وشه أزرق اوى و لما الدكتور لاقانى مبلم اوى قدام الجثه قالى مالك يا ابنى أنت أول مره تشوف قتيل 

قلت له أيوه أيوه يا دكتور قتيل ... قتيل ازاى دا؟ 

دا التشريح المبدائي بيقول أنه ميت بسفكسيا الخنق 

- يعنى قصدك مخنوق يا دكتور ؟؟ 

- أيوه مخنوق و مخنوق بحبل كمان و بطل رغى شويه عشان اعرف أشوف شغلى 

وقفت ابص على الدكتور و هو بيشتغل و كل شويه يطلب منى حاجه و أنا حاسس انى هموت جسمي مقشعر و خايف اوى بس مش قادر اتكلم و لا كلمه 

الدكتور خلص شغله و قعد على المكتب و كتب التقرير 

كان الفجر شقشق و لقيته بيقول دكتور أسعد هيجى كمان شويه عشان يشرح الجثه التانيه 

أنا كتبت التقرير و هقدمه للنيابه يطلعوا تصريح الدفن عشان اهليه الميت يجوا يستلموه 

و أنا اهز دماغى من غير ما أنطق و جوه نفسي عمال أقول أنا ايه اللى وقعنى الوقعه السودا دى 

ياريتنى سمعت كلام بكر واد عمى 😰

الدكتور خلص و قالى لم الأدوات و حطها فى الاوتوكلاف عشان تتعقم عشان الدكتور أسعد يجى يلاقيها جاهزه و أنا ماشي دلوقتي 

مع السلامه يا دكتور 

آه يا حوستى السودا ياانى هتعمل ايه يا واد يا سالم هتكمل فى المخروبه دى و إلا هترجع فى كلامك و ترجع بلدك مدلدل ودانك؟ ؟؟

و الله منا عارف هعمل ايه أنا استنى الدكتور أسعد ده و أشوف هعمل ايه .

بعد ساعتين لاقيت دكتور صغير فى السن فى التلاتينات كدا دخل على وسيم و هادى الملامح مبتسم بعكس الدكتور وسيم صحانى من النوم و سألني عن اسمى و طلب الأدوات و لما لاقانى متاخد كدا قالى انت قلقان كدا ليه الناس اللى هنا دول مفيش منهم أى خوف الخوف من الأحياء مش من الأموات 

الناس اللى هنا ميتين بجرايم اللى مموتهم ناس احياء لسه على وش الأرض عايشين بياكلوا و يشربوا و لا اكنهم ازهقوا روح 

صدقنى الخوف مش من دول الخوف من الناس العايشه اللى معندهاش ضمير 

بص كدا دى شابه قتلها جوز أمها طمعا فى فلوس أمها لأنها وريثتها الوحيده و قال أنها انتحرت بس من المعاينه المبدئيه كدا البنت منتحرتش 

قلت و عرفت منين يا دكتور ؟ 

قالى بص تحت ضوافرها كدا هتلاقى أجزاء من جلده و كمان الردود و الكدمات اللى على جسمها بتقول أنها اتعرضت لمعركه قبل ما تتخنق 

ايه دا يا دكتور دا الجثه التانيه دى كمان مخنوقه الدكتور وسيم قالى كدا 

شفت بقا يا عم سالم مش بقولك النفس الانسانيه دى خطيره الخوف من الأحياء مش الأموات 

كلام الدكتور أسعد طمنى شويه و لقيته دكتور عسل كدا و بياخد و يدى معايا فى الكلام كدا و بصراحه كلامه عن الحوادث و أسبابها خلانى عندى فضول اعرف حكايه كل جثه موجوده فى المشرحه 

أنا خلاص هقعد بس ... اللى بسمعه بالليل . ااه عم عبده قالى بكرا تتعود عليهم و يتعودوا عليك و الدكتور أسعد قالى مفيش خوف منهم خلاص أنا هقعد و اجرب ليله كمان و أشوف هيحصل ايه .

يتبع ....

المشرحه 

الجزء 3

 الدكتور أسعد خلص و كتب التقرير و أنا لميت الادوات و حطتهم فى الجهاز و ريحت شويه جنب الجثث لقيت اهليه القتيل إللى شرحه الدكتور وسيم جايين يستلموه بعد ما اخدوا تصريح من النيابه 

و لقيت ست كبيره فى الغالب أمه عماله تعيط و تولول  و تقول بأنى وحيدى قتلوك الكفره قتلوك و حرقوا قلبى اااااه يا ابنى مليش من بعدك عيش يا حبيبي و حواليها شويه ستات عمالين يهدوا فيها و يعيطوا معاها 

الفضول اخدنى انى اعرف قصة الشاب دا فسألت واحد من قرايبه طلع ابن خالته 

- هو ايه حكايه الجدع ده 

- دا ابن خالتى عزت أدب و أخلاق و شغال سواق على عربيه نص نقل جه واحد ابن حرام قاله عايزك فى نقله و طلع معاه عزت اتاريه مدبر له مصيبه و خدوه فى حته مقطوعه و خنقوه بحبل عشان يسرقوا عربيته 

و خالتى دى ملهاش غيره معندهاش و لا بنات و لا ولاد اشتغلت عليه بعد أبوه ما مات و هو لما كبر بقى بيشتغل و يصرف عليها ربنا يصبر قلبها بقا 

الست من كتر الصويت وقعت من طولها و صعبت على اوى جريت جبت لها كوبايه ميه و فوقناها 

الناس خدوا امانتهم و مشيوا و لقيت نفسي واقف زعلان اوى الدنيا دى مش مستاهله أن حد يعمل كدا فى حد عشان حته عربيه 

أما البنت اللى قتلها جوز أمها فاستلمها ناس من أهل أبوها 

قعدت لوحدى بعد ما الناس مشيوا و لقيت نفسي من كتر التعب روحت فى النوم لقيت بنت جايلى فى منامى و بتقولى ساعدنى و كأنها حقيقه قدام عنيا

قمت فتحت عنيا و أنا مش عارف أنا بحلم و إلا حقيقه 

جالى فضول انى أفتح الإدراج اللى محطوط فيها الجثث و فعلا قمت و فتحتها و أنا بقرأ الفاتحة و ايه الكرسي 

فتحت درج و اتنين و لما فتحت الدرج التالت جالى ذهول 😨😨😨

ايه دا البنت اللى شفتها فى منامى اهى بسم الله الرحمن الرحيم دى مكتوب عليها مجهوله 

يا ترى بقالها أد ايه هنا بس شكلها متعور اوى شكلها حادثه يا خبر طيب اتصرف ازاى دلوقتى و اساعدها ازاى 😪😪

أيوه أنا عرفت ازاى

أنا هروح اسأل البنت دى جت فى اى حادثه و اصورها و أروح اسأل عليها 

رحت سألت فى الإستقبال الحاله دى جايه منين و كانت رايحه فين ؟

قالى كانت جايه من قريه اسمها العمار تبع القليوبيه و كانت العربيه رايحه القاهره و لما عملت الحادثه لم يستدلوا عليها و لا على اهليتها عشان مكانش معاها اى أوراق 

قلت تمام أنا بقى انزل العمار دى و اسأل يمكن أوصل لشئ و فعلا تانى يوم الصبح استاذنت نص يوم و سألت اوصل للعمار دى ازاى و ركبت لحته اسمها القناطر و من القناطر أخدت عربيه للعمار 

نزلت العمار و أنا مش عارف ابدء منين خصوصا انى عرفت قبل ما امشي أن البنت دى بقالها أسبوعين محدش سأل عليها و أنهم هيدفنوها فى ترب الصدقه بكرا فبقيت بسابق الزمن عشان اوصل لأهلها 

أول  ما نزلت لاقيت زاويه كدا الناس بتصلى فيها رحت عليها و سألت شيخ عجوز قاعد يقرأ قرآن 

السلام عليكم يا حاج 

- و عليكم السلام يا ابنى اتفضل 

- و الله يا حاج كنت عايز اسأل عن اهل بنت متغيبه بقالها أسبوعين و تقريبا من عندكم هنا 

- بنت أد ايه يا ابنى ؟؟ 

-بنت شابه حوالى 20 سنه كدا استنى معايا صورتها 

ووريته الصوره الراجل شهق و قال سماح 

لا إله إلا الله هى فين يا ابنى لا إله إلا الله 

قلت له هى فى المشرحه كانت جايه فى حادثه و معرفوش اهلها و عايزين يدفنوها بكرا فى مدافن الصدقه 

- لا حول و لا قوى إلا بالله دا اهلها دايخين عليها قوم معايا اوديك لهم 

و فعلا قمت و روحت لأهل  سماح و عرفوا بنتهم و جم معايا علشان يستلموها ووسط دموعهم شكرونى و لقيت أبوها بيقولى كتر خيرك يا ابنى أنت عملت فى جميله عمرى ما هنسهالك ابدا 

الحمد لله انى قدرت اساعدها و اوصلها باهلها بدل ما كانوا عاشوا طول عمرهم محتارين راحت فين 

يتبع .....😊

المشرحه 

الجزء الرابع و الأخير 

مرت الأيام و كل يوم أشوف حاجات و لا كنت اتخيلها فى حياتى 

كمان اتعلمت تغسيل الميتين علشان فى ناس بنغسلها و نكفنها 

أبشع حاجات شفتها هى الحوادث لأن ساعات بيجى ناس بتبقى عباره عن اشلاء بس 

كمان حوادث الحرايق ربنا يرحمنا يا رب بتبقى صعبه اوى 

امبارح كنت قاعد لقيتهم جايبن لى صره ملفوف فيها حته لحمه كدا 

قلت لهم أي دى 

قالوا فى أم معدومه الضمير اظاهر غلطت مع حد و رمت ضناها للكلاب فى الزراعات و الكلاب أكلته مبقاش منه غير الحته دى😢

الحكايه دى أثرت فى اوى و قعدت اعيط ازاى هان عليها ضناها تعمل فيه كدا و الحته إللى كانت باقيه منه كان شكلها صعب اوى 😢😢

أنا تعبت اوى مش قادر استحمل كل دا 

أنا نفسيتى تعبت اوى ... هروح اقعد مع بكر شويه 

رحت قعدت شويه مع بكر ابن عمى و سالنى عامل ايه فى الشغلانه الجديده 

حكيت له كل حاجه و قلت له نفسيتى تعبت من اللى بشوفه 

قالى أمال أنا اعمل ايه ؟ طب انت اللى بتشوفهم بيبقوا ماتوا و خلاص مبيتكلموش أمال أنا بقا بشوف بلاوى و ناس بتجعر من كتر الألم و بيبقوا صعبانين على و مش قادر اعملهم حاجه اللى جاى فى حادثه و اللى ابنه واقع من الدور الرابع و اللى محروقة حروق من الدرجه التالتة و اللى و اللى ..... يااا دى بلاوى و اللى يشوف بلاوى الناس تهون عليه بلوته 

و الله يا سالم أنا بحمد ربنا كل يوم ألف مره لما بشوف الحاجات دى احنا فى نعمه مش حاسين بيها 

- الحمد لله على كل حال بس أنا خلاص معنتش قادر استحمل يا بكر 

- بكرا تتعود يا سالم أنا كنت كدا فى الأول و بعدين اتعودت خلاص 

- لا بس أنا بشوف الناس و هى ميته خلاص مبقاش لها حول و لا قوه بشيل فيهم و اغسلهم و مفيش حد فيهم بيقدر يرفع ايد و لا رجل . بحس أد ايه الإنسان دا ضعيف مفيهوش غير لسان 

لو الناس تشوف اللى بشوفه كانت اتعظت مكنش أخ أكل ورث أخوه و مكنش حد طمع فى التانى أو قتله عشان شويه فلوس 

الناس فعلا فى غفله كبيره و مش حاسين أن العمر قصير اوى . عمالين يجروا و ملهيين و ناسيين أن فى آخره و فى حساب و فى ربنا مراقبهم و مطلع على كل اللى بيعملوه 

أنا خلاص يا بكر مش قادر اشتغل الشغله دى أنا حاسس انى داخل على اكتئاب شديد أنا هرجع البلد اشتغل أى شغلانه و خلاص 

- طب فكر تانى يا سالم الشغلانه كويسه و انت متثبت فيها يعنى مش أى حد يوصل للى انت فيه 

- اللى أنا فيه ؟؟ منا قلت لك الدنيا مش مستاهله خلاص و معدش يفرق معايا و لا الوظيفه و لا الفلوس 

- امال هتعيش ازاى ؟؟ 

هشتغل أى حاجه أكل منها عيش و خلاص لغايه ما ربنا ياخد وديعته 

- انت كدا قلقتنى عليك يا سالم 

- لا متقلقش بالعكس الحمد لله انى شفت اللى شفته دا عشان اتعظ و اداوم على صلواتى.  ربنا بيحبنى 

أنا اللى شفته فى الشهر اللى اشتغلته دا مشفتوش فى حياتى كلها 

مع السلامه يا واد عمى أنا هروح اخد خلجاتى و أروح على أول قطر على الصعيد 

- مع السلامه يا سالم سلم لى على الجماعه كلاتهم 

- الله يسلمك يا خوى.  يوصل أن شاء الله . 

تمت 😊

إذا عجبتكم القصه أرجو الترحم على روح والدى و سائر أموات المسلمين 

#دجيهان_عادل

Drgehan Adel

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ...

 ‏