عنبر خمسه الجزء الرابع عشر

#عنبر_خمسه

#الجزء_الرابع_عشر

غلط يا دكتور غلط ...كدا هيشكوا فيك اكتر ..انت لازم تتصرف طبيعى جدا و تيجى شغلك و لما يسألوك تقول مشوفتش حاجه 

عندك حق يا شعبان ...خلاص خد العنوان عندك ......

و اديت لشعبان العنوان و مفيش ربع ساعه كان تحت البيت 

اخدنا ساره و رحنا شقة ابن عمه اللى قالى عليها 

اول ما دخلنا الشقه شقه فخمه اوى متصدقش أن شعبان له قريب عنده شقه زى دى 

ايه رايك يا دكتور فى الشقه ؟؟

حلوه اوى يا شعبان و شكل قريبك ده مكلفها اوى 

طبعا ابن عمى دا بقاله عشرين سنه فى الخليج و الشقه دى شقه واحده من شقق كتير عنده

ما شاء الله ربنا يزيده 

طيب المفتاح اهو هتعوز منى اى حاجه تانيه ؟؟؟

لا متشكر يا شعبان كتر خيرك 

لو عاوز اجيب لكم اكل و الا حاجه ؟؟

لا متشكر اوى لو عايز هنزل اجيب 

تمام ..استأذن انا بقا

وقف شعبان يهرش فى دماغه و فهمت طبعا أنه عاوز فلوس 

بقولك خد دول يا شعبان 

ايه دول يا دكتور ؟؟ دول كتير اوى 

و لا كتير و لا حاجه ...

من يد ما نعدمها يا دكتور... سلام عليكم

وعليكم السلام

ساره دا كله كانت قاعده على كرسي فى الصاله ضامه رجليها و اديها و باصه فى الارض 

بعد ما مشى شعبان قلت لساره تعالى يا ساره ادخلى الاوضه دى عشان ترتاحى شويه 

ساره هزت دماغها بالموافقه

و قبل ما تدخل أديت لها شويه ادويه تساعدها انها تنام بشكل كويس 

أما أنا قعدت فى البلكونه اللى كانت بتبص على مساحه خضرا كبيره و المنظر من الدور الرابع جميل اوى 

قعدت أحلل كلام ساره عن والدتها و زوجها و استنتجت حاجات كتير اوى بس برده الحكم النهائى بعد ما ساره تكملى حكايتها 

و انا بفكر برده حطيت احتمال و لو واحد فى الميه أن ساره كان بيتهيألها الكلام ده او ممكن تكون بتكدب عليا 

لازم انا كدكتور اكون محايد قدام الحاله اللى بعالجها و احط قدامى جميع الاحتمالات الممكنة و الغير ممكنه .

دخلت على الفجر نمت على الكنبه اللى على الصاله و صحيت على الضهر على تليفون من شعبان بيطمن علينا و هل مرتاحين فى شقة ابن عمه و الا لا 

مرتاحين يا شعبان الحمد لله و متشكر مره تانيه 

لا متشكر ايه بس ؟ لا شكر على واجب و انا فى الخدمه 

قمت من النوم اتطمنت أن ساره لسه نايمه نزلت جرى جبت اكل و شاى و نسكافيه و شوية حاجات كدا 

رجعت لقيت ساره قامت و قاعده فى الصاله 

صباح الخير يا ساتو

صباح النور يا دكتور 

نمتى كويس ؟؟

الحمد لله 

طب يلا عشان تفطرى و نكمل كلامنا 

خلصنا فطار و ابتديت اعمل جلسه تنويم مغناطيسي تانيه لساره 

احنا وقفنا لحد ما اتجوزتى سامر و سافرتى معاه افريقيا 

ايوه ....سامر زى ما قلت لك كان راجل اعمال و كان لشركته فروع كتير فى دول كتير مش افريقيا بس ...لكن الشركه الام كانت هناك 

طبعا هو كان بيبقى مشغول على طول تقريبا مكنتش بشوفه الا عند النوم 

المفروض انى كنت متفقه معاه أننا هنقضى شهر و هنرجع لكن ظهرت قدامه مشكله فى شغله فى الشركه هناك تطلبت أنه يفضل وقت اطول 

طبعا دا اللى كان مفهمهولى بس اكتشفت بعد كدا انه اتعرف على واحده و هى دى السبب اللى خلاه قعد هناك الوقت دا كله

طبعا انا فى الوقت اللى كان مشغول فيه حاولت اشغل نفسي فى اى حاجه مفيده ..حاجه تحسسنى انى انسانه اتمتع بالإنسانية 

اتعرفت هناك على فريق هدفه مساعده القبائل و الاسر المحتاجة 

مش عاوزه اقولك أن دى اكتر فتره فى حياتى كنت سعيده فيها و فرحانه 

كنت لما اقدم مساعده لطفل و لو بأكل بسيط كنت اشوف الفرحه اللى عمرى ما شفتها فى حياتى 

الاطفال كانوا بيحبونى اوى وكانوا بينادوا عليا ب ( مام ساتو )

لما عرفت أن جوزى على علاقه مع الست اللى قلت لك عليها نفسيتى تعبت اوى و واجهته و انا ثايره جدا 

ازاى تيجى على كرامتى بالشكل ده ؟؟ ازاى تعرف غيري و احنا مكملناش شهور مع بعض 

طبعا فى الاول اعتذر لى و قالى انها مجرد صديقه و أنه بيحبنى و ميقدرش يخونى 

بس انا كنت عارفه أنه خاين بدليل اللى عمله مع والدى ...بس غرورى هيألى انى لما اكون معاه عمره ما هيبص لغيري ابدا 

بس كنت غلطانه اوى ...اللى اكتشفته بعد كدا انه متعدد العلاقات يعنى مبيكتفيش بواحده فى حياته ..ممكن يكون بيكلم اكتر من واحده فى نفس الوقت .

حاولت أركز فى شغلى و اسقطه من حساباتى بس أخباره القذره كانت بتجيلى اول بأول و كنت اتكسف جدا و احس بالخزى من نظرات الناس ليا 

لحد ما فى يوم حصله فضيحه وواحد عرف أنه ماشي مع مراته ...طبعا ساعتها الدنيا قامت مقعدتش و اضطر أنه يهرب أو ينفد بجلده لأن الراجل كان مصمم أنه يقتله .

طيب و ايه اللى خلاكى تفضلى على ذمته بعد كل اللى بتحكيه ده ؟؟ ليه مرجعتيش لبيت اهلك و اخدتى قرار انك تنفصلى عنه 

انا فعلا كنت واخده قرار بكدا بس فكرت مره تانيه و قلت لو رجعت و اتطلقت مش بعيد يرجع يلف حوالين والدتى مره تانيه و خصوصا انى عرفته على حقيقته و عرفت أنه ميعرفش يعنى ايه حرام و حلال 

لما بابا و ماما جم يسلموا علينا شفت فى عينه نظره لماما انا عارفاها كويس اوى 

استنى لحظه ...انتى اللى رحتى لوالدك تسلمى عليه و الا هما اللى جم عندك ؟؟

هما اللى جم بعد يوم من وصولنا مصر 

تمام ...كملى 

بعدها زيارات ماما كترت اوى ليا و انا مكنتش حابه الوضع ده خالص 

حاولت انى اكون كويسه مع جوزى عشان ميفكرش فى امى مره تانيه بس لقيتهم الاتنين بيتهمونى بحاجات انا مبعملهاش 

فى الاول اتلخبطت اوى و شكيت فى نفسي بس بعد كدا ابتديت اخد بالى كويس 

حاجات زى ايه ؟؟

يعنى مثلا الاقيه بيصحينى فى عز النوم و بيقولى اصحى انتى بتصوتى 

بس انا بكون نايمه بشكل عادى جدا و مش حاسه انى بصوت 

مسك لى الموضوع ده و بقى يشتكى انى يوميا مبنيموش من كتر صريخى 

طب ازاى و انا مبحسش بأى حاجه من اللى بيقولها دى 

قلت اكيد هو بيتلكك و عاوز يروح ينام فى اوضه تانيه عشان يكلم اللى هو عاوزه 

بس ابتدى يعمل حاجات تانيه زى انى الاقيه داخل عليا و بيقولى يلا يا ساره ملبستيش ليه ؟؟

البس ليه ؟؟ 

الله..انتى نسيتى انى عازمك على العشا و متفق معاكى أنى هفوت عليكى الساعه ٨ بالليل 

انا معرفش اى حاجه من اللى بتتكلم عليها دى

انتى يا ساره من يوم ما رجعنا و انتى مش طبيعيه خالص 

انا ؟؟؟ بس انا مش فاكره اى حاجه من اللى بتقوله ده 

اتكررت المواقف دى كتير و بقى يتفنن أنه يجننى و لقيت ماما بتقولى أن جوزى بيشتكى منى و انها عاوزه تساعدنى

يا ماما انا مش مجنونه 

يا بنتى هو اللى يروح لدكتور نفسي يكون مجنون ... منا اهو ابوكى ودانى لدكتور عبداللطيف و بقيت زى الفل ...ايه رايك اخدك له يشوف ايه سبب الحاله اللى انتى فيها دى 

 بس انا مبشتكيش من اى حاجه يا ماما

خلاص خلى الدكتور هو اللى يقرر و يقول الكلام ده بنفسه 

و طاوعت امى و رحت معاها للدكتور عبداللطيف الراجل كان هادى و مبتسم اوى و بقا يعاملنى معامله لطيفه جدا و ادانى علاج 

كنت اخد العلاج اروح فى دنيا غير الدنيا ..كنت انام باليومين و التلاته ...تركيزى قل جدا و بقيت ضايعه تماما 

قررت انى ابطل العلاج من نفسي و من غير ما اقول لحد و فعلا عملت كدا و لقيت نفسي ابتديت افوق و ارجع لوعيى مره تانيه 

اكتشفت فى الفتره دى انى حامل 

فرحت اوى انى اخيرا ربنا هيعوض عليا و هكون عندى بنت او ولد يسلونى و يملوا عليا دنيتى لانى طول عمرى عايشه وحيده 

نفسيتى ابتدت تتحسن اوى و قلت لوالدى ووالدتى انى حامل 

و قلت لجوزى اللى بالمناسبه مفرحش خالص و لا ظهر عليه اى ملمح للفرحه 

بس انا مهمنيش انا كان كل اللى يهمنى ابنى أو بنتى اللى فى بطنى

ابتديت اخد بالى من نفسي و من اكلى و علاجى .. و فجأه لقيته اهتم اوى على غير عادته و بقا يدينى الدوا بايده

لحد ما فى ليله قمت على الم شديد ... حسيت أن بطنى بتتقطع و لقيت الدم مغرق السرير اللى كنت نايمه عليه

سامر اخدنى المستشفى بسرعه كشفوا عليا و لقيت الدكتور بيقول للمرضه

حاله اجهاض و نزيف جهزى اوضة العمليات بسرعه 😔

#دجيهان_عادل

يتبع

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ...