خيانه ( كامله )

قصه خيانه ( كامله )

خيانه 

الجزء1

أنا نجوى 32 سنه معايا بكالوريوس تربيه قسم تاريخ بس للاسف مبشتغلش لأنى خلصت من هنا و اتجوزت رأفت و خلفت منه تلات بنات زى الشربات 

اتجوزت أنا و رأفت جواز صالونات زى ما بيقولوا يعنى مكنتش اعرفه جه عن طريق واحده صاحبه ماما فى الشغل كانت جايه تبارك لى على النجاح فى البكالوريوس 

ألف مبروك يا نجوى 

- الله يبارك فيكى يا طنط 

- ما شاء الله كبرتى يا نجوى و بقيتى عروسه بقالى كتير مشوفتكيش 

- ربنا يخليكى يا طنط دا من ذوقك بس 

- و لقتها بتقول لماما لا لا يا سميه ازاى كنتى مخبيه علينا القمر دا . عريسها عندى شاب زى الفل بيشتغل محاسب فى شركه محترمه وعنده 30 سنه

ردت ماما و دا تعرفيه منين يا ماجده ؟؟؟

قالت لها دا ابن أختى رأفت أدب و كمال و أخلاق عاليه 

أنا بقا اتحرجت من الكلام و قمت دخلت اوضتى 

تانى يوم لقينا طنط ماجده بتتصل و بتقول أنها عايزه تجيب العريس و أمه يقعدوا معانا شويه نشوف بعض 

و استاذنتها أنهم هيجوا يوم الجمعه 

أمى قفلت معاها السكه و ندت على ابويا و قالت له و قعدت توصفله العريس على وصف طنط ماجده له و كان مرسوم على وشها فرحه كبيره 

ابويا قالها طيب تمام لما يجى و نشوفه ربنا يسهل 

يوم الجمعه جه و كنا محضرين جاتوه و حلويات و حاجات ساقعه و كان ميعادهم بعد المغرب 

بعد أذان المغرب بشويه لقينا جرس الباب بيرن  أمى فتحت و لقت طنط ماجده و أختها و ابنها رأفت 😍

شاب وسيم طويل شعره اسود له دقن خفيفه متحدده عنيه عسليه ابيضانى و ماسك فى ايده بوكيه ورد و علبه شيكولاته شكلها تحفه .

قعدوا و أنا دخلت الجاتوه و الحاجه الساقعه و بابا قالى اقعدى يا نجوى قعدت و بقيت الاحظه و هو بيتكلم مع بابا . و بابا عمال يسأله عن شغله و هو يجاوب بطلاقه 👌👌

و كل ما عينى تيجى على حماتى الاقيها بصالى و مبتسمه اوى 

بعد شويه طنط ماجده قالت لماما عايزين العرسان يتكلموا مع بعض شويه خليهم يقعدوا فى البلكونة يتكلموا شويه 

فماما قالت لها و ماله قوموا اقعدوا فى البلكونه 

كنت مكسوفة اوى منه و من بابا😄 . و قمت لقيته هو كمان محرج و مش عارف يتكلم و أنا كمان كنت ساكته 

و بعدين لقيته بيسالنى عن دراستى و كنت فى جامعه ايه و أنه كان بيجى لصحابه فى كليه التربيه و أنه كان بيقعد تحت مبنى التاريخ دا كتير و قعد يتكلم و لقيت دمه خفيف اوى و صراحه ارتحت له جدا و كمان كان واضح من كلامه أنه شاب طموح اوى و دا عجبنى جدا 

الزيارة انتهت و أمى قالت لطنط ماجده هنعمل استخاره و انتوا كمان تعملوا استخاره و أن شاء الله خير 

رأفت سلم على بابا و ماما و جه يسلم على لمحت فى عينه الاعجاب و قالى مع السلامه يا انسه نجوى قلت الله يسلمك يا استاذ رأفت 

مشيوا ولقيت الانطباع عند بابا و ماما كويس و أنا كمان كنت طايره من الفرحه و حاسه أنه أخيرا لقيت الإنسان إللى طول عمرى بحلم ليه💖😍 . 

بعد يومين لقيت طنط ماجده بتتصل تسأل عن رأينا و ماما قالت لها أن احنا موافقين و اتفقوا سوا يجوا تانى علشان يتفقوا مع بابا على كل تفاصيل الجواز 💑

عايزين تعرفوا حصل ايه بعد كدا تابعونى. ..

يتبع ..........😊gg

خيانه 

جزء 2 

رأفت ووالدته و طنط ماجده جم و اتفقوا على كل حاجه و اتفقوا مع بابا أن الخطوبه مدتها ست شهور 

عرفت فيها رأفت و كنت كل يوم بحبه أكتر من اليوم إللى قبله كنت بحسد نفسي عليه رأفت شخص هادى رزين مثقف اوى دمه خفيف كريم جدا يعنى فيه الصفات اللى كل بنت تتمناها 

عدت الست شهور جهزنا خلالهم شقتنا و كملت باقى جهازى و اتعمل لى فرح و لا ألف ليله و ليله 

شقتى كانت كبيره و مريحه اوى هواها بحرى أى حد يتمنى يسكن فيها 

يوم جوازنا كان أروع يوم فى حياتى زوجى حبيبي قالى انتى هديه ربنا لى و لو لفيت الدنيا مش هلاقى فى جمالك و ادبك و رشاقتك 

بقيت بسمع الكلام منه و أنا مش مصدقه نفسي معقوله كل السعاده دى 

مرت الأيام و خلفت بنتى الأولى ساندي و كنا كلنا فرحانين بيها اوى انشغلت معاها جدا و بقت هى محور حياتى .

كنت ساعات بشوف فى عين رأفت نظره كدا معناها انتى معنتيش بتاخدى بالك منى و ساعات كان بيقولها بهزار و كنت اضحك و اقوله ما هو بنتك اللى وخدانى منك 

مرت الأيام و لقيت نفسي حملت فى بنتى التانية هنا و كنت تعبانه اوى فى الحمل دا و بقيت اقضى فترات طويله من حملى عند والدتى علشان تخدمنى و كنت بحس انى مقصرة فى حق رأفت بس برده كنت بقول لنفسي أن السبب فى تعبى بنته 

طبعا بعد ما ولدت هنا الدنيا باظت اوى بقيت تقريبا مبنامش هنا مصحيانى طول الليل و ساندى مغلبانى طول النهار . أما جوزى فكان مركز فى شغله اوى و بقى يترقى فى مجاله لغايه ما فتح مكتب محاسبه كبير و على مستوى و عين فيه محاسبين و محاسبات 

هنا مكملتش السنه و لقيت نفسي حملت للمره التالته و للأسف مكنتش عامله حسابى على الحمل ده بقيت اعيط هعمل ايه دا البنتين مجننى 

طول فتره الحمل المره دى كنت قاعده عند والدتى علشان تاخد بالها منى و من بناتى و طبعا رأفت كان بيجيلى كل أسبوع مره يبات معانا و باقى الأسبوع عند والدته. 

ولدت بنتى التالته سهيله و رجعت بيتى مع بناتى التلاتة 

تخيلوا حجم المعاناه تلات أطفال خمس سنين و سنتين و طفله عمر شهر .

بقيت أشد فى شعرى منهم بقيت منامش الليل بيتى اللى كان على طول مترتب بقا ميشوفش الترتيب 

حياتى كلها اتلخبطت و رأفت بقا يجى على النوم و بقى ينام فى اوضه تانيه علشان زن العيال و معدش حتى بيعاتبنى و لا يهزر معايا زى الأول 

مرت سنتين ساندى دخلت المدرسه و هنا دخلت الحضانة و ظبطت نفسي شويه بقيت اجيب واحده تساعدنى فى تنضيف البيت و بقى عندى وقت أطول اعتنى بنفسي اينعم أنا فقدت رشاقتى و بقى عندى كرش من القيصريات اللى عملتها لكن برده أنا حلوه و جوزى بيحبنى 

دا اللى كنت بقوله لنفسي أو بمعنى اصح بضحك بيه على نفسي 😢

لاحظت أن رأفت بعد عنى اوى اوى بقى حد عايش معانا زى اللى ساكن فى بنسيون مفيش ما بنا حوار إلا عن الفلوس و بس 

دايما تليفونه صامت و دايما فى ايده مبيفارقهاش و عامل باس وورد للتليفون دا كله خلانى أشك فيه 

و يوم عن يوم الشك بقا يكبر فى قلبى لغايه ما فى يوم هنا بنتى طلبت منه تلعب على موبايله و هو قاعد جنبها طبعا و فجأه جرس الباب رن و لقى ابن عمه جاى يزوره و ابن عمه دا لسه جاى من إيطاليا 

طبعا اتلهى فيه و نسي حكايه الموبايل و أنا لقتها فرصه انى اخد الموبايل من هنا و ادور فيه 

أول ما فتحته و يا ريتنى ما فتحته شفت .......

عايزين تعرفوا شفت ايه 😨 تابعونى

يتبع ........😊gg

خيانه 

جزء 3

فتحت الموبايل و دخلت أولا على الرسايل لقيت الرسايل ممسوحه قعدت أبحث بكلمه بحبك الاقى يظهر لى محادثات كتير اوى ممسوحه بحثت و لاقيت كلام قذر بينه و بين ستات كتير بس لاحظت أنه فى الفتره الاخيره فى ست واحده متكرر معاها الكلام كتير 

دخلت على الواتس و لقيت رقم دايما بيبعت له و كاتبه باسم ويجا أخدت الرقم بسرعه 

دخلت على سجل جوجل و ابتديت أشوف هو باحث عن ايه لقيته فاتح مواقع إباحية و صور مخله بقيت اتفرج على الكلام ده و أنا مش مصدقه نفسي بقا دا جوزى المحترم اللى مبيسبش فرض بقا دا إللى كنت بقول مفيش زيه ؟؟ بقا دا اللى كنت بحسد نفسي عليه كل  دا مر فى دماغى و أنا واقفه فى المطبخ مذهوله مفقتش إلا على صوت ساندي بنتى جايه بتقولى بابى بيقولك فين الشاى 

قولت لها حاضر حاضر يا ساندي 

دخلت الشاى و سلمت على مجدى و أنا دماغى مش فى و حطيت موبايل جوزى على الطرابيزه و استأذنت منهم انى عندى صداع جامد و دخلت اوضتى 

اترميت على سريرى و قعدت اعيط ليه كدا  ؟ عمل فى ليه كدا؟  يعنى كان بيضحك على دا كله يعنى هو مبيحبنيش يعنى يعنى ........؟؟؟؟؟؟؟؟؟؟؟؟؟؟

أنا هتجنن أنا لازم أول ما مجدى يمشي اواجهه و اقوله ليه عمل كدا معايا 

لا أنا هطلع اناديه أنا مش قادره استنى 

لا بس كدا هفضح نفسي .... انا مشوشه اوى و مش عارفه أفكر خالص 

فجأه جرس تليفونى رن ببص فيه لقيت رقم غريب قلت مين دا ؟؟ أنا مش هرد انا مش ناقصه انا فى اللى مكفينى . التليفون بطل رن و لقيته بيرن تانى يووووووو مين الرخم اللى عمال يرن ده 

رديت برخامه ألو 

ألو أيوه يا وحشه 😂

مين معايا ؟؟؟

ايوا طبعا عندك حق متعرفيش صوتى ما انتى بقالك كتير مكلمتنيش من لقى أحبابه نسي صحابه بقا

انتى مى صح ؟

ايوا مى يا وحشه انا قابلت طنط فى الشارع انهارده و أخدت رقمك منها انتى وحشتينى اوى يا نجوى . ايه يا بنتى هما اللى بيتجوزوا بينسوا اصحابهم كدا  

معلش يا مى الجواز و العيال شغلونى اوى . و انتى عامله ايه دلوقتى و اتجوزتى و إلا ايه و بتشتغلى 

قالت لى حيلك حيلك انتى عايزه تعرفى كل ده فى التليفون انا عاوزه أشوفك يا بنتى انتى وحشانى موت 

قلت لها و انتى و الله يا مى احنا عشره أربع سنين كليه .طيب ايه رأيك اديكى العنوان و تيجى تقعدى معايا بكرا شويه .

قالت اجى فين يا بنتى احنا نروح نتقابل فى النادى و نفسح العيال انا عرفت من مامتك أنك معاكى تلات بنات قمر و أنا عاوزه اشوفهم 

قلت لها ماشي هجيلك بكرا على الساعه خمسه كدا 

قفلت مع مى و أنا عماله أفكر هعمل ايه مع رأفت 

و فى الآخر هدانى تفكيرى انى اتصل بالرقم اللى اخدته من تليفونه و اتصلت فعلا لقيت واحده صوتها مايع اوى بتقول الوووووو 

طبعا سمعت الصوت و بلمت وقفلت السكه و قعدت اعيط

سمعت مجدى بيستاذن و ماشي و لقيت رأفت داخل ينام  فى الاوضه التانيه و هو صامت كعادته طبعا 

دخلت عليه و فتحت النور بص لى كدا و قال اقفلى النور عشان أنام عندى شغل الصبح 

قلت له مين ويجا يا رأفت ؟؟؟ لقيته قام اتنطر و قعد و قالى ويجا انتى عرفتى الاسم دا منين ؟

قلت له عرفته موبايلك و عرفت حاجات كتير اوى عمرى ما كنت اصدق أنك تعملها 

رد على بعصبيه يعنى انتى عايزه ايه دلوقتى ؟؟

قلت انا عاوزه اعرف ليه عملت كدا 

عاوزه تعرفى ؟ هقولك بس متزعليش بقا 

و قام راح واقف و شد أيدى جامد و جابنى قدام المرايا و قالى بصى كدا لشكلك بصى هو دا منظر واحده ست انتى بتعملى ايه فى الحياه ؟ انتى لازمتك ايه فى حياتى اصلا ؟ 

بقيت بسمع الكلام كأنه كرابيج نازله على جسمى 

صرخت فى وشه و قلت اللى انا فيه دا من ولادك جسمى اللى باظ و بطنى اللى اتفتحت دى علشان اجيب لك ولاد تفرح بيهم 

بهدلتى و سهرى الليالى معاهم و شكلى اللى مش عاجبك ده علشان أكون لك اسره يتمناها أى حد 

لقيته صقف بهستريه و قالى برافوو عليكى و المطلوب منى ايه دلوقتى ؟؟

قلت له من ويجا 

قالى مراتى خلاص استريحتى مراتى ست عارفه يعنى ايه ست 

أنا سمعت الكلمه و قعدت اعيط بهستريا و قلت له طلقنى طلقنى يا رأفت 

يتبع .............😊gg

خيانه ٤_٥_٦_٧

الجزء 4 

قلت له طلقنى يا رأفت 

راح ضاحك ضحكه عاليه اوى و قالى انتى بتحلمى بقا 

اطلقك ليه فهمينى كدا انتى اخترتى تكونى أم و بس خلاص شيلى بقا للآخر خليكى أم و خلاص زعلانه اوى منى انى دورت على غيرك ما انتى إللى لغيتى وجودى من حياتك خلاص مترجعيش تزعلى بقا . طلاق مش هطلق مش عشان خاطرك انتى لا عشان خاطر بناتى متتبهدلش 

بصيت له و لقيت نفسي معرفش الشخص ده . مين دا ؟؟ بيتكلم كدا ازاى  ؟؟؟ و الله ما عرفت أرد حسيت أن تفكيرى اتشل. 😩

خرجت من الأوضة و رحت اوضتى قعدت على سريري و مر شريط حياتى قدام عينى و كل التعب اللى تعبته فى حمل وولاده و تربيه و كل دا يتقابل بالجحود دا 

معرفش ايه خلانى أفكر أن أكيد هو مخبى على حاجات تانيه كتير و أنا من شغلتى مع البنات مكنتش بدور وراه 

لقيت نفسي قمت و رحت على اوضه المكتب  و دخلت ادور زى المجنونه على أى حاجه أنا مش عارفه بدور على ايه بس أكيد هلاقى أى حاجه 

و لقيت درج مقفول حاولت افتحه معرفتش جبت سكينه صغيره و كسرته و فتحت الدرج 

لقيت فيه أوراق خاصه بشغله و لقيت ملف مكتوب عليه ويجا 

أول ما عينى وقعت على الكلمه قلبى اتخطف و فتحت الملف زى المجنونه لقيت ورقه جواز عرفى من ست شهور و صور ليها بالمايوه و بالملابس الداخليه و لقيت كمان فواتير كتير اوى بدهب هو شاريه باسمها اشي اطقم و خواتيم سولتير و حاجات مكنتش متخيلاها 

قريت دا كله و عنيا مش مبطله دموع مش عارفه ببكى عليه و إلا على حالى 

أخدت الملف و قفلت الدرج و روحت على اوضتى و سمعت باب الشقه بيتفتح و بيتقفل ببص من الشباك لقيته اخد عربيته و مشي 

مسكت الأوراق فى أيدى و قعدت اعيط لغايه ما روحت فى النوم

تانى يوم قمت الصبح مش شايفه قدامى من كتر العياط عنيا وارمه جدا و صوتى مبحوح و عندى صداع فظيع 

مودتش ولادى المدرسه و قعدت طول النهار من غير أكل 

ببص لقيت جرس التليفون بيرن و لقيت مى هى اللى بتتصل بى 

رديت عليها و قالت أنا رايحه أهو على النادى انتى وصلتى فين؟ ؟؟

قلت لها معلش يا مى مش هقدر اجى أنا تعبانه شويه 

قالت ألف سلامه عليكى يا حبيبتى مالك عندك ايه 

قلت لها مفيش حبه تعب كدا 

قالت لا أنا حاسه أن صوتك زعلان هو أنا مش عارفاكى 

قلت لها لا مش زعلانه و لا حاجه بس عندى مشكله كبيره 

قالت مشكلة ايه هتخبى على يا نجوى 

صراحه كنت محتاجه افضفض مع حد غير حد من عيلتى و لقيت أن مى و بحسب معرفتى السابقه بيها انسانه كويسه جدا و عندها حكمه فى حل الأمور .

قلت لها خلاص أنا جايلك يا مى علشان نتكلم سوا شويه أنا فعلا محتاجه افضفض معاكى لأنى حاسه انى هموت 

مى قالت لى و أنا مستنياكى يا حبيبتى 

لبست و لبست اولادى و رحنا النادى أول ما شفت مى لقيتها احلوت اوى و زى ما يكون صغرت مش كبرت جسمها جميل و رشيق زى ما هى و لبسها أنيق اوى جزمتها متلمعه هدومها مكويه 

أول ما شافتنى اخدتنى بالحضن و قالت لى وحشتينى يا نوجا و راحت باست ولادى و قعدت تسالهم اسمكم ايه و كان معاها ابنها ولد صغير أمور اوى عنده حوالى 5 سنين و قالت لى ابنى الأستاذ عمر أهو 

قلت لها ما شاء الله قمر ما شاء الله ايه مخلفتيش غيره 

قالت لا لما عمر يكبر شويه عشان أكون واخده بالى منه و من أبوه يا اوختى 😂

ايه بقا يا ستى مالك قلقتينى عليكى و شكلك دبلان اوى و عنيكى وارمه 

قلت لها أنا بعيط من امبارح 

قالت ليه كل دا فى ايه ؟؟ و أكيد مااكلتيش كمان انتى و الولاد استنى هطلب لكم حاجه تاكلوها و نجيب آيس كريم علشان نحكى كدا و احنا مرتاحين

مى طلبت أكل لنا و للولاد و أنا مكنش لى نفس للأكل خالص فاصرت على انى أكل اى حاجه 

بعد الغدا بدأت احكى لمى على كل حاجه من أول يوم عرفت فيه رأفت و أنا بحكيلها و دموعى بتنزل منى 

و هى بصالى و مفيش على وشها اى رد فعل 

هى بتسمع و بس 

لغايه ما كملت لها الحكايه للآخر 

قالت لى خلاص انتى كدا خلصتى الحكايه 

قلت أيوه 

قالت حكايتك سهله و انتى تقدرى تحليها بنفسك بس عايزه أسألك سؤال واحد قبل ما أقول اى حاجه 

انتى لسه بتحبى رأفت ؟؟؟ و عايزه تكملى معاه ؟ 

سكت و مردتش عليها . 

قالت ردى علشان اساعدك 

قلت لها أيوه طبعا بحبه بحبه اوى و أكتر من روحى كمان 💔

قالت كويس يبقى تسمعينى و متزعليش من اى كلام هقوله لكى دلوقتي 

عايزين تعرفوا مى قالت لى ايه استنونى فى الجزء الخامس 

يتبع .........😊 gg

خيانه 

جزء 5 

قالت كويس يبقى تسمعينى و متزعليش من اى كلام هقوله لكى دلوقتي 

هزيت رأسي بالموافقة 

مى قالت لى انتى عارفه أنا بحبك أد ايه يا نجوى و مش عايزه كلامى دلوقتي يزعلك أنا هكون لكى زى الجراح إللى بيعمل عمليه للمريض و يستاصل منه جزء مش عشان يوجعه لا عشان يعالجه و أى عمليه لازم لها شويه ألم لغايه ما تتعافى نهائي 

جوزك عنده حق فى كل اللى قاله انتى فعلا مبقتيش نجوى بتاعه زمان انتى فعلا بقا شكلك زى ما يكون عندك خمسين سنه انتى حتى لبسك مش متناسق و مبهدله فى نفسك اوى . قبل ما تحاسبي جوزك على رد فعله خليكى حقانيه مع نفسك و حاسبيها على فعلها الأول . هتقولى بهدلتى من ولاده زى ما بتبرري لنفسك دايما هرد عليكى و اقولك أن دا باختيارك زى ما هو قالك 

كان بايدك تنظمى نفسك و تخلى فى فرق بين ولادك خمس و إلا ست سنين على الأقل تكونى شميتى نفسك و متهدريش حق الراجل اللى معاكى 

طيب هو ذنبه ايه أنه يلاقى الست اللى المفروض سكنه طول النهار ناكشه شعرها و عماله تجرى ورا عيالها حتى الكلمه الحلوه و اللمسه الرقيقه مش لاقيها طبيعى جدا أنه هيدور عليها بره 

انتى قلتى أنك كنتى بتسبيه بالشهور و تروحى عند والدتك طيب المفروض هو يعمل ايه . اقولك بقا على اللى هو حاسه منك و مش قالوا لكى هو حس أنه مجرد ممول أو شريك بالمال و بس يصرف و يجيب و مطلوب منه أنه يتحمل و يتحمل ....

يبقى انتى اللى دفعتيه لكدا انتى بتقولى أنه كان كويس جدا طيب اسالى نفسك ايه اللى حصل خلاه يتغير عليكى ؟ 

الراجل يا نجوى زى الطفل الصغير بيتعب و بيحتاج الايد اللى تطبطب عليه كان محتاجك تكونى أمه و أخته و مراته و حبيبته و انتى للاسف بعدتى اوى عن كل ده و اخترتى لنفسك دور تانى خالص زى ما قالك اختارتى تكونى أم و بس مشكلتك فى التوازن انتى معرفتيش توازنى أمورك هتقولى فى ستات كتير زيى و ازواجهم مبيرحوش يتزوجوا عليهم هقولك أن دى قدرات و إمكانيات . فى راجل ممكن يتحمل و راجل لا . فى راجل قدرته الماديه تساعده و راجل لا .

ولازم كل ست تعف زوجها بالطريقه اللى هو عاوزها 

لازم تكونى حقانيه مع نفسك علشان تقدري تحلى مشكلتك و تعديها على خير 

أسهل حاجه انى كنت اقولك ايه دا ؟ دا راجل خاين لازم تطلبى الطلاق و اقومك عليه بس فى النهايه بيتك هيتهد و بناتك هتتشرد

كل دا بسمع كلام مى و أنا دموعى نازله و مبتكلمش فعلا مى عندها حق فى اللى بتقوله فعلا رأفت حاول كتير معايا و لما كان يقولى تعالى نخرج كنت اقوله تعبانه و عايزه أنام .لما كان يجيب لى هديه كنت اخدها و احطها جنبى و اتشغل ببنتى و أنسي اقوله حتى شكرا . فعلا أنا موتت حاجات كتير جواه بس مكنش قصدى بس هو جرحنى برده لما راح اتجوز على 

مى قطعت على تفكيرى و قالت لى متفكريش كتير احنا لازم نتحرك من دلوقتى 

قلت لها اعمل ايه ؟؟

قالت لازم تغيرى كل حاجه فى نفسك لازم تغيرى طريقه لبسك و تروحى جيم تظبطى وزنك لازم تظبطى بيتك و تحاولى ترجعى نفسك مره تانيه ليه متشتغليش ؟ 

قلت اشتغل ازاى هو أنا عندى وقت اصلا 

قالت انتى معندكيش حسن تنظيم لوقتك طيب خلاص بلاش الشغل دلوقتى احنا هنبتدى من دلوقتى قومى معايا على صاله الجيم اللى فى النادى 

قمت معاها رحنا الصاله راحت سلمت على الكابتن و اكتشفت أنها بتتدرب معاه و اتفقت معاه أنه هجى كل يوم الجيم ساعتين تخسيس و ادانى ورقه ريجيم أمشي عليها . 

خرجنا من صاله الجيم اخدتنى على حمام السباحة و اتفقت مع الكابتن أنه هيدربنى مرتين فى الأسبوع على السباحه و اشتركت لاولادى كمان فى السباحه 

خرجنا من النادى و اخدتنى على الكوافير خلت الكوافير قص لى شعرى و صبغه و عملى ماسكات تفتيح 

و بعدين وصلتنى البيت و قالت لى احنا عملنا جزء و لسه شويه حاجات كدا هنعملهم تانى بكرا الصبح هفوت عليكى نعمل باقى الحاجات 

شكرت مى جدا و طلعت بيتى و حاسه انى خلاص هستعيد نفسي من أول و جديد 

طبعا رأفت مجاش البيت و أنا بصراحه كنت لسه مجروحه من كلامه فقلت كويس البعد برده هيدينا فرصه احنا الاتنين نقيم علاقتنا ببعض 

نمت الليله دى و أنا مرتاحه للتغيير اللى عملته و مستنيه مى بكرا علشان اكمل اللى بداناه 

عايزين تعرفوا عملت ايه أنا و مى استنونى فى الجزء السادس 

يتبع ........😊 gg

خيانه 

جزء 6

 تانى يوم قمت من النوم على جرس الباب  ببص فى الساعه لقيتها 6 صباحا ايه دا مين جايلنا دلوقتى فتحت لقتها مى 

دخلت و سلمت على و قالت لى لبسى ولادك يلا و نزليهم المدرسه و الحضانه فعلا لبست اولادى و عملت لهم سندوتشاتهم و استنيت باص المدرسه يجى ياخدهم 

فى الوقت دا مى بقت تبص على الشقه و تكتب ملاحظات فى ورقه معاها 

و بعد ما اولادى نزلوا جبت لها سندوتشات و شاى و قعدنا نفطر 

مى قالت لى بعد الفطار عايزاكى تورينى دولابك 

استغربت اوى و قلت لها ليه يا مى 

قالت هتعرفى دلوقتى 

قمت فعلا و فتحت لها دولابى مسكت ملابسي الداخليه و الخارجيه و بصت كدا قالت ايه دا يا نجوى هى الهدوم دى من ايام جوازك و إلا ايه 

قلت لها لا كنت ساعات بجيب حاجات لنفسي برده بس الصراحه كنت مركزه على البنات هما أهم منى 

ردت و قالت مين قال أنهم أهم منك دا لا لا لا الهدوم دى كلها مش نافعه قديمه اوى 

احنا لازم نجيب هدوم جديده هاخدك بعد الضهر اعرف محل فيه تخفيضات هايله هنجيب شويه لانجيرهات و بيجامات و بيبي دول و كاش مايو و شويه لبس خارجى حلو كدا 

رحت هزيت رأسي و قلت لها ماشي 

قالت يلا لمى الهدوم دى كلها فى شنطه و ابقى اتبرعى بيهم لأى حد محتاجهم 

يلا بينا بقا على الصاله 

بصى يا ستى أنا اتفقت مع واحده بتيجى تساعدني فى شغل البيت و هتيجى كمان شويه هتغسل السجاد و هتغسل الانتريه و هتغسل المطبخ و الحمام و تخليهم فله و بعد كدا هتجيلك مرتين فى الأسبوع و تعملى لها مرتب شهرى علشان تفضى لجوزك 

بعد الضهر هننزل نشترى شويه مفارش و ملايات و قماش ستاير و كام سجاده جداد أنا عايزه اغير كل حاجه فى الشقه 

بعد شويه جت أم أحمد إللى قالت عليها مى و فعلا كانت لهلوبه و شاطره جدا و خفيفه و مى بقا بقت توجهها و تخليها تغير مكان العفش و تغير نظام السراير و تنضف سراميك الحمام و المطبخ  و غسيل الحوائط صراحه خلت الشقه فل زى ما يكون لسه ساكنين فيها جديد 

بعد الضهر كنا خلصنا كل حاجه و البنات جت من المدرسه و لما دخلوا فرحوا اوى بمنظر الشقه و مى نبهت عليهم أنهم مينعكشوش الشقه تانى 

ساندي سألتها أمال فين عمر يا طنط مى قالت لها عمر مع مامتى وديته انهارده علشان ابقى فاضيه مع ماما 

نزلنا بعد الغدا أنا و مى و البنات و اشترت لى شويه هدوم تحفه و حاجات مكنتش شفتها قبل كدا و لا أعرفها و اشترت لى شويه برفانات على مكياج  و اكسسوارات كانى عروسه جديده 

كمان اشترينا مفارش للبيت و شويه مشايات جديده 

روحت البيت و أنا فرحانه اوى بالحاجات الجديده دى و مى قالت لى من أول بكرا هنروح الجيم بقا و دروس السباحة هعدى عليكى بكرا أن شاء الله 

فعلا ابتديت فى عمل رياضه مع نظام غذائي للتخسيس و كنت فى خلال شهر واحد رجعت لوزنى و رشاقتى 

كمان استيل لبسى خلانى أظهر بسن صغير 

بقيت أحس أنى ماشيه زى الفراشه خفييييييفه و النهجان اللى كنت بحس بيه لما بمشي شويه خلاص راح أما رأفت بقا فكل الفتره دى كان غايب عن البيت و حتى محاولش يتصل بى كان بيسيب لى الفلوس فى حسابى و كان بيجيلى رساله من البنك اعرف منها أنه حط لى فلوس

مى مسبتنيش الشهر دا كله و كانت معايا خطوه بخطوه 

و فى مره و هى قاعده معايا سألتني هو رأفت متصلش بيكى قلت لها لا هو أكيد خايف يكلمني اتخانق معاه 

قالت طيب احنا عاوزينه يشوف التغيير اللى حصل لك دا 

قلت لها يشوفه ازاى أنا عمرى ما هروح له 

قالت و مين قال هتروحيله احنا هنتصور هنا فى الشقه و فى النادى و فى صاله الجيم و نصور البنات و هما فى حمام السباحة و ننزلهم على الفيس مش هو صديقك برده على الفيس ؟

قلت ايوا 

قالت حلو و هننزل شويه بوستات رومانسيه كدا و بوستات معناها أنه وحشك و أنك مستنياه و كدا 

و فعلا نفذت خطه مى و لقيته عملى لايك على الصور 

و بعدين لايك على البوستات بيورينى أنه شافها 

بعد يومين لقيته بيرن على و مى كانت قاعده جنبى قلبى اتخطف و ارتبكت اوى مى قالت لى ردى و متعاتبيش و لا كانه غاب الفتره دى كلها 

رديت  وقولت الوووو 

عايزين تعرفوا رأفت قالى ايه و قولت له ايه استنونى فى الجزء السابع 

يتبع .........😊gg

خيانه 

الجزء السابع و الأخير 

رديت على التليفون و قلت الوو

إزيك يا نجوى و ازاى البنات 

الحمد لله كلنا بخير ازيك انت عامل ايه 

أنا الحمد لله كويس أنا عاوز أشوفك يا نجوى و اشوف البنات و نتكلم شويه  . 

مى كانت قاعده جنبى و عماله تشاورلى انى أوافق  أنه يقابلنا.

قلت له اوك احنا فى النادى بكرا الساعه خمسه عندنا تدريب سباحه تعالى لنا على سته 

سكت رأفت شويه زى ما يكون أستغرب من كلامى و كان نفسه يقول ليه نتقابل بره . بس أنا كنت عايزه اقابله بره لعدة أسباب كنت عايزه اقلل انفعالى لما أشوفه لأنى طبعا هكون قدام الناس كمان كنت عايزاه يشوف التغيير على الطبيعه و يشوف أن احنا كمان بقا لنا حياة زى ما هو أختار لنفسه حياه 

قفلت السكه و مى قالت لى بقا لازم نجهز لمقابله بكرا دى . عايزاكى بقا تلبسي طقم شيك كدا و نروح الكوافير عايزاكى عروسه من أول و جديد 

تانى يوم جهزت نفسي و لبست و ببص فى مريتى لقتنى.. لقيت نجوى إللى كانت من عشر سنين فرحت اوى و حسيت انى هتخطب من تانى و ابقى عروسه من تانى 

رحنا النادى و البنات دخلوا حمام السباحة و أنا قعدت اراقبهم من بعيد شويه و لقيت رأفت جاى ببص عليه لقيته خس اوى و شكله مش نايم شكله مرهق 

أول ما شافنى أبتسم اوى و سلم على و قعدنا 

أول ما قعد قالى وحشتيني ابتسمت ابتسامه صغيره و هزيت رأسي 

رأفت عنيه كانت بتلمع نفس النظره اللى شوفتها فى عينه يوم ما جه يخطبنى و لقيت عينه بتبص على لبسي و التغيير اللى حصل فى وزنى و قالى انتى اتغيرتى خالص انتى رجعتي نجوى بتاعه زمان كان فين دا كله من زمان 

قلت كان موجود 

قالى طب ليه معملتيش كدا ليه خلتينى اعمل اللى عملته أنا بحبك يا نجوى و كان نفسي نعيش كويسين طول عمرنا نربى أولادنا ما بيننا 

بص يا رأفت أنا عاوزه اعترفلك بحاجه أنا فعلا قصرت كتير فى حقك زى ما انت قلت و اهملت فيك كتير بس كان مبررى انى اربى ولادنا و أنهم صغيرين محتاجين لى أكتر منك لكن للأسف أنا غلطت فى المعادلة دى و معرفتش أتصرف كويس و مكنش عندى حسن تقدير للأمور . بس انت كمان غلطت غلطت لما لجأت لستات من بره و عرضت نفسك للحاجات دى كنت أتمنى أنك تكون أقوى من كدا كنت أتمنى أنك كنت تيجى لى و تثور على الوضع و تحاول تنظم معايا الوضع اللى اختل منى كنت تساعدنى و تشد أيدى و تخلينى جنبك مش تبعد و تستسهل و تروح لأى ست تقولك كلمه حلوه 

احنا اللى بينا ميثاق غليظ زى ما ربنا قال 

لكن للأسف بننسي و نتناسي الكلام ده و كل واحد مننا بيخبى جواه من شريك حياته مواقف و حاجات كتير بتألمه و مبيحاولش يصارحه بيها لما المواقف دى بتتراكم يوم بعد يوم و تبقى زى الجبل و يجى أى موقف صغير هايف ينسف العلاقه دى زى القشه اللى قصمت ظهر البعير  . لما قعدوا يحملوا على ضهره قش و يحملوا و يحملوا و جم فى الآخر حطوا قشه راح الجمل برك مقدرش يتحمل مع أنها قشه لكن من كتر الحمل خلاص معدش عنده طاقه 

أنا وصلتك للنقطه دى و انت كمان وصلتنى لها لما مقدرتش أى مجهود عملته عشان ولادنا و عايرتنى انى مبقتش اسوى حاجه فى حياتك و انى مش ست و انى مجرد أم لاولادك و بس 😢

رأفت بقا يسمع كلامى و شايفه فى عينه الندم 

و قالى أنا اسف يا نجوى أنا فعلا غلطت أنا الشهر اللى عدى دا كنت ضايع من غيرك و من غير ولادى اوعى تصدقينى لما قلت لك انى مش هطلقك عشان البنات بس أنا كنت ساعتها بحاول ادارى على غلطتى و بحاول انسحب من الموقف بسرعه لأنى مكنتش عايز المواجهة دى. كنت بهاجم علشان متحطتش فى موقف الدفاع . انا خلاص طلقت ويجا و اكتشفت أن حياتى ناقصه اوى من غيرك و من غير ولادنا 

رأفت مسك أيدى و باسها و لقيت البنات خلصت التمرين و جم فرحوا اوى ببباهم و قعد يحضنهم و اخدنا اتعشينا بره و لقيته محضرلى مفاجأه و جايب لى خاتم سولتير تحفه مكتوب عليه اسف حبيبتى 

روحنا البيت و عجبه اوى التغيير فى البيت و من اليوم ده بقيت اخد بالى من حاجات كتير مكنتش واخده بالى منها و لقيت جوزى كمان بدأ يتعامل معايا بطريقه تانيه خالص فعلا لكل فعل رد فعل 

أما مى بقا بقت صديقه العيله هى و زوجها و ابنها و بقينا تقريبا أسره واحده كلنا .

عايزه أقول فى النهايه لأى ست و اى راجل اوعى تشيلوا فى قلبكم من الطرف التانى و تقولوا اهى عيشه و خلاص صارحوا وواجهوا و حاولوا تحلوا و تاخدوا بأيد بعضكم علشان تنقذو المركب . كمان لازم يكون عندنا شجاعه الاعتذار اللى غلط مننا يعتذر دا ميقللش منه . لازم نعرف أن لكل منا دور فى الحياه و لازم نحترم ادوار بعض و نقدرها كويس 😍😍

و فى النهايه بقول مفيش حد معصوم من الغلط كلنا بنغلط و لازم نسامح بعض و نصفح عن بعض و منقفش لبعض على الواحده .

أرجو أن القصه تنال اعجابكم و أرجو لو اسعدتكم تدعو لأبى بالرحمة و المغفره 

تمت 😊😊

#دجيهان_عادل