ماما عزيزه ( كامله )

#ماما_عزيزه

#الحلقه_الاولى

كل سنه و انتوا طيبين يا حبايبي ، و يجعل ايامكم خير على طول يارب 

احب اعرفكم بنفسي انا عزيزه الشهيره بماما عزيزه اللذيذه 

الحمد لله عايشه فى نعمه من الله  ربنا مراضينى بالولد و البنت و الحمد لله قدرت اربيهم تربيه كويسه و علمتهم تعليم عالى و جوزتهم كمان

انا دلوقتى على المعاش بقالى سنتين يعنى عندى ٦٢ سنه و صدقونى الحياه بعد الستين حاجه اخر متعه 

انا كنت مديره فى التربيه و التعليم و يمكن شغلى إثر عليا كتير و خلانى اتعامل مع اولادى بطريقه تربويه 

احب اعرفكم باسرتى الصغيره 

انا عزيزه و زوجى الحج محمد 

انا عندى ولد و بنت 

الولد أحمد و مراته نها و عندهم ولدين آسر و ياسر 

البنت فريده و زوجها علاء و عندهم لما و لؤى 

يعنى احنا اسره مكونه من عشر أفراد عايشين فى بيت واحد 

جوز بنتى علاء كان عاوز يجيب شقه بره بس احنا لما جالنا قلناله و ليه يا حبيبي ؟؟ تكلف نفسك و الشقه موجوده 

انا طول عمرى بحلم أن ولادى ميبعدوش عن حضنى ابدا و الحمد لله قدرت اعمل كدا و جوزتهم معايا فى نفس البيت اللى بنيناه انا و الحج محمد 

هو ورث الأرض عن والده الله يرحمه و انا ساعدته فى البنا و عملت جمعيات و بقيت الم عليه على قد ما اقدر لغايه ما عملنا بيت اربع ادوار 

الدور الاول عملناه محلات و مأجرينها الحمد لله بإيجار كويس اوى 

الدور التانى ساكنين فيه انا و الحج محمد 

أما التالت فيه فريده و جوزها و اولادها و فى الدور الرابع ساكن احمد و مراته 

الحمد لله كلنا فى البيت بنحب بعض و بنتعامل أننا وحده واحده 

كل واحد من ولادى له شقته اى نعم بس لما اطبخ اى طبخه ببقى عامله حسابى فى اكل لهم و لأولادهم كمان 

احفادى بيحبوا اكلى اوى و تقريبا مبيكلوش غيره ...

دايما فريده و نهى اسمعهم بيزعقوا و ينزلوا يشتكولى أن العيال مبترضاش تاكل اكلهم و انا اغمز للعيال و اقولهم ليه كدا يا اولاد ؟؟؟ المره الجايه لازم تأكلوا اكل ماما 

العيال تستخبى فيا و تقولى لا يا تيته أكلك احلى 

هههههههههه عيال بريئه متعرفش تجامل 

اولادى كمان الصراحه كل ما يعملوا اكل لازم ينزلوا منه 

نظام البيت طول السنه ماشي بالنظام ده و رغم أن الكل طلب منى اننا نكون كلنا فى عيشه مشتركه و خلاص الا انى رفضت لأن لكل واحد خصوصيته برده ...يمكن مرات ابنى بتحب تطبخ براحتها فى بيتها يمكن جوز بنتى ميعجبوش اكل معين و يتحرج يقول ...فعشان كدا و منعا للاحراج سايبه كل واحد حر فى حياته 

النظام ده فى كل السنه الا شهر رمضان 

هو الشهر الوحيد اللى بنكسر فيها القاعده دى 

الكل بينزل لى و بنتجمع قبل بدايه الشهر الفضيل بيوم و بنقسم المهام 

الحج محمد بيروح يجيب لنا حاجات رمضان من ياميش و خلافه 

و البنتين  نها و فريده بينزلوا يشتروا زينه رمضان من حبال نور... لفاونيس...لمفارش 

و الولدين احمد و علاء بينزلوا يشتروا مستلزمات الاكل للشهر كله من لحوم و خضار و غيره 

أما انا بقى فبتبقى مهمتى انى بفرش مسجد البيت 

عندى اوضه كبيره مش حاطه فيها حاجات كتير عاملاها للغرض ده 

لما يهل رمضان بفرشها بسجاد مخصوص عايناه مبطلعوش إلا فى رمضان و أعطر السجاد بالمسك و العنبر و اولع البخور فى الاوضه عشان يحسسنا بروايحه الحلوه 

بحضر المصاحف و بحضر كرسيين ليا و للحج محمد لأننا مبنقدرش نقف كتير بحكم السن و الحمد لله على كل حال 

الاوضه دى بقا معموله لصلواتنا طول النهار انا و البنات و بالنسبه للرجاله بتبقى لصلاة السنن 

كمان لازم كل يوم قبل ما نتسحر بساعه الكل ينزل باولاده و نفتح مصاحفنا و كل واحد يقرا جزء من القرآن بصوته و بعد كدا نصلى التهجد 

و صلاه التهجد بتبقى بالتتابع بين احمد وعلاء لأن الحج محمد مبيقدرش يقف كتير و مينفعش يبقى الامام و هو قاعد و الباقى واقفين .

احفادى بقا بيبقى لهم برنامج تانى غير الكبار 

عندى تلات أحفاد ما شاء الله ابتدوا الصيام من السنه اللى فاتت لكن لؤى الصغير هو اللى لسه مصمش عشان لسه عمره خمس سنين 

احفادى بينزلوا الصبح الساعه ٨ و معاهم مصاحفهم و يقعدوا مع جدهم يحفظهم كل يوم نص صفحه و بيحفزهم بجوايز حلوه 

و الحمد لله قربوا التلاته يخلصوا نص القرآن الكريم 

انهارده اول يوم رمضان  الساعه دلوقتى ٨ الا خمس دقايق زمان الاولاد نازلين 

و على الساعه ١٠ كدا بتنزل البنتين علشان نشوف هنطبخ ايه 

اول يوم ده بيبقى يوم خاص فى الاكل ...بنعمل كل الاكلات اللى بيحبها الولاد 

احمد ابنى بيحب المكرونه بالباشاميل و علاء بيحب المحشي و نها ملهاش اوى فى الاكل بتاكل نواشف و فريده بتعشق البط أما الحج محمد بقا فلازم اول يوم ده يأكل ملوخيه من عمايل اديا و يبقى واقف و انا بطش التقليه 😂

الولاد نزلوا لجدهم اهو ..لما اروح انا بقى اصلى الضحى و أقرأ جزء القرآن على ما البنات تنزل

       ..........................

صباح الخير يا ست الحبايب

صباح النور و السرور يا حلوين صايمين و الا زى كل سنه 

و دا كلام برده يا ماما ؟؟ زى كل سنه طبعا 

شاطره يا فريده ...صليتوا الضحى ؟

ايوا طبعا يا ماما 

طب يلا بينا ع المطبخ 

عملنا الاكل و جهزنا كل حاجه و جه احمد و علاء من شغلهم 

اه ما انا نسيت اقولكم أنهم زملا فى نفس الشغل و من هنا علاء شاف فريده و خطبها 

فطرنا كلنا و صلينا المغرب و نها عملت لنا دور شاى معتبر 

بعد كدا صلينا التراويح و جه ميعاد الحدوته اللى معوده عليه الولاد 

ها يا اولاد عاوزينى احكيلكم حدوته ايه انهارده ؟؟

حدوته علاء الدين و المصباح السحرى يا تيته

يوووو ..انتوا مبتزهقوش من الحدوته دى ؟

لا يا تيته

طيب انا هحكيلكم نصها بس و النص التانى بكرا لأنها طويله اوى 

و احنا موافقين يا تيته 

كان يا مكان و لا يحلى الكلام الا بذكر النبى عليه الصلاة و السلام 

عليه الصلاه و السلام 

كان فى شاب صغير اسمه علاء الدين الولد ده ......

#ماما_عزيزه

#الحلقه_الثانيه

كان يا مكان و لا يحلى الكلام الا بذكر النبى عليه الصلاة و السلام 

عليه الصلاه و السلام 

كان فى شاب صغير اسمه علاء الدين الولد ده كان شاب مستهتر طول النهار مبيستغلش وقته فى الصح و دايما يلعب و مش شايل للدنيا هم 

الولد كان له أب اسمه مصطفى الخياط 

و فى يوم من ذات الايام مرض مصطفى الخياط مرض شديد و للاسف مات .

علاء الدين فضل لوحده فى الدنيا هو ووالدته ...

ابتدى علاء الدين يرجع للطريق المستقيم و ابتدى يتصاحب على اصدقاء حلوين عرفوه طريق المسجد و مبقاش يفوت فرض 

امه بقت تبيع حاجات من دكان مصطفى الخياط علشان تقدر تجيب اكلهم و شربهم 

و فى يوم من ذات الايام كان علاء الدين واقف مع أصحابه و لقى واحد بيسأل على أبوه مصطفى الخياط 

تفتكروا مين دا اللى بيسأل عليه يا اولاد ؟؟

الساحر الشرير يا تيته 

ايووووه هو الساحر الشرير ...و دا كان ساحر قرأ فى كتب السحر عن كنز كبير و مصباح سحرى موجودين تحت الارض لكن للاسف محدش يقدر يفتح الكنز ده و لا يجيب المصباح الا واحد بس اسمه علاء الدين و أبوه اسمه مصطفى و بيشتغل خياط 

الساحر عرف الاسم و الوصف من كتاب السحر و راح يدور على علاء الدين 

متعرفوش يا اولاد شاب اسمه علاء الدين ؟

ايوه انا علاء الدين 

انت ابن مصطفى ؟؟

ايوه انا ابن مصطفى الخياط 

ازيك يا ابنى و ازاى ابوك عامل ايه ؟؟

ابويا مات من فتره 

ايه مصطفى مات ؟؟؟ لا حول و لا قوة الا بالله ... مصطفى مات  اهئ اهئ اهئ اخويا حبيبي 

هو انت تعرفه ؟؟

بقولك اخويا ...انا عمك يا علاء الدين 

عمى ؟؟ انا اول مره اعرف ان ليا عم 

انا عمك و تقدر تسأل والدتك ...خد الدينارين دول و قول لوالدتك انى هاجى اتعشي عندكم الليله الجايه 

راح علاء الدين لوالدته و سألها 

هو انا ليا عم مسافر يا امى ؟؟

تقريبا يا ابنى ...سمعت ابوك بيقول أنه له أخ سافر من زمان ...بتسال ليه يا علاء الدين ؟؟

اصلى قابلته انهارده و قالى أنه هيجى يتعشى معانا بكرا باذن الله 

يا خبر ...دا احنا معندناش لقمه عيش فى بيتنا 

خدى يا امى ...عمى ادانى الدينارين دول ..خديهم هاتى بيهم اكل 

تانى يوم الساحر قابل علاء الدين مره تانيه 

و سأله قلت لوالدتك يا علاء انى هجيلكم الليله ؟؟

ايوه يا عمى قلت لها 

طب خدى الدينارين دول كمان .

اخد علاء الدين الدينارين و راح لوالدته و ادهملها ...

جهزت امه العشا و جه الساحر بالليل 

قعد معاهم و قعد يحكى على مغامراته فى السفر و عن ذكرياته المزيفه مع اخوه. و كل ده و علاء الدين منبهر بحكايات عمه و فى نص الكلام سأل الساحر علاء الدين 

انت بتشتغل ايه يا علاء الدين ؟؟

انا مبشتغلش حاجه يا عمى

ايه ؟؟ انت بتقول ايه ؟ ازاى مبتشتغلش ؟ لا لا انا لازم اخدك بكرا اعرفك على تجار السوق كلهم و نعملك محل كبير اوى و تبقى اكبر تاجر فى البلد 

و فعلا يا اولاد الساحر اخد علاء الدين تانى يوم بعد ما جابله بدله جديده و راح عرفه على تجار السوق و قالهم أن علاء الدين هيكون اكبر تاجر اقمشه فى البلد 

بعد كدا الساحر قال لعلاء الدين تعالى نتمشي شويه يا علاء 

حاضر يا عمى 

مشى الساحر هو و علاء و خرجوا بره المدينه لحد ما وصلوا لمكان مقطوع طلع الساحر بخور من جيبه و بدأ يقول كلام مش مفهوم ...اتفتحت فتحه فى الارض 

و ظهر سلم جوه الفتحه دى 

هنا بص الساحر لعلاء الدين و قاله انا عاوز منك خدمه يا علاء الدين 

اؤمرنى يا عمى 

انا عاوزك تنزل تحت على السلم ده هتلاقى فى نهايه السلم باب مفتوح هتدخل هتلاقى حديقه مليانه فواكه بس مش فواكه عاديه لا دى مصنوعه من الأحجار الكريمه خد اللى انت عاوزه منها 

فى اخر الحديقه دى فى مصباح منور انا عاوزك تطفيه و تجبهولى ...مش عاوز منك غير المصباح ده 

حاضر يا عمى 

استنى يا علاء الدين ...خد يا ابنى الخاتم ده معاك 

خاتم ايه ده يا عمى ؟؟

الخاتم ده خاتم سحرى عليه خادم ...لو حصلك اى مشكله تحت ادعك الخاتم هيطلعلك الخادم و هو هيحللك مشكلتك 

حاضر يا عمى 

نزل علاء الدين على السلم ووصل للحديقه اللى قاله عليها الساحر 

علاء الدين انبهر بالمنظر و انبهر بالجواهر و الاحجار الكريمه اللى مشفش زيها فى حياته 

ابتدى علاء يجمع فى الفواكه دى و كل ما يعجبه حاجه يحطها فى جيوبه لحد ما كان مش قادر يمشي ...لحد ما وصل للمصباح 

طفى المصباح و اخده و بقى ماشي مش قادر يمشي من الحاجات اللى شايلها الساحر ابتدى ينادى عليه و يقوله يلا يا علاء الدين 

حاضر يا عمى انا جاى اهو 

طب هات المصباح الاول 

حاضر يا عمى 

يلا يا علاء الدين ...الحفره قربت تقفل

حاضر  جاى اهو 

طب هات المصباح ..مد ايدك و هاته 

الله ما قلت حاضر ... مالك مستعجل كدا ليه يا عمى ؟؟

هنا الساحر اتغاظ و نطق بكلمات مش مفهومه فاتقفلت الحفره بطريقه اسرع

علاء الدين مصدقش نفسه ازاى عمه يعمل فيه كدا ...حاول يرجع الحديقه مره تانيه معرفش لقى الباب اتقفل 

قعد علاء الدين يبكى و مش عارف يتصرف ازاى ...فات يوم اتنين و فى تالت يوم كان علاء الدين خلاص تعب جدا من قلة الاكل و الشرب و خلاص أيقن أنه ميت 

رفع علاء الدين ايده و قعد يدعى ربنا ينقذه و فجأه و هو رافع ايده لاحظ الخاتم اللى الساحر ادهوله و افتكر أن عمه قاله لو حصلك مشكله ادعك الخاتم و فعلا دعك الخاتم طلع له عفريت صغير 

شبيك لبيك تطلب ايه ؟

ارجوكى ودينى بيتى حالا 

و فى لحظه كان علاء الدين واقف قدام بيته ...خبط علاء الدين على الباب امه فتحت له و قالت 

كنت فين يا علاء الدين ؟؟

و قبل ما يجاوب عليها كان وقع مغمى عليه من قلة الاكل 

امه اخدته و سندته للسرير و شالت الحاجات اللى كانت فى جيوب بدلته فى صندوق قديم عندها

ام علاء الدين جابت له قطعه خبز و قطعه جبنه اكل و نام 

تانى يوم امه راحت السوق و قام علاء الدين يفكر فى اللى حصله و افتكر ازاى عمه سابه جوه الحفره عشان خاطر حته مصباح مصدى 

قام علاء الدين و جاب المصباح و قعد يبص عليه يمكن يعرف السر اللى فيه 

علاء الدين لاحظ أن المصباح عليه تراب قام جاب قماشه و مسح المصباح و فجأه خرج دخان كتير اوى من المصباح 

علاء الدين خاف و رمى المصباح من ايده 

و فجاه اتشكل من الدخان ده عفريت كبير اوى ضخم جدا 

علاء الدين خاف جدا و بقى مش قادر يقف على رجليه 

العفريت قاله بصوت زى الرعد شبيك لبيك عبدك و ملك اديك تطلب ايه ؟؟

فكر علاء الدين بسرعه و قاله اطلب اكل انا جعان اوى 

سمعا و طاعه يا مولاى 

و فجأه ظهر قدام علاء الدين سفره كبيره من الاطعمه المختلفه و كلها فى اطباق من الفضه

علاء الدين و امه فضلوا يأكلوا فى الاكل ده يومين . بعد كدا بدأت امه تاخد الاطباق تبيعها و تشترى بفلوسها اكل 

بعد ما الطباق خلصت ...علاء الدين لقى امه خرجت و دعك المصباح مره تانيه و طلب منه سفره زى اللى طلبها قبل كدا 

و اتكرر نفس اللى حصل مره تانيه 

لكن علاء الدين فكر و قال انا مش هفضل كدا على طول انا لازم يكون ليا شغل خاص بيا 

علاء الدين جاب المصباح و دعكه طلع له العفريت 

طلب منه علاء الدين أنه يعمله اكبر محل لبيع الاقمشه فى الصين كلها و يجيب له بضايع من الحراير و كل انواع الاقمشه من الهند و من كل مكان فى الدنيا 

و فعلا قامت المدينه على وجود محل كبير جدا مليئ بالاقمشه 

انبهرت الناس بالبضايع اللى فيه لدرجه ان صيته وصل للاميره بنت الامبراطور

الاميره جت تتفرج على البضاعه و اول ما علاء الدين عينه وقعت عليها .....

#ماما_عزيزه

#الحلقه_الثالثه

انبهرت الناس بالبضايع اللى فيه لدرجه ان صيته وصل للاميره بنت الامبراطور

الاميره جت تتفرج على البضاعه و اول ما علاء الدين عينه وقعت عليها حبها حب شديد 

اختارت الاميره بدر البدور بعض أنواع القماش الغاليه و القيمه جدا و اللى عمرها ما شافت زيها 

و راحت لعلاء الدين عشان تحاسبه لكن علاء الدين رفض أنه ياخد اى فلوس منها و قالها تعتبر أن دى هديه منه 

بعد كدا علاء الدين مبقاش عارف يفكر إلا فى بدر البدور ...راح لامه و قالها انا عاوز اتجوز 

امه فرحت و سالته عاوز تتجوز مين ؟؟

قالها بدر البدور بنت الامبراطور 

امه انزعجت جدا احنا فين يا ابنى و هى فين ؟؟

معلش يا امى دى اللى قلبى مال لها ... انا عاوزك تاخدى شويه حاجات من اللى انا كنت جايبهم معايا  و تروحى للامبراطور تطلبى ايد بنته ليا ( امه مكنتش اعرف قيمه الحاجات دى و كانت متخيله انها ازاز )

ازاى يا ابنى ؟؟ انت بتقول ايه بس ؟؟

زى ما بقولك يا امى ...روحى يوم التلات هو فاتح بابه لكل الناس كل يوم تلات روحى يا امى و كلميه 

و فعلا يا اولاد الام راحت يوم التلات لكنها فضلت واقفه و مقدرتش تتكلم و لا تقول للامبراطور اللى كانت جايه عشانه 

و لما رجعت لعلاء الدين اللى كان منتظرها و هو على احر من الجمر قالت له انها مقدرتش تكلم الامبراطور 

زعل علاء الدين جدا لكن والدته وعدته انها هتروح التلات اللى بعده 

و فعلا راحت و اتكرر نفس الموقف مره تانيه و لما رجعت لعلاء الدين و قالت له انها برضه مكلمتهوش.. زعل و مرض مرض شديد و امه مكنتش عارفه تعمله ايه 

قررت الام انها تكلم الامبراطور بأى طريقه  و دا عشان خاطر ابنها المريض

و فعلا راحت و لاحظ الامبراطور أن الست دى بتيجى كل تلات و مبتتكلمش و لا بتقول شكوتها ..

الامبراطور شاور للوزير روح هات لى الست دى اشوف حكايتها ايه 

الوزير نادى ام علاء الدين و حضرت ادام الامبراطور 

الامبراطور سألها انتى ليه بتيجى تقفى كل تلات بالشكل ده و مبتتكلميش ؟؟ قوليلى مطلبك ايه ؟

انا ...انا ..انا جايه أخطب الاميره بدر البدور لابنى علاء الدين 

ضحك الامبراطور و قالها ..ابنك دا بيشتغل ايه ؟؟

ابنى تاجر  عنده اكبر محل اقمشه فى البلد كلها 

طيب ابنك يقدر يقدم ايه هديه لبنتى ؟؟

هو ادانى الحاجات دى و قالى انها هديه للاميره 

ايه داااا ...انتى جبتى الحاجات دى منين ؟؟؟

ليه ؟؟ هى فيها ايه ؟؟

دى حاجات عمر ما العين وقعت عليها ... انتى عندك منها تانى ؟؟

ايوه عندى صندوق مليان 

لااااا انا لازم اشوف ابنك ده ...خليه يجى يقابلنى بكرا 

حاضر حاضر يا مولاى 

رجعت الام فرحانه اوى و قالت لعلاء الدين أن الامبراطور عاوز يشوفه 

علاء الدين فرح اوى و قام من سريره و اخد المصباح طلب منه بدله فخمه و أنه يعمله موكب كبير و هو رايح للامبراطور 

فى اليوم التالى ركب علاء الدين الفرس بتاعه و خلفه موكب كبير من الركايب المحمله اقمشه و جواهر و بضايع من كل حته فى الدنيا ...و بقى يرمى على الناس جنيهات دهب و الناس تجرى ورا الموكب 

لحد ما وصل لقصر الامبراطور 

الامبراطور لما شاف كدا كان استغرب اوى من المنظر ده 

استقبل الامبراطور علاء الدين استقبال هايل ووافق عليه كزوج لبنته بعد موافقتها طبعا بس على شرط أن علاء الدين يبنى قصر كبير  للاميره بدر البدور جنب قصر الامبراطور

رجع علاء الدين من عند الامبراطور و هو فرحان و سعيد و دعك المصباح السحرى و طلب منه أنه يبنى له قصر كبير اضخم من قصر الامبراطور و اجمل منه كتير 

و فعلا يا اولاد الامبراطور قام الصبح لقى قصر فخم ضخم جنب قصره 

استغرب الجميع من ظهور القصر بالسرعه دى 

تم الزواج و عاش علاء الدين مع الاميره بدر البدور فى سعاده و هنا لغايه ما عرف الساحر خبر ظهور قصر كبير جنب قصر الامبراطور 

الساحر قال ميعملش كدا الا خادم المصباح انا لازم اخد المصباح ده من علاء الدين 

فكر الساحر فى فكره شريره يحصل بيها على المصباح 

يا ترى ايه الفكره الشريره دى ؟ دا اللى هتعرفوه بكرا باذن الله 

لا يا تيته كملى من فضلك 

لا يا اولاد الوقت أتأخر و احنا لازم ننام شويه قبل ما تنزلوا تانى عشان نصلى التهجد و نتسحر سوا ...يلا يا حلوين هاتوا بوسه لتيته و اطلعوا يلا على اوضكم 

لا يا تيته عاوزين ننام معاكى هنا 

لا عشان ماما متزعلش اطلعوا يلا و ابقوا انزلوا كمان شويه 

حاضر يا تيته 

..............................................

تانى يوم مر يومنا زى كل يوم فى رمضان ...بعد العصر جم احفادى يطالبونى ببقيه الحدوته 

لا بقيه الحدوته هنحكيها بعد صلاة التراويح زى ما وعدتكم ...دلوقتى انا هلعب معاكم لعبه حلوه اوى على ما امهاتكم تكمل الاكل 

صحيح يا تيته ؟؟

صحيح يا اسر يا حبيبي 

طب عاوزين جدو يلعب معانا يا تيته 

تعالى يا حج محمد العب مع الولاد 

لا يا ستى انا مش قادر أجرى و العب معاهم رجليا وجعانى 

لا متخافش دى لعبه مفيهاش جرى 

طب قولى يا ستى 

بصوا يا اولاد احنا هنجيب برطمان نسميه برطمان المفاجأت 

الله يا تيته انا بحب المفاجآت اوى 

استنى بس يا لؤى 

انا ساكته اهو يا تيته و مش بتكلم زيهم 

شاطره يا لما يا حبيبتى 

بصوا بقا انا عاوزه منكم تجبولى ورق ملون و قلم و برطمان فاضى 

حاضر يا تيته ثوانى 

.......

اهم يا تيته الحاجات اللى طلبتيها 

بصوا بقا يا اولاد انا هكتب فى الورق ده بعض الجوايز و بعض الطلبات و هقفل الورق كويس اوى و كل واحد منكم ياخد ورقه و اللى هيطلع له ورقه هينفذ الطلب اللى فيها أو هياخد الجايزه اللى فيها 

الله حلوه اوى يا تيته ...يلا اكتبى يلا 

طب استنوا شويه ...لا اطلعوا بره عشان متشوفوش انا بكتب ايه 

تعالوا يا اولاد انا خلاص خلصت 

يلا مين هيبتدى و ياخد اول ورقه ؟؟

جدو ....جدو يا تيته 

لأ خلوا جدو اخر واحد ...يلا يا اسر خد ورقه و قولنا مكتوب فيها ايه ؟

حاضر يا تيته ....اهى ورقتى مكتوب فيها مبروك كسبت عشره جنيه .....هيييييييه 

برافوا عليك يا اسر خد العشره جنيه اهيه 

يلا يا لما طلعى ورقه و اقرى اللى فيها 

حاضر يا تيته ....اهى مكتوب فيها مبروك كسبت كيس شبسي و شيكولاته ....هييييه 

اتفضلى يا لما كيس الشيبسي و الشيكولاته اهو 

يلا يا ياسر اختار ورقه 

حاضر يا تيته ...مبروك كسبت خمسه جنيه ....هيييه 

اتفضل يا ياسر الخمسه جنيه اهيه 

يلا يا لؤى انت اللى عليك الدور اختار ورقه و انا هقرهالك 

حاضر يا تيته ....اهيه الورقه

مكتوب فى ورقتك يا لؤى انك تمشي على اديك و رجليك و تنونو زى القطه و تلف الصاله لفتين 

ايه دا يعنى مش هاخد فلوس زيهم ؟؟؟

كل واحد بيطلع له حاجه بينفذها يا لؤى 

حاضر يا تيته 

انت زعلان ؟؟؟

لا يا تيته ...

طيب الدور عليك دلوقتى يا جدو  خد ورقه و اقراها 

حاضر يا تيته

ايه دا ...دا مكتوب فيها أن اللى مخدش فلوس أو هديه عليا اديله خمسه و عشرين جنيه 

يعنى انا يا جدو ...انا اللى هاخد الخمسه و عشرين جنيه ...هييييه 

شوفوا يا اولاد اللعبه دى عامله زى الدنيا لكل واحد مننا رزقه ...و لازم كلنا نرضى باللى ربنا قسمهولنا ...شوفتوا لما لؤى رضى باللى طلع له ربنا رزقه ازاى ؟؟

ايوا فعلا يا تيته 

يلا يا جدو طلع ال٢٥ جنيه اديهم للؤى و يلا بقا عشان المغرب خلاص هيأذن

حاضر يا ستى عنيا للؤى و لجدة لؤى 

بس هتكملليلنا الحدوته بعد التراويح يا تيته 

عنيا ليكم يا روح تيته بس خليكوا حافظين احنا واقفين لحد فين 

حافظين يا تيته ...انتى وقفتى لحد ما الساحر فكر فكره شريره عشان يسرق المصباح من علاء الدين 

شاطرين يا حبايبي 

#ماما_عزيزه

#الحلقه_الرابعه

حافظين يا تيته ...انتى وقفتى لحد ما الساحر فكر فكره شريره عشان يسرق المصباح من علاء الدين 

شاطرين يا حبايبي 

.................                ..................

يلا يا اولاد تعالوا عشان نكمل الحدوته 

فكر الساحر فى حيله عشان يقدر ياخد بيها المصباح 

قعد يراقب قصر علاء الدين لحد ما عرف أنه طالع فى رحله صيد خارج البلاد ...اشترى الساحر مصابيح جديده بتلمع و عمل نفسه بياع و بدأ ينادى 

ابدل المصابيح القديمه بالمصابيح الجديده ...ابدل المصابيح القديمه بالمصابيح الجديده 

و كانت الاميره بدر البدور و بعض الجوارى واقفين فى الشرفه ...سمعوا الساحر بيقول كدا استغربوا و ضحكوا على التاجر العبيط اللى بيستبدل المصابيح القديمه بمصابيح جديده 

الاميره قالت طيب ما تيجوا نشوف هو فعلا بيعمل كدا و الا مجرد أنه بينادى بالشكل ده لجذب الإنتباه ؟؟ انا شفت علاء الدين عنده مصباح قديم حاطه فى وسط هدومه روحى هاتيه يا هنا و انزلى بدليه

حاضر يا مولاتي 

و فعلا جابت هنا المصباح و نزلت بيه للساحر 

اول ما الساحر شافه عينه لمعت و فرح فرح شديد و ادالها مصباح جديد

الساحر اخد المصباح و دعكه طلع له العفريت 

شبيك لبيك عبدك و بين اديك تطلب ايه ؟؟

اطلب تنقل لى قصر علاء الدين باللى فيه من الصين الى الهند و تنقلنى معاه 

امرك يا مولاى 

و فعلا يا اولاد العفريت نقل القصر بما فيه للهند 

و قام الامبراطور فى اليوم التالى ملقاش قصر بنته جنب قصره 

الامبراطور اتجنن ...فين الاميره و فين قصر الاميره بدر البدور ؟؟؟

الامبراطور بعت حراسه يدوروا فى كل مكان عن بنته بدر البدور ووقف حراس على باب المدينه يستنوا  علاء الدين عشان يقبضوا عليه

و استدعى الامبراطور ام علاء الدين و سألها عن ابنها و هى طبعا مكنتش تعرف اى حاجه 

طبعا الامبراطور كان قلقان على بنته جدا و كان عاوز ينتقم من علاء الدين اللى هو السبب فى اختفائها .

اول ما وصل علاء الدين للمدينه استقبله الحراس و قبضوا عليه 

علاء الدين مكنش مصدق و قعد يزعق و يقولهم 

انتوا متعرفوش انا مين ؟؟؟ انا علاء الدين زوج الاميره بدر البدور ....انا هوريكم ازاى تقبضوا عليا بالشكل ده ؟

وصل الحراس لقصر الامبراطور و معاهم علاء الدين 

لاحظ علاء الدين أن القصر بتاعه مش موجود ...و  قابله الامبراطور و سأله و هو ماسك فى رقبته 

فين بنتى ؟؟؟ وديتها فين ؟؟

بنتك ؟؟؟ بدر البدور ؟؟

ايوه بدر البدور ...بس انا اللى غلطان انى رضيت بيك و رضيت بقصر يتبنى فى يوم و ليله ...انا مش هسيبك انا لازم اموتك عشان ضيعت بنتى 

مولاى الامبراطور زى ما هى بنتك هى زوجتى و إن كان موتى يرجعها انا اموت فداها بس صدقنى انا معرفش ايه اللى حصل و لا هى اختفت ازاى و لا القصر اختفى ازاى 

ساعدنى يا ابنى 

اوعدك يا مولاى انى هدور عليها و مش هرجع الا بيها 

و خرج علاء الدين يبحث عن زوجته بدر البدور و لكن للاسف ملقهاش فى المدينه كلها ...

قعد على شط الميه يندب حظه و ينادى على اميرته و من كتر ما كان عمال بيعيط رجله اتزحلقت ووقع فى الميه 

التيار كان شديد و بدأ يجرف علاء الدين 

حاول علاء الدين أنه يمسك بالصخور القريبه من الشط عشان ميجرفوش التيار و فجأة و هو بيحاول اندعك الخاتم اللى كان الساحر أعطهوله فى أحد الصخور و طلع له الخادم بتاعه 

اول ما شافه علاء الدين فرح اوى ما هو كان ناسيه

شبيك لبيك عبدك و بين اديك تطلب ايه ؟

طلعنى من النهر ده بسرعه 

أمر مولاى 

العفريت طلع علاء الدين من النهر و حطه ع الشط 

علاء الدين سأل العفريت عن حكايه بدر البدور و القصر اللى اختفى 

العفريت قاله ان الساحر اللى عمل نفسه تاجر و بدل المصباح القديم بمصباح جديد و بعدها دعك المصباح و طلع له المارد طلب منه نقل القصر للهند 

ياااا الهند ؟؟ طب انا بأمرك انك ترجع القصر مكانه 

مقدرش يا مولاى انا عفريت صغير ...عفريت المصباح مارد كبير يقدر ينقل القصر بسهوله لكن أنا مقدرش

طيب خلاص ودينى هناك قدام القصر 

سمعا و طاعه يا مولاى 

و نقل العفريت علاء الدين قدام قصر الاميره ...و فضل مستخبى عشان يشوفها 

لغايه ما الاميره خرجت فى الشرفه 

نادى لها علاء الدين بصوت هامس 

اول ما الاميره شافته نزلت دموعها من عينيها و قالت له الحقنى يا علاء الدين 

اهدى يا بدر البدور و احكيلى 

الساحر خطفنى و نقل القصر هنا و عاوز يتجوزنى و كل ليله بيجيلى بس انا بطرده 

خلاص يا بدر البدور متخافيش انا هقولك على خطه تعمليها هنتخلص بيها من الساحر ده 

خطه ؟؟ خطة ايه دى ؟

بصى يا ستى انا هجيب لك دوا بينيم تحطيه للساحر فى الشراب بتاعه و اول ما يشرب هينام على طول بعد كدا تنادى عليا و انا هتصرف معاه 

و فعلا نفذت بدر البدور خطة علاء الدين و حطت منوم للساحر فى الشراب بتاعه اول ما شربه راح فى النوم 

طلعت بدر البدور للشرفه و شاورت لعلاء الدين 

طلع علاء الدين لقى الساحر نايم ....دور فى هدومه لقاه مخبى المصباح فيها 

علاء الدين دعك المصباح و طلع له العفريت 

شبيك لبيك عبدك و بين اديك 

شيل الساحر ده و ارميه فوق أعلى جبل 

أمر مولاى 

و انقل القصر ده و رجعه مكانه مره تانيه

أمر مولاى 

و فعلا يا اولاد العفريت نقل القصر. ....اما الساحر بقى لما العفريت رماه فوق الجبل اتلمت عليه الحيوانات المفترسه و الطيور و اكلوه 

رجع علاء الدين و معاه زوجته بدر البدور و فرح بيهم الامبراطور 

مرت الايام و حملت الاميره بدر البدور و كانت خلاص قربت تولد و كان فى المدينه واحده ست شاطره جدا بتولد الستات و لها معرفه بطب الاعشاب و كان اسمها فاطمه 

الاميره طلبت من علاء الدين أنه يروح بنفسه للست دى عشان يجيبها تولدها لأنها سمعت بشطارتها

و لكن للاسف كان للساحر اخ اصغر منه لما عرف اللى حصل لأخوه و أن علاء الدين كان هو السبب فى موت اخوه قرر أنه ينتقم منه 

راح للعشه اللى ساكنه فيها فاطمه و قتلها و اتنكر فى لبسها و قعد مكانها

جه علاء الدين عشان يناديها هجم عليه اخو الساحر و حاول يقتله بخنجر كان معاه

علاء الدين سحب سيفه و خبط الخنجر وقعه من ايد اخو الساحر 

اخو الساحر سحب سيفه هو كمان و بدأ يحارب فى علاء الدين لغايه ما علاء الدين نجح فى التغلب عليه و قتله 

و لما رجع علاء الدين لقصره لقى مراته بدر البدور خلفت له مولود جميل 

و مرت الايام و مات الامبراطور و اصبح علاء الدين هو الامبراطور الجديد و عاش مع زوجته و اولاده فى سعاده و هنا و حكم بلده بالعدل و ساد الرخاء فى أنحاء البلاد 

و توته توته خلصت الحدوته حلوه و الا ملتوته ؟؟

 حلوه اوى يا تيته

 ‏تسلموا يا روح تيته

#ماما_عزيزه

#الحلقه_الخامسه 

يا حاجه 

نعم يا حج محمد 

انهارده عاوزك تتممى على الأكياس اللى بنعملها عشان نروح انا و الولاد نوزعها بعد صلاة التراويح باذن الله 

متخفش يا حج انا و البنات امبارح عملناهم 

عملتوا كام شنطه ؟؟

خمسين زى ما انت قلت 

طيب عظيم اوى و حطيتى فيها ايه ؟؟

ما انت عارف يا حج 

عارف بس لازم اتاكد بنفسي برضه 

حطينا فيها ٣ كيلو رز و كيلو فول و ازازتين زيت و علبه سمن و ٢ كيلو سكر و ربع زبيب و ربع جوز هند و باكو شاى و كيسين مكرونه و هنحط الفراخ و انتوا جايين تمشوا

تمام يا حاجه ..طب و جهزتى الظرف بتاع عيله الاستاذ عبدالدايم الله يرحمه 

ايوه طبعا جهزته مع الشنطه بتاعتهم 

اتوصيتى بشنطتهم يا حاجه ؟؟

ايوا امال حطيت لهم شنطتين فى شنطه واحده انا عارفه أن سناء حملها تقيل و معاها خمس عيال 

اه و الله يا حجه العيال شكلهم يصعب على الكافر ...اليتم وحش اوى 

سيدنا النبى كان يتيم يا حج 

عليه الصلاة و السلام 

طيب انا هقوم اصلى العصر و اجى عشان نلعب مع العيال شويه 

الله ما انت بتقول رجليك وجعاك 

مين قال كدا ؟؟ دا انا صحتى زى البمب

و الله ؟؟؟ طب أما نشوف البومب ده 

هتشوفى ...بس متقليش عليا اوى يعنى 😂

ايوااااا ارجع كدا فى كلامك 😜😜

انا ارجع فى كلامى ؟؟ طب هتشوفى 

هشوف ...أن مكنتش اقطع نفسك 😂😂

بتقولى حاجه يا حجه ؟؟

لا سلامتك يا حج روح يلا عشان تلحق الجماعه 

تيته يا تيته يا حلوه يا تيته 

اهلا اهلا حبايبي ...صليتوا العصر ؟؟

ايوا يا تيته 

شاطرين و عشان انتوا شاطرين كدا هلعب معاكم لعبه حلوه 

لعبه ايه ؟؟؟

استنوا بس لما جدو يجى من المسجد 

اهو ...جدو جه يلا يا تيته 

سلام عليكم يا اولاد 

و عليكم السلام و رحمة الله و بركاته 

ايه ...جاهز يا حج ؟؟؟

طبعا جاهز 💪💪

طيب اللعبه اللى هنلعبها انهارده هى لعبه الاختباء 

ايه ايه ؟؟ يعنى هتلعبينى استغمايه ؟؟ لا يا ستى انا منسحب 

الله الله من اولها كدا ؟؟

منا مش حمل كدا 

شفت بقا ...و على العموم دى مش استغمايه 

امال دى ايه ؟؟

انا هخبى حاجات و انتوا كلكم تدوروا عليها و اللى هيلاقيها له عندى هديه 

ماشى يا تيته احنا موافقين 

لا انا ليا تعديل على اللعبه دى 

تعديل ايه بقا ؟؟

انتى تخبى اكتر من حاجه عشان يكون فى فرصه لاكتر من حد أنه يكسب 

فكره حلوه اوى يا حج و انا موافقه خلاص 

انا هدخل الاوضه اعمل الحاجات اللى هخبيها و ارجع لكم بعد دقايق 

ماشي يا تيته 

يا اولاد انتوا تغششونى معاكم فاهمين ؟

لا يا جدو الغش حرام من غشنا فليس منا 

لا مش قصدى تغششونى يعنى قصدى تساعدونى انتوا عارفين جدكم عجوز 

حاضر يا جدو هنساعدك 

ربنا يخليكم ليا يا حبايبي 

ايه اتفقتوا على ايه ؟؟؟؟

مفيش يا حجه  ...ها جبتى الحاجات اللى هتخبيها ؟

ايوا انتوا عددكم اربعه و جدو الخامس انا جهزت خمس اظرف و هخبى كل ظرف فى مكان و انتوا عليكم بقا تلاقوهم 

بس اللى هيلاقى ظرف هيجيبه من غير ما يفتحه و يحطه قدامه و يبقى كدا مهمته انتهت و يستنى اخواته لما يلاقوا بقيه الاظرف

يعنى كدا يا حجه كلنا هناخد جوايز 

ايوا يا حج محمد عشان متزعلش 

طيب هتخبى الاظرف فين يا تيته ؟؟

هخبيها فى الصاله هنا اتفضلوا اطلعوا بره لحد ما اخبى كل الاظرف 

و انا كمان أخرج 😂؟؟؟

دا انت اول واحد تخرج يا حج محمد 😜

ماشي يا ستى ...يلا يا اولاد 

.....................              ...................

تعالوا يا اولاد انا خلاص خبيت الاظرف يلا بقا ورونى شطارتكم 

بعد دقيقه ....

انا لقيت ظرف يا تيته 

برافو عليكى يا لما  لقتيه فين ؟

لقيته هنا تحت الكنبه

شاطره....تعالى هنا حطيه قدامك و اقعدى جنبى 

و انا كمان لقيته ظرف يا تيته 

برافو يا ياسر لقيته فين ؟

لقيته هنا فى درج النيش 

شاطر يا ياسر تعالى حطه قدامك هنا و اقعدى جنبنا 

و انا ...لقيته لقيته يا تيته 

شاطر يا لؤى يا حبيبي لقيته فين 

هنا يا تيته تحت السجاده 

طيب تعالى اقعد معانا فاضل أسر و جدو 

و انا كمان لقيته يا تيته 

شاطر يا آسر لقيته فين ؟ 

لقيته هنا تحت تربيزه السفره 

شاطر يلا تعالى اقعد معانا و كلنا هنستنى جدو يلاقى الظرف بتاعه 

انا دوخت يا عزيزه و كل ما اجى الاقى حاجه العفاريت دى تسبقنى و تاخدها 

هههههههههه اجمد يا حج و دور على الظرف الاخير هو فى مكان ميخطرش على بالك 

منا دورت فى كل حته مش لاقيه 

مش يمكن قدام عنيك و انت مش واخد بالك 

الله ...قدام عنيا فين؟؟؟يكونش هنا ....ياخبر دا مكان ميخطرش على بال ..انتى كمان طلعتى عفريته مخبياه فى جيب الجاكيت بتاعى 

ايوه انت ليه تقلعه هنا ؟😂😂

يلا بقا كل واحد يفتح الظرف بتاعه و يقولنا لقى فيه ايه ؟؟

لما ...انا لقيت خمسين جنيه يا تيته شكرا يا تيته 

ياسر ...و انا كمان لقيت خمسين جنيه شكرا يا تيته 

يلا يا لؤى شوف طلع لك ايه ؟؟

خمسين برده يا تيته شكرا يا تيته 

أسر ....و انا كمان طلع لى خمسين جنيه شكرا يا تيته 

فاضل جدو يلا ورينا يا جدو كسبت ايه ؟

ايه دا بقا ؟؟؟

هههههههههه هههههههههه هههههههههه ايه طلع لك ايه ؟؟

طلع لى انى اجيب لكم ايس كريم كلكم على حسابى ...لا انتى مستقصدانى بقا 

هههههههههه لا ابدا دا نصيبك و دى الورقه اللى طلعت لك 

ماشى يا ستى احلى ايس كريم للعيله كلها مش العيال بس 

هتحكيلنا حدوته ايه يا تيته انهارده ؟؟

هحكيلكم حدوته  الصياد و الجنى

الله .....طب احكى 

لا ما انتوا عارفين ميعاد الحدوته بعد صلاة التراويح باذن الله 

باذن الله يا تيته 

#ماما_عزيزه

#الحلقه_السادسه

يلا يا تيته احنا خلاص صلينا العشا و التراويح احكيلنا بقا حدوته الصياد و الجنى 

طيب معلش يا اولاد انا هحكيلكم حته صغيره من القصه لانى تعبت اوى انهارده و حاسه انى عاوزه انام 

سلامتك يا تيته 

الله يسلمكم يا حبايبي 

كان يا مكان و لا يحلى الكلام الا بذكر النبى عليه الصلاة و السلام 

عليه الصلاه و السلام 

 كان  فى صياد عجوز ، له زوجة وثلاث بنات. وكانوا فقراء اوى لدرجة إنهم مكنوش بيلاقوا اللى يكفيهم من الاكل كل يوم. كان الصياد  ده  بيرمى شبكته في الميه أربع مرات كل يوم 

وفي يوم من ذات الأيام، والقمر  كان موجود في السماء، والنهار لسه  مطلعش، خرج الصياد بره  أطراف المدينة ووصل  لشط البحر، .....دخل  في الماء، ورمى الشبكه، واستنى لحد ما  غاصت. وجمع الحبل، وبدأ في سحب الشبكة، ولقاها عماله تتقل لدرجه انه مكنش قادر يسحبها . فخلع ملابسه وغطس في الميه، و عام تحت الشبكة، وقعد يهزها ويجرها لغايه ما قدر يطلعها  أخيرًا للشط

يا ترى صاحبنا الصياد هيلاقى ايه يا اولاد ؟

سمك كتير يا تيته 

تفتكروا ؟؟؟؟

ايوا 

راح الصياد عشان يفتح الشبكة، و هو فرحان اوى . لكن للاسف ملقاش سمك زى ما قلتوا  ، لقى جرة كبيرة فاضيه. 

زعل الصياد  و بقا يقول لنفسه بقا بعد التعب دا كله و تخرج لى جره فاضيه دى حاجه غريبه اوى 

 الصياد  قعد يدعى ربنا ، ونضف شبكته وصلحها،  و بعدين خاض في الميه مرة تانيه ورماها للمره التانيه .  الشبكة مسكت فى حاجه ، وكان  لازم يغوص في الماء عشان يطلعها

 ‏ولما سحبها للشط، وبص جواها ، زعل اوى لدرجة أن عنيه دمعت.

 ‏ليه يا تيته هو لقى ايه ؟؟

 ‏لقى لوح خشب .

 ‏يا خبر ....و عمل بعد كدا ايه يا تيته ؟

 ‏طلع شبكته و نضفها و رماها للمره التالته و استنى لحد ما غاصت فى الميه و للاسف لما رفعها المره دى ملقاش إلا شويه صخور و ازاز مكسر.....

 ‏يا عينى دا غلبان اوى 

 ‏الصياد صعبت عليه نفسه و قعد يعيط

 ‏زعلان عشان مراته و أولاده اللى فى البيت و معندهمش لقمه ياكلوها 

 الصياد قعد يدعى ربنا و يقوله :

 ‏يارب انت عارف انى كل يوم برمى شبكتى اربع مرات  و انا يا رب رميتها تلات مرات و مفضلش الا مره واحده بس

 ‏ يا رب ساعدنى و ارزقنى من حيث لا أدرى و لا احتسب 

 ‏يا حنان يا منان يا ذا الجلال و الاكرام يا من ملئ نوره اركان عرشه يا مغيث اغثنى يا مغيث اغثنى

رمى الصياد شبكته فى الميه للمره الرابعه و الاخيره و انتظر لما غاصت و بعد كدا سحبها 

الله.... الشبكه مش عاوزه تتحرك 

انا هحاول اهزها يمكن تتحرك كدا و الا كدا 

يا خبر دى شكلها ماسكه فى حاجه تانى ....يااااربى هو فى ايه انهارده ؟؟

نزل الصياد الميه و قعد يحاول و يحاول يشد شويه و يهز فيها شويه .. لحد ما نجح في النهايه أنه يطلعها من الميه .

لما سحبها للشط كان فيها حاجه تقيله اوى 

فتح الصياد الشبكه و لقى فيها جره نحاس مقفوله 

فرح الصياد، وقال لنفسه: 

يا سعدك يا هناك يا واد يا حامد انا هبيع الجره النحاس دى فى السوق و اكيد هتجيب لى فلوس كتير اوى

بس دى تقيله اوى انا مش قادر احركها من مكانها 

ايوه انا لازم افضى اللى فيها عشان اعرف اشيلها

بس دى مقفوله قفله صعبه اوى ...انا معايا سكينه هحاول افتحها بيها 

ياااا دى مقفوله قفله جامده اوى بس على مين انا وراكى وراكى مش هسيبك 

اخيرا عرفت افتحك ...غلبتينى يا شيخه

انا هميل الجره دلوقتى على الأرض عشان انزل اللى فيها...

الله الله دى مفيهاش حاجه ...هى فاضيه و الا ايه ؟؟؟ 

منزلش حاجه منها ليه ؟؟؟ 

ايه دا 😲😲😲

ايه اللى خارج منها دا ؟؟؟

دا دخان رهيييييب 

ايه دا ؟؟؟ دا بيتجمع و بيعمل حاجه زى جسم 

بس دا مش جسم انسان ...

دا ضخم اوى ...رجليه فى الارض و رأسه فوق فوق فى السما 

دماغه عامله زى القلعه و بقه زى الكهف و أسنانه شكلها مخيف اوى 

ايه دا ؟؟ انا ظهر لى جنى و الا ايه ؟؟؟

انا خايف 

مش قادر ابلع ريقى 

يا ترى هيعمل فيا ايه ؟؟؟

عاوزين تعرفوا الجنى هيعمل ايه فى حامد الصياد ؟؟

ايوا يا تيته طبعا

بكرا باذن الله هقولكم 

طب كملى الحته دى بس يا تيته 

انا قلتلكم انى تعبانه انهارده بكرا باذن الله هنكمل 

تصبحى على خير يا تيته

و انتوا بخير يا روح تيته

#ماما_عزيزه

#الحلقه_السابعه

انت لسه تعبانه يا ماما 

لا يا فريده انا بقيت كويسه الحمد لله بعد ما فطرنا 

بس وشك مخطوف اوى يا ماما 

متخافيش يا نها انا كويسه و الله 

طب اخلى احمد يوديكى للدكتور ؟

و الله يا بنتى لو انا تعبانه كنت قلت لك ...اللى انا فيه ده بحكم السن 

ايواااااا    اقفش ...اعترفى اعترفى 

هههههههههه انت جيت يا حج محمد ؟؟

ايوا جيت الحمد لله و انتى بتعترفى 

بعترف بايه يا اخوياااااا ؟؟

بتعترفى انك بقيتى عجوزه ...يا عجوزه 😜

انا برده ؟؟؟ هو مين اللى طول الليل يقول اه يا رجليا ؟

انتى يا حاجه 😜

هههههههههه انا ؟ الله يسامحك 

خلاص يا ستى انا اللى بقول و انا اللى بقيت عجوز و انتى ست الصبايا ...هو انا كنت اطول القمر ده ؟...دا انا بحمد ربنا كل يوم انه رزقنى بالحجة عزيزه

سيدى يا سيدى ع الكلام الحلو احنا نمشى انا و نها بقا يا سى بابا 

ايوه انا شايف كدا برده 

هههههههههه هى بقت كدا ؟؟ طيب يا سي بابا اللى يهنى سعيد بسعيده 

تيته تيته ....يلا احكيلنا بقية حدوته الصياد و الجنى 

لا يا اولاد تيته تعبانه انهارده 

لا يا نها انا كويسه يا حبيبتى و هكملهم الحدوته

احنا وقفنا فين يا حبايبى ؟؟ مين فاكر ؟

انا يا تيته فاكر 

قول يا ياسر 

لغايه ما الدخان طلع من الجره و اتشكل على هيئه جنى ضخم ووقف الصياد قدامه مرعوب 

ايوااااا برافوا عليك يا ياسر 

وقف الصياد مرعوب زى ما قال ياسر و سأل الجنى 

انت بتعمل ايه جوه الجره دى ؟؟

ضحك الجنى بصوت عالى زى الرعد و قاله 

افرح يا صياد

و افرح ليه بقا ؟؟

افرح عشان خلاص هموتك

ايه ؟؟ تموتنى ليه ؟؟ هو انا عملت فيك حاجه وحشه ؟؟ دا حتى انا طلعتك من الجره اللى كنت محبوس فيها يعنى المفروض تشكرنى مش تقتلنى ؟

و عشان انت خرجتنى هخليك تختار طريقة الموته اللى عاوز تموتها 

لا كتر خيرك ... كدا كتير و الله مش عارف من غيرك كنت عملت ايه؟

انت بتهزر يا انسي ؟

طبعا بهزر..... بقا دا جزائى ؟؟؟ انى اطلعك و تبقى عاوز تقتلنى ؟؟

انا هحكيلك انا عاوز اقتلك ليه 

انا كان ليا سيد بشتغل عنده و للاسف عملت حاجه غلط زعل منى و كان عقوبه اللى يزعل السيد ده أنه يتحبس فى جره 

حبسنى سيدى فى جره نحاس و قفلها كويس اوى و رماها فى البحر 

فضلت ٢٠٠ سنه فى الجره و كنت بقول فى نفسي اكيد حد هيطلع الجره دى و يحررنى  و ساعتها هكافأ اللى هيطلعنى ده و اخليه غنى اوى 

لكن مرت السنين و خلصت اول متين سنه من غير ما حد يحررنى 

لما دخلت فى المية سنه التالته قطعت عهد على نفسي أن اللى هيحررنى هخليه ملك و هديله تلات امنيات كل يوم لكن للاسف محدش حررنى برده و مرت سنين و سنين

دا خلانى اغضب و قررت أن اى شخص هيحررنى هديله امنيه و  هى أنه يختار طريقه موته

و عشان كدا انا بسألك دلوقتى :

عاوز تموت ازاى يا انسي ؟ 

إنَّا لله وإنَّا إليه راجعون. يعنى حظى يجى فى السنين بتاعة غضبك ؟؟ و اجى كدا و اطلعك ؟ انا عارف حظى .... أعتقني لله ، انا معملتش لك اى حاجه وحشه .    

 قولى عاوز تموت ازاى و بطل رغى كتير

 ‏رغى كتير ؟؟؟ انت منين يا جنى 

 ‏و انت مالك 

 ‏يعنى خلاص مش هترجع فى كلامك ؟ بالله عليك انا عندى عيال متموتنيش دا انا برده اللى خرجتك من الجره

 ‏ما هو دا جزاء انك خرجتنى من الجره

 ‏

 ‏يا خبر دا جنى شرير اوى يا تيته ...هو ليه بيعمل كدا ؟

 ‏ما هو قال يا لما أنه غضب من كتر قعدته جوه الجره 

 ‏اسكتى يا لما ....كملى يا تيته 

 ‏حاضر يا لؤى 

 ‏فكر الصياد أنه إنسان و أنه اكيد اذكى من الجنى ده و قرر أنه يخلص نفسه بذكائه 

 ‏الصياد قال للجنى 

 ‏توعدنى انك متقتلنيش الا لما تجاوبنى على سؤال واحد هيجننى من ساعة ما شفتك 

 ‏اسأل يا انسي

بالله عليك انت فعلا كنت جوه الجره دى ؟

اقسم بالله انى كنت محبوس جوه الجره دى 

لا انا مش مصدقك ..انت شكلك بتكدب عليا ...ازاى عاوز تقنعنى أن انت كنت فى الجره الصغيره دى....دى الجره دى متاخدش ايد من اديك فازاى بقا جسمك كله كان جواها ؟؟

يعنى انت مش مصدق انى كنت جواها ؟

ايوه طبعا مش مصدق

طيب انا هوريك عشان متقولش كداب

انتفض الجني واتحول  لدخان طلع وامتد فوق البحر وانتشر فوق الأرض، بعد كدا اتجمع وبدأ يدخل في الجرة. ولما اختفى الدخان، الجني قال و هو جوه الجره :

مصدقنى دلوقتى يا صياد ؟؟

الصياد جاب السداده بسرعه و قفل بيها الجره باحكام 

و قال للجنى :

قولى بقا يا عم الجنى عاوز تموت ازاى انت دلوقتى ؟ لانى هرميك دلوقتى فى البحر و هعمل بيت هنا جنب الشط و احذر اى صياد يمر بالمكان منك 

لا ارجوك متعملش كدا انا كنت بهزر معاك 

بتهزر معايا ؟؟ حد قالك أننا كنا أصحاب قبل كدا ؟؟ انت جنى خسيس 

 بعد كدا بدأ  الصياد يدحرج الجرة ناحية البحر.

 ‏ الجني صرخ : «لا! لا!»

 ‏ لكن الصياد  جاوبه : «نعم! نعم!»

 ‏

 ‏يا ترى الصياد هيرق لحال الجنى ؟ و الا هيصمم أنه يرميه فى الميه ؟؟

 ‏يرميه طبعا يا تيته 

 ‏بكرا هقولكم أن كان الصياد فعلا هيرميه فى الميه و الا لأ 

#ماما_عزيزه

#الحلقه_الثامنه

يلا يا اولاد خلصوا بسرعه فاضل ساعه على المغرب 

خلاص يا ماما احنا خلصنا اهو 

بعد الفطار....

الله..... يسلم ايديكم يا بنات الاكل حلو اوى 

تسلم يا بابا عجبك المحشي ؟؟

طبعا دا احلى حاجه فى الاكل 

انا اللى عملاه يا بابا 

نعم ..هو انا اتوه عن محشي الحجه ..دا كل صابع فيه بيقولى عزيزه عزيزه 😂

ايوا بقا شوف يا احمد بابا بيقول ايه اتعلم 

منا متعلم يا بنتى ذاك الشبل من هذا الأسد

الا صحيح يا عمى مقولتلناش انت عرفت ماما عزيزه ازاى ؟

يااا دى حكايه طويله يا علاء 

طب ما تقولهالنا 

بص اللى اقدر اقوله لك أن عزيزه كانت جارتى و كنت لما اشوفها كدا قلبى يرفرف

سيدى يا سيدى ...ايه الحلاوه دى يا حج محمد 

اختشي يا بت يا فريده مش جوزك اللى عاوز يعرف 

طب قول ...كلامك جميل 

اقول ايه بس قطعتوا حبل افكارى 

قول يا عم متتكسفش 

اه ...لما عزيزه كانت فى الثانويه العامه كنت انا ساعتها فى رابعه كليه زراعه دخلت لابويا و  قلت له انى بحبها اوى و مش قادر أخرجها من تفكيرى و طلبت منه انى اخطبها

ابويا ضحك لى كدا و قال حاااضر ثوانى 

و طلع بره افتكرت أنه رايح يقول لامى بقا و هيروحوا يخطبوهالى 

لقيت ابويا داخل عليا بخرزانه من اللى قلبك يحبها و لقيته قفل علينا الباب 

بتعمل ايه يا حج ؟ طب استنى افهمك 

و نزل عليا ضرب 

الله ليه كدا ؟؟؟

ابويا كان راجل شديد اوى و مكنش يحب الحال المايل و لما قلت له انى بحبها معجبوش الكلام و قالى يعنى بتبص لجارتك و هى زى اختك و مسكنى ضربنى لأن ده فى نظره كان عيب اوى 

ها ...و بعدين 

طبعا انا صوتى كان جايب لآخر العماره بس محدش يعرف انا بصرخ ليه

جه ابو عزيزه و كان شقتهم جنب شقتنا على طول خبط امى فتحت له 

و دخل يخبط على باب الاوضه اللى ابويا حابسنى فيها و نازل فيا ضرب 

ابويا فتح له و الراجل فضل يقوله ليه كدا بتضرب ابنك ليه ؟؟

و ابويا مش عاوز يقول السبب ...هيقوله ايه بس انا بضربه عشان بيحب بنتك 

و الراجل يبص لى و يقولى انت عملت ايه يا محمد يا ابنى 

و انا ساكت مش قادر اتكلم 

لحد ما امى الله يرحمها قلبها كان بيتقطع عليا و قالت له 

الصراحه يا حج على ابنى محمد بيحب عزيزه و عاوز يتجوزها 

الراجل كنا فاكرينه هيزعل أو يكشر لقيناه فرح و الضحكه بقت على وشه اد كدا و قال لابويا 

و عشان كدا بتضرب الواد ؟؟ ايه مش عاوز تناسبنى و الا ايه يا حج احمد 

لا مش كدا ...انا ضربته لانه بص لبنتك و دا  ميصحش 

عارف يا حج احمد اهو عشان تربيتك الحلوه دى انا موافق انى اجوز عزيزه لمحمد ...الواد مغلطش و لا اجرم أنه بيقولك عاوز اتجوز اللى بحبها 

يعنى انت مش زعلان يا حج على ؟؟

و ايه اللى هيزعلنى ؟ انا ازعل لما الاقى حد بيحب بنتى ؟؟ لا طبعا 

بس ابنى لسه فى الكليه و الله اعلم هيشتغل ايه و الا فين و بنتك كمان لسه بتتعلم 

يا سيدى احنا بنشترى راجل و ابنك لو اشتغل ايه انا موافق برده 

يلا نقرا الفاتحه

و قروا الفاتحه فى علقه ...و بقيت اقرا معاهم و انا جسمى متشرح من الضرب 

هههههههههه هههههههههه هههههههههه

بتضحكوا على ايه يا عيال ؟؟

مفيش يا بابا بس دى قصة حب مؤثره اوى 

اخص عليكم انا غلطان انى حكيت لكم 

لا لا متزعلش 

طب و انتى يا ماما ايه كان رد فعلك لما عرفتى انك اتخطبتى فى خمس دقائق كدا ؟

يااااا هترجعونى للذى مضى 

احكى يا حجه يلا عاوزين نعرف

اليوم اللى بيحكيه  الحج محمد دا لقيت ابويا داخل عليا بيه ...و يا عينى اديه متشرحه ووشه متعور و لقيت ابويا بينادى عليا و كنت قاعده بذاكر عشان امتحانى كان بعد اسبوع 

تعالى يا عزيزه سلمى على خطيبك 

خطيبي ؟؟ خطيبي مين دا ؟

طلعت شوفته قاعد جنب ابويا زى العصفوره المبلوله و طبعا انا عارفاه و كنت بشوفه فى الطالعه و النازله و هو بيبص عليا و الصراحه هو كان مؤدب عمره ما حاول يكلمنى هو بس كان بيكتفى أنه يبص لى 

و كمان لما طلعت لقيته مضروب و عرفت أنه مضروب بسبب حبه ليا صراحه صعب عليا اوى و لقيت نفسي مبسوطه مش عارفه ليه 

مبسوطه انى اضربت يا زيزا ؟؟

لأ مبسوطه أن فى حد بيحبنى كدا و اضرب عشانى 

و لقيت نفسي وافقت كدا بمنتهى السهولة و معترضتش على كلام ابويا بالرغم انى كنت راسمه لنفسي انى لازم اكمل تعليمى و أن الجواز دا خطوه تتاجل بعد ما ارسم مستقبلى و احقق احلامى

الله الله يعنى انتى وافقتى على بابا من باب الشفقه

لا لا ...هو كان عاجبنى برده 

ايوا اعترفى ههههههههه 

تصدق احنا غلطانين يا حج أن احنا نحكى للعيال دى 😂😂

ايوا يا بطتى عيال متستاهلش 😂😂

بطتك كمان ؟؟😂😂😂😂😂

اسكت يا حج العيال واقفالنا ع الواحده 😂

خلاص يا ماما بس كملوا عملتوا ايه بعد الموقف ده 

مفيش ...انا نجحت فى الثانويه و دخلت كليه التربيه و ابوكوا خلص كليه الزراعه و اشتغل فى جمعيه زراعيه فى بلد ارياف كانت جنبنا 

ابويا جوزنا و انا فى تانيه كليه فى شقه تبع شغل ابوكوا 

وعشنا مع بعض على الحلوه و المره ياما حرقت اكل و ياما قصرت معاه لما كنت ببقى فى امتحاناتى و هو كان بيشلنى و ارجع الاقيه مجهز لى الاكل و ساعات منضف لى الشقه و الاطباق 

كانت حاجات صغيره اوى بس كانت بتعززه فى نظرى اوى و كنت بفرح اوى لما الاقيه مقدرنى كدا 

و فعلا مش هنسي كلمة ابويا لما قالى يوم فرحى انا جوزتك محمد لانه بيحبك يعنى هيكرمك و عمره ما هيظلمك 

و فعلا ابويا كلامه كان صحيح ...و حب الحج محمد ظهر فى كل موقف من مواقف حياتنا .

دا من اصلك انتى بس يا بطتى ...عشان انتى ست اصيله 

تسلملى يا ابو احمد يا غالى

تيته يا تيته فين بقية الحدوته 

من عنيا يا حبايبى 

احنا وقفنا فين ؟؟

وقفنا عند الجنى لما حبسه الصياد مره تانيه جوه الجره 

ايواااا ...بعد ما حبس الصياد الجنى ابتدى الجنى .... 

#ماما_عزيزه

#الحلقه_التاسعه

تيته يا تيته فين بقية الحدوته 

من عنيا يا حبايبى 

احنا وقفنا فين ؟؟

وقفنا عند الجنى لما حبسه الصياد مره تانيه جوه الجره 

ايواااا ...بعد ما حبس الصياد الجنى ابتدى الجنى يستعطف الصياد بصوت ضعيف افتح لى يا انسي و انا اخليك غنى

انت كداب و انا لازم أرمى الجره دى فى قاع البحر

لا لا ارجوك متعملش كدا.....اوعدك لو حررتنى مش هزعجك ابدا و لا هأذيك و هخليك غنى 

لا و الله 

اه و الله 

احلف و أتعهد قدام ربنا انك تنفذ اللى قلته ده 

و الله و الله ...أتعهد أمام الله انى مش هأذيك و هخليك غنى لو خرجتنى من الجره

طيب انا هفتحها بس افتكر انك حلفت ....

و فتح الصياد الجره و بدأ الدخان يخرج منها مره تانيه 

اول ما خرج الجنى ضرب الجره برجله بعيد لدرجة أنها وصلت لنص البحر 

الصياد لما شاف كدا قال اااه كدا الجنى دا مش ناوى على خير و اكيد هيرجع فى كلامه و هيموتنى

الصياد صرخ و قال للجنى :

انت اتعهدت قدام ربنا ...اوعى تغدر بيا و الا ربنا هينتقم منك أشد انتقام 

ضحك الجني لما سمع اللى قاله الصياد، ورد: «أيها الصياد، اتبعني.»

 الصياد مشى وراه لغاية ما وصلوا إلى جبل خارج المدينة.

 ‏انت مودينى فين يا جدع انت ؟

 ‏متخفش يا انسي تعالى يلا اطلع معايا الجبل ده 

 ‏جبل ؟؟ و هطلعنى الجبل ليه بس ؟

 ‏هتعرف ...اطلع بس

 ‏اما نشوف اخرتها ايه معاك

 ‏الصياد و الجنى اتسلقوا الجبل و عبروا الجنب التانى ووصلوا لنص الغابه 

 ‏اول ما وصلوا لقوا بحيره حواليها اربع تلال 

 ‏تلال يعنى ايه يا تيته ؟؟؟

 ‏يعنى جبال صغير يا لؤى 

بص الصياد باندهاش لانه لقى البحيره دى مليانه سمك ملون كتير اوى 

الجنى قال للصياد 

أرمى شبكتك يا صياد 

الصياد سمى الله و رمى الشبكه و بعد كدا سحبها و لقى فيها اربع سمكات واحده بيضا و التانيه حمرا و التالته زرقا و الرابعه صفرا ‏

الجنى قاله :

خد الأسماك دى لملك مدينتك و هو هيديك فلوس تخليك غنى لكن خلى بالك متصطادش هنا اكتر من مره فى اليوم.

تمام ...و انت هتروح فين دلوقتى؟

انا خلاص دورى خلص معاك مع السلامه يا صياد و اشكرك انك حررتنى 

اول ما الجنى خلص كلامه يا اولاد  ضرب الأرض برجله فانشقت الأرض و بلعته ‏. 

الصياد اخد السمك و راح للملك و الملك انبهر بالسمك لما شافه و كانت دى اول مره يشوف سمك زى دا

الملك أدى للصياد مبلغ مناسب الأربع سمكات 

و بقى كل يوم الصياد يروح البحيره الغامضه دى و كان يصطاد كل يوم اربع سمكات بيضا و حمرا و زرقا و صفرا و يروح يبيعها للملك

و من اليوم دا الصياد بقى غنى و بقى ولاده احسن حالا و بقوا سعدا 

الصياد بقى يشكر ربنا و يحمد فضله على نعم ربنا اللى لا تعد و لا تحصى .

و توته توته فرغت الحدوته حلوه و الا ملتوته ؟

حلوه اوى يا تيته 

ها ...هتحكيلنا ايه تانى 

لا انتوا تروحوا تناموا ... مفيش حواديت تانى انهارده 

حاضر يا تيته 

طب. فين بوسة تيته ؟

اهيه يا تيته 😘😘😘😘

تسلمولى يا حبايبى 

تصبحوا على خير 

و انتى من اهل الخير 

تمت