الجنيه ( كامله )
جزء 1
أنا فاتن أو تونه زى ما صحابى بينادولى هحكيلكم على حاجات غريبه اوى حصلت معايا من زمان و محفوره جوايا و مش ممكن انساها
لما كان عندى خمس سنين كنت نايمه فى اوضتى و مكنش لسه عندى أخوات و كان أبويا شغله بالليل و أنا و أمى فى البيت لوحدنا .
أمى نيمتنى فى سريرى و خرجت من الاوضه و أنا كنت عاوزه ألعب و مش عاوزه أنام و حاولت أغمض عنيا و بعد شويه لقيت الباب بيتفتح و بابا دخل على و قعد جنبى على سريري
فتحت عينى لقيته فرحت اوى و قلت له أنت رجعت يا بابا ؟؟ قالى أنا عرفت أنك مش جايلك نوم فجيت اقعد جنبك لغايه ما تروحى فى النوم و أروح الشغل و طبطب على جبينى و أنا مسكت ايده فى حضنى و نمت
أول ما صحيت الصبح دورت على بابا جنبى ملقتوش فقمت رحت لماما و دخلت صحيتها و قلت لها بابا فين يا ماما ؟؟
ماما قالت لى بابا فى الشغل يا تونه
قلت هو رجع الشغل تانى يا ماما
قالت رجع ايه ؟؟ هو من ساعه ما راح المغرب مجاش ما انتى عارفه
قلت لها لا يا ماما بابا رجع بالليل بعد ما نيمتينى و قعد جنبى لغايه ما روحت فى النوم
ماما ضحكت و قالت لا أكيد كنتى بتحلمى يا تونه قومى يلا البسي عشان اوديكى الحضانة
بس يا ماما ...
مبسش يلا يا شقيه بطلى رغى
ماما لبستني و رحت الحضانه و لما رجعت لقيت بابا نايم دخلت بوسته فصحى من النوم سألته هو انت يا بابا رجعت من الشغل امبارح و قعدت جنبى لغايه ما رحت فى النوم
قالى لا يا تونه أنا لسه راجع من الشغل من شويه ليه هو فيه ايه
قلت له يبقى أنا أكيد كنت بحلم زى ماما ما بتقول
رحت اوضتى و قعدت ألعب بلعبى لقيت حد بينادى على زى ما يكون صوت بنت صغيره و الصوت جاى من تحت السرير
شلت الملايه و بصيت ملقتش بنت بس لقيت قطه
ايه دا القطه دى جت منين ؟؟؟ أخدت القطه و قعدت ألعب معاها و اشربها من اللبن بتاعى
و قعدت أفكر لها فى اسم و اخترت لها اسم توته و قعدت ألعب و العب و انيمها جنبى و أقولها نامى يا توته تنام
تعالى يا توته تيجى
أمى خلصت الغدا و ندت على قولت لتوته استنى هنا هشوف ماما عاوزه ايه
ماما قالت يلا نتغدا
قلت لها أنا عاوزه آكل توته معانا
قالت توته مين ؟؟
قلت توته القطه بتاعتى
ماما اتخضت و قالت قطه فين القطه دى و ازاى تلعبى معاها دى أكيد مليانه حشرات و دخلت منين القطه دى تعالى وريهالى
دخلت الاوضه و قعدنا ندور على القطه ملقنهاش و ماما ساعتها اتهمتنى بالكدب و انى بألف قصص مره عن بابا و مره عن القطه 😳
و سمعتها عماله تقول لبابا بنتك هتجننى خيالها واسع و عماله تألف قصص
بابا قالها عشان معندهاش أخوات بتخلق أصحاب غير حقيقين و تعيش معاهم فى الخيال متقلقيش كل الأطفال اللى فى سنها بيعملوا كدا
أنا بقا سمعت كلامهم بس كنت متأكده أن فى توته و دخلت اوضتى ادور عليها
و نزلت تحت السرير اشوفها و فعلا لقيتها
أخدتها و قعدت ابوس فيها و قلت لها كنت عارفه أنك هنا يا توتى يا حبيبتى أكيد كنتى متخبيه من ماما
شاطره عشان ماما لو كانت لقتك كانت رمتك و أنا بحبك اوى . انتى صحبتى و أختى الصغيره
و أنا عماله اكلم القطه فجأه سمعت صوت بيقولى و أنا كمان بحبك اوى يا تونه 😍
عاوزين تعرفوا صوت مين دا استنونى فى الجزء الجاى
يهمنى اعرف رأيكم فى الجزء الأول من القصه
يتبع .......😊gg
#الجنيه
جزء2
فجأة سمعت حد بيقولى و أنا كمان بحبك يا تونه
قلت انتى مين ؟؟
قالت أنا صاحبتك توته
اتخضيت و سبت القطه من ايديا و جريت على بابا اترميت فى حضنه بلهفه
بابا حس أن فى حاجه غريبه فرفع رأسي و قالى مالك يا فاتن؟؟؟ حصل ايه ؟
قلت له هقولك يا بابا بس متقولش لماما
قال قولى يا حبيبتى
قلت له أنا لقيت القطه تانى و المره دى القطه كلمتنى و قالت لى أنها بتحبنى
بابا ضحك و قالى طب و هو فى قطه بتتكلم برده يا تونه ؟؟؟ انتى يا حبيبتى بيتهيالك
قلت لا و الله يا بابا طب بص ضافرها خربشنى لما جيت اشيلها
بابا بص على ايدى و سكت ايه دا الخربوش دا و نادى على ماما و قالها بصى البنت
ماما قالت له البت دى مش بتريح روحها أكيد اتخربشت فى أى حاجه
أنا بقا كنت خايفه ادخل اوضتى و رحت وقفت فى البلكونة شويه و لما تعبت روحت أنام جنب ماما
ماما قالت لى روحى نامى فى اوضتك يا فاتن
قلت لها أنا خايفه يا ماما
قالت بطلى دلع يلا البنات الحلوين يناموا فى اوضتهم
رحت الاوضه و قعدت ادور تحت السرير ملقتش حاجه قعدت فتره كبيره مش قادره أنام و فى الآخر غلبنى النوم
بعد الموقف دا قعدت أسبوع مشوفتش أى حاجه و كنت ابتديت أنسي
لكن حصل حاجه غريبه اوى كنت بلعب مع بنت جارتى اسمها سندس و اتخنقنا كاى طفلين عادى يعنى و كان معايا عروسه بحبها اوى
سندس خطفت من ايدى العروسه و هى بتتخانق معايا و طلعت تجرى
أنا وقفت اعيط و خفت ماما تعرف تضربنى لأنها منبهها على ما اخرجش بلعب بره الشقه
رجعت اوضتى و قعدت اعيط لغايه ما رحت فى النوم
لقيت توته جايه لى فى الحلم و بتقولى متزعليش أنا هجيب لك العروسه و هأدب لك البنت سندس دى
صحيت من النوم ببص جنبى لقيت عروستى
ايه دا ازاى العروسه جت هنا و فجأه سمعت صريخ
أمى فتحت الباب و انا جريت أشوف فى ايه
لقينا أم سندس شايلاها و بتجرى و تصوت و تقول بنتى بتموت
أنا ساعتها مكنتش فاهمه ايه اللى بيحصل بس بعد كدا فهمت 😳
دخلت اوضتى و مسكت عروستى و انا خايفه اوى منها رميتها على الأرض و خرجت لقيت أمى بتتكلم مع الجيران و بيقولوا أن البنت كانت نايمه و فجأه لقوها قامت تكح و وشها أزرق و بقت تطلع رغاوى من بقها زى ما يكون حد خانقها 😥
أمى دخلت و انا كنت خايفه اوى و قلت لها عايزه أنام جنبك يا ماما
ماما كان قلبها واجعها على البنت و قالت تعالى يا تونه و طبطبت على و اخدتنى فى حضنها و نمت
حلمت بتوته جايه لى فى الحلم و بتقولى قومى نامى فى اوضتك قلت لها لا انا هنام جنب ماما
قالت قومى يا فاتن و إلا متزعليش من اللى هعمله فى مامتك . أظن انتى شفتى بنفسك اللى حصل لسندس
أنا بس اديتها درس صغير كدا عشان متزعلكيش تانى و هترجع كويسه متخافيش عليها
بس انتى قومى دلوقتي روحى اوضتك أحسن لك
قمت من النوم مخضوضه و قعدت اعيط أمى صحيت على عياطى
مالك يا فاتن؟؟
قلت لها توته هتاذيكى يا ماما زى ما اذت سندس
ماما طبعا مصدقتنيش و قعدت تطبطب على و تقولى أهدى بس يا بنتى مفيش حاجه من دى
قلت لها أنا لازم أروح اوضتى أحسن هتاذيكى
ماما قالت يا بنتى مفيش الكلام ده متخافيش
أنا بقا صممت أروح اوضتى كنت خايفه على ماما
و سمعت ماما بتكلم بابا فى التليفون و بتحكيله على و بتقوله أحوال البنت مش عجبانى خالص هى لازم لها مساعده نفسيه . و اتفقت مع بابا يودونى لطبيبه نفسيه قريبه ماما .
أنا سمعت مكالمتهم و قعدت اعيط أن مفيش حد مصدقنى و لقيت ماما جايه تنام جنبى
اتطمنت بوجود ماما و رحت فى النوم
عايزين تعرفوا حصلى ايه بعد كدا استنونى الجزء الجاى ☺
يتبع ..........😊gg
#الجنيه
جزء 3
و لقيت ماما جت تنام جنبى
اتطمنت بوجود ماما و رحت فى النوم
حلمت أن فى تعبان كبيييير اوى اسود بيهاجم ماما و عايز ياكلها و ماما بتجرى منه و بتحاول تهرب بسرعه
أنا وقفت قدام التعبان و امرته أنه يقف مكانه و لقيته فعلا وقف و جه ناحيتى و أتحول لتوته
صحيت من النوم مخضوضه من الحلم اللى شفته و حسيت أن توته عايزه تاذى ماما 😢
و لقيت الفجر بياذن صحيت ماما و قلت لها يلا نصلى يا ماما طبعا ماما فرحت اوى لأنى كنت ساعتها صغيره و مكنتش اعرف اصلى اوى
ماما خدتنى و دخلتنى الحمام و اتوضت قدامى و أنا قلدتها و رحنا فردنا المصليه و صلينا الصبح
ماما قعدت تسبح و أنا قعدت اقول زيها لغاية ما النهار شقشق
ماما قالت اجى أنام معاكى بقا يا تونه انتى لسه خايفه؟
قلت لها لا يا ماما أنا خلاص مش خايفه
و رحت أنام شويه و صحيت على صوت ماما بتصحينى أروح الحضانه الساعه 8 الصبح
رحت الحضانه و قعدت ألعب مع اصحابى و كان لى صاحبه بحبها اوى اسمها رنا قعدت ألعب معاها و جرينا على المرجيحه هى سبقتنى و ركبتها و أنا زعلت و وقفت اعيط
لما رنا جت تنزل من على المرجيحه معرفش ازاى اتكعبلت ووقعت و رجلها اتكسرت
طبعا قعدت تصرخ و احنا كمان كلنا قعدنا نعيط عليها
و أنا زعلت اوى عشانها و المس طلبت الإسعاف و الإسعاف جت خدتها
و أنا واقفه زعلانه عليها لقيت صوت بيهمس فى ودنى و بيقولى أحسن عشان تحرم تجرى قبلك و تاخد المرجيحه منك
بصيت جنبى أشوف ايه الصوت دا ملقتش أى حد حواليا 😨😨😨. رحت قعدت على كرسي لوحدى و حطيت وشى على الترابيزه و قعدت اعيط.
لقيت ايد بتطبطب على و تقولى زعلانه ليه يا تونه ؟
رفعت راسي لقتها ماما
فرحت اوى و قلت لها يا ماما رنا انكسرت بسببي
ماما طبطبت على كتفى و قالت لا مش بسببك و لا حاجه انتى معملتيش حاجه هى اللى طماعه و غلطانه و كانت عايزه تسبقك باى طريقه
استغربت اوى ماما عرفت منين أن رنا كانت بتجرى على المرجيحه عشان تركب قبلى
ماما قالت لى قومى يلا اغسلي وشك عشان نمشي
رحت غسلت وشي و رجعت ملقتش ماما قعدت ادور عليها و سألت المس عنها قالت ماما مجتش خالص يا فاتن 😤
مصدقتش المس و قولت أكيد المس مشفتش ماما لما جت
بعد شويه الباص جه و ركبنا و روحت البيت
دخلت جرى على ماما و قلت لها انتى رحتى فين يا ماما؟ ؟؟
قالت أنا هنا فى البيت يا تونه
قلت لا لما جيتى لى الحضانه و روحت أغسل وشي انتى رحتى فين ؟
قالت أنا مجتش لكى الحضانه أصلا يا تونه
و لقيتها بتنده على بابا بعصبية و بتقوله يا عصام احنا لازم نودى البنت للدكتوره ضرورى انهارده
بابا قالها حاضر حاضر أهدى شويه مالك بس مش كنتى بتقولى أنك رايحه تزورى أم سندس و تشوفى سندس عملت ايه
قالت ايوا هلبس و أروح أهو
قمت أنا رديت و قلت لها سندس كويسة يا ماما متخافيش عليها
ماما بصت لى باستغراب و دخلت لبست هدومها
و جت تروح قالت لى تيجى معايا يا تونه مش سندس دى صاحبتك ؟؟
قلت لها ماشي اجى . و أخدت العروسه فى أيدى 👯
طلعنا لسندس و لقيتها قاعده ساكته بتبص لى و خايفه منى😳😎
ماما قالت لها قومى يا سندس العبى مع فاتن
سندس صرخت و قالت لا و دخلت جرى على جوه
أمى استأذنت من ام سندس و نزلنا من فوق و لقيتها بتبصلى كدا بصه غريبه
عايزين تعرفوا حصلى ايه بعد كدا استنونى الجزء الجاى ☺
يتبع ........😊gg
#الجنيه
جزء 4
بعد ما نزلنا من عند سندس لقيت أبويا لبس و قال لماما يلا ميعاد الدكتوره
رحنا للدكتوره ست هاديه و لطيفه اوى أول ما شافتنى ادتنى شيكولاته و قعدت تهزر معايا
ماما و بابا حكوا لها على الحاجات اللى أنا بعملها و هى كانت بتبتسم و تدون ملاحظات فى اجنده معاها
و بعدين قالت لهم طيب من فضلكم استنونى بره
و ابتدت الدكتوره تتكلم معايا و تسألني و مكدبتنيش خالص زى ما ماما بتعمل بل بالعكس كانت مصدقانى و مهتمه اوى بكلامى و دا شجعنى اوى انى أحكى لها عن توته و عن أنها بتاذى أى حد يحاول يضايقنى
الدكتوره سمعت منى و خلتنى احكيلها على كل اللى جوايا
و بعدين دخلت أبويا و أمى و قالت لهم البنت مفيهاش أى حاجه غريبه
البنت بس حساسه شويه و نفسها يكون عندها أصدقاء و كل اللى فى سنها بيكونوا كدا متقلقوش
و نبهت على ماما أنها لو شافت توته متطردهاش لأن فاتن بتحبها و هى بتحاول تحمى فاتن
طبعا أمى كانت بتسمع الكلام باندهاش و لقيت أبويا بيبتسم و بيقول حاضر هو احنا لينا بركه إلا توته 😊
خرجنا من عند الدكتوره بابا جاب لنا آيس كريم و مرجحنى شويه و رجعنا البيت
بعد الموضوع ده مشفتش توته خالص و كنت ساعات بتمنى اشوفها علشان ألعب معاها
مرت حوالى خمس سنين و لقيت أمى بتقول لابويا أنها حامل
فرحت اوى أن هيكون لى أخت أو أخ
و ابتدت أمى تجهز سرير للمولود و تجيب له لعب و ملابس
بعد شهور ربنا رزقنا برامى أخويا كنت فرحانه اوى بيه و بقيت اتحايل على ماما انى اشيله و ماما مكنتش ترضى
و فى يوم ماما كانت منيمه رامى على الكنبه و هو عمر شهر و دخلت المطبخ و أنا كنت قاعده بكتب الواجب .
و فجأه لقيت رامى واقع على الأرض و عمال يصرخ جريت عليه و لقيت أمى طلعت من المطبخ على الصوت و جت شالت رامى بسرعه من على الأرض و اتهمتنى انى أنا اللى وقعته و انى غيرانه منه و لأول مره أمى تمد ايدها على و تضربنى ضرب جامد اوى لدرجه أنها عورتنى فى أيدى و أنا قعدت أحلف لها انى و الله ما قربت له بس هى مصدقتنيش و قالت لى يا كدابه انتى اصلا طول عمرك كدابه أمشي يلا على اوضتك
جريت على الاوضه و قعدت اعيط يجى ساعه و هى مدخلتش على تصالحنى و كنت حاسه أنها ظلمتنى و أنها بتفضل أخويا الصغير على 😢
رحت فى النوم من كتر العياط و لقيت ست جايه لى فى الحلم شكلها جميل اوى و لابسه لبس جميل و بتطبطب على و بتقولى متزعليش يا تونه يا حبيبتى
قلت لها أنا معملتش حاجه لرامى و ماما ضربتنى و أنا معملتش حاجه
ردت و قالت أنا عارفه و شفت كل حاجه متزعليش
بصيت لها و قلت لها انتى مين ؟؟
قالت أنا نورسين أنا بحبك اوى يا فاتن
قلت لها هو انتى تعرفينى؟
قالت طبعا من أول ما اتولدتى و أنا معاكى
قلت لها معايا فين ؟ أنا أول مره أشوفك
قالت لا أنا على طول جنبك و حواليكى و بحاول احميكى
بصيت لها كدا و أنا مستغربه و قمت من النوم
من اليوم دا بقت نورسين تزورنى كل يوم فى احلامى و ابتديت اخد علي وجودها و استناه
بقت هى صاحبتى الوحيده و بقيت اقعد لوحدى و مش عاوزه اكلم اى حد حتى أمى و أبويا
أبويا و أمى لاحظوا انى بقيت اقعد لوحدى و لقيت بابا بينادينى و يقولى انتى ليه قاعده لوحدك على طول يا تونه ؟؟
قلت مفيش يا بابا
ردت أمى تلاقيها غيرانه من اخوها هى اتغيرت كدا من أول ما اتولد
بصيت لها و سكت مرضتش ارد عليها
و دخلت اوضتى حزينه من كلامها و بقيت أتمنى أنام عشان الاقى نورسين اشتكيلها
و فجأه لقيت نورسين قاعده جنبى على السرير
عايزين تعرفوا عملت ايه لما شفت نورسين لأول مره على الطبيعه استنونى الجزء الجاى
يتبع ..... 😊gg
#الجنيه( جزء ٥ ؛ ٦ ؛ ٧ ؛ ٨ ؛ ٩)
جزء 5
و دخلت اوضتى حزينه من كلامها و بقيت أتمنى أنام عشان الاقى نورسين اشتكيلها
و فجأه لقيت نورسين قاعده جنبى على السرير مصدقتش عنيا و افتكرت انى بحلم لكن حسيت بايدها بتطبطب على و تقولى متزعليش يا فاتن أنا عارفه أن أمك زعلتك و كل دا بسبب رامى اخوكى
قلت لها انتى ازاى جيتى هنا انتى مين ؟
قالت أنا اكتر واحده بتحبك فى الدنيا و هتعرفى دلوقتي بحبك أد ايه
نورسين اختفت . بصيت حواليا ملقتهاش قلت أكيد بيتهيألي 😯
فجأه سمعت أمى بتصرخ 😰😰
فتحت الباب و لقيت أمى بتلطم و تقول رامى مات 😨😨😨😨😨😭😭😭😭
جريت عليها و قلت رامى مات ازاى
قالت مات استريحتى يا أختى استريحتى
مات اللى كنتى غيرانه منه مات اللى كان تاعبك مات
أبويا كان لسه رايح الشغل أمى اتصلت عليه لحقته و هو على باب الشارع
ألو يا عصام تعالى يا عصام رامى مات رامى مات يا عصام
و لقيت أبويا فى دقيقه واحده كان فى البيت و اخد رامى من على دراع أمى و جرى و أمى جريت وراه و أنا وراهم
أبويا أخده على مستوصف قريب مننا و الدكتور كشف عليه و قاله البقاء لله الطفل اتوفى
أمى قعدت تصرخ تصرخ لغايه ما اغمى عليها
و أبويا قعد فى الأرض مقدرش يقوم
و أنا قعدت اعيط 😢
الدكتور فوق امى و الجيران قوموا أبويا من الارض و راحوا معاه خلصوا تصريح الدفن
و فى ست كبيره جارتنا أخدت رامى غسلته و كفنته و اخدوه علشان يدفنوه
أنا كل دا مكنتش مدركه رامى مات ليه أو ايه السبب فى موته
معرفتش ألا لما دخلت اوضتى و قعدت لوحدى اعيط لقيت نورسين ظهرت
قلت لها شوفتى يا نورسين أخويا مات و معدش لى أخ
قالت منا عارفه
قلت لها عارفه ازاى ؟؟
قالت اخوكى كان لازم يموت علشان فاتن متزعلش تانى كدا أمك مش هتفضل عليكى حد تانى و مش هتضربك تانى عشانه
بصيت لها باستغراب هل اللى فهمته دا صح ؟؟؟😨
انتى اللى موتى أخويا ؟
قالت لا أنا مموتوش بس ساعدت فى كدا
قلت لها ازاى ساعدتى فى كدا ؟؟
قالت اخوكى اتقلب على وشه و كان محتاج أن حد يعدله و أمك كانت لسه هتدخله و كانت هتشوفه و تعدله طبعا
قمت أنا عملت حركه فى المطبخ ووقعت حلل كانت هى رصاها
فهى اتخضت من الصوت و دخلت جرى تشوف فى أى فى المطبخ أنا بقا ظهرت لها على شكل قطه و انتى عارفه ازاى أمك مبتحبش القطط جريت ورايا و قعدت تطاردنى لغاية ما طردتنى من الشقه طلعت بره الشقه مع طلوع روح رامى 😈
أمك دخلت عليه لقيته قطع النفس و بدأت تصرخ زى ما شفتى
أنا سمعت كدا و قلت لها انتى مجرمه مجرمه و قمت اهجم عليها عشان اضربها لقيت كان جسمى كله اتشل
مش قادره اتحرك
و لقيتها بتقولى دا بدل ما تشكرينى انى خلصتك منه ؟
مش دا اللى أمك بتذلك عشانه ؟ مش دا اللى بتضربى بسببه ؟؟
على العموم أنا بحبك برده و مش هسيبك و مش هخلى اى حد ياذيكى انتى فاهمه
و ضحكت ضحكه عاليه حسيت أنها رجت الاوضه
و فجأه اختفت و لقيت جسمى اتفك لكن حسيت أن جسمى مكسر اوى
نمت على السرير و أنا ببكى على رامى و على المصيبه اللى أنا فيها
هعمل ايه ؟ أقول لمين ؟ محدش هيصدقنى
اعمل ايه يا ربى
عايزين تعرفوا فاتن عملت ايه استنونى فى الجزء الجاى
يتبع .........😊gg
#الجنيه
جزء 6
نمت على السرير و أنا ببكى على رامى و على المصيبه اللى أنا فيها
هعمل ايه ؟ أقول لمين ؟ محدش هيصدقنى
اعمل ايه يا ربى
قعدت طول الليل منمتش . خرجت من اوضتى لقيت أبويا قاعد ساكت على كرسي من كراسي الانتريه
دورت على أمى بعنيا ملقتهاش
رحت لها اوضتها لقيتها حاضنه هدوم رامى و قاعده تعيط
أول ما شافتنى اخدتنى فى حضنها و قعدت تعيط و تقول اخوكى مات يا فاتن معدش ليكى أخ . أنا السبب أنا السبب
بقيت اطبطب عليها و اعيط و كان نفسي أصرخ و أقولها أنا السبب
نورسين مش هتسيبنى فى حالى
أمى مكنتش اكلت حاجه فرحت المطبخ و عملت لها فطار هى و بابا و بقيت أعملها أى حاجه هى عوزاها و بقيت قاعده تحت رجليها
و فى آخر اليوم دخلت اوضتى و حاولت أنام شويه لقيت نورسين ظهرت
و لأول مره الاقى على وشها نظرة غضب و لقيتها بتقولى :
- انتى ايه اللى بتعمليه دا ؟
- بعمل ايه يعنى ؟؟
-انتى نسيتى اللى أمك عملته فيكى؟
- أمى معملتش فى أى حاجه وحشه أمى أكتر واحده فى الدنيا بتحبنى
- صرخت نورسين و قالت لااااااااا أنا أكتر واحده بحبك أنا أمك مش هى
- قلت لها ممكن أسألك سؤال يا نورسين
- قالت طبعا يا حبيبتى
- انتى جيتى لى ازاى أو حبتينى ليه زى ما بتقولى ؟إشمعنى أنا يعنى ؟ ليه مش أى حد تانى
- هقولك يا فاتن ..
أنا ولدت بنت جميله سميتها لورين ليلة ما أمك ولدتك لكن بنتى دى بعد أيام ماتت 😢
بقيت ألف مشارق الأرض و مغاربها مش قادره اصدق أنها ماتت و فى يوم و أنا ماره ببيتكم سمعت صوت صراخك و كان عمرك أسبوعين تقريبا
صراخك وجع قلبى و فكرنى ببنتى لقيت نفسي غصب عنى دخلت لكى لقيتك لواحدك و أمك مش موجوده
و انتى عماله تصرخى خايفه و جعانه و أمك سايباكى وواقفه مع واحده من الجيران و مش سامعاكى و انتى عماله تنحرى من العياط
دخلت عليكى و بصيت لوشك لقيتك تشبهى بنتى لورين شلتك من على السرير و رضعتك
انتى سكتى و بقيتى تبصى لى و تبتسمى و إيدك الصغيره مسكت اديا و مكنتيش عايزه تسبيها
أمك كانت بتسيبك فى الاوضه لوحدك و أنا كنت كل ليله بجيلك ارضعك و أنام جنبك و اشيلك لو قلقتى بالليل
انتى بنتى يا فاتن و مش هسمح لأى حد أنه يضرك او ياذيكى و مش هسمح لكى تحبى حد غيرى انتى فاهمه - أنا سمعت الكلام ده و مكنتش مصدقه ودانى أنا راضعه من جنيه ؟؟ معقوله الكلام ده ؟ أكيد نورسين بتكدب على أنا لازم اسأل و اعرف
خرجت من اوضتى و روحت لبابا
محتاج حاجه منى يا بابا ؟
- لا يا حبيبتى متشكر ادخلى نامى
- كنت عايزه أسألك على حاجه يا بابا
- اسالى يا حبيبتى
- هو انتوا من أمتى بتسيبونى أنام لوحدى فى اوضتى ؟
بصى يا ستى أمك كانت بتحطك فى سرير بيبي صغير جنبها الكلام دا أول أسبوعين تقريبا لغايه ما واحده جارتنا اقنعتها أنها لازم تعودك من و انتى بيبي كدا تنامى لوحدك فى اوضتك و فعلا أمك كانت تسيبك فى اوضتك بعد ما ترضعك
و جربنا أول ليله لاقيناكى معيطيش و لا اى حاجه بل بالعكس بتنامى طول الليل و تصحى تجيبك من هناك كأنك كنتى طول الليل نايمه فى حضنها . بل بالعكس بقا لما كانت تحاول تنيمك بالنهار على سريرنا كنتى تقعدى تصرخى و متعرفيش تنامى خالص و كانت تضطر توديكى تنامى فى اوضتك . و سبحان الله لما اخوكى رامى اتولد أمك حاولت تعمله زى ما عملت معاكى بس كان على طول يعيط و أمك كانت تقولى أن الواد دا مختلف خالص عن أخته و أنه عاوز دايما ينام فى حضنها بعكسك انتى
- سمعت الكلام من بابا و اتاكدت أن كلام نورسين صحيح 😥
طيب أنا هتصرف دلوقتي ازاى ؟
دخلت اوضتى لقيت نورسين قاعده على سريري و بتضحك لى بمكر و بتقولى ها خلاص اتاكدتى من كلامى ؟
هزيت راسي بمعنى أيوه
لقيتها بتقولى انتى من هنا و رايح بتاعتى أنا بنتى أنا
مش عاوزاكى تسمعى كلام حد غيرك
و لو حد نادى عليكى متسمعيش كلامه و أنا أوعدك انى قريب خالص أخدك تعيشي معايا على طول و مش هنفترق خالص
أنا سمعتها بتقول كدا و خفت اوى اوى و معرفتش أرد عليها
هتاخدنى فين ؟ ازاى اسمع كلامها هى بس ؟ ازاى مش هشوف أمى و ابويا؟
ازاى ؟؟؟؟؟
عايزين تعرفوا حصل ايه لفاتن مع الجنيه نورسين استنونى الجزء الجاى ☺
يتبع ......😊gg
#الجنيه
جزء 7
هتاخدنى فين ؟ ازاى اسمع كلامها هى بس ؟ ازاى مش هشوف أمى و ابويا؟
ازاى ؟؟؟؟؟
بعد كدا ابتدى ظهور نورسين فى حياتى يكون بشكل كبير و ابتدت تفرض على اقعد معاها فى اوضتى على طول
و طبعا اهلى ما اخدوش بالهم اوى لانهم كانوا مشغولين بموت رامى
و أمى دخلت فى اكتئاب شديد و بقت هى كمان مبتكلمش حد و على طول نايمه و دموعها على خدها
و طبعا ابويا بيروح الشغل و يرجع ينام و خلاص
فى الفتره دى نورسين بقت تمارس على دور الأم و بقت تحدد لى أمتى أنام و امتى آكل و امتى ألعب
و أنا طبعا علشان كنت صغيره و كنت خايفه منها مكنتش أقدر أقولها لا
و استمر الحال شهور كل واحد مننا عايش فى وادى
لغايه ما فى يوم سمعت الباب بيخبط فتحت لقيت خالى سامح
أول ما شفته فرحت اوى و هو أول ما شافنى حضنى و قالى و الله كبرتى و بقيتى عروسه يا تونه
قلت له انتى وحشتنى اوى يا خالو
خالى سامح على طول بيسافر و مشفتوش فى حياتى إلا كام مره كدا
طبعا أمى أول ما سمعت صوته خرجت و سلمت عليه و مقدرتش تمسك دموعها و هو قالها البقاء لله يا عايده انتى مالك عملتى كدا ليه دا أنا معرفتكيش انتى خسيتى اوى و زى ما يكون كبرتى فى السن خمسين سنه
قالت له ما انت عارف اللى حصلى يا سامح
رد خالى لله ما أعطى و لله ما أخذ يا أختى و دا قضاء الله و قدره و أن شاء الله يكون لك فى الجنه
خالى قعد يتكلم مع أمى و لقيتها بتبسم و دى كانت أول مره اشوفها بتبتسم من ساعه الحادثه
و بقى خالى كل يوم يحلف على أمى يأخذنا و نخرج علشان يخفف عليها شويه و يخرجها من الحاله اللى هى فيها و فعلا أمى اتحسنت كتير اوى و علاقتها بى اتحسنت أكتر من الأول
كل يوم خالى ياخدنا نتفسح فى مكان مره حديقه الحيوان و مره الأهرامات و مره القلعه و الحديقه الدوليه
كنت سعيده اوى بالخروج كل يوم و كان خالى بينام فى السرير اللى جنبى و دا طبعا مكنش بيخلى فيه فرصه لظهور نورسين
و فى يوم خالى دخل الحمام ياخد دش و أنا دخلت اوضتى لقيت نورسين قاعده على سريرى و الشرار بيتطاير من عنيها من الغضب و بتقولى
- ايه اللى بيحصل دا ؟؟ انتى ازاى تعملى كدا
قلت لها و انتى مالك سبينى فى حالى . ابعدى عنى
لقيتها اتنرفزت أكتر و قربت منى حسيت كان نار مقربه عليا لدرجه انى حسيت أن حرارتى ارتفعت
قالت حاضر أنا هوريكى يا فاتن ازاى تتحدينى
اختفت نورسين و أنا حسيت بالفزع الشديد
و فجأه سمعت صوت انفجار و لقيت خالى بيصرخ
جريت أنا و أمى على الصوت لقينا الحمام مدمر و السخان منفجر و خالى مرمى على الأرض محروق فى اكتر من مكان فى جسمه 😢😢
طبعا أمى قعدت تصرخ و جريت على التليفون اتصلت بالاسعاف
و جت الإسعاف اخدته و أنا كنت ببكى على خالى و ببكى عشان عارفه مين السبب فى اللى حصله و ببكى على حالى
و أن كل دا بيحصل بسببي أنا 😥
أنا بقيت لعنه على كل اللى حواليا . لعنه مش هتنتهى إلا بموتى 😌
يتبع. .........😢 gg
#الجنيه
جزء 8
كل دا بيحصل بسببي أنا 😥
أنا بقيت لعنه على كل اللى حواليا . لعنه مش هتنتهى إلا بموتى 😌
رحنا مع خالى المستشفى و كان فى حروق من الدرجه التانيه
و الدكتور طمنا أن الحروق 30 فى الميه من الجسم و أنه ان شاء الله ربنا هينجيه
بقينا كل يوم نروح لخالى و بقيت أحاول دايما انى أكون متواجده مع اى حد على طول و مسبش فرصه لنورسين تظهر لى
و فى مره و أنا قاعده جنب خالى فى المستشفى أمى راحت للدكتور و أنا قعدت جنبه
خالى فتح عنيه لقانى جنبه أبتسم لى و قالى أهلا تونه
قلت له حمدالله على سلامتك يا خالو
الله يسلمك يا حبيبتى
سامحنى يا خالو
اسامحك على ايه يا فاتن انتى ذنبك ايه ؟؟
أنا السبب فى اللى حصل لك و فى اللى حصل لرامى
أنا السبب فى اى حاجه وحشه بتحصل إلى حواليا
- انتى بتقولى ايه ؟؟؟ السبب ازاى يعنى ؟
- أنا قلت لهم زمان و هما مصدقونيش
- قلتى ايه و قلتى لمين فهمينى يا بنتى
و لسه هتكلم لقيت نورسين ظهرت خلف الشباك و بتبص لى بصه تحذير خلتنى اترعب منها و الكلام وقف فى زورى
و لقيتنى بقول لخالى هو انت بتصدق كدا اى حاجه أنا بهزر معاك
خالى أبتسم ابتسامه كدا أنه مش فاهم و مش مصدق و زى ما يكون حس ان فى كلام كنت عايزه اقوله و مقولتوش
أمى دخلت و قعدت تتكلم مع خالى شويه و هو كل شويه يبص لى
أمى استأذنت و روحنا و دخلت اوضتى لقيت نورسين ظهرت لى
و قالت لى انتى كنتى عايزه تقولى لخالك على صح ؟؟
انتى عارفه يا فاتن لو قلتى لخالك هيحصل ايه ؟؟
هتزعلى اوى اوى عليه و مش هيكون لكى خال اسمه سامح تانى
حطى عقلك فى رأسك انتى تعبتينى اوى معاكى و أنا بس مستنيه يكون عندك 16 سنه و هاخدك معايا
كنت بسمع كلامها و أنا مش قادره أنطق و اختفت نورسين و أنا قعدت اعيط 😢😢😢
بعد شهر خالى خرج من المستشفى و حالته اتحسنت كتير و جه قعد معانا فى البيت
و طول الوقت شايفه فى عينه سؤال و بحاول أهرب منه
و فى مره أمى كانت بالمطبخ و لقيت خالى بيقولى أنا عايز أسألك عن حاجه يا فاتن ؟
أنا عايز اعرف معنى الكلام اللى قلتيه فى المستشفى
و متقليش كنت بهزر لأنى مش هصدقك
أنا حاسس أنك فى مشكله و محتاجه حد يساعدك
متخافيش احكيلى و أنا هساعدك
- مقدرش يا خالى احكيلك اى حاجه
- ليه يا فاتن
- لأن لو حكيت لك هيكون تمن كدا حياتك
- حياتى انا ازاى ؟؟؟
- أرجوك يا خالى متضغطش على لأنى مش هتكلم
- طيب خلاص يا فاتن انا مش هضغط عليكى بس فى اى وقت حسيتى انك عايزه تتكلمى مع حد انا موجود و لو حتى هيكلفنى حياتى زى ما بتقولى
هزيت راسي و أنا جوايا نار نفسي أصرخ و اقوله و أخلص نفسي و عيلتى من الكابوس دا بس مش قادره
دخلت اوضتى لقيت نورسين قاعده على سريرى و بتقولى شاطره يا تونه
سمعت خالى بيسال أمى هو رامى مات ازاى يا عايده
أمى حكت له و قعدت تعيط
قالها طب انا عايز أسألك عن فاتن هل قالت لكم فى يوم ان حد بيحاول ياذيها او ياذيكوا
قالت ااه كانت و هى لسه فى الحضانة اخترعت لنا كدا حكاية قطه اسمها توته و قعدت تقول توته هتاذيكى يا ماما و أنا أخدتها لدكتوره نفسيه و حلت معاها المشكله و من يومها مجبتش سيرة توته دى تانى
خالى سكت و متكلمش
و أنا قعدت اعيط كالمعتاد و قررت انى انتحر علشان اخلصهم كلهم من لعنتى دى 😢
يا ترى هو دا اللى عاوزاه نورسين ؟ دا اللى هنعرفه فى الجزء الجاى
يتبع ........😊gg
#الجنيه
جزء 9 و الاخير
قعدت اعيط كالمعتاد و قررت انى انتحر علشان اخلصهم كلهم من لعنتى دى 😢
لازم اتخلص من حياتى علشان أحافظ على حيات الناس اللى بحبهم
لازم اتخلص من حياتى قبل ما تم ال16 سنه و تاخدنى معاها
دا الكلام اللى كان بيتردد جوايا و مبيفارقنيش ابدا
و قعدت أفكر أن أكيد ربنا هيسامحنى لأنى باللى هعمله دا هحمى خالى و أمى و ابويا
طيب هموت نفسي ازاى ؟؟؟
مقدرش اضرب نفسي و لا اعورها
طب اشنق نفسي و دى كمان صعبه اوى هحس بألم رهيب و أنا بموت
طب ارمى نفسي فى البحر بس دى كمان فيها غرق ووجع قلب
أنا احسن حاجه انتحر بالحبوب اخد كميه كبيره تموتنى
أنا هدخل اتسحب و أجيب كل الحبوب اللى فى الاجزخانه بتاعه الحمام
بس أنا لازم أكتب لهم رساله اعتذرلهم فيها عن اى ألم سببته لهم
بابا حبيبي ... ماما حبيبتى
أنا اسفه عن كل لحظه سببت لكم ألم فيها أنا اخترت التخلص من حياتى علشان احميكم كلكم
كل اللى حصل من أحداث سيئه كان بسبب وجودى
و لذلك قررت انى اخلصكم من اللعنه اللى اصابتكم دى
أنا مش عاوزاكم تزعلوا منى و حاولوا تدعولى دايما
أنا بحبكم جدا
بنتكم فاتن
كتبت الرساله و حطيتها على المكتب و فرغت كل الحبوب قدامى و أخدتها كلها
بعد شويه لقيت الدنيا بتلف بيا و جالى مغص رهيب و بقيت مش قادره أقف على رجليا حتى مكنتش قادره انادى على حد ينجدنى
و فجأه ظهرت لى نورسين و على عكس ما كنت أظن أنها هتزعل بموتى لقيتها فرحانه اوى و بتقولى انتى كدا سهلتى على كتير ووفرتى على الوقت لأن قوانينا تمنع انى اجيبك معايا و انتى عندك أقل من 16 سنه
لكن فى حاله موتك ممكن اخد روحك معايا بسهوله و تيجى تعيشي معايا للأبد
أنا هقعد جنبك هنا عشان اضمن أنك متخرجيش صوت و حد من أهلك يلحقك
هنا أدركت انى ساعدت نورسين مش بعدتها عنى لا دا أنا سلمت لها نفسي لما سمعت كلام شيطانى
قعدت اعيط و أنا بتقطع و ادعى ربنا
يا رب أنا عارفه انى غلطت بس بابا كان دايما يردد ايه
أمن يجيب المضطر إذا دعاه
يا رب أنا محتجالك و عارفه أنك مش هتخذلنى ابدا
يا رب أنا غلطت و شيطانى ضحك على و غلطت لما نسيت أن لى رب عظيم أعظم من نورسين و من العالم بتاعها
يا رب غيثنى بجنود من عندك يا رب انصرنى عليها أنا بك أقوى
يا رب مليش غيرك انجدنى يا رب و ابعت لى اللى يساعدنى
كنت فاكره و متأكده ان ربنا هيبعت لى أمى او خالى او ابويا عشان يساعدونى
لكن اللى لقيته من كرم ربنا كان أعظم بكتير
لقيت فجأه ظهر فارسين لابسين ابيض و ماسكين كل واحد حربه فى ايده
أول ما نورسين شافتهم انزعجت جدا و حاولت تهرب لكن الفارسين مسكوها و قتلوها بالحربه اللى معاهم
قلت لهم و أنا مش قادره اتكلم
انتوا مين ؟
قالوا احنا عباد الله من الجن المسلم سمعنا استغاثتك و سمعها كثير من الجن المسلم و جئنا لاغاثتك يا أمة الله
اعلمى يا أمة الله أننا ما أتينا اليكى إلا نصره لله الواحد الحق حين استغثتى بالله
و نحن جند الله و الآن سياتى من أهلك من ينقذك باراده الله عز و جل
اوصيكى أمة الله إلا تقنطى من رحمة الله
اختفى الفارسين و لقيت أمى داخله على و لقتنى واقعه و مش قادره أرد عليها
صرخت و جه خالى و بابا شالونى وودونى المستشفى عملولى غسيل معده و حطونى تحت الملاحظة
و لما فقت بابا و ماما كانوا زعلانين منى اوى
بابا قالى كدا يا فاتن كنتى عايزه تحرقى قلبى عليكى يا بنتى انتى متعرفيش ان اللى يموت نفسه يموت كافر و العياذ بالله و جزائه جهنم لأنه قنط من رحمه الله
قلت له أنا اسفه يا بابا أوعدك معملش كدا تانى
خرجت من المستشفى و خالى سامح قعد جنبى و سالنى
أنا بقا لازم اعرف الحكايه منك كلها و هصدقك فى كل حرف هتقوليه
حكيت لخالى على كل حكايتى و هو صدقنى و أظهر تعاطف شديد معايا
و من اليوم دا مبقتش أشوف نورسين خالص الحمد لله و بقت حياتى طبيعيه جدا
و ربنا رزقنا كمان باحلى اخين توأم ملين علينا الدنيا
بس خلاص بكرا هسيب لهم البيت
بكرا فرحى على رؤف حبيبي و انتوا كلكم مدعوين طبعا 😍😘😘😘
مفيش مبروك 😂
تمت 😊
أرجو أن القصه تكون نالت اعجابكم و أدخلت على ارواحكم شيئ من السعاده . لو عجبتكم القصه أرجو الدعاء لوالدى رحمة الله عليه بالرحمة و المغفره
د. جيهان عادل 😊
 جزء 1 أنا فاتن أو تونه زى ما صحابى بينادولى هحكيلكم على حاجات غريبه اوى حصلت معايا من زمان و محفوره جوايا و م…){kind=link}
تعليقات
إرسال تعليق