عنبر خمسه الجزء الثالث عشر

#عنبر_خمسه

#الجزء_الثالث_عشر

يعنى كان دايما يبص لها بإعجاب و شفتهم كذا مره بيتوشوشوا سوا لما بابا كان بيسيب المكان 

طب و ده خلاكى تحبيه ؟؟

كنت عاوزه أبعده 

و بعد ؟؟؟؟

نجحت انى أبعده فتره بس ...

انتى حبتيه ؟؟

لا ..عادى يعنى 

و عشان كدا قتلتيه ؟؟

انا مقتلتوش 

ازاى مقتلتوش فهمينى 

انا صحيت لقيته مات لوحده...موته بشعه بشعه

طيب أهدى... احكيلى من اول ما لاحظتى أنه بيهتم بوالدتك و ازاى جذبتيه ليكى 

سامر كان صديق بابا ..راجل وسيم  كان فى أواخر الأربعينات ...كان شخص ناجح جدا و عملى بطريقه مذهله مبيضيعش وقت نهائى ...لو جت قدامه فرصه مناسبه لا يمكن يضيعها 

كنت ساعات اشوف والدتى بتبص له بصه انبهار... بصه اعجاب عمرى ما شفتها بتبص لوالدى بالشكل ده 

فى الاول كنت صغيره و مكنتش اخد بالى معنى البصه دى ايه ...لكن اما كبرت شويه ابتديت افهم حاجات كتير مكنتش فاهماها 

بقيت اشوفها تاخد تليفونها و تتكلم بصوت واطي مع حد انا معرفوش و كنت ساعات لما ادخل عليها فجأه كانت تضطرب و تسكت أو تنهى بسرعه المكالمه 

لما اتكررت الحركه دى ادامى اكتر من مره انا شكيت فى الموضوع و ابتديت اراقبها من بعيد لبعيد 

لقيتها انها بتهتم اوى بنفسها لما تعرف أن سامر جاى عندنا البيت و عينيها تلمع بشكل عجيب و تحس انها رجعت عيله صغيره بترقق صوتها و تتعامل بشكل غريب 

طب ووالدك مكنش ملاحظ الكلام ده ؟

والدى كان اطيب راجل فى الدنيا مكنش يعرف معنى الخيانه ...خياله ميجيش أن مراته ممكن تفكر فى غيره ...كان بيتعامل مع الموضوع أن ده صاحبه و دى مراته و كلنا أصحاب و حبايب 

فضل الشك فى قلبى يكبر بس مفيش عندى اى دليل لحد ما فى يوم تليفونها كان على التربيزه و جالها رساله منه فيها كلمتين اتنين 

هستناكى الليله 

انا شفت الرساله و مصدقتش نفسي ...يعنى ايه هستناكى الليله ؟؟ مش قادره استوعب انى امى بتخون ابويا 

طب ليه ؟؟ بابا ده احسن راجل فى الدنيا ...بابا موفر لها كل اللى تشاور عليه ...بابا شكلا جميل ووسيم برده طب ليه ؟؟؟ 

مكنتش عارفه اتصرف ...دماغى اتشلت من التفكير ...بابا لو عرف أن صاحبه الوحيد و مراته بيخنوه ممكن يروح فيها ...انا خايفه عليه هو مش عليهم 

كل اللى جه فى دماغى انى امسح الرساله بسرعه و بعد كدا افكر هعمل ايه بعد كدا 

فى اليوم ده لقيت والدتى فعلا بتلبس و بتجهز نفسها و كانت قايله لبابا انها هتروح تقابل صحابها فى النادى و طبعا بابا معترضش و لا شك فيها نهائى 

فى اليوم ده كنت هتجنن عاوزه امنعها من الخروج بأى طريقه ...بس ازاى ؟؟

فكرت انى اعمل تعبانه و فعلا بدأت اصرخ و امسك بطنى 

بابا جه جرى على الصوت 

مالك يا ساتو ..فى ايه يا حبيبتى

بطنى يا بابا بطنى بتتقطع 

ماما هى كمان جت و قالت فى ايه يا احمد 

ساره تعبانه يا اعتدال 

عندك ايه يا ساره ؟؟

بطنى يا ماما ...بطنى بتتقطع الحقينى 

طب هخلى الخدامه تعملك حاجه دافيه تشربيها 

لا يا ماما ...بقولك بموت الحقينى 

بابا قال لازم نروح للدكتور مفيش غير كدا 

ماما وقفت و هى متردده و قالت له طب و ميعادى مع الناس يا احمد ؟؟

ميعاد ايه يا اعتدال ؟؟ البنت بتموت قدامك و تقوليلى الناس 

طيب هروح اعتذرلهم فى التليفون على ما تلبس 

و فعلا راحت ماما اعتذرت لسامر و لغت الميعاد و انا فى اليوم ده رحت للدكتور و ملقاش فيا اى حاجه طبعا بس ادانى حاجات للانتفاخ و شويه فيتامينات 

ماما طبعا كانت راجعه مضايقه وكل شويه تنفخ و تقول لبابا عاجبك الدلع بتاعها ده ؟ اهو الدكتور قال معندهاش حاجه 

بابا قعد يضحك و يقولها يا ستى احمدى ربنا ...كويس انها سليمه 

الصراحه انا اللى حمدت ربنا فى الليله دى انى نجحت انى اعطلها و مخليهاش تروح له 

طول الليل قعدت افكر ازاى أبعدها عنه و جه فى دماغى فكره انى لازم ادخل فى الموضوع 

و فعلا ابتديت اكلم سامر و المح له انى معجبه بيه و أنه مثال للراجل اللى فى خيالى و صورة فتى الاحلام اللى بتتمناها اى بنت ...طبعا سامر مضيعش الفرصه انا وريثه ابويا الوحيده و كمان صغيره و جميله بشهادة الجميع 

سامر كان فاكر أنه هو اللى بيصطادنى بس فى الحقيقه كنت أنا اللى بصطاده 

فى الفتره دى كانت اخر سنه ليا فى الليسانس و هو ما صدق و كان عاوز يفاتح بابا فى الموضوع بس انا رفضت و قلت له لما اخلص دراسه و طبعا اتفقت معاه فى الفتره دى أنه يقلل زياراته لينا عشان بابا ميلاحظش اى شئ 

طب ما يمكن العلاقه بينه و بين والدتك فضلت مستمره ؟

مظنش ...فى الفتره دى كنت محاوطاه من كل حته مكنتش بسيب له فرصه يعمل اى حاجه ..كمان كنت مراقبه والدتى كويس اوى و لقيتها جالها حاله اكتئاب شديد بابا طبعا مكنش يعرف سببها ...اخدها و راح لدكتور عبداللطيف مدير المستشفى و قعدت تتعالج معاه فتره 

بعد كدا الموضوع هدى خالص و مبقتش اشوفها بتتكلم فى التليفون مع حد و لا بتخرج من البيت من أصله 

طب ما كدا كويس ...ليه استمريتى فى الجوازه بقا ؟؟ انتى نجحتى تبعديهم عن بعض اهو 

مكنش ينفع يا دكتور انى أتراجع ...تراجعى معناه أنه هيرجعلها و بشكل أقوى من الاول كمان 

طب و بعدين ؟ كملى 

نفذت خطتى للنهايه و استنيت لما خلصت الامتحانات و رحت لبابا و ماما اقولهم على قرارى بجوازى من سامر

طبعا طلبى اتقابل بعاصفه شديده من والدتى ...اما بابا فأنا عارفه أنه كان بيحبنى و مبيرضاش يزعلنى ابدا و كمان سامر بالنسباله شخصيه كويسه و طموحه 

طبعا انا ضحيت بحاجات كتير اوى منها انى اعمل فرح زى اى بنت ، ضحيت انى افرح و اتجوز شاب أدى فى السن ، لكن كل ده مهمنيش المهم انى احافظ على بابا و على بيتنا 

بجوازى من سامر اكيد ماما هتقطع الأمل فيه نهائى 

و علشان كدا كنت مستعجله جدا و فعلا تم الموضوع فى أسبوع واحد بس و سافرت معاه افريقيا ..و هناك ..

هنا رن تليفونى و لقيت شعبان 

فوقت ساره  ....و قمت بعيد عنها علشان ارد عليه ...اكيد فى حاجه خطيره 

ايوا يا شعبان فى ايه ؟؟

الحق يا دكتور الست ام ساره جت هنا و قالبه الدنيا و عماله تقول اكيد الدكتور اللى اسمه احمد ده هو اللى هربها 

طب ما تقول . ... و لا يهمنى 

ميهمكش ازاى بس ؟؟ البنت اللى مع حضرتك دى فاقده الاهليه يعنى وجودها عندك يعتبر جريمه خطف يعاقب عليها القانون 

بس انا مش خاطفها يا شعبان ..انت عارف انى عاوز اساعدها

معرفتى دى يا دكتور و لا ليها ريحة اللزمه ..القانون مبيمشيش بالنوايا الحسنه ...انت لازم تنقل البنت دى من اى مكان يخصك 

يعنى ميكونش المكان باسمك أو باسم حد من عيلتك 

طب و انا هجيب مكان مش تبعى ازاى ؟؟

اجر يا دكتور اى شقه 

أاجر ؟؟ ما هو الايجار هيكون باسمى يا ذكى 

اه صحيح ..

طب انا عندى فكره حلوه ..انا ليا ابن عم له شقه فى أكتوبر قافلها و مسافر و مدينى مفتاحها كل شويه بروح اشقر عليها و انضفها عشان التراب ميبوظش العفش ممكن تاخد ساره توديها هناك 

فكره حلوه اوى يا شعبان ...انا موافق 

حلو اوى ... هفوت عليك كمان شويه و اروح اوديكوا الشقه بس ادينى العنوان 

طب انا عاوزك تقدملى على اجازه اسبوع يا شعبان 

غلط يا دكتور غلط ...كدا هيشكوا فيك اكتر ..انت لازم تتصرف طبيعى جدا و تيجى شغلك و لما يسألوك تقول مشوفتش حاجه 

عندك حق يا شعبان ...خلاص خد العنوان عندك ......

#دجيهان_عادل

يتبع

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ...