#ندم
#الجزء_الاول
فكرت كتير ابعت مشكلتى على جروب من جروبات الفيس اللى بتحل المشاكل لكن الصراحه شجاعتى خانتنى و خفت من تعليقات بعض الناس اللى هتكون قاسيه عليا و انا فى الحقيقه فيا اللى مكفينى
هحكيلكم حكايتى من البدايه و عاوزكم تحطوا نفسكم مكانى ...مش عاوز منكم غير العدل فى الحكم عليا..... مش هطول عليكم و هبتدى حكايتى
انا شريف ٣٨ سنه حاصل على بكالوريوس تجاره قسم محاسبه بس الشهاده منفعتنيش اوى ...قصدى مشتغلتش بيها فى مكان كمحاسب يعنى
انا من صغرى و انا بشتغل فى اى حاجه تيجى قدامى ...مبقولش لحاجه لا ...بعرف اجيب الجنيه من بق السبع زى ما بيقولوا
بحط اديا فى التراب تصبح دهب ....
بعد ما خلصت كليتى و دخلت الجيش كنت بنزل اجازات ...و خلال اجازاتى كنت اروح اشتغل فى اى حاجه عشان اجيب مصاريفى و مخليش ابويا يصرف عليا جنيه
قبل ما اخلص الجيش بحوالى شهرين كنت نازل اجازه
و لقيت امى داخله عليا و عاملالنا كوبيتين شاى
فاضى يا شريف و الا هتخرج ؟
اتفضلى يا ماما ...ايوه فاضى
انا جايه اشرب معاك الشاى
خير يا ست الحبايب ما هو الشاى دا اكيد وراه حاجه ...حاسس كدا أنه شاى مش برئ
يا سلام يا واد ....يعنى انا بتخابث عليك ؟
لا العفو يا ست الحبايب ...بس بقول أن اكيد فى كلمتين عاوزه تقوليهم لى
فعلا يا شريف عندى كلمتين يا ابنى
شفتى ...عيب عليكى ...كنت عارف و الله
خلاص بقا يا شريف بطل هزار و اسمع اللى جايه اكلمك فيه
اتفضلى يا ست الكل كلى اذان صاغية
انا عاوزاك تدور على بنت الحلال و تتجوز زى اخواتك نفسي افرح بيك يا شريف
و ليه كدا بس ؟؟ هو انا زعلتك فى حاجه يا زوزو ؟ جواز ايه اللى عاوزانى اتجوزه ؟
يا ابنى انت اخر العنقود و نفسي افرح باولادك قبل ما اموت
بعد الشر عليكى يا حبيبتى ...بس بجد يا ماما انا مبفكرش فى الموضوع ده نهائى دلوقتى
و ليه يا شريف متفكرش ؟؟ اللى ادك كلهم خاطبين و متجوزين
يا ماما انا لازم اجهز نفسي كويس قبل ما ادخل على بنت الناس
ملكش دعوه بالتجهيز انا هساعدك زى ما ساعدت اخواتك ...هبيع لك القيراطين بتوعى و نخطب لك
يا ماما قراطين ايه بس اللى عاوزه تبعيهم ؟ انا عمرى ما اوافق على الكلام ده
يا ابنى ريح قلبى يا حبيبي و خدنى على اد عقلى
ريحينى انت يا ماما و متتكلميش فى الموضوع ده خالص و لكى عليا يا ستى اول ما احس انى مستعد له هاجى بنفسي و اقولك اخطبيلى
زى ما تشوف يا ابنى ...انا كان نفسي تخطب و تتجوز و تبقى الفرحه فرحتين فرحة خروجك من الجيش و فرحة جوازك
كمان ؟؟ يعنى عاوزانى اتجوز فى شهرين ؟؟ لا انتى كدا بقا عاوزه تخلصى منى بسرعه ...
أخص عليك دا انت نور عينى اخلص منك دا ايه ؟؟
بعد شويه جالى اتصال من احمد صاحبى و اتفقنا نتقابل على القهوه
ازيك يا احمد
الله يسلمك يا شريف ...عامل ايه يا حبيبي فى الجيش
الحمد لله زى الفل فاضل شهرين و اخلص باذن الله
ايوا يا أبا ....خلص بقا عشان تشوف بنت الحلال و نفرح بيك
انت كمان بتقول زى الحاجه ما بتقول ...لا يا عم انا قدامى كام سنه كدا على ما اكون كونت نفسي
كام سنه ؟ انت مجنون يا ابنى ؟ هو العمر فيه كام سنه ؟
انت تتكل على الله و تدور من دلوقتى ....هو انت فاكر انك هتلاقيها فى يوم و ليله كدا ؟
ادور ايه يا احمد ؟ انت عاوزنى ادخل على ناس و انا مبشتغلش؟ ادخل اقولهم ايه ؟
انت اللى بتقول كدا يا شريف ؟ دا انت بالذات ماشاء الله عليك ..بتعرف تكسب القرش كويس اوى
بقولك ايه..غير الموضوع و تعالى نلعب دورين طاوله عشان اغلبك زى زمان
و انا موافق
بعد ما رجعت البيت قعدت افكر فى كلام ماما و كلام احمد صاحبى انا نفسي اتجوز بس عاوز حاجه معينه فى خيالى ...
انا برسم لنفسي حياه نفسي اعيشها مش اى جوازه و السلام
انا بحلم انى اخلى مراتى دى ملكه متوجه على عرشها ...بحلم انى مخلهاش ناقصها اى حاجه خالص ... اللى تشاور عليه اجيبه لها
نفسي اعيش معاها عيشه مثاليه او اقرب للمثاليه
نفسي لما ادخل بيتى مراتى تستقبلنى من على الباب ... اشوف فى عنيها فرحتها برجوعى
نفسي تاخدنى فى حضنها كأنى ابنها مش بس جوزها
نفسي احس انها مراتى و امى و بنتى و عشيقتى ...
لما بشوف اخواتى المتجوزين و علاقاتهم التقليديه اوى بحلم انى معشش عيشتهم دى
معظم المشاكل اللى بشوفها بتكون الفلوس فيها عامل رئيسى و عشان كدا نفسي مخليش مراتى ناقصها حاجه و تكون فاضيه ليا انا بس و لحبى
مش عارف التفكير ده صح و الا غلط ...بس حاسس ان هو ده اللى هيسعدنى
مرت الايام و خلص الجيش و ابتديت افكر بشكل تانى فى مستقبلى ...فكرت انى استورد بضاعه من الصين و اشتغل فيها و سمعت أن الموضوع ده مربح جدا بس طبعا عاوز راس مال محترم
كنت مجمع مبلغ من شغلى لكن طبعا مش كافى للى بخطط له
امى لما لقتنى محتار عرضت عليا تبيع ليا القيراطين اللى حيلتها
تانى يا ماما ...معندكيش الا القيراطين دول
يا ابنى انا عاوزه اساعدك و بعدين دول حقك ...كل اخ من اخواتك بعت له قيراطين كدا زيك
لا يا ماما انا رافض الموضوع ده نهائى ...دا بدل ما ازودهم لكى ؟؟
طب عندى فكره تانيه
فكرة ايه دى؟
انت محتاج كام على اللى معاك ؟
حوالى خمسين ألف كدا
انا هروح لخالتك و استلف منها الخمسين الف و لما تشتغل ابقى سدهم لها
يا ماما انا مش عاوز استلف
حيرتنى يا ابنى معاك ..
متقلقيش يا حبيبتى ...انا فى دماغى فكره تانيه
فكره ايه بقا ؟
فكرة شراكه ...بفكر اشوف حد يشاركنى
حلو اوى و انا موافقه
موافقه على ايه ؟؟
موافقه انى اشاركك بالقيراطين بتوعى
ههههه لا و الله
اه و الله ...انت بتقول انك عاوز شريك و انا بقول معايا راس المال اللى هشاركك بيه ...القيراطين دلوقتى يعملوا فوق السبعين الف جنيه ...نعمل شركه بعقود و نوثقها فى الشهر العقارى
انتى بتتكلمى بجد يا ماما ؟
ايوا طبعا بتكلم جد ...انت تاجر شاطر و انا مأمنه على فلوسي معاك
و فعلا عملنا الشركه انا و ست الحبايب و كلفنا محامى يخلص لنا إجراءاتها
عملت سجل ضريبي للشركه و سافرت الصين و شحنت شحنه موتسيكلات
بعد شهر وصلت الموتسيكلات و ابتديت اجمعها و أبيعها بالقسط و كاش
ما شاء الله الدخل كان هايل ...شجعنى دا انى اجيب شحنه تانيه و بقيت اراسل الشركه اللى اخدت منها الشحنه الاولى و احولهم الدولارات و هما يبعتوا لى الموتسيكلات اللى محتاجها
بعد كدا ابتديت أوسع فى مجال شغلى ...كل ما رأس مالى يكبر كنت أوسع اكتر و ابتديت استورد كل الاجهزه الكهربيه و ادوات المنزل ...و فتحت معرض كبير اوى
و كنت ببيع للتجار جمله و للناس قطاعى
و طبعا طول الفتره دى ست الحبايب مش سايبانى و عاوزانى اتجوز بأى طريقة
لحد ما فى يوم دخلت عليا و قالت لى ..
خلاص يا شريف لقيت لك بنت الحلال اللى هتريح قلبك ....
#ندم
#الجزء_الثانى
بعد كدا ابتديت أوسع فى مجال شغلى ...كل ما رأس مالى يكبر كنت أوسع اكتر و ابتديت استورد كل الاجهزه الكهربيه و ادوات المنزل ...و فتحت معرض كبير اوى
و كنت ببيع للتجار جمله و للناس قطاعى
و طبعا طول الفتره دى ست الحبايب مش سايبانى و عاوزانى اتجوز بأى طريقة
لحد ما فى يوم دخلت عليا و قالت لى ..
خلاص يا شريف لقيت لك بنت الحلال اللى هتريح قلبك
هى مين دى ؟؟
فيروز بنت اخت ام حسين جارتنا ...شابه قمر شفتها انهارده كانت عند خالتها ، متعلمه و مؤدبه و يتيمه
طب و انا هروح أخطب واحده من غير ما اشوفها يا ماما ؟
انت ليه محسسنى انك هتتجوزها بكرا ...احنا هنروح لهم نشرب معاهم كوبايتين شاى تشوفها و تشوفك ...و اذا حصل قبول يبقى خير و بركه و اذا محصلش يبقى خلاص مخسرناش حاجه
بس انا مش فاضى و الله يا ماما
بقولك ايه يا شريف المشوار مش هياخد نص ساعه و بعدين هما هنا مش بعيد يعنى ..و انا خلاص رتبت مع خالتها أننا هنروح الجمعه بعد الصلاه نقعد معاهم شويه نشوفهم و يشوفونا
كمان ؟؟ يعنى اتفقتى و انا اخر من يعلم
منا عارفه و متأكدة انها هتعجبك ...دا خالتها بتشكر فيها و بتقول عليها نضيفه موت ...و بعدين متحرجنيش بقا مع الناس انا خلاص قلت للست
خلاص يا ماما هاجى معاكى بس نص ساعه بس لان عندى مواعيد مع تجار
ماشي يا ابنى ..الف مبروك مقدما
ههههههههه الله يبارك فيكى يا ست الحبايب مش عارف ليه حاسس انك هتلبسينى فى الحيطه
لا عيب عليك دا انا هبهرك 😂
و اخدتنى امى و رحنا للعروسه و قابلناها هناك هى ووالدتها لأن والدها متوفى
البنت كشكل كانت حلوه بيضا جسمها متناسق ملامحها حلوه بس كان فيها ملاحظه واحده لاحظتها عليها من اول و ما قعدنا و هى انها ساكته و مبتتكلمش ...انا قلت يمكن مكسوفه او عندها حياء
انتهت القعده بأنهم هيستخيروا و يتصلوا بينا و احنا كمان هنستخير
بعد ما خرجنا امى قالت لى شفت ؟؟ ايه رايك فى العروسه بقا ؟؟
و الله هى حلوه بس مش عارف ساكته كدا ليه ؟؟ كان نفسي اتكلم معاها كدا و اعرف بتفكر ازاى
يوووو مستعجل على ايه بكرا تتكلم و تتكلم لما تشبع كلام ...المهم انها عجبتك
بصى يا امى انا هعمل استخاره و ربنا يقدم اللى فيه الخير
بعد كام يوم لقينا أهل العروسه باعتين بيقولوا انهم موافقين
امى دخلت عليا فرحانه و قالت لى فيروز وافقت خلاص يا شريف ...يلا شوف فاضى امتى عشان نحدد لهم ميعاد نروح نقرا الفاتحه لان اعمامها هيجوا من بورسعيد مخصوص
يا ماما انتى مستعجله كدا ليه ؟؟
و ايه اللى هيأخرنا يا ابنى انا شايفه أن البنت عجباك و دلوقتى انت بقيت ما شاء الله تقدر تفتح بيت ...و العمر بيجرى يا ابنى
خلاص يا ماما قوليلهم هنروح لهم الجمعه الجايه بإذن الله بعد صلاة المغرب
و فعلا رحنا و استقبلونا احسن استقبال و اتفقنا مع اعمامها على تفاصيل الجواز و كل شي تمام
و اتفقنا أن الشبكه مع الفرح بعد ست شهور
بعد كدا كنت بزورهم كل اسبوعين عشان ظروف شغلى و للاسف كان العيب اللى لاحظته اول مره لسه موجود
هى ساكته على طول مبتتكلمش الا لما اسالها على حاجه غير كدا ممكن تقعد ساعه متنطقش
مش عارف الموضوع ده خنقنى اوى و رحت لامى قلت لها
يا ماما انا فى حاجه خنقانى من موضوع الجواز ده
فى ايه يا شريف ؟
يا ماما البنت حلوه و كل حاجه بس انا مش حاسسها ...بحس أن مشاعرها جامده كدا ...دى عمرها ما اتصلت بيا تسأل عنى حتى لو قعدت يومين مكلمهاش
يا ابنى البت متربيه و غلبانه...خام متعرفش الكلام ده ...دا انت المفروض تفرح مش تزعل و بعدين يا ابنى دى يتيمه و مينفعش نكسر بخاطرها
يعنى ايه يا ماما طب و خاطرى انا ؟؟
خاطرك على عينى ..بس بكرا تيجى فى بيتك و تعلمها طباعك و تفهمها على اللى بيضايقك ...
خلاص يا ماما اللى تشوفيه
و الله يا ابنى انا شايفه انها حلوه و لايقه عليك و أن شاء الله هتريحك اوى ...ربنا يرضى عنك يا ابنى
خلاص يا ماما
و للاسف كدبت احساسي و قلت يمكن عشان مؤدبه كلامها قليل و يمكن كلام امى صحيح و انها بعد الجواز هتتغير
و تمت إجراءات الجواز و فرشت لها شقه و لا فى الاحلام فيها جميع الاجهزه الكهربيه و اغلى فرش
ليلة دخلتنا كانت ليله عجيبه ...اول ما دخلنا لقيتها دخلت على أوضة النوم و قفلت على نفسها
قلت يمكن محرجه و اكيد هتغير هدومها و تخرج دلوقتى
قعدت فى الصاله و استنيت ....
لكن برده لا الباب اتفتح و لا هى خرجت من الاوضه
رحت خبطت بالراحه على الباب ...منا قاعد فى بيت عيله و مش عاوز حد يسمع اللى بيحصلى
خبطت و هى مردتش ...الفار لعب فى عبى و قلت ليكون جرالها حاجه
ابتديت اخبط بشكل أقوى و انده ...فيروز....فيروز انتى كويسه
فين و فين لما ردت عليا و قالت اه
اه ايه ؟ طب ما تفتحى الباب
لا
لا ؟؟ لا ليه ؟ افتحى نتكلم
لا
متخافيش يا فيروز هتكلم معاكى كلمتين اتنين و خلاص
لا
طب هاخد هدومى بس
لا
هو كل اللى طالع عليكى لا لا ...طيب خلاص انا هنام هنا بره لو عوزتى حاجه نادى عليا
و رحت قعدت على كنبة الانتريه و انا مذهول ...هى ابتدت كدا ؟؟ شكلك هتشوف ايام حلوه يا شريف ...ال و اصحابى كانوا بيقولولى ادبح لها القطه ...دا هى اللى دبحتهالى ...الله يسامحك يا ماما انتى اللى دبستينى فى الجوازه السودا دى
تانى يوم صحيت الصبح دخلت على المطبخ ..كنت نايم بقميص الفرح و البنطلون على كنبة الانتريه و سمعت صوت خربطه فى المطبخ قمت اشوف فى ايه
لقيتها منزله كل الكوبيات و الاطباق ...لا دى كانت منزله المطبخ كله على الأرض
فى ايه ؟؟ انتى بتعملى ايه ؟؟
برتب المطبخ
نعم بترتبى ايه ؟ ما هو كان مترتب يا بنتى
لا ترتيب البنات مش عاجبنى ...انا عاوزه ارتبه على طريقتى
يا صلاة النبى ....طيب ربنا يعينك
سبتها و دخلت اوضه النوم عشان اغير هدومى و اريح جسمى شويه على السرير ما هى الكنبه كسرت ضهرى رحت فى النوم مقمتش الا على صوت الزغاريط
اهلها جايين و جايبين الصباحيه
و لقيت امى طالعه معاهم ....و البوس و الاحضان اشتغلت بقا ...و الف مبروك يا حبايبي
امها خدتها و دخلت بيها الاوضه
و انا دخلت ورا امى المطبخ و هى بتجيب الحاجه الساقعه
ايه الاخبار يا شريف ؟؟
اخبار ؟؟ مفيش و لا اخبار و لا اهرام يا اما
ازاى يا ابنى ؟
زى الناس ...الست هانم قفلت على نفسها طول الليل و قامت الصبح عملت فيها رجل الكشافه و بقت تتشعلق فى علب المطبخ و ترتب فيه
ههههههههه
بتضحكى ؟؟ ما هى دى شورتك ...انتى قلتيلى هبهرك و انا مصدقتكيش ...انا دلوقتى صدقتك خلاص
ههههههههه البت مكسوفه يا ابنى ...انت مستعجل على ايه يا اخويا لسه قدامك العمر بطوله ...بس فعلا البت نضيفه اوى ...المطبخ مترتب على المسطره
و انا هعمل بالمسطره ايه يا ماما ؟
يا ابنى بالهداواه ...اتكلم معاها بالراحه و هى تلين معاك
هى مديانى فرصه ؟
معلش بكرا تلين
انا لسه هستنى بكرا ؟
ههههههههه يوو جتك ايه يا شريف ...يلا يا ابنى الناس مستنيانا بره
و خرجت لقيتها قاعده و امها قاعده مكشره ...فهمت على طول أن بنتها حكت لها اللى حصل
الناس قعدوا شويه و باركولنا و جم يمشوا لقيت حماتى بتسلم عليا و بتشد على ايدى و بتقولى
مبروك يا شريف ...شد حيلك شويه مع البت
هى قالت كدا و انا معرفتش ارد عليها يا ترى البت بنت اللذينا دى قالت لها عنى ايه ؟؟؟
#ندم
#الجزء_الثالث
الناس قعدوا شويه و باركولنا و جم يمشوا لقيت حماتى بتسلم عليا و بتشد على ايدى و بتقولى
مبروك يا شريف ...شد حيلك شويه مع البت
هى قالت كدا و انا معرفتش ارد عليها يا ترى البت بنت اللذينا دى قالت لها عنى ايه ؟؟؟
بعد ما الناس خرجوا جريت وراها و كانت سبقتنى على المطبخ عشان تغسل الكوبيات و الاطباق و ترص الحاجات اللى اهلها جايبنها فى الصباحيه
انا عاوز اعرف انتى قلتى ايه لمامتك عليا ؟
مقلتش حاجه
اومال بتقولى شد حيلك مع البنت شويه ليه ؟
معرفش
سيبي اللى فى ايدك ده و كلمينى
نعم
هو انتى مغصوبه على جوازنا ده ؟ فهمينى يا بنت الحلال؟
لا ابدا
اومال ايه مالك ؟
مفيش
بطلى تردى عليه ردود قصيره بالشكل ده خدى و أدى معايا فى الكلام كدا
منا برد على اى حاجه تقولها اهو
يا فيروز انا عاوز نعيش مع بعض عيشه كويسه ..انا مبحبش المشاكل
و لا انا
طيب عظيم هايل ...مدام انتى مش مجبوره على الجوازه دى و مبتحبيش المشاكل يبقى احنا كدا يا حبيبتى متفقين
متفقين على ايه ؟
متفقين على أننا نبدا حياتنا من غير مشاكل ..احبك و تحبينى ...تشوفى ايه بيعجبنى تعمليه و اشوف ايه بيعجبك اعمله ....نراعى احساس بعض
ماشي
هو ايه اللى ماشى ؟
كلامك يعنى
دا اللى هان عليكى ...يا بنتى كلمينى كدا زى ما بكلمك
منا بكلمك اهو ...بس انا مش فاضيه عاوزه ارص الحاجات دى قبل ما تبوظ ...احط لك تاكل ؟؟ امى جايبه اكل كتير اهو
اكل ؟؟ انا بكلمك فى رومانسيه و حب و انتى بتقولى اكل ؟
ما هو هيبوظ يا شريف
طب اقولك على حاجه انا هساعدك نحط الاكل و ناكل سوا و بعد كدا نعملنا كوبايتين عصير كدا و نقعد نتكلم
لا روح انت و انا هجهز الاكل و العصير و اجيبه
حاضر يا فيروز
خرجت من المطبخ و انا مش عارف اتصرف معاها ازاى عمال احايل فيها و البعيده جبله مش عاوزه تحس
بعد خمس دقايق لقيتها مجهزه كل حاجه صراحه هى شاطره و خفيفه اوى فى شغل البيت و دا كنت ملاحظه عليها من ايام الخطوبه
بعد ما اكلنا بقولها تعالى بقا نتكلم شويه مع بعض
نتكلم ايه يا شريف و المواعين دى مين هيغسلها ؟
سبيها ...هى هتموت يعنى
لا لا مينفعش
طب اقولك انا هغسلها يا ستى ....تعالى بس و ملكيش دعوه بيها ...سيبى بس الطباق دى
لا لا بطل يا شريف انا مقدرش اقعد و معلقه مش نضيفه
بعد ما خلصت غسيل و دخلت عشان ترتاح دخلت لها و قعدت اكلم فيها و احايلها لحد ما لانت الحمد لله و بدأت تتجاوب معايا
مرت الايام و انا حاسس انى اتجوزت ايوه بس فى حاجه نقصانى ...مش هو ده اللى كنت راسمه و مخططه لحياتى
مراتى طيبه و شاطره اوى فى بيتها و نضيفه جدا بس مش واخده بالها منى خالص
كل همها التنضيف و بس كل همها عمايل الاكل و بس ...طب و انا فين من ده كله
اصبحت حزين اوى و الموضوع ده شغل جزء كبير من تفكيرى لدرجه انه اثر على شغلى و ابتديت أهمل فى بعض الحاجات اللى بعملها
امى لاحظت التغيير اللى حصلى و سالتنى ..مالك يا شريف ؟
انا مش مستريح يا امى فى حياتى مع فيروز
ليه كدا يا ابنى البت كويسه اوى و غلبانه
يا ماما انا غلطت من الاول انى مصدقتش احساسي ...فيروز مش البنت اللى كنت بحلم بيها
ايه اللى بتقوله دا يا شريف هو لعب عيال و الا ايه ؟ مينفعش اللى بتقوله دا ....انت بس عشان لسه عريس جديد مش واخد على الوضع بكرا تتعود
يا ماما انتى مش فهمانى
لا انا فهماك و بقولك متكسرش بخاطر اليتيمه يا ابنى
حاضر يا ماما
ركز بس فى شغلك انا شايفاك مش واخد بالك منه و اخوك بيقول انك ضيعت كذا عمليه
حاضر يا ماما ...هاخد بالى من شغلى
ربنا يهديك يا ابنى
بعد الكلام ده بأسبوع كانت حماتى جايه فى زياره عندنا ...اول ما دخلت من بره لقيتها مبتسمه و بتقولى
تعالى يا شريف اقعد جنبى هنا
رحت قعدت جنبها و انا مستغرب ايه الرضا ده
عندى لك خبر حلو
خير يا حماتى أن شاء الله
مراتك حامل
ايه حامل ؟؟
ايوه حامل و انا اتاكدت بنفسي ...جبت لها اختبار حمل و طلعت حامل
طب الف مبروك يا حماتى
الف مبروك لك انت يتربى فى عزك أن شاء الله
أن شاء الله عن اذنك هدخل اغير هدومى و استريح شويه
و دخلت و انا فى حاله صدمه ....كل انسان متجوز بيتمنى اللحظه دى و بيفرح بيها الا انا حسيت كأن الخبر ده مشكله جديده وقعت على دماغى ....انا كان عندى امل اصلح اللى عملته ... أتراجع عن الجوازه دى ...لكن مع وجود طفل الموضوع هيكون صعب اوى و محدش هيوافقنى انى أطلقها خاصة بعد وجود طفل
اعمل ايه يا ربى ؟ انا اللى عملت فى نفسي كدا ..انا ندمت انى مقلتش لا من اول مره مكنتش مرتاح فيها للموضوع
للاسف ساعات الانسان بيبقى شايف الحقيقه قدام عنيه و بيكدب نفسه و بيقعد يدور على المبررات و الأعذار للحقيقه دى مع انها بتكون واضحه وضوح الشمس
مراتى دخلت عليا و انا قاعد على السرير سرحان
مالك يا شريف ؟ هو انت زعلان انى حامل
لا ليه بتقولى كدا ؟
اصل ماما بتقول انها اول ما قالت لك الخبر وشك اتغير و قلب الوان
و ماما تقولى الخبر ليه يا فيروز ؟
يعنى ايه مش فاهمه ؟
دى حاجه تخصنا احنا بس ...ايه اللى يخلى امك هى اللى تقولى على الخبر ده ؟
يااا ...هى دى مشكله يعنى ؟ دى حاجه عاديه و هى كانت فرحانه و نفسها تبشرك...بقا دا جزاتها ؟ انا شايفه انك بتتلكك
و لا بتلكك و لا حاجه ....هتلكك ليه يعنى ؟
و الله معرفش اسال نفسك ؟ من اول ما سمعت الخبر و انت مش طايق روحك...لو مش عاوز تخلف منى اروح أنزله
يا ستى انتى عاوزه تعملى مشكله و خلاص ..هو انا اتكلمت اصلا ....خلاص يا فيروز حصل خير ...الف مبروك يا حبيبتى .
سابتنى و طلعت و علامات القرف منى مرسومه على وشها
بعد كدا عدت الايام و انتهت شهور الحمل على خير و الحمد لله... و فيروز خلفت بنتى الاولى مريم و طبعا اهتمامها كله اتوجه للبنت و مراعاتها
انا بقا استسلمت للأمر الواقع و بقيت خلاص مش زعلان ...يعنى بالبلدى اتعودت على كدا
مراتى كانت دايما تهتم اوى انها تغير العفش و السجاد و الستاير كل شويه ...و كانت دايما شاغله نفسها فى غسيل الحيطان و الأرضيات و مكنتش بتسمح بذرة تراب تدخل عندنا البيت
كانوا اخواتى و اصدقائى اللى بيدخلوا بيتى بيحسدوني على نضافتها و شطارتها و حسن ضيافتها
بعد حوالى سنتين من ولادة مريم بنتى لقيت مراتى تعبت و قعدت ترجع اخدتها و رحنا للدكتور و هناك عرفت انها حامل للمره التانيه
استقبلت الخبر عادى لا انا فرحان و لا زعلان ...و مرت الايام و عرفنا انها حامل فى توأم
طبعا كل اللى بيحصل ده كان بيزود عندى الشعور بالحزن و الندم ... احساس السجين اللى كل يوم يسلسلوا رجليه بسلسله اتقل من اللى قبلها و مع مرور الوقت بتكلبش اكتر و اكتر من غير اى أمل انى اعرف افكها أو اخلص منها ... للاسف مش عارف اتصرف 😔
#ندم
#الجزء_الرابع
بعد ما فيروز ولدت التوأم طبعا البيت بقا فيه حالة طوارئ
طول الليل و النهار شغاله زى النحله معاهم و مع مريم بنتى ...و امى الله يبارك لها كانت بتطلع تقعد لها بالعيال عقبال ما هى تشوف طلبات البيت من طبخ و كنس و خلافه
انا بقا بقيت زى رجاله كتير و نسيت بقا حكايه الرومانسيه و الحب دى ...بقيت راجل تقليدى اوى اصحى الصبح اروح شغلى و ارجع اخر النهار اتعشي و انام
هى كلامها كان قليل و انا كمان بقيت زيها فقدت الأمل فى انى اغيرها
مر شهرين بعد الولاده و لقيتها بتقولى لما رجعت من الشغل انها تعبانه
تعبانه عندك ايه يا فيروز ؟ ما انتى مبتريحيش نفسك
لا يا شريف مش من الشغل ...هو الشغل بيتعب ؟ انا دايخه و نفسي غامه عليا
دى تلاقيها انيميا عشان لسه والده و نزفتى كتير فى القيصريه ...على العموم هاخدك بكرا باذن الله اكشف عليكى .
و اخدتها و يا ريتنى ما اخدتها ....لقيتها حامل للمره التالته
يا خبرك اسوح يا فيروز ؟؟ انتى فاكره نفسك ارنبه يا بنتى ؟
انا معرفش يا شريف دا حصل ازاى ؟؟
متعرفيش ايه ؟؟ امك مقلتلكيش ؟ الدكتور اللى ولدك مقلكيش ؟ يا بنتى دا جرحك لسه مفتوح هتعملى ايه ؟؟
معرفش يا شريف ..انت مالك كدا عمال تأنب فيا ؟ هو انا حملت لوحدى ؟؟
يا بنتى انا خايف عليكى ...انتى مش مديه نفسك فرصه تستريحى خالص ....هتراعى العيال دى ازاى ؟؟
ربنا هيعين باذن الله
ما هو كله باذن الله طبعا بس ديننا بيقولنا نعقلها و نتوكل
طب و لو جم توام تانى هتعملى ايه يا حلوه ؟؟
طب يا ريت ...العيال عزوه
عزوه ؟؟ طب خليكى فى العزوه بتاعتك يا اختى
و رجعنا البيت و لقيتها بتكلم امها و هى فرحانه فى التليفون و بتقولها انها حامل ....انا مش عارف الستات دول بيفكروا ازاى ؟ و ازاى بينسوا الالم الرهيب اللى بيحصلهم فى الحمل و الولاده كدا بسرعه ؟ دا سؤال نفسي اعرف اجابته
نزلت اقعد مع امى شويه لانى كنت حاسس انى مخنوق اوى
مالك يا شريف ؟
فيروز حامل يا ماما
ايه ؟ حامل ازاى يا ابنى ؟ دى لسه والده
معرفش يا ماما اهو ده اللى حصل
يا أدى الخيبه دى هتتبهدل يا عينى بالعيال
هى هتتبهدل و انا لا يا ماما ؟؟ منا كمان هتبهدل اوى
يا اخى انت راجل و هتستحمل امال هى هتعمل ايه يا ابنى دا لما تولد هيكون عندها سن ٤سنين و سنه و نونه لسه مولوده
ماما انا عاوز اسالك سؤال
اتفضل يا ابنى
هو انتوا ازاى كدا بتنسوا بسرعه اللى بتشوفوه فى الحمل و الولاده
يا ابنى دى فطره و غريزه ربنا حطها فينا و لولا كدا مكنتش واحده خلفت مره تانيه ...بس ربنا بينسينا و بيخلى غريزه الامومه اللى موجوده فينا اقوى من اى الم بنحس بيه .
طيب يا ماما
روق كدا يا شريف ...العيال حلوين برده
حلوين مقلتش حاجه بس احنا مش داخلين سبق يا ماما ....بالراحه مش كدا انا مبقتش متجوز و لا حاسس بجواز ...مفيش حوارات غير على البامبرز اللى اجيبه و العيال العيانه اللى عاوزين يروحوا للدكتور و مش عارف مين عنده مغص و مين عنده اسهال
ههههههههه معلش يا ابنى بكره يكبروا و مشاكلهم تقل
تقل و الا تزيد يا ماما ؟؟
قصدى مشاكلهم اللى من النوع ده يعنى
اممممم الله يجازى اللى كان السبب
بتدعى على مين يا واد ؟
بدعى على نفسي يا ماما
لا بعد الشر عنك يا روح ماما
مرت الايام و فيروز خلفت بنتى الرابعه ....و أصبحت فى خلال خمس سنين عندى أربع اولاد ..ولدين و بنتين
طبعا مش عاوز اقولكم إن البيت بالنسبه ليا بقا مجرد لوكاندا لانى مبقتش استحمل زن العيال و طبعا فيروز كل اللى عليها هات فلوس اجيب سجاده جديده العيال بهدلوا سجاده الصاله
حاضر
هات فلوس اجيب مفارش سرير انا مش ملاحقه تغيير ملايات
حاضر
هات نعمل سريرين للعيال علشان دول اربعه محتاجين اربع سراير بدل اتنين
حاضر
كل ده بقا الطبيعى بتاعنا و علاقتنا الزوجيه كانت روتينيه جدا لما الست تحن عليا
لغايه ما فى يوم تعبت و قالت لى انا عاوزه اكشف نسا
ساعتها قلبى وقع فى رجليا ... نسا مين ؟؟ دا البت الصغيره لسه سنتين ....يا خبر لتكون حامل مره رابعه
اوعى تكونى حامل البيت خلاص قلب مورستان
لا يا شريف انا تعبانه بس مش حامل
طيب انا مش فاضى خدى امى و روحوا اكشفى
طب و العيال يا شريف مين هيقعد بيها ؟
هاتى امك و الا اقولك سبيهم لامى و خدى امك معاكى
يعنى مفيش امل تيجى معايا
و الله يا فيروز عندى ميعاد مع تجار كبار عشان فى بضاعه جايه من الصين و قرشها حلو اوى
طب خلاص هروح انا و ماما
و راحت مراتى لدكتوره النسا كشفت عليها و قالت لها انها عندها التهابات جامده و ممنوع تستعمل وسيله منع الحمل اللى الستات بيستعملوها لمده لا تقل عن ست شهور
لما رجعت بالليل لقيت فيروز بتقولى على الكلام اللى قالته لها الدكتوره
قلت لها طب و بعدين ؟؟ هتعملى ايه ؟؟
قالت مش هعمل حاجه
يعنى ايه يا بنتى ؟؟ ما انتى كدا ممكن تحملى تانى
لا ما هو انت متقربليش الست شهور دول
نعم يا اختى ...انتى بتقولى ايه ؟؟ طب اقولك خدى برشام بتاع منع الحمل و الا الحقن اللى بيقولوا عليها دى
لا انا مخدش الحاجات دى تبوظ لى جسمى
طب و بعدين مش هينفع الكلام ده
هو ده الكلام اللى عندى و لو مش عاجبك روح اتجوز
اروح اتجوز ؟؟؟ انتى بتقولى ايه ؟؟
زى ما بقولك كدا ...معنديش غير الكلام ده
انا بقا هتصل بامك و اشوف الكلام اللى بتقوليه ده
و اتصلت على امها و قلت لها بنتك بتقولى روح اتجوز ...امها قعدت تكلمها و هى دماغها انشف من الحجر
طب اعمل ايه اتصلت على اعمامها فى بورسعيد و عرضت عليهم الموضوع و هما قعدوا يكلموا فيها و يا بنتى مينفعش الكلام ده و الراجل له حقوق و هى برده مصممه و كل اللى على لسانها ما يروح يتجوز هو انا حايشاه
اعمامها جم و اتلموا و قعدوا يكلموا و هى و لا هى هنا
ساعتها بقا قلت لهم انا كدا عدانى العيب عشان لما اتجوز محدش يلوم عليا ...انا راجل و بصرف على بيتى من الالف للياء و مش مخليها محتاجه حاجه لا هى و لا عيالها و اهى قدامكم اهى اسالوها و اقدر افتح بيت و اتنين و تلاته كمان ...
الناس مكنتش عارفه تقول ايه ...هما شايفينها منشفه دماغها و دا خلانى اعند اكتر لما شفتها بتتحدانى قدامهم كدا..
و معرفش بقى جوايا احساسيس متضاربه انا مش جامعهم عشان احل لا انا جامعهم عشان اشهدهم على بنتهم و زى ما يكون الموضوع ده جالى على هوايا و ما صدقت الاقى حجه اخلص بيها من الإحساس اللى انا حاسه ناحية الجوازه دى ..احساس المظلوم اللى ظلم نفسه أنه رضى بانسانه بارده زى دى
و لغايه ما كنت قاعد فى القعده دى مكنش فى دماغى حد معين و لا حاطط عينى على حد و لآخر لحظه كنت بقول لو عرف اعمامها يرجعوها عن اللى فى دماغها خلاص اهى عيشه و السلام لكن لما شفت صباح عندى فى المعرض كل ده اتغير و ابتديت فعلا افكر فى الجواز مره تانيه .
#ندم
#الجزء_الخامس
و لغايه ما كنت قاعد فى القعده دى مكنش فى دماغى حد معين و لا حاطط عينى على حد و لآخر لحظه كنت بقول لو عرف اعمامها يرجعوها عن اللى فى دماغها خلاص اهى عيشه و السلام لكن لما شفت صباح عندى فى المعرض كل ده اتغير و ابتديت فعلا افكر فى الجواز مره تانيه .
اكيد دلوقتى كلكم عاوزين تعرفوا حكايه صباح دى
انا هقولكم ... بدايه معرفتى بصباح هى قضيه ...اه و الله زى ما بقولكم كدا
فى يوم كنت قاعد فى المعرض بخلص شويه ورق لقيت واحده ست داخله عليا بس ايه اللهم صلى على النبى ست زى ما بيقول الكتاب
فرسه ماشيه على الأرض طول بعرض بحلاوه ...مكياج محترفين بارفان هادى ...كل حاجه فيها ملفته الصراحه
اول ما دخلت عليا
حضرتك استاذ شريف ؟
ايوا انا شريف اتفضلى
كنت جايه اتكلم مع حضرتك فى موضوع كدا
اتفضلى ...تشربى ايه الاول
لا مفيش داعى ...انتوا رافعين عليا قضيه و كنت بس جايه استسمحك تدينى شويه وقت
قضيه ؟ احنا رافعين عليكى انتى قضيه ؟؟
ايوا ...جوزى كان واخد منكم بضاعه و ادوات منزليه و انا كنت الضامن له و للاسف تعثر و انا دلوقتى اللى مطالبه انى اسد الفلوس دى
و زوجك تعثر ليه ؟؟
دى حكايه طويله اوى ...بس اللى عاوزه حضرتك تعرفه دلوقتى أنه خلاص مبقاش زوجى
لا انا مش فاهم اى حاجه خالص ...يعنى ايه مات و الا اتطلقتوا و الا ايه ؟؟
للاسف يا استاذ شريف انا اتجوزت عطيه جوزى و انا معرفش حقيقته ... بعد الجواز عرفت أنه بيشرب مخدرات و بقيت احاول معاه و كنت عاوزه اعيش و خلاص
كان كل يوم ضرب و اهانه و كنت بستحمل لانى مليش حد غير امى و اخت واحده
طبعا كان بيأثر اوى فى مصاريف البيت و دا اضطرنى انزل ادور على اى شغل اشتغله
و فعلا لقيت شغل فى كوافير و ابتديت اتشهر و الناس حبتنى اوى ...فكرت افتح محل خاص بيا و عرضت الفكره على اختى و فعلا اجرنا مكان و بنشتغل فيه حاليا
طب و جوزك ؟؟
منا جايالك فى الكلام اهو ...جوزى جه المعرض هنا و اخد حاجات بالقسط و طبعا انتوا هنا بتحتاجوا ضامن و للاسف اجبرنى انى اضمنه
بعد كدا هو اتمسك فى قضيه تعاطى و اتحبس خمس سنين ...انا بقا طلبت انى اتطلق منه لانه كان مورينى العذاب الوان ...و فعلا اتطلقت بالمحكمة و كنت نسيت خالص حكايه انى ضامناه دى
اتفاجئت انى جايلى محضر و بيقولى أن فى قضيه بوصلات امانه معموله ليا طب انا دلوقتى ذنبى ايه انا مطلقه و معايا تلات بنات كمان و بشتغل عشان اكلهم طب اتصرف ازاى حضرتك ؟
طب انتى عاوزه ايه دلوقتى ؟؟
عاوزاك بس تستنى عليا و انا هسد لك أن شاء الله بس مترفعش عليا قضيه و تشرد بناتى اللى مبقلهمش حد فى الدنيا غيري
طب قوليلى القضيه باسم مين ؟؟
بأسم صباح السيد احمد
طب ثوانى اتصل على احمد اخويا اشوف ...اصل هو اللى بيتصرف فى الحاجات دى
و اتصلت باحمد و عرفت فعلا انها كانت ضامنه لجوزها فى بضاعه ب ١٥ الف جنيه
قفلت مع احمد و قلت لها خلاص يا ست صباح انا هخلص الموضوع ده متقلقيش
ربنا يجازيك خير يا استاذ شريف و الله كل الناس قالوا على حضرتك انك انسان ...انا بقى هسد لحضرتك الفلوس أن شاء الله ... كل اسبوع هجيب لك مبلغ و ربنا يسد ما علينا
ماشى يا ست صباح عنيا ليكى
تسلم عنيك و يسلم لى قلبك الطيب ده ...استأذن انا بقا
طب استنى هاتى رقم موبيلك عشان اقولك على اللى هيحصل فى القضيه
حاضر اتفضل الكارت بتاعى اهو
امممم انتى كاتبه فى الكارت انك بتعملى بروتين و مونكير و تاتو و كافة شئ
ايوا بعمل كل حاجه تخلى الست حلوه فى عين جوزها ...ما هو لازم الواحده و لا مؤاخذه تاخد بالها من جوزها و متخلهوش يبص بره ابدا
و الله ؟؟ دا انتى على كدا بقا كنتى مدلعه المرحوم
هئهئهئ ... مرحوم مين ؟
قصدى جوزك يعنى
اه و الله يا اخويا ... لعبته كل الالعاب المسليه ...لعبته كيكه على العالى و كيكه ع الواطى ، لعبته استغمايه و برده مطمرش فى امه هههههههههه
ههههههههه انتى دمك زى العسل
شالله خليك يا اخويا ...هناخد منها ايه بس ...يلا استأذنك انا بقا اصلى سايبه واحده على جهاز البخار زمانها ساحت
طب إجرى شوفيها و انا هبقى اكلمك
اوك ...سلام يا شيكو
كمان شيكو ...ايه الحلاوه دى ...طب بقولك ايه ما تسيبي الوليه تسيح و تعالى اغديكى بره
لا لا مينفعش عندى شغل كتير و الله ...مره تانيه أن شاء الله ... سلام بقا .
خرجت صباح من المعرض و خدت حته من قلبى معاها البت نغشه اوى وواخده بالها من روحها ...هى دى الستات و الا بلاش مش شيخ الغفر اللى عندى فى البيت
بعد كدا ابتدت المكالمات بينا و لقيت فى صباح اللى ملقتوش فى فيروز ضحك و هزار و دم خفيف و دردحه و لقيت نفسي بقولها تتجوزينى
و طبعا صباح وافقت و كانت طايره من الفرحه كمان
و اتجوزت صباح فى السر عشان مراتى متعملش معايا مشاكل ...
أجرت لصباح شقه مفروشه و قعدتها فيها و هى ودت بناتها عند امها و جابت بس البنت الصغيره معاها
مش عاوز اقولكم على السعاده اللى شفتها مع صباح ...ياااا انا مكنتش متجوز قبل كدا يا ناس
من كتر فرحتى بيها اخدتها و رحنا نصيف و نقضى اسبوع فى شرم الشيخ ...و طبعا قلت لمراتى انى مسافر فى شغل
رحت مع صباح شرم و كنت حاسس انى فى الجنه
مكنتش عاوز ارجع من هناك ...بقينا نجرى ورا بعض و نلعب زى الاطفال
صراحه صباح كانت ست بمعنى الكلمه ورتنى اللى عمرى ما شفته مع فيروز
و رجعت من الاجازه و انا بتمنى انها متخلصش بس للاسف خلصت
لما روحت كنت متفائل و مقبل كدا على الدنيا مراتى لاحظت التغيير و سألتنى مالك فرحان كدا ليه ؟ داخل تغنى و خارج تغنى
هو حرام لما تشوفينى مبسوط ؟
لا مش حرام و لا حاجه بس كنت منكد علينا الفتره اللى فاتت
انا برده اللى كنت منكد عليكى ...الله يسامحك على العموم انا مش عاوز اتخانق دلوقتى انا جبت لك ١٥ فرخه و ١٠ كيلو لحمه اهم خدى حطيهم فى الفريزر
حاضر
طبعا انا كان باين عليا اوى انى متغير و نفسيتى بقت افضل ...امى كمان لاحظت عليا التغيير و صراحه مقدرتش اخبى عليها اكتر من كدا
ماما عاوز اتكلم معاكى كلمتين
تعالى يا شريف ...مالك يا حبيبي
انتى عارفه يا ماما المشاكل اللى حاصله بينى و بين فيروز فى الفترة الأخيرة
ايوه يا ابنى ربنا يصلح حالكم و يهدى سركم يارب
و اظن انتى شايفه اد ايه أن مفيش توافق ما بينا خالص
يا ابنى مينفعش تقول الكلام ده انت خلاص بقا عندك اربع عيال اسم الله و مينفعش تتكلم كدا
يا ماما احنا مش هندفن راسنا فى الرمل ...دا احساس يا ماما جوايا من اول ما اتجوزتها و هى محاولتش تغير نفسها بالرغم انى اتكلمت معاها كتير اوى ...و زى ما انتى شايفه مش مخليها محتاجه اى حاجه و مع ذلك مبتراعيش خاطرى خالص و لا بمثلها اى حاجه
متقولش كدا يا ابنى ...هى بس اللى طبيعتها تقيله شويه بس اكيد بتحبك انت ابو ولادها
معرفش بقا يا ماما أن كانت بتحبنى و الا لا ...بس اللى اعرفه انى مش مرتاح معاها و لا سعيد و عشان كدا انا اتصرفت
اتصرفت عملت ايه يا شريف ؟
انا اتجوزت يا ماما
انت بتقول ايه يا شريف ؟ اتجوزت ازاى ؟ و مين ؟ و من غير ما تقولى و تاخد رايى
منا اخدت رايك قبل كدا يا ماما و ايه النتيجه عايش تعيس يا ريتنى صدقت احساسي من الاول
و مين اللى اتجوزتها دى يا شريف
مش مهم مين يا ماما بس دى اللى انا اخترتها بنفسي و مرتاح معاها جدا
ليه كدا يا ابنى ؟ مراتك لو عرفت مش هيحصل طيب
ليه يا ماما هى مش قدامك و قدام اعمامها كانت عماله تقول روح اتجوز روح اتجوز ...زى ما يكون انا مش فارق معاها خالص
يا ابنى دا كلام بيتقال ساعه زعل بس لكن الحقيقه غير كدا
لا يا ماما انتى متعرفيش لما كانت بتتكلم بالشكل ده قدامكم و قدام اعمامها انا كان احساسي ايه ...كنت حاسس انها عاوزه تفهم اللى حواليها انى مليش فايده عندها أو أنها راميه طوبتى زى ما بيقولوا ...انا مستهلش منها كدا ابدا يا ماما ...هى جرحت كرامتى قدام الناس
و الله يا ابنى ما عارفه اقولك ايه
متقوليش انا خلاص اتجوزت و مستريح اوى مع مراتى الجديده و هى بقا خليها فى شقتها و اولادها انا مش هقصر معاهم و لا هتحس اصلا انى اتجوزت ...انا بس قلت لكى عشان مش قادر اخبى عليكى اكتر من كدا
و انا ولا كأنى سمعت حاجه منك يا شريف ..ربنا يصلح لك الحال ىا ابنى
فات شهر و كله تمام بروح لصباح فى الشقه اللى مأجرها لها و برجع بيتى عادى جدا كأن مفيش حاجه
بس الظاهر أن فيروز شكت فى الموضوع خاصه انى معنتش بطلب منها اى حق من حقوقى الشرعيه
طبعا اتحرك المحقق كونان اللى جواها و بقت نفسها تعرف ايه سبب التغيير ده و حاولت كأى ست مصريه اصيله مع موبايلى لكن اخوكم كان واخد حذره و حاطط كلمه سر متعرفهاش
و لكن الحذر لا يمنع القدر زى ما بيقولوا ...كنت قاعد مع مريم بنتى و طلبت منى تلعب لعبه على موبايلى و اديتلها الموبيل بكل براءه منا قاعد جنبها و هى بتلعب يعنى مفيش خطر و لا كنت واخد خوانه اصلا
و يشاء السميع العليم أن يجيلى واحد حبيبي مشفتوش من سنه ينادى عليا و انا من فرحتى بيه نسيت أن الموبيل مع مريم
اول ما نزلت اشوف الراجل مراتى جريت اخدت الموبيل من ايد مريم و قلبت فيه ...
و هنا حدثت الكارثه يا ساده ...مراتى شافت صورى مع صباح على البحر و هى نايمه على صدرى و صور بتبوسنى فيها و صور و انا حاضنها
مراتى شافت كدا و .....
#ندم
#الجزء_السادس
اول ما نزلت اشوف الراجل مراتى جريت اخدت الموبيل من ايد مريم و قلبت فيه ...
و هنا حدثت الكارثه يا ساده ...مراتى شافت صورى مع صباح على البحر و هى نايمه على صدرى و صور بتبوسنى فيها و صور و انا حاضنها
مراتى شافت كدا و لقيتها نزلت عند امى و هاتك يا صويت
دخلت بسرعه افتكرت أن حصل حاجه او حد تعب لا قدر الله
لقيت مراتى عماله تصرخ و تقولى اتجوز عليا ...اخص عليك ...يا لهووووى و امى تهدى فيها و تقولها طب اقعدى بس يا بنتى نتفاهم
و دى تعيط و تصرخ ابدا ....طلقنى طلقنى
اخواتى و زوجاتهم نزلوا على الصريخ و دخلوا علينا
و انا دا كله واقف ساكت خالص انا لو اتكلمت الدنيا هتقوم مش هتقعد
انتى كنتى عارفه يا ماما مش كدا؟ اكيد قالك ما هو مبيخبيش عليكى حاجه
لا يا بنتى معرفش حاجه
بطلوا كدب بقا ...انا عارفه انكم كلكم عارفين و انا المغفله الوحيده اللى اخر من يعلم
احترمى نفسك و متوجهيش كلام لامى خالص عاوزه تتكلمى كلمينى انا
انت هتطلقنى يعنى هتطلقنى
هنا اخواتى زقونى دخلونى اوضه تانيه عشان الموضوع ميكبرش و اتهور عليها
و سمعت امى بتقولها استهدى بالله يا بنتى و اطلعى شقتك و بكرا نتكلم
لاااااا و دينى و ما أعبد ما اخطى الشقه دى تانى انا هاخد ولادى و امشى
يا بنتى ميصحش كدا اقعدى بس
انا برده اللى ميصحش كدا ؟؟ قولى الكلمه دى لابنك يا حماتى ...انا قصرت معاه فى ايه ؟ دا الناس بيحسدوه على بيته و نضافته و أولاده ...بس اقول ايه عينه فارغه ميملهاش الا التراب
لا عيب بقا كدا ...انا مقدره انك زعلانه بس عيب تغلطى فى جوزك بالشكل ده
لا اااا العيب دا تقوليه لابنك ...اللى رمى عياله و رايح يتسرمح مع واحده شبه الرقصات ....متكسفتش و لا خزيت على دمك و هى عماله تتصور معاك بمنظرها دا ...بس اقول ايه ؟
بطلى فضايح بقا يا فيروز و اقعدى
لا هو انتوا لسه شفتوا فضايح دا انا هخلى سيرته على كل لسان ..
هنا مقدرتش اتحمل كلامها وخرجت لها :
انتى عاوزه ايه ؟ عاوزه تمشى ؟ يلا مع السلامه
بقى كدا ؟ حااااضر أن ما وريتك يا شريف ؟؟
ابقى ورينى يا ماما ...يلا من هنا
مراتى اخدت العيال و مشيت و لقيت بقا اخواتى كلهم اتلموا عليا انت ازاى تعمل كدا و انتى كنتى عارفه يا ماما
و لقيت مرتاتهم قاعدين يتوشوشوا و يضحكوا زى ما يكونوا شمتانين فيها
بقولكم ايه انا معملتش حاجه حرام و دا شرع ربنا مرحتش زنيت و الا عملت حاجه تغضبه و بعدين انا راجل مقتدر و اقدر افتح بيتين و تلاته كمان
اخواتى قعدوا يقولولى بس كدا انت هتخرب البيت و عيالك دول هيروحوا فين ؟
عيالى مش هيروحوا فى حته و انا كفيل بيهم
و انت اتعرفت على مراتك الجديده دى فين يا شريف؟
اتعرفت عليها من اى مكان محدش له فيه المهم انها مريحانى و بتعملى اللى انا عاوزه
اخواتى لما لاقونى بتكلم بحده كدا سكتوا ..و انا الصراحه كنت قاصد اتكلم معاهم بالشكل ده عشان ميقعدوش يغلطوا فيا و يضايقونى بالكلام ..
اخواتى لما زهقوا منى سابونى و طلعوا شققهم.
امى هى اللى كانت صعبانه عليا فى الحوار ده لقيتها واقفه تعيط
بتعيطى ليه دلوقتى يا حاجه ؟
بيتك يا ابنى اللى اتخرب و العيال اللى هتتشرد
ما هو مخروب يا ماما ...هو انتى عاجبك اللى كان بيحصل معايا ؟ و بعدين عيالى انا مش هسيبهم حتى لو طلقتها هصرف عليهم و مش هخليهم عاوزين حاجه ابدا
لا يا ابنى متجبش سيرة الطلاق دى على لسانك
يا ماما انا لا عاوز أطلق و لا نيله عشان خاطر العيال بس ...لكن لو هى حكمت دماغها اعمل ايه يعنى ؟؟
ان شاء الله بكرا تهدى و ربنا يحنن قلبها عشان خاطر ولادها بس
و الله بقا ترجع مترجعش هى حره
تانى يوم مراتى بعتت تاخد هدومها و هدوم العيال و طبعا والدتى فتحت للمرسال و اديته كل اللى عاوزه
تالت يوم امى لقتها باعته تاخد بطاقة التموين والبيض الفراخ و اللحمه اللى فى الفريزر
امى قالت و ماله ما هو عيال ابنى اللى هايكلوهم و اديتهم كل حاجه و اديتها سكر و زيت و رز من عندها
فى اليوم الرابع بقا امى لقتها باعته لها العيال فى توكتوك
ايه ده انتوا جايين مع مين ؟؟
جايين لوحدنا يا تيته ؟
ازاى كدا ؟
ماما ركبتنا التوكتوك و قالت له يوصلنا عندك و قالت لنا روحوا لابوكوا
كدا ؟؟؟طيب يا حبيبتى ادخلوا تعالوا
امى لما لقت كدا اتصلت عليها
ازيك يا فيروز يا بنتى
الله يسلمك
مجتيش مع العيال ليه ؟؟
اجى فين ؟؟ انا معنتش اخطى باب بيتكم تانى
طب و هو ينفع تبعتى عيال صغيره كدا لوحدهم فى توكتوك ...مش خايفه عليهم يا بنتى يتخطفوا ؟
اه ينفع ايه اللى هيقل نفعه ؟ يروحوا لابوهم هو أولى بتربيتهم ، يقعد بيهم بدل ما هو داير يتسرمح هنا و هنا
عيب كدا يا فيروز ايه يتسرمح دى ؟؟
العيب اللى عمله المحروس و مارعاش عشره سبع سنين ...عياله عنده و اهلى مش هيصرفوا على ولاد غيرهم و يبقى يورينى بقا هيربيهم ازاى ....سلام ياااا تنت
امى قفلت السكه و اتصلت عليا
مراتك بعتت العيال يا شريف
بعتتهم ليه ؟
بتقول عيالك و أنت أولى بتربيتهم
بقا كدا ؟؟ هى فاكره انها هتلوى دراعى ؟ لا ابدا و الله
الليله صباح هتكون فى شقتها و نايمه على فرشها
لا لا يا شريف متأذمش الموضوع يا ابنى ...انت كدا بتعقد المواضيع مش بتحلها
يا ماما هى مش هتلوى دراعى
يا ابنى مفيش لوى دراع و لا حاجه العيال أهم معايا انهارده و انت روح لأهلها و اتكلم معاهم و شوف يمكن ربنا يصلح الحال
انا مش رايح لحد يا ماما دى ملهاش كبير ..و بعدين انا معملتش حاجه غلط هى قدامهم قالت روح اتجوز
يا ابنى انت ايوا معملتش حاجه غلط بس هى خدت على خاطرها من اللى انت عملتوا ...اكتر حاجه تكسر الست هى أن جوزها يتجوز عليها
ما هى اللى عملت كدا فى نفسها يا ماما
معلش يا شريف عشان خاطرى يا ابنى لم الموضوع و كلم اعمامها
حاضر يا ماما و لو أن الموضوع ده تقيل على قلبى اوى
قفلت مع امى و اتصلت على عمها حكيت له الحكايه كلها و قلت له انى عاوز ارجعها عشان العيال
عمها قالى طيب هتصل على الجماعه و ارد عليك
بعد شويه عمها اتصل عليا و قالى احنا مستنينك فى البيت بكرا باذن الله
رحت تانى يوم و اخدت اخويا الكبير معايا و قعدوا يتكلموا و فهمتهم أن ده حقى و انا معملتش حاجه غلط و انا مش مقصر معاها فى اى حاجه
و هى تقول لا يطلقنى ...يتحايلوا عليها و هى مصممه على رأيها
و انتهت الجلسه على أنهم هيحاولوا يقنعوها و هيتصلوا بيا
انا بقا روحت و انا متضايق اوى من اللى حصل ...مدام مفيش حل بيجبونى و يقعدونى ليه فى قعدة الرجاله دى
اول ما امى شافتنى قالت
ها عملتوا ايه ؟؟
معملناش الست هانم طالبه الطلاق
انت بتقول ايه ؟؟امال اتصلوا عليك ليه ؟
معرفش يا ماما ...انا روحت المشوار ده عشان خاطرك انتى لكن إن كان عليا مكنتش عاوز اروح أو اشوف وشها خالص
معلش يا ابنى حقك عليا
لا ابدا يا ماما عادى بقا
طب و اعمامها معرفوش يقنعوها دا المدارس يا ابنى كمان كام يوم و مريم فى المدرسه و الولدين فى الحضانه هتسيبهم ازاى كدا ؟
اهو اعمامها قالوا إنهم هيتصلوا بيا تانى
بعد يومين لقيت اتصال من عمها و قالى أنه أقنعها ...و لما قلت له على حكايه المدارس دى قالى انها هتيجى قبل المدارس بيوم عشان خاطر العيال
قلت له تمام
قفلت معاه و استنيت انها تيجى قبل المدارس بيوم زى ما عمها قال مجتش
اتصلت عليه تانى و سألته قالى انها رجعت فى كلامها و عاوزاك تطلقها
قلت له خلاص انا كدا عملت اللى عليا و زياده و قفلت السكه
رحت لصباح الشقه اللى مأجرهالها و قلت لها قومى يا صباح لمى هدومك و تعالى معايا
على فين يا شيكولاتا ؟
على شقتى اللى فى بيت ابويا
بجد ؟؟؟؟؟؟؟؟
#ندم
#الجزء_السابع
رحت لصباح الشقه اللى مأجرهالها و قلت لها قومى يا صباح لمى هدومك و تعالى معايا
على فين يا شيكولاتا ؟
على شقتى اللى فى بيت ابويا
بجد ؟؟؟؟؟؟؟؟
ايوا بجد يلا قومى
بس هجيب بنتى معايا
طبعا جبيها و مالو مفيهاش حاجه
طب يعنى والدتك أو اخواتك ؟؟
يا ستى محدش له دعوه بيا يلا بس متضيعيش وقت
صباح لمت حاجتها بسرعه و كانت الفرحه مش سايعاها و خدتها فى العربيه و رحنا على البلد
اول ما دخلنا الشارع و بما اننا فى منطقه ريفيه بقا الكل يبص مين دى اللى نازله معايا من العربيه و شايل معاها شنطة هدوم كبيره و بعدين بسم الله ما شاء الله هى ملفته للنظر بلبسها و مكياجها
اول ما دخلت على امى بيها امى اتخضت و بان على وشها القلق
صباح مراتى يا ماما
اهلا و سهلا يا بنتى
اهلا بيكى يا حاجه ...هاتى بوسه ...و الله من كتر كلام شريف عنك حبيتك اوى
ربنا يخليكى يا بنتى
دول ولادى يا صباح
بسم الله ما شاء الله ...تعالى يا عسل اظن دى مريم صح
ايوا صح
تعالى يا مريم أما اقولك
لا
كدا ؟؟ دا انا هجيب لك حاجه حلوه
لا مش عاوزه
تعالى يا مريم سلمى على ماما صباح و بوسيها
لا يا بابا مش عاوزه
متزعليش يا صباح بكرا تاخد عليكى
لا ازعل ايه ؟؟ انا هعرف اخليها تحبنى ازاى
امى اتعاملت مع صباح كويس بس انا بس اللى كنت فاهم امى و حاسس بالحزن فى عينيها.....مطولتش القعده مع امى كتير و قلت لها هطلع اورى صباح الشقه يا امى
قالت و مالوا يا ابنى بس ابقى انزلى عاوزاك
طبعا كنت متوقع انها هتعوزنى دى لأن الكلام فى عنيها انا قريه
حاضر يا ماما خمس دقايق بس
طلعت مع صباح و دخلتها الشقه
نورتى بيتك يا عروسه
بنورك يا قلب العروسه ....ايه دا ؟ ايه الجمال دا كله الشقه زى ما يكون شقة عروسه بجد ...هو انت غيرت عفش مراتك ؟؟
لا هو دا عفش مراتى بس مش انا قلت لك انها كانت نضيفه اوى و بتغير الحاجه على طول
واضح اوى فعلا ...دا انا و انا عروسه مكنتش حاجتى بالنضافه و الحلاوه دى
تعالى اما افرجك على باقى الشقه
دى أوضة النوم
واووووو ايه دااااا ...ايه الحلاوه دى يا شيكولاتى ؟ و ايه الفرش الحلو ده ؟ عمرى ما كنت أحلم انام فى أوضة زى دى
تعالى لسه فى اوضتين كمان ...دى اوضه الولاد
ما شاء الله واسعه و منظمه و حلوه اوى
و تعالى ....دى اوضه للضيوف
الله دا فيها أوضة نوم كامله ...بس جميله و الله
و طبعا الصاله فيها الانتريه و السفره و النيش زى ما انتى شايفه
ايوا ما شاء الله الصاله كبيره اوى ....الصاله لوحدها كانت قد شقتى كلها اللى كنت متجوزه فيها ...و دا ايه دا ؟؟ ايه الصينى و الكوبيات الحلوه دى ؟ دى كلها كوبيات هى كانت فاتحه محل و الا ايه ؟؟
لا بس هى بتحب تجيب اى حاجه جديده تنزل
و الا الصينى ؟؟دا شكله من النوع الغالى اوى
ايوا هى فيروز مبتجبش غير الحاجات القيمه
طيب هدخل بقى ارص هدومى و اخد شاور على ما تنزل للحاجه
اه صحيح انا نسيت الحاجه ...هنزل مش هتأخر عليكى
لا براحتك يا شيكولاتى ...انا لسه هجهز نفسي بمناسبه الشقه الحلوه دى
حلاوتك يا حلو
هئ هئ هى
و نزلت لامى و انا عارف هتقول ايه ...اول ما دخلت لقيت مريم قاعده جنبها و عماله تعيط
مالك يا مريم بتعيطى ليه ؟؟
تعالى يا شريف اقعد جنبى هنا
نعم يا ماما
ايه اللى انت عملته دا يا ابنى ؟؟ انت كدا هتأذم الوضع اوى
و انا اعمل ايه يا ماما ...ما انتى شايفه انا اتحايلت عليها و بعد ما اتفقت رجعت فى كلامها تانى و العيال عاوزين حد يراعيهم و انا مش عاوز اتقل عليكى اكتر من كدا
و مين قالك انى متضايقه منهم ..يا ابنى احنا عاوزين نحل مش نعقد ...و انت باللى عملته دا هتعقد الدنيا اكتر
ما تتعقد يا ماما ...انا خلاص زهقت
طيب عاوزه اقولك على حاجه تانيه
اتفضلى يا ماما
بنتك مريم زعلانه أن فى واحده تانيه هتنام على سرير امها
يعنى ايه يا ماما ؟
يعنى يا ابنى انت عندك اوضه ضيوف دخل مراتك فيها و اقفل اوضه فيروز على حاجتها و هدومها
حاضر يا ماما ...حاجه تانيه ؟؟
لا يا ابنى ...بس بستأذنك هاخد اختك و مرات اخوك و نروح لفيروز
يا ماما و الله ما هتيجى معاكم انا عارفها مخها انشف من الحجر
طب معلش سبنى احاول
زى ما تحبى يا ماما
طلعت لقيت صباح مجهزه نفسها كأنها عروسه شعر و ميكب و لبس و بارفان ...و لقيتها حطت هدومها فى الدولاب و ركنت حاجه فيروز على جنب
قلت لها معلش يا صباح احنا هنقعد فى أوضة الضيوف و هنقفل على حاجه فيروز عشان حاجتها و كدا
حاضر يا شيكولاته من عنيا يا حبيبي ...لو حتى قلت لى اقعدى فى الحمام الحلو ده انا موافقه
اهو عقلك الكبير ده هو اللى عجبنى فيكى
عقلى بس ؟؟؟
لا طبعا كله كله
اااه بحسب ههههههه ....تعالى بقا حضرت لك حاجه خفيفه كدا نتعشى بيها ...عشان عاوزاك فى موضوع حلو اوى و فيه خير باذن الله
خير أن شاء الله يا حبيبتى ؟
تعالى بس خد من ايدى دى .... ايوااا عسل يا شيكولاتى
ها ... موضوع ايه اللى عاوزه تكلمينى فيه ؟
انت عارف طبعا انى مأجره كوافير انا و اختى و بقى لنا اسم و الزباين بقت بتجيلى بالاسم
ايوا ما شاء الله
دلوقتى الراجل صاحب المحل جالى انهارده و عاوز يبيعه و انا صراحه مستخسره انى بعد ما عملت ليا اسم و الناس عرفتنى اسيب كل ده
طب يعنى عاوزه ايه ؟
يعنى لو تشتريهولى و يبقى بتاعى لوحدى هيبقى الخير كله لنا ...و زى ما تشوف برده
خلاص يا صباح شوفى الراجل عاوز فيه كام و انا اشتريهولك ...عنيا ليكى يا صبوحتى
تسلم عنيك يا روح الصبوحه
بعد كدا ابتدت صباح تتشغل بالمحل اوى و تعيد تجهيزه و فرشه مره تانيه و بقت تقضى طول اليوم هناك
امى كانت بتطلع الشقه و مكنش عاجبها الوضع و لقيتها بتقولى يا ابنى انا شايفه مراتك مش واخده بالها من العيال خالص و عماله تطلع فى حاجات فيروز كوبيات و اطباق و تسيب الحاجات متوسخه ...يا ابنى دا الشقه اتقلبت خالص ...دا فيروز كانت منضفه وواخده بالها من البيت عن كدا
يا ماما أدى انتى قولتيها كانت واخده بالها من البيت مش منى انا ...صباح مريحانى و مش مهم البيت
ازاى يا ابنى بتقول كدا ؟؟ بص لما اقولك العيال طول النهار سرحين فى الشارع و انا مش قادره عليهم
يعنى ايه يا ماما ؟
يعنى انا هبعت اختك و مرات اخوك لمراتك تجس نبضها وتكلمها و تشوف حل فى موضوعكم دا العيال هى اللى بتدفع تمن عندكم يا ابنى
زى ما تشوفى يا ماما
#ندم
#الجزء_الثامن
العيال طول النهار سرحين فى الشارع و انا مش قادره عليهم
يعنى ايه يا ماما ؟
يعنى انا هبعت اختك و مرات اخوك لمراتك تجس نبضها وتكلمها و تشوف حل فى موضوعكم دا العيال هى اللى بتدفع تمن عندكم يا ابنى
زى ما تشوفى يا ماما
تانى يوم امى بعتت اختى هناء و مرات اخويا سلوى لمراتى و قعدوا اتكلموا معاها
مش كفايه كدا و ترجعى لبيتك يا فيروز ؟؟
اى بيت يا هناء ؟؟
بيتك ... شقتك يا بنتى
اه شقتى اللى قعدتوا واحده تانيه فيها ؟
طب ما تيجى يا بنت الحلال و هى نمشيها
اجى فين يا ست سلوى ...لااااا
يافيروز استهدى بالله شريف طيب و معملش فيكى حاجه وحشه
يا سلام ...اما يتجوز عليا دى حاجه حلوه صح ؟؟ الهى جوزك يتجوز عليكى زيى يا سلوى
يا بنتى مش انتى اللى عندتى و قلتى له يروح يتجوز
و هى اى واحده تقول لجوزها روح اتجوز يتجوز ؟..دا كدا نص ستات مصر ازواجها يتجوزوا عليهم
لا يا فيروز بس انتى غلطانه برده هو قالك استخدمى وسيله منع حمل و انتى مرضتيش
يا سلام يبقى عشان مرضتش يتجوز ...طب ما فى رجاله مسافره بره و بيبعد عن مراته بالسنه و السنتين ليه مبيتجوزوش دول؟
ياستى الموضوع مختلف الراجل بره بيبقى بعيد عن مراته إنما انتى قدامه
بقولك ايه يا ست سلوى انتى متجيش يا اختى تعملى عليا ابله الناظره ...انتى يا اختى ممشيه جوزك على العجين ميلخبطوش ...خيره كله فى حجرك الدور عليا انا اللى معرفش عنه اى حاجه و كل ليله يخلص شغله و يروح يقعد على القهوه مع أصحابه ميجليش الا اخر الليل زى ما يكون انا كنبه أو رجل كرسي..كلكم منصوفين فى اجوازكم سواء انتى سواء سميره راخره جوزها راجل طيب و من أيدها دى لايدها دى و سايبها تشتغل و تعمل اللى هى عاوزاه مبيقدرش يرد لها كلمه ......مفيش غيرى انا اللى حزينه و جوزى له دماغه اللى ماشي بيها و لا عاملى اى اعتبار
طب ما تعملى زينا و تاخدى جوزك فى حضنك و تحتويه و تنسيه صحابه و قعدة القهوه
لا مبعرفش اعمل زيكم.... خلينالك يا اختى السهوكه
طب و ماله لما تتسهوكى على جوزك الرجاله عاملين زى الاطفال عاوزين اللى يضحك على عقلهم بكلمتين
لا انا مليش فى اللف و الدوران بتاعكم ده سيبناهولك يا اختى
انتى مالك كل ما اقولك كلمه تهبى فيا كدا ...هو انا عملت فيكى حاجه ...انا جايه هنا خايفه عليكى و على بيتك
لا متشكرين محدش قالك تخافى عليا و بعدين هو انتى فاكره انى خايل عليا انك جايه و خايفه عليا ؟ لا يا حبيبتى انا عارفه كويس اوى انكم شمتانين فيا سواء انتى سواء الست سميره ... و بعدين انتوا بقا اللى المفروض تخافوا منى
يعنى ايه نخاف منك ؟ ما تفهمينا يا حبيبتى
خلاص يا سلوى احنا مش جايين ننتخانق ...يا فيروز عيالك متبهدله يا اختى ...انتى عماله تعندى و هو يعند و العيال هى اللى فى النص ما بينكم
ليه يا هناء ما اخوكى جابلهم واحده تانيه غيرى ...خليها بقا تشيل و تورينا شطارتها
يا فيروز مهما كان مرات الاب مش ممكن هتكون زى الام
طب بذمتك يا هناء انتى مش شفتيها ؟؟ دى عامله زى الرقاصين ...رايح يجيب حته كوافيره و يدخلها على عفشي و حاجتى ؟؟ ودينى لأوريه ابو رياله ده
ما تتكلمى عدل يا بت انتى
ليه شايفانى بتكلم عوج و الا ايه يا ست سلوى....العى و انت جاهى جوزك يتجوز عليكى و افرح فيكى زى ما انتى فرحانه فيا كدا دلوقتى
تصدقى انك قليلة الادب
خلاص اسكتى يا سلوى مش عاوزين نكبر الموضوع...
انتى مش شايفه قلة ادبها ؟؟؟ انا لولا مقدره ظروفها و حرقة قلبها كنت عرفت ارد عليها كويس
خلاص يا سلوى بقا ..... طب انتى طلباتك ايه يا فيروز عشان ترجعى
طلباتى ؟ .... اخوكى يجيب لى عفش جديد اوضه نوم و سفره و انتريه و اطفال و ضيوف و يجيب لى كل الاجهزه الكهربيه ، و الصينى بتاعى و كافة شئ من هدوم جديده لفرش و عاوزه دهب كأنى عروسه جديده منا مش هقعد على عفش قعدت عليه غيري...و يجيب لى شقه فى المدينه بعيد عن بيت العيله و يكتبها باسمى
ليه يعنى السفيره عزيزه ؟
متدخليش فى الكلام يا سلوى انا بكلم هناء موجهتش لكى كلام ...و بعدين اه انا حسن من السفيره عزيزه ...دى حاجه متخصكيش
خلاص يا فيروز انا هقوله ...يعنى لو عمل لك اللى قلتى عليه هترجعى ؟؟
لا طبعا ...هو يعمل اللى قلت لك عليه ده و بعد كدا افكر ارجع له و الا لأ .....انا لما ارجع ارجع بمزاجى انا مش بمزاجه هو
يااختى يا حلوه ...ايه يا بت الطعامه دى ؟؟و الله لولا العيال ما كان عبرك
خلاص يا سلوى يلا بينا ...انا هقوله يا فيروز و هرد عليكى ....سلام عليكم
مع السلامه .....
بعد خروج اختى و مرات اخويا من عند فيروز و لسه كانوا مخرجوش من البوابه سمعوا مراتى بتشتم فيهم
سلوى لما سمعت قعدت تشتمها و تقولها
اخص عليكى احنا غلطانين أننا عبرنا واحده زيك ...انتى يا بت مكنتيش لينا من الاول انا عارفه كان مستحملك ازاى ؟ دا ربنا نجده و الله ...جتك الهم و الغم .......... و هناء تزق فيها و تقولها يلا بالله عليكى مش عاوزين مشاكل اكتر من كدا
هناء رجعت و حكتلى على اللى حصل مع فيروز فى حضور امى و قالت لى هى طالبه شقه كامله من مجاميعه بس بره بيت العيله و عاوزه دهب جديد عشان ترجع...قلت ايه ؟
وانا موافق يا هناء
بس هى بتقول انك تعمل كل ده و بعدين هى هتفكر ترجع لك و الا لا
نعم .....كمان ؟؟؟ ليه هى فاكره نفسها ايه ؟
و الله قلت لها كدا يا شريف و اللى متعرفوش انها شتمتنا كمان و بهدلتنا .
اسكتى يا سلوى ....هدى الدور يا شريف و لم عيالك مع امهم
انا برده يا هناء ؟؟ الهانم عاوزه تدوس على رقبتى و تدفعنى اد كدا و بعدين توافق أو لأ ؟؟ طب ما هى كل ما نتفق معاها اتفاق بترجع فى كلامها و ملهاش كبير ...ايش ضمنى انى بعد ما اعمل اللى هى عاوزاه ترجع تقول لا
مفيش ضمان يا شريف
عجبك الكلام ده يا ماما؟؟
و الله يا ابنى منا عارفه ...هى اكيد واخده على خاطرها انك دخلت واحده غريبه على عفشها
طب خلاص خليها بقا واخده على خاطرها......انا مش هشترى واحده بيعانى بالشكل ده ..دى كل اللى فارق معاها العفش و الدهب انا مش فارق معاها يا ماما و لا فى خيالها اصلا ...دى واحده طماعه و مش هامهها الا انها تنهب اى حاجه منى و خلاص
يا ابنى ما جوازك عليها حسسها بعدم الأمان و حسسها انك بعتها فى لحظه ...فهى عاوزه تأدبك بس
انتى معايا و الا معاها يا ماما ؟؟
يا ابنى انا معاك و معاها عشان خاطر عيالكم
طب خلاص خليها كدا شويه و تضرب دماغها فى اتخن حيطه
بعد كدا بدأت الحرب الالكترونيه بين مرتاتى الاتنين و بقوا يدخلوا يشتموا بعض على صفحتى و بقت فيروز تتريق عليا و تبين لها انها اخدت مقلب فيا و تحط صور ساخره و تقولها البسي
طبعا انا كنت بشوف كدا و دمى يتحرق عملت لها بلوك من الفيس و وصيت صباح انها متردش عليها نهائى
صباح بعد ما جهزت المحل الزبائن كتروا اكتر كانت ساعات تاخد العيال معاها الكوافير خميس و جمعه و العيال فى الاول كانت مبسوطه اوى ...لان اليومين دول بيبقى فى عرايس و ناس بتزغرط و فرحانه و العيال كانت بتهيص معاهم
بعد كدا و لما الشغل زاد اكتر اضطرت صباح انها تقعد فى البلد اللى فيها المحل و دى بلد جنب بلدنا و بقت تيجى لنا يوم اجازتها بس و بقت تيجى تستخدم الاطباق و الكوبيات و تسيبها مش نضيفه خالص امى تطلع بالصدفه تلاقى الاطباق فيها عفن و الدنيا مدربكه و الهدوم فى كل مكان ....
امى كانت تمسك المواعين تغسلها و تنضف الشقه على اد ما تقدر ما هى ست كبيره برده
اخواتى بدأوا يضغطوا عليا و يكلمونى انى ارجع مراتى
قلت لهم انى معنديش مانع بس هى اللى منشفه دماغها و كل ساعه براى و ملهاش كبير
قالوا طب نودي لها العيال
قلت و ماله و مستعد اديها خمس الاف جنيه فى أيدها كل شهر عشان تصرف عليهم ...لكن للاسف الحل ده منفعش لأن مدارس الولاد بعيد عن بيت والدتها
الوضع فضل على ما هو عليه لحد ما فى يوم كنت قاعد فى المعرض و لقيت اختى داخله عليا و بتقولى الحق يا شريف .....
#ندم
#الجزء_التاسع
قلت و ماله و مستعد اديها خمس الاف جنيه فى أيدها كل شهر عشان تصرف عليهم ...لكن للاسف الحل ده منفعش لأن مدارس الولاد بعيد عن بيت والدتها
الوضع فضل على ما هو عليه لحد ما فى يوم كنت قاعد فى المعرض و لقيت اختى داخله عليا و بتقولى الحق يا شريف
خير يا هناء فى ايه ؟
فى واحد محضر بيسأل عليك و بيقول فى أمر ضبط و إحضار ليك
ليا انا ؟ ليه ؟
بيقول فى حكم عليك بسنه سجن فى قضية تبديد العفش
الظاهر فيروز رفعت قضيه بالقايمه و احنا نايمين
طب و قلتى للمحضر ايه ؟
مش انا اللى كلمته ماما هى اللى كلمته و قالت له إنك مسافر و انا جيت جرى خفت تيجى و هو موجود
طب متقلقيش انا هتصل بالمحامى بتاعى و اشوف الحوار ده
و اتصلت على المحامى و طمنى و قالى ادينى يوم هسأل و اعرف لك القصه كلها
تانى يوم لقيته بيكلمنى و بيقولى أن فيروز رافعه عليا قضيه طلاق و نفقه و تبديد القايمه و دى اتحكم فيها بسنه سجن و غرامه ٣٠ الف جنيه
و امتى عملت القضيه دى يا متر ؟؟
القضيه دى بقالها حوالى خمس شهور
طب انا مجليش اى اعلان لا على البيت و لا المعرض
لا ما هو ساعات بعض المحامين بيكتبوا عنوان غلط عشان الخصم ميعرفش حاجه عن القضيه و ميحضرش و لا يقدم ورق و بالتالى يتحكم عليه زيك كدا
طب و بعدين ؟؟
متقلقش انا هقدم على استئناف و انت لو عاوز تأدبها ممكن ترفع عليها قضيه طاعه
قضية طاعه ؟؟؟ لا لا طاعة ايه
دى قضيه بنعملها نوع من الضغط على الخصم و بتبقى قضيه قدام قضيه
لا يا متر أن كانت هى رضيت تدخل ابو اولادها المحكمه انا مرضاش ....هى لو عاوزه تنفصل انا أطلقها و اديها كل حقوقها مكنش له لازمه اللى عملته دا من الاول
طيب خلاص يا استاذ شريف بكرا باذن الله هكون كتبت مذكرة الدفاع و اعمل لك استئناف باذن الله
بعد ما المحامى مشي قعدت افكر ...بقى دى مراتى اللى كنت بحاول اعيشها افضل عيشه ...فين العشره ؟؟
انا لما اتجوزت مخنتش عشرتها اتجوزت على سنة الله و رسوله ....دا حقى و هى اللى دفعتني لكدا بعندها و غبائها ...لكن هى ازاى تعمل كدا ؟
ازاى تبقى عاوزه تحبسنى و تعملى قضيه ؟ و هى متاكده لو طلبت حاجتها هديهالها ....اد كدا شيطانها مسيطر عليها ؟ فين الميثاق الغليظ اللى ربنا قال عليه ؟
طب منا ممكن ابهدلها برده و أقل باصلى معاها و مطولهاش و لا حق و لا باطل ، ممكن مخليهاش تشوف ولادها دول مره تانيه و اخليها تبكى بدل الدموع دم ...دماغى هتنفجر مش قادر اصدق و الله انا اقوم اروح احسن
قمت روحت البيت لقيت امى قاعده زعلانه و لقتها بتقولى :
حقك عليا يا ابنى انا اللى وقعتك الوقعه السودا دى
لا يا امى متعتذريش دا فى الاول و الاخر نصيب و انتى مدخلتيش فى قلبها بس انا صعبان عليا اوى انها تشكينى و عاوزه تحبسنى
معلش يا شريف اكيد اللى عملته دا من حرقة قلبها و انك دخلت واحده على عفشها
ياااااا يا ماما انتى لسه بتلاقيلها مبررات
لا يا ابنى ابدا و الله انا بحاول اخفف عنك بس
عارفه يا ماما اكتر حاجه مأثره فيا انى مش مصدق انها بعد العشرة الطويله دى يجى فى خيالها انها تضرنى بالشكل ده ...طب ليه ؟ احنا مش أعداء ...يعنى لو حتى اختلفنا أو استحالت العشره ليه نقطع فى بعض كدا ؟ انتى عارفه المحامى قالى انى ممكن اعملها قضيه طاعه و لو كسبتها و مرضيتش تنفذ هتبقى ناشز يعنى ملهاش اى حقوق عندى بس انا مش عاوز اعمل كدا
هون على نفسك يا شريف ...طب ما تحاول يا ابنى تتصالحوا سوا
انتى بتقوليلى انا الكلام ده ؟..طب منا على يدك بعت لها كذا مره بس هى مش عاوزه تعيش و انا مش هجبرها انها تعيش معايا
يا ابنى و الله دا كله عند و شغل محامين
و ايه يخليها تروح لمحامى يا ماما ؟ ايه يخليها تستقوى براجل غريب او بالمحكمة على جوزها ابو ولادها
معلش يا شريف عشان خاطر ولادك
و اشمعنى هى مقلتش عشان خاطر ولادى ...اشمعنا انا دايما اللى لازم اطاطى
لا مش بتطاطى يا ابنى انت بس بتهدى عشان المركب تمشي
عنها ما مشيت يا ماما ...انا خلاص هطلقها و هديها العفش اللى اشتكيتنى بيه
لا بالله عليك متاخدش قرار وقت نرفزه و أهدى بس و صلى على النبى
اللهم صلى عليه بس انا مش واخد قرار وقت نرفزه و لا حاجه ...انا من زمان و انا نفسي اخد الخطوه دى
طب استنى يا شريف انا هروح لها يا ابنى و احاول معاها محاوله اخيره
لا يا ماما من فضلك ...هى اختارت طريق المحاكم و خلاص خليها تمشي فيه
لا حول ولا قوه الا بالله ...ربنا يهدى الحال معلش يا شريف عاوزه اقولك على حاجه تانيه ممكن تزعلك
متخافيش يا ماما انا خلاص نحست و معدش فى حاجه بتزعلنى .
بنتك مريم جابت الشهاده انهارده و جايبه درجات وحشه اوى و بتقول أن الأخصائيه الاجتماعيه عاوزه ولى أمرها ...فأنت بكرا قبل ما تنزل شغلك فوت على مدرستها شوفهم عاوزين ايه
حاضر يا ماما
تانى يوم رحت المدرسه بتاعه بنتى ... سألت عن الاخصائيه الاجتماعيه و رحت لها ...
اول ما دخلت عليها افتكرتها ....دى ساميه زميلتى اول حب ليا لما كنت فى الثانوى ...ياااا شكلها متغيرش خالص ...عامله زى الورده ، ملامحها هاديه لبسها محترم و منسق و فيه ذوق ، جمالها طبيعى من غير اى مكياج ...غريبه مش لابسه فى أيدها دبله ...يا ترى هى مش متجوزه فعلا ؟ و الا زى ستات كتير بعد الجواز بتضطر تبيع دهبها و تفضل من غير دبله ؟
قطع تفكيرى صوت ساميه و هى بتقول
اتفضل حضرتك...... تحت امرك
انا ولى أمر الطالبه مريم شريف احمد
اه ....اتفضل يا فندم
انتى مش فاكرانى يا ساميه ؟
لا مش واخده بالى و الله
انا شريف كنت زميلك فى المدرسه الثانويه و كنا مع بعض فى دروس العربى و الانجليزى
استنى ....اااااه افتكرت اهلا بيك يا استاذ شريف
اهلا بيكى ...بس انتى متغيرتيش خالص ...زى ما يكون سايبك امبارح ...بنفس حلاوتك و جمالك
احم ....خلينا فى موضوعنا دلوقتى البنت مستواها قل جدا ...بعد ما كانت متفوقه فى السنين اللى فاتت دلوقتى مدرسينها بيشتكوا منها و بيقولوا على طول نايمه على الديسك و مبتكتبش الواجبات و مبتتجاوبش معاهم نهائى
غير بقا أن سلوكها أصبح عدوانى جدا و بقت تضرب زمايلها ....لسه امبارح ضاربه واحده زميلتها و معوراها و اهلها جم هدوا الدنيا ...و انا وعدتهم انى احل المشكله
طب انا تحت امرك اساعد ازاى ؟
هو انا اللى هقولك تساعد ازاى ؟؟ حضرتك البنت كدا اكيد عندها مشكله و لازم تحلها انت ووالدتها
للاسف والدتها مش موجوده
انا اسفه ...هى توفت ؟
لا عايشه بس فيه مشاكل بينا ...سايبه البيت و سايبالى مريم غير تلاته أخواتها
طب ما تحاول تصلح عشان خاطر الاطفال دول
للاسف منشفه دماغها و مش راضيه ترجع ...لا و شاكيانى كمان فى المحاكم
طب انا ممكن اقولك على حل
يا ريت و الله يبقى كدا كتر خيرك
انت عارف والدى طبعا ؟
لا صراحه مش واخد بالى
انا والدى قاضى عرفى ممكن يساعدك فى حل المشكله دى
يحلها ازاى ؟ انا بسمع عن القضاه العرفيين بس معرفش ايه نظامهم
بص يا سيدى القاضى العرفى ده مبيبقاش لوحده دول بيبقوا تلاته و لهم كلمه و بيحاولوا يفضوا المنازعات بين الناس بدون دخول للمحاكم
بيسمعوا من الطرفين و بيحكموا على الطرف الغلطان و بيلزموه بأنه ينفذ الحكم ده
طب انا مش عارف ....طب اقولك انا هسال و ارد عليكى ...ممكن رقم تليفونك عشان اكلمك
لا معلش مبديش رقم تليفونى لحد
انا اسف ...بس كنت عاوز اكلمك و اطمن على مريم برده
عاوز تطمن على مريم ممكن أدى لحضرتك نمرة المدرسه و هما يحولوك على مكتبى هنا
تمام ...انا متشكر اوى ...طب ممكن اسالك سؤال تانى بس ارجوكى متكسفنيش
اتفضل
هو انتى متجوزه ؟؟
و دا شئ يخصك فى ايه ؟؟
معلش ...اصلك مش لابسه دبله فى ايدك و مش معقول الجمال ده كله مش متجوز
من فضلك يا استاذ شريف ميصحش الكلام ده
انا اسف و الله انا مش قصدى ...اسف لو زعلتك
خلاص مفيش مشكله المهم دلوقتى مريم لازم تحل مشاكلك مع مراتك و تاخد بنتك فى حضنك و تهتم بيها و تشوف ايه مضايقها اوى كدا و مخليها عصبيه ...و انا من ناحيتى هحاول اجيبها فى الفسحه و اتكلم معاها و أوصى عليها المدرسين
حاضر يا مس ساميه .....و انا اسف مره تانيه أن كنت ضايقتك
لا ابدا. انا قلت لك خلاص
طب هاتى رقم المدرسه بقا
اتفضل الرقم اهو ...و لما تكلمهم قولهم حولونى على اوضه الاخصائيه
تمام استأذن انا ...سلام عليكم
اتفضل ...و عليكم السلام ورحمه الله وبركاته
خرجت من عندها و انا بقول لنفسي ايه اللى عملته دا يا شريف ؟؟ لزوموا ايه تسألها متجوزه و الا لا ؟ انت عاوز منها ايه اصلا ؟
يخربيت كدا 🙄
#ندم
#الجزء_العاشر
خرجت من عند ساميه و انا بقول لنفسي ايه اللى عملته دا يا شريف ؟؟ لزوموا ايه تسألها متجوزه و الا لا ؟ انت عاوز منها ايه اصلا ؟
يخربيت كدا 🙄
لما رحت على المعرض لقيت اخويا الكبير مصطفى قاعد بيخلص شويه حسابات سألته عن موضوع القاضى العرفى ده قالى هو كويس بس مشكلته أن اللى بيغلط بيتحكم عليه بمبلغ جامد اوى و انت عندك غلطه
غلطة ايه انا معملتش حاجه غلط انا اتجوزت على سنة الله و رسوله
لا غلطتك انك دخلت مراتك التانيه على عفش مراتك الاولى و دا مش من حقك
طب و بعدين ؟
انا شايف أننا نحل الموضوع ده ودى مع مراتك يا شريف
انا مش عاوزها تانى ...انا خلاص كرهتها
بطل كلام عبيط يا شريف ...انت لازم تحافظ على حياتك مع مراتك عشان خاطر الأربع عيال اللى ملهومش ذنب دول و بعدين مين قالك أن كل البيوت الموجوده دى مقامه على الحب
يا مصطفى انا نفسي احب و اتحب
طب ما انت اتجوزت تانى ...ايه مش بتحب مراتك التانيه هى كمان ؟؟
لا بحبها بس ...
ايوووه اهو انا عاوز اسمع بس ايه ؟؟
بص يا مصطفى انا منكرش انى اتسرعت فى جوازتى التانيه دى و محسبتش لها حساب ...بس فيروز عملت لى عقده و خلتنى ادور على اللى ناقص فيها و لما لقيته فى صباح اتجوزتها بدون أدنى تفكير و لا حساب للى ممكن يحصل بعد كدا
طب و بعدين ؟؟
بعدين دى معرفهاش انا حاسس انى تايهه مش عارف انا عاوز ايه بالظبط بندم على كل حاجه من اول جوازتى بفيروز و تسرعى فى الجواز بصباح
معدش له لازمه الندم دلوقتى يا شريف انت لازم تحل المشكله اللى حطيت نفسك فيها دى
عارف يا مصطفى انا نفسي امشى ...اسافر بعييييد اوى و ابعد عن كل المشاكل دى ...يا ريتنى يا اخى لا اتجوزت و لا شفت الجواز من أصله
منا قلت لك مفيش داعى للندم خلاص ...لازم تفكر فى طريقه تخرج نفسك بيها من الورطه دى
هشوف يا مصطفى ....
بعد اليوم ده بقيت اتردد على مدرسه مريم بنتى و اروح لساميه بحجه انى اطمن على مريم و مستواها مع المدرسين
كل ما كنت اشوف ساميه كنت احس اد ايه انا غلطت فى حق نفسي لما اتنازلت من الاول عن حلمى فى انى اتجوز اللى بحبها
ساميه حد كويس اوى ذوق لسانها حلو مؤدبه محترمه فيها كل الصفات اللى كنت بتمناها من زمان
بس مشكلتها معايا انها مبتدنيش فرصه اتكلم معاها و اعرف عنها كل حاجه ...بخاف اسألها عن حياتها تزعل منى
و فى يوم كنت خارج من عند مريم من الفصل لقيت وليد زميلى و زميل ساميه فى الثانوى
الله وليد ؟؟ ازيك يا وليد
اهلا اهلا ازيك يا شريف وحشتنى اوى
انت فين يا ابنى بقالى سنين مشفتكش
اصلى كنت مسافر اعاره بره و لسه راجع مبقليش سنه ...تعالى هندخل نشرب كوبايتين شاى و نتكلم شويه
لا مش هينفع عندى شغل و الله يا وليد ...بس ايه رايك نتقابل على القهوه بالليل
طيب يا ريت انت واحشني اوى و نفسي اتكلم معاك كتير
طب خلاص خد تليفونى اهو و نتقابل بعد العشا فى قهوة السعدنى
يااااا انت لسه بتروح السعدنى ؟
ايوه طبعا احنا لنا غيرها ...انا و كل الشله بنروح هناك
طب حلو اوى هجيلك باذن الله
مشيت و كل تفكيري أن ربنا بعت لى وليد ده عشان اعرف كل حاجه عن ساميه ما هو زميلها و اكيد يعرف عنها كل حاجه
كان نفسي اساله عنها و احنا واقفين بس لقيت لا وقته و لا مكانه .
ممكن حد منكم يقول فى نفسه ايه العك اللى انا عمال اعكه ده ...و تقولوا عليا انى غلطان أو محلتش مشاكلى و رايح ادور على مشاكل جديده ....انتوا معذورين فعلا و انا شخصيا لو شفت واحد بيعمل كدا هقول عليه أنه مش متزن و بيفكر غلط
لكن صدقونى انا مش عارف اوصفلكم انا مشدود اد ايه لساميه ...بحس انها زى المغناطيس ..ببقى قاعد قدامها مش عاوز اقوم .....معرفش ليه كدا ...لغاية دلوقتى مش لاقى تفسير للى بيحصلى دا ....و عارف إن ممكن مشاكلى تزيد بس مش قادر اعمل غير كدا
رحت القهوه بالليل و قابلت وليد و قعدنا نتكلم و حكيت له حكايتى و هو كان قاعد مذهول
ليه يا ابنى تعمل فى نفسك كدا ؟؟ طب و مراتك الجديده نظامها ايه معاك ؟
مراتى الجديده روشه اه بس من اول ما اشتريت لها المحل انشغلت بيه جدا لدرجه انها بقت مبتجيش البيت الا يومين فى الأسبوع
نعم انت كمان اشتريت لها محل ؟
ايوه يا وليد
انت ليه متسرع اوى كدا ؟؟ ليه كل حاجه بتعملها مبتفكرش فيها قبل ما تعملها ؟
بقولك ايه يا وليد انا مش ناقص و حيات ابوك انا فيا اللى مكفينى و عارف كل الكلام اللي هتقوله ده
يا شريف انت لازم تفوق
حاضر هفوق بس عاوز اسالك عن حاجه
اتفضل
الاخصائيه الاجتماعيه الاستاذه ساميه ظروفها ايه ؟
و انت بتسأل عن ساميه ليه ؟
لا ابدا أصلها شخصيه محترمه اوى و كنت عاوز اعرف عنها اى حاجه ....هى تقريبا مش متجوزه لانى مش شايف فى أيدها دبله صح ؟؟
هنا بص لى وليد نظره عجيبه معرفتش اترجمها زعل على حزن على غيظ ...مش فاهم بص لى كدا ليه ؟
انت بتبص لى كدا ليه ؟ هو انا قولت حاجه غلط ؟؟
ساميه مش لابسه دبله لأن عندها حساسيه فى أيدها من اى خاتم أو دبله يا شريف
طب هى متجوزه يعنى ؟؟
و انت عاوز منها ايه ؟
معرفش يا وليد بس حاسس ان ساميه هى اللى هتخرجنى من كل اللى انا فيه .ست عقلها كبير و محترمه اوى ...تصور لما سألتها عن حكايه الدبله دى زعلت و مرضيتش تقولى ههى متجوزه و الا لأ
ساميه مراتى يا شريف
ايه؟؟؟؟ مراتك ؟؟؟ انا اسف يا وليد و الله ما كنت اعرف ...انا افتكرتها مش متجوزه ...انا اسف جدا
خلاص يا شريف مفيش داعى لكل الاسف ده انا عارفك كويس و عارف انك متقصدش ...بس عاوز اقولك أن اللى انت فيه دا من المشاكل اللى حواليك و اللى مخلياك نفسك تخرج منها بأى طريقه بس للاسف انت بتعالج الغلط بغلط اكبر و كل ما تلاقى واحده تكلمك كلمه كويسه تنجذب لها
انت عندك فراغ عاطفى يا شريف
انا اسف يا وليد
خلاص مفيش حاجه بس لازم تقعد مع نفسك و تعيد حساباتك كويس و تخرج بسرعه من اللى انت فيه ده عشان متغلطش اكتر من كدا
حاضر يا وليد ...
طيب هقوم انا بقا
طب بالله عليك ما تكون زعلان منى ...و الله ما كنت اقصد
و الله ما زعلان و لا حاجه ...سلام يا شريف خلى بالك من نفسك يا حبيبي
قام وليد مشي و انا كنت بقول لنفسي يا ارض ابلعينى ...كنت حاسس ان مدلوق على دماغى جردل ميه ساقعه ...يا ادى الحظ يا ربى يعنى متقعش قرعتى إلا فى جوزها ...و اروح اساله عليها ؟ انا كل اللى بعمله غلط ...كل حاجه فى حياتى سيئه ...حتى الامل أو شعاع النور اللى حسيت أنه هيطلعنى من اللى انا فيه خلاص راح
يا الله ...ساعدنى يا رب ...انا تعبت اوى
روحت البيت و دخلت و انا بجرجر رجليا و حاسس انى تعبااااان اوى ...فتحت الباب و دخلت اترميت على كرسي فى الصاله ...سمعت صوت صباح و هى بتتكلم فى التليفون و مشغوله اوى لدرجه انها مسمعتنيش و انا داخل
لسه كنت هنادى عليها سمعتها بتقول
يعنى فرج خرج من السجن ؟؟
خرج امتى ؟
وحشنى اوى فرج نفسي اشوفه
لا جوزى ايه ؟ دا بالنسبالى حصاله ...ضحكت عليه و خليته يشتريلى المحل و لسه ...هخليه يشتريلى شقه و يأمن لى مستقبلى انا و بناتى ....
طبعا انا ميتخفش عليا ...هما كلمتين على حركتين جبته الأرض هههههههههه و هو الصراحه كان عنده استعداد جامد ....و البومه مراته دى كانت مسهلالى كل حاجه
خلاص ماشي بكرا خلى فرج يجيلى المحل ...سلام
انا سمعت كدا و مكنتش مصدق ودانى ...كنت حاسس ان هيجيلى جلطه ...قمت اتنطرت من على الكرسي و فتحت عليها الباب
اول ما شافتنى اضطربت و قالت اهلا يا شيكولاته 🙄
#ندم
#الجزء_الحادى_عشر
طبعا انا ميتخفش عليا ...هما كلمتين على حركتين جبته الأرض هههههههههه و هو الصراحه كان عنده استعداد جامد ....و البومه مراته دى كانت مسهلالى كل حاجه
خلاص ماشي بكرا خلى فرج يجيلى المحل ...سلام
انا سمعت كدا و مكنتش مصدق ودانى ...كنت حاسس ان هيجيلى جلطه ...قمت اتنطرت من على الكرسي و فتحت عليها الباب
اول ما شافتنى اضطربت و قالت اهلا يا شيكولاته 🙄
كنتى بتكلمى مين ؟؟
لا دا سوسو اختى ...الله من امتى بتسالنى بكلم مين ؟
انا أسأل وقت منا عاوز
فى ايه مالك ؟؟ جاى حامى عليا ليه كدا ؟
مش عارفه ليه ؟؟
و رحت جايبها من شعرها بايدى و تنيت ايدها ورا ضهرها
ايه دا ؟؟؟انت بتعمل كدا ليه ؟؟
مش عارفه بعمل كدا ليه يا بنت الكلب ؟ انا غلطان اصلا انى فتحت بيتى لواحده حيوانيه زيك
فى ايه بس انا عملت ايه ؟؟
ايوه اعمليهم عليا يا بت ...انا سامعك بتتكلمى مع اختك يا شلة حراميه يا نوّر
ليه يا اخويا ؟ سرقنا منك ايه ؟؟
و لكى عين تردى كمان يا بنت الكلب ....
و نزلت فيها ضرب بأديا و رجليا ...بقيت امسك دماغها و اضربها فى الحيطه ....نتفت شعرها اللى فرحانه بيه ده ...بقيت اضرب فيها بكل غل ...
هى بقا قعدت تصوت تصوت لما اخواتى و امى سمعوا الصريخ ...و قعدوا يخبطوا على الباب
و انا دا كله عمال اضرب فيها بدون وعى ...و بقولها هترجعيلى كل قرش صرفته عليكى يا بنت الكلب
الدهب و المحل و الفلوس اللى خدتيها منى
و هى كل اللى طالع عليها صريخ و بس ..
امى قعدت تخبط و تقولى افتح يا ابنى البنت هتموت فى ايدك ....
و لما زهقت منى نزلت جابت مفتاح الشقه و فتحت بسرعه و دخلت هى و اخواتى لقونى ماسك صباح من شعرها ووشها وارم و مفيهوش حته سليمه...رأسها بتنزف ...الدم نازل منها و من كذا مكان فى جسمها
امى لما شافت المنظر اتخضت جدا و جريت عليا سلكتها من ايدى
اخويا مصطفى قالى
انت اتجننت ؟؟ انت بتضربها كدا ليه ؟؟
محدش له دعوى دى مراتى و انا حر فيها
مراتك ايه و زفت ايه؟ و لما تموتها و تروح فى داهيه هتبقى تعمل ايه ؟
لما اروح فى داهيه متبقاش تيجى تسأل عليا
هنا امى اتدخلت و قالت استهدوا بالله يا اولاد ...اقعدوا بس و انتى يا صباح تعالى ادخلى اغسلى وشك و غيري هدومك دى
و صباح مبتنطقش عماله ترد على امى بأنها تهز لها رأسها بالرفض بطريقه هستريه
طب تعالى اقعدى بلاش تغيري هدومك
و صباح تهز دماغها برده
و فجأه لقيناها طلعت تجرى على تحت ...جيت أجرى وراها اخواتى مسكونى خافوا اتهور و اموتها
كل ده و هما مش فاهمين انا ليه بضربها و انا صراحه مكنتش عاوز اقولهم على خيبتى التقيله ...هيقعدوا يقطموا فيا و يقولولى دى آخرة تسرعك و انت غلطت و......و...و.....
لما اخواتى غلبوا فيا و مرضتش اتكلم خدوا بعضهم و نزلوا
امى فضلت قاعده ...يمكن اقولها اى حاجه بس انا مكنتش عاوز اتكلم
مش هتقولى كنت بتتخانق مع مراتك ليه ؟ و ليه ضربتها الضرب ده كله ؟؟
مش عاوز اتكلم يا ماما ...انا تعبان اوى
طيب يا ابنى انا هسيبك دلوقتى تستريح و بكرا نتكلم باذن الله
نزلت امى من عندى و شريط الذكريات مر قدام عنيا انا طول عمرى انسان عملى و بفكر كويس فى اى خطوه بخطيها ...ازاى ابقى فاشل فى جوازى بالشكل ده
فضلت طول الليل مش عارف انام عمال اتقلب على سريري و دمى محروق بأن حتة بت زى دى تضحك عليا بالشكل ده ...انا لازم بكرا اروحلها المحل و اجيبها من شعرها تانى و امضيها على كل حاجه خدتها منى ...كان لازم افهم من الاول انها نصابه
اول ما النهار طلع قمت اخدت دش و لبست هدومى و قلت انزل اروح المعرض شويه و بعدها اطلع على كوافير الهانم لأنها مبتفتحش الا على الضهر
امى لقيتها قاعده و فاتحه الباب و مستنيانى
تعالى يا شريف ....عامل ايه يا ابنى
الحمد لله يا امى ..العيال راحت المدرسه ؟
ايوه لبستهم و فطرتهم و مشيوا من شويه
معلش بقا يا ماما انا متقل عليكى
لا يا ابنى متقولش كدا ....انت شكلك تعبان اوى هو انت منمتش ؟؟
يعنى نمت ساعه كدا
طب مش هتقولى ضربت مراتك ليه الضرب دا كله ؟؟
يا ماما انا مش عاوز أتكلم من فضلك ...دى مشكله و انا هحلها لوحدى
يا ابنى دا كان شكلها رهيب كويس أن بنتها كانت عند حماتك امبارح و اولادك بايتين هنا و الا العيال كانت اتسرعت من المنظر
خلاص يا ماما انا هقوم عشان اروح شغلى
طب انت فطرت؟؟
لا مليش نفس
طب استنى انا عامله فطار ... تعالى نفطر سوا
لا يا ماما و الله ما قادر ...هبقى اجيب اكل فى المعرض و أفطر ...سلام
مع السلامه يا ابنى ...ربنا يجعلك فى كل خطوه سلامه و يوقف لك ولاد الحلال يااارب
رحت المعرض و قعدت ابص على عقارب الساعه مستنى الضهر يأذن عشان اروح اشوف الست هانم
على الساعه ١١ كدا لقيت واحد مخبر داخل عليا
الاستاذ شريف محمد عرفه موجود ؟؟
ايوه موجود عاوزه فى ايه يا شاويش ؟؟
انت شريف ؟؟
ايوا انا
البيه الظابط عاوزك في القسم دلوقتى حالا
عاوزنى ؟؟ عاوزنى ليه ؟
و الله معرفش...هو طالبك بالاسم و هناك هتعرف كل حاجه
حاضر يا شاويش بس اتصل بالمحامى بتاعى الاول يحصلنى على القسم ...اكيد دى فيروز باعته قضيه جديده
و اتصلت على المحامى و قلت له يروح لى على القسم
و رحنا انا و المخبر ...اول ما دخلت على الظابط لقيته بيقولى
ايه يا عم شريف عاملى فيها بلطجى و عمال تضرب النسوان ؟؟؟
نسوان مين يا باشا ؟؟
مراتك المسكينه مقدمه فيك بلاغ و تقرير طبى بعلاج اكتر من ٢١ يوم يعنى جنحه يا عم
مراتى مين ؟؟
ايه هو انت لك اكتر من واحده ؟ مراتك السيده صباح احمد
ااااه صباح ؟؟ هى اشتكتنى؟
ايوا شكياك انت كاسر لها دراعها دا غير كدمات متفرقه فى كل جسمها و تورم فى الوجه
الظابط بقا يكلمنى و انا حاسس انى مش فى وعيى ...الدنيا اسودت من حواليا و بقيت مش عارف افكر
لها عين تيجى تشتكينى بعد اللى عملته معاها ؟؟ دا انا صرفت عليها مصاريف مكنتش تحلم بيها
قطع تفكيري صوت استاذ حسن المحامى و هو بيكلم الظابط و بيقوله خير يا باشا ؟
الحقنى يا متر صباح شاكيانى و بيقولى انها جنحه
متقلقش يا استاذ شريف ... هشوف التقرير فيه ايه
الظابط فتح تحقيق معايا و كان استاذ حسن بيشاورلى انى أنكر انى ضربتها
بعد شويه دخلت صباح مجبسه دراعها و خدوا أقوالها
بعد كتابه المحضر سألت المحامى هما يعملوا فيا ايه دلوقتى
قالى المحضر هيتحول على النيابه بس متقلقش هتخرج
الظابط قاله مش لما نكشف عليه الاول و نشوف يمكن عليه قضيه و الا حاجه ؟
الظابط دخل رقم بطاقتى على جهاز كمبيوتر قدامه كدا و قال ...الله الله انت عندك قضيه اهو و محكوم عليك بسنه سجن
رد المحامى دى قضيه قايمه بس احنا رافعين استئناف
مليش فيه يا متر الاستاذ مشرفنا الليله دى
المحامى حاول يخرجنى بضمان محل اقامتى و تعهد انى احضر امام النيابه فى اليوم التالى
لكن الظابط مرضييش و قاله دا شغلى يا متر و مينفعش أخرجه
و لاول مره فى حياتى ادخل تخشيبه ...كنت حاسس انى فى كابوس و اكيد هصحى منه
المتر قالى متقلقش يا استاذ شريف بكرا فى النيابه هنعرف نتكلم مع وكيل النيابه و نخرجك
إفضل انت قولى متقلقش متقلقش لما هتغرقنى انا عارف
لا عيب عليك تقول كدا
طب اتصل على اخويا مصطفى و فهمه على اللى حصل و قوله ميقولش للحاجه حاجه و يفهمها انى مسافر فى شغل
حاضر من عنيا
مشى المحامى بعد ما دخلت التخشيبه و ببص حواليا لقيت مجموعه من الاخوه المجرمين أشكالهم ضاله ...اللى واخد سكينه فى وشه و اللى قاعد مقرفص على الارض بيشرب سجاير و اللى فارد بطانيه قذره و نايم عليها على الأرض... و اللى قاعد يهرش زى الجربان ........دا غير الحشرات اللى من كل نوع الموجوده فى المكان ...براغيت بقا على صراصير على دبان على ناموس كوكتيل هايل من الحشرات...
التخشيبه قذره جدا ريحتها بشعه حاطين جردل فى جنب انا اسف بيتبولوا فيه ، مفيهاش منفذ و ضلمه الا من شعاع نور داخل من الشباك الصغير اللى فى الباب
اول ما دخلت وقفت فى جنب خايف المس اى حاجه لقيت واحد شكله مجرم اوى قرب منى و قالى
معاك سيجاره يا اخ ؟؟؟
#ندم
#الجزء_الثانى_عشر
التخشيبه قذره جدا ريحتها بشعه حاطين جردل فى جنب انا اسف بيتبولوا فيه ، مفيهاش منفذ و ضلمه الا من شعاع نور داخل من الشباك الصغير اللى فى الباب
اول ما دخلت وقفت فى جنب خايف المس اى حاجه لقيت واحد شكله مجرم اوى قرب منى و قالى
معاك سيجاره يا اخ ؟؟؟
لا ..انا مبدخنش
اومال معاك ايه ؟؟
ممعييش
حته حشيش ..سيجاره بانجو ؟؟
قلت لك ممعييش حاجه
قلب نفسك كدا ...و شوفلى حاجه معاك
و الله ما معايا
فى ثانيه لقيته طلع موس من بقه و مسكه و هو فى وضع هجوم و مسكنى من رقبتى
الظاهر عليك خام اوى ..انت جاى فى ايه يلا ؟؟
جاى فى جنحه ضرب
ههههههههه ضرب ؟؟ ...دا الشغلانه عيلت اوى ...و ضربت مين يا حيلتها ؟؟
ضررربت مراتى
اه ايوه كدا ..شككتنى فى نفسي ما هو اللى زيك ميتشطرش الا على حرمه ..و ضربتها ليه بقا ؟؟
و انت مالك ؟
نعم نعم نعم انت بتقول لمين كدا يلا ؟؟؟ انت اهبل و الا ايه ؟؟ انت كدا لعبت فى عداد عمرك ...انا بقا هعلمك الادب علشان متبقاش ترد تانى على المعلم سيد مشكله
و فجأه عنيكوا ما تشوف الا النور لقيت المعلم سيد نازل فيا ضرب من غير اى داعى لدرجه انه قلعنى هدومى و اخدها و طبعا اخد كل الفلوس اللى فى جيبي و سابنى جثه ملقاه على أرض التخشيبه القذره و لا واحد من الاخوه المجرمين حاول يقوله كدا عيب يا معلم سيد و لا واحد حتى حاول يحوش عنى و هما شايفينه عمال ينفض فيا زى واحده ست عفيه استفردت بسجاده و نزلت فيها ضرب..
طبعا انا اغمى عليا من كتر الضرب و محستش بنفسي إلا و العسكرى داخل ينادى
فين المدعو شريف محمد عرفه ؟؟
فتحت عينى بالعافيه و بصوت ضعيف قلت له انا هنا يا شاويش
قوم يا اخويا... ناموسيتك كحلى .. قوم يلا عشان تترحل على النيابه
قمت بالعافيه و انا حاسس ان جسمى كله مكسر و مفيهوش حته سليمه
ايه دا مين قلعك هدومك كدا ؟؟
طبعا انا مقدرتش انطق و لا أقول إن اللى عمل فيا كدا المعلم سيد مشكله و لمحته بطرف عينى لابس هدوم و متأنتك بيها
العسكرى جرنى من دراعى و قالى و الله لارحلك للنيابه بالملابس الداخليه كدا
لا و النبى يا شاويش ...ادينى تليفونك اخلى اخويا يجيب لى طقم و هديك اللى عاوزه و الله
ايه دا يا متهم ؟؟ انت عاوز ترشينى ؟؟
لا ابدا و الله دا ده تمن المكالمه
اه أن كان كدا معلش ... خد يا اخويا بس متزودش عن دقيقه
حاضر ..حاضر يا شاويش
الو ...ايوا يا مصطفى
ايوا يا شريف ايه اللى حصل يا ابنى ؟
مش وقته يا مصطفى هات لى غيار معاك و تعالى لى حالا
انا فعلا كنت لسه نازل جايلك دلوقتى و كنت هاجى لما المحامى قالى امبارح بس هو قالى مفيش داعى لانى مش هعرف اشوفك
طب خلاص هات لى الغيار و تعالى بسرعه بالله عليك قبل ما يرحلونى على النيابه
حاضر ١٠ دقائق بالظبط و اكون عندك ...سلام
اتفضل يا شاويش متشكر اوى اخويا جاى بعد عشر دقايق و مليش بركه الا انت
طيب يا اخويا أما نشوف ...هو قلبى الطيب ده اللى مودينى فى داهيه
بعد عشر دقائق لقيت مصطفى داخل عليا و انا واقف جنب العسكرى و مش لابس هدوم
مصطفى اتخض و قالى امال فين هدومك يا شريف ؟؟و ايه اللى فى وشك ده انت مضروب ؟
لا دى مناقشه صغيره كدا بينى و بين المعلم سيد مشكله انتهت بعلقه لطيفه من اديه الحلوين .....هدومى بقا الله يرحمها ...خدوها منى تذكار فى التخشيبه ...اومال انا طلبت منك غيار ليه ؟
انا بحسب هدومك اتوسخت و الا حاجه
لا و الله يا درش انا مملكش الرفاهيه دى دلوقتى
انت بتهزر يا شريف ؟؟
امال هعمل ايه بس ؟؟
المحامى قالى أن مراتك شاكياك انك ضربتها
ايوه ..و مقلكش هيخرجنى ازاى ؟؟
بيقول لازم نعمل تصالح مع صباح قدام النيابه عشان وكيل النيابه مديكش اربع ايام على ذمة التحقيق
ايه ؟؟ انت بتقول ايه يا مصطفى ؟ يعنى انا ممكن اتحبس تانى ؟؟
لا بالله عليك يا مصطفى روح لصباح دلوقتى و اعرض عليها اى حاجه بس تتنازل
انا عاوز اعرف انت ضربتها ليه بس ؟
منا خايف تقطمنى
عيب عليك دا لا وقته و لا مكانه انى اقطمك بس لازم افهم عشان لما اتكلم معاها ابقى فاهم كل حاجه
طيب انا هقولك ....
و حكيت لمصطفى على كل اللى سمعته
مصطفى بص لى كدا و قالى انت دايما متسرع يا شريف ...على العموم نخلص من اللى احنا فيه دا الاول و بعدين يبقى لنا كلام تانى مع بعض
طب هتعمل ايه مع صباح ؟؟
ملكش دعوه بقا ...انا ليا تصريف تانى معاها و هجيبها لحد النيابه تتنازل و الجزمه فوق دماغها
ازاى ؟؟
هقولك بعدين ..سبنى بقا عشان الحقها
و مشي مصطفى و راح على العنوان اللى اديتهوله
اول ما صباح فتحت له الباب
نعم ...خير يا ابو فوزى
انا جاى لكى نتكلم كلمتين يا ست صباح
مفيش كلام بينا ...كلامى مع النيابه ...تنازل مش هتنازل و أعلى ما فى خيلكم اركبوه
بالراحه كدا ...مالك محموقه كدا ليه ؟
اصل انت جاى و عايزنى أتنازل عشان خاطر المحروس اخوك ؟
و هو المحروس اخويا ده مش جوزك برده ؟؟
لا منا ناويه اخلعه لما يتص تلات سنين سجن ان شاء الله
ههههههههه هو اللى هيتص ؟؟؟ طب ادخلى البسي هدومك و يلا تعالى معايا عشان تتنازلى
بقولك ايه ابعد عنى لاصوت و ألم عليك الجيران و اقول جاى يتهجم عليا و البسك تهمه انت كمان
لا مش هتعرفى تعملى كدا ...انا مش شريف يا ماما ...شريف اخويا طيب إنما أنا لا
تؤتؤتؤ اخاف و اكش من دا الوش
بطلى رغى و روحى البسي زى ما قلت لك
هنا خرجت امها و اختها من الاوضه ...لو سمحت يا استاذ امشي من هنا لنلبسك تهمه ...مش كفايه اخوك كسر لها دراعها و شلفط لها وشها خالص
و اخويا عمل كدا ليه ؟ اظن انتوا عارفين طبعا
ردت صباح اخوك كداب و محصلش اللى بيقول عليه ده و تنازل انا مش هتنازل
بقى كدا ؟؟ و انا كمان هشتكيكى بالكمبيالات اللى عندى و دى فيها بقا خمستاشر سنه سجن على الأقل لانى هعملك قضيه بكل كمبياله و هما خمس كمبيلات بخمس قواضى ...سلام يا حلوه
استنى ...كمبيالات ايه اللى عندك ؟؟ انا مكتبتش كمبيالات انت كداب
لا كتبتى و صورها اهيه مش دى امضتك برده ؟؟
انا ممضتش على حاجه زى دى انت مزور امضتى
طب خلاص نخلى الطب الشرعى يشوف دى امضتك و الا لا ...هو انتى يا بت فاكرانى اهبل و الا ايه ؟؟ انا لما شريف دخل عليا بيكى و قالى الغى القضيه اللى عليكى و شفت شكلك كدا سبحان الله مرتحتلكيش و كنت حاسس ان الموضوع مش هيقف لغايه هنا و خلاص ...حضرت لك شويه كمبيالات على بياض مضيتك عليهم أثناء ما كنا بنعمل التصالح و انتى طبعا مكنتيش واخده بالك عشان كنتى بتسبلى لشريف اخويا
انت بتقول ايه؟ انت كدا خاين للامانه
اسم الله عليكى يا ربة الصون و العفاف ...اتلمى يا بت لاوديكى فى داهيه و المحل و الدهب اللى اخويا جابهملك يرجعوا
لا الدهب حقى ...دى شبكتى و انا مش هديهوله
خلاص تمام هتفق معاكى اتفاق و هنكون احنا الخسرانين فيه بس يلا زى بعضه ......دلوقتى انتى هتيجى معايا عندالمحامى اديكى الكمبيالات و فى مقابل ده هتتنازلى عن المحضر اللى عاملاه لشريف و عن المحل ...بس و مش عاوزين منك غير كدا
طب و انا ايه يضمنى انك متلعبش بيا تانى و تكون فى كمبيالات تانيه
مفيش ضمان ...بس انا مصلحتى ايه انى احبسك
و انت كان مصلحتك ايه لما مضتنى على الكمبيالات من غير ما اعرف ؟
لا طبعا ليا مصلحه .....الفلوس اللى اخويا اتنازلك عنها دى فلوسنا و فلوس ولادنا ...بس اخويا طول عمره طيب و ملوش فى لوع الحريم ..بس انا قريتك من اول لحظه
خلاص انا هاجى معاك اتنازل بس على شرط
لا انتى متتشرطيش عليا
لا مش شرط ..دا طلب
اتفضلى
اخوك يطلقنى و يدينى مؤخرى اللى كاتبهولى
اخويا كدا كدا هيطلقك بعد اللى عملتيه اما بالنسبه للمؤخر احنا مبناكلش حق حد
و راحت صباح مع مصطفى و اتنازلت عن القضيه و المحل و سلمها مصطفى كمبيالاتها ... و طبعا مطلعتش خسرانه من الموضوع ده لانى جايبلها دهب بخمسين ألف جنيه و مؤخرها زيهم
المحامى خلص إجراءات التصالح و اول ما خرجت اخويا مصطفى حضنى و قالى حمدالله على السلامه يا اخويا
الله يسلمك يا حبيبي...انا مش عارف من غيرك كنت عملت ايه ؟؟
متقولش كدا يا شريف انت اخويا الصغير ...بس انت لازم تفوق لنفسك بقا يا شريف
فعلا عندك حق يا مصطفى
و اول حاجه تعملها انك تطلق اللى اسمها صباح دى
حاضر ...انهارده مش هتكون على ذمتى
بعد كدا بقا هنشوف هنعمل ايه بقا فى باقى مشاكلك دى
#ندم
#الجزء_الثالث_عشر
متقولش كدا يا شريف انت اخويا الصغير ...بس انت لازم تفوق لنفسك بقا يا شريف
فعلا عندك حق يا مصطفى
و اول حاجه تعملها انك تطلق اللى اسمها صباح دى
حاضر ...انهارده مش هتكون على ذمتى
بعد كدا بقا هنشوف هنعمل ايه بقا فى باقى مشاكلك دى
قبل ما اروح البيت كنت مطلق صباح و كاتب لها شيك بمؤخر الصداق
رجعت البيت لقيت امى عرفت كل حاجه و قاعده تعيط
بتعيطى ليه بس يا امى ؟؟
بعيط على حالك يا ابنى
متقلقيش يا امى انا بخير و الله ...هطلع بس اخد دش و اغير هدومى لانى حاسس ان جسمى بياكلنى اوى
طيب يا ابنى استحمى على ما احضر لك لقمه
بعد ما استحميت و غيرت هدومى طلعت لقيت امى حاطالى صنيه اكل على تربيزة السفره قعدت عشان اكل بس كنت هموت من التعب لدرجه انى نمت و انا ماسك اللقمه
امى لما شافتنى كدا قالت لى قوم يا شريف يا ابنى ريح جسمك
ايوه فعلا يا ماما انا ميت من التعب بقالى يومين منمتش
و دخلت انام و حمدت ربنا على نعمة السرير و الفرش اللين بعد ما كنت فى حته من أقذر ما شفت فى حياتى
نمت لدرجه انى مقمتش الا تانى يوم
مكنتش عاوز أخرج من البيت بعد اللى حصل معايا ...و طبعا بما اننا فى بلد ارياف فكل البلد دلوقتى عرفت حكايتى
قعدت يومين بعد خروجى من القسم فى البيت مش عاوز أخرج لحد ما جالى مصطفى و قالى انت لامتى هتدنك قاعد فى البيت يا شريف ؟
مش قادر اورى وشي للناس يا مصطفى
ليه يعنى ؟؟ هو انت كنت ممسوك فى قضيه مخدرات و الا سرقه ؟؟ دى مشاجره بينك و بين مراتك يعنى حاجه بتحصل مع ناس كتير اوى ....يلا يلا قوم احلق دقنك دى و ظبط نفسك و الحقنى على المحل ...فى تجار تقال اوى جايين لنا انهارده
حاضر يا مصطفى اسبقنى انت بس
بعد ما مصطفى مشي قلت لنفسي هتفضل لغايه امتى مستخبى ؟؟ قوم يلا ظبط نفسك و روق حالك كدا
و فعلا قمت و حلقت دقنى و حطيت بارفان و لبست طقم شيك كدا و نزلت
رحت المعرض و قعدت شويه مع مصطفى و بدأ يكلمنى :
فكرت هتعمل ايه فى وضعك يا شريف ؟؟
و الله يا مصطفى مش عارف ..انا بفكر اجيب واحده تنضف و تعمل اكل للولاد على ما اشوف هتصرف مع فيروز ازاى
طب ايه رايك اروح لها انا و احاول احل معاها الموضوع ؟
ما اختك و مرات اخوك راحولها و مفيش فايده
لا شغل الحريم يختلف عن كلام الرجاله و بعدين هى كان اعتراضها انك اتجوزت عليها و دلوقتى انت طلقت يبقى ملوش لزوم انها تفضل غضبانه كدا
خلاص اللى تشوفه يا مصطفى
بعد شويه لقيت تليفونى بيرن و لقيت امى بتقولى
ايوا يا شريف جالك جواب من مدرسه مريم انذار بالرفد و لازم تروح تشوف فى ايه
انذار بالرفد ليه يا ماما ؟ هى مريم مبتروحش المدرسه و الا ايه ؟
لا ازاى يا ابنى ؟ كل يوم بلبسها و تروح مع اخواتها
طيب يا ماما هروح بكرا باذن الله لان زمانهم مشيوا دلوقتى .
قعدت طول النهار فى المعرض و انشغلت مع التجار و الحسابات و حاولت الهى نفسي عشان مفكرش كتير فى اللى انا فيه
بس برده كل ما افتكر صباح و هى بتتكلم عليا بالشكل ده و افتكر فيروز و رفعها عليا قضيه و عيالى اللى متشرده كنت ازعل اوى و مش لاقى نهايه لكل ده
و انا قاعد بعد المغرب و بشتغل فى شويه حسابات لقيت فيروز داخله عليا
كان بقالى حوالى سنه مشفتهاش ....جه فى دماغى لأول لحظه انها عرفت انى طلقت و جايه تقولى يلا نلم عيالنا وسطنا و نرجع لبعض بس للاسف تفكيري مطلعش فى محله خالص
ازيك يا ابو مريم ....الف مبروك يا اخويا
عاوزه ايه يا فيروز ؟
هعوز منك ايه يعنى ؟؟ جايه ابارك لك على الطلاق
الله يبارك فيكى عاوزه حاجه تانيه ؟؟
عاوزه اقولك أن ده ذنبى ...شوفت جرالك ايه ؟؟ عشان تبقى ترمرم كويس
احترمى نفسك يا فيروز ...ايه ارمرم دى ؟
ايوه ترمرم لما تروح تجيب بت متساوش تلاته مليم و تتجوزها عليا يبقى بترمرم ...لما تخليك تكع دم قلبك و تصرف عليها اد كدا يبقى بترمرم ....لما تدخلها على فرشي و حاجتى يبقى ربنا خلصلى منك ...دعوتى عليك ربنا استجابها ....قهرتى اللى قهرتهالى ...دموعى اللى منشفتش من على خدى بسببك
و انتى جايه تشمتى فيا ؟؟
اللهم لا شماته ...انا جايه أشفى غليلى فيك واشوفك مكسور زى ما كسرتنى
تصدقى بالله انتى اكتر انسانه بارده و مستفزه شفتها فى حياتى ..و انا ندمان على كل يوم قضيته معاكى ..انتى عمرك ما حبتينى كل اللى كان همك فلوسي و بس انتى متفرقيش كتير عن صباح ...انتوا الاتنين كنتوا عاوزين الفلوس و بس ...الست اللى تدخل جوزها ابو عيالها المحكمه متستهلش انها تفضل على ذمته ....انا كنت بحاول الاقيلك عذر و اقول من حرقه قلبها لكن دلوقتى ايه الداعى انك تيجى و تقولى الكلام ده ؟
عارفه انا يوم عن يوم بحس انى كنت غلطان اوى انى استمريت معاكى
ندمان انى مصدقتش احساسي و وقفت ....انا فعلا غلطان بس هصلح غلطى ..انتى طالق يا فيروز طالق بالتلاته ..مش عاوز اشوف وشك تانى ابدا
بتطلقنى يا عرة الرجاله ؟؟ و دينى لأوريك ..أن ما خليتك تلف حوالين نفسك مبقاش انا فيروز
طب يلا من هنا لمخليش فى جسمك حته سليمه
مصطفى اخويا جه على الصوت
فى ايه يا جماعه استهدوا بالله
اخوك عرة الرجاله طلقنى .....فاكرنى هموت عليه ..لا اااا دا انا بكره اتجوز سيد سيده و أن ما وريته مبقاش انا فيروز
عيب كدا يا ام مريم ميصحش الكلام اللى بتقوليه دا
العيب اللى اخوك عمله ابو عين زايغه الرمرام ....اللى راح جاب واحده ضحكت عليه و لهفت فلوس ولادى
ما تحترمى نفسك بقا ...عمال اكلمك بالحسنى و انتى برده معندكيش دم ...يلا اتفضلى من هنا
اه ما انتوا زى بعض شله حراميه ...عاوزين تاكلوا حقى ..صحيح مينفعش معاكم الا بنات الشوارع هما اللى بيعرفوا يتعاملوا معاكم ...و دينى منا ساكته و لا مهنيك يا شريف يا ابن زينب
طب اتفضلى من هنا و اللى عاوزه تعمليه اعمليه
و مشيت فيروز و انا ماسك نفسي بالعافيه خفت اضربها يتكرر موقف صباح و تشتكينى و اقابل سيد مشكله تانى
ببص لاخويا مصطفى لقيت وشه احمر و عمال يقول
لا حول و لا قوة الا بالله، لا حول ولا قوه الا بالله
دى اللى انت كنت لسه عاوز تصالحنى عليها ؟؟
انا اول مره اعرف انها قليلة الادب كدا ...دى مكنتش مبينه اى حاجه خالص
يا مصطفى اللى تيجى تتشمت فى جوزها دى قليلة أصل و انا خلاص طلقتها بالتلاته و عمرها ما ترجع على ذمتى
طب ليه اتسرعت كدا يا شريف ؟ عيالك هيعملوا ايه ؟
اتسرعت ؟؟؟ دا انا اتأخرت اوى اوى فى القرار ده ....دا ده أصح قرار اخدته فى حياتى من ساعه ما شفت فيروز دى و بعدين عيالى مش هيكسروا رقبتى يا مصطفى ...عيالى هربيهم احسن تربيه هجيب لهم اللى تطبخ و تنضف و هجيب لهم المدرسين فى البيت و مش هخليهم ناقصهم حاجه
خلاص يا شريف قوم روح انت شكلك تعبان اوى
روحت البيت و حكيت لأمى على اللى حصل قعدت تعيط و تقولى انا مش عارفه كان مستخبيلك فين دا كله يا ابنى
نصيب يا ماما ... كله نصيب
طب و عيالك ؟؟
عيالى ربنا معاهم يا ماما ...و بعدين ما فى امهات بتموت و العيال بتتربى برده
بس دول امهم موجوده يا شريف
و انا مش همنعهم من امهم و بعدين يا ماما هى رمياهم بقالهم سنه اهو حتى البنت الصغيره اللى عمرها سنتين رمياها و مهمتهاش و لا قلبها وجعها عليها
خلاص يا ابنى اللى تشوفه , دى حياتك و انت حر فيها
يا ريتك يا ماما قولتى الكلمه دى من زمان ...من ساعه ما قلت لك انى مش مستريح للجوازه دى
حقك عليا يا ابنى
خلاص يا ماما انا مش زعلان كله نصيب زى ما قلت لك ...
سبت امى و طلعت شقتى و انا حاسس ان جبل انزاح من على قلبى ... لأول مره من سنين انام و انا مبسوط و حاسس بالراحه دى ...لاول مره احس انى اخدت قرار صح هى متستهلش انى احزن عليها لحظه زيها زى صباح بالظبط .
#ندم
#الجزء_الرابع_عشر
سبت امى و طلعت شقتى و انا حاسس ان جبل انزاح من على قلبى ... لأول مره من سنين انام و انا مبسوط و حاسس بالراحه دى ...لاول مره احس انى اخدت قرار صح هى متستهلش انى احزن عليها لحظه زيها زى صباح بالظبط .
تانى يوم رحت المدرسه لمريم بنتى و كنت قررت بينى و بين نفسي انى انتبه بقا لاولادى و احاول اعوضهم غياب امهم عنهم
دخلت على ساميه و كانت مشغوله بتكتب شوية حاجات فى دفتر قدامها ... بصيت لها كدا و قلت فى نفسي ليه مقبلتكيش من الاول ؟
ساميه لاحظت دخولى قامت و سلمت عليا بكل ادب و قالت
انت فين يا استاذ شريف بقالنا شهرين مشفنكش ؟
معلش كنت مشغول شويه
ربنا معاك ...احنا بعتنا لك انهارده عشان مريم ...مريم بقالها اسبوع متواصل مجتش المدرسه و انتوا مقدمتوش اى شهاده طبيه انها عيانه
ازاى اسبوع ؟؟ امى كل يوم بتلبسها هدومها و بتبعتها على هنا
و الله دا اللى مدرسه الغياب قالته ليا
طيب انا هشوف الموضوع ده ...بعد اذنك
اتفضل ...معلش فى السؤال انت اتصالحت انت ووالدتها ؟
لا انا طلقت امها اصلا
ليه كدا ؟؟ لا حول و لا قوة الا بالله ...طب منا قلت لك انك ممكن تلجأ لوالدى عشان تحل مشكلتك
لا انا مشكلتى مكنش لها حل ...و صدقينى افضل حل لها هو الطلاق
انت عندك اولاد تانى غير مريم ؟؟
ايوه عندى اتنين تؤام هنا فى الحضانه و بنت عمرها سنتين
اظن دول مع والدتهم ؟
لا للاسف هى بعتتهم ليا تالت يوم غضبت فيه
لا اله الا الله معقوله الكلام ده ؟؟
اه و الله و بقالها حوالى سنه مشفتهومش و لا تعرف عنهم حاجه
طيب ممكن تحكيلى على المشكله يمكن نلاقى حل سوا ...انا يهمنى الصحه النفسيه لمريم و لاخواتها و لو لقيت الموضوع كبير ممكن اعرضه على والدى ...انا كمان هنزل لاخواتها اللى فى الحضانه و اشوفهم عاملين ايه بس ابقى سيب لى أسماءهم من فضلك
حاضر ....بس مش عاوز ادوشك معايا
لا دا صميم شغلى يا استاذ شريف
و حكيت لساميه على كل حاجه من البدايه للنهايه مخبتش عليها اى حاجه
كانت بتسمعنى و هى متأثره جدا و بعد ما خلصت الحكايه قالت لى
اسمح لى يا استاذ شريف انت غلطت من الاول و صلحت غلطك بعد ما خلفت أربع اولاد ملهمش ذنب ...كل ذنبهم أن لهم اب سمح لامه باختيار شريكه حياته كأنها سلعه زى اى سلعه محتاجها و بالرغم من عدم اقتناعك بيها من الاول الا انك كملت برده معاها و مشيت فى طريق بيدفع تمنه دلوقتى اولادك الصغيرين دول. كمان امهم معندهاش أدنى احساس بالمسؤليه و كل هدفها انها تعند معاك و تحاربك بالاولاد.......
حتى لما حاولت تصلح اخترت اختيار تانى متسرع و اتجوزت واحده غير كفئ ليك و كانت النتيجه انها دخلتك القسم و كانت هتلبسك قضيه
عارف كل اللى بتقوليه ده و مقدرش أنكره ابدا و عشان كدا بندم على كل لحظه عشتها و انا بلف فى الساقيه دى
انا اسفه لو كلامى ضايقك بس انا لازم انبهك لاخطائك عشان تصلحها فكر تانى فى حكايه الطلاق دى عشان متجنيش على اولادك اكتر من كدا ...صدقنى تجربه الطلاق دى اوحش تجربه ممكن الست أو الراجل يمروا بيها
باذن الله حاضر استأذن انا و هشوف حكايه غياب مريم دى
عاوزاك على تواصل معايا يا استاذ شريف من فضلك
حاضر يا استاذه ساميه ...اه ابقى سلميلى على الأستاذ وليد من فضلك
وليد ؟؟؟
ايوه وليد جوزك دا صاحبى الروح بالروح
حاضر ...باذن الله
روحت البيت و استنيت مريم لما جت من المدرسه و اخدتها فى الاوضه و سألتها
تعالى يا مريم
نعم يا بابا ؟؟
انتى كنتى بتروحى المدرسه الاسبوع اللى فات ؟؟
ايوه يا بابا
كدا يا مريم بتكدبى عليا ؟؟ انا كنت فى مدرستك انهارده و قالولى انك بقالك اسبوع مبتروحيش ...انا عاوز اعرف انتى كنتى بتروحى فين ؟
منا خايفه لتضربنى يا بابا
لا متخافيش لو قلتى الحقيقه مش هعملك حاجه
انااا كنت بروح أودى اخواتى و ادخلهم الحضانه اطلع الاقى ماما واقفه مستنيانى عند باب الحضانه
و امك كانت عاوزه منك ايه يا مريم ؟
ماما كانت بتاخدنى عند تيته و تاكلنى و تجيبلى حاجات حلوه و كانت بتسالنى عليك و على طنط صباح
اه و بعدين كملى يا مريم
كانت تقولى عاوزاكى تاخدى بالك يا مريم من كل حاجه بتحصل عندكم فى البيت و كل حاجه جدتك زينب تقولها لابوكى و تيجى تقوليها لى ...و لما انت ضربت طنط صباح و انا سمعت تيته و هى بتتكلم رحت قلتلها و هى فرحت اوى و ادتنى حاجات حلوه كتير اوى وقالت لى انا عاوزاكى بقا يا مريم تفتحى ودانك اوى لاى حاجه تتقال بعد كدا و لما انت غبت يومين انا قلت لها ...و كانت نفسها تعرف انت رحت فين و قالت لى اول ما تعرفى حاجه قوليلى على طول
و لما انت رجعت البيت و سمعتك بتتكلم انت و تيته أن البوليس قبض عليك عشان ضربت طنط صباح و انك خلاص طلقتها ...رحت لماما و قلت لها و هى فرحت اوى و بقت تزغرط و تقول الحمد لله ربنا جاب لى حقى ...يا رب تنتقم منه اكتر و اكتر ...انا ساعتها زعلت اوى من ماما عشان قالت عليك كدا
و مين يا مريم قالها انى رحت الشغل ؟
انا يا بابا سمعت عمو مصطفى و هو بيقول لتيته انك هتلبس و تنزل الشغل انهارده و لما قابلتها قدام باب الحضانه قلت لها ...
و ليه يا مريم مجتيش قولتيلى على كل ده ؟؟
انا كنت خايفه منك يا بابا ....هى قالت لى فى الاول انى لما احكيلها على كل اللى بيحصل دا هيخليها ترجع لنا بسرعه ..و كمان هى وصتنى و قالت لى اوعى تقولى لحد انى باجيلك هنا احسن ابوكى يضربك
بقا كدا يا فيروز ؟؟؟ حاااضر
عاوزه اقولك على حاجه تانيه يا بابا
قولى يا مريم
انا انهارده رحت ملقتهاش مستنيانى زى كل يوم بس لما خرجت لقتها واقفه و سألتنى عن رقم طنط صباح هو معايا و الا لا ؟ قلتلها ايوه معايا على موبيلى لأن طنط صباح كانت ساعات بتتصل بينا و هى فى المحل
ها و بعدين كملى يا مريم
مفيش يا بابا لما عرفت أن الرقم معايا على الموبيل اخدت منى الموبيل بسرعه و نقلت الرقم على تليفونها
متعرفيش كانت عاوزه الرقم ليه يا مريم ؟
لا يا بابا مقلتش ليا ...بس قالت لى ابوكى طلقنى يا مريم ....صحيح يا بابا انت طلقتها ؟؟ ليه كدا يا بابا ؟
خلاص يا مريم روحى دلوقتى و انا هبقى افهمك على كل حاجه بعدين
خرجت مريم و انا هتجنن ازاى تعمل كدا فى بنتها و تخليها تتجسس على ابوها و عيلته ...دى انسانه مش طبيعيه ابدا بتعلم بنتها ايه ؟؟
انا دلوقتى عرفت هى كانت بتعرف اخبارى منين ؟ مكنتش أتخيل ابدا انها تعمل كدا ...انا مش عارف افكر ...و يا ترى كانت عاوزه تليفون صباح ليه ؟؟ اكيد الموضوع ده وراه حاجه ...
#ندم
#الجزء_الخامس_عشر
خرجت مريم و انا هتجنن ازاى تعمل كدا فى بنتها و تخليها تتجسس على ابوها و عيلته ...دى انسانه مش طبيعيه ابدا بتعلم بنتها ايه ؟؟
انا دلوقتى عرفت هى كانت بتعرف اخبارى منين ؟ مكنتش أتخيل ابدا انها تعمل كدا ...انا مش عارف افكر ...و يا ترى كانت عاوزه تليفون صباح ليه ؟؟ اكيد الموضوع ده وراه حاجه ...
تانى يوم رحت لساميه و حكيت لها كل اللى مريم قالته ليا ...ساميه ظهر على وشها الضيق و قالت لى
طبعا تصرفها غلط ... بس يمكن عملت كدا من غيرتها عليك و اهتمامها بيك
انتى بتقولى ايه يا استاذه ؟ اهتمام ايه اللى يخليها توصى طفله صغيره انها تجسس على ابوها و اهل ابوها و بعدين دى بتدعى و تقول ربنا ينتقم منه ...يعنى لا واحده مهتمه و لا نيله دى واحده قلبها مليان غل
معلش يا استاذ شريف ما انت جرحتها برده بجوازك عليها و الست لما تضايق ممكن تهبل بأى كلام بس مبتبقاش قاصده الكلام يعنى
ماشي يا استاذه
بس انت برده غلطان يا شريف
انا غلطان فى ايه ؟ ليه بتقولى كدا ؟؟
انت المفروض كنت اتكلمت مع مريم و فهمتها أن الطلاق مش معناه انك بتكره مامتها و أن مهما يكون انت مش هتحرمها من امها و ماما هتفضل ماما و بابا هيفضل بابا عشان نفسيه البنت
منا جالى صدمه لما قالت لى الكلام ده ...مبقتش عارف اعمل ايه
معلش انت لازم تحتضن ولادك و تحاول تخرجهم من الحاله اللى هما فيها
حاضر يا استاذه ... باذن الله هحاول اعمل كدا انا متشكر اوى
لا ابدا لا شكر على واجب
سلمتيلى على وليد ؟؟ للاسف كل ما باجى مبصادفش و اشوفه
هو مين قالك على حكايه جوازى من وليد دى ؟
هو اللى قالى لما قابلته من شهرين
اااه ...
ايه هو فى حاجه و الا ايه ؟ انا اسف لو ضايقتك ؟
لا ابدا بس انا منفصله عن وليد من حوالى اربع شهور
ايه ؟؟ معقوله ؟امال هو قالى ليه انكم متجوزين ؟
للاسف شريف رافض موضوع طلاقنا ده و عنده امل كبير أننا نرجع لبعض بس خلاص مينفعش
طب ممكن اعرف ليه ؟
معلش افضل احتفظ بالاسباب لنفسي
طب انا اسف جدا ...اسف اوى ...عن اذنك
و خرجت من عند ساميه و انا طاير من السعاده ...ياااا لسه فى امل ...يا سلام لو توافق تتجوزنى يبقى كدا مشاكلى كلها اتحلت
بقيت بفكر فى ساميه ليل نهار و بقيت اتحجج كل يومين بحجه و اروحلها
و ابتديت أفرغ وقت اكتر لاولادى و أخدهم أخرجهم و افسحهم جوه القاهره و براها ....جناين بقا و ملاهى و متنزهات ...العيال بقت مبسوطه اوي و رجعت اشوف ضحكتهم الحلوه مرسومه على وشهم
كمان اتكلمت مع مريم زى ما ساميه قالت لى و البنت تقبلت الموضوع و حسيت. انها لما فهمت ارتاحت
ابتديت اتفق مع مدرسين علشان يجوا للاولاد فى البيت يذاكروا معاهم و يفهموهم اللى مش فاهمينه
طبعا عفش فيروز كومته كله فى شقه فاضيه عندنا فوق و غطيته كويس على ما ابعته لها
و ابتديت اجهز شقتى من اول و جديد ....جبت نقاشين دهنوا الحيطان بالوان زاهيه و فرشتها بفرش جديد و سجاد و نجف جديد ...خلتها متشطبه على المفتاح
فى نفس الوقت بقيت اتحرك فى اتجاه تانى و رحت سالت على ابو ساميه من بعيد لبعيد و عرفت أنه راجل محترم اوى و كلمته مسموعه
كمان جمعت اخبار عن وليد و عرفت أنه لما يأس من ان ساميه ترجعله طلب نقله لمدرسه تانيه فى محافظه تانيه
كنت كل يوم بمنى نفسي و اقول قربت من حلمى خاصه ان ساميه ابتدت تلين معايا فى الكلام لما لقتنى راجل محترم و لما عرفت حكايتى و اشفقت على حالى
و لما طلبت منها رقم تليفونها اديتهولى لأنها عرفت ان اخلاقى كويسه
بعد حوالى اسبوعين و انا قاعد فى المعرض برفع عينى من دفتر الفواتير اللى قدامى الاقى مين ؟؟
تتوقعوا الاقى مين قدامى ؟؟؟
لقيت صباح داخله عليا بكامل أناقتها
ازيك يا شريف
الله يسلمك..... خير يا صباح
خير أن شاء الله ...ايه موحشتكش ؟
لا يا صباح موحشتنيش
بس انت وحشتنى اوى يا شريف
لا و الله طب و حبيب القلب فرج
الله يلعنه مطرح ما راح ما تجبليش سيرته الزفره دى
ليه ؟ ايه اللى حصل ؟؟ عملك ايه ؟؟
عمله اسود البعيد ....سرقنى يا شريف ...سرق كل الفلوس اللى احتكم عليها و سرق دهبى
قصدك سرق فلوسي انا و دهبى يا صباح
ايوا ....انا غلطانه يا شريف و خلاص عرفت غلطى كويس و فهمت انى فضلت واحد صايع على راجل و سيد الرجاله ...انا سامحتك على ضربك ليا عارف ليه ؟؟
ليه أن شاء الله ؟؟؟
عشان لسه بحبك
و انا بقا المفروض أصدق الكلام ده صح ؟؟
اه و الله صدقه يا شريف و معايا دليل على كدا كمان
دليل ؟؟ دليل ايه ده ؟
بس توعدنى انك لما تتأكدمن حبى ترجعنى تانى احنا لسه فى فتره العده و ممكن ترجعنى بكلمه يا شريف
حاضر ....اخلصى
اكبر دليل على حبى ليك انى مرضتش أوافق مراتك الاولانيه على اللى كانت عاوزه تعمله فيك
مراتى فيروز ؟؟ و هى كانت عاوزه تعمل فيا ايه ؟ و ايه يثبت من أصله أن كلامك صحيح ما يمكن بتكدبى عليا عشان ارجعك
حلووو اوى الكلام ده ....انا بقا مسجله لك كل الكلام صوت و صوره و هسمعك كل حاجه بنفسك ....اتفضل
ايه دا ؟
دا فديو صورته لما مراتك كلمتنى فى التليفون و قالت لى انها عاوزانى فى موضوع مهم اوي ...ساعتها الفار لعب فى عبى و قلت دا انتى ياما شتمتينى على النت قبل ما نعملها بلوك ....قلت لنفسي اكيد البت دى جايه تعمل فيا مقلب ما هى مبتحبنيش و بتكرهنى كره العمى
قلت لها اتفضلى يا حبيبتشى ...و حطيت التليفون فى حته قدام الكنبه اللى هنقعد فيها
اول ما دخلت ضغطت على زرار تسجيل الفديو ... اهو اتفضل اسمع بنفسك
ازيك يا صباح
الله يسلمك يا ام مريم
انتى عرفتى أن شريف طلقنى ؟؟
لا معرفتش طلقك امتى و ليه ؟؟
طلقنى لما عرفت أنه طلقك و روحت أقوله هو بنات الناس لعبه ؟؟ حرام عليك عندك ولايا ....بتعمل فيها زى ما عملت فيا ؟؟؟...قعد يزعق و يقولى انا كدا مليش حبيب اى واحده تعحبنى هاخد منها غرضى و هرميها ....و بعدين عرفت أنه ضربك و كسرلك دراعك و اخد منك المحل صح ؟
اتتى عاوزه ايه يا فيروز ؟؟
عاوزه نتحد سوا و تنتقم منه زى ما بهدلنا
و ننتقم منه ازاى بقا ؟؟
هقولك انا بس فتحى ودانك كويس
#ندم
#الجزء_السادس_عشر_والاخيره
و بعدين عرفت أنه ضربك و كسرلك دراعك و اخد منك المحل صح ؟
اتتى عاوزه ايه يا فيروز ؟؟
عاوزه نتحد سوا و تنتقم منه زى ما بهدلنا
و ننتقم منه ازاى بقا ؟؟
هقولك انا بس فتحى ودانك كويس
اهو فاتحاها
انا سمعت أن طليقك الاولانى كان ممسوك فى قضيه مخدرات
و انتى مالك و مال طليقى الاولانى ؟؟
اصبرى بس متبقيش حمقيه كدا ...احنا عاوزين منه خدمه
خدمة ايه دى ؟؟
عاوزينوه يستقضالنا فرش حشيش
فرش حشيش مره واحده ؟؟؟ انتى عارفه الفرش دا عامل كام دلوقتى ؟؟
مهما يكون انا هدفع ...معايا دهبى يجيب مبلغ كبير اوى
طب و عاوزه فرش الحشيش فى ايه ؟
عاوزاه يروح لشريف كأنه زبون عادى و يحطوهوله فى اى مكان من غير ما شريف ياخد باله ...بعدها نبلغ عنه البوليس و يلبس قضيه اتجار لأن المحل باسمه
ممكن اسالك سؤال
اتفضلى
ايه اللى هتستفديه من اللى عاوزه تعمليه دا ؟؟
طبعا هستفيد ....هستفيد انى اكسره زى ما كسر قلبى ...هستفيد انى احرق قلبه على شبابه زى ما حرق قلبى ...هستفيد انى اخد عيالى فى حضنى مره تانيه
طب و هو كان منعك منهم ؟ اللى اعرفه انه كان عاوز يسيبهوملك و يديكى خمس الاف مصاريفهم فى الشهر
و هى الخمس آلاف هتكفى اربع عيال ؟؟ دا بيستهبل
بصى يا فيروز انا مليش دعوه بالحوار ده ... الراجل خلاص مبقاش جوزى و معدش ليا دعوه بيه
بقى كدا ؟؟ يعنى انتى عاوزه تفهمينى انك مش متغاظه منه و عاوزه تنتقمى منه
لا و انتقم منه ليه ؟؟
الله امال رحتى اشتكتيه ليه لما ضربك
انتى ملكيش دعوه اشتكيته مشتكتوش ملكيش فيه و يلا اتفضلى من غير مطرود انا عاوزه انام
الفديو خلص و انا مش مصدق نفسي ...معقوله ام ولادى تبقى عاوزه تلبسنى قضيه ؟؟؟ معقوله وصل بيها الحقد و الغل انها تفكر بالطريقه دى ؟؟ طب بلاش عشان مفطرتش فى اولادها لما ابوهم يتمسك فى قضيه مخدرات هيكون شكلهم ازاى قدام الناس ...دى اكيد مش طبيعيه دى الفل و الكره عموها...انا عمال افكر و قطع تفكيرى صوت صباح و هى بتقول :
قلت ايه يا شيكولاته
فى ايه يا صباح ؟؟
فى أننا نرجع لبعض و الله انا ندمت ...انا لسه بحبك
متتكلميش فى الموضوع ده تانى يا صباح من فضلك
و إذا قلت لك انى حامل ؟؟
حامل ؟؟؟ حامل ازاى ؟؟
كنت حامل و انا معرفش ...طب عشان خاطر ابننا أو بنتنا اللى جايه دى ...انا مش زى فيروز يا شريف انا عاوزه ولادنا يتربوا فى وسطنا
بصى يا صباح انسي خالص انى ارجعك ..المؤمن لا يلدغ من جحر مرتين ...حتى لو فى طفل ما بينا دا مش هيبقى سبب فى انى ارجعك لعصمتى بعد ما سمعت اللى سمعته منك و انتى بتكلمى اختك
و الله يا شريف انت فهمت غلط
متحلفيش بس بالله عليكى ..مش عاوزين نقلب فى القديم ...خلاص الموضوع انتهى
خرجت صباح من عندى و هى متضايقه طبعا انها معرفتش تضحك عليا المره دى زى كل مره و لا خال عليا دلعها فيا ....اخوكم اتعلم برده
اللى عرفته بعد كدا أن صباح لما خرجت من عندى اتغاظت اوى و راحت متصله بفيروز و أدت لها رقم فرج و قالت لها انا مليش دعوه بالموضوع ده ...منك ليه مباشره
و فعلا فيروز مكدبتش خبر و اتصلت على فرج و طلبت منه فرش الحشيش ...بس لما طلبت منه يروح يحط الحشيش فى المعرض هو رفض و قالها مليش فيه انا كل اللى عليا انى اجيبه لكى و انتى بقا تتعاملى
فيروز قررت انها تلبس نقاب عشان محدش يعرفها و تيجى تعمل نفسها بتتفرج على البوتجازات و الغسالات و تنتهز اى فرصه و تسيب الحشيش فيها و بعد كدا تبلغ عنى
فرج طلب منها ٢٠٠ الف جنيه فيروز قالت له طيب ادينى يومين اجمع لك الفلوس
و فعلا بعد يومين كانت باعت الدهب اللى انا جايبهولها و حضرت المبلغ و راحت تقابل فرج عشان تسلمه الفلوس و تستلم منه المخدرات ...لكن ربك بالمرصاد اتارى الشرطه مراقبه فرج من اول ما راح جاب المخدرات و استنى لما قابل فيروز و قبض عليهم متلبسين الاتنين
فيروز طبعا انهارت و اعترفت فى التحقيقات أن صباح شريكتها و هى اللى عرفتها على فرج عشان تجر رجلها هى كمان فى القضيه
فرج و فيروز خدوا ١٥ سنه سجن أما صباح لا طلعت حامل و لا حاجه كانت لعبه منها عشان ارجعلها و القاضى حكم عليها بسنه سجن مع ايقاف التنفيذ
اما انا بقا فرحت لأبو ساميه و دخلت البيت من بابه و طلبت أيدها رسمى
ابوها رحب بيا جدا و قالى ادينى فرصه اسبوع اسال عليك و اخد رأيها
بعد اسبوع لقيته بيتصل و بيقولى أنه سأل عليا كويس و عرف انا مين و ابن مين و انى نسب يشرف و أن مبدئيا كدا ساميه موافقه بس فى موضوع عاوزه تكلمنى فيه قبل اى حاجه
و فعلا كنت عندهم بالليل و قعدت معاها هى ووالدها و لقيتها بتقولى
بما انك طلبت ايدى رسمى يبقى لازم تعرف سبب طلاقى من وليد
ميهمنيش اعرف انا عاوزك انتى ... احنا ولاد النهارده
لا يا شريف ...دى حاجه لازم تعرفها عشان متقولش انى غشيتك
غشتينى ؟؟ ازاى مش فاهم
انا عندى مشاكل فى الانجاب و انا اللى طلبت الطلاق من وليد بالرغم من حبه الشديد ليا بس انا مش انانيه انا يهمنى سعادته برده و لما أهله لمحولى أنه المفروض يتجوز مره تانيه عشان يخلف هنا قررت انى انسحب نهائى من حياته احتراما لرغبة أهله و تقديرا لانى مش عاوزه احرمه من نعمه الخلف ...هو حاول كتير و لآخر لحظه كان فاكر انى هرجعله بس لما لقى الموضوع طول اوى قدم على نقل من المدرسه و راح محافظه تانيه
انا قلت اقولك عشان تبقى عارف كل حاجه ...لانى عمرى ما اتكلمت مع حد فى الكلام ده و لا حد يعرف احنا اتطلقنا ليه اصلا
و انا موافق يا ستى و مش عاوز خلفه تانى انا عاوزك انتى و بعدين احنا ربنا مدينا اربع عيال هنعوز ايه اكتر من كدا
و فعلا اتجوزت ساميه و عشت معاها اجمل ايام حياتى ...الحب فعلا بيفرق ...التفاهم شيى مهم اوى فى الجواز ..ساميه بعقلها الكبير و حنيتها على اولادى كانت عوض ربنا ليا على كل اللى حصلى فى حياتى
انا بشكر ربنا كل يوم الف مره على تواجد ساميه فى حياتى... و سبحان الله كنت فاكر أن المحن اللى دخلت فيها ملهاش حل لكن أن مع العسر يسر فعلا ...ربنا جعل لى مخرج من كل مشكله اتحطيت فيها
انا دلوقتى ندمان على كل لحظه عشتها بعيد عن ساميه ...كل دقيقه ضيعتها و انا مش موجود جنب حياتى و روحى و عقلى حبيبه قلبى ساميه
دى حكايتى اللى حبيت احكيهالكم و لكم طبعا حق الحكم عليا و هل انا مظلوم و الا ظالم ....
ااااه نسيت اقولكم مش ساميه مراتى حامل 😅
تمت
🌹🌹🌹🌹🌹🌹🌹🌹🌹🌹🌹🌹🌹🌹
انا عاوزه بس اعلق على حاجه القصه حقيقيه لغايه ما شريف اتجوز صباح و بقى مبسوط معاها فقط ...و الوضع إلى الآن معلق ...فيروز فى بيت أهلها سايبه له الأربع عيال و عياله متبهدله بس شريف الحقيقى مبسوط بصباح و دلعها فيه
بس ناس كتير مبتحبش النهايات المفتوحه اللى زى دى و عشان كدا دخلت انا بقا باقى الأحداث اللى شوفتوها عشان اقفل القصه .
🌹🌹🌹🌹🌹🌹🌹🌹🌹🌹🌹🌹🌹
ارجو أن القصه تكون نالت اعجابكم ....لو عجبتكم ارجو ان تدعوا لوالدى رحمه الله و سائر موتى المسلمين .💞
#قصص_وحكايات_د_جيهان_عادل.💞💞
فضلا غير مسموح نقل أو نسخ القصه إلا بعد اذن الكاتب ...
تعليقات
إرسال تعليق