عنبر خمسه الجزء السابع

#عنبر_خمسه

#الجزء_السابع

رحت لقيت شعبان واقف مبلم 

افتح يا شعبان 

ننننعم 

افتح بقولك من غير و لا كلمه 

فتح شعبان و ايده بتترعش و رزق واقف مذبهل من المنظر 

اول ما دخلنا الاوضه و شفنا ساره متكومه على السرير و الجروح ماليه جسمها و الدم على الحيطان كلها لقيت رزق شهق  و قال يا لهوى و طلع يجرى على بره 

أجرى ألحقه يا شعبان

حاضر يا رياسه 

وقفت و لاول مره قدام ساره و انا و هى لوحدنا فى الاوضه ...ازاى البنت دى وصلت للشكل ده ؟؟ ازاى الخراب اللى انا شايفه طايل كل شئ حتى الحيطان اللى حواليها

انا واقف و غرقان فى تفكيري و سمعت صوت شعبان و هو جاى و بيقول لرزق

تعالى بالذوق لنقول مجنون و هربان مننا و لو شاطر اثبت بقا عكس كدا 

يا عم الله يرضى عليك سبنى انت قافش حرامى ؟؟

الدكتور طالبك و لازم تروحله 

تعالى يا رزق ..خايف ليه ؟؟

هو انت مش شايف يا دكتور الاوضه عامله ازاى ؟ و الا الست اللى نايمه دى عامله ازاى ؟

متخفش منا و شعبان واقفين معاك اهو و لو فى اى خطر عمرى ما كنت عرضتك ليه 

بس انا خايف يا دكتور 

متخفش انا كنت قايلك هديك كام ؟؟

٥٠٠ جنيه 

ليه خمسيه جنيه ليه يا دكتور ؟؟

اسكت يا شعبان 

بس كدا كتير اوى 

تاخدهم و تدهن انت الاوضه ؟؟

لأ انا معرفش ادهن ...انا بشتمرجى اد الدنيا و تقولى ادهن ؟

طب اسكت خالص مسمعش حسك ....ها يا رزق ؟

نعم يا دكتور 

انا هديلك ٦٠٠ جنيه بس تخلص لى الاوضه دى فى نص ساعه 

حاضر يا دكتور بس يعنى الست دى مش ممكن تصحى دلوقتى ؟؟

لا متخافش الست دى نايمه مش هتصحى غير بكرا الصبح 

تمام ...بس هتقف معايا متسبنيش 

حاضر انا واقف اهو 

بدأ رزق يدهن الاوضه بسرعه جدا و كل شويه يبص على ساره و قلقان جدا و ساره زى الجثه مبتتحركش 

قعدت اتأملها لقيت اثار دموع عامله مجرى على وشها وسط اثار الدم و الخربشه اللى فيه 

جه فى دماغى انى اخلى شعبان يجيب لى طبق ميه و قطن و امسح لها وشها بس خفت تصحى و رزق يطلع يجرى و يسيب الاوضه 

رزق خلص الاوضه بسرعه خرافيه يمكن أقل من نص ساعه 

و لقيته نط طلع على الباب و اخد أدواته معاه 

شعبان بقا واقف يتحسر على ال٦٠٠ جنيه اللى فى ربع ساعه 

مالك يا شعبان ؟؟

مفيش يا دكتور بس ٦٠٠ كتير اوى هو كان عمل ايه يعنى ؟

منا قلت لك تدهنها انت عملتلى فيها البشتمرجى

منا مكنتش اعرف انها سهله كدا طب انا مستعد ادهن اوضة مكتبك بالبلاستيك اللى فاضل ده  و اخد ٢٠٠ جنيه بس

ههههههههه ماشي يا شعبان نشوف الموضوع ده بعدين ....يلا اقفل الاوضه على ساره هروح أودى رزق و هرجع لها تانى

تانى ؟؟؟ هترجع ليه تانى ؟

و انت مالك يا شعبان 

خلاص انا اسف الاوضه نورت صحيح بس ايه الفايده ؟؟ اول ما المذكوره تقوم هتبهدلها تانى 

ملكش دعوه يا شعبان و بطل كلام كتير ..طلع بس جردل البلاستيك ده بره و اقفل كويس 

طبعا هقفل كويس هى دى محتاجه وصايه ؟

اخدت رزق و حاسبته ورجعته مكان ما خدته 

بعد كدا رحت جبت البوسترات الاربعه من الاستوديو و كنت قاصد أن يكون البوستر بحجم الإنسان و هو واقف و كنت مختار صوره لساره لوحدها و تلات صور مع والدها

انا عاوز ساره اول ما تفتح عينيها تشوف الصور دى 

كمان انا ليا هدف تانى بالصور دى ...بما انى هركب كاميرات من غير ما حد ياخد باله فكان لازم اغطى على الموضوع ده و كله يكون فاهم أن فنى الكاميرات اللى جاى ده هو الفنى اللى جاى يعلق الصور 

بعد كدا رحت جبت الفنى و معاه الكاميرات 

و رحنا على المستشفى 

طبعا شعبان فتح لى و ما صدق أقوله روح انت 

الفنى وقف يركب الكاميرات و انا ركبت البوسترات داير مايدور فى الأربع جهات بتوع الاوضه و فى مستوى مرتفع شويه عشان ساره متقطعهومش 

الفنى ركب الكاميرات الصغيره فى حتت جنب البوسترات بحيث تكون مخفيه و جربهالى وشفت الرؤيه بيها كويس اوى على موبايلى 

الفنى خرج و فضلت انا وساره فى الاوضه 

الاوضه فعلا شكلها اتغير تماما و بقت أكثر بهجه و صور ساره زينتها اوى 

دلوقتى ممكن امسح وشك يا ساره 

مسكت القطن و الميه اللى كان محضره ليا شعبان و قربت منها 

ابتديت أقرب ايدى من وشها و انا مستعد انها ممكن فى اى وقت تصحى و الله اعلم ممكن تعمل فيا ايه ؟

ابتديت امسح الدم من وشها و تبان ملامحها شكلها هادى اوى و هى نايمه 

قبل ما اخرج حطيت لها القرنفل اللى بتحبه فى زوهريه بلاستيك جبتها مخصوص عشان متعرفش تكسرها 

طبعا انا عرفت معلومه القرنفل دى من الصور برده 

خرجت بهدوء من اوضتها و قفلت الباب 

رحت مكتبى و ناديت شعبان 

يا شعبان 

نعم يا ريس 

ساره ميدخلهاش اى حاجه الا بأوامرى انا 

حاضر 

و تبطل المهدئات اللى بتحطها ليها دى تماما 

نعم ...ازاى ؟؟

انت مالك انت ...انا هديك علاجها بنفسي 

طيب حضرت المدير عاوزك 

هروحله دلوقتى 

و رحت للدكتور عبداللطيف و لقيته متنرفز جدا 

انت مش قلت يا دكتور انك هتقولى على كل حاجه هتعملها فى حاله ساره 

ايوه يا دكتور و انا فعلا هقدم لحضرتك التقرير عن الحاله و خطة العلاج 

امال ايه اللى انت عملته فى اوضتها من غير اذنى ده ؟؟

انا معملتش حاجه انا بس بحاول أحسن الظروف حواليها علشان تستقبل العلاج بطريقه كويسه 

شكلك هتتعبنى يا دكتور احمد 

لا ابدا يا فندم انا مش قصدى و لو اعرف ان دى حاجه هتضايق حضرتك كنت قلت لك الاول 

بعد كدا ما تخطيش خطوه إلا و اكون عارف بيها انا مش خيال مأته فى المستشفى دى 

انا اسف يا دكتور اوعدك مش هتتكرر تانى 

طب اتفضل انت على مكتبك دلوقتى 

خرجت من عند دكتور عبداللطيف و انا مستغرب ...معقول يكون بيهتم بكل حالات المستشفى بالشكل ده و الا ساره دى حاله خاصه عنده بحكم معرفته بيها قبل كدا 

 المهم رجعت مكتبى و كان عليا نبطشيه فى الليله دى منمتش و كنت مستنى اللحظه اللى تفوق فيها ساره و تشوف التغيير اللى حواليها 

 ‏طبعا قبل ما شعبان يسلم الورديه طلبت منه يجيب باتيه و شيكولاته و يحطهم فى اوضة ساره جنب الورد 

 ‏شعبان كان بيبص لى كأنى كائن فضائى نازل من المريخ 

 ‏الساعه اربعه الفجر بالظبط فتحت ساره عينيها 

 ‏ انتبهت جدا و قمت قعدت على سريري علشان اشوف ساره هتعمل ايه  اول ما تشوف الصور و الورد ؟؟؟

#دجيهان_عادل

يتبع

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ...