الهام ( كامله )
بدأت قصتى لما كنت فى يوم رايحه لخالتى فى بلد جنب بلدنا
ركبت الاتوبيس و ركب جنبى شاب اسمراني . كل ما المح بعنيا الاقيه باصص على
بقيت مستغربه اوى من بصاته دى و من جرأته اللى وصلت لحد الوقاحه
نزلت من الاتوبيس و مشيت شويه و بلتفت ورايا لقيت نفس الشخص ماشي ورايا و مثبت عينه على زى ما يكون بيراقبنى
اتوترت جدا خصوصا إن احنا بقينا نسمع عن حالات خطف للكبار كمان
سرعت خطوتى و بقيت شبه بجرى فى الشارع زى الهبله و كنت خايفه ابص ورايا الاقيه لسه ماشى
لغايه ما وصلت لبيت خالتى طلعت السلالم جرى و خبطت بهستريا
خالتى فتحت لى و اتخضت من منظرى
فى اى يا الهام ؟؟ مالك يا بنتى ؟
فى واحد ماشي ورايا يا خالتى و عمال يبص لى بصات غريبه اوى
فين الواحد دا تعالى وريهولى من الشباك
بصينا من الشباك ملقتش حد واقف خالص
خالتى قالتلى يمكن بيتهيالك يا بنتى
قلت يمكن يا خالتى
خالتى خدتنى فى حضنها و سلمت على و سالتنى عن احوالى و أحوال امى و ابويا و اخواتى و قعدنا نتكلم و انا برده بفكر فى الشخص الغريب دا بصاته لى مش طبيعيه خالص
المهم اتغديت عند خالتى و كانت ماسكه فى ابات معاها بس انا مرضتش و قلت لها لازم اروح عشان خاطر انتى عارفه امى متستغناش عنى انا أيدها و رجلها
خالتى ضحكت و قالت طب اومال لما العريس يجى بقا هتبقى تعمل ايه الست امك دى ؟😂
ضحكت و ودعتها و مشيت
كنت خايفه ابص ورايا و بقيت امشي بسرعه لغايه ما وصلت الموقف و ركبت و روحت
روحت البيت و امى سالتنى عن خالتى و أحوالها و نمت الليله دى و حلمت بالشخص دا فى الحلم بيجرى ورايا و بيخنقنى بقيت اصرخ لغايه ما امى جت على صوتى
صحتنى من النوم و قعدت تقرالى قران و تقولى مالك مالك يا بنتى فيكى ايه 🤔
بقيت مش عارفه ارد بس حاسه ان فى حاجه تقيله على صدرى
قلت لها دا كابوس يا ماما متقلقيش
شويه و هديت و قلت لها روحى نامى يا ماما انتى معلش قلقتك
قالت لا يا بنتى و لا قلقتينى و لا حاجه ربنا يهدى سرك يارب
تانى يوم امى قالت أما أنا حلمت لك حلم جميل اوى يا الهام
قلت لها خير يا ماما
قالت حلمت أن امى الله يرحمها جايه لى فى الحلم و ادتنى طرحه سودا و قالت لى الطرحه دى لالهام
سودا سودا يا ماما و بتقولى حلم حلو
ايوا يا بنتى دا معناه أن هيجيلك عريس متريش
ههههههههه عريس متريش يا سلام و دا تفسير مين أن شاء الله ؟؟😂😂😂😂
دا تفسيرى يا بت و بكرا تشوفى
قومى يلا اعملى الفطار لابوكى قبل ما ينزل شغله
و بعد الفطار عايزاكى تقلبيلى الشقه يمكن العريس يجى انهارده
عريس عريس مين يا ماما ؟؟
العريس المتريش يا منيله على عينك انا احلامى متنزلش الارض ابدا
و الله يا ست ماما 🙄 حاضر لما اشوف اخرتها بس لو مجاش العريس بقا هتعملى ايه 🤭🤔
و لا هعمل حاجه طبعا هتكونى روقتى لى الشقه و خلاص
امممممم قولى كدا بقا حاضر يا بطوط هو انا أقدر ارفض لك طلب يا بطوطتى يا حلوه
عملت الفطار ابويا فطر و نزل شغله و انا بقا مسكت الشقه تنضيف و مسح و كنس و خلتها فله
هلكت طول النهار و دخلت ارتاح و عملت لنفسي كوبايه نسكافيه كدا و مسكت موبايلى و لسه بقعد سمعت جرس الباب بيرن
قمت افتح لقيته هو 🤨😟😵 هو نفس الشخص اللى شفته امبارح
شهقت و قولت يا خبر اسود انت ايه اللى جابك هنا ؟
انا اسف جدا والدك موجود لو سمحتى ؟
لا بابا مش هنا انت مين و عايز ايه؟
فى اللحظه دى امى خرجت على الصوت و قالت مين يا الهام لقيت أخينا دا ابتسم اوى و قال هو انتى اسمك الهام
بصيت له كدا باندهاش
امى قالت خير يا ابنى عايز مين ؟
قال انا عايز الحج
لا الحج لسه مجاش بيجى على الساعه ٨
طيب يا حاجه قوليله انى هجيله على الساعه ٩ كدا
أقوله مين يا ابنى ؟
هو ميعرفنيش بس انا أسمى سامى . سلام عليكم
عليكم السلام يا ابنى
انا طبعا كنت واقفه شبه الصنم امى تكلم فى و انا مبردش
فى ايه يا. الهام مالك متسمره مكانك كدا ؟
اصل الجدع دا كان ماشي ورايا امبارح و انا رايحه لخالتى و كنت فاكراه عايز يخطفنى و مرضتش اقولك عشان متقلقيش
ماشي وراكى و جاى لغايه هنا و عايز يقابل ابوكى اااااه فهمت بالصلاة ع النبى كدا حلمى اتحقق اهو
شفتى يا بت مش بقولك احلامى متنزلش الارض ابدا
بس يا ماما انا حاسه أنه إنسان غريب مش طبيعى ابدا
جينا بقا لدلع البنات الفارغ الجدع اهو زى الفل طول بعرض و لا كان غريب و لا حاجه
ادخلى يا اختى جهزى العشا لابوكى عشان نستنى العريس 😂
بعد شويه ابويا جه و امى استقبلته من على الباب الحق يا عماد فى عريس جاى لبنتك كمان ساعه
عريس مين دا و جاى منين ؟
معرفش هوف جدع جه سأل عليك من شويه
و هو قالك أنه هو عريس و الا عرفتى ازاى ؟
هو باين عليه و انا كمان شفت امى بتدينى طرحه لالهام يبقى اكيد دا عريس
يا سلام على احلامك العجيبه
طب يلا اتعشا بسرعه عشان زمانه جاى
بعد ساعه لقينا جرس الباب بيرن
ابويا فتح الباب لقاه
سلام عليكم يا حاج
عليكم السلام يا ابنى
كنت عايز حضرتك فى موضوع كدا
اتفضل يا ابنى
دخل سامى و حكى لبابا انه معاه بكالوريوس تجاره و أنه فاتح مشروع بيدخله دخل كويس اوى وأنه شافنى و عايز يتجوزنى
ابويا سأله و فين اهلك يا ابنى
قاله انا مليش اهل ابويا و امى ماتوا من فتره و مكنش لى غير قرايب من بعيد
انا عايز الانسه الهام بالهدوء اللى عليها انا مش عايز منكم اى حاجه انا لى بيت كبير على البحر مفروش من كله و مستعد اتجوز خلال اسبوع
ياااا انت مستعجل ليه كدا يا ابنى مش لما آشور البنت و امها و كمان لو فى موافقه لازم نسأل عليك جيرانك اى حد يعرفك و كمان نيجى نتفرج على البيت
كل دا مفيهوش مشكله يا عمى مع أن المكان اللى انا ساكن فيه محدش يعرفنى فيه لانى فى حالى جدا و مع ذلك انا مع حضرتك اى حاجه عايز تسال عنها هقولك
طيب يا ابنى هشور البنت و ارد عليك
تمام يا عمى ممكن رقم تليفونك علشان اعرف الرد و اتصل امتى ؟
اتفضل الرقم اهو وأن شاء الله كمان اسبوع كدا كلمنى
ياااا اسبوع كتير اوى مينفعش قبل كدا
طيب يا ابنى اتصل كمان تلات ايام بس اكتب لى عنوانك هنا عشان اسال عنك زى ما قلت لك
حاضر يا عمى اهو عنوانى و عنوان شركتى كمان
بس عاوز اسالك الأول انت عرفت الهام بنتى منين ؟
انا شفتها امبارح فى الاتوبيس عربيتى كانت عطلت و كنت نازل اركب تاكسي لمحت الانسه الهام و ركبت جنبها صراحه شدنى جمالها مشيت وراها لغايه ما عرفت البيت و جيت اطلبها من حضرتك
طيب يا ابنى خلاص على اتفاقنا
استاذنك يا عمى
اتفضل يا ابنى مع السلامه
ابويا دخل و حكى على كل اللى سامى قاله و لقيت امى فرحت و عينيها لمعت و قالت حلو اوى العريس المقطوع من شجره دا يعنى لا هيكون لكى حما و لا عمه تنغص عليكى عيشتك و خير جوزك كله هيكون ليكى
قلت بس مش غريب أنه يمشي ورايا لغايه هنا
و ايه الغريب فى كدا يا ناصحه ؟
الغريب يا ماما أن دا معناه أنه وقف استنانى لغايه ما قعدت عند خالتى و خرجت روحت و ركبت مره تانيه و رجعت هنا كل دا ليه مش غريبه دى
و النبى يا بنتى بلاش فلسفه فارغه ابقى اساليه انتى يا اختى على الكلام دا بعدين
لا يا ماما انا مش مستريحه للموضوع ده
يا بنتى الله يهديكى هو انتى اتكلمتى معاه و الا تعرفيه ازاى تحكمى عليه بقولك ايه اعملى استخاره و هنسال عليه و اللى فيه الخير يقدمه ربنا
ابويا سال على سامى فى محيط شغله و بيته و الغريب أن فى ناس كتير معرفتوش
انا صليت استخاره رغم انى مكنتش مرتحاله خالص بس إلحاح امى عليى خلانى افكر و احاول اديله فرصه
بعد تلات ايام لقيناه بيتصل ببابا و يقوله خير يا عمى موافقين و الا ايه
بابا قاله مبدئيا كدا ايوه بس لازم نقعد معاك و نتفق على شويه تفاصيل كدا
قال حاضر حالا اكون عندك و قفل السكه
بابا استغرب اوى و لقينا بعد دقيقه جرس الباب بيرن زى ما يكون كان مستنى تحت البيت
كلنا بصينا لبعض و استغربنا جدا هو ممكن يكون هو ؟؟؟؟
و فعلا ابويا فتح و لاقاه هو
سلام عليكم يا عمى
اهلا يا ابنى هو انت كنت مستنى تحت و الا ايه
بصراحه يا عمى ايوا كنت منتظر تحت على احر من الجمر انا بقالى كتير عايش لوحدى و علشان كدا تلاقينى مستعجل شويه انا اسف
لا يا ابنى مفيش حاجه بس استغربنا شويه
امى دخلت عليهم اهلا بيك يا ابنى
اهلا بيكى يا ماما
يا حبيبي طالعه من بوقك زى العسل و الله انت لازم تتعشي معانا بقا عشان يبقى عيش و ملح دا الهام هى اللى محضره الاكل اصل الغدا بتاعنا هو العشا عشان عمك بيجى متأخر
لا شكرا يا طنط انا واكل من شويه
لا و الله ابدا ثوانى و الاكل يكون جاهز
امى دخلت المطبخ و خدتنى معاها و قالت لى يلا حضرى السفره و زودى طبق عشان خطيبك
قلت لها خطيبي 🙄😏
قالت ايوا يلا همى شويه و أجرى البسي حاجه الاول حلوه كدا
منا لابسه اهو جلابيه حلوه
جلابيه ايه بس يا بت أمشي البسي حاجه خروج كدا يلا
يووو يا ماما خروج ايه 🤔 انا هفضل كدا و أن كان عاجبه
امشي يا بنت اعملى اللى بقولك عليه متفضحناش قدام الناس
رحت لبست دريس و طرحه طلعت جهزت مع امى الاكل و كل دا و بابا عمال يتكلم معاه
حطينا الاكل و اكلنا و تقريبا هو مكلش الا بسيط اوى زى ما يكون مكسوف
بعد العشاء بابا قاله اقعد مع الهام اتكلموا شويه بقا عشان تعرفوا بعض
اول ما بابا سابنا نتكلم لقيته بيبص لى نفس النظره الثابته اللى كان بيبص لى بيها فى الاتوبيس
الموضوع استفزنى اوى و سألته انت بتبص لى كدا ليه
قال انا اسف مش قصدى حاجه بس ملامحك مريحه اوى تخلى اى حد يشوفك يرتاح لك على طول و يحس انك من دمه
صراحه إجابته عجبتنى و خلتنى أهدى عليه بعد كدا
سالته انت جيت ورايا لغاية هنا ازاى؟ انا هتجنن بقالى ٣ ايام بفكر فى الموضوع ده
يا ستى و لا تتجننى و لا حاجه انا كنت لى مصلحه فى شارع السد عارفاه؟
قلت ايوا دا الشارع اللى فيه خالتى
قال رحت هناك اقضى مصلحتى و صراحه كنت فاكرك ساكنه فى البيت اللى دخلتى فيه دا و قلت فى نفسي هروح اخطبك من والدك
و بعد ما خلصت مصلحتى و خارج يشاء ربنا انى الاقيكى خارجه من البيت لقيت نفسي مشيت وراكى من غير اراده لغايه ما ركبتى الاتوبيس تانى و ركبت انا من الباب الخلفى عشان متتخضيش لانى لاحظت انك كنتى خايفه و عماله تمدى خطوتك فى الشارع فمحبتش الفت انتباهك و اخوفك لغايه ما وصلتى لغاية هنا
و سالت المحل اللى تحت البيت هى الانسه دى. ساكنه هنا قالى ايوا و شارو لى على البلكونه بس يا ستى
صراحه إجابته اقنعتنى و كمان طول ما هو بيتكلم حسيت انى ظلمته بحكمى المبدأى عليه و حسيت انى ارتحت شويه من ناحيته بس برده حته تسرعه دى كانت قلقانى اوى
امى دخلت بطبق فاكهه و قعدت تتكلم معاه و تقوله انت بيتك بقا كام اوضه قالها بيتى كبير يعتبر فيلا لما تيجى بكرا هتشوفيه على الطبيعه
قلت له بكرا ازاى؟
قال و نأجل ليه بس مدام فيه قبول الحمد لله يبقى ليه التسويف . امى طبعا عجبها كلامه و قالت صح يا سامى يا ابنى عندك حق و الله
قال خلاص هفوت عليكم بكرا ان شاء الله بعد الضهر أخدكم بالعربيه افرجكم على بيتى و شركتى و نتغدى سوا
بابا قاله ماشي و احنا موافقين انا بكرا مش رايح الشغل عشان المشوار ده و هستناك
تانى يوم لقيت سامى جه بعربيته و اخدنا امى لما شافت العربيه فرحت اوى و عنيها لمعت
و لما رحنا عنده البيت فيلا كبيره مش بيت عادى زى ما كنت متوقعه و مفروش فرش غالى امى بقت تبص لى و تقرصنى و تقولى شايفه احلامى يا بنت الهبله اصلك مكنتيش مصدقانى انتى و ابوكى
صراحه انا انبهرت بالمكان اوى
و بعدها رحنا شركته برده حاجه محترمه اوى
و بعد كدا اخدنا اتغدينا فى مطعم سمك تحفه
كل دا و انا مش مصدقه نفسي ازاى كنت هضيع على روحى عريس حلو كدا بافكارى الهبله دى . الراجل زى الفل اهو و اى واحده تتمناه
بعد الغدا قعدنا و لقيته مطلع علبه قطيفه من جيبه و راح قايل شبكتك يا عروسه
اتخضيت شبكتى ايه 🤔
بفتح العلبه لقيت خاتم الماظ شكله خيال
صراحه تنحت
امى بقا شدت العلبه من ايدى و بقت هاين عليها ترقع زغروطه بس لولا الاحراج يعنى
ابويا قاله انت مبتضيعش وقت خالص كدا يا سامى
قاله يا عمى و ليه اضيع وقت حياتى كلها اد ايه عشان اضيعها و بعدين شغلى فى التجاره علمنى انى لازم اكون مستعد فى كل وقت و مضيعش فرصه من ايدى
و بالمناسبه دى عايزين نحدد ميعاد الفرح بقا
بابا قاله طب مش لما تاخدوا على بعض شويه يعنى قول كدا ست شهور على الأقل
ست شهور ليه يا عمى ما كل حاجه جاهزه هنستنى ليه بس
امى ردت صحيح يا عماد ست شهور ليه هما لسه هيجهزوا نفسهم هو شهر واحد كفايه عقبال ما نحضر شويه الحاجات بتاعه الهام و نشوف الناقص لها و خلاص
رد سامى و قال و انا مستعد من بكرا انزل معاها اجيب لها أى هدوم اى حاجه تشاور عليها أو اى حاجه نقصاها.
صراحه الكلام كله كان كويس بس بسرعه اوى كنت فرحانه و فى نفس الوقت مقلقه شويه
معقوله انا هتجوز فى شهر واحد 🤔 معقوله بالسرعه دى ؟
طب فين قصص الحب الرومانسيه اللى كنت عايزه اعيشها زى ما كنت بسمع من البنات اصحابى فين الخناقات اللى بتحصل بين المخطوبين فين الحاجات دى 🤭
فات الشهر و انا كل يوم عن يوم اقتنع بسامى و امى كانت طايره بيه و عملى فرح مكنتش احلم بيه خالص و لا فى الاحلام.
عيلتى وصلونى البيت و باركولى و مشيوا
انا بقا اول ما دخلت قعدت كنت مكسوفه اوى و حاطه وشي فى الارض استنيت شويه ملقتوش جه رفعت رأسي و بصيت جنبى ملقتش حد
استغربت اوى
قعدت حوالى ربع ساعه و ملقتوش اتغظت اوى قمت من على الكنبه ادور عليه و لقيت بابا اوضه مفتوح دخلت لقيته حاطط وشه بين اديه و قاعد يعيط 🥺😓
ايه دا فى ايه ؟؟؟؟ مالك ؟
مفيش يا الهام افتكرت اهلى و كنت اتمنى يكونوا معايا فى اليوم ده
معلش يا سامى متزعلش انا اهو بقيت كل عيلتك انا امك و اختك و كل حاجه ليك
ربنا يخليكى لى يا حبيبتى بس ممكن تسبينى لوحدى دلوقتى روحى غيرى هدومك و انا جاى وراكى
حاضر يا سامى بس هدى نفسك
رحت الاوضه و انا مستغربه من البنى ادم دا
المهم غيرت هدومى و قعدت استناه لغايه ما روحت فى النوم من كتر التعب و صحيت على جرس الباب
قمت ببص حوالى ملقتوش و لقيته فتح و كانت امى و ابويا و عيلتى جايين يباركوا
امى طلعت على فوق على طول و اول ما شافتنى قالت لى الف مبروك يا حبيبتى
الله يبارك فيكى يا ماما
ها طمنينى عليكى
الحمد لله انا بخير يا ماما
يعنى كله تمام و الا فى حاجه مضيقاكى ؟
لا كله تمام الحمد لله مفيش حاجه مضيقانى
طب يلا غيرى هدومك و انزلى سلمى على اعمامك و اخوالك تحت
حاضر يا ماما
غيرت هدومى و نزلت سلمت على عيلتى و قدمت لها حاجه ساقعه و قعدوا شويه و مشيوا
الغريب بقا انى لقيت جوزى مغير هدومه يعنى مرحتش عليه نومه زى منا تخيلت
بعد الناس ما مشيت بصيت له كدا و سالته انت غيرت هدومك امتى
قال انا نمت فى المكتب من كتر العياط و صحيت بدرى لقيت نفسي لسه بالبدله روحت دخلت لقيتك نايمه زى الملاك مرضتش اقلقك اخدت هدومى و خرجت بالراحه و لبست هنا
اااه طيب تحب احضر لك الاكل
لا انا اكلت
ازاى تاكل لوحدك ؟ هو احنا مش بقينا متجوزين و انت لازم تعرف أن الأمور اتغيرت
انا اسف و الله بس كنت جعان اوى و مرضتش اقلقك زى ما قلت لك و على العموم يا ستى دى غلطه مش هتتكرر
ماشي يا سامى لما نشوف
طيب انا هروح اوضه المكتب اخلص حاجه مهمه و ارجع لك عشر دقايق بس
شغل يوم الصباحيه يا سامى ؟
معلش يا حبيبتى دا ايميل مهم عشان شحنه مستوردينها و انتى عارفه الاجانب الوقت عندهم بفلوس
اللى تشوفه يا سامى
و الله ما تزعلى منى انا انهارده هعملك مفاجاه هايله و هاخدك اعشيكى برا فى مطعم رائع و نسهر للصبح سوا
هزيت راسي و قلت طيب
انا بقا شغلت التلفزيون و قعدت اتفرج عليه لغايه ما رحت فى النوم
استمر الحال على كدا حوالى اسبوع لما بقيت اضايق جدا طب مدام على طول فى مكتبه ليه يتجوز ؟ طب و ليه السرعه فى الجواز بقا ؟ دا اللى كان يشوفه كان يقول انه مش قادر يستنى لحظه
انا متضايقه اوى منه و لازم اتكلم معاه
نزلت له لقيته قافل على نفسه خبطت فتح بعد فتره
قلت له عايزه اتكلم معاك شويه
قال تعالى يا حبيبتى
قلت له أنت اتجوزتنى ليه ؟
هو دا سؤال علشان بحبك طبعا
بتحبنى ازاى ؟؟
بحبك زى ما اى راجل بيحب ست
لا مش صحيح
ليه بتقولى كدا ؟؟
انت بتحبنى حب امتلاك يعنى زى اى فازه أو كرسي عجبك اشتريته و احتفظت بيه فى بيتك
ايه الكلام الاهبل دا ؟؟ لا طبعا الكلام ده مش صحيح بالمره انتى فاهمه غلط خالص
طب فهمنى الصح انت
هقولك يا ستى انا عارف إن إحنا اتجوزنا بسرعه و كنت عايزك تاخدى على البيت و تاخدى على الاول و متحسيش بأى غربه من ناحيتى. وبعدين انا بحبك و متشكيش لحظه فى كدا ابدا
ماشي يا سامى هصدقك بالرغم أن كلامك مش مقنع اوى
مش مقنع ليه ؟؟ طب تعالى اقولك انتى مالك حلوة كدا انهارده ؟
يا سلام منا حلوة كل يوم يا اخويا
لا بس حلاوتك زايده انهارده
ضحكت و قضينا ليله سعيده انا و سامى و قلت خلاص بدأت حياتى معاه و كل شئ هيتعدل
بس للاسف تانى يوم لقيته فى المكتب و بيقعد قافل على نفسه بالساعات و بقيت محتاره من موقفه دا
فات اسبوع كمان على نفس الوضع و كل ما اتكلم معاه يطلع لى ميه حجه و حجه
و فى يوم لاقيته لابس و نازل قلت له أنت رايح فين ؟
انا هروح الشغل انتى ناسيه انى ورايا شغل و الا ايه
خلاص شهر العسل خلص
بصيت له كدا و قلت له شهر العسل 😒 هو فين العسل دا
ضحك و قال حياتنا كلها هتبقى عسل يا حبيبتى بس سبينى دلوقتى انزل شغلى و انا اما ارجع هنكمل العسل يا عسل
ماشي يا سامى مع السلامه
امى بقا كانت بتكلمنى كل يوم تطمن على و كانت لما تسالنى كنت اقولها كله تمام
لكن بعد ما سامى نزل لقيتها بتتصل و صراحه كنت متضايقه اوى و هى حست بصوتى و سالتنى و انا حكيت لها على كل حاجه من اول ليله الدخله
امى استغربت اوى و قالت لى و ليه مقولتيش لى لما سالتك
قلت مكنتش عايزه اكبر الموضوع يا ماما و قلت اهو ليله و عدت و خلاص بس اظاهر بقا أن دا أسلوب حياته
قالت لى بت يا الهام يكونش جوزك دا عارف ستات عليكى و بيقفل على نفسه بالساعات يتكلم معاهم على النت
ستات ايه ماما طب و بيتجوزنى ليه بقا مدام بيكلم ؟
لا مظنش هو بس مهتم بشغله زياده عن اللزوم و مش شايف غيره
طيب يا الهام معلش يا بنتى اصبرى شويه لما نشوف اخرتها
قفلت مع امى بس كلامها شغلنى برده و قلت لما اقوم ادور فى المكتب بتاعه على اى حاجه اعرف منها معلومه
جيت افتح باب المكتب لقيته مقفول استغربت اوى طب هو قافله ليه و خايف من ايه دا خلى الشك يزيد فى قلبى
قررت انى لازم ادخل المكتب و اعرف ايه جواه
رحت جبت سكينه من المطبخ و حاولت افتح الباب بس معرفتش برده
افتكرت أن المكتب له شباك على الجنينه خرجت بسرعه و لفيت ورا البيت ووصلت لاوضه المكتب من بره و جبت كرسي و دخلت السكينه ما بين الشيش و بعضه و زقيتها لفوق لغايه ما الشيش فتح معايا
قمت نطه جوه الاوضه و دخلت فتحت الكمبيوتر بتاعه لقيت ملفات شغل و بس و ملقتش اى حاجه غريبه على الكمبيوتر الا فولدر واحد كان مقفول بكلمة سر
قلت خلاص ادور فى المكتب نفسه
لقيت أوراق كتير اوى و كنت خلاص هيأس و اخرج من الاوضه لقيت ملف لونه اسود فتحته لقيت صور لستات كتير حوالى سبع ستات و منهم صوره لى و مترقمين من واحد لسبعه و انا رقم سبعه 😳
استغربت اوى و بفتش فى باقى الورق لقيت أن سامى دا لقيط و ملوش اهل و متربى فى ميتم 🥺
ايه دا يعنى ضحك علينا 😔 يا خبر انا سامعه صوت العربيه جه انا لازم أخرج بسرعه قبل ما يشوفنى
قفلت الملف بسرعه و رجعته مكانه و قفلت الكمبيوتر و طلعت بسرعه و قفلت الشيش زى ما هو و جريت على البوابه لقيته نازل من العربيه
ايه دا فى ايه يا الهام مالك بتجرى كدا ؟
لا مفيش يا سامى كنت بتمشي و قلت أجرى شويه أنشط نفسي
اااه بحسب فى حاجه خوفتك
لا ابدا هخاف من ايه
دخلنا البيت و انا مرعوبه مش خايفه بس يا ترى مين البنات دول و ليه صورتى فيهم و ايه حكايه الملجأ و ليه ضحك علينا ؟
مالك يا الهام حاسس ان فيكى حاجه غريبه ؟
لا انا ابدا مفيش حاجه .... بس انت متاخرتش فى الشغل يعنى
منا مقدرتش ابعد عنك يا حبيبتى يا دوب خلصت كدا كام حاجه بسرعه و رجعت لك
طيب تحب احضر لك الغدا دلوقتى ؟
لا انا هدخل المكتب اخلص شويه حاجات و بعدين نتغدى
اه صحيح انت قافل اوضه المكتب ليه ؟ انا كنت عاوزه انضفها و لقيتها مقفوله
لا ابدا بس دى عادتى من زمان انى اقفلها لان بيكون فيها ورق مهم و بعدين متتعبيش نفسك يا ستى انا اللى هنضفها دايما علشان مفيش ورقه تتنطر هنا و الا هنا.
زى ما تحب يا سامى
دخل سامى الاوضه و بعد دقيقه لقيته بينادى على بصوت عالى الهااااأاااام
اول ما سمعته بينادى بالطريقه دى قلبى وقع و حسيت انه عرف انى دخلت المكتب
بقيت بترعش و دخلت قلت نعم ..نعم يا سامى
قالى ممكن تعمليلى فنجان قهوه
بلعت ريقى و قلت حاضر
رحت اعمل القهوه و انا عماله افكر هعمل ايه فى اللى عرفته عنه دا
الملجأ اللى هو متربى فيه دا انا عارفاه و كنت بمر عليه كتير و انا رايحه الجامعه . انا لازم اروح اسال هناك يمكن اعرف اى معلومه تفيدنى و ليه هو كدب علينا و مقالش أنه ملوش اهل .
رحت وديت له القهوه و طلعت اوضتى و الخوف ملينى مش عارفه ايه صور الستات اللى لقيتها دى ؟ و بيعمل بيهم ايه ؟
تانى يوم قلت له انا عاوزة اروح عند ماما وحشتنى قالى طيب لما اجى من الشغل نروح لهم اخر النهار نقعد معاهم شويه
قلت له لا لا انا عاوزه اروح اقعد معاها طول النهار و عشان انت عارف برده انى بساعدها فاهروح أنصف لها الشقه و ابقى اجى اخر النهار أو تبقى تفوت على بعد الشغل
طيب زى ما تحبى يا الهام . طب البسي اوصلك
لا روح انت انا لسه ورايا شويه شغل صغيرين هنا فى البيت و بعديها هلبس و انزل يلا اتكل انت على الله علشان متتاخرش
طيب يا ستى زى ما تحبى . سلام
سلام
اول ما سامى مشي جريت لبست هدومى و نزلت ركبت تاكسي و رحت الملجأ
دخلت الملجأ و سالت عن مكتب المدير
دخلت لقيت المديره ست كبيره فى السن رحبت بى تقريبا كانت فاكرانى جايه اتبرع للملجا
تحت امرك اقدر اخدمك بايه ؟؟
كنت عاوزه اسال عن حد كان متربى هنا فى الملجا ؟
حد مين يا فندم ؟
واحد اسمه سامى مجدى
و دا بتسالى عليه ليه ؟ و كان عندنا من امتى ؟
و الله انا معرفش هو كان عندكم امتى بس هو عنده ٣٠ سنه و بسال عليه لأنه متقدم لى و عايزه اعرف عنه كل حاجه .
_قصدك سامى مجدى يوسف ؟
=ايوه حضرتك
_متقدملك؟؟؟؟ بس سامى دا ......
=ماله حضرتك ؟
_ سامى دا عمرى ما أنساه هو مشيي من هنا من اكتر من ١١ سنه بس هو ليه حادثه معينه بتخلينى منسهوش ابدا
= حادثه ايه من فضلك ؟
_سامى دا استلمناه و هو لسه عمر يوم و كانت امه الله يسامحها لفاه فى حته قماش و رمياه بدمه فى الزباله
استلمناه بمحضر و اتسمى الاسم دا
استنى هجيب لك الملف بتاعه
الست راحت تجيب الملف و انا قعدت افكر يا ترى حادثه ايه اللى سامى عملها
الست جابت الملف ووريتنى صورته و هو صغير عمر ايام و كمان شهاداته فى المرحله الابتدائيه و الاعداديه و الثانويه و قالت سامى كان ولد هادى و فى حاله و كان شاطر فى المدرسه بس كان حساس شويه
و فى يوم عينا استاذه جديده لسه متخرجه من الجامعه معانا هنا فى الملجأ و للاسف دى كانت غلطه مكررنهاش تانى
= ليه كانت غلطه حضرتك ؟
_ علشان معظم الولاد اللى كانوا فى سن المراهقه ساعتها حبوها و اتعلقوا بيها و منهم سامى .
لكن سامى كان زياده شويه و كان ابتدى يهمل دروسه و هو فى تانيه ثانوى و ابتدت المدرسه دى تحاول تشجعه علشان يرجع لمستواه تانى لكنه فهم التشجيع دا على أنه حب و ابتدى يتعامل معاها على هذا الأساس
المدرسه كانت واخده بالها بس محبتش تحرجه و خافت مستواه يتدهور و بقت تشجعه على المذاكره لغايه يوم ما اخد الثانويه العامه اليوم المشؤوم
جه سامى فرحان كان جايب مجموع كبير و راح للمدرسه دى و صارحها بحبه
طبعا المدرسه ضحكت و قالت له أنت لسه صغير على الكلام ده و انا بعتبرك اخويا الصغير
سامى مصدقش كلامها و قالها ازاى بتقولى كدا انا كبير و عارف بقول ايه كويس
المدرسه قعدت تحاول تفهمه و اخر ما زهقت قالت له بقولك ايه يا ولد انت حته عيل كان صعبان على يضيع مستقبله وقفت جنبه يعنى ولا حب و لا زفت هو انا هعيل
سامى هاج جدا من الكلام ده و زق المدرسه زقه جامده وقعت للاسف على حجر دماغها اتفتحت نقلناها المستشفى لكن نزفت كتير اوى و للاسف ماتت 😔
أما سامى فاتحول الى الإصلاحية و اتحجز هناك لغايه ٢١ سنه . و دا اللى أعرفه عن سامى
= انا سمعت الكلام ده و مكنتش مصدقه ودانى. شكرت الست و خرجت و انا مش قادره اتلم على اعصابى 🥺
هعمل ايه ؟
انا لازم اعرف بقية الحقيقه . انا هروح البيت و احاول اعرف اى حاجه من الورق
ركبت تاكسي و رحت على البيت و دخلت اوضه المكتب زى ما دخلتها امبارح و لسه بطلع الأوراق لقيت سامى بيفتح على الاوضه
استخبيت ورا الستاره اللى ورا المكتب و كنت خايفه اوى يحس بى
دخل بسرعه و فتح الكمبيوتر و دخل على الملف المقفول بكلمة سر و اللى مكنتش عرفت افتحه امبارح و لقيته طلع تليفونه ووصله بالكمبيوتر و لقيته فتح صور لى كتير مصورهالى و انا نايمه أو وانا مش واخده بالى و قعد يقلب فى الصور و اكتشفت أنه مصورنى صور كتير فى الشارع و من فتره يعنى مش زى ما قالى أنه مشي ورايا مره و جه يخطبنى دا شكله بيراقبنى من زمان
بعد كدا سامى بدأ يفتح ملفات تانيه داخل الملف الاول و كان مرقم الملفات دى من ١ الى ٧
و بدأ يفتح ملف ملف بالترتيب و اكتشفت انها صور كتير للستات اللى شفت صورهم قبل كدا . و كلهم تقريبا زيى يعنى صور لهم فى الشارع و صور لهم فى البيت هنا و صور و هما نايمين .و صور و هما ميتين 😲😳😳
دول مش ميتين بس دول متقطعين كمان ؟؟؟
بدأت أحس أن رجليا مش شايلنى و كنت خايفه اوى يغمى على .
سامى قفل الكمبيوتر و خد مفاتيحه و خرج ركب العربيه و مشي
انا بقا جالى انهيار و بقيت اعيط و اصرخ و على لسانى كلمه واحده اعمل ايه اعمل ايه .....
انا لازم ابلغ البوليس بس انا معنديش أى دليل على اللى شفته دى مجرد صور يمكن تكون فوتوشوب
خرجت من الاوضه و قعدت فى الصاله افكر هو ممكن يكون مخبى الجثث دى فين ؟ و فين كان بيقطعهم كدا ؟
اكيد الجثث دى هنا فى مكان قريب مش بعيده عن هنا
قعدت افكر و افتكرت أن سامى كان قايلى فى مره أنه عنده بدروم فيه العدة بتاعه العربيه و فيه كراكيب كتير
قمت اتنطرت من على الكنبه و نزلت جرى على السلم علشان ادخل البدروم ده يمكن الاقى حاجه
طبعا لقيته مقفول بقفل جبت شاكوش و قعدت اخبط بيه القفل لغايه ما فتحته
دخلت البدروم لقيت فى حنفيه و بانيو و عده جزار و شنيور تقطيع زى اللى كنت بشوفهم فى افلام الرعب و لقيت هدوم كتير لستات مرصوصه فى كراتين و متعلقات شخصيه جزم ساعات شنط ........
لقيت ديب فريزر كبير اوى قربت منه و كنت مستغربه وجوده فى المكان ده فتحته لقيت 🥺😲😲😳😳😳
اكياس فيها قطع من الستات دى كف ايد راس رجل و كل قطعه ملفوفه فى استرتش بلاستيك و محطوطه فى كيس
انا شفت المنظر اغمى على .... معرفش قعدت اد ايه مغمى على بس قمت مسروعه و طلعت أجرى عايزه أخرج من البيت دا بأى طريقه خرجت من البيت قعدت أجرى أجرى عشان ابعد و كانى بنفد بعمرى
ركبت تاكسي روحت بيت ابويا . اول ما ابويا و امى شافونى اتخضوا جدا و انا كمان مقدرتش امسك نفسي و اغمى على
ماما فوقتنى و قعدت هى و بابا يسالونى فى ايه ؟؟
بقيت مش عارفه انطق من الصدمه و لما هديت شويه حكيت لهم و انا بصرخ على اللى شفته
ابويا قال لازم نبلغ البوليس حالا عن اللى شفتيه
و فعلا بلغنا البوليس و راحوا الفيلا و طلعوا الجثث و قبضوا على سامى
و لما وكيل النيابه سأله اعترف بكل سهوله و قاله ايوه قتلتهم هما يستاهلوا اكتر من كدا مفيش ست تستاهل انها تعيش بدأ من امى اللى رمتنى فى الزباله و انا عمر يوم مصعبتش عليها و لا قلبها حن لى . و الا مدرستى اللى حبتها اكتر من نفسي و كنت مستعد انى اموت نفسي عشانها لكنها سخرت منى و استعيلتنى و قالت إنها كانت بتشفق على مش اكتر
بعدها قررت انتقم من كل واحده تشبه مدرستى دى بقيت امشي فى الشوارع ادور عليهم زى المجنون و لما الاقى واحده بتفكرنى بيها ادخل عليها بفلوسي و كلهم مبيقلووش للفلوس لأ 😒
و لما سأله وكيل النيابه عن مصدر فلوسه دا
قاله أنه فى الاصلاحيه اتعلم حاجات كتير اوى و قابل عيال مجرمه علموه تجارة المخدرات و منها كون ثروة كبيره
و لما سأله وكيل النيابه ازاى كنت بتبرر لاهالى الستات دى اختفائهم ؟
قال كنت بخترع لكل واحده قصه و اقنع اهلها بيها منهم اللى طفشت و خدت هدومها و معرفش طريقها و اروح مع اهلها اعمل محضر غياب عادى جدا
و منهم اللى كانت مسافره معايا بره و ماتت فى حادثه و دفنتها هناك و كنت اراضى اهلها بقرشين مع شويه تأثر منى و كانوا بيصدقونى
و منهم اللى قلت لأهلها إن إحنا طالعين نعمل عمره هديه جوازنا و ماتت و دفنتها فى البقيع
و كنت باخد بالى انى اجيب كل واحده من بلد مختلفه علشان مفيش حد يقدر يوصل لو سأل
و عمرى ما كلمت حد من جيرانى و لا يعرفوا حاجه عنى خالص
و لما سأله ازاى كنت بتموتهم قال كنت بخنق الواحده باديا و اشوفها و هى روحها بتطلع بين اديا و عينيها خارجه لبره و عروق وشها بتبقى هتتفرتك و هى عماله تصرخ و انا مبرحمهاش زى ما غيرها مرحمنيش .وبعد ما كانت روحهم بتطلع فى ايدى كنت اشيلها و انزل بيها البدروم و ابتدى اقطع فيها و اكيسها و احطها فى الفريزر و لما الفريزر يتملى كنت اخد بعض الاكياس و اروح ارميها للكلاب فى الصحراء و اقف اتفرج عليهم و هما بياكلوها و انا مستمتع جدا 😠
وكيل النيابه سأله طب و الهام ؟؟ كنت هتموتها امتى ؟
قاله زى الباقيين بس كنت عايز اعذبها الاول و اخليها تحبنى و تبقى فى حيره دايما هل بحبها و الا لا و ليه بيعمل معايا كدا ؟ . و كنت بفرح اوى انى اشوفها فى الحاله دى و كان دا بيرضى غرورى جدا و بيحسسنى انى باخد حقى من كل ستات الدنيا . انا مش ندمان على اى حاجه عملتها و لو خرجت هعمل كدا تانى و هنتقم من كل ست اشوفها علشان هما ميستهلوش غير كدا 😔
انتهت التحقيقات مع سامى و حولوه لمستشفى الامراض العقليه علشان يحددوا حالته و هل هو مسؤل عن اللى كان بيعمله دا و الا هو مريض نفسي 😔
أما أنا فقعدت اتعالج فتره كبيره من اللى شفته و من الكوابيس اللى كنت بشوفها للستات المتقطعه لكن كنت بحمد ربنا الف مره فى اليوم أنه نجانى من الموت على ايد واحد مجنون زى دا 😔😔😔
تمت 😊
ارجو أن القصه تنال اعجابكم و تكون أدخلت شئ من السعاده على نفوسكم و اذا كانت عجبتكم ارجو الدعاء لوالدى رحمه الله عليه
#دجيهان_عادل 😊
 بدأت قصتى لما كنت فى يوم رايحه لخالتى فى بلد جنب بلدنا ركبت الاتوبيس و ركب جنبى شاب اسمراني . كل ما ا…){kind=link}
ايه ده انا اتصدمت هى دى قصة حقيقية يادكتورة بس كنت عايشة فيها لدرجة انى خوفت على وصفك 👏👌
ردحذف