هويدا
الجزء الثامن و العشرون
قالت هويدا تلك الكلمات و انصرفت بكل ثبات و بحركات بطيئه تاركه صلاح مكانه يتصبب العرق من كامل جسده لا يستطيع الحركه
بعد دقائق حاول صلاح أن يتمالك نفسه قام مسرعا الى غرفه زهيره دق الباب بهدوء
يا اما ...يا اما الحقينى يا اما .....
فى ايه يا واد ؟ مالك بتترعش كدا ؟
بلاش بلاش يا اما
بلاش ايه يا واد ؟؟ أهدى و اقعد روشتنى
بلاش تجيبي الزار ...بلاش
و ليه بقا ؟؟ انت عايزها تخلص علينا نفر نفر ؟؟
ما هى برده لو جبتيه هتخلص علينا نفر نفر يا اما
بطل خيابه يا واد انت دا انا دافعه اد كدا للى اسمها سعاده دى
يا اما اسمعى كلامى ...دا دخلت عليا فى الضلمه سرعتنى و اللى عليها قالى لو جبتوا حد يخرجنى هخرج روحكم قبل منى
بيخوفك يا عبيط تلاقيه خايف ...و بعدين مقفلتش على نفسك بالترباس ليه زى ما قلت لك ؟
انا قلت مش هيحصل حاجه يعنى
لا هو دلوقتى بقى اخطر من الاول و مدام عرف أننا جايبين ناس تطلعه يبقى ممكن يعمل اى حاجه
يا لهوى ياانا ...هتموتنى يا اما
متخافش يا ولا انا هخليها داخله الحمام و اسحب العيال و اول ما تدخل اقفل عليها لحد ما الشيخه سعاده و اللى معاها يجولها
لا انا مش بايت فى الدار دى تانى
رايح على فين يا واد انت ؟؟
هروح ابات فى المزرعه الكام يوم دول على ما تخلصوا اللى بتعملوه دا
بقا كدا يا صلاح
ايوا كدا ....هو العمر بعزقه ؟؟
طب بات الليله و اقفل على نفسك كويس و ابقى بات فى المزرعه من بكرا
لا لا عليا الطلاق منا بايت فيها الليله و سبينى بقا يااما قبل ما الاقيها طالعالى
روح يا اخويا روح يا سيد الرجاله.
خرج صلاح متوجها إلى المزرعه التى يعمل بها ليستقر بها هذه الأيام
فى الصباح استيقظت زهيره و اخذت تراقب غرفه هويدا لتجدها تفتح الباب و تجلس على السرير تنظر بشرود إلى النافذه ..ترفع بصرها للسماء مره و تخفضه للأرض مره و تتكلم بكلمات غير مفهومه
شعرت زهيره بالخوف الشديد فقد زادت حالة هويدا سوء
فكرت زهيره أن تبعث لعزه لتحضر و ترى ابنتها
نادت على ابنتها الصغرى هنادى و همست بأذنها
تعرفى بيت اهل هويدا يا هنادى ؟
ايوا يا اما اعرفه
تعرفى تروحى تناديلى امها بسرعه ؟؟ قوليلها بنتك تعبانه و عاوزه تشوفك ضرورى
هى مالها يا اما عماله تبص لفوق و تحت كدا و بتقول ايه ؟
ملكيش دعوه يا هنادى و لا تقربى منها خالص انتى فاهمه ؟
حاضر. يا اما ...مش هقرب
طب يلا بسرعه ناديلى امها
خرجت هنادى مسرعه الى دار عزه و اخذت تطرق الباب ... ما من مجيب
خرجت إحدى جارات عزه قائله
ميييين ....عاوزه مين يا حبيبتى ؟
عاوزه خاله عزه يا خالتى
لا خالتك عزه سافرت مع جوزها و اولادها مصر
جوزها مين ؟ مش جوزها مات ؟
لا دا جوزها الجديد ...خلاص هى سابت البلد و راحت معاه أصله بيشتغل بواب فى عماره و هيقعدوا كلهم هناك
يعنى مش هترجع تانى ؟؟
معرفش يا بنتى ...بس اكيد هتغيب لأنها كانت واخده هدومها و شويه عزال من الدار
ماشي يا خالتى
عادت هنادى لتخبر والدتها بما سمعت
ضربت زهيره على صدرها غير مصدقه
بقى امها اتجوزت ؟؟ دا الراجل لسه دمه منشفش فى التربه ؟؟؟ شوف القادره ؟ لا و طفشت و سابت لى البلوه دى .....هى كانت عارفه أن بنتها ملبوسه و ما صدقت خلصت منها ....طيب يا عزه ....لزقتى لنا المصيبه و هربتى ؟
بينما زهيره تحدث نفسها إذا بهويدا تمر عليها ذاهبه إلى الحمام ملقيه السلام عليها
صباح الخير يا اما زهيره
تعجبت زهيره فهويدا تبدو طبيعيه جدا
ردت زهيره الصباح و انتظرت هويدا لتدخل الحمام و همست باذن هنادى أن تسرع إلى غرفة هويدا و تحضر أبناء أخيها حتى لا تؤذيهم امهم و اوصتها بوضع وساده مكان الطفلين و تغطيتها
أسرعت هنادى و حملت الطفلين و وضعت الوساده
أشارت لها زهيره بأن تخرج بهم خارج الدار و تنصرف سريعا
خرجت هويدا من الحمام و توجهت لغرفتها
تبعتها زهيره و ما أن دخلت هويدا غرفتها الا و أغلقت زهيره عليها الباب بقفل كانت قد اعدته فى يدها
اخذت هويدا تصرخ
بتقفلى عليا ليه يا اما ؟؟ انا عملت ايه ؟؟
قفلت عليكى لحد ما جوزك يرجع بعد كام يوم
جوزى ؟؟ و جوزى راح فين ؟؟ و بعدين هاكل عيالى ازاى ؟؟
عيالك معايا يا اختى
نظرت هويدا على السرير رفعت الغطاء بلهفه فلم تجد اولادها
اخذت تطرق الباب بعنف افتحى يا وليه ...افتحى يا ظالمه ....عملت فيكى ايه عشان تخدى عيالى و تحبسينى كدا ؟
عملك اسود يا اختى ...احمدى ربنا انى حبستك مطردتكيش فى الشارع بعد مبقلكيش حد ....عرفتى أن امك اتجوزت و ابوكى لسه متمش السنه يا بت ؟
ما تتجوز و انتى مالك انتى ؟
و عرفتى انها خدت اخواتك و هجت من البلد مع العريس ؟ عامله عروسه الشايبه
انا لولا ولاد ابنى كنت رميتك زى ما امك رمتك
جلست هويدا على الأرض غير مصدقه ما سمعت قائله :
امى هجت و سابت البلد ؟؟؟
يتبع
صلوا على حبيبكم النبى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق