هويدا
الجزء السابع و العشرون
سادت حاله من الهرج و اعتقد الجميع انها حاله تسمم حيث أن الالم لا يتوقف ...
توجه الجميع إلى المشفى للكشف
تأجل شراء الذهب و عادت زهيره و ابنائها حزانا على ابنتهم التى لم تكتمل فرحتها بينما كانت هويدا فى منتهى السعاده مما حدث
عندما عاد الجميع أخذوا يتهامسون بأن الطعام بالتاكيد ملوث بفعل فاعل و أن السبب فى ذلك هويدا و لكن لم يجرؤ أحد أن يوجهه لها اى اتهام مخافة أن تتحول عليهم
كانت هويدا تسمع حديثهم و تشعر بالفرح الشديد و أنها اخيرا تأخذ حقها مما فعلوه بها
فى اليوم التالى ذهبت زهيرا الى جارتها ام محمد و هى حزينه
سلام عليكم يا ام محمد
و عليكم السلام يا حجه ....الف مبروك لفرحه ...و الله فرحت لها اوى
مبروك ايه بس ؟؟ و لا مبروك و لا نيله
ليه كفالله الشر دا انا شايفه العريس داخل عندكم امبارح هو و أهله و كنتى بتقولى انكم رايحين تجيبوا الشبكه
مجبناش حاجه بسبب المصيبه اللى عندنا فى البيت
ليه ؟ هى جت لها الحاله و العريس موجود ؟؟؟
لا يا اختى دى كانت هتسمنا كلنا
يا لهوى ازاى ؟؟
معرفش يا اختى ...احنا كلنا من هنا و رحنا نجيب الدهب جالنا اسهال جماعى و بدل ما نفرح روحنا كلنا المستشفى
يا خبر ...لا دا كدا خطر عليكم يا حاجه
منا عارفه بس خفت اطردها تعمل فيا حاجه
خلاص يبقى زى ما قلت لك
منا جايلك عشان كدا ....عاوزه اروح معاكى للناس بتوع الزار دول
عنيا يا حاجه فى اى وقت تقولى عليه يلا بينا
دلوقتى يا ام محمد قبل كمان شويه ...هروح البس جلابيتى و ارجع لك تكونى لبستى
ماشي يا حبيبتى و انا هخلى محمد ابنى يروح هوا يجيب لنا عربيه من الموقف و تبقى تحاسبيها انتى
ماشي يا حبيبتى
انطلقت المرأتان إلى القريه المجاوره حيث تقطن (سعاده )كودية الزار
(سعادة )سيده سمراء شديده السمار طويله قويه البنيه حفر الزمان ملامحها ، فى أواخر الاربعينيات ترتدى جلباب ابيض و طرحه خضراء و يفوح منها رائحه البخور
لها وشم على ذقنها عباره عن ثلاث خطوط ، نظرتها حاده و عيونها ثاقبه
دخلت زهيره و ام محمد عليها و قصوا لها قصه هويدا و ما فعلته
انصتت المراه إليهما و هى تهز رأسها إلى أن انتهوا من الحكايه
شوفى يا حجه ...مرات ابنك باللى بتحكيه دا يبقى لابسها مارد
يا خبر ...مارد ؟؟
متقاطعنيش و استنى لما اخلص كلامى
حاضر ....بس يعنى ايه مارد و عرفتى ازاى ؟
منا قلت اسكتى شويه ...انا مبحبش الشغل دا
خلاص حقك عليا ....سكتت اهو
المارد دا جنى عظيم ما هو متعملش اللى عملته دا لو هو حته جن عادى ...انتى بتقولى انها كانت بتاكل الفراخ نيه و بتشرب من دمها
ايوا يا اختى ... قدامى
و بتقولى كلمتك بصوت راجل انتى و جوزها
ايوا حصل
يبقى زى ما انا قلت دا مارد و لو مخرجش ممكن يولع فيكم أو يسمكم
عندك حق احنا متبهدلين و كلنا رحنا المستشفى امبارح بسببها
قصدك بسببه
يعنى المارد اللى عمل فينا كدا ؟؟
ايوا امال ...البت غلبانه و عاوزه تعيش
طب و الحل يا ست ؟؟
الحل أننا نعمل لها زار و نطلعه من عليها
طب و الحكايه دى هتتكلف كتير ؟
لا ابدا احنا مبناخدش حاجه لينا ...كلها طلبات الاسياد
و طلبات الاسياد دى تطلع بكام كدا ؟
متقلقيش يا زهيره كلها حاجات بسيطه
ايوا بس عاوزه اعرف برده
انتى بترغى كتير كدا ليه يا وليه انتى ؟؟
لا بس عشان اعرف اللى هيطلب إمكانياتى و الا لا
امكانياتك يا زهيره و لو عاوزه تجيبي انتى الطلبات هاتيها و ابقى راضى رجالة الحضره و خلاص
ماشي اجيب انا الطلبات
طب خدى الورقه دى هاتى الطلبات اللى فيها
فيها ايه الورقه دى ؟؟
يووو...انتى هتزهقينى ليه ؟؟ جهزى الحاجه و يوم الجمعه نكون عندك نعملك الحضره
ماشي حاضر بس متتاخريش عليا احنا فى الدار حالتنا صعبه
من هنا للجمعه تلات ايام يا زهيره مش بعيد يعنى ....بس خلى بالك لازم تجيبي الطلبات بالظبط لو خلفتى اى حاجه يبقى كأننا معملناش اى حاجه
يا لهوى ...طب خلاص هاتيهم انتى ...انتى برده ادرى بشغلك
ما قلنا كدا من الاول انتى بس غاويه تبوظى الطبيخ عشان شويه ملح
لا خلاص خدى دول من تحت الحساب
ايه دول يا اختى ؟؟ انا عايزه اد دول خمس مرات دا غير لما نيجى تراضى الرجاله
مش كتير كدا ؟؟؟
بقولك ايه يا وليه انا مبحبش الفصال...خلاص سبيها لما تموتكم
لا خلاص خلاص خدى يا اختى الفلوس اهى
عادت زهيره و هى تسب فى هويدا و اليوم الذى رأتها فيه و أن لولا خوفها ما كانت تحركت و لا دفعت قرشا واحدا من أجلها
اخبرت زهيره صلاح بشأن زيارتها لسعاده و أنها ستحضر رجال الزار فى بيت جارتهم ام محمد و عليه أن يتجنب التعامل مع هويدا الى أن يأتى يوم الجمعه
سمعت هويدا ما قصته زهيره لزوجها صلاح و توعدت لهم
بات صلاح تلك الليله فى حجره الكنب ليبتعد عن هويدا كما أمرته امه
قامت هويدا بمنتصف الليل نثرت شعرها و دخلت له بالظلام قائله بصوت اجش
قوم يا صلاح يا ابن زهيره .....عاوز تجيب لى ناس يطلعونى من جتت مراتك ؟؟ انا بقا مش طالع الا اما اخد روحك الاول
انتفض صلاح من مرقده و كاد قلبه يتوقف
مش انا ...انا معملتش حاجه
بكرا الصبح تقول لامك تصرف نظر على اللى عاوزه تعمله دا لإما قول يا رحمن يا رحيم على نفسك
قالت هويدا تلك الكلمات و انصرفت بكل ثبات و بحركات بطيئه تاركه صلاح مكانه يتصبب العرق من كامل جسده لا يستطيع الحركه
بعد دقائق حاول صلاح أن يتمالك نفسه قام مسرعا الى غرفه زهيره دق الباب بهدوء
يا اما ...يا اما الحقينى يا اما .....
يتبع
صلوا على حبيبكم النبى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق