هويدا
الجزء الثانى و العشرون
دخل حمدى غرفته مقهورا ....و كلما تذكر ابنته الطفله الهزيله و هى تحمل طفليها و عيناها تحمل الذل و كسرة النفس تألم بشده
أصبح الصباح و ذهبت عزه لايقاظ زوجها ليذهب إلى عمله
و لكنه لم يقوم
فارق الحياه مقهورا على صغيرته
فقدت هويدا سندها و داعمها الأكبر فى الحياه ...و لم يعد لها إلا الله سبحانه وتعالى
صرخت عزه ..... فزوجها لم يكمل الاربعين و قد ترك لها أطفالا صغارا و لا تعلم ما الذى ينتظرها بعد وفاة زوجها
تجمع الجيران ووصل الخبر إلى هويدا و التى لم تصدق ما سمعت
أسرعت هويدا الى بيت أبيها باكيه
دخلت عليه و هى غير مصدقه لما سمعت
كان مبتسما كأنه نائم
تعالت صيحاتها بالصراخ ...ادركتها صديقه لها كانت جارتها و اخذتها بحضنها
شدى حيلك يا هويدا
ابويا مات يا سلوى ...ابويا مات
معلش يا حبيبتى كلنا لها
مات ازاى ؟؟ دا كان عندى امبارح ؟ يكونش نايم ؟؟ و الا عنده غيبوبه
لا يا هويدا دكتور الصحه لسه ماشي و قال إنه مات خلاص
يا حرقة قلبى عليك يا ابا ....يا سندى فى الدنيا ...يا ضهرى اللى انكسر ....مين اللى فاضلى يا أبا ؟؟ مين لما ازعل هيمسح دموعى ؟ مين هياخد لى حقى من اللى ظالمنى ؟؟ دا انا كنت متقويه بيك ؟؟ تروح و تسبنى ؟؟ رحت و سبتنى ليه ؟؟
استهدى بالله يا هويدا....كلنا لها يا حبيبتى مفيش حد هيخلد فيها
قلبى اتحرق يا سلوى ....هموت وراه
معلش ...أهدى يا حبيبتى اهدى
حضر المغسل و تمت مراسم التغسيل
وضع بالنعش و حمله اربعه رجال
تبعت هويدا الجنازه و هى تولول و تصرخ بينما امها كانت صامده لا يخرج صوتها
بحثت هويدا عن زوجها بين الرجال و لم تجده
عللت عدم وجوده أن نظرها هو من خانها و أنه اكيد موجود بين اوائل الرجال السائرين خلف الجنازه
كانت تتمنى أن يربط على كتفها أن يقول لها سأحل محل والدك سأكون سندك فى الحياه و لكنها لم تجده ...
عادت إلى بيت أبيها بعد دفنه و هى تجر أذيال الحزن
انتظرت دخوله و لكنه لم يحضر
مضى اليوم و هويدا بعالم اخر ...
بعد المغرب وجدت هويدا زوجها و ابوه قد حضروا للعزاء كالاغراب
اتجهت إليه ...و أشارت له من بعيد
قام صلاح من بين الرجال متوجها لزوجته
كنت فين طول النهار ؟؟ مجتش الدفنه ليه ؟
ما انتى عارفه كنت فى الشغل
الشغل ؟؟ و ازاى معتذرتش و جيت ؟؟ اللى مات دا يبقى حماك
معلش معرفتش امشي محروس ابن سعد الغفير اللى معايا تعبان و مع ابنه فى المستشفى و مجاش انهارده مكنش فى غيري فى المزرعه
طب و امك فين ؟؟ مجتش تعزى ليه ؟؟
امى تعبانه و كمان العيال معاها معرفتش تيجى
بقا كدا ؟؟
ايوا ....و يلا عشان تروحى لعيالك
اروح دا ايه ؟؟ اسيب عزا ابويا و اروح ؟؟
ابوكى خلاص مات و الحى ابقى من الميت و عيالك من الصبح مرضعوش ...قعدتك ملهاش لازمه ...همى يلا معايا
الناس جايه بتعزينى اسيبهم و امشي ازاى ؟
امك موجوده ...مش لازم انتى يعنى
لا ...مش جايه انهارده و هبات مش هاجى الا بعد تلات ايام
بقى كدا؟؟ يبقى خليكى بقا ....و ملكيش عيال حدايا
انت ايه يا اخى ؟؟ ليه مش بتقدر إللى انا فيه ؟
انا قدرت و سبتك طول اليوم اهو بس الواحده لازم تسمع كلام راجلها و متباتش بره بيتها إلا بإذنه
طب سبنى ابات انهارده بس ؟
قلت ترجعى البيت الليله يعنى ترجعى البيت الليله يا اما كدا يا اما ملكيش عيال و لا تحلمى حتى تشوفيهم تانى
بكت هويدا و شعرت بالحسره ....لو أن والدها معها الان لدافع عنها و لم يسمح لزوجها أن يعنفها هكذا
لكنها الآن وحيده ليس لها أحد ...أن صممت على رأيها ستخسر اولادها أيضا و لن ترتاح مع امها ابدا
مضت هويدا خلف زوجها و هى ساخطه
دخلت الدار لتجد زهيره جالسه أمام صينيه مليئه بالطعام
نظرت لها هويدا و لم تتحدث و دخلت الى غرفتها حيث اولادها
أشارت زهيره لابنها بالاقتراب منها
همست بجانب أذنه
هى مالها لاويه بوزها ليه ؟؟
مكنتش عاوزه تيجى الليله و ال ايه كانت عاوزه تقعد تلات ايام ..
مش قلت لها اللى قلت لك عليه ؟؟
ايوا قلت لها ...لو مجتيش ملكيش عيال عندى
جدع يا واد يعنى لسه جايه امبارح و عاوزه تقعد تانى هناك ؟؟ هى سيره بقا و الا ايه ؟ ...يلا اقعد اتعشي تلاقيك جعان
اه و الله يا اما انا جعان اوى.
طب اقعد ....خد كل الحمامه دى انت تعتبر عريس جديد
عريس ايه بقا ؟؟ ما ابوها مات و بوظ لى الموضوع اهو
و لا باظ و لا حاجه دى مراتك حلالك و تجيك وقت ما تطلبها و لو معملتش كدا الملايكه تلعنها طول الليل
عندك حق يا اما ...انا قايم بقا
لحقت تخلص اكل يا واد ؟؟
عشان الحقها قبل ما تنام
روح يا اخويا الله يسهل لك
دخل صلاح على هويدا الغرفه وجدها تبكى
جلس بجانبها بعض الوقت و انتظر لتصمت و لكن بكاؤها لم ينقطع
و بعدين بقا ؟؟ انتى هتفضلى طول الليل تعيطى كدا ؟؟
إن مكنتش اعيط على ابويا هعيط على مين ؟ و كمان حكمت عليا مبتش و اخد عزاه
يا بت انا عاوز مصلحتك ..قعدتك فى وسط الغم دا هيخليكى تعبانه ، نسوان شكلها يسد النفس قاعده تعيط و تولول و يجيبوا فى سيرة الناس .. هتقعدى تعملى ايه بس ؟؟ ... لكن لما ترجعى بيتك و تكونى مع جوزك حالتك هتبقى احسن
احسن ازاى يعنى ؟؟
يعنى هطلعك من الحزن دا ...تعالى أما اقولك
انت عاوز ايه ؟؟
عاوز حقى
حقك دا ايه ؟؟؟
حقى الشرعى يا بت
حقك و ابويا ميت ؟؟
طب و انا مالى و بعدين هو حقى الشرعى هيمنعه من الخروج من التربه ؟؟ دى حاجه و دى حاجه
دى حاجه و دى حاجه دا ايه ؟؟ انت معندكش دم
انتى بتشتمينى يا بنت الكلاب ؟؟ طب ايه رايك بقا انى هاخد حقى منك و غصب عنك كمان ....
يتبع
صلوا على حبيبكم النبى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق