ليلى و الذئب
الجزء الثامن و الاخير
اسرع فوزى إلى مقر الشهر العقارى و احضر أحد الموظفين معه و تمت الإجراءات
انا هنزل يا ناديه اوصل الاستاذ
ماشي يا فوزى متتأخرش
حاضر يا حبيبتى
توجه فوزى إلى مكتب المحامى الخاص به الاستاذ اسامه
ازيك يا متر
اهلا ازيك يا فوزى
جبت لك التوكيل اهو زى ما اتفقنا
حلو اوى ....انت ساومتها على رجوع البت ؟؟
لا الموضوع خد شكل تانى ...ربك له تصاريفه
ازاى؟؟ حصل ايه ؟
الوليه اول ما بنتها اختفت وقعت من طولها و بقالى شهر قاعد جنبها فى المستشفى و بعد كدا اقنعتها بصنعه لطافه تعملى التوكيل عشان امشي بيه الشغل
دا انت مبخت ...كدا بقا تقدر ترجع البت لها من غير ما تظهر فى الصوره بعد ما تكتب الشركه باسمك
لا انا مش هكتب الشركه باسمى انا رجعت فى كلامى خلاص
رجعت فى كلامك ليه ؟؟
انا هبيع الشركه و اخد الفلوس و اسافر على بره اشوف لى جوازه حلوه كدا و اتمتع بفلوس الحيزبون اللى ضحكت عليا و فهمتنى أن ليلى بنتى و خدعتنى طول ٢١ سنه
نفسي افهم خدعتك ازاى ؟؟ عرفت منين أن البنت مش بنتك
هقولك ازاى .....من كام شهر حسيت بشويه تعب كدا قلت اروح اكشف عند دكتور تناسليه و فعلا رحت كشفت و طلب منى شويه تحليلات
و لما رحت له تانى الدكتور قعد يتكلم عن الالتهابات اللى عندى و بيكلمنى كانى عارف حالتى و بيقولى طبعا انت عارف ان عندك ضمور فى الخصيتين و دا عيب خلقي انت مولود بيه ...دلوقتى بقا حصل لك التهابات فى .....
استنى استنى يا دكتور ضمور ايه اللى بتتكلم عليه ؟؟ يعنى ايه الكلام ده ؟
انا اسف هو انت مكنتش تعرف بحالتك ؟
لا اول مره اعرف منك الكلام دا دلوقتى ....
ليه هو حضرتك متجوزتش ؟؟
متجوز من ٢١ سنه و مخلف كمان
مخلف ازاى ؟؟ مستحيل تكون مخلف ... حالتك دى من حالات العقم التام
انت بتقول ايه يا دكتور ؟؟
و الله دا اللى شايفه قدامى
خرجت من عند الدكتور و انا الدنيا سودا فى عينى و قلت لازم اروح لدكتور تانى يمكن دا مبيفهمش و رحت لدكتور كبير و للاسف قال لى نفس الكلام و انى لا يمكن اخلف
كنت عاوز ارجع اموتها و اموت بنتها إلى ضحكت عليا بيها بقالها سنين و لكن فكرت انى لو عملت كدا هخسر كل حاجه ...هتسجن فى واحده زى دى متستاهلش اتسجن يوم عشانها
طب ما يمكن حصل معجزه من ربنا و البنت بنتك
و الله قلت كدا برده و قلت لازم اتاكد قبل ما اعمل اى شئ واخدت من شعر ليلى شعرتين و هى نايمه و رحت عملت تحليل ال دى أن اى و طلعت النتيجه انها مش بنتى فعلا ...و ساعتها فكرت انتقم من ناديه و احرق قلبها على بنتها و فلوسها
تحرق قلبها على فلوسها اه لكن بنتها لا دا مش اتفاقنا
انا غيرت رايى و هحرق قلبها على بنتها ...دا اللى هيشفى غليلى
لا لا يا فوزى انت كدا هتودينا كلنا فى داهيه
و انت مالك انت ؟؟
مش انا اللى جبت لك سيد ...لو الموضوع اتكشف هتجر رجلينا كلنا لحبل المشنقه
لا ملكش دعوه انت بالحوار ده و لا هدخل سيد فيه اصلا
ازاى يعنى ؟
انا هخلص عليها بنفسي و ارميها فى أى حته
طب و ليه الأذى دا ما ترجعها لامها و خلاص و انت كدا كدا هتاخد فلوس الست و مش هيفضل لها اى حاجه تعيش بيها ، دا أكبر انتقام منها
لا أكبر انتقام يكون فى بنتها
بس يعنى البت مش هتصعب عليك ؟؟ البت زى بنتك برده و انت اللى مربيها
لا محدش يصعب عليا غير نفسي ، انا اتخدعت و لازم اخد حقى
انا مش معاك يا صاحبى فى الحوار ده
ماشي و انا مش عاوزك معايا انا عارف هعمل ايه كويس
خرج فوزى من مكتب اسامه و توجه إلى بيته متصنع البكاء
دخل على ناديه بوجه مكفهر
مالك يا فوزى فى ايه ؟؟
لسه جايلى اتصال دلوقتى من اللى خطفوا ليلى
صحيح؟ بنتى بخير ؟؟ البت جرالها ايه يا فوزى ؟
المجرمين عاوزين اتنين مليون جنيه يا ناديه
ايه اتنين مليون جنيه ؟؟؟
ايوا و قالوا لى لو بلغت البوليس مش هتشوف بنتك تانى
لا لا ....ادفع لهم يا فوزى
ادفع لهم ازاى بس ؟؟ دا رصيدنا فى البنك ميجبش الفلوس دى ...ما انتى عارفه أن السيوله اللى معانا حطيناها فى الصفقه
طب و بعدين ؟؟؟
مش عارف و الله
طب معانا كام تقريبا ؟
حوالى مليون و نص
طب انا هكتب لك شيك بالمبلغ روح هاته و بيع حته الأرض اللى عندى بالتوكيل و كمل المبلغ
ازاى يا ناديه ؟ كدا مش هيتبقى معانا فلوس خالص
تغور الفلوس بس بنتى ترجع
لا انا من رايى نبلغ البوليس بالمكالمه دى و هما يتصرفوا
لا بالله عليك ما تبلغ البوليس ...احنا هندفع المبلغ عشان بنتنا ترجع بالسلامه
خلاص زى ما تحبى...دى فلوسك و انتى حره فيها
بنتى عندى اغلى من اى شئ و باذن الله الفلوس تتعوض لكن بنتنا متتعوضش دى اللى خرجنا بيها من الدنيا
اه طبعا ...دى اللى خرجنا بيها
فى اليوم التالى توجه فوزى إلى البنك ليحول نقود زوجته إلى حسابه فى الخارج
تحرك فوزى بسرعه شديده و كان على اتفاق مع أحد المشترين لشراء الشركه منه
اخذ جزء من ثمن الشركه و اتفق مع المشترى أن يحول له باقى الثمن بعد شهر إلى حسابه بالخارج
توجه فوزى إلى المكان الذى يختبأ به سيد و أعطاه باقى حسابه و طلب منه تسليم ليلى له و هى مقيده
فك سيد قيود ليلى و عصب عيناها و فمها و يداها و توجه بها إلى عربه فوزى
خد بنتك اهى بس متفكش عينها الا اما تطلعوا من هنا
حاضر حاضر
فرحت ليلى كثيرا عندما سمعت صوت ابيها ، شعرت بالأمان الذى افتقدته منذ أكثر من شهر
كانت تظن أنها اخيرا نجت من سيد و أعوانه و لم تكن تعلم أن سيد سلمها للذئب الذى لا يملك بقلبه ذرة رحمه
تخيلت ليلى أن ابوها سيقوم بفكها عند الابتعاد قليلا عن بيت سيد و لكنه لم يحدث .....و لكنها لم تكن قلقه فهى الان مع أبيها و هو يعرف مصلحتها
توقفت السياره بعد فتره كانت ليلى قد غفت فيها من التعب
تخيلت أنها وصلت بيتها و لكنها وجدت من يجذبها بقوه من ملابسها و ينزع غطاء عينها عنها
ابتسمت ليلى و ظنت أن ابوها سيفك قيودها و يأخذها بحضنه و لكن ذلك لم يحدث
وجدته يدفعها إلى وسط الصحراء و بيده سكين كبير
لم تفهم ليلى ماالذى يحدث و لم تدرك اين يذهب بها ابوها
توجه فوزى إلى مكان بعيد و اجلس ليلى على الأرض و هى فى ذهول شديد و لا تصدق ما ترى
ضحك فوزى ضحكه سخريه و هو ينزع الغطاء من على فمها قائلا
طبعا مش مصدقه عنيكى ...ايوا انا إللى كنت خاطفك عشان احرق قلب الست الوالده عليكى زى ما حرقت قلبى و خدعتنى سنين و اوهمتنى انك بنتى ...
هزت ليلى رأسها غير مصدقه ما تسمع و الدموع تتساقط من عينيها بشده
انا معنديش مشكله معاكى انتى شخصيا بس سامحينى لازم اكمل انتقامى من امك و اقتلك عشان اشفى غليلى منها
صرخت ليلى بشده و كانت تتوسل له بأن يتركها
و لكن قلبه لم يحن لتوسلاتها أخذ السكين و نحر رقبتها
وقعت ليلى على الأرض والدماء تسيل منها
انصرف فوزى بعد أن ظن أنه قتلها ولكن إرادة الله فوق إرادة البشر
افاقت ليلى بعد فتره و هالها منظر الدماء و لكنها تمالكت نفسها و أمسكت برقبتها و حاولت الوصول إلى اقرب طريق
و بالفعل وصلت للطريق رآها أحد الماره و نقلها إلى المشفى
و هناك تم التحقيق معاها لمعرفه من قام بمحاوله قتلها
أدلت ليلى بأقوالها و تم القبض على فوزى و هو بالمطار قبل هروبه
تماثلت ليلى للشفاء و لكنها كانت فى صدمه قويه مما حدث و لم تكن تصدق أن فوزى ليس ابوها
كان لديها الف سؤال و سؤال عن والدها الحقيقى من هو و لماذا امها فعلت ذلك ؟؟
كانت تنتظر معرفه الاجابه من والدتها بفارغ الصبر و لكنها ابت أن تخبرها
طلبت ليلى منها أن تعلمها الحقيقه لأنها لن ترتاح ابدا طالما لم تعلم بما حدث و من هو ابوها الحقيقى
رفضت ناديه ذكر اى شئ و اصيبت بالقهر الشديد على ضياع مالها و كشف سترها و لم تستطع المقاومه فوافتها المنيه
حزنت ليلى حزن شديد فقد فقدت عائلتها بالكامل فى لحظات
ذهبت الى المحكمه لعلها تعرف من فوزى اى شئ عنها
اقتربت ليلى من القفص و سالت فوزى
انت تعرف انا بنت مين ؟؟
لا معرفش روحى اسالى امك
امى خلاص ماتت
ضحك فوزى بشده عندما علم أن ناديه ماتت و ارتفع صوته بالمحكمة
انا كدا ارتحت ....عاوزين تعدمونى اعدمونى انا كدا خلاص خدت حقى
عادت ليلى إلى منزلها حزينه لأنها لم تصل لأى شيئ و لم تعرف من هو ابوها الحقيقى و هل أخطأت امها حقا ؟ ام لا
رن جرس الباب قامت ليلى بمنتهى الضعف لتجد خالتها سها و التى تسكن ببلد عربى و عندما علمت بوفاة اختها جاءت لتعزى ليلى
ألقت ليلى بنفسها فى حضن خالتها و التى كانت تشبه امها كثيرا
البقاء لله يا ليلى انا عرفت كل إللى حصل من الجرايد
عرفتى أن فوزى مش ابويا ؟
ايوا ...انا كنت عارفه من زمان أن فوزى مش ابوكى
انتى كنتى عارفه ؟؟؟ طب انا بنت مين ؟؟ تعرفى ابويا فين ؟؟؟
ابوكى للاسف مات من زمان
ازاى ؟؟؟ مات امتى ؟
اختى ناديه اللى يرحمها كانت بتحب واحد اسمه فارس و للاسف غلطت معاه و هو وعدها أنه هيجى يتقدم لها و بالفعل جه و اتقدم و طلب من والدى الله يرحمه أن الزواج يتم بسرعه
نزل فارس من عندنا و عمل حادثه و مات
اختى حزنت عليه جدا و طبعا على نفسها بس مكنتش لسه تعرف انها حامل
فوزى كان شغال فى شركه ابونا و كان من زمان بيحب ناديه وياما حاول بكلمها بس هى كانت بتصده
لما عرفت انها حامل جت لى و قعدت تعيط و حكت لى على كل حاجه
حاولنا نتخلص منك بس معرفناش و هنا جت لى الفكره و قلت لناديه انها توافق على فوزى و تتجوزه باسرع وقت خاصه انهم مش هيحتاجوا حاجه لان بابا كان عاوزها تقعد معاه لما تتجوز و البيت كان جاهز
وبالفعل تم الزواج فى اقل من شهر و بعد حوالى سبع شهور امك خلفتك و الكل افتكر انك بنت سبعه و محدش كان يعرف السر دا غيرى انا ووالدتك الله يرحمها
يعنى فوزى كان عنده حق فى اللى عمله
كسر حقه ؟؟ حق ايه ؟ دا مجرم و كان هيقتلك و هو كمان السبب فى موت اختى
انتوا خدعتوه و ضحكتوا عليه و لبستوه بنت مش بنته
و هو كان يطول العز إللى عاش فيه طول السنين دى
عز ايه ؟ دى جوازه باطله و حياه باطله
انتى بتقولى ايه يا ليلى ؟
بقول حق ربنا ...اللى عملتوه دا جريمه تستحقوا عليها العقاب انتى و اختك
انتى اتجننتى يا بنت ؟
ايوا اتجننت ....اتجننت اما الاقى امى الست المحترمه مش محترمه ...لما الاقى نفسي بنت حرام و مليش اصل و لا فصل ،،، لما الاقى الراجل إللى ربانى مش ابويا و انكم اشترتوه بشويه فلوس و ضحكتوا عليه عشان كان بيحب اختك
دا حرامى و قتال قتله ازاى بتدافعى عنه كدا ؟؟
اى حد مكانه كان عمل كدا و اكتر من كدا ....تخيلى انسان اتخدع اكتر من عشرين سنه يكون إحساسه ايه ؟؟
انتى مجنونه ازاى بتبررى له جرايمه دى ؟؟ دا سرقك و اخد مالك لنفسه
مسمحاه .... انا مسمحاه و دا أقل حاجه اعملها عشان ارد له جزء من كرامته
لا انتى اكيد اتجننتى
لا انا عقلت و هروح بكرا أتنازل عن حقى و هغير اقوالى و أقول أن فوزى محاولش قتلى و انى كان بيتهيالى عشان كنت تحت تأثير مخدر
لو عملتى كدا يبقى لا انا خالتك و لا اعرفك
و مين قالك انى عاوزه اعرفك اصلا ؟
خرجت سها و هى ساخطه على ليلى
توجهت ليلى إلى النيابه و غيرت أقوالها بعد استشارة المحامى الخاص بها
خرج فوزى بعد فتره و علم أن ليلى من اخرجته
توجه إلى بيتها و اعتذر لها بشده عن ما فعله بحقها و أن الحقد هو الذى حركه و جعله كالمجنون و ترك لها حقيبه بها ٢ مليون جنيه و سلم عليها و رحل
فكرت ليلى فى حال الكثيرين الذين لا يعلمون لهم اب و قررت انشاء دار خيريه للاطفال اليتامى و اللقطاء و ندرت نفسها للعمل الخيري
قامت بتجهيز الدار لاستقبال الاطفال بعد استخراج كافه الاوراق اللازمه لذلك
و هى الان مسؤوله عن ثلاثين طفل ليس لهم بعد الله سواها
🌷 تمت 🌷
أرجو أن القصه تكون عجبتكم و لو عجبتكم القصه ارجو الدعاء لوالدى رحمه الله عليه بالرحمه و سائر موتى المسلمين
اشوف وشكم بخير 🌷🌷
صلوا على حبيبكم النبى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق