أنس
الجزء السادس
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
لحد ما كنت خلاص بين الحياه و الموت
و بالفعل فقدت الوعى تماما و فشلوا أنهم يفوقونى زى كل مره و تقريبا افتكروا انى مت من كتر اللى عملوه فيا
حبوا يتخلصوا منى
لفونى فى سجاده قديمه و اخدونى رمونى فى حته مقطوعه
و طبعا من غير اى حاجه تدل على شخصيتى ...
بيتهيالى لو حد من اهلى شافنى ساعتها مكنش عرفنى من كتر اللى كان حاصلى و الورم و الزرقان اللى كان فى كل حته فى جسمى 😔
الحته اللى رمونى فيها كانت مقطوعه تماما يعنى لولا ستر ربنا كنت مت فعلا و تحللت و محدش عرف عنى حاجه
كان فى اتنين جايين من مرسي مطروح و راجعين على اسكندريه
و يشاء السميع العليم أن العربيه بتاعتهم تعطل فى مكان قريب اوى من المكان اللي انا مرميه فيه
لما العربيه كانت جايه من بعيد كنت سامعه صوتها بس مكنتش و لا قادره انادى و لا اتحرك و بقيت ادعى ربنا أن حد يلاقينى قبل ما تاكلنى الكلاب
بعد لحظه سمعت العربيه وقفت و فى مكان قريب اوى منى ...كنت سامعه كل كلمه بيقولوها
ايه اللى حصل للعربيه يا حسام ؟؟
و الله ما عارف يا طارق
انا قلت لك العربيه دى مش هتسد معانا فى المشوار ده ...المشوار بعيد عليها اوى مصدقتنيش
طب و العمل ايه ؟؟ الساعه دلوقتى تلاته بالليل ..كدا هنفضل للصبح على ما نتصل بمكانيكى أو بحد يجى يقطرنا
يا ادى الخيبه ..دا انا عندى شغل مهم اوى فى المينا الصبح
طب ما انا زيك ..امال ايه اللى جابنى بالليل كدا
الامل دلوقتى أن اى عربيه تمر صدفه و يرضى ينقلنا معاه أو يقطر العربيه
طب ما تتصل على سعد اخوك يجى ينفذنا
سعد مين ؟؟ سعد زمانه فى سابع نومه و لو رنيت عليه من هنا للصبح مش هيصحى
طب متعرفش انت تصلح فيها اى حاجه
و الله ما عارف بس احاول ...انا هولع كشاف العربيه احسن الدنيا كحل و انت تعالى نورلى بكشاف الموبيل
طب يلا ...على الله تعرف تشغلها بدل ما نبات هنا
فجاه الدنيا نورت لما نوروا كشاف العربيه و اللى لأجل حظى كان نوره متجه ناحيتى
حاولت اعمل اى حركه علشان ياخدوا بالهم منى بس مقدرتش ...المجرمين كانوا مكتفنى بحبل تخين جدا و حوالين رقبتى ايشارب كانوا بيستخدموه فى شنقى لحد ما تقرب روحى تطلع كانوا يسبونى
ها يا حسام عرفت العطل فين ؟؟
لا مش عارف ...انت عارف انى لسه شاريها من اسبوعين و العربيه دى غير بتاعتى القديمه خالص
و الله يا اخى بتاعتك القديمه كانت احسن ...انا عارف دفعت فيها فلوس ازاى دى
اهو ده اللي حصل يا طارق مش وقت تقطيم و حياة والدك
خلاص يا عم انا لا بقطم و لا هتكلم ....انا بس عاوز البى نداء الطبيعه
نعم يا اخويا ؟؟ هى حبكت ؟
الله هو بكيفى ؟؟ اخوك مزنوق
خلاص روح شوف لك حته فك زنقتك فيها
منا هروح ..هو انا هستناك لما تقول
سمعت صوت خطوات رجلين جايه ناحيتى ..قربت و قربت و اتجدد فيا الأمل أنه ممكن يلاقينى
حاولت اصرخ لكن صوتى كان رايح من كتر الصريخ
دعيت ربنا يا رب يارب
فجأه لقيت الصوت قرب منى اوى ....ووقف قدام السجاده
الحق يا حسام فى سجاده مرميه هنا اهى و شكلها جديد
يا عم بطل نتانه بقا ...انت مش هتبطل العاده اللى فيك دى ؟...هتعمل بيها ايه بس؟
عمرك ما هتتعلم منى حاجه يا حسام ..كل حاجه حد بيرميها ممكن ننتفع بيها
يا عم على رأى المثل لو كان فيه الخير ما كان رماه الطير
يا ابنى فى ناس بترمى حاجات بالنسبالها قديمه بس بالنسبه لناس تانيه بتكون حلوه اوى
هو انت محتاج سجاده زى دى يا طارق ؟؟
حتى لو مش هستعملها انا ممكن نديها لحد غلبان و نكسب فيه ثواب
يا سلام يا سلام
اه و الله زى ما بقولك ...انا هاخدها
لا مش هحطها فى عربيتى دى ...اكيد مشحمه و الا مزيته و هتوسخ لى العربيه
هنحطها فى شنطة العربيه يا حسام
لا يا طارق انا اصلا ممعييش مفتاح شنطة العربيه
طب بص هنفردها و لو لاقيناها مش نضيفه يا عم مش هناخدها
طارق قرب من السجاده و اول ما حط ايده عليها و بدأ يفتحها سمعته بيقول لحسام
الحق يا حسام ..دا فى حاجه جوه السجاده
حاجة ايه دى ؟؟ اوعى تكون مخدرات
لا ....تعالى بص
فتح طارق السجاده و سلط عليا نور الموبيل
حسام اول ما شافنى صرخ
الله يخربيتك يا طارق ...الله يخربيتك ...هنلبس جريمة قتل دلوقتى
استنى يا حسام ..دى لسه فيها الروح ...الست عينيها بتقفل و تفتح
تقفل ايه و تفتح ايه ؟ اللى يخربيت فضولك يا اخى ...احنا هنروح فى داهيه
داهيه ليه هو احنا نعرفها و الا هى تعرفنا ؟؟
طب قوم بسرعه نمشي من هنا
نمشي ازاى و نسيبها ؟؟؟؟؟
و احنا مالنا و مالها ؟ هى من بقية عيلتنا ؟؟
حرام عليك بقولك لسه صاحيه انا سامع صوت نفسها اهو
طارق قرب منى اوى
انتى يا ست ...سامعانى
نطقت بصوت ضعيف اوى ...الحقنى ...الحقنى
البنت صاحيه و بتقول الحقنى يا حسام احنا لازم نتصل بالاسعاف
اسعاف ايه ؟؟؟ لو اتصلت بالاسعاف هيقولوا أن احنا اللى ضاربنها بالعربيه
لا هو ده شكل واحده مضروبه بعربيه ؟؟
خلاص يبقى لازم نتصل بالشرطه
انا عارف انها ليله مش معديه انهارده
و اتصل طارق بالشرطه اللى حضروا بعد حوالى ربع ساعه و معاهم سياره اسعاف
نقلونى بسرعه على المستشفى بعد ما طارق و حسام حكولهم ازاى لقونى
دخلت المستشفى و كانت حالتى صعبه جدا و فى بعض الكسور فى ايدى و رجلى
دخلت العنايه المركزه ..و للاسف معرفوش انا مين و لا استدلوا على شخصيتى
فى الفتره دى انس و اهلى كانوا بيدوروا عليا فى اسكندريه حته حته
مسبوش مكان إلا و سألوا فيه
بلغوا الشرطه ...لفوا على المستشفيات
عملوا صور مطبوعه ووزعوها ...نزلوا صورى على الفيس بوك انى مفقوده و اى حد يشوفنى يتصل بيهم
انس كان عنده امل أنه يلاقينى رغم مرور أيام كتير على اختفائى
قعدت اسبوع فى العنايه المركزه لحد ما فقت اخيرا ...و صراحه كان فيه اهتمام غير عادى بيا بدأ من صف التمريض لحد اكبر دكتور فى المستشفى
بعد ما خرجت لقيت ظابط المباحث موجود مع الدكتور و بيستأذنه أنه يستجوبنى و يعرف انا مين و مين اللى عمل فيا كدا ؟؟؟؟؟؟😔😔
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق