أنس
الجزء الرابع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
مكنتش مصدقه نفسي من كتر السعاده اللى انا فيها ...كنت ساعات أحسد روحى عليه
انس مش انسان دا ملاك عايش على الأرض
لحد ما جه اليوم اللى غير حياتى و قلبها رأسا على عقب 😔🥺
كنت فى الترم التانى للسنه الاخيره من الكليه و لقيت واحده صاحبتي اسمها مروه جايه تقولنا
ازيكم يا جماعه
اهلا مروه
جايبلكم خبر بمليون جنيه
خبر ايه فرحينا
فى رحله لاسكندريه انما ايه هايله
رحلة ايه دى ؟؟
رحله يوم واحد بس ...لكن منظمه اوى و البروجرام بتاعها مليان و مدهونه من وزاره الشباب
يعنى بكام يعنى ؟؟
تخيلى بكام يا شهد ؟؟
على الأقل 200 جنيه
لا دى بخمسين جنيه بس
ايه ؟؟ دا مش حق المواصلات
فعلا ..و عشان كدا قلت الحق اقولكم قبل ما تتحجز لأنها و بالسعر هتتملى فى لحظه
بس معرفش اهلى هيرضوا و الا لا و كمان خطيبي
يا ستى ادفعى و لو مرضيوش الف مين هيطلع مكانك
تصدقى صح ...طب مين بيجمع فلوس الرحله دى ؟
انا طبعا ..هو انتى متعرفيش انى عضو الرحلات فى الكليه ؟
ايوه صحيح ...طب خدى الخمسين جنيه بتاعتى اهى و ربنا يسترها و اعرف اقنعهم
دا لازم تقنعيهم احنا هنروح قلعه قيتباى و نتغدى فى قريه سياحيه و بالليل هنروح نقعد على كافيه و الاتوبيس هيتحرك الساعه تسعه مساء يعنى هنبقى هنا على الساعه 12 بالكتير اوى
يااا كل ده بخمسين جنيه ؟
مش بقولك لقطه
طب و ميعادها امتى دى ؟؟
يوم الجمعه الجاى و السبت عندنا اجازه يعنى هترجعى تنامى لتانى يوم براحتك
حلوه اوى يا مروه و خصوصا اننا كلنا هنطلع مع بعض و هيكون يوم جميل اوى
فعلا الرحلات اللى زى دى مفيش زيها ، ذكريات حلوه اوى و هنتصور سوا و هيبقى يوم كله ضحك و لعب
كنت فرحانه اوى و رجعت البيت حكيت لامى عن الرحله و كلى حماس
طب و مذاكرتك يا شهد ؟؟ انتى ناسيه انك فى اخر سنه فى الكليه ؟
يا ماما دا يوم واحد بس و بعدين انا بذاكر كويس متخافيش عليا ..بالله عليكى يا ماما توافقى انتى و بابا انا اول مره اروح رحله مع زمايلى
يا بنتى انا خايفه عليكى
خايفه عليا من ايه بس ؟؟ ما كل صحباتى هيكونوا معايا
الكلام الاخير لابوكى
ان شاء الله لو بابا لقاكى موافقه هيوافق
طب قلتى لانس ؟؟
لا مستنيه لما بابا يوافق الاول و بعدين أقوله
ماشي يا شهد هدخل اقول لابوكى
اتوصى شويه يا بطوط هجيب لك هديه معايا و انا جايه من اسكندريه
هديه ايه يعنى ؟ لما اشوف تستاهل المجهود اللى هعمله و الا لا ؟؟
اللى تقولى عليه اجيبهولك من عنيا ..انت تؤمر يا جميل
انا عاوزه أم الخلول و بكلاويز
بس كدا ؟؟ عنيا ليكى
طب استنى هنا لما اشوف ابوكى هيقول ايه
مستنيه اهو
و بالفعل امى اقنعت ابويا بالرحله ووافق بعد جهد و جه الدور على انس و ازاى اقدر اقنعه لانه بيرفض اى خروج مع اصحابى بحجه أنه بيخاف عليا
اتصلت عليه
ازيك يا انوس
الله يسلمك يا شوشو ...سبحان الله كنت لسه هتصل بيكى حالا
القلوب عند بعضها ... سبقتك انا ...بقولك ايه يا انس
نعم حبيبتى
انت بتحبنى اد ايه ؟؟
انتى لسه بتسالى ؟ انتى بالنسبالى ايه ؟ لا يا حبيبتى اطمنى انتى العالم و اللى فيه على رأى الاستاذ هانى شاكر
بطل هزار بقا
و الله ما بهزر .. انا بتكلم جد جدا
طيب اللى يحب حد يرضى يزعله ؟؟
و مين دا اللى يقدر يزعل حبيبي ما عاش و لا كان
لا بعد الشر عنك
امال ايه ؟ انا زعلتك فى ايه ؟
لا انت لسه مزعلتنيش بس ممكن تزعلنى
ايه الالغاز دى ؟ ما تتكلمى يا بنتى على طول
ايوووه... لو عندك بنت و شبطت فى لعبه هتعمل ايه ؟
هجيبهالها طبعا لو معايا فلوسها
ايوه معاك
ايه انتى شبطتى فى لعبه ؟؟
حاجه زى كدا
اتكلمى يا شهد على طول انتى عارفه انى مبحبش اللف والدوران فى الكلام
انا عاوزه اطلع رحله اسكندريه مع اصحابى يوم واحد
لا يا شهد انتى عارفه رأيى فى الموضوع ده كويس
بس انا نفسي يا انس وبابا و ماما موافقين ليه بقا عاوز تنكد عليا
انكد عليكى ؟؟؟ خلاص يا شهد مدام اهلك موافقين انا مليش حكم عليكى
بس انا مش عاوزاك تكون زعلان
لا انا مش زعلان .. بس خايف عليكى
متخافش الرحله دى تحت رعايه وزاره الشباب و هيطلع معانا اتنين من المشرفين كمان
انا عارف يا شهد ..وواثق فيكى بس انا خايف لتحصل لك مشكله و الا حاجه
متخافش و الله مش هيحصل حاجه أن شاء الله
طب الرحله دى امتى ؟؟
ليه هتطلع معايا ؟
ايوه او ممكن اجيلك على هناك
الرحله الجمعه الجايه باذن الله
يا ادى الحظ
ليه ؟ فى ايه ؟
انا مسافر بورسعيد اخلص ورق للشركه فى المينا ...
خلاص متقلقش أن شاء الله مش هيحصل حاجه
خلاص يا شهد ربنا يستر
و جه يوم الرحله ...اليوم اللى انقلبت فيه حياتى كلها رأسا على عقب
كان ميعاد تجمعنا الساعه اربعه الفجر قدام الكليه علشان نلحق اليوم من أوله
بابا وصلنى و فضل واقف لحد ما الاتوبيس اتحرك
قعدنا نغنى و نهيص لحد ما وصلنا اسكندريه و كانت الساعه حوالى سبعه و نص الصبح
المشرفين قالوا لنا على البرنامج و مواعيده و طلبوا مننا الالتزام بالوقت عشان نقدر ننفذه كله
طول اليوم انس يتصل بيا و يتابعنى لدرجه ان شحن التليفون كان على وشك أنه يخلص
خلصنا معظم البروجرام و كان فاضل أننا نتجول جوله حره و نقعد على كافيه و بعد كدا نتحرك
البنات اقترحوا أننا نروح زنقة الستات و بلاش كافيه لأنهم سمعوا أن فيها حاجات حلوه اوى و اسعارها هايله
و بالفعل رحت انا و اتنين زمايلى علشان نشوف الحاجات اللى سمعنا عنها
الدنيا كانت زحمه اوى و كل واحده مننا بتدور على حاجه معينه و بالشكل ده هنعطل بعض ، فاتفقنا أننا نفترق و نتجمع بعد ساعه على اول السوق
و دخلت السوق و كنت منبهره بالهدوم اللى اسعارها قليله اوى بالنسبه الى عندما و على المناديل المطرزه بالترتر و العبايات اللى بتلمع
افتكرت طلب ماما ..فسألت حد من البياعين عن حته بيتباع فيها ام الخلول و البكلاويظ فوصف لى محل فى شارع جانبى بعيد عن السوق شويه
رحت بسرعه و كان شارع متطرف مفيهوش ناس كتير ..يعنى الرجل فيه خفيفه و كانت الساعه قربت على تسعه قلت هجيب و ارجع اقابل صحباتى على اول السوق
و لسه داخله المحل شفته
ايوه هو ...
مش ممكن انسي ملامحه ابدا
هو ...
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق