حدوته البرام - قصص اطفال
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
اصدقائى صديقاتى
موعدنا انهارده مع حدوته جديده من الحواديت اللى علمها لى والدى الله يرحمه
الحدوته باسم البرام و للى ميعرفوش البرام هو الطاجن
كان يا ما كان و لا يحلى الكلام الا بذكر النبى عليه الصلاة والسلام
كان فى راجل غلبان مش معاه الا جنيه و كان جعان اوى راح اشترى شقه فول و راح ع البحر عشان ياكلها و هو بياكلها وقعت منه فولايه فى الميه قعد يعيط و يقول اه يا فولتى يا بطنى جعتى اه يا فولتى يا بطنى جعتى
طلع له ملك من البحر قاله مالك بتعيط ليه يا راجل انت ؟؟؟
قاله الفوله بتاعتى وقعت و انا جعان
قاله طيب متزعلش خد البرام ده و قوله يا برام يا برام هات لى فراخ و حمام هيجيب لك اطلب منه اى اكل هيجيب لك
فرح الراجل و روح بيته و قفل على نفسه و قعد يطلب من البرام اكل و ياكله بعدين قرر يعزم كل جيرانه على الاكل
عزمهم كلهم و جه واحد منهم ساله جبت الاكل دا كله منين ؟؟ و انت مكنتش لاقى تاكل امبارح ؟
قاله هقولك على سر بس متقولش لحد انا عندى برام سحرى بيجيب لى الاكل
قاله جاره ما تجيب البرام ده اصل عندى ضيوف هأكلهم بيه و هرجعه لك على طول
قاله صاحبنا هترجعه تانى صح ؟؟
قاله اكييد
تانى يوم صاحبنا راح لجاره و قاله هات البرام فرد عليه انا ماخدتش منك حاجه قاله ازاى انت اخدته منى قاله امشى من هنا مأخدتش حاجه
راح الراجل ع البحر تانى و قعد يعيط اه يا فولتى يابطنى جعتى
خرج له الملك قاله بتعيط ليه تانى مش اديتك البرام
قاله الراجل ضحك على و اخده منى
فاعطاه الملك صنيه و قاله اطلب منها اى حاجه هتجيبها لك و تكرر نفس اللى حصل يا ساده و ضحكت عليه جارته و خدتها منه بحجه انها هتاكل ولادها و تانى يوم تكرر ما حدث سابقا
راح ع البحر يعيط اه يا فولتى يا بطنى جعتى
طلع له الملك مالك تانى
قاله الست ضحكت على و اخدت الصنيه
قاله طيب خد العصايه دى و اقفل على نفسك و قولها يلا يا مبروكه و هتجيبلك البرام و الصنيه
فرح الراجل و عمل كدا و قالها يلا يا مبروكه
نزلت مبروكه فيه ضرب وتقوله تحرم تحرم تدى حاجتك لحد تحرم تقول اسرارك لحد
قال حرمت حرمت يا مبروكه راحت واقفه
راح للراجل اللى اخد منه البرام و قاله هات البرام قاله مأخدتش حاجه قالها طب يلا يا مبروكه راحت نازله فيه ضرب الراجل قاله خلاص خلاص خد اهوه
و راح للست اخد منها الصنيه بنفس الطريقه
و رجع بيته معاه البرام و الصنيه و قعد يطلب منهم الاكل مبسوط فرحان
نتعلم من القصه ان احنا منقولش اسرارنا لحد و نتعلم من غلطنا اذا غلطنا
ارجو ان تعجبكم القصه اذا عجبتكم ارجو الدعاء لابى بالمغفره و الرحمه
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
و توته توته توته فرغت الحدوته حلوه و الا ملتوته ؟
تعليقات
إرسال تعليق