ابو رجل مسلوخه الجزء الحادى عشر

#ابو_رجل_مسلوخه

#الجزء_الحادى_عشر

النيابه  أمرت بحبس سمير و أفرجت عن عمى و ابويا عمله ليله عزم فيها أهل البلد على فول نابت و عيش طرى و جاب الشاعر يحيى الليله

و البلد كلها كانت فرحانه و كانت ليله حلوه 

بعد الليله ما خلصت و الكل مشي لقينا الواد اسامه مش موجود 

امى قلبها اتخلع و خافت تكون الجنيه رجعت فى كلامها و نادته مره تانيه و امى مشغوله مع الناس 

ابويا جرى على الترعه و امى بقت تدور فى مقاعد الدار كلها و انا طلعت جرى فوق  اشوفه 

لقيت الواد قاعد فى وسط القش و الحطب المحطوطين فوق السطوح و باصص للسما

قاعد كدا ليه يا مزغود انت دا ابوك و امك بيدوروا عليك  ؟؟

و يدوروا عليا ليه ؟؟ هو انا صغير و الا كنت صغير ؟؟؟

ياض بطل لماضه و انزل معايا امك هتتهبل عليك تحت 

لا انا هنام هنا الليله 

ياض انت مش خايف من التعابين ؟؟ دا امك لقت تعبان قبل كدا فى الحطب ده 

لا مش خايف و بطل وش بقى و انزل و سبنى ...عاوز انام

مجنون ...هقول ايه بس ؟؟ هنزل عشان اطمن امك 

و نزلت لامى اللى كانت بتلف حوالين نفسها و كانت لسه هتطلع على بره عشان تسال الجيران 

يا اما ...ابنك فوق نايم ع القش 

ايه اللى منيمه على القش ؟؟؟

معرفش يا اما 

طب روح شوف ابوك ع الترعه يا سعد و انا  هطلع له 

امى طلعت للواد بس راسه جزمه مرضيش ينزل معاها 

ابويا رجع معايا و هو بيسب فى الواد و تربيته و لما امى قالت له أنه مش راضى ينزل قالها احسن خليه مرزوع فوق 

تانى يوم امى صحيت بعد الفجر على طول و اخدت الشريطين ( حصيرتين ) مطرح ليلة امبارح .. و راحت تغسلهم على الترعه 

الترعه كانت لسه فاضيه و محدش من النسوان جه لسه بس بعد دقايق امى لقت ست كبيره اسمها الحاجه سميحه جايبه صنيه وعى و جايه تغسلها 

امى لما شافتها طلعت جرى من الميه و راحت خدت الصنيه من على دماغها 

ايه اللى مخرجك بدرى كدا يا خاله سميحه ؟

شغلة البدريه منسيه يا نرجس 

طبعا بس فين مرتات ولادك ؟؟ مجوش هما يغسلوا الوعى بدالك ليه ؟؟ 

انا مش عاوزه حاجه منهم انا هغسلهم بنفسي 

و ليه كدا ؟؟ انتوا متخانقين و الا ايه ؟؟؟ 

متخانقين من زمان ...كل واحده عاوزه تعمل ست على قفايا 

معلش يا خالتى انا هغسلهم لك انا 

لا يا بنتى انا هغسلهم ...الله يرحمها ازهار كانت دايما تعدى عليا و تاخدهم تغسلهم لى 

ازهار ؟؟؟؟ ازهار كانت بتغسل لك الوعى ؟؟ 

ايوا و مستغربه ليه ؟؟ مفيش زى ازهار الله يرحمها 

معلش يا خاله بس احنا مجالناش من وراها الا الأذى 

و هى ذنبها ايه يا بنتى ؟؟ انتى هتسيبى الحمار و تتشطرى على البردعه ؟؟ ...... دى غلبانه و مظلومه و كل اللى بيتقال فى سيرتها ده كدب و افترا 

ازاى بقا ؟؟ و السجاير اللى كانت بتشتريها دى كانت بتشتريها ليه ؟؟ و المشوار اللى كانت عاوزه فيه عمى هشام  و مكنتش عاوزه حد يعرف عنه حاجه دا ايه ؟؟ 

اسمعى أما اقولك يا نرجس كله سلف و دين  حتى المشي ع الرجلين ...متجبيش فى سيرة حد عشان هتلاقى اللى يجيب فى سيرتك يا بنتى

و الله ما بجيب فى سيرة حد و انتى عارفانى من الدار للغيط و لا ليه خلطه بحد ابدا بس هتجنن و اعرف كانت عاوزه فى ايه ؟؟ و دخلتنا فى مشاكلها ليه ؟

انا عارفه سر ازهار كله بس مقدرش اقولك عليه لتروحى تقولى للنسوان و سيرتها تبقى لبانه فى حنكهم 

طب قوليلى يا خاله و بالله العظيم منا قايله لاى واحده اى كلمه من اللى هتقوليها ليا دلوقتى 

احلفى و ادعى على نفسك أن طلعت كلمه منك بره 

و حياة ربنا ...إن شالله اعمى و ما اوعى اربى عيالى ان قلت كلمه بره أو لاى واحده ست 

ازهار يا بنتى كانت شكل و بس بتلبس و تتعايق قدام الناس بس من جواها مكسور و حزين 

ازاى و هى كل ست فى البلد كانت بتحسدها على اللى هى فيه ؟ 

ازهار كانت بتلبس حلو و تاكل حلو بس ناقصها اهم حاجه من متاع الدنيا 

قصدك العيال يعنى ؟؟ 

العيال و الراجل 

ليه ما هو جوزها معاها ؟

جوزها  معاها و مش معاها .....جوزها زى ما انتى عارفه راجل كبير فى السن و كان متجوزها عشان شكله قدام الناس و بس و هى رضيت بيه لأنها كانت مطلقه قبل كدا و غلبانه ووحدانيه 

ايه دا ؟ هى كانت مطلقه قبل كدا ؟؟ 

ايوا ....ازهار مش من بلدنا زى ما انتى عارفه ...بت يتيمه و غلبانه بختها مال فى جوازتها الاولانيه و لما أتقدم لها جوزها اللى معاها ده وافقت بيه و قالت اهو أخرج من الفقر اللى انا عايشه فيه و خلاص 

طب و الاكل و السجاير اللى كانت بتشتريهم دول كانت بتاخدهم لمين ؟؟ 

ازهار كان لها اخ بس واد بتاع مشاكل و كان كل كام يوم ينط لها و يطلب منها فلوس و سجاير و كانت بتجيبله عشان ميعملهاش فضيحه قدام الناس فى البلد و الناس تعرف أن لها اخ خيبان زى ده 

طب و كانت عاوزه عمى هشام فى مشوار ايه ؟؟ 

انا هقولك 

قبل ما ازهار تتقتل بيوم واحد جت لى بعد صلاة العشا و دموعها على خدها 

مالك يا ازهار معيطه و عنيكى وارمه ليه كدا ؟؟ 

مسعود اخويا يا خاله اتمسك امبارح بالليل ..لسه جايلى الخبر حالا من جماعه قرايبي

ليه كفا الله الشر ؟ اتمسك ليه ؟؟ 

شويه عيال غووه و خلوه يروح يسرق معاهم شولة غله من شونة القمح اللى فى المركز 

طب و بعدين يا بنتى ؟؟ 

مش عارفه اتصرف ازاى يا خاله ؟ جوزى لو عرف ممكن يطلقنى فيها دى و ارجع اترمى فى الشارع... مش هلاقى اللقمه اكلها 

لا حول و لا قوه الا بالله طب و هتسيبى اخوكى كدا ؟؟

ما هو ده اللى مجننى ...دا برده اخويا و مليش غيره فى الدنيا دى 

طب شوفى أما اقولك انتى تجهزى نفسك و تجهزى مبلغ كدا و تروحى تاخدى عربيه مخصوص للمركز و تشوفيلك سواق ابن حلال كدا ياخدك المشوار ده من غير ما يجيب سيره لحد و تروحى لاخوكى يا بنتى توكلى له محامى كويس يخرجه من الداهيه اللى هو فيها ده 

بس الوقت اتمسي و انتى عارفه انى لازم اكون مبيته على السواق من بدرى عشان يعمل حسابه و مقدرش اروح لحد منهم دلوقتى انتى عارفه لسان الناس مبيرحمش

 

بكرا روحى لأى سواق كويس و اتفقى معاه و بعد بكرا باذن الله تكونوا فى المركز 

حاضر يا خاله هعمل اللى قلتى عليه 

و راحت ازهار لهشام عمك و كانت عاوزه تقوله على المشوار بس بصت لقت الكل باصص عليها و خافت يسألوه بعد ما تمشي و يقولهم فطلبت منه أنه يجيلها البيت و كانت ناويه تديله فلوس بزياده عشان يحفظ سرها و يروح معاها اى مشوار بعد كدا مع اخوها لكن اسم الله عليها ملحقتش و قتلها المجرم ...و فوق كل ده الناس مش سايبنها فى حالها و عمالين يجيبوا سيرتها

 

طب ما انتى لازم تتكلمى يا خاله و تبرئيها قدام الناس اللى فاكرين أن مشيها كان بطال 

انا مقدرش أفتش سر امنتنى عليه انا قلت لك انتى بس عشان انتى حلفتيلى و كمان عشان الموضوع لطكم و كان هياخد عمك فى الرجلين 

يااااا ...ياما فى السجن مظاليم زى ما بيقولوا ...

ايوا يا بنتى الناس لها الظاهر لكن البواطن دى ميعرفهاش الا ربنا سبحانه و تعالى

و نعم بالله يا خاله 

 

امى روحت البيت و هى متعجبه و مبقاش على لسانها الا أنها تدعى لازهار بالرحمه .

يتبع ..

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض نفسه للمسائله القانونيه ..