ابو رجل مسلوخه الجزء العاشر

#ابو_رجل_مسلوخه

#الجزء_العاشر

و نزلت السلالم و ركبى بتخبط فى بعض كان جاى فى دماغى أن الجنيه هتطلع تخطفنى و تنزل بيا الميه تانى ...بس برده كنت خايف على امى ما هى الجنيه مبتاخدش الصغيرين بس زى ما سمعنا دا بتاخد رجاله و ستات كمان ...كنت بقول حتى لو تاخدنى انا بس امى لا ...امى انا بحبها و كمان عشان خاطر اخواتى الصغيرين مين هيربيهم و الله اعلم ابويا هيخرج و الا لأ 

وصلت لاخر سلمه و ببص على اللحوقى لقيت اللحوقى فاضى 😳

لا و مغسول كمان 

اخدته و طلعت جرى لامى 

امى اول ما شافته فرحت اوى و قالت كدا يبقى الجنيه قبلت المصالحه الحمد لله 

امى اخدتنى فى أيدها و روحنا البيت و كان هاين عليها تصحى اسامه من النوم عشان تقوله و تفرحه 

و الغريبه بقا أن اسامه قام الصبح كأن مفيهوش اى حاجه و بقى يلعب معانا و لا كأنه كان حاصله اللى حصل 

امى كانت فرحانه أنه بقى كويس و اتلهت فى موضوع ابويا و عمى و بقت تروح لهم المركز كل يومين توديلهم اكل و لبس نضيف 

تقرير البصمات طلع و لقوا بصمة عمى فعلا موجوده بالمكان لكن ابويا مكنش له اى بصمات 

و مع التحريات النيابه قررت أن ابويا ملوش دخل بالموضوع و اخلوا سبيله من غير ما ياخد تجديد مره تانيه 

أما عمى فالقضيه مشيت زى ما هى و كان هو المتهم الوحيد 

و بالرغم أنهم وجدوا بصمات تانيه فى المكان إلا أن مفضلش غير عمى قدامهم هو المتهم 

عمى لما لقى تقرير البصمات طلع و لقى نفسه هيلبس القضيه اعترف قدام النيابه أنه فعلا راح للقتيله الليله دى بناء على رغبتها .....

ازيك يا هشام 

الله يسلمك يا ست ازهار 

انت فاضى بكرا تودينى مشوار ؟؟ 

تحت امرك بس مشوار فين ده ؟

 عندى مشوار مهم بس مش عاوزه حد يعرف بيه .... بص انا مش هعرف اتكلم هنا و يشوفونى واقفه معاك الناس مبترحمش و كلامهم زى الرصاص 

ايوه عندك حق 

طب انت بتخلص شغلك امتى ؟؟ 

بخلص كل يوم بعد العشا و ساعات تسعه حسب الزباين 

طب كويس ابقى تعالى بعد ما تخلص شغل على الأقل تكون الرجل خفت شويه و هقولك على كل حاجه 

تحت امرك يا ست ازهار 

و رحت يا باشا ...بس لأجل بختى الوحش اتخانقت مع واحد من الموقف على تحميل دور و حرنت عن التحميل و رحت ماشي 

و انا مروح دارى افتكرت ازهار و مشوارها 

قلت أما احود عليها بالمره لانى عارف لو روحت هنام و هكسل اروح لها 

و فعلا رحت و لقيت الباب مفتوح استغربت المفروض دى واحده عايشه لوحدها و جوزها مبيجيش الا كل شهر مره ايه اللى يخليها تفتح بابها بالشكل ده 

ناديت عليها 

ست ازهار ...ست ازهار 

سمعت صوت من جوه واطى اوى بيقول تعالى ...تعالى يا اللى بره 

انا هشام يا ست 

مردتش عليا قمت بغبائى داخل 

يارب يا ستار    ....ياللى هنا 

قمت لقيتها واقعه على الأرض سايحه فى دمها و كان لسه فيها الروح 

االلحقنى ...بالله عليك 

مين اللى عمل فيكى كدا ؟؟

المجررررم .....الحقنى ارجوك 

طب اعمل ايه دلوقتى ؟؟ هشيلك و اخدك معايا فى العربيه اوديكى المركز 

مششش هلحق ...انا بنزف جامد ...سد الجرح الاول قبل ما تنقلنى 

اسده بايه بس يا ربى ؟؟

دخلت المطبخ جرى لما افتكرت أن امى الله يرحمها كانت بتسد لنا اى جرح بالبن 

دخلت دورت على علبه البن لحد ما لقتها 

طلعت علشان احط البن على جرحها 

البن يا ست ...البن اهو يا ست 

قلبت فيها شمال و يمين لقيتها ماتت و فجاه سمعت حد بينادى عليها و صوت رجلين داخله ...خفت يشوفونى جنب الجثه يفتكروا انى انا اللى قتلتها ...بصيت لقيت شباك اوضة النوم مفتوح رحت ناطط منه و هو ده كل اللى حصل يا باشا و الله العظيم 

طبعا النيابه مصدقتش عمى و القضيه مشيت أنه هو القاتل 

لحد ما يشاء السميع العليم أن القاتل الحقيقى يغلط غلطة عمره و يروح يتصرف  فى عقد دهب من المسروقات اللى اتسرقت من ازهار كان جوزها مبلغ باوصافه 

القاتل افتكر أن بعد مرور اكتر من ست شهور إن كدا الموضوع خلص و راح لصايغ فى المركز 

الصايغ شك فيه لأن عقد كبير و تقيل و عيار 24 و القاتل شكل هدومه مش غاليه

الصايغ سأله انت جايب العقد ده منين ؟؟ 

القاتل اتلجلج و قال بتاع امى الله يرحمها ورثاه عن امها 

الصايغ عرف أنه بيكدب لان الصنعه حديثه و كمان معظم الدهب إللى فى السوق عيار 21 

 طيب العقد ده هيعمل مبلغ كبير لانه ما شاء الله تقيل اوى اقعد اشرب كوبايه شاى على ما ابعت البيت اجيب لك فلوس 

 ‏

الصايغ بعت واحد من اللى شغالين معاه بسرعه لأقرب قسم و بلغهم 

و هما جم قبضوا على الراجل 

الراجل فى الاول أنكر تماما أنه هو اللى عمل كدا و كان مصمم أن ده دهب امه 

تم استدعاء جوز ازهار و اللى شاف العقد و قال ايوه العقد ده كنت شاريه من العراق و ده عيار 24 

بمواجهه القاتل و تضييق الخناق عليه تبين أنه سواق كان بيشتغل فى الموقف 

سواق من غير عربيه يشتغل يوم و يبطل عشره 

فى اليوم اللى ازهار كانت فى الموقف كان هو قاعد و كان بقاله كام يوم مشتغلش و الكل مش راضيين يركبوه على عربياتهم لانه غشيم و متسرع و كذا مره يعمل حوادث و يكسر  

سمير لقط ازهار و هى واقفه مع هشام و شاف الدهب اللى بيلعلط فى اديها 

بقى يقول لنفسه 

بقى حتة حرمه زى دى معاها الدهب دا كله ؟؟ و انا مش لاقى اكل ؟؟ اه منك يا دنيا 

سمير لما لقى ازهار خلصت كلام مع هشام و مشيت شيطانه وزه أنه يروح وراها 

و فعلا مشي وراها لحد ما وصلت بيتها 

استنى لحد ما الرجل خفت و الدنيا  ابتدت تليل و راح خبط عليها 

اول ما فتحت له الباب 

انت مين يا جدع انت ؟؟ و عاوز ايه ؟؟ 

انا عذرائيل الموت اللى جاى يخطف اجلك و يخلصك من حياتك يا حلوه 

ازهار جت تصوت راح حاطط ايده على حنكها  و دخلها على جوه 

قعدت تحاول تتخلص منه و راحت عضاه فى ايده ...راح مطلع مطوه و راح غرزها فى رقبتها 

ازهار وقعت ع الارض و راح مقلعها الدهب اللى فى اديها الاتنين و العقد اللى فى رقبتها و اخدهم و طلع جرى من الباب 

النيابه  أمرت بحبس سمير و أفرجت عن عمى و ابويا عمله ليله عزم فيها أهل البلد على فول نابت و عيش طرى و جاب الشاعر يحيى الليله

و البلد كلها كانت فرحانه و كانت ليله حلوه 

بعد الليله ما خلصت و الكل مشي لقينا الواد اسامه .......

يتبع ..

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض نفسه للمسائله القانونيه ..