#قصة_ابو_رجل_مسلوخه_كامله
انهارده هحكيلكم قصه ابو رجل مسلوخه على لسانه و ازاى الراجل ده انظلم من ناس كتير من غير ما يعرفوا حكايته الاصليه
يلا بينا ...احكيلنا يا ابو رجل مسلوخه عن حكايتك :
انا كنت راجل فلاح و كنت شاب من احسن الشباب ...الكل كان بيحلف باخلاقى و باجتهادى فى شغلى ...
حبيت بنت اسمها بهيه و كانت اسم على مسمى بهيه و هى بهيه عيون سود زى الليل ، شعر اسود طويل ، خدود زى التفاح .
كانت اجمل بنت فى بلدنا
كل شباب البلد اتقدمولها و دا خلى ابوها يطلب لها مهر غالى
مهر غالى ازاى ؟؟
ابوها كان عنده طاحونه كان وارثها عن ابوه و كانت الطاحونه دى واقفه لأن كل اللى كان يشتغل فيها كان يقول فيها عفاريت و سمعنا إن كذا واحد اتقتل فيها
الطاحونه سمعتها ساءت اوى و اتقفلت من زمن بعيد و كانت ستات البلد تروح بلد جنبنا عشان تطحن الغله و الدره اللى بيخبزوا بيها
استمر الحال ده سنين و حاول ابو بهيه يفتح الطاحونه و يشتغل فيها بنفسه بس كان يلاقي النار تولع لوحدها و تطفى لوحدها و مفيش اى ست تقدر تقرب منها
ابو بهيه راح لشيخ ..الشيخ قاله أن الطاحونه دى اول شغل لها كان بدم زفر
دم زفر ازاى يا عم الشيخ ؟
يعنى فى حد ادبح فيها
و مين اللى دبحه ؟؟ و حد مين ده ؟؟
جدك اللى دبحه
و مكنش له أهل اللى ادبح ده ؟؟
كان راجل غلبان عقله على اده
طب و جدى دبحه ليه ؟؟
عشان هما قالوله كدا ... و ان بكدا الطاحونه هتشتغل و رزقها هيزيد
طب و بعدين يا عم الشيخ ؟؟
لازم واحد قلبه جرئ يبات فيها ليله بحالها
بس كدا ؟؟ طب ما دى سهله
لا طبعا مش سهله اللى هيبات فى الطاحونه احتمال كبير ميخرجش منها مره تانيه
انت بتقول ايه يا عم الشيخ ؟؟
زى ما بقولك يا ابو بهيه
ابو بهيه مصدقش كلام الشيخ و طلب من واحد من رجالته يبات فيها ليله
تانى يوم راح فتح عليه لاقاها ميت و مبرق عنيه زى ما يكون شاف حاجه خوفته
ابو بهيه فقد الأمل فى الطاحونه و تشغيلها
و لما ابتدى الخطاب يهلوا على بنته كان شرطه الوحيد أن اللى يبات فى الطاحونه ليله بحالها و يقفل عليه بايده من بعد المغرب لحد طلوع الشمس هيجوزه بنته
شباب كتير اتقدموا بالرغم أن اهلهم كانوا مش موافقينهم لانهم عارفين حكايه الطاحونه كويس
اول جدع دخل الطاحونه و قفل عليه ابو بهيه الباب
جه تانى يوم لقاه مقتول و متخلع عنيه الاتنين
الناس لما عرفت الحكايه خافت و بقت تتكلم فى كل حته
جه شاب تانى اسمه حمزه كان طول بعرض و طلب ايد بهيه
ابوها طلب مهرها و هو أنه ينام ليله فى الطاحونه و فعلا الجدع نام
تانى يوم لقوا جثته من غير رقبه خالص
البلد كلها هاجت و اتهمت الراجل أنه بيعرض عيالها للموت عشان طاحونته
الراجل قالهم انا مضربتش حد على ايده و مقولتش لحد أنه يجى ...دا مهر بنتى و اللى قادر عليه يتقدم و هو المسؤل عن نفسه
كل ده كنت اسمع عنه و مكنش ليا اى دعوه بيه لانى مكنتش لسه شفت بهيه
بس لما شفتها عرفت ليه الشباب هيموت عليها بالطريقه دى و عرفت اد ايه تستاهل أن الواحد يموت عشانها
اول ما شفتها كأنى شفت ملاك مش بشر
حبها دخل قلبى زى ما يكون اتولدت بيه
مبقتش افكر الا فيها و ازاى افوز بيها
كل اللى حواليا قالوا لى لأ بس انا صممت و رحت لابو بهيه اطلب أيدها
ابوها قالى انت عارف المهر يا أمين ؟؟
ايوا عارفه يا عم الحج
اكيد سمعت اللى قبلك حصل لهم ايه ؟؟
ايوا عارف كل حاجه
خلاص انا كدا اتخلصت من ذنبك و انت حر
انا اعمل اى حاجه فى الدنيا عشان بهيه
خلاص بعد المغرب تكون واقف قدام باب الطاحونه و الصبح لو كان لك عمر افتح لك الباب
باذن الله
روحت البيت و كنت عايش لوحدى مقطوع من شجره زى ما بيقولوا
طلعت ملابس الإحرام بتاعة ابويا الله يرحمه اللى حج بيها بيت الله الحرام
و اغتسلت و قريت ايه الكرسي و بعض الصور من المصحف
طلبت من ربنا أنه يحفظنى علشان اتجوز بهيه و أملى عينى من جمالها و تبقى حلالى
لبست ملابس الإحرام علشان تكون كفنى فى حاله انى أقابل وجه كريم
و لبست فوقه جلابيتى و اخدت قلتى معايا علشان اشرب و اتوضا منها ...و رحت استنيت قدام الطاحونه
و لقت أهل البلد كلهم متجمعين و عمالين يزعقوا لعم حسان ابو بهيه و يقولوله حرام عليك شباب الجدع
و حاولوا يرجعونى عن اللى عاوز اعمله لأنهم طبعا عارفين انى ممكن ادخل مطلعش
بس انا قلت لهم سبونى دا اختيارى و حتى لو مت انا راضى
الناس سكتت و بقت تخبط كف على كف و تقول
لا حول ولا قوه الا بالله العلي العظيم
عم حسان فتح الطاحونه و دخلت انا و انا بسمى باسم الله العظيم .....و قفل عليا الباب الصاج
سمعت الناس و هى بتنصرف من المكان و صوتها بيبعد شويه بشويه
الدنيا جوه الطاحونه كانت كحل متشوفش ايدك منها
قلعت جلابيتى و لعت عود كبريت و دورت على مكان اللمبه وقدتها
لما قدت اللمبه اطمنت شويه ...المكان كان هادى و نضيف مفيهوش غير الماكينه اللى بتطحن الغله
فرشت جلابيتى و صليت العشا و مفيش اى حاجه غريبه حصلت و لا سمعت صوت و لا شفت حركه
حمدت الله و قلت يمكن ربنا كاتب لى نصيب فى بهيه
مسكت سبحة ابويا و قعدت اذكر ربنا لحد ما رحت فى النوم
فى نص الليل سمعت صوت ...و اللمبه اتطفت قمت قعدت بسرعه و قعدت اذكر الله
بسم الله ...اللهم لا حول و لا قوه الا بالله
الله اكبر ..الله اكبر
الجو حرارته رفعت و حسيت انى دخلت جهنم فجأه
قعدت اتشاهد على نفسي
اشهد أن لا إله إلا الله و ان محمدا رسول الله
فجأه لقيت الحيطه بتتشق و بيبان منها نور و طريق طويل اوى
حاولت اغطى عينى بجلابيتى لأن النور كان شديد و عامينى و كمان قلت فى نفسي اكيد هما جايين علشان يموتونى
فجاه حسيت بايد لمست كتفى و انا مستخبى تحت الجلابيه
و سمعت صوت ست بتقولى
انت ايه اللى جابك هنا ؟؟
انا اتخرست و معرفتش انطق
فجأه لقيت الجلابيه بتطير من فوق دماغى و لقتها واقفه قدامى
ست طويله شكلها مخيف شعرها اسود و عنيها لونها احمر و مرسومه بالطول ، لها انياب بارزه زى انياب الأسد
رد عليا انت مين و بتعمل هنا ايه ؟؟
انا أمين و و ...جاى ابات هنا ليله
ازاى تقتحم بيتى و تسمح لنفسك انك تنام فيه من غير اذنى
متأخذنيش يا ستنا انا معرفش أنه بيتك
امال فاكره بيت مين ؟؟
اللى اعرفه انه مكان الطاحونه بتاعت عم حسان
حسان مين ؟؟ المكان ده من زمان ملكى و ملك اجدادى
ازاى ؟ اللى اعرفه انه ملك ابو حسان
لا طبعا هو افتكر لما جاب واحد غلبان و دبحه هنا أننا هنسيب له المكان ؟؟
انا اسف يا ستنا مكنتش فاهم الكلام
مفيش اسف انت غلطت و لازم تدفع تمن غلطك
انا بعترف و مستعد اعمل اللى تقولى عليه
مش خايف من الموت ؟؟
هخاف من ايه ؟؟ منا داخل و عارف إن ده ممكن يحصلى
غريبه
و ايه الغريب فيها؟؟؟
بستغرب عليكم انكم ممكن تضحوا بحياتكم عشان سراب
لا مش سراب ..القلب لما بيحكم مفيش حد يقدر يخالفه
انت عاشق بقا ؟؟؟
ايوه يا ستنا ...عشقتها اول ما عينى وقعت عليها و مستعد أضحى بعمرى كله فى سبيل نظره من عينيها
هههههههههه انت ساذج اوى
ليه بتقولى كدا ؟؟
مفيش حد يستاهل الحب دا كله
لا فيه ...بهيه حبيبتى
تصدق عجبتنى !!! طب انا هقدم لك عرض ممكن تنقذ بيه حياتك و تتجوز حبيبتك
انا موافق عليه من قبل ما تنطقيه
مش لما تعرف ايه هو العرض الاول
اى شئ انا مستعد اعمله علشان اتجوز بهيه
عرضى ليك هو انك تتجوزنى و بكدا يتحل الاشكال ...هتبقى زوجى و تقدر تدى لحسان الاذن بالمكان
بس انا مقدرش اتجوز الا بهيه
لو مقبلتش عرضى لا هتتجوز بهيه و لا غيرها ...متبقاش غبى يا أمين
طب ممكن أسألك سؤال
اتفضل
انتى كنتى بتعرضى العرض ده على اللى قبلى ؟؟
لا طبعا ...اللى قبلك مكنوش بيلحقوا ينطقوا من أصله ...هما تعدوا على المكان و فى عرفنا اللى يتعدى على مكاننا محلل لنا نعمل فيه اى حاجه
طب منا عملت زيهم ...ليه مموتنيش قبل ما اتكلم
انا كنت بالفعل جايه اموتك بس شكلك عجبنى و استغربت من ملابسك
انا لابس كفنى علشان لو مت يدفنونى بيه
قلبك جامد يا أمين و دا اللى عجبنى فيك ....انت حتى مخفتش من شكلى
و اخاف من ايه ؟؟ انتوا خلق من خلق الله
عظيم ...عظيم مدام كدا ...قلت ايه فى العرض اللى عرضته عليك ؟؟؟
موافق بس لازم تعرفى أن قلبى هيفضل معاها
انا ميهمنيش حكايه القلب دى خالص المهم انك قبلت عرضى و هتتجوزنى قبل بهيه
قبل بهيه ازاى ؟؟
الليله يا أمين لازم تكون دخلتك عليا
بس انا ...
انت ايه ؟؟؟ رجعت فى كلامك و الا ايه ؟؟
لا ابدا مرجعتش بس مكنتش فاكر الحكايه بالسرعه دى
كل حاجه عندنا فى لمح البصر يلا بينا علشان نتمم مراسم الزواج
و دخلت معاها فى طريقها اللى اتفتح فى الحيط ...
فى الاول كان الطريق عباره عن نور بعدها بقا ضباب متشوفش منه اى شئ ....بعد كدا ظهر قدامى قصر عظيم
واقف قدامه صفين من الخدم و الجوارى اللى كانوا موطيين راسهم تحيه لملكتهم زاد الميعاد
بقيت اتفرج على اللى حواليا و انا متعجب
ايه اللى انا شايفه ده ؟؟ انا بحلم و الا ايه ؟؟ فين العالم ده موجود ؟؟
زاد الميعاد زى ما يكون عرفت اللى فى دماغى لقيتها بتبص لى و تقولى
انت فى مكان بعيد اوى عن بلدك يا أمين ...بس متقلقش هرجعك مكانك قبل الشمس ما تطلع للوجود
هزيت لها راسي و انا حاسس انى مش فاهم اى حاجه
زاد الميعاد ابتسمت و شاورت لى انى ادخل القصر
اول ما دخلت القصر لقيت
اول ما دخلت القصر لقيت قصر فخم جدا مفروش فرش عمرى ما شفته فى حياتى
ايشي سجاد و اشى نجف و ستاير
اول ما تدخل تلاقى نافوره ضخمه شكلها عجيب و بتطلع منها الميه من كذا اتجاه و بألوان مختلفه
بلاط القصر نفسه عمرى ما شفت زيه ، ألوانه زاهيه و حلوه اوى
السقف مزخرف و عليه نقوش دهبيه شكلها عجيب
الكراسي بتاعته قطيفه و ناعمه نعومه مشوفتهاش
بقيت ابص حواليا و خايف حاجه من الجمال ده يروح منى ، كنت عاوز الاحظ كل اللى موجود و أمتع عينى بيه
زاد الميعاد دخلت قاعه كبيره جدا و كنت ماشي وراها كأنى مسلوب الاراده
على الجانبين كان واقفين ناس شكلهم غريب اوى و ملابسهم عجيبه
فى نهايه القاعه كان فى كرسي مرتفع زى ما يكون عرش قعدت عليه زاد و نادت على أحد الحراس ينادى لها عاقد العقد
بعد ثوانى لقيت واحد و معاه دفتر كبير جدا حضر فى الحال
عاقد العقد كتب العقد و خلانى بصمت عليه باديا الاتنين من غير ما اعرف مكتوب فيه ايه
انا كان كل اللى هاممنى انى اخلص و اخرج من اللى انا فيه ده
المراسم خلصت فى وسط مباركات من كل الموجودين الا واحده ست كبيره كانت ملازمه زاد وواقفه جنبها و كان شكلها بشع
الست دى كانت بتبص لى بغيظ شديد كأن بينى و بينها طار
بس انا لا اخدت و لا وديت و خصوصا انى مشفتهاش بعد كدا فى الأيام اللى قضتها مع زاد... و لا حتى جه فى بالى اسأل مين دى و بتبص لى كدا ليه ؟
طلعت انا و زاد الميعاد على اوضه واسعه عظيمه و فرشها من الحرير و مراتبها مشفتش فى نعومتها و ليونتها
زاد شاورت لى على حمام ادخله و اغير الكفن اللى كنت لابسه
و بالفعل دخلت وانا بكلم نفسي و بقول لروحى انا اكيد بحلم مش ممكن يكون دا كله حقيقه
بعد شويه خرجت لقيتها قاعده مديانى ضهرها بس ريحة عطرها مشمتهاش قبل كدا و لبسها فى منتهى الجمال
اول ما قربت من السرير لقيت واحده تانيه غير الشكل اللى شفتها بيه
لقيت واحده صبيه جميله اوى حسنها مفيش زيه
استغربت و بقيت أتلفت حواليا
انتى مين ؟؟
ضحكت ضحكه كلها دلع و قالت لى
انا زاد ...زاد الميعاد
زاد ازاى ؟؟؟ انتى ..شكلك اتغير ليه ؟؟
انا اقدر اتمثل فى اى شكل تحبه ...ايه عجبتك ؟؟
انتى حلوه اوى
يعنى احلى من بهيه ؟؟
انا قلت لك يا زاد قبل كدا
خلاص خلاص خلينا فى اللى احنا فيه ..انت من الآن زوجى و ليا حق عليك
اه ..ايوه
حسب قوانينا اللى انت مضيت عليها انت زوجى و ليا الحق فيك وقت ما اشاء
بس انا مقرتش اى قوانين
عارفه انك مبتعرفش تقرا بس دى مش مشكلتى...المهم انك تعرف أن لك زوجه و هيكون لك اولاد و لهم حقوق عليك
اولاد ؟؟؟
ايوه امال فاكر ايه ؟ يلا تعالى مش هنضيع الليله فى كلام فارغ
و اتجوزت زاد و بالرغم أن صورتها كانت ساحره بالنسبالى إلا أن قلبى مكنش مرتاح ابدا و كنت حاسس ان هتقابلنى مشاكل ربنا اعلم بيها
تانى يوم زاد قدمت لى الطعام و كان طعام عمرى ما شفته .. سفره عامره بما لذ و طاب من أنواع الطعام
مبسوط يا أمين ؟؟
الحمد لله ...هو انا هرجع الطاحونه امتى ؟؟
زهقت منى ؟؟
لا ابدا بس عاوز لما عم الحج حسان يفتح يلاقينى
متخافش زى ما قلت لك هتكون هناك فى الميعاد ..بس لازم تعرف أن الوقت عندنا بيختلف عن الوقت عندكم
هزيت راسي و سكت منا مفيش فى ايدى حيله و لازم استنى لحد ما هى ترجعنى للمكان لانى لا أعرف اروح و لا اجى
قعدت معاها تلات ايام و كنت قلقان و هى كانت ملاحظه قلقى و بتضحك عليا
فى نهايه اليوم التالت اخدتنى زاد ورجعتنى على الطاحونه بعد ما انشق الجدار مره تانيه و قالت لى
كمان شويه هيجى حسان و انت بقا معاك أمر بالمكان ....يقدر يشغل الطاحونه
تمام متشكر يا زاد
خلى بالك لقائنا هنا هيكون كل خميس تجيلى بعد العشاء و ده هيكون سر ما بينا محدش يعرف عنه حاجه و لا بهية نفسها
ان شاء الله
لو مجتش مش محتاجه اقولك انا هعمل ايه
لا ربنا يسترها هاجى ان شاء الله
مع السلامه يا زوجى
مع السلامه يا زاد
بعد دقيقه لقيت الباب اتفتح و لقيت البلد كلها واقفه تتفرج و كلهم كانوا متوقعين أنهم يلاقونى ميت زى اللى قبلى
بس الكل اتفاجئ بيا و بقوا يهللوا و يكبروا و شلونى فوق راسهم و لفوا بيا البلد
عم حسان مكنش مصدق عنيه ..بقى فرحان اوى لأن مشكلته اخيرا اتحلت
لما وصلنا لبيته و الناس انصرفت قالى
انا عاوز اعرف انت خرجت ازاى ؟؟ و ازاى مقتلوكش زى اللى قبلك ؟؟
انا خرجت بقدره ربنا
و نعم بالله يا ابنى ...طب احكيلى ايه حصلك من اول ما قفلت عليك الباب
لا سامحنى يا عم الحج مقدرش احكى اى شئ بس علشان تقدر تحافظ على طاحونتك مفتوحه لازم كل خميس اروح ابات فيها
و انت هتعمل كدا فعلا ؟؟
دا مش اختيار ..لو مروحتش الله اعلم ايه ممكن يحصل
خلاص يا ابنى زى ما تحب
هتعقد لى على بهيه امتى ؟؟
ان شاء الله الخميس الجاى
منا لسه قايلك يا عم الحج أن الخميس مينفعش
اه صحيح متأخذنيش يا ابنى ...خلاص الجمعه يناسبك ؟؟
ايوه يناسبنى اوى
الف مبروك يا ابنى
الله يبارك فيك يا عمى
انت من هنا و رايح هتبقى ابنى مش زوج بنتى و عاوزك تيجى تشتغل معايا و تشغلى الطاحونه
من عنيا يا عمى
و بالفعل اتجوزت بهيه و كان اسعد يوم فى حياتى كلها اخيرا اتلميت على حبيبه قلبى ...دعوتى لربنا ...كل امنيتى
عشت معاها سنين و سنين و خلفت منها البنات و البنين
و كانت هى عارفه أن الخميس مش بتاعها و عمرها ما سألتنى سبب غيابى عن البيت
اما زاد فكانت برده زوجتى و كانت بتتفنن انها تفوز بقلبى زى بهيه و كانت كل مره تتمثل فى صوره مختلفه اجمل من المره اللى قبلها ..و خلفت منها عشرين ولد و بنت
و كنت فاكر أن الحياه استقامت و مش هقابل اى مشاكل لكن دوام الحال من المحال ....
زاد كانت دايما بتغير من بهيه لكن أنا دايما كنت بقولها انا مغشتكيش و انتى عارفه حكايتى من الاول و عارفه حبى لبهيه من قبل ما اعرفك
كانت تتنرفز شويه و ترجع تروق مره تانيه و ساعات كانت تعمل بعض الحاجات اللى تضايق بهيه
بس انا كنت فى كل مره بعرف أوقفها عند حدها لأنها كانت بتحبنى و مبتقدرش تكسر لى أمر
فى يوم خميس رحت زى عادتى لزاد
اليوم ده زاد مكنتش على بعضها زى ما يكون فى حاجه شاغله مخها
فى ايه ؟ مالك يا زاد ؟؟
مفيش يا أمين ...عاوزه أسألك سؤال
اتفضلى
انت بتحبنى ؟؟
طبعا بحبك انتى ام اولادى
بتحبنى زى بهيه ؟؟
تانى يا زاد ؟؟
يعنى كل السنين دى مخلتكش تحبنى ؟؟ طب ليه ؟
القلب مش بادينا يا زاد و مع ذلك انا بحبك برده
انا عاوزاك ليا لوحدى يا أمين
لا يا زاد دا مش اتفاقنا
يا ادى الاتفاق اللى ماسك فيه ؟؟ انا ليا حقوق عليك ...ليه مش عاوز تفهمنى ؟؟
و انا بديلك حقوقك و مش مقصر معاكى يا زاد
لا مقصر معايا و مع اولادى ...انت بتيجى هنا يوم و تقعد مع مراتك التانيه ست ايام
هرجع و اقولك أن ده اتفاقنا من الاول و بقالنا سنين ماشيين عليه ايه اللى جد انهارده ؟؟
لورين عندها حق فى كل اللى قالته
لورين ؟؟ لورين مين ؟؟
بنت خالتى ...جت لى انهارده زياره و معجبهاش حالى ...بكتنى على روحى و قالت لى بقى الملكه زاد يبقى ده حالها ؟؟ و فعلا عندها حق
متخربيش على نفسك يا زاد و متسمعيش كلام من اى حد
اخرب على نفسي ازاى ؟؟ انت بتقول ايه ؟؟
اللى سمعتيه ...انتى مراتى من سنين و دا اتفاق ماشيين عليه ، لا انا خالفته و لا انتى خالفتيه
سكتت زاد و هى مش عاجبها الكلام ، وانا عشان اغير الموضوع قلت لها
فين الطعام ؟؟
ثوانى و هيكون جاهز بس عاوزه اقولك أن معانا ضيفه على الاكل
ضيفه مين ؟
منا لسه قايلالك لورين
اه نسيت ...تنور طبعا لورين
السفره جهزت و لقيت زاد بتقولى اتفضل
رحت اقعد على الكرسي لقيتها قاعده فى وشي ...نفس الست اللى شفتها فى الفرح ..الوجه القبيح ...لونها الاسود اللى ميختلفش عن اللى جواها .. و عندها قرون خارجه من راسها
ونفس البصات الوحشه اللى كانت بتبصها
مش عارف لما شفتها قلبى اتقبض و حسيت أن حاجه مش كويسه هتحصل .
احساسي بيقولى انها بتكرهنى و بتتمنى لى الشر... لكن كدبت احساسي و قلت لنفسي اكيد بيتهيالى و هى ليه هتكرهنى ؟؟
رحبت بيها رغم اللى شايفه فى عينيها
بصت لى بصه شر و هى بتمضغ الاكل و قالت لى
اهلا بيك
الليله عدت و روحت بيتى بعد ما راضيت زاد و مشيت من عندها و هى مش زعلانه ونسيت لورين و خناقه زاد
مرت الايام و جه يوم الخميس اللى المفروض أنه يوم زاد و طبعا بهيه عارفه النظام
فجأه لقيت سميه بنتى جايه بتصرخ الحق يا أبا امى وقعت من فوق السطوح
سبت الطاحونه و جريت لقيت الاسعاف جت تاخد بهيه اللى كان الدم مغطيها و عماله تصرخ بطريقه هستريه
ركبت معاها العربيه و رحنا المستشفى و هناك عرفت أن بهيه حالتها خطيره و أن فى اكتر من كسر فى جسمها و أنهم شاكين كمان أن عندها نزيف داخلى
قعدت على الأرض قدام العنايه المركزه و انا بعيط
لما الليل دخل ... المستشفى طلبت من الكل انه يروح
بس اروح ازاى و اسيب روحى ؟؟
امشي ازاى و انا معرفش بهيه هيحصل لها ايه ؟؟ مش ممكن اروح
طلعونى بره المستشفى و قعدت على الرصيف اللى قدامها و العين بتسقى العين و شريط حياتى معاها بيمر قدام عينى و مش قادر أتخيل حياتى من دونها
فجأه لقيت زاد ظهرت قدامى واترسم على وشها الغضب الشديد
انت مجتش ليه ؟؟
انتى معرفتيش اللى حصل مع بهيه ؟؟
مليش فيه ؟؟ دا يومى و حقى
انتى ايه ما بتحسي ؟؟ بقولك الست جوه بين الحيا و الموت
و انا بقولك قوم معايا يا أمين ...انت كدا بتخالف القوانين
يحرق كل القوانين ...انتى ايه يا شيخه مفيش عندك تقدير ؟؟
كمان بتهينى ؟؟؟ حسابك معايا هيكون عسير
ابعدى عنى انا مش ناقصك
اختفت زاد وانا بقول لنفسي اكيد زعلانه شويه و هتروق هى بتحبنى و اكيد بتقول اى كلام و خلاص ...المهم اشوف بهيه و ايه اللى حصل فيها
الفجر اذن و لقيت ممرضه طالعه من المستشفى بتتلفت شمال و يمين
امين أمين
ايوه انا هنا ..فى حاجه ؟؟
مراتك فاقت و عاوزاك
يا ما انت كريم يا رب ...هى حلوه
ايوه كويسه يلا بسرعه يا أمين انا جايه اناديك من غير ما حد ياخد باله ..انت عارف إن ده ممنوع
عارف عارف كتر الف خيرك
و طلعت جرى لبهيه لقيتها فى حاله وحشه اوى مكنتش قادر امنع دموعى و انا واقف جنبها و ماسك أيدها اللى كلها جروح ..ووشها اللى كان زى طبق البنور بقا كله جروح و كدمات
أمين
ايوا يا بهيه ..انا أمين انا هنا جنبك يا حبيبتى
انا هموت يا أمين
لا ...بعد الشر عنك ..انتى هتعيشي و هنربى عيالنا سوا باذن الله
لا انا شفت امى جايه تاخدنى و عاوزه أوصيك على عيالنا ...خلى بالك منهم يا أمين ...امشي يا أمين خد عيالنا و امشي من البيت
امشي ؟ ليه بتقولى كدا؟؟
فى حد عاوز يأذينا
حد مين دا ؟؟
واحده ست شكلها وحش اوى و زى ما يكون لها قرنين هى اللى زقتنى من فوق السطوح و انا بلم الغسيل و بقت تضحك و تقول ...و لسه هتشوفى انتى و جوزك و عيالك ..امشي يا أمين ...اهرب
انتى بتقولى ايه يا بهيه ؟؟
خلى بالك من العيال يا اأأ ...ميييين
بهيه بهيه
بهيه ماتت ...لا اتقتلت ...قتلتها لورين المجرمه ... هى اللى عندها قرنين
ضهرى اتقطم و روحى اتسحبت مع موت بهيه ... وقعت فى الارض زى ما يكون مخى اتشل ...طب اعمل ايه دلوقتى ؟؟ كدا هى ناويه على الشر و مش هتجيبها لبر
يا خبر ...ولادى انا سايبهم لوحدهم
جريت على الدار و اول ما وصلت لقيت الدخان طالع للسما و النار خارجه من كل حته 😳 .....
محستش بنفسي إلا و انا برمى نفسي فى النار علشان الحق عيالى
النار كانت بتشعلل بشكل غريب زى ما يكون بنزين مدلوق فى كل مكان
دخلت جرى على اوض ولادى بس مقدرتش ادخلها لأنها بالفعل كانت كتله نار و لمحتها فى وسط النار بتضحك و تقهقه بصوت عالى
انتى عاوزه منى ايه ؟؟ و ليه بتأذينى كدا ؟
ههههههههه و لسه ياما هتشوف منى
دى كانت اخر كلمه سمعتها منها قبل ما يحصلى اختناق و اقع فى وسط الحريق
و للاسف ملحقتش حد من ولادى
و اتحرقت حروق شديده جدا و نقلونى المستشفى بين الحيا و الموت
كنت سامع الدكتور بيقول أن رجليا اتحرقت حرق شديد و لا يمكن هقدر ادوس عليها مره تانيه و سمعته بيقول لواحد جارى أن حالتى خطيره و لو نجيت منها هتبقى معجزه
بس انا كنت بتمنى جوه نفسي انى اموت و ارتاح و احصل حبيبة قلبى مراتى بهيه و عيالى اللى كانوا كل دنيتى
الم الحرق كان شديد حاجه متتوصفش بس مش اد الحرق اللى فى قلبى و حاسس بيه
قعدت اسبوع بطلع فى الروح و بقيت كل ما افوق اتشاهد على نفسي
فجأه ظهرت زاد الميعاد ...
انتى ايه اللى جابك هنا ؟؟
دى مقابله تقابل بيها مراتك ؟؟ المفروض انا اللى زعلانه منك و بالرغم من كدا انا جيت اشوفك
جيتى تشوفينى بعد ما دمرتينى
انا ؟؟؟ ليه انا عملت ايه ؟؟
قريبتك قتلت مراتى وولعت فى عيالى و هى السبب فى كل اللى انا فيه ده دلوقتى
انت بتقول ايه ؟؟ قريبتى مين ؟؟
قريبتك لورين ...
و لورين تعمل كدا ليه ؟؟
روحى اسأليها ..انتى جايه تسألينى انا ؟
هروح يا أمين و لو تبين صدق كلامك هيبقى ليا معاها حساب عسير
و راحت زاد للورين تسألها
انتى يا لورين اللى قتلتى بهيه و اولاد أمين ؟؟
مين اللى قالك كدا ؟؟ هو طبعا
اتكلمى يا لورين ...انتى عارفه عقوبه الكدب عليا ايه ؟؟
ايوه انا اللى عملت كدا ...
انتى ازاى تعملى كدا ؟
علشان خاطرك ...عشان يبقى ليكى لوحدك
مين اذنك ؟؟
دا جزاتى انى خايفه على مصلحتك ؟؟
انتى دمرتينى و زوجى على وشك الموت
و ماله لما يموت .منا كمان زوجى مات
قولى كدا بقا ...انتى بتحقدى عليا
انا ؟؟؟ و هحقد عليكى ليه ؟؟
طول عمرك مبتحبنيش و عمرك ما اتمنيتى ليا الخير و لما جتيلى بعد مقتل زوجك و انتى منكسره افتكرتك رجعتى تايبه ...بس اقول ايه ؟ اللى فيه طبع مبيسلهوش
ايوه بحقد عليكى ...طول عمرك احسن منى وامك احسن من امى
ليه امك تتجوز ملك من ملوك الجن و انا امى تتجوز واحد عادى ؟؟؟
ليه تتولدى ملكه و انا اتولد من العامه ؟؟
ليه يكون لكى زوج اختارتيه بنفسك و انا زوجى يتقتل و هو فى عز شبابه ؟؟
اعوذ بالله على غلك ....انتى أحقر واحده شفتها فى حياتى ....انتى لازم تاخدى عقابك على اللى عملتيه ده
متقدريش تعمليلى اى شئ انتى نسيتى انك مديانى خاتم الحمايه ؟؟
ادتهولك لانى كنت خايفه عليكى من اللى قتلوا زوجك بس انتى متستاهليش
يا ماااريه
امر مولاتى
انزعى عنها خاتم الحمايه
امرك مولاتى
يا ارطفيل ...يا راعيل ...يا افاعيل خدوها و انفوها فى جبل الاحزان
لا جبل الاحزان لا ...ارجوكى يا زاد الميعاد
يلا يا ارطفيل ...مش عاوزه تاخدكم بيها رأفه و لا رحمه
امر مولاتى
و انتى يا ماريه ناديلى الحكيم كوهال
امرك مولاتى
زاد لما اتأكدت أن كلامى صحيح بقت محتاره و مش عاوزه تفقدنى و عشان كدا نادت الحكيم كوهال اللى حضر فى الحال
الحكيم كوهال يا مولاتى
خليه يدخل بسرعه
السلام و التحيه للملكه زاد الميعاد
و عليكم السلام كوهال اتفضل اقعد
تحت امرك يا مولاتى
زوجى يا حكيم بين الحيا و الموت و عاوزه أنقذه بأى طريقه
الحياه و الموت من أمر الله يا زاد و مفيش
حد يقدر عليهم إلا رب العباد
و نعم بالله بس اكيد فى طريقه اخليه معانا بيها ...انا محتجاله انا و عياله
مفيش غير اننا نقدر نحتفظ بروحه بينا
و ازاى نعمل كدا ؟؟
بتعويذه الحكيم الأكبر كياتا
انت تعرفها التعويذه دى يا كوهال ؟؟
اعرفها يا مولاتى
طيب ايه المطلوب ؟؟
مطلوب انى احضر وقت وفاته و سيبي الباقى عليا
طب يلا بينا هنروح له انا سايباه فى حاله وحشه اوى ربنا يستر و ميكنش مات
و فعلا جت زاد الميعاد و معاها الحكيم كوهال وقفوا جنبى و انا بلفظ انفاسي الاخيره و كانت اخر حاجه سمعتها من زاد و انا حى :
انا مكنتش اعرف ان لورين هى السبب فى كل اللى حصل بس انا خلاص جبت لك حقك انت و بهيه و اولادك و نفتها لجبل الاحزان اللى لا فيه انس و لا جان ..اللى بيدخله بيتمنى الموت و ميلاقيهوش
اما انت يا حبيبي فهتكون معايا على طول حتى لو مش بجسدك هتكون بروحك
سمعت زاد و قفلت عنيا و حسيت أن روحى بتتسحب من رجليا حته بحته
الدنيا حواليا منوره
انا بتألم اه بس مش زى ما كنت متخيل
الموت مطلعش وحش زى ما كنت فاكر
روحى قربت على حلقى
خلاص خرجت
روحى خفيفه اوى و طايره ....الله انا شايف جسمى نايم على السرير
اخيرا حاسس انى خفيف زى الريشه انا طاير فى طريق منور ....الله ...الموت حلو
اللى عند ربنا اكيد حلو ..احلى من الدنيا ديا
و فجأه و انا فى الملكوت ده لقيت زى ما يكون حاجه خطفت روحى و شدتها للأرض مره تانيه
حسيت بالتقل بعد الخفه و الألم بعد الفرح
و لقيت نفسي قاعد فى قصر زاد
ايه دا ؟؟ انا رجعت للدنيا و الا ايه ؟؟ و ايه اللى جابنى هنا ؟؟
متخافش يا أمين انا اللى جبتك هنا و الحكيم بيصلح الحروق اللى فى جسمك
و جيت هنا ازاى ؟؟ انا مت و كان خلاص بينى و بين الجنه خطوه
انا اللى جبتك يا حبيبي ...الحكيم كوهال عمل تعويذه و رجعك ليا
و مين قالك تعملى كدا ؟؟
اوعى متلمسنيش انت كمان ....رجعنى تانى انا مش عاوز اعيش
مش ممكن الكلام ده ...خلاص التعويذه اتعملت و مقدرش ارجع فيها
و انا مش قاعد لك فيها يا زاد
طب استنى يا أمين
لا مستناش
و مشيت هايم على وشي و لا عارف اروح فين و لا اجى منين
وشى محروق و رجليا مسلوخه
سمعت صوت بنت بتبكى زى صوت سميه بنتى جريت عليه من غير شعور منى
البنت اتسرعت و صرخت وأمها دخلت و لقتنى افتكرتنى جاي اخوف بنتها
قعدت تصرخ و تقول ابو رجل مسلوخه جاى ياكل بنتى ...ابو رجل مسلوخه جاى يموتها
و من يومها الناس كلها نسيت انى أمين و عرفونى باسم ابورجل مسلوخه و بقوا يخوفوا العيال الصغيره منى و يقولولهم لو منمتوش هنجيب لكم ابو رجل مسلوخه
و دى كانت الحكايه للى يحب يعرفها
تمت
ارجو أن تكون القصه عجبتكم و لو عجبتكم ارجو الدعاء لوالدى بالرحمه و المغفره و سائر موتى المسلمين
#د.جيهان_عادل
أزال المؤلف هذا التعليق.
ردحذفأزال المؤلف هذا التعليق.
حذف