#ابو_رجل_مسلوخه
#الجزء_الثانى_والعشرون_والاخير
امك جت هناك اهى و معاها الجدى الابيض
انا مش عاوز ادخل للراجل ده يا سعد
يا عم متخافش ...يلا يلا امك بتشاورلنا
جايين يا اما ....
دخلنا لعم الشيخ بهلول انا و اسامه و امى و الجدى
اول ما شافنى قال لامى
ابنك سعد ؟؟
ايوا يا مولانا
هيحتاج هو كمان يترقى لانه شاف زى اخوه
بس هو مبيشتكيش من حاجه
انتى هتعرفى احسن منى ؟؟
لا حاشا لله
طيب بطلى كلام كتير و هاتى الجدى دا هنا
حاضر اتفضل اهو
جبتى الجلابيه ؟؟
ايوا يا شيخ
لبسيها له
حاضر
يا عمران ...هات الرجاله و تعالوا
الشيخ بدأ يقول كلام مش مفهوم و يحط بخور فى المنقد اللى قصاده و الدخان عبى المكان
يلا يا عمران اربطوا الولد ده ربطه شديده
اسامه بقا يصرخ و الرجاله بيربطوا اديه و رجليه فى عمود حديد كبير متثبت بالاسمنت فى وسط الاوضه
متخليهومش يربطونى يا اما ...خدينى من اديهم يا اما .....الحقنى يا سعد ...الحقنى
قلبى كان بيتقطع على اخويا بس نعمل ايه الشيخ قال إن ده العلاج
الشيخ قال للرجاله اللى معاه قربوا الجدى و خلوه قدام الواد
الشيخ قرب بسكينه كبيره جدا نصلها بيلمع و دبح الجدى مره واحده من غير ما يسمى
السكينه غرقت دم و الجدى بقا يتنطط و هو مربوط زى اسامه بالظبط
الرجاله اللى معاه بقوا يجيبوا الدم اللى مغرق الأرض و يحطوه على وش اسامه و جسمه كله و اسامه مش مبطل صريخ
انا و امى قعدنا نعيط على منظر اسامه
قام الشيخ شاخط فينا
لو مش قادرين تتحملوا المنظر اطلعوا بره
امى طبطبت على كتفى و قالت لى اسكت يا سعد
فجأه سمعنا صوت منعرفش جاى منين صوت عامل زى صوت الغاره أو زئير الأسد
انا و امى كنا خايفين و لاقينا الشيخ بيقول
اخرج من جسمه احسن لك ...أخرج لعنه الله عليك ...أخرج لاقتلك
كل ده و اسامه بيصرخ و يقول فكونى فكونى
و فجأه صوته اتغير و بقا زى ما يكون صوت راجل تخين ووحش جدا
انا هوريك يا شيخ النكد و الهم ....فكنى لاولع لك فى المكان
و لا تقدر تعمل حاجه يا عدو الله
متتحدنيش يا بهلول
لا انا بتحداك وورينى هتعمل ايه ؟ أخرج من جسمه احسن لك
اسامه لقيناه رفع ايده و قطع الحبل اللى كان مربوط بيه بسهوله زى ما يكون مربوط بفتله ولقيناه بيقول بنفس الصوت التخين
هو وقع على ابنى موته و عمرى ما هسيبه الا اما احرق قلب امه عليه زى ما حرق قلبى
الشيخ صرخ ...امسكوه يا عمران كويس
الخمس رجاله اللى كانوا ماسكين اسامه مكنوش قادرين عليه
الشيخ جاب السكينه المليانه دم و بدأ يلوح قدام عين اسامه
اسامه بدأ يخاف و يتراجع
و هوب لقينا الشيخ بيشاور للرجاله اللى معاه يجيبوا عصى و يبدأ الضرب فى اسامه
الصوت التخين اللى كان بينطق بيه اسامه كان عمال يصرخ ..يصرخ
و انا كمان كنت عمال اصرخ بس صوتى جنب صوته مش باين
و فجأه كل شي انتهى
اسامه وقع على الأرض و الصوت بطل
امى جت تجرى عليه الشيخ صرخ فيها
ارجعى ليطلع منه يلبسك انتى
ابنى جراله ايه ؟؟
ابنك مجرلوش حاجه ...هو اصلا محسش بالضرب دا كله ...الضرب كله على اللى كان جواه
امال مبيتحركش ليه ؟؟
هو بيرتاح بعد طلوع المارد من جواه
طيب الحمد لله ...و هيفوق امتى يا شيخ ؟؟
بكرا الصبح هيبقى زى الفل
يا رب يا شيخ
فين فلوس الرجاله دول ؟
اهم
ايه دول ؟؟
معلش يا شيخ اصل الفلوس قصرت معايا شويه عشان الجدى اللى مات
انتى هتحكيلى قصه حياتك ؟؟ على العموم لما تجيلى بابنك التانى يوم الجمعه الجايه ابقى هاتى باقى الفلوس معاكى
حاضر يا عم الشيخ
يلا شيلى ابنك كدا زى ما هو و نيميه فى فرشته و سبيه لبكرا الصبح
حاضر بس همشي بيه كدا بالدم ده ؟؟
امال عاوزه تشيلى الدم علشان المارد يرجعله ؟؟ ابنك جسمه لسه مفتح و ممكن جدا المارد يرجع له مره تانيه
لا خلاص مش هقلعوا هدومه
طيب خلاص تعالى يا عمران لفه بالملايه دى متخليش باين منه إلا دماغه و شيله انت بنفسك ووصله لحد دارهم بعريتى
كتر خيرك يا شيخ...هو فى زيك ؟ بالله ما فى زيك
و طلعنا من عند الشيخ و احنا فرحانين أن اسامه اخيرا هيخف و كنا مستغربين أنه يخلى حد من اللى بيشتغلوا معاه يوصلنا
و امى فضلت طول السكه تدعيله
رجعنا البيت و ابويا اول ما شاف اسامه اتخض من منظر الدم اللى مغرق وشه
عملتوا ايه فى الواد يا نرجس ؟؟
ايش فهمك انت يا عبدالحميد ...دا علاج الشيخ
شيخ ؟؟ و الا ما انتى نافعه... الواد نايم مبينطقش ليه يا نرجس ؟؟؟
نايم يا عبدالحميد بعد ما الشيخ خرج منه المارد .......بكرا الواد هيكون زى الفل زى ما قال الشيخ
خليكى ماشيه ورا النصاب بتاعك ده لما نشوف اخرتها
اسكت انت لا منك و لا كفاية شرك
فى الليله دى مكنتش عارف انام من اللى شفته قدام عينى و الصوت اللى سمعته و الضرب اللى اخويا اضربه
تانى يوم امى راحت تصحى اسامه
قوم يا اسامه يلا عشان احميك و البسك الجلابيه الجديده اللى اشترتهالك من السوق ...قوم يا ولا يلا
اسامه اسامه
مبتردش ليه ؟؟؟ اسامه اسامه
لا انت مموتش ...لا ...ااحنا كنا بنعالجك
ماله يا اما ؟؟
ملوش يا سعد اسامه ممتش اسامه ممتش
امى جالها حاله غريبه و بقت تصرخ و تلطم ....الشارع كله اتلم على صويتها و هى ماسكه اسامه و عماله ترج فيه و عاوزاه يصحى
بس اسامه مصحيش تانى اسامه مات
الموضوع دخل فى تحقيق و نيابه و تشريح و تبين أنه مات نتيجه الضرب و أنه حصله كسور فى الجمجمه و كسور فى العمود الفقري أدت للوفاه
الشيخ بهلول اتحبس هو و اللى معاه بتهمه الدجل و القتل
امى حزنت على اسامه و جالها صدمه و مبقتش تنطق لحد ما حصلته بعدها بشهر
اما ابويا ...فموت اسامه كسر ضهره و بقى ماشي زى التايه فى البلد
و انا شلت الهم بدرى باخواتى البنات و بقيت مسؤل عنهم فى كل حاجه لحد ما جوزتهم و اتطمنت عليهم فى بيوتهم
دى حكايتى ...حكايه من حكايات كتير حصلت و بتحصل كل يوم
دايما يجى فى دماغى حكايه موت الجدى الاولانى و اقول فى نفسي يمكن دى كانت اشاره من ربنا أن امى متكملش و هى مأخدتش بالها منها
بس ارجع اقول لكل اجل كتاب و هى دى ساعته اللى ربنا كاتبهاله
و الحمد لله على كل حال
عاوز اقول لكل واحد بيروح لدجال اتقى الله فى نفسك و فى فلوسك و فى أهل دارك و ألجأ لربك هو الوحيد اللى هينجيك من اللى انت فيه ، و ابعد عن اى حد يطلب طلبات غريبه او يقولك اسمك و اسم امك دول ناس دجاله و مبيجيش من وراهم الا الشر .
تمت.
ارجو أن القصه تنال اعجابكم ، و اذا عجبتكم القصه ارجو الدعاء لوالدى بالرحمه والمغفره و سائر موتى المسلمين .
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض نفسه للمسائله القانونيه ..
تعليقات
إرسال تعليق