#ابو_رجل_مسلوخه
#الجزء_السادس
ابويا جرى و انا جريت وراه ووقفت اراقبه من بعيد و هو بيسال الناس
حصل ايه يا اولااا
و سمعت الناس بتصرخ و تقول ازهار اتقلت و اتسرقت ليلة امبارح 😳 .
لا حول و لا قوة الا بالله ...دا مين ابن الحرام اللى قتلها ده ؟؟
محدش يعرف يا عبدالحميد ..بيقولوا اتقتلت فى العشيه و اللى قتلها هرب و محدش شافه
امال لقوها ازاى ؟؟
جوزها كان راجع بالصدفه ... دا لولا كدا كان زمانها عفنت جوه من غير ما حد يعرف
ايوا امال ما هى وحدانيه يا ولداه و لا عيل و لا تيل
اهو العمده هناك و مأمور المركز و النيابه و الدنيا مقلوبه
ربنا يسترها يا حكيم يا اخويا ...دى حاجه تقلق
تقلق ليه يعنى ؟؟
يعنى واحد قتال قتله فى وسطنا كدا و احنا منعرفوش و مش عاوزنى اقلق
ههههههه طب ازهار كان معاها فلوس و دهب على قلبها اد كدا ( الله يرحمها يعنى ) احنا بقى هيقتلونا على ايه ...اتكل على الله يا عبدالحميد
و نعم بالله انا همشي انا بقا عشان اشوف مصالحى
مع السلامه يا ابو سعد
ابويا كان ماشي مذهول و مش على بعضه معرفش ليه ...بس قلت اكيد خايف ملهاش تفسير غير كدا
ابويا رجع لامى و هو ساكت ...امى سألته
ايه اللى بيحصل فى البلد ؟؟؟
بيقولوا ازهار العايقه اتقتلت ليلة امبارح
اتقتلت ؟؟؟ و مين قتلها ؟؟
محدش يعرف
ملناش دعوه يا عبدالحميد ..احنا نشوف اللى ورانا و ملناش دعوه بمين اتقتل و مين اتسرق
انا مقلتش لكى انها اتسرقت
يعنى اللى هيقتلها هيقتلها ليه يعنى ؟ ما اكيد عشان يسرقها
عندك حق يا نرجس
انت مالك نازل عليك سهم الله كدا ؟؟؟؟...تكونش كانت عينك منها ؟؟
عين ايه و رجل ايه يا وليه يا مهبوله ..امشي روحى شوفى الواد اسامه عامل ايه دلوقتى ؟
امى راحت تشوف اسامه لقته سخن تانى
الحقنى يا عبدالحميد الواد سخن مولع
لا كدا مبدهاش لازم نطلع على المستشفى اللى فى المركز ...الواد هيروح منا ...البسي يا وليه و لبسي الواد حاجه تقيله و تعالى بينا نروح على الاستباليه
و انا يا أبا عاوز اجى معاكم
هتيجى تعمل ايه يا سعد ...خليك مع اخواتك البنات هنا
لا عاوز اجى يا أبا ...عاوز اروح المركز معاكم
خلاص يا عبدالحميد خليه يجى معانا و انا هسيب البنات مع خاله رسميه
انا مش عارف آخرة دلعك فى الواد ده ايه بس !!...يلا يا اخويا سند اخوك عشان يقوم على بال ما اروح لعيد جارنا
و خرج ابويا لجارنا و سالت امى
هو رايح لعم عيد ليه يا اما؟؟
اكيد رايح يستلف منه فلوس عشان مشوار المركز يا سعد
هو ابويا ممعهوش فلوس يا اما ؟
لا معاه ..بس لازم يكون معاه فلوس بزياده عشان لو حصل حاجه يعنى ...بقولك ايه يا سعد يا ابنى
نعم يا اما
انا هاخدك معانا عشان تحاول تسكت اخوك لو خترف بأى كلام و الا حاجه ..خايفه يجيب سيرة ازهار قدام ابوك
حاضر يا اما متخافيش مش هخليه ينطق
ابويا رجع و اخدنا انا و امى و اسامه و طلعنا على المركز
امى ركبت باسامه فى العربيه من قدام و احنا ركبنا ورا لأن العربيه مكشوفه
وصلنا الاستباليه ...مبنى كبير اوى و شغالين فيه ناس كلهم لابسين زى بعض
الاستباليه كان لها ريحه غريبه كانت هتخلينى ارجع
ابويا كان شايل اسامه على كتفه و راح لراجل بيقطع التذاكر
عاوز اكشف على الواد ده لو سمحت
عاوز تكشف ايه ؟؟
هو ايه اللى اكشف ايه ؟؟
يعنى باطنه و الا عظام و الا رمد ؟؟
هو الواد عنده سخونيه شديده و مش راضيه تنزل من امبارح
يبقى هتكشف باطنه هات تلات قروش
ليه يعنى تلات قروش ؟؟ مش دى مستشفى حكومه يعنى الكشف و العلاج ببلاش ؟
يا عم متعطلناش هات تلات قروش يا تاخد ابنك و تروح
يعنى مينفعش قرش
لا مينفعش ..انت بتفاصل فى طماطم و الا ايه ؟؟
خلاص خلاص متزقش ..خد التلات قروش اهم حار و نار
اتفضل التذكره اهى ...امشي من الناحيه دى تانى اوضه يمين
دخلنا عند الدكتور اللى كان باين عليه تنك اوى و ابن ناس ...لابس لبس شكله حلو اوى و نضاره و شعره ناعم و مسرحه على جنب و حاطط السماعه فى رقبته
التمرجى خد من ابويا التذكره و امى اخدت اسامه من ايده و قعدت على الكرسي قدام الدكتور
خير يا حاجه
ابنى يا دكتور سخن مولع من امبارح و بطنه سايبه جت اديله كوباية لبن الصبح راح مرجعها من فوق و من تحت
طب حطيه على السرير ده اكشف عليه
وقفت اتفرج على الدكتور و هو بيكشف على اسامه و كنت بقول ياريتنى انا اللى مكانك ..اهو على الأقل هتترحم من شغل الغيط و كمان ابويا هيجيب لك اكل حلو و دوا و هتدلع اخر دلع
الدكتور خلص كشف و قال الولد ده عنده حمى شديده و لازم يتحجز يا حجه
ابويا قاله و ماله يتحجز بس يكون كويس يا دكتور
ابويا خلص إجراءات المستشفى و ساب امى مع اسامه تتحجز بيه و خدنى عشان نروح
خدى بالك من الواد يا نرجس
حاضر يا اخويا و انت كمان خد بالك من الدار و العيال
متقلقيش انتى بس و خليكى فى اللى انتى فيه ...انا بكرا هجيلك أن شاء الله
طيب يا اخويا بالسلامه انت عشان تلحق العربيات قبل ما السكه تقطع
سلام عليكم
و عليكم السلام
ابويا اخدنى و روحنا و كنت نسيت حكايه ازهار دى و انا فى المركز من اللى شوفته هناك من محلات تضرب محلات حامد بتاع بره بالجزمه و الا طعميه البندر السخنه ياااا حاجه كدا ملهاش وصف ...ممشتش من قدام الراجل الا اما خليت ابويا يجبلى طعميه و عيش سخن منه ...كنت بتمنى اعيش هناك على طول و مرجعش البلد تانى ابدا
اول ما نزلنا من العربيه لقينا الغفر فى كل مكان و الدنيا مقلوبه
و الناس كلها واقفين مستنين خروج جنازه ازهار
ابويا سأل واحد جارنا ...ايه اللمه دى تانى ؟؟
هو انت مسمعتش أن ازهار اتقتلت ؟؟
ايوا سمعت بس دا كان الصبح
ما هو النيابه حققت و اخدت جوزها و شويه من جيرانها عشان يسألوهم أن كانوا شافوا حاجه
طب وواخدين جوزها ليه ؟؟
فى ناس بتقول أنه هو اللى قتلها و أنه عمل نفسه لاقاها كدا
طب و بعدين ؟؟
مفيش النسوان بيغسلوها و هتطلع دلوقتى يودوها الترب
لا حول و لا قوه الا بالله ..طب استأذن انا
ايه ؟ مش هتحضر الجنازه ؟؟
لا أصل ابنى تعبان و محجوز فى الاسبتاليه و بناتى لوحدهم فى الدار
الله يعينك و يشفهولك
الله يخليك
ابويا مشي و روحنا البيت قام جاب لنا طبق قشطه و عليهم حتتين جبنه خرط و قالنا كلوا يا عيال
و انت يا ابا مش هتاكل ؟؟
مليش نفس
ابويا دخل نام فى اوضة الكنب و دى كانت اوضه للضيوف ارضيتها معموله بالاسمنت و مفروش فيها شريط و فيها اربع كنبات
انا بقا قلت ام أخرج و اشوف الناس بتقول ايه على ازهار
رحت وقفت ع الترعه جنب الستات اللى بتغسل الوعى
سمعتهم عمالين يجيبوا سيرتها واحده منهم كانت بتقول :
استغفر الله العظيم يا رب.... بيقولوا عشيقها اللى قتلها
لا يا شيخه حرام عليكى دا حرامى و بيقولوا ملطها دهبها كله اللى كانت بتتأنزح علينا بيه
ردت واحده تالته : و ليه ميكونش جوزها اللى قتلها عشان يخلص منها و من قرفها ؟
كل واحده كانت بتحاول تحلل الجريمه و تقنع الباقى بوجهه نظرها انها هى اللى صح و الباقى غلط
و كل واحده بقت تقول للباقى بكرا تشوفوا أن كلامى انا هو الصدق
مشيت شويه لقيت العيال اللى بلعب معاهم هما كمان بيتكلموا عن موضوع ازهار و لقيتهم بيقولوا أن امهم قالت لهم أن ابو رجل مسلوخه هو اللى قتل ازهار عشان كانت بتخرج بالليل
رد عيل تانى و قال لا دى جنية البحر لأن بيت ازهار قريب من الترعه
بقيت اسمع الكل و اضحك عليهم فى سري انا الوحيد انا و اخويا اللى عارفين الحقيقه و احنا اللى شفناها بعنينا ...ابو رجل مسلوخه و جنيه ايه يا هبل ؟
اسامه دخل قبل منى و يمكن شاف شكله كويس ..انا شفته من ضهره و شفت جلابيته ...بس برده مش لازم انطق زى ما امى قالت لى لياخدونا يحبسونا احنا ..ما هم اكيد هيسيبوا الحمار و يتشطروا على البردعه
يتبع ..
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ..
تعليقات
إرسال تعليق