غلطه ( كامله)

قصه غلطه ( كامله )

 ( الجزء الاول و الثانى و الثالث)

جزء 1

أنا سهير 32 سنه متزوجه و عندى بنتين قصتى عاديه زى أى ست مصريه اتجوزت جواز صالونات 

جوزى تقليدى جدا يجى من الشغل يأكل و يشرب الشاى و يتفرج على التلفزيون لغاية ما يروح فى النوم 

خروجنا مع بعض قليل جدا كل همى بناتى و بس و فى يوم كنت زهقانه و عايزه اتخانق مع أى حد 

لقيت جوزى داخل على قلت له مصطفى أنا عايزه اقولك على حاجه قالى قولى 

قلت له أنا عايزه اشتغل بص لى كدا نظره فيها استهزاء و قالى تشتغلى؟  تشتغلى ايه هو انتى ناقصك حاجه ؟ 

قلت له هو الشغل عشان الفلوس بس أنا معايا مؤهل عالى و من حقى اشتغل و اثبت نفسي 

راح ضحك اوى و قال تثبتى نفسك ؟ بطلى تتفرجى على افلام يا حلوه و سابنى و دخل يغير هدومه 

أنا بقا اتضايقت اوى من رده و دخلت وراه 

مصطفى عاوزه اشتغل بص كدا و قال هتشتغلى ايه أن شاء الله قلت له اشتغل أى حاجه اشتغل حتى معاك امسك لك الحسابات قالى نعم يا أختى بطلى هبل و روحى حضريلى الغدا بسرعه 

رحت أحضر الغدا و أنا متغاظه جدا و قررت فى نفسي انى لازم اعمل إللى فى دماغى 

و فعلا تانى يوم بعد ما نزل قمت لابسه هدومى و وديت بناتى الحضانه و روحت له الشغل 

أول ما شافنى أستغرب كدا و قال خير حد حصله حاجه من البنات؟ قلت له لا البنات كويسة قال آمال فى ايه ؟ 

قلت له مش أنا قلت لك امبارح أنا هشتغل معاك و امسك لك الحسابات 

راح قالى أمشي يا سهير  قلت لا مش همشي 

روحى يا سهير متخلنيش اتنرفز عليكى 

قلت له لو مشيت مش هروح على البيت 

قال اعملى اللى عاوزاه و غورى من وشي دلوقتي 

جريت من قدامه و روحت أخدت بناتى و روحت على بيت ماما 

قعدت اعيط و هى مش فاهمه حاجه و تقولى فهمينى ايه اللى حصل 

فجاه لقيت جرس الباب بيرن و لقيت فؤاد ابن خالتى اللى كان بيحبنى زمان دخل لقانى بعيط 

اتخض و قالى مالك ؟؟؟ ..........

إذا عجبتكم القصه قولوا و أنا أكملها لكم 

د.جيهان

قصة غلطه

الجزء 2

دخل فؤاد لاقانى بعيط قالى مالك ؟ قلت له مفيش حاجه أنا اسفه يا فؤاد أنا تعبانه شويه و هدخل ارتاح . قالى اتفضلى يا سهير 

دخلت اوضتى و بعد دقيقتين سمعت فؤاد بيستاذن من ماما أنه هيمشي 

أمى دخلت عليه و طبطبت على كتفى و قالت لى فهمينى بقا يا حبيبتى فى ايه ؟

رحت حكيالها الحكايه راحت ردت على و قالت ليه كدا يا بنتى ليه تعملى مشكله مع جوزك ؟ هو جوزك مخليكى محتاجه حاجه ؟

قلت لها انتى كمان يا ماما بتقولى زيه هو أنا عايزه اشتغل عشان فلوس ؟ لا يا ماما أنا بقالى 6 سنين متجوزه حاسه انى بقيت زى الكنبه إللى بقعد عليها أحلامي كلها راحت كنت بحلم بحياة مختلفه خالص عن ده و للأسف كله راح 

ردت أمى و قالت راح ايه بس ؟ ايه الكلام الخايب اللى بتقوليه دا يا سهير 

قومى قومى استعيذى بالله كدا و اتوضى و صلى و استهدى بالله كدا على ما أحضر لكى الغدا 

قلت لها مليش نفس يا ماما 

انتى كدا يا سهير من زمان قماصه و أى حاجه صغيره تعملى عليها موضوع و أنا مش شايفه أن فى مشكله اصلا 

طب هقولك لما ابوكى يجى من الشغل نشوف رايه ايه 

حاضر يا ماما نشوف 

بعد شويه ماما خرجت من الاوضه و حطيت دماغى على المخده و حضنت بناتى و أنا بقول فى نفسي يا ترى  أنا كدا غلطانه ؟ لا أنا مش غلطانه هو بيعاملنى خدامه و بس اكنس و اطبخ و اطبطب و بس و لما أقوله عايزه أثبت نفسي يقولى غورى من وشي 

طب ما كان طبطب على 

طب فيها ايه لو خدنى على قد عقلى 

طب أنا كان نفسي يسألني عن السبب الحقيقى لأنى اشتغل مش يمكن بعمل كدا عشان ياخد باله منى 

دماغى هتنفجر من التفكير 

طب لو لى معزه عنده أكيد هيتصل بى لما يروح ميلقنيش 

بعد شويه سمعت الباب بيتفتح و لقيت بابا جه و دخل لقى بناتى بيلعبوا قالهم أهلا أهلا يا حلوين و سمعته بيقول لماما هو سهير هنا يا حاجه ؟

قالت له أيوه يا حج و زعلانه شويه 

زعلانه ليه ؟ هدخل اشوفها 

بابا خبط على الباب و دخل على اخدنى فى حضنه و قالى الجميل زعلان ليه ؟

قلت له مفيش يا بابا . طبطب على كتفى و قالى مالك يا حبيبتى فيكى ايه ؟

حكيتله على الموضوع أبتسم ابتسامه فيها حنيه و قالى كل ده عشان موضوع هايف كدا 

قلت له أنت كمان يا بابا بتقول هايف ؟

قالى يا بنتى اللى انتى فيه دا مش موضوع شغل 

انتى عايزه تلفتى انتباه جوزك لحاجه بس هو مخدش باله 

على العموم الموضوع  بسيط و محلول أن شاء الله 

أنا هتصل بجوزك يجى يتغدى معانا و نتكلم 

قلت له لا يا بابا من فضلك متتصلش بيه 

قال خلاص متزعليش بس أنا متأكد أنه هيجى يطيب خاطرك 😊

يتبع .....

قصه غلطه 

الجزء الثالث 

بابا قالى قومى يلا اغسلي وشك و تعالى نتغدا أمك عاملالنا الاكله المفضله طاجن باميه باللحمة الضانى يستاهل بقك 😋

قلت له و الله يا بابا مليش نفس 

قال لا عيب بقا الباميه بتناديكى و عشان ولادك كمان ياكلوا معاكى 

بعد الغدا لقيت بابا داخل بكوبايتين شاى و بيقولى الشاى الخطير وصل طبعا متقدريش تقاومى الشاى بتاعى 

قلت له طبعا يا بابا 😊

اتكلمنا شويه و دخلت عشان أنام مجليش نوم ازاى هنت عليه و متصلش بى  طب ازاى مسالش على بناته 

دخلت على النت لقيته اون لاين اتغظت جدا و قلت فى نفسي ما أنت رايق أهو و قاعد ع النت 

قعدت انزل بوستات حزينه و بوستات عن إللى بيبيعوا العشره 

و فى الآخر اتخنقت و قفلت النت و حاولت أنام معرفتش 

الفجر إذن قومت صليت و رجعت اقعد على النت تانى 

لقيت رساله من فؤاد 

( ازيك يا سهير أنا عايز آتطمن عليكى بس ) 

شوفت الرساله و مردتش عليها و قلت فى نفسي أنا مش ناقصاك أنت كمان 😣

بابا صحى سمعت صوته بيكلم ماما رحت خارجه 

صباح الخير يا سهير 

صباح الخير يا بابا 

ايه اللى مصحيكى بدرى كدا ؟

أنا منمتش اصلا يا بابا أنا عايزه انزل ادور على شغل يا بابا 

شغل ايه يا سهير ازاى من غير موافقه جوزك 

جوزى أنا قلت له و أنا مفرقتش معاه و لا سأل عنى و لا سأل عن بناته 

يا بنتى استهدى بالله أنا هكلمه انهارده و نشوف حل 

المره دى سكت عشان عارفه نهايه الكلام معاه 

هو آه طيب بس عنيد اوى و بيحب يمشي كلامه 

بابا راح الشغل و قالى و أنا ماشي هتصل بيه يجى يتعشي معانا 

قلت له طيب يا بابا 

يتبع ....😊

قصة غلطه ( الجزء الرابع و الخامس و السادس و السابع )

الجزء الرابع

مر اليوم و أنا مستنيه بابا علشان اعرف مصطفى رد عليه و قاله ايه 

بابا جه و لقيت مرسوم على وشه نظرة حزن فعرفت على طول و توقعت المكالمة 

قلت له مصطفى مرضيش يجى صح ؟

قال لا يا بنتى بس هو مشغول شويه قلت له لا يا بابا دا جوزى و أنا معشراه سنين و عارفه بيفكر فى ايه 

هو أكيد قالك زى ما مشيت لوحدها ترجع لوحدها صح 

طب ما انتى عارفه أهو استهدى بالله و قومى اروحك بيتك 

ياااه يا بابا أد كدا أنا رخيصة عندك و عايزنى أروح لواحد مش عاوزنى 

لا يا بنتى مش كدا بس مش عايزين نكبر الموضوع أكتر من كدا و لما نروح هنتكلم معاه و نعرف نقنعه 

تقنعه بايه تقنعه أنه يرضى ارجعله و إلا احط جزمه فى بقى و مطلبش انى اشتغل تانى؟  لا يا بابا أنا اسفه أنا مش هروح و هنزل ادور على شغل و اصرف على ولادى و لو وصلت هأجر اوضه اقعد فيها 

انتى اتجننتى يا سهير ايه الهبل اللى بتقوليه دا 

استهدى بالله بس و الأمور هتتحل أن شاء الله 

دخلت اوضتى و قعدت اعيط يااا يا مصطفى أد كدا أنا ملزمكش أد كدا أنا قليله فى نظرك 

ما أهو انت لو بتحبنى مكنتش عملت كدا 

فتحت صفحته على النت لقيته ناشر اغانى و مروق نفسه و لا كان حاجه حصلت رحت عملاله بلوك من الفيس و الماسنجر والواتس 

بعد شويه لقيت جرس التليفون بيرن كان عندى أمل يكون هو بس طلع فؤاد بيسال على ماما 

و سمعتها بتحكيله اللى حصل فاتغظت منها اوى 😥

ليه تقوله و تشمته فى أنا مرضيتش اتجوزه زمان و قلت له أنت زى أخويا دلوقتي يقول أحسن و يشمت فى 😢

بعد شويه لقيت ماما بتقوله تشرف يا فؤاد عرفت أنه جاى يووووو أنا مش عاوزه أشوفه و لا أشوف أى حد أنا تعبانه 

بعد المغرب لقيت جرس الباب بيرن و لقيت فؤاد دخل و قعد يتكلم مع ماما و لقيته بيقولها أنا مستعد أحل المشكله و أشغل سهير معايا 

و سمعت ماما بتقوله لا يا ابنى مينفعش احنا كدا هنكبر الموضوع اوى مع جوزها و هنقويها عليه 

فى اللحظه دى الكبر اخدنى و لقيت نفسي فتحت الباب و خرجت لفؤاد و بقوله و أنا موافقه اشتغل معاك 😧

لقيت فؤاد اترسم على وشه نظره سعاده كبيره حسيت ساعتها انى اتسرعت فى قرارى 

يتبع ....😊

قصه غلطه 

الجزء الخامس

بعد ما وافقت على شغلى مع فؤاد استأذنت منه و دخلت الاوضه و لقيت نفسي بلوم روحى ليه كدا ؟؟ دى أنا كنت متضايقة أن ماما حكت له على مشكلتى يبقى أروح اشتغل معاه 

أنا مشوشه و مش عارفه أفكر 😳

طب ما يمكن مصطفى يتصل على بابا و يجى ياخدنى و خلاص !

قعدت أفكر شويه و لقيت واحده صاحبتى و جارتي لما شافت ولادى عرفت أنى عند ماما جت تسلم على 

إزيك يا سهير وحشتينى يا بنتى 

و انتى كمان يا ثناء وحشتينى اوى ازيك و ازاى جوزك و أولادك ؟

الحمد لله زى الفل بس الواد عبده الصغير مجننى يا أختى بيربينى من أول و جديد 😂

معلش ربنا يهديهولك يا حبيبتى كل الولاد كدا 

يارب يا أختى . أمال مصطفى فين ؟؟

مصطفى فى البيت .احنا زعلانين شويه 😢

ليه يا سهير ؟ حصل ايه يا حبيبتى ؟

حكيت لثناء على كل حاجه قالت لى و انتى هتشتغلى مع فؤاد ؟ انتى عارفه أن جوزك مبيحبهوش ابدا و كدا انتى هتكبرى الموضوع 

قلت لها أنا مش عارفه أفكر يا ثناء و ملقتش حل إلا دا دلوقتي على الأقل فؤاد مش ممكن يضرنى أو ياذينى باى شكل لأنه من لحمى 

انتى متأكده يا سهير من الكلام إللى بتقوليه دا ؟ انتى بتضحكى على نفسك موضوع فؤاد دا يمكن يخرب بيتك 

خلاص يا ثناء متتكلميش فى الموضوع دا تانى أنا هروح اشتغل مش هلعب يعنى و أنا مش رايحه بكره و لا بعده أنا هروح من أول الشهر يعنى قدامى حوالى 10 أيام لما أشوف هيحصل فيهم ايه 

-براحتك يا سهير . طب بقولك ايه بدل جو الاكتئاب اللى انتى عايشه فيه دا ايه رأيك هنروح العين السخنه أنا و محمد جوزى يوم واحد تعالى معانا و عشان تفسحى البنات .

-لا مش هقدر و الله يا ثناء اعفينى 

- مفيش اعفينى خلاص أنا عملت حسابك معانا مفيش كلام حضرى نفسك هنفوت عليكى بعد صلاة الفجر 

-يا بنتى انتى مجنونه هقوم الفجر كدا أمشي من غير ما أقول لهم 

- ملكيش دعوه أنا هقول لطنط و عمو و أنا خارجه خلاص ملكيش حجه يا حاجه 😀

-خلاص ماشي يا ثناء و قلت فى نفسي أنا حياتى مش هتقف عليه . هو عايش و لا هامه حاجه و انا اللى مموته نفسي هنا . فيها ايه لما أخرج و أروح عن نفسي شويه 

و فعلا فى اليوم التانى رحت انا و بناتى السخنه مع ثناء و جوزها و كان يوم جميل اوى كان بقالى كتير محستش انى عايشه و بضحك كدا 

بعد أسبوع لقيت جرس التليفون الارضى بيرن رديت لقيته مصطفى 😴

ألو ازيك 

الله يسلمك 

انتى مش هتعقلى بقا و ترجعى بيتك ؟؟ 

عايزنى أرجع لوحدى بعد ما كسرت بخاطري و كسفت والدى و مرضتش تيجى لما قالك تعالى

- انتى هتحورى يا سهير هو انا زعلتك و إلا عملت فيكى حاجه بقولك ايه يا بنت الناس انا عندى مشاكل الدنيا و مش فاضى لدلعك دا ربنا عالم بى 

و انا كمان جزء من حياتك و بيتهيألي جزء مهم و لازم تراعى شعورى 

- و انا مبرعيش ظروفك ازاى أن شاء الله ؟؟؟ 

خلينى اشتغل .و اساعد 

- سهير الموضوع دا منتهى عندى و انتى عارفه كدا كويس 

- و انا خلاص نازله شغل كمان يومين 

- نعم يا أختى شغل شغل ايه ؟ و ابوكى موافق على المسخرة دى ؟ 

- ملكش دعوه بابويا دا قرارى انا 

- قرارك اااه و هتشتغلى ايه بقا أن شاء الله 

- هشتغل فى شركه فؤاد ابن خالتى همسك حسابات الشركه 

- نعم نعم فؤاد مين و حسابات مين ؟؟ انتى أكيد اتهبلتى بقولك ايه مفيش شغل مع الزفت دا و لو عملتيها يا سهير هتبقى طالق 

و راح قافل السكه فى وشي 😲 

أنا مستوعبتش الكلمه ايه دا مصطفى طلقني 

ايه دا ازاى كدا . أنا مش مصدقه ودانى 😢

أنا فعلا اتاكدت أنه محبنيش لحظه واحده . لو كنت اساوى عنده حاجه مكنش رمانى بالسهولة دى 😭

يتبع ......

قصة غلطه

الجزء السادس و السابع

بعد ما مصطفى قفل السكه فى وشي لقيت نفسي فى حالة اندهاش و حسيت احساس غريب اوى احساس انى زعلانه و فى نفس الوقت انى بقيت حره 

مش عارفه ليه من جوايا مكنتش زعلانه اوى .. مصطفى بالرغم أنه راجل طيب بس فيه عيوب كتير خنيق كدا مبيتكلمش معايا خالص تقليدى اوى عكس شخصيتى تماما دايما فى تكشيره على وشه و لو دخل لاقانى بضحك أو بغنى مثلا يستغرب و يقولى بتضحكى ليه 

مبحسش أنه بيفكر فى خالص و لا حنين على و طلاقه لى بالسهولة دى أكد لى إحساسي بس فى نفس الوقت مكنتش أتمنى اخد لقب مطلقه فى يوم من الأيام  كنت بحلم دايما انى اخلى بيتى جنه ، أن يكون أنا و زوجى أصحاب نخرج سوا و نلعب سوا و نفرح و نفرح أولادنا معانا 

أمى خرجت من المطبخ و أنا فى الحاله دى ووشى ضارب ألوان 

- فيه ايه يا سهير مالك ؟ مين كان بيتصل؟ 

- دا مصطفى يا ماما .... مصطفى طلقني يا ماما 

- ايه طلقك؟ ؟؟؟ طلقك ليه ؟؟؟ ايه إللى حصل ؟ يا خراب بيتك يا بنتى 

خرج أبويا من اوضته على صوت ماما و قالها فى ايه يا حاجه؟  قالت له بنتك اتطلقت يا حج و قعدت تعيط 

الغريب بقا انى معيطش خالص و لا اكنى أنا اللى اتطلقت 

لقيت أبويا بيقولى ليه كدا يا بنتى ايه اللى حصل روحت قلت له على المكالمة 

أبويا قالى انتى غلطانه يا بنتى و انتى سبب كل الغلط دا 

قلت له دايما تيجى على يا بابا و دايما اسمع كلامك حتى لو مش مقتنعه.  مش مصطفى دا اللى اقنعتنى اتجوزه  و لما عدى شهر واحد من الخطوبه حسيت بفرق كبير فى التفكير بينى و بينه و جيت و قلت لك يا بابا أنا مش مرتاحة قعدت تقنع فى انى بكره هاخد عليه و على أسلوبه 

بابا سكت متكلمش و أمى بقت تبكى و انا مذهوله و مش مصدقه زى ما يكون السكينة سرقانى 

بابا قال المفروض بقا تقعدى و متروحيش الشغل اللى هيخرب بيتك دا 

قلت له معلش انا اسفه يا بابا حتى لو هرجع لمصطفى لازم اوقع اليمين علشان يحرم يحلف على تانى و مياخدش على كدا 

بعد إذنك انا رايحه شغلى بكره

أبويا سكت و حسيت أنه مش قادر يفكر و قام دخل اوضته 

انا بقا قمت تانى يوم رحت شقتى الساعه 9 الصبح بعد نزول مصطفى و أخدت هدومي و هدوم بناتى و أخدت دهبى و كل شئ يخصنى و نزلت 

رحت البيت عند ماما و حطيت حاجتى و دخلت غيرت هدومى و لبست طقم شيك و قلت لماما انا نازله رايحه الشغل 

ماما بصت لى و متكلمتش بس حسيت أن كلامى مش عاجبها 

بس انا خلاص هعمل اللى انا عاوزاه انا بقيت حره 

نزلت ركبت تاكسي و روحت شركة فؤاد 

دخلت و سألت عن مكتبه ووصلت لقيته قاعد فى مكتب فخم اوى قلت فى نفسي سبحان مبدل الأحوال فؤاد دا كان عيل صايع مبيشتغلش و اللى وصله لكدا الأرملة اللى أد أمه اللى اتجوزها 😏

أول ما شافنى فؤاد قام وقف و رحب بى جدا و قالى تشربى ايه ؟؟ 

قلت له انا مش جايه أشرب انا جايه اشتغل 

قال طبعا طبعا و ضرب الجرس للسكرتيره و قالها خدى مدام سهير على حجرة المحاسبين وديها لأستاذ عبد الرحيم تشتغل معاه 

شكرته و قمت رحت لاستاذ عبدالرحيم اللى بدأ يدينى بعض الشغل البسيط علشان اتدرب 

و بقيت واحده واحده افهم و بقيت لهلوبه و شغاله زى الدينامو علشان أثبت لنفسي انى كنت صح و أن مصطفى هو اللى كان غلط و انى استحق أعيش حياة أفضل من اللى عشتها معاه 

مر شهرين و انا بشتغل و حبيت شغلى جدا و صراحه فؤاد كان عاملى مرتب كبير كنت فرحانه بيه اوى

لقيت أستاذ عبدالرحيم بيقولى فى سفريه اسكندريه يا مدام سهير علشان مستخلصات من الجمارك و مفيش غيرك ينفع يخلص لنا الموضوع دا 

قلت له و ماله يا استاذ عبد الرحيم أروح اخلصهم 

قالى خلاص خدى الاوراق معاكى و اركبى بدرى و روحى و لما توصلى هناك كلمينى و انا اقولك تعملى ايه و تروحى لمين 

قلت له تحت امرك 😊

تانى يوم قمت بدرى و ركبت السوبر جيت و وصلت اسكندريه على الساعه 9 الصبح و ركبت تاكسي للمينا يعنى وصلت هناك تسعه و نص و لسه بخرج موبايلى عشان اتصل باستاذ عبدالرحيم زى ما قالى لقيت مفاجأه فى وشي 😦

يتبع .....

قصه غلطة 

الجزء السابع و الاخير

أول ما وصلت المينا و بطلع موبايلى لقيت فؤاد فى وشي ... ايه دا ايه إللى جابك هنا 

- أنا هنا من امبارح يا سهير بخلص حاجات وورق مهم 

- طب مدام أنت هنا أستاذ عبدالرحيم بعتنى ليه ؟

- لا دا أنا الورق اللى جاى اخلصه حاجه تانيه خالص 

هزيت دماغى كدا و أنا مش مقتنعه بالحدوته الخايبه دى بس مدام أنا واثقه من نفسي خلاص ميهمنيش 

طلعت موبايلى و اتصلت بعبد الرحيم و عرفت منه هعمل ايه بالظبط و استأذنت من فؤاد 

- فؤاد قالى هنروح سوا 

- قلت له أن شاء الله 

خلصت شغلى و عملت كل حاجه قالى عليها عبدالرحيم و قلت هخرج أركب و أمشي على طول .

و أنا خارجه لقيت فؤاد قاعد مستنينى فى العربيه و نادى على 

ركبت معاه و قالى هنروح بقا اغديكى أكله سمك عند أشهر واحد بيعمل سمك هنا 

قلت له معلش يا فؤاد أنا مش عايزه اتأخر عشان ولادى و عشان ماما متقلقش على 

قالى الموضوع مش خياخد نص ساعه أوعدك مش هاخرك عشان عايزك فى موضوع مهم و الله 

هزيت رأسي و قلت له ماشي و قلت لنفسي أنا لازم اعرف اخره ايه بقا 

رحنا المطعم و طلب السمك و بدأ يتكلم و أنا متوقعه معظم كلامه بس اللى متوقعتوش الطلب اللى طلبه منى 

سهير أنا لسه بحبك و عمرى ما نسيتك فى يوم 

فؤاد الموضوع دا انتهى من زمان و أنت راجل متجوز دلوقتي 

طب و ايه المانع انى لسه بحبك ؟

المانع أنك متجوز بقولك 

أنا عرفت من خالتى أن مصطفى طلقك من شهرين بسببي 

طبعا أنا لما سمعت كدا اتغظت من ماما جدا أنا كنت فاهمه أن محدش يعرف حكايه الطلاق دى 

قلت له طب و بعدين ؟؟؟؟

قالى نتجوز 😮 بس نتجوز عرفى لأن لو مراتى عرفت هتسحب منى كل حاجه و هنخسر كل حاجه و أنا أوعدك هجيب لكى كل اللى تشاورى عليه و هغرقك فسح و خروجات و شوبنج و اللى تتمنيه 

بصت له كدا و مكنتش عارفه أرد عليه من الإحساس اللى حسيته لحظتها أد كدا أنا رخيصة فى نظره 

أد كدا هو باصص لى البصه دى 

قمت بمنتهى الهدوء و قلت له هروح إغسل ايدى 

و أخدت شنطتى و خرجت ....

بقيت أجرى فى الشارع زى الهبله 

هى دى الحريه اللى كنتى عايزاها 

هو دا التحرر اللى فرحتى بيه 

هو دا الشغل اللى فرحتى بيه و خربتى بيتك عشانه 

شفتى بقيتى رخيصه ازاى فعلا مصطفى كان عنده حق 

كان خايف على من كلاب السكك و أهو أقرب الناس لى أهو طمع فى يااااااااا 

ركبت و روحت على القاهره و أنا متضايقه و حسيت انى غلطت غلطة عمرى انى خربت بيتى اللى كنت عايشه فيه ملكه و فرقت ولادى عن أبوهم 

مصطفى فيه عيوب بس عيوب أقدر احتملها عيوب ممكن اتغاضى عنها أنا كمان فى عيوب مفيش حد خالى من العيوب 

أول ما رجعت البيت لقيت نفسي دايخه جدا قلت أكيد من حالتى النفسيه و السفر 

لكن بعد شويه اغمى على بابا اخدنى بسرعه للمستشفى كشفوا على و علقوا لى محاليل و فى دكتوره سألتني انتى متجوزه قلت لها أيوه 

قالت هنعمل اختبار حمل 

و فعلا عملت اختبار حمل و طلعت حامل 😨

يا الله حامل !!

لقيت بابا بيقولى لازم نقول لجوزك يا بنتى 

هزيت راسي بالموافقة 

و لقيت بابا بيتصل بمصطفى و بيقوله و بعد حوالى عشر دقايق لقيت مصطفى عندى دخل على و قالى وحشتيني حمدالله على سلامتك 

أنا زعلانه منك اوى يا مصطفى 

أنا اللى زعلان منك يا سهير انتى متعرفيش أنا فى مشاكل أد ايه و مبرضاش اقولك عشان مشيلكيش الهم و انتى مش حاسه بى و تروحي تعندى و تشتغلى مع فؤاد و انتى عارفه أنه شخص مش كويس عايزانى بعد دا كله أعمل ايه 

- كنت عايزاك تطبطب على يا مصطفى كنت عايزاك تاخدنى فى حضنك كنت عايزاك متسخرش منى و تقولى غورى من وشي 

كنت عايزاك تاخد بالك منى 

أنا آسف يا سهير سامحينى 

و أنا كمان اسفه يا مصطفى انى غلطت فى حقك 

طيب عشان الكلمتين الحلوين دول أنا هاخدك و اخد العيال و نروح شرم أسبوع 

طب و شغلك ؟؟؟ 

شغلى الحمد لله استقر دلوقتى و عديت الازمه 

و فعلا رجعت بيتى و لقتنى ببص لحياتى بشكل مختلف أنا مش خدامه زى ما كان عقلى بيصورلى أنا ملكه فى بيتى و فعلا الست ملهاش إلا بيتها و جوزها و عيالها 

و بعد كأم شهر ربنا رزقنى بأحلى زياد فى الدنيا 

و فهمت أن حياتى فى ضل زوجى و اولادى بالدنيا و ما فيها 

انتهت ..

أرجو أن القصه تكون عجبتكم 😊

لو عجبتكم ارجو الدعاء لوالدى رحمة الله عليه