#ابو_رجل_مسلوخه
#الجزء_الخامس_عشر
امى قامت من الفجر و خدت اسامه فى أيدها و راحت على عم الشيخ بهلول
يلا يا اسامه مد شويه يا ابنى
منا بمد اهو يا اما
كدا بتمد ؟؟ دا احنا كدا هنوصل على الضهر
انا مش عاوز اروح يا اما
ليه يا ضنايا ؟؟ دا الشيخ ده حلو اوى و بيقولوا بيحب العيال و اول ما هتدخل هيديك بستليه و أرواح
مش عاوز بستليه و لا أرواح
امشي بس معايا و انا اجيب لك طعميه سخنه و عيش كيزان من صهرجت
بتضحكى عليا ؟؟؟
لا و الله ما بضحك طب هتشوف دلوقتى
امى قعدت تحايل فيه لحد ما وصلوا لبيت الشيخ
بيت الشيخ قدامه ساحه كبيره اوى
الناس متجمعه فيها من كل البلاد اللى حواليه
و فيه ناس بايته كمان من الليله اللى قبلها عشان يلحقوا دورهم
الناس كلها اللى قاعده جايين ع السمع و فى منهم اللى مجرب الشيخ مع حالات تانيه
و الكل قاعد يتكلم على كرامات الشيخ و أنه معاه خدام اقويه من الجن بيساعدوه
امى بقت كل ما تسمع تطمن و تدعى ربنا يجيب الشفا على ايده
امى قعدت باسامه لبعد العصر لحد ما جه دوره
دخلت للشيخ بهلول ...شيخ بعين واحده شعره ابيض طويل نازل على أكتافه لابس سبحه ضخمه و جلباب اخضر و فوق رأسه عمه خضرا
قدامه البخور فى شاليه كبيره و كل شويه يزودها من بخور جنبه
تعالى يا بنتى
ايوا يا عم الشيخ
ماله الولد ؟؟
تعبان يا عم الشيخ و حاله اتبدل
اسمه و اسم امه ؟؟
اسامه ابن نرجس
استنى شويه
حاضر
الشيخ غمض عينه السليمه و بدأ يتمتم بصوت واطى ، و كأنه بيكلم حد معاه و بعدها قال
اسامه ابن نرجس شاف اللى مقدرش يتحمله عقله
تمام يا عم الشيخ
حادثه اثرت عليه و خلت روحه مش فيه
صح يا عم الشيخ
اخرسي متتكلميش
حاضر ..حاضر
ابنك اتلبس يا نرجس و من يوم الحادثه اللى شافها و هو أموره اتقلبت و حاله اتبدل و مبقاش زى الاول
احنا عملنا مصالحه مع جنيه البحر ياعم الشيخ علشان ندت عليه
الجنيه ملهاش دعوه بحالة ابنك ...
امال مين نده عليه و مين اللى خد الرز المعمر ؟؟
ما قلت اخرسي ...رز ايه اللى بتتكلمى فيه ..ابنك لو فضل على الحاله دى هيروح منك يا نرجس
يا لهوى لا بالله يا عم الشيخ اعمل اى حاجه
كويس انك جبتيه دلوقتى لانك بعد كدا مكنتيش هاتعرفى تسيطرى عليه
عندك حق يا شيخ دا مسك كذا راجل زقهم و مكنوش قادرين عليه
مش هو اللى عمل كدا .... دا اللى فيه
فيه ايه بقا ؟؟
فيه عفريت لبسه لما شاف القتيله ووقع على الأرض
طب و لبسه ليه العفريت ؟
وقع عليه و اتلمس لمسه ارضيه
يا ستار يا رب
اللى جواه حالف ليأذيه
طب و بعدين يا شيخ ؟؟
لازم تطلعيه
أطلعه ...بس اعمل ايه ؟؟ اللى هتأمرنى بيه هعمله
ابنك لازم له دم
دم مين لا مؤاخذه ؟؟
دم يا وليه يعنى فدو
قصدك نعجه يعنى و الا معزه ؟؟
جدى ابيض مفيهوش شعره سودا
حاضر
و تجبيلى قطر من قطره و ياريت الجلابيه اللى كان لابسها ليلة الحادثه
لا الجلابيه حرقتها
حرقتيها ليه ؟؟؟ انتى كدا قوتيه عليه ؟؟
حقك عليا مكنتش اعرف
خلاص هاتى الجلابيه التانيه اللى كان لابسها فى الفرح
و دى كمان عرفتها
جرا ايه يا وليه امال انتى جايه لى ليه ؟؟
انا متأسفه يا شيخ ...بس نفسي أسألك يا شيخ هو اسامه هو السبب فى اللى حصل فى الفرح ده
حرام عليكى ابنك مسكين لا له فى التور و لا الطحين هو بس كان مأمور أنه يروح و يشهد اللى حصل علشان يعلم معاه اكتر و يتعقد اكتر و اكتر
اصله كان بيقول أن كل اللى اتكلم على ازهار هيدفع التمن
مش هو اللى كان بيقول ...دا اللى عليه و هو اللى بيمليه
طب و الجاموسه
بس مترغيش كتير ...ابنك زى ما قلت لك لا له فى التور و لا الطحين ..اللى عليه ساعات بيقوله على بعض الحاجات اللى هتحصل مش اكتر
طيب يا شيخ انت عاوز الجدى و الجلابيه و بس ؟؟
و عاوزين كمان أجرة الرجاله اللى هتساعدنى فى تخريج المارد من ابنك
مارد ؟؟؟ مارد مره واحده ؟؟
انا قلت متسأليش كتير
معلش يا شيخ خدنى على اد عقلى انا عاوزه افهم برده
اللى جوا ابنك مارد كبير و حالف ليأذيه و يأذيكم انتوا كمان
يا لهوى بالى ....يا مورك يا نرجس
اخرسي يا وليه بلاش ولوله ...المره الجايه لما تجيبي المطلوب هنخرج منه المارد انا و خمسه من الرجال
خمسه مره واحده ؟؟
امال انتى فاكره ايه ؟؟ اسمعى اللى بقولك عليه
حاضر ...حاضر يا عم الشيخ بهلول
انهارده السبت .....عاوزك تكونى محضره ليا الطلبات و تجيلى يوم الجمعه الجايه
الجدى و الجلابيه و الفلوس صح ؟؟
انتى يا وليه اسئلتك كتير ليه ؟؟
بتأكد بس ...حقك عليا
خلاص روحى يلا و من هنا ليوم الجمعه مش عاوزك تتكلمى مع حد و لا تقولى اى حاجه سمعتيها هنا ...مفهوم ؟؟
ايوا مفهوم ...حاضر ...بالاذن يا شيخ
اذنك معاكى يا ام سعد
سعد ؟؟؟ انت عرفت سعد كمان ؟؟ طب سعد فيه حاجه هو راخر ؟؟
ابقى هاتيه معاكى المره الجايه نشوف فيه حاجه و الا لأ ؟
حاضر هجيبه.....سلام عليكم
و عليكم
امى مشيت من عند الشيخ و هى مقتنعه اوى بكلامه و بقى عندها امل كبير أن الشفا هيجى على ايده
امى لما روحت ابتدت تدور على الجدى اللى طلبه الشيخ
لفت البلد حته حته علشان تلاقيه و برده ملقتش جدى بنفس المواصفات دى
واحده جارتنا اقترحت عليها تطلع على سوق التلات فى بلد جنبنا
ابويا لما شافها عماله تلف كدا حوالين روحها بقى يبص لها و يتعجب
انتى يا وليه مش هتهمدى ؟؟؟ جدى ايه اللى عماله تلفى البلد عليه ؟؟
يوووو منا قايلالك يا عبحميد
قالك القل و تعب السر يا بعيده ...انتى هبله يا نرجس ؟؟ دا كله كلام دجل و تخاريف
اسكت يا عبدالحميد انت متعرفش حاجه
طب ما تعرفينى يا ناصحه
الشيخ قالى مقولش لحد
ايوا طبعا لازم يقولك كدا علشان نصاب
لا متقولش على الشيخ بهلول نصاب ...دا عرف كل حاجه من غير ما اقول
انتى حره بس انا مش هدفع مليم احمر فى الجدى ده
ملكش دعوه انا هبيع حلقى
نعم نعم نعم حلق ايه اللى هتبيعيه ؟
ملكش فيه ...دا حلق امى الله يرحمها
خلاص انتى حره بس انا بقولك انك هتندمى يا نرجس و بكرا تقولى عبدالحميد قال
لا متخافش مش هندم ..ابنى عندى اهم من مية حلق
امى تانى يوم خدت بعضها و طلعت على سوق المواشي و بقت تدور لحد ما لقت الجدى المطلوب
امى فرحت اوى انها أخيرا لقته و جبته و جت على الدار
خد يا سعد يا ابنى اربط الجدى ده فى الزريبه و حط له شويه برسيم
دا الجدى اللى طلبه الشيخ يا اما ؟؟
ايوا يا سعد ...دا انا لفيت عليه لف مقولكش
انتى هتاخدينى معاكى يا اما صحيح ؟؟
ايوا عشان اطمن عليك انت كمان
ماشي عشان تجبيلى طعميه و عيش كيزان زى ما جبتى لاسامه
همك على بطنك انت ...مش لما نشوف اخوك الاول
و ماله نشوف اخويا و تجبيلى طعميه
حاضر يا سعد هجيب لك
مر يومين و جه اليوم الموعود
امى صحيت من تلاته الفجر و كانت مبيته على عمى هشام يجى بعربيته علشان يودينا احنا و الجدى عند الشيخ
يلا يا سعد عمك وصل يا ابنى
حاضر يا اما انا قمت اهو ...
هاخد اخوك فى ايدى و اطلع عقبال ما تجيب الجدى و تيجى
حاضر يا اما
امى راحت ركبت جنب عمى و خدت اسامه على رجلها
و انا دخلت اجيب الجدى ...ببص لقيته ميت
جريت على امى
الحقى يا اما الجدى مات 😳😳
يتبع ..
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض نفسه للمسائله القانونيه ..
تعليقات
إرسال تعليق