#ابو_رجل_مسلوخه
#الجزء_الرابع_عشر
بقولك ايه يا اسامه انا هروح اجيب لنا كوبيتين شربات نشربهم بدل ما احنا واقفين كدا
لا خليك هنا يا سعد
غريبه ،؟؟ اول مره تقول للشربات لا ؟؟
استنى بس يا سعد كمان شويه ابقى روح
حاضر ...انت حر ..اعمل نفسك أمير كدا لحد ما الشربات يخلص و منشربش
انا قلت الكلمه دى و لقيت سقف الدار اللى احنا واقفين فوقه بيتهز من تحت منا و هوب لقيت السقف شمال و يمين بيقع
و فضلنا انا و اخويا واقفين على بسطة السلم فى النص
مش عاوز اقولكم على الصريخ اللى كان شغال بعد صوت الزغاريط
ناس وقعت على ناس
و ناس وقعت فى حلل الطبيخ السخنه
و ناس وقعت فى حلل الشربات
ناس كتير اوى ماتت ستات و رجاله و عرايس كان فرحها بعد اسبوع و عرايس فرحها بعد اسبوعين
حتى العروسه نفسها اتكسرت و ناس من اهل البلد لفوها وودوها لعريسها زى ما هى كدا عشان يتصرف فيها
انا واخويا كنا واقفين و لقينا راجل شباب زى ابويا كدا راح شايلنا و نقلنا على الدار اللى جنب دار العروسه ...اخدنا بعضنا و نزلنا جرى من سلم جيران العروسه و طيران على البيت
البلد اتقلبت عزا كبير
اكتر من مية واحد وواحده ماتوا فى الحادثه دى لدرجة أنهم مكانوش بيسلموا حد لأهله و كانوا بيغسلوا الميتين فى الترعه بهدومهم و بدهبهم و كل حاجه يغطوهم فى الميه و بعدها ينقلوهم بالجرار على الترب
فى الترب بقا محدش بيقول دى ترب عيله فلان
الترب كلها اتفتحت و الشباب انتشروا فيها و بقى اللى يوصل لهم يدفنوه
منهم عيال و منهم ستات
و اللى حامل و اللى عروسه لسه متجوزه
فى ناس مات لها بنتين عرايس و فى اكتر
ناس كتير اوى ماتت فى اليوم ده
امى لما سمعت الصريخ طلعت تجرى و كانت خايفه علينا و لما لقتنا جايين قعدت تبوس فينا و تحمد ربنا أنه نجانا
تانى يوم لقينا هبد جامد على الباب و لقينا واحده جارتنا اسمها عزه جايه تتخانق مع امى
ولادك رجعوا يا نرجس الاتنين و انا ولادى ماتوا
معلش يا عزه يا اختى البقاء لله يا حبيبتى
قوليلى ولادى يموتوا و انتى ولادك يرجعوا ليه ؟؟ اشمعنى انا
وحدى الله يا حبيبتى ربنا يصبر قلبك
قلبى ؟؟ قلبى ما اتحرق خلاص و انتى عيالك رجعوا محصلهمش حاجه
معلش يا حبيبتى
هنا اسامه خرج للست و بص لها
امشي يا وليه انتى من هنا ...انتى جايه تخانقينا ليه ؟؟؟ هو احنا اللى موتنا عيالك ؟
اسكت يا اسامه
لا مسكتش يا اما ...مدام وليه بجحه و محدش علمها الادب
عيب يا زفت ...ادخل جوه غوور
لأ مش همشي الا اما الوليه دى تمشي الاول
امى اتحرجت و راحت ضاربه اسامه بالقلم على وشه
اسامه بص للست بغضب خلاها لمت روحها و مشيت
امى وقفت متسمره مكانها و افتكرت كلام اسامه أن البلد كلها هتدفع تمن الكلام فى سيرة ازهار و بقت واقفه تقول لروحها
يا ترى اسامه كان عارف اللى هيحصل ده ؟؟؟ امال ليه قالى متجيش لا انتى و لا اخواتى ؟؟ و ليه قالى اتأخرى ؟؟ الواد فعلا مش طبيعى و لازم نشوف له شيخ
مر شهر على الحادثه دى و اسامه بقى قاعد لوحده على طول شكله اتغير
وشه اصفر و تحت عنيه بقا اسود زى ما يكون مبينامش
امى فى الشهر ده كانت بتدور و تسأل على شيخ سره باتع زى ما بتقول عشان يعالج اسامه
لحد ما فى واحده قالت لها على شيخ فى بلد جنبنا و قالت لها أنه ممكن ينقل حيطه من مكانها
امى انبهرت بالكلام و قررت تروح للشيخ ده بأى طريقه
عبدالحميد
نعم يا نرجس
انا سمعت عن شيخ حلو اوى عاوزه اروحله
شيخ مين ده ؟؟
شيخ فى صهرجت بس بيقولوا سره باتع
احنا مش هنخلص من الموال ده يا نرجس ؟ انتى كل يوم و التانى طالعالنا بحكايه ؟؟
يعنى انت عاجبك شكل الواد كدا ؟؟ دا الواد اتمقت يا عين امه و مبقاش فيه
من قلة اكله يا اختى ..اكليه و هو هيبقى زى الفحل
منا بحط له الاكل مبيرضاش و بعد ما كان اكتر عيل عندى طفس مبقاش خلاص يا عبدالحميد
بقولك ايه يا نرجس انا مش ناقص وجع دماغ ..بكرا من بدرى عندنا شغل كتير فى الغيط و لازم انام عشان اكون فايق
الشغل اهم من ابنك يا عبدالحميد ؟؟
و اهم من اللى خلفونى كمان يا نرجس ..الشغل اللى بيجبلوكم الطفح اللى بتطفحوه ...اقعد جنبك بقا و كلى تراب انتى و عيالك يا نرجس
طب انا هروح انا
روحى يا اختى بس متطلبيش منى مليم احمر
مش عاوزه منك حاجه انا بعت كام بيضه على حبة لبن على شوية قشطه و هروح
روحى يا اختى الهى تروحى ما ترجعى يا بعيده
حرام عليك يا عبدالحميد ...كنت عملت لك ايه انا ؟؟
حرمت عليكى عشتك .... اعملى حسابك أن دى اخر مره تروحى لشيوخ و كلام فاضى من ده
أن شاء الله هتكون اخر مره ...ما انت مسمعتش اللى بيتقال عليه دا ....
مش عاوز اسمع و يلا طفى اللمبه دى خلينى اتخمد
حاضر ...ياباى عليك
فى الليله دى اسامه جه صحانى من النوم
سعد يا سعد
ايه يا اسامه ؟؟ مالك ؟؟
انا خايف يا سعد
خايف من ايه يا اسامه ؟؟
مش عاوز اروح مع امك للشيخ اللى بتقول عليه ده
ليه ؟؟ دا بيقولوا شيخ كويس اوى
لا يا سعد مش عاوز
طب قولى خايف من ايه بس ؟؟
مقدرش اقولك
هو انت يا اسامه مش عاوز ترجع زى الاول ؟؟ و تلعب معايا تحت التوته و نروح نجيب بلح من تحت نخل ابوك اسماعيل ؟؟
عاوز
طب خلاص روح مع امك يمكن ربنا يجيب على أدين الشيخ ده الشفا
حاضر يا سعد هروح مع امك
شاطر يا اسامه
امى قامت من الفجر و خدت اسامه فى أيدها و راحت على عم الشيخ بهلول
يتبع ..
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض نفسه للمسائله القانونيه ..
ردحذفجميل يا دكتوره
بس عجبنى اوى شالو العروسه مكسره يتصرف فيها العريس😂