#القبيحه
#الجزء_الحادى_عشر
يا ادى المصيبه ...بقا بدل ما تجبيلى الفلوس تروحى تشترى فستان ؟؟ الفستان دا لازم يرجع حالا و تجيبي فلوسه
لا مش هينفع ارجعه
لا يا ماما مترجعهوش دا عاجبنى اوى و عاوزه اروح بيه الجامعه
خلاص يا بت يا دعاء خديه أدبا ليها عشان بعد كدا ما تبقاش تتصرف من دماغها 😒
شكرا يا ماما ...انا كنت بشوف سما صاحبتى بتلبس واحد زيه و كنت هموت عليه
ميغلاش عليكى يا حبيبه امك سما مين دى ؟ هى هتيجى فى جمالك و حلاوتك ايه ؟؟ ...و انتى يا معدوله من الصبح تروحى تدورى على شغل و مترجعيش هنا البيت الا اما تلاقى ..فاهمه و الا لأ
فاهمه 😔
و دخلت اوضتى قعدت على سريري و تلا كانت طايره قدام عينى و عنيها بتطق شرار
انتى ازاى تسيبي لها فستانك كدا ؟؟؟ دا انتى اللى مختاره لونه و انتى اللى عاملاه بايدك
و كنت هعمل ايه يا تلا ...لو اتكلمت كلمه امى كانت هتطردنى و هياخدوا الفستان برده
و يطرودوكى ليه و ياخدوه ليه ؟؟ انتى ليه ضعيفة بالشكل ده ؟
و عاوزانى ابقى قويه ازاى ؟ و انا المره الوحيده اللى دافعت فيها عن نفسي بعد ظلم سنين و سنين كان جزائى انى انفصلت من المدرسه و اهلى ما صدقوا و كانوا عاوزين يقعدونى فى البيت
يعنى انتى عاجبك حالك ده ؟؟
لا طبعا بس هعمل ايه ؟
بطلى تنرفزينى روحى هاتى فستانك من اختك
انتى قلتى بنفسك دى اختى يعنى مرحش بعيد و بعدين انا هلبسه فين و الا لمين ؟
بقا كدا ؟؟؟ طيييييب ماشى يا اميمه نامى يلا عشان نروح نسلم الفساتين بكرا سوا
انا مش جايلى نوم متعرفيش تجبيلى كتاب اقرا فيه ؟
طبعا اعرف ...عاوزه كتاب ايه ؟؟
هاتيلى حاجه خياليه كدا تعيشنى فى واقع غير الواقع اللى انا عايشاه
انتى اللى عامله فى نفسك كدا انتى مش ضعيفه انتى جبانه
فعلا عندك حق انا جبانه ...جبانه جدا
طب خدى جبت لك كتاب الف ليله و ليله
متشكره يا تلا
العفو ...عاوزه حاجه تانى منى ؟؟
انتى هتمشي ؟؟
ايوا و هجيلك الصبح
طيب مع السلامه
قعدت اقرا فى الكتاب اللى جابتهولى تلا لحد ما رحت فى النوم
و قمت قبل الفجر زى كل يوم اتوضيت وصليت و قعدت اذكر ربنا
النور طلع و العصافير بدأت تزقزق بعدها سمعت صوت ماما و هى بتنادى عليا و تقول
قومى يا قعر الكنكه عشان تدورى على شغل
حاضر انا صاحيه
الله امال فين تلا مجتش ليه ؟؟ هى قالت إنها هتيجى معايا عند عمرو ...
انتى فين يا تلا
يلا يا زفته بتتلكعى فى ايه عندك ؟؟
خارجه اهو يا ماما
اخدت التلات فساتين و خبيتهم فى شنطتى وبقيت أتلفت على تلا و مستغربه انها مجتش زى ما قالت لى
فجاه سمعت صوت دعاء اختى و هى بتصرخ و بعدها سناء و سمعت ماما بتجرى عليهم و هى بتقولهم .. فى ايه يا بنات ؟
طلعت من اوضتى ووقفت بعيد بس كنت شايفه اللى جوه الاوضه
و لقيت هدوم دعاء و سناء مولعين جوه الدولاب و فجأه الولعه وقفت مره واحده و الغريب بقا أن الدولاب سليم جدا
سمعت دعاء بتعيط وتقول لماما
انا فتحت عينى لقيت دخان طالع من الدولاب استغربت قمت افتح الدولاب لقيت النار مقابلانى لدرجه انها كانت هتحرق وشي قعدت اصوت ...و سناء قامت على صوتى
و ايه اللى يخلى الدولاب يولع كدا ؟؟ انتوا كنتوا حاطين فيه ايه ؟؟
احنا محطناش حاجه يا ماما
و ازاى يولع و ازاى يطفى منه لنفسه كدا ؟؟ حاجه غريبه اوى
هنعمل ايه دلوقتى يا ماما دا معدش عندنا و لا بلوزه و لا فستان و لا بنطلون نروح بيهم الجامعه
متزعلوش يا بنات انا هتصرف و اجيب لكم اللى عاوزينه
يا ماما انهارده اول يوم فى امتحان الميد تيرم و لو مرحناش هنسقط
اه صحيح دا انا كنت ناسيه
دا انا قلت هروح بفستان جديد اول يوم و كنت فرحانه اوى ..بين البت دى كان عينها فيه ...وش فقر صحيح
عينها ايه و زفت ايه ؟ هى اللى زى دى تلبس فستان زى ده ازاى يعنى ؟؟ ...ال على رأى المثل ايش تعمل الماشطه فى الوش العكر
ههههههههه عندك حق يا ماما ...بس هنعمل ايه دلوقتى ؟؟
البسوا بقا اى حاجه من عندى على ما نشترى لكم لبس تانى
سمعت الكلام و استغربت من حكايه النار دى بس قلت انا مليش دعوه ليتهموها فيا
فتحت الباب و نزلت من البيت
قابلتنى تلا على باب البيت
كنتى فين يا تلا ؟
مفيش كان عندى مشكله كدا خلصتها و جيت على طول
مشكله ايه كفا الله الشر ؟؟
مشكله كدا ...و خلاص تمت على خير
اوعى تكونى انتى اللى عملتى كدا فى هدوم دعاء و سناء ؟
و ماله أما اعمل كدا ؟؟
لا هزعل منك دول مهما كان اخواتى برده
متبصليش كدا ... اللى حصل حصل
ليه كدا يا تلا ؟؟ طب ساعديهم من فضلك دول عندهم امتحانات انهارده
امك يا اختى ساعدتهم و ادتهم اسدالين سود هيروحوا بيهم الجامعه 😂
جبتى الفساتين معاكى ؟
ايوا جبتهم بس مش المفروض يكون معايا التلاتين جنيه عشان اسدد اللى عليا ؟
ما انتى يا بنتى هتديله الفساتين
افرض معجبهوش شكلهم ؟؟
هيعجبه أن شاء الله بس يلا بينا
رحنا على المحل لقيناه قافل
الحقى يا تلا المحل قافل
طبعا لازم يكون قافل الساعه سبعه و نص دلوقتى ...معظم المحلات قافله الا محلات الفول و الطعميه
طب هنعمل ايه دلوقتى ؟؟
مفيش بقا غير انى اعزمك على الفطار
تعزمينى ازاى ؟؟
حطى ايدك فى جيبك كدا
ايه دا ؟؟ دى عشره جنيه
خديها بقا و روحى اشتريلك شويه سندوتشات و حاجه ساقعه
ربنا يخليكى ليا يا رب
رحت اشتريت السندوتشات و الحاجه الساقعه و فضل معايا تلاته جنيه
لو الراجل بتاع الكتب كان قاعد كنت اشتريت منه كتاب دلوقتى
و تشترى ليه و انا اقدر اجيب لك اللى تشاورى عليه
اه صحيح عندك حق ...يلا بينا بقا زمان المحل فتح
يلا بينا
رحنا المحل و لقيته فتح الحمد لله
دخلت لقيت عمرو قاعد على المكتب و بيقرا فى المصحف
سلام عليكم
و عليكم السلام
انا جبت لك الشغل اللى اتفقنا عليه
يااا بالسرعه دى ؟؟ ورينى كدا ؟
اتفضل ..دول تلات فساتين اطفال
واوووو انتى اللى عامله دول ؟؟
ايوا انا
ازاى بالسرعه دى ! و بالاتقان ده ؟؟ دول متقفلين تقفيله مصانع
متشكره اوى
لا بجد دول هايلين اوى و مكنتش متخيل أن الشغل هيكون كدا ابدا
انا هاخدهم و هبيع الفستان بربعمية جنيه
مش كتير شويه ؟؟
كتير مين ؟؟ دا الفساتين اللى زى دى تمن الواحد بيعدى الستميت جنيه انتى مش عايشه فى الدنيا و الا ايه ؟؟
اتفضلى يا ستى دول متين جنيه من تحت الحساب
متين جنيه مره واحده ؟؟
ايوا ...انتى حقك ٨٠٠ جنيه اصلا
و انت ليك ٣٠ جنيه عندى
يا ستى ما بين الخيرين حساب
لا معلش الحق حق
طيب خلاص اعتبريهم من اللى عليا ليكى
طب مش لما يتباعوا الاول ؟
هيتباعوا اكيد ..الشغل ده منزلش السوق قبل كدا ...دا عامل زى المستورد
انا فعلا نقيت التصاميم دى من مجلات اجنبيه
واضح جدا ...بقولك ايه تقدرى تعمليلى كام فستان فى اليوم ؟؟
اللى تقول عليه
يعنى تقدرى تعمليلى عشره و الا حتى عشرين
حيلك حيلك بالراحه مش لما دول يتباعوا
طيب خلاص خدى الخيوط دى و اعمليلى خمسه نفس التصميم ده
ماشى خلاص اعمل بقا صفحه و ايد فيها كل الحسابات دى
من عنيا يا ست اميمه ...معلش الكلام خدنا و معزمتكيش على حاجه
لا لا شكرا
لا و الله انتى مبقتيش غريبه ....ولا يا على هات شاى و فطار للانسه اميمه
لا و الله فطرت كتر خيرك
طب خليه شاى بس يا على
انتى بقى ساكنه فين ؟؟
ساكنه فى ....فى حته قريبه من هنا
طب كنت عاوز رقم المحمول عشان الشغل يعنى
لا ...منا ممعييش محمول
معقوله ؟ هو فى حد دلوقتى ممعهوش محمول ؟؟؟
هجيب واحد أن شاء الله قريب
و انا هستنى النمره
طيب استأذن انا دلوقتى
طب و الشاى ؟؟
مره تانيه باذن الله ...سلام عليكم
و عليكم السلام و رحمة الله و بركاته
خرجت من المحل و انا بتلفت حواليا ...انتى فين يا تلا ؟؟؟سبتينى ليه اول ما دخلت المحل ؟؟؟
يتبع ..
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
تعليقات
إرسال تعليق