ام فاروق

صباح الخير يا ام فاروق

صباح الفل يا حبيبتى صباحك قشطه 

و لا قشطه و لا نيله 

ليه كدا بس كفالله الشر 

كله من الراجل و عمايله 

ماله يا حبيبتى 

كان عند مراته التانيه بقاله اسبوع و يدوب دخل امبارح لاوى بوزه تقوليش شاف عفريت 

ليه كدا ؟؟ دا انتى قمررر 

شالله خليكى يا حبيبتى بس نقول ايه البعيد مبيفهمش 

و لا يهمك يا ام فاروق افرحى كدا يا اختى و متزعليش روحك محدش واخد منها حاجه

منا بحاول و الله يا ام محروس يا اختى ادينى خرطت الملوخيه اللى بيحبها اهو  و هعملهاله و كمان بقمع الباميه اهو عشان اعمله  طاجن باميه يستاهل بقك و بسلق جوز كوارع جوه ياك يطمر فيه 

ههههه هيطمر أن شاء الله بس انتى حبشيها كدا بورق لورا و مستكه و حبهان و جوزة الطيب و حاولى كدا تدلعى عليه و تصغرى صوتك و ترققيه كدا 

ارققه ازاى يا اختى علمينى ؟؟ 

يعنى بلاش تطبشى كدا فى الكلام ووطى صوتك و انتى بتتكلمى معاه اكنك عيله عندها عشر سنين  ، لما يقولك على حاجه متقوليش لا ، قولى اللى تشوفوا يا ابو فوفو 

ايه ؟؟ ابو فوفو ؟؟

ايوا دلعيه كدا ...هو الدلعدى جوزك اسمه الحقيقى ايه ؟

اسمه عتريس 

خلاص قوليله عنيا يا سى ريسو ، تحت امرك يا سي ريسو ، مقدرش أرفض لك طلب يا سي ريسو 

ريسو ايه دا ؟؟ عتريس يبقى ريسو ؟؟ عجبت لك يا زمن 

امال هو سابك و اتجوز عليكى ليه ؟

قصدك ايه يا ام محروس؟

متزعليش منى يا اختى انتى طول النهار تصرخى و تزعقى و صوتك زى الراجل ، طول النهار لابسه الجلابيه الغامقه مبتقلعهاش الا كل اسبوع مره ...ريحتك يا اختى بكون شامها من هنا 

انا ؟؟؟ فشرررررر هى مين دى اللى ريحتها طالعه بصى لنفسك يا اختى 

مالى بقا ؟؟؟ ماليه عين جوزى و مرحش اتجوز عليا و غسيلى قشطه قدامك اهو و كل يوم بلبس له الأحمر و الأخضر و الفوشيا و مدلاعاه اخر دلع 

ما هو باين 

ايوه امال دا كفايه انى كل تلات بروح حمام التلات اتكيس و اتدعك لحد ما اكون زى الفل و ريحتى مسك و عنبر 

حمام التلات ؟؟ اول مره تقوليلى انك بتروحى هناك 

لا دا انا على طول هناك لما قربت ابوش من كتر الدعك

طب ما تبقى تاخدينى معاكى ينوبك ثواب فيا 

عنيا يا اختى اخدك معايا 

و لو انى زعلانه من الكلام اللى قلتيه ليا دلوقتى 

معلش يا ام فاروق مش بقولك الحقيقه يا اختى عشان تاخدى بالك و ترجعى جوزك لحضنك 

عندك حق يا حبيبتى ال على رأى المثل يا بخت من بكانى و بكى عليا و لا ضحكنى و ضحك الناس عليا 

بالظبط كدا يا اختى 

يا ام فاروووووق 

نعم يا ررررريسو ...انا جايه اهو يا حبيبي 

#د_جيهان_عادل

تمت