القبيحه
#الجزء_التاسعة_عشر
و فجأه لقيت باب الشقه بيفتح
جالى ذعر شديد و مقدرتش حتى اقوم اشوف مين اللى بيفتح الباب
سمعت خطوات جايه ناحيه الاوضه ....
و الباب اتفتح ببص لقيت مريم اختى
عليه ...عليه
مريم فتحت النور و لقتنى نايمه بهدومى و جسمى كله بيترعش و هدومى مبلوله من العرق
انتى هنا يا عليه ؟؟ ...ياااا انتى سخنه اوى ...انتى عندك حمى و الا ايه ؟
معررررفش
قومى اتسندى عليا هننزل المستشفى
لا ...لا انا عاوزه اموت
انتى مجنونه تموتى ايه ؟؟ طب و عيالك دول يروحوا فين ؟؟
سبينى يا مريم سبينى
لا مش هسيبك انا لازم اتصل على جوزك دلوقتى يجى يلحقنا
لا لا... قدرى ...لا متقوليش لقدرى بالله عليكى يا مريم
فى ايه يا عليه ؟؟ أهدى أهدى مالك ؟؟
طب قومى معايا خدى دش عشان الحراره دى تنزل
مش قادره اقف
خلاص هنزل الصيدليه اجيب لك خافض للحراره و اجى
و نزلت مريم و لقيتها بعد شويه راجعه و معاها دكتور
الدكتور كشف عليا و ادانى العلاج و مريم عملت لى اكل و اكلتنى بالعافيه
بعد يومين اتحسنت حالتى الصحيه بس كنت طول الوقت ساكته
اختى حاولت تعرف ايه سبب حزنى بس مقدرتش اقولها
هى افتكرت أن خناقى مع قدرى و بعدى عن اولادى السبب و طبعا مجاش فى بالها أن اللى حصل ده ممكن يحصل
اختى اتصلت على جوزى من ورايا و قالت له على انى تعبانه و انها جابت لى الدكتور فى البيت
قدرى فى الاول مكنش عاوز يجى و قال لاختى أنه زعلان انى سبت البيت و العيال من غير اى تحمل للمسؤليه و انى كنت السبب انه يسيب شغله
مريم قعدت تطيب خاطره لحد ما جه
اول ما شفته قعدت اعيط و اصرخ فى مريم :
مين قالك تتصلى بيه ؟؟ مين قالك تكلميه ؟؟ انا عاوزه اتطلق خلاص ...مبقناش ننفع لبعض
جوزى بص لمريم و قالها
هى دى اللى جايبانى عشان اصالحها ؟؟؟ انتى جايبانى تهزأينى يا ام عبدالرحمن ؟؟
ما عاش اللى يهزأك يا اخويا ...فى ايه مالك يا عليه ؟؟ الراجل جاى لحد عندك ...عاوزه ايه تانى ؟؟
عاوزه يمشي و يطلقنى
انتى اكيد اتهبلتى فى عقلك
قدرى لما سمعنى بقول كدا راح واخد بعضه و ماشي قابل جوز اختى قدام الباب
جوزى اختى سلم عليه و حلف عليه أنه يدخل معاه تانى
قدرى كان متنرفز اوى و كنت سامعه صوته و انا جوه و سامعه جوز اختى عمال يهدى فيه
اختى بقت تبص لى و تقولى
عاجبك كدا هتطلقى و تروحى فين يا موكوسه ؟؟ و عيالك دول مفكرتيش هيعملوا ايه ؟
معاهم ربنا انا مش ممكن ارجع له تانى ابدا
ليه ؟؟ ايه اللى حصل لدا كله ؟؟ مكنوش كلمتين شدتوا قدام بعض بيهم
مين اللى قالك ؟؟ و عرفتى منين انى هنا اصلا ؟؟
اتصلت عليكى جوزك رد عليا و قالى انك زعلتى و مشيتى و انا قلت اكيد هلاقيكى هنا
يا مريم ريحينى انا مش هقدر ارجع لقدرى تانى ابدا ابدا
( قلت كدا و انهرت من العياط )
ليه ايه اللى حصل ؟؟ قوليلى انا اختك ...اكتر حد فى الدنيا تأتمنيه على سرك
انا خيبتى كبيره اوى يا مريم
خيبة ايه اعوذ بالله ؟؟؟؟؟
انا هحكيلك بس اقسمى بالله انك متحكيش الكلام اللى هقولهولك ده لأى حد فى الدنيا
اقسم بالله ما فى كلمه هتطلع من بقى من اللى هتقوليه دلوقتى
و حكيت لمريم على اللى حصل و بقت تلطم على وشها و انا بحكيلها
لحد ما خلصت الحكايه لقيتها بتحط أيدها على بؤقى و عنيها مليانه دموع
اكتمى ....اكتمى خالص متجبيش سيرة الكلام ده ابدا على لسانك ...انتى محصلش معاكى كدا ...انتى فاهمه ؟؟؟
متنطقيش ...قومى البسي و امشي مع جوزك و لا تحاولى تفتكرى اى حاجه انسي اللى حصل
اختى كانت فى حاله عصبيه خوفتنى جسمها كله بقا يترعش و دموعها نازله زى المطره و بقت تقوم فيا من عل السرير
قومى يلا هنغسل وشنا و نطلع للجماعه و تروحى معاه
بسس
مبسش اسمعى كلامى انا اختك الكبيره و عارفه مصلحتك
و قمت معاها غسلت وشى و طلعنا لجوزى و جوز اختى فى الصاله
كنت حاطه وشي فى الارض و مش قادره ابص لهم
اختى قالت لقدرى معلش يا ابو وليد عليه كانت واخده على خاطرها شويه عشان سبتها المده دى كلها بس خلاص انا راضيتها بكلمتين و الموضوع انتهى
جوز اختى قال كلمتين هو كمان و صالحنا على بعض و روحنا على بيتنا
قعدت فتره كبيره واخده جنب منه و مبنمش جنبه
لحد ما عرفت انى حامل فيكى و شكيت أن الحمل ده ميكونش منه
حاولت انزله بكل طريقه ...و هو كمان زى ما يكون شك فى حاجه لانه لقانى مش فى حاله طبيعيه
ساعتها ساب البيت و مشي و الدنيا اصلا كانت ضيقه معاه اوى و كان بيدور على شغل
عملت كل حاجه عشان انزلك منزلتيش و لما قلت لمريم قالت لى ما يمكن يكون اللى فى بطنك ابن قدرى ...انتى عرفتى ازاى أنه مش منه ؟؟ و على العموم الولد ابن الفراش يعنى كدا كدا هيتكتب باسمه
مرت ايام و معرفتش انزلك و اتصالحت على قدرى و رجع البيت و لقى شغل
جه يوم الولاده ...وولدتك
اول ما شفتك عرفت انك مش بنت قدرى
قدرى كمان شفت نظره غريبه فى عينه عمرى ما انساها ابدا
من اليوم ده حصل شرخ كبير بينى و بينه و بقينا اتنين اغراب عايشين تحت سقف واحد
انا بموت كل ما اشوفك بتكبرى قدامى و بتفكرينى بغلطتى
و هو الشك مالى قلبه بس مش قادر يتكلم لانه ميملكش اى دليل 😔
خلاص يا ماما كفايه متتعبيش نفسك اكتر من كدا انا كنت عارفه أن قدرى مش والدى
عرفتى منين ؟؟ خالتك اللى قالت لك ؟؟
لا ...عرفت لوحدى ...بس مكنتش اعرف الحكايه بالظبط
عارفه انا قولت لك الحكايه دى ليه دلوقتى ؟؟
ليه ؟؟
عشان تسامحينى ...انا ظلمتك كتير على غلطه ملكيش ذنب فيها ...بس صدقينى يا بنتى غصب عنى
انا مسمحاكى يا ماما و عاوزاكى متتكلميش فى السر ده ابدا تانى زى ما خالتو مريم قالت لك
حاضر يا بنتى
خرجت من عند ماما و الدنيا بتلف بيا ....اى نعم علاقتى هتتصلح بيها زى ما دعيت ربنا كتير اوى بس للاسف هتتصلح على حساب معرفة الحقيقه اللى كانت صعبه اوى اوى
اخواتى سألونى ماما كانت عاوزاكى ليه ؟
قلت لهم ماما كانت بتصالحنى على اى حاجه عملتها معايا
اخواتى بصوا لى و متكلموش بس كنت شايفه الدموع فى عنيهم
و انا كمان كنت ماسكه نفسي بالعافيه
مشيت من قدامهم و دماغى بتفكر فى سعودى ...لازم اروح له و اشوفه فين
لازم يعرف غلطته نتج عنها ايه ؟
بس ازاى ؟ انا كدا هفضح نفسي و هفضح امى
طب حتى اشوف شكله
حاجات كتير كانت بتدور جوه دماغى زى الطاحونه اللى بتلف
رجعت البيت معرفش ازاى و دخلت على اوضتى
رميت نفسي على سريرى و بكيت بكيت كتير اوى
فجاه سمعت صوت تلا
اميمه ... اميمه
تلا ؟؟؟🥺
يتبع ..
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
ياتري تلا اتفكت ولا حلم بردو
ردحذفجميل اوى ان تلا رجعت تانى 👏🏻👌🏻
ردحذفجميل اوى ان تلا رجعت تانى 👏🏻👌🏻
ردحذفازاي سعودي هيكون عايش وهو لما اعتدى ع امها كان كبير ف السن اصلا
ردحذف
ردحذفجميله يا دكتوره