القبيحه
#الجزء_العشرون
رجعت البيت معرفش ازاى و دخلت على اوضتى
رميت نفسي على سريرى و بكيت بكيت كتير اوى
فجاه سمعت صوت تلا
اميمه ... اميمه
تلا ؟؟؟🥺
ايوه يا اميمه انا جيت
كنتى فين يا تلا ؟؟ سبتينى ليه و مشيتى ؟؟
غصب عنى يا اميمه
غصب عنك ازاى ؟؟
لما رفضتى مساعدتى ليكى رغم تحدى كل عيلتى عشانك انا زعلت منك بس قررت انى مش هغيب عنك كتير هو يوم او اتنين من ايامكم و ارجع لك تانى
لكن اول ما وصلت عند اهلى لقيتهم كلهم اجتمعوا حواليا و قالولى
هى دى اللى اتحدتينا كلنا عشانها ؟؟ اهى قالت لك بصريح العباره ابعدى عنى ...منتظره ايه تانى ؟
اميمه محتاجانى ...هى متقصدش
مفيش حاجه اسمها متقصدش ...هى مش عاوزاكى معاها خلى عندك كرامه بقا
انا عندى كرامه و مش هسيب اميمه انا بدأت معاها مشوار و لازم اكمله
و احنا مش هنسمح لك تمرمطى بكرامتك و كرامتنا الأرض كدا
و فى لحظه واحده لقيت القيود فى ايديا و اخدونى و حبسونى فى كهف جوه جبل الآهات
جبل الآهات ؟؟؟
ايوه بيسموه كدا من كتر الآهات اللى بتتقال فيه لأنهم بيحبسوا اى حد بيخرج عن إرادتهم جواه
ها و بعدين ؟؟؟
لما اتخانقتى مع امك و اخواتك و كشفتى سر امك قدامهم و انا كنت واخده منك العهد انك متقوليش اهلى عرفوا و جم عملولى محاكمه تانيه و أيدوا رقبتى و اديا و رجليا و حكموا عليا بخمس سنين
ياااا خمس سنين ؟؟
احنا عندنا الزمن غير عندكم.... خمس سنين عندنا بتعادل تلات شهور عندكم
كملى يا تلا
لما اتصالحتى مع امك و سامحتيها طلبت انى أقابل امى كهرمانة بنت الملك الاحمر
و قلت لها انى كنت صح و انى لازم ارجع لك علشان اكمل مسيرتى معاكى و اساعدك و أن انتى دلوقتى محتاجانى عن اى وقت فات
امى رقت لحالى و كلمت كبار العشيره و وافقوا انى أخرج و اجيلك
فعلا يا تلا انا محتاجاكى اوى اوى بس قبل كل ده انا بعتذر لك عن اى حاجه وحشه حصلت ليكى بسببى
انا مش زعلانه يا اميمه كل شئ مقدر علينا و كل شئ ربنا كاتبه لنا هنشوفه
انا تعبانه اوى يا تلا طول عمرى عايشه مذلوله و فى الاخر كمان اعرف انى نتجت من غلطه يعنى مليش اب شرعى زى كل الناس ...كان له حق والدى.. اقصد استاذ قدرى أنه مبيصش فى وشي كان له حق أنه ميعاملنيش زى اخواتى ...كتر خيره اصلا أنه وافق يدخلنى المدرسه ويعيشنى جوه بيته
انتى بتحاسبي نفسك على غلطه ملكيش ذنب فيها ليه يا اميمه ؟؟ ليه مصممه تدفعى تمن غلطه معملتهاش ؟؟؟
مقدرش اهرب من الواقع يا تلا
الواقع ده احنا اللى بنعمله بأيدينا ..احنا اللى لازم نفرضه على كل اللى حوالينا ...ليه نخلى واقع مش بتاعنا يأثر علينا و يتحكم فينا ؟
الكلام سهل يا تلا بس الحقيقه صعبه و بتجرح اوى
بايدك تغيرى كل ده ...و مدام انتى مغلطتيش يبقى مش مطلوب منك تتحملى غلط غيرك
بس انا لازم اروح له و اشوف البنى ادم اللى عمل الغلطه دى و مر كأنه معملش اى حاجه
هتستفيدى ايه ؟؟
معرفش بس انا عاوزه اشوفه و خلاص يكفى أنه هو السبب فى كل العذاب اللى حسيت بيه فى حياتى و اللى لسه هحس بيه كمان
صدقينى يا اميمه رؤيتك ليه مش هتحرق غيرك انتى ...هو و لا يعرفك و لا هيعترف بوجودك اصلا و تلاقيه مش فاكر والدتك اصلا
معلش يا تلا بس على الاقل اشوف شكله ايه ؟
طيب انتى تعرفى مكانه ؟؟؟
اعرف أنه قريب من بيت جدى و أنه اسمه سعودى و اعرف اليافطه بتاعته
بس الكلام ده من اكتر من ١٨ سنه يعنى وارد أن يكون كل ده اتغير
ريحينى يا تلا ...هتيجى معايا و الا لا ؟؟
هاجى معاكى بس على شرط
شرط ايه ؟؟
اوعدينى أن مهما تشوفى متعمليش اى رد فعل ...اتفرجى من بعيد لبعيد و بعد ما نرجع عاوزاكى تنسي سعودى ده نهائى و اى حكايه تعرفيها عنه و تحاولى تعيشي حياتك بقا
اوعدك يا تلا
يلا بينا
و رحنا عند بيت جدى و فضلت اسال عن محل ملابس جمله فى المنطقه محدش كان عارفه لحد ما فقدت الامل انى الاقيه
و مكنش قدامى غير حل واحد بس علشان اعرف بيه المكان
كنت ماشيه اكلم نفسي و اقولها ... ( انا كنت متخيله أنه جنب بيت جدى بس لا مطلعش زى ما تخيلت
لازم اعرف المكان من خالتى مريم ...اكيد امى قالت لها على مكانه )
يلا بينا يا تلا
على فين يا اميمه ؟؟
هنروح لخالتى مريم اسألها عن مكان المحل
انتى اتجننتى ؟؟ عاوزه تعرفى خالتك انك عرفتى ؟؟
و دى فيها ايه يعنى ؟؟ ما هى عارفه كل حاجه
لا يا اميمه ...مينفعش تعملى كدا
منا لازم اعرف طريقه
هقولك انا و امرى لله
ايه دا ؟ انتى تعرفى و سايبانى الف من الصبح
لا انا معرفش فين بالظبط بس افتكر أن امك حاطه الكارت بتاعه فى دولاب فى بيت جدك
طب و انا هدخل بيت جدى ازاى بقا ؟؟ انا ممعييش مفتاح
عيب عليكى تسألى سؤال زى ده و انا معاكى ...يلا بينا هفتح لك الباب بعصايتى السحريه
يا سلام ...( ابرا كدبرا ) و كدا صح ؟؟
ايون
طب ورينى يا فالحه
انتى بتشكى فى قدراتى ؟؟؟
لا ابداااا ...اتفضلى ورينى
تلا طلعت العصايه الدهبيه بتاعتها و شاورت على القفل و فى ثوانى كان القفل اتفتح
تلا بصت لى بصه اعتزاز و افتخار بنفسها و هى مربعه اديها و طايره جنب كتفى
لا طلعتى معلمه يا تلا صحيح
طبعا طبعا لا داعى للتصفيق
دخلت بيت جدى و دورت على الكارت فى الدولاب و فعلا لقيته تحت جرنال قديم اصفر مفروش فى درفة الدولاب
العنوان فعلا بعيد عن بيت جدى و مش موجود فى المكان
ركبت تاكسي و طلبت منه يوصلنى للعنوان
ووصلت للشارع اللى فيه المحل و بدأت اسال عليه و برده محدش عرفه
لحد ما وصلت لمحل ادوات صحيه كان واقف فيه راجل عجوز و سألته عليه
سلام عليكم يا حج
و عليكم السلام يا بنتى
متعرفش واحد هنا اسمه سعودى كان فاتح محل ملابس جمله ؟؟ اسمرانى هو كدا
سعودى ؟؟؟ اااه افتكرت
عارفه ؟؟
ايوه اعرفه الله يسامحه بقا
طب ممكن تدلنى على مكانه ؟؟
بسيطه يا بنتى ..هتلاقيه هناك فى ترب الغفير
بيعمل ايه فى ترب الغفير دى ؟
ههههههه هيكون بيعمل ايه يعنى ؟؟ مات و شبع موت من حوالى ١٥ سنه
مات ؟؟؟؟
ايوه اتقتل
اتقتل ازاى ؟؟
مفيش داعى بقا يا بنتى اذكروا محاسن موتاكم
لا ارجوك انا عاوزه اعرف عنه كل حاجه
ممكن اعرف بتسألى عليه ليه ؟؟؟
ليا و لاهلى دين قديم فى رقبته و مظلمه كبيره اوى
و اهو ربنا اخد لكم حقكم و حق كتير ظلمهم
طب قولى اتقتل ليه و ازاى ؟؟
يتبع ..
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
ياترى هايقولها على حكاية قتله دى ولا لا 🤔
ردحذف