#القبيحه
#الجزء_السابع_عشر
تلا اختفت فى الحلم و الدنيا اسودت حواليا و مبقتش شايفه اى حاجه
فوقت و انا حاسه بالألم الشديد و الحسره و مش عارفه اعمل ايه و اتصرف ازاى 😔
قمت من النوم متأخر بصيت فى ساعه الموبيل لقيت الساعه بقت تسعه
لبست فستان جديد من اللى اشتريتهم و اخدت شنطتى اللى فيها الفساتين و خرجت
لقيت ماما قاعده فى اوضتها و قافله على نفسها على غير العاده
خرجت و مهمنيش شئ
كل اللى كان بيدور فى دماغى هى تلا ...
ازاى اذيتها ؟ يكونش عشان كشفت السر اللى حلفتنى انى مقولوش ؟؟ و الا عشان انا دورت فى كتب السحر و حبيت أاذى اللى اذونى ؟؟
طيب يا ترى ايه اللى ممكن اعمله عشان انقذها من اللى هى فيه ؟؟
يا ترى هشوفها مره تانيه و الا كدا خلاص معدش فيه تلا ؟؟؟
هى قالت لى كل واحد منا بقا له طريق ...بس انا مش قادره اعيش من غيرها ... هى الوحيده اللى حسستنى انى انسانه و ليا كيان ...انا محتجاها اوى اوى
محتاجه تكون دليلى اللى يعرفنى الصح من الغلط ...محتاجه تكون اختى و امى و كل قرايبي ...محتاجه نظرت عينها ليا اللى عمرى ما شفت فيها انها متضايقه من شكلى زى بقية البشر
يا رب ....زى ما رزقتنى بيها رجعهالى يارب
فضلت ماشيه فى طريقى و انا بفكر فى تلا لحد ما وصلت للمحل
رحت لعمرو و سلمته الفساتين و لاحظ انى مسهمه و مبتكلمش معاه زى كل مره
ممكن أسألك سؤال لو مش هتضيقى يعنى ؟؟
اتفضل
مالك يا اميمه ؟؟
مفيش حاجه
ازاى مفيش حاجه انا اول مره اشوفك كدا من اول ما عرفتك
موضوع كدا شاغلنى
طب ما تحكيلى
مش عاوزه ادوشك
عيب تقولى كدا ...انتى مش بتعتبرينى اخوكى و الا ايه ؟؟
ايوا طبعا
طيب ما تحكى يمكن اقدر اساعدك
ليا واحده صاحبتي ساعدتنى كتير و يمكن هى الوحيده اللى حبتنى و اتعلمت منها كتير
عظيم جدا
بس هى فى ضيقه و زعلانه منى لسبب ما و مش عارفه افك ضيقتها دى ازاى و لا عارفه هى زعلانه منى ليه اصلا
دى حاجه سهله اوى
سهله ازاى بقا ؟؟
راجعى كلامها معاك و شوفى اخر لقاء بينك و بينها ايه اللى خلاها تزعل منك و اعتذريلها عنه و صالحيها
عندك حق ....استأذن انا بقا
مستعجله ليه ؟؟
مفيش.... لازم اروح عشان اعمل الشغل اللى طلبته منى
طيب فلوس الشغل بتاع الفساتين اهو
متشكره
دا انا اللى متشكر ليكى ..الفساتين اللى بتعمليها هى اللى شغلت المحل التانى انا مش ملاحق على الطلبات
ربنا يزيدك من نعيمه يا رب
مشيت من عند عمرو و انا بفكر فى كل كلمه قالها ليا
تلا مشيت لما قولت لها ملكيش دعوه و متدخليش فى حياتى مره تانيه و دى كانت غلطه منى لأنها كان يهمها مصلحتى
كمان هى زعلت منى لما قلت على السر و المفروض انى مكنتش نطقت ...انا لازم اصلح غلطتى و اعتذر لماما
لفيت فى الشوارع كتير و انا بكلم نفسي ، حاجات كتير بتتردد جوه نفسي ، احاسيس متناقضه ، بين الخير و الشر ..بين انى اعتذر و بين انى استمر فى انتقامى منهم
كنت حاسه ان جوابا حرب ... حرب مش هتنتهى الا اما تدمر كل شئ
روحت البيت لقيت امى فى اوضتها و اخواتى فى اوضهم ...البيت ساكت على غير العاده
دخلت اوضتى و قعدت على سريرى و قررت ألغى موضوع الكتاب لانى توصلت ان الانتقام اول ما بيحرق بيحرق صاحبه
و بالفعل دخلت على النت و لغيت الاوردر
فات شهر على الحال ده كل يوم أخرج اروح لعمرو اديله الفساتين و ارجع مشوفش حد كله قافل على نفسه و البيت بقى سكووون
لحد ما فى يوم سمعت دعاء بتصرخ و تنادى وليد و بتقوله ماما تعبانه اوى و بوقها اتعوج و أيدها و رجلها مبيتحركوش
جريت عشان اشوفها و كنت حاسه انى السبب فى اللى حصل لها ده
وليد وقف تاكسي و صممت انى اروح معاهم
روحنا مستشفى حكومى بس الدكاتره قالوا إنها اعراض جلطه و أن لازم تدخل عنايه مركزه و طبعا مفيش عنايه هناك
قلت لوليد تعالى هندخلها عنايه مركزه فى مستشفى خاص
انتى عبيطه؟؟ انتى متعرفيش المستشفى الخاص دى هتطلب كام ؟؟؟ هنجيب منين يا فالحه ؟؟
ملكش دعوه انا معايا
و فعلا رحنا مستشفى التيسير الخاصه و طلبوا مننا عشر الاف جنيه تحت الحساب
دفعتهم و دخلتها العنايه
المستشفى طلبت أن يرافقها واحد بس طلبت من اخواتى انى انا اللى أرافقها قالوا لا عشان شغلك
كلهم كانوا مستغربين انا جبت الفلوس دى منين بس مقدروش يسألونى
روحت البيت و انا حاسه بتأنيب الضمير
انا السبب ...مكنش لازم اقولها اللى قولته
قعدت فى البيت اربع ايام من غير ما اعمل اى حاجه غير انى اصلى و ادعيلها
بعدها لقيت وليد جاى لى البيت و بيقولى
ماما عاوزه تشوفك
عاوزه تشوفنى انا ؟؟؟
ايوه
قمت لبست بسرعه و اخدت معايا فلوس تانيه و رحت المستشفى
اول ما دخلت على امى لقيتها شكلها متغير اوى
وشها اصفر و خاسس جدا ...الشعر الابيض مالى دماغها ...التجاعيد ماليه وشها ...من زمان و انا مبصتش لها بالقرب ده
ملامحها كانت غايبه عنى
كنت بشوفها من بعيد و بدون تركيز لانى كنت دايما حاطه وشى فى الارض
لما دخلت على امى لقيتها نايمه و كانوا نقلوها من العنايه إلى اوضه عاديه
فضلت واقفه جنبها أتأمل فى ملامحها حوالى ربع ساعه و دموعى نازله على خدى من غير اى صوت
امى فتحت عينيها و بصت لى و ابتسمت
اول مره فى حياتها تبتسم ليا
مسحت دموعى بسرعه و هى شاورت لى بايدها انى اقرب منها
قربت منها و مسكت أيدها اللى اتملت تجاعيد و قعدت ابوس فيها
نزلت دموعها و قالت لى
انا عرفت انك دفعتيلى كل مصاريف المستشفى
متتكلميش يا ماما متتعبيش نفسك
سامحينى يا بنتى
مسمحاكى بس متتعبيش نفسك
لا انا لازم اقولك على كل حاجه علشان تعرفى...
يا ماما ارجوكى متتكلميش ..انتى تعبانه ...لما تقومى بالسلامه نبقى نتكلم سوا
لا ...انا ...خايفه ..اموت من غير ما احكيلك ...لازم تعرفى الحقيقه ...كامله ...ريحينى ...يا بنتى ...
طب قولى يا ماما
الحكايه.. يا بنتى .....
يتبع ..
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
ياخبر لو امها حصل لها حاجة هاتشيل الذنب طول عمرها
ردحذفياخبر لو امها حصل لها حاجة هاتشيل الذنب طول عمرها
ردحذفبجد انتي رائعه
ردحذف