القبيحه الجزء الثالث

#القبيحه

#الجزء_الثالث

خرجت بسرعه زى السهم و قلت لها 

الكتب اللى كانت فى الاوضه فين ؟؟

بعناهم ....اهم جابوا قرش يساعدونا فى المعيشه ...عندك اعتراض و الا ايه ؟؟

دخلت الاوضه من غير ما ارد عليها بس كنت حاسه ان روحى اتسحبت منى 

حتى اعز ماليا استخسروه فيا و اخدوه منى 😔

انا اسفه انى معرفتكمش على نفسي كويس ، خدنى الكلام و مقلتش ايه سر أن عيلتى بتعاملنى بالطريقه دى و بتكرهنى الكره دا كله ....

هرجع بيكم لورا شويه و هكيلكم البدايه جت منين 

البدايه من اول ما امى عرفت انها حامل فيا و كانت استكفت بالتلات عيال اللى عندها لأن الحال كان على اده اوى 

ابويا لما عرف انها حامل للمره الرابعه ثار و زعل و سبلها البيت و مشي و دى كانت أول مره يسيب البيت و يمشي 

امى كرهتنى من قبل ما تشوفنى و حاولت تنزلنى بأى طريقه 

عملت كل الوصفات البلديه اللى الستات قالولها عليها 

جابت برشام من واحد صيدلى قريبها عشان تنزلنى و لكن للاسف معرفتش 

قدره ربنا و إرادته كانت فوق اى ارداه 

و نزلت للدنيا بعد الم شديد وولاده متعثره أدت لنزيف و استئصال الرحم لوالدتى 

ساعتها الكل قال انى السبب ...و معرفش انا السبب ليه ؟؟ 

طبعا انا اتولدت و شكلى مش طبيعى الكل كان بيقول انى طفل منغولى يعنى هطلع متاخره عقليا 

دماغى كبيره جدا ، سمرا اوى ، عنيا فيها حول ، شعرى مجعد جدا زى الليفه السلك 

مناخيرى معوجه ، بوقى كبير جدا و شفايفى غليظه 

كل الأوصاف دى عكس اخواتى تماما 

بعد ما اتولدت بتلات أيام اخويا وليد وقع من على سور البلكونه و ايده انكسرت ...كان عمره ساعتها سبع سنين 

طبعا الكل قال إن وشى الفقر كان السبب 

امى كانت تسيبنى من غير رضاعه زى ما قلت لكم قبل كدا على أمل انى اموت و اريحها و بالرغم من كدا كان عندى تشبث عجيب بالحياه معرفش ليه 

لما تميت السنه ...يوم عيد ميلادى بالظبط ابويا عرف أن عنده السكر و طبعا كانت محزنه فى البيت و الكل اتهمونى بانى السبب برده 

لما وصلت لست سنين و كنت منبوذه تماما فى البيت امى مكنتش عاوزه تودينى المدرسه و لكن أنا كنت بتمنى و كنت بعيط كتير اوى لربنا و اطلب منه انى أخرج لانى كنت محبوسه دايما

المره الوحيده اللى اتجرأت و انا صغيره انى اروح لوالدى و أكلمه كانت المره دى 

طلبت منه أنه يودينى المدرسه و مش عاوزه اى حاجه فى الدنيا بعد كدا 

ابويا سمعنى و مردش عليا 

و سمعته بيقول لوالدتى على طلبى و هى كانت رافضه جدا و قالت له انت عاوز تفضحنا ؟؟؟

و ايه الفضيحه فى كدا يا عليه ؟؟؟

انت مش شايف شكلها عامل ازاى ؟؟ دى متخلفه 

لا يا عليه انتى عارفه كويس أن اميمه مش متخلفه و لا حاجه بس هى شكلها كدا 

و انا بقا هصحى كل يوم اسرح للست الهانم و اعملها السندوتشات ؟؟؟

طب و ماله ؟

لا انا مش عاوزه اشوفها و لا ابص فى وشها 

خلاص نقص لها شعرها زى الولد و هى بقا تبقى تاكل اى حاجه او لما ترجع و خلاص

يوووو يا قدرى انت مصمم تفضحنا و تفرج الناس علينا 

يا ستى هريحك منها و مش هتبقى فى وشك طول النهار 

طيب اللى تشوفه 

طبعا ابويا مجبليش و لا شنطه جديده و لا مريله جديده ...و اكتفى بمريله دعاء اختى القديمه و شنطة وليد المقطوعه 

بس انا مهمنيش برده المهم انى كنت أخرج للدنيا و اتعرف على أصحاب زى ما كنت اسمع اخواتى بيتكلموا عن اصحابهم 

اول يوم رحت المدرسه الكل بقا يبص لى كأنى كائن فضائي نزل من السما

بقا يشاوروا عليا و يضحكوا و انا مش فاهمه بيضحكوا كدا ليه 

انا كنت بعرج برجلى شويه لانى لما كان عندى أربع سنين وقعت عليها و طبعا متعالجتش فعملت لى زى عاهه كدا و بقيت امشي اعرج لحد دلوقتى 

العيال بقوا يجروا بعيد و يشتمونى و يتنمروا على شكلى لحد ما جت بنت كانت عامله نفسها زعيم عصابه و كانت بنت مؤذيه اوى اسمها هند و طلعت عليا اسم الوحش 

و من اليوم ده بقت كل العيال تنادينى الوحش 

كنت بتضايق اوى من الاسم ده بس مكنتش اقدر اقول لحد انت بتقول كدا ليه 

العيال كانوا يستنونى فى اخر اليوم الدراسي و يحدفونى بالميه اللى معاهم و ساعات بالتراب كمان 

كنت دايما اسال نفسي ليه بيعملوا كدا معايا و انا عمرى ما اسأت إلى حد فيهم ؟

ليه الناس دايما بتيجى على الضعيف اللى ملوش حيله و لا ضهر ؟

ليه الناس تكون ظالمه بالشكل ده ؟

طب مش عارفين أن فى رب بيحاسب ؟ و هيحاسبهم عن اى أذى نفسي سببوه لبنى ادم زيهم مرتكبش اى جريمه غير أن شكله مختلف عنهم ؟ 

هند دى مكنتش بتسبنى فى حالى ابدا و كانت دايما تضربنى لانى اشطر منها كتير 

كانت تتغاظ جدا انى كنت بجيب دايما الدرجات النهائيه 

و كان اليوم اللى المدرس يقول فيه الدرجات و يقول انى الاولى على الفصل كان يوم ميعديش 

كانت تستنانى بره و تضربنى هى و العصابه بتاعتها 

مكنتش اقدر اشتكى لاهلى لانى كنت اخاف ان امى تقعدنى فى البيت و متخلنيش اروح المدرسه تانى 

عدت المرحله الابتدائيه بكل قرفها و جبت ٩٩ فى الميه 

امى قالت لابويا يقعدنى بقا لانى خلاص بقيت افك الخط و هعوز التعليم فى ايه ؟ 

بس ابويا قالها حرام البت جايبه مجموع كبير مفيش حد من ولادك جابه سبيها تكمل 

ضحكت و هى بتسخر من كلامه و بتقوله ليه أن شاء الله هتكون دكتوره ؟؟؟ 

و الله مش بعيد على ربنا البت شاطره مع انها مبتخدش اى دروس 

و مش هتاخد انا بقولك اهو ..علشان لو جت قالت عاوزه درس انجليزى و الا رياضه ممعييش انت بتدينى مصروف كام يعنى ؟؟

ابويا سكت و انا وصلت لى الرساله و قلت خلاص مش عاوزه اى دروس بس ادخل إعدادى و احقق هدفى

فى الاعدادى المديره كانت شارطه أننا نتحجب و كانت فرصه بالنسبالى انى البس ايشارب و اغطى كمان وشي علشان اللى حصلى فى الابتدائى ميتكررش فى الاعدادى مره تانيه 

بس للاسف لقيت هند دخلت معايا نفس المدرسه و بقت تشد الايشارب من على وشي علشان تضحك عليا البنات اللى متعرفنيش

لحد ما فى يوم فاض بيا الكيل و قربت منى زى كل مره و لسه هتشد الايشارب رحت ماسكاها بكل قوتى و بكل غل السنين اللى جوايا من ناحيتها و بقيت اضرب فيها بلا وعى ...قطعت لها شعرها مخلتش فيه حته سليمه ، مسكت دماغها و ضربتها فى الرصيف لما بقت تجيب دم من كل حته عرفت بعد كدا انها اتخيطت عشر غرز

البنات كلها كانت واقفه تصرخ و محدش اتجرئ أنه يقرب منى لانى بالفعل كنت هفرمه 

اخدت حق سنين كانت بتسبب لى الم فيهم بس للاسف النتيجه كانت انى انفصلت من المدرسه بعد استدعاء ولى امرى 

امى لما عرفت قالت لابويا خلاص كفايه عليها لحد كدا ...انت هتستنى لما تقتلنا حد ؟؟

ابويا وافق على كلامها لانه كان متعصب جدا 

كلهم شافوا رد الفعل و لا حد فيهم سأل نفسه ايه الفعل اللى عملته هى اللى يخلينى اعمل فيها كدا ؟؟ 

هما شافونى انى المعتديه بس الحقيقه انى انا المجنى عليها 😔

يتبع ..

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ...