الخطيئه الجزء السابع والاخير

#الخطيئة

#الجزء_السابع_والاخير

قصص رعب روايات جميلة روايات رومانسية روايات اون لاين روايات كاملة كتب وروايات

هربت و انا مش عارفه اروح فين ؟؟

المهم انى امشي و خلاص 

طب اروح لامى ؟؟؟ بس هى اتبرت منى خلاص و مبقتش عاوزانى 

طب اروح ادور على ابويا ؟؟

ابويا مين اللى مسألش علينا و لا يعرف عنا حاجه و بعدين مش بعيد يقتلنى بعد اللى حصل ده

طب امشي فى الشوارع و خلاص ؟

منا خايفه من الشارع و اللى فيه و يمكن وائل يدور عليا و يلاقينى و يحبسنى مره تانيه 😔

فضلت ماشيه فى الشوراع لحد ما رجليا وجعتنى و حسيت انى تعبانه اوى خاصه انى كان بقالى يومين مكلتش 

قعدت استريح شويه على الرصيف و كان باين عليا الإجهاد جدا 

لقيت ايد بتطبطب عليا 

رفعت بصرى لقيت ست كبيره يمكن عندها ستين سنه و بتمد لى أيدها بكيسه سندوتشات ...زى ما يكون ربنا بعتها ليا 

خدى يا بنتى ...كلى ...شكلك تعبانه اوى و باين عليكى الإرهاق 

بصيت لها و مقدرتش انطق قعدت اعيط 

الست قعدت جنبى على الرصيف و طبطبت عليا و اخدتنى فى حضنها و قالت لى مالك بس ايه اللى مزعلك ؟؟

الدنيا اللى مزعلانى 

دنيا ايه ؟؟ انتى لسه لا رحتى و لا جيتى ...امال اما يبقى عندك خمسه و ستين سنه كدا زيى هتعملى ايه ؟؟

ربنا يديكى الصحه 

طب كلى و احكيلى حكايتك يمكن اقدر اساعدك 

و فعلا اكلت زى المفجوعه كنت ببلع بس من غير مضغ من كتر الجوع 

هى بصت لى بحنان و قالت لى يااا شكلك كنتى جعانه اوى 

انا بقالى يومين مكلتش 

و ليه كدا يا بنتى ؟؟

و حكيت للست فريده كل حكايتى ...كانت بتسمعنى و هى ساكته 

بعد ما خلصت كلامى قالت لى 

انا مش هقولك انك غلطانه لانك اكيد عارفه 

ايوه عارفه 

بس هقولك كلمه واحده متستمريش فى الغلط 

يعنى ايه ؟؟

يعنى انتى غلطتى و كلنا بنغلط احنا مش ملايكه بس الغلط الاكبر بقا انك مترجعيش لامك و تضيعى بشكل نهائى

و هو انا كدا مضعتش ؟؟

لا مضعتيش لسه ...الضياع الحقيقى بقا انك تتوهى فى الشارع و تبقى بنت شوارع ..انتى بتقولى أن امك كانت حنينه عليكوا دايما و كانت بتحاول تساعدكم و تفرحكم على اد ما تقدر

ايوه 

يبقى خلاص لازم ترجعى مهما كانت العواقب لازم تواجههى و تعتذرى ...لازم تبردى قلب امك اللى محروق عليكى دلوقتى

عندك حق بس انا خايفه 

متخافيش ... صدقينى مهما تعمل فيكى امك مش هيكون زى اللى شوفتيه و الا اللى لسه هتشوفيه فى الشارع 

الست طبطبت عليا و قامت من جنبى اختفت وسط الزحمه ...لدرجه انى تخيلت انها مش انسانه ...اكيد دى ملاك ربنا بعتهولى علشان يرشدنى للصواب

قررت اروح لامى و اللى يحصل يحصل منا مليش غيرها فى الدنيا دى

هروح و اوطى على رجليها ابوسها و استسمحها تسامحنى 

و فعلا رحت على البيت ...خبطت و انا قلقانه من رد فعلها و متخيله انها اول ما تشوفنى هتضربنى أو تقتلنى بس انا خلاص مبقاش يفرق معايا شئ حتى لو قتلتنى انا موافقه على الأقل اخلص من العار اللى انا فيه ده 

لما خبطت على الباب سها اختى فتحت لى ، اول ما شافتنى صرخت 

الحقى يا ماما ...اروى رجعت 

لقيت امى جايه بالعافيه و نها بتسندها و جايه و دموعها مغرقه وشها 

انتى جيتى يا اروى ...جيتى يا حبيبتى ...اهون عليكى تعملى كدا فى امك 

امى اخدتنى فى حضنها ....( ياااااا كنت محتاجه الحضن ده من زمان ...ادفى حضن حسيت بيه فى حياتى )

سامحيني يا امى حقك عليا ...سامحينى 

مسمحاكى يا ضنايا ....مسمحاكى بس ليه غبتى كدا ؟؟ ليه مرجعتليش على طول 

عشان قالولى انك مدورتيش عليا و اللى كان بيسالك عليا كنتى بتقوليلهم معنديش بنت اسمها اروى. 

هما مين اللى قالولك دول يا بنتى و كنتى طول الفتره دى مع مين و بتعملى ايه ؟

هقولك يا اما 

قبل ما تقوليلى ..انا يا بنتى دورت عليكى فى كل مكان مسبتش قسم و لا مستشفى و لا حته ممكن تكونى رحتى فيها إلا و سألت عليكى 

من ساعة ما مشيتى و انا جالى السكر و الضغط و دخلت المستشفى اكتر من مره

مكنتش مصدقه انى هشوفك تانى 

غير بقا أن ابوكى افتكر دلوقتى أنه له بنت و راح عمل فيا بلاغ بالاهمال و انى سبتك تمشي

سامحينى يا امى انا غلطت غلط كبير اوى

احكيلى يا اروى على كل حاجه 

حكيت لامى على كل اللى حصل من اول ما وائل كلمنى و خلانى سرقت الفلوس و اخدنى عندهم و اقنعونى أن امى مبتدورش عليا و انى لازم احمل من ابنهم و فعلا حملت و كان بيضربنى و يعذبنى 

امى كانت بتسمعنى و دموعها نازله على خدها و اول ما عرفت انى حامل قعدت تلطم على وشها و تصرخ لحد ما اغمى عليها 

قعدت افوقها انا و اخواتى و قلت لها حقك عليا انا همشي و مش هتشوفى وشي تانى بس سامحينى

امى اخدتنى فى حضنها من غير و لا كلمه و قعدت تعيط 

للاسف جبت لامى و اخواتى العار و بقا الكل بيتكلم عنى انى هربت مع واحد و رجعت حامل 

كسرت امى و خليتها تمشي موطيه دماغها بين الناس و مع ذلك كانت احن الناس عليا

دلوقتى انا ولدت من شهرين و طبعا ابو الطفل و لا سأل فيه و لا أهله سألوا عليه و انا مش عارفه اتصرف لا انا و لا امى 

ببقى نايمه و سامعه امى بتعيط بالليل و بتدعى ربنا و مش قادره اقولها شئ 

انا نفسي اكمل تعليمى ...نفسي ارجع اروى اللى امها كانت فخوره بيها 

لكن للاسف انا خلاص انتهيت و جنيت على امى و اخواتى كمان 

انا عاوزه أوجه كلمه لكل بنت بتكلم ولد من ورا اهلها ...

اوعى تخونى ثقة اهلك فيكى ...اوعى تصدقى حد يقولك انا بحبك ...دى اكبر خدعه بيضحك بيها الولد على البنت 

اللى ودانى فى داهيه انى صدقته و قلت بيحبنى بس الحب كان لعنه و خطيئه انا لوحدى اللى دفعت تمنها 😞

و جبت للدنيا طفل ملوش ذنب إلا أن أبوه ندل و امه عبيطه ...اوعوا تغلطوا غلطتى خليكى فى بيتك معززه مكرمه لحد ما يجى اللى يخبط على بابك غير كدا متفتحيش الباب لأى حد عاوز يضحك عليكى و يقولك  انا بحبك 😞

تمت 🌷🌷

اذا عجبتكم القصه ارجو الدعاء لوالدى رحمه الله عليه بالرحمه و المغفره و سائر موتى المسلمين

قصص رعب روايات جميلة روايات رومانسية روايات اون لاين روايات كاملة كتب وروايات

 ‏#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ...