اريد حقى الجزء الاول

#اريد_حقى

# الجزء_الاول

قصص رعب روايات جميلة روايات رومانسية روايات اون لاين روايات كاملة كتب وروايات

ازيكم 

احب اعرفكم بنفسي 

انا ندى زوجه و ام لطفلين توأم  ...عندى ٢٧ سنه.

عاوزه احكيلكم حكايتى اللى اغرب من الخيال و اللى كتير منكم ممكن ميصدقوهاش. 

كنت عايشه حياه عاديه خالص زى اى واحده ست متجوزه  

ايام عاديه ...ايام حلوه ..و ايام نكد 

معظم المشاكل اللى كانت بتحصل كانت بسبب جوازى فى بيت العيله 

جوزى طيب بس سلبى اوى فى أمور كتير

ياما اتعرضت لظلم كبير من والدته و اخواته و هو كان بيقف موقف المتفرج و بس ..

هحكيلكم جزء من المشاكل دى علشان تفهموا انا اقصد ايه 

طبعا السكن فى بيت العيله بيتطلب حاجات كتير  زى الصحيان بدرى ، خدمه كل اهل البيت حتى سلايفك المتجوزين ، خدمة البنات الموجوده فى البيت حتى تنضيف الاوض اللى بيقعدوا فيها 

و لو قلتى مثلا أن البنت تنضف اوضتها يطلعوا فيكى و يقولوا دول ضيوف و مسيرهم يمشوا من البيت 

كنت شايفه أن تبريراتهم دى تبريرات ظالمه و ملهاش اساس

و كنت لما اتكلم مع جوزى و أقوله انت شايف ظلمهم ليا بعينك  و مبتنطقش كان يرد عليا رد غريب اوى ..

دول اهلى و مش عاوز اعاديهم 

يعنى ايه مش عاوز تعاديهم ؟؟ ...و بعدين انا مطلبتش منك تتخانق معاهم انا بطلب منك تجيب لى حقى لما تلاقينى مظلومه

 

ندى ...انا مش عاوز مشاكل اهلى دول اللى ساعدونى علشان اتجوز و افتح البيت اللى انتى قاعده فيه دلوقتى ده 

يعنى ايه يعنى ؟؟

يعنى تسكتى و خلاص و تعملى اللى امى تقولك عليه 

حرام عليك انت اتجوزتنى عشان تمرمطنى و تشغلنى خدامه عند اهلك ؟؟

دا واجبك يا ندى ..اهلى دول جابولك راجل 

يا سلام منا كمان اهلى جابولك ست 

و انا متأخرتش عن اهلك لو طلبوا اى مساعده انا هقدمهالهم 

اهلى مش عاوزين منك حاجه غير انك تخلى بنتهم سعيده...انا مش واخده على كدا فى بيت اهلى و انت مفهمتنيش أن العيشه هتبقى مشتركه 

دا سلو بلدنا 

و انا مش من بلدكم و معرفش السلو ده يا فوزى 

هو ده اللى عندك و أن كان عاجبك 

لا مش عاجبنى 

بقولك ايه اللى بينى و بين اهلى دم و لحم لكن انتى حايلله ورقه اللى ربطانى بيكى 

ورقه ؟؟؟

ايوه ورقه و لو مش عاجبك الباب يفوت جمل و زى ما دخلنا بالمعروف نخرج بالمعروف 

بقى كدا يا فوزى ؟؟

انا بقولك الكلمتين دول يا بنت الناس و احنا فى الاول اهو و لسه ربنا مرزقناش بخلفه لو مش عاجبك الوضع انتى حره 

و سابنى و مشي و قفل الباب وراه ... نزل عند أهله تحت و بقيت سامعه ضحكهم

دى كانت من أوائل المشاكل اللى قابلتنى مع جوزى بعد حوالى شهرين من جوازى 

كلامه نزل على قلبى كأنه سكاكين بتقطع فيا ...و قررت انى مقعدش لحظه واحده فى البيت بعد الكلام ده 

لميت هدومى و دهبى و نزلت ركبت توكتوك للمحطه و من هناك اخدت عربيه لحد المدينه اللى ساكنين فيها اهلى 

رحت لاهلى و دمعتى على خدى ...ابويا طبطب عليا و قالى متزعليش يا حبيبتى كتف زاد و كتف ميه

جوزى بعد يومين اتصل على بابا و قاله يرضيك بنتك تسرق الدهب و تطفش ؟

ابويا زعق له و قاله ايه تسرق دى ؟؟ هو ده مش دهبها و الا ايه ؟؟ و بعدين من فضلك تعالى علشان نتكلم فى المشكله اللى حاصله دى 

زوجى قفل السكه و بعد شويه لقينا والده بيتصل أنه هيجى يشرب معانا الشاى 

و بالفعل جه حمايا و قعد يتكلم مع والدى أنهم بيعاملونى انى بنتهم و أن الخدمه فى البيت مبتنقصش من الواحده حاجه 

بابا رد عليه ...طب ما تقول الكلام ده لبناتك ياحج ..اللى ترضاه لبنات الناس ترضاه لبناتك برده ...و بنتى انا مجوزها عشان تخدم جوزها مش عشان تخدم عيله بحالها 

المهم بابا و حمايا شدوا مع بعض و الموضوع اتأزم جدا و حمايا حلف انى ما راجعه البيت مره تانيه و لا معتباه برجلى 

ابويا بعد ما حمايا مشي حلف أنه يطلقنى من جوزى

و دخلنا بعد كدا بقا فى أن والدى راح لمحامى و رفع قضيه طلاق و قايمه و ليله طويله كدا 

انا من جوايا مكنتش عاوزه افشل بعد شهرين جواز بس و اخد لقب مطلقه و انتوا طبعا عارفين الستات اللى شايلين اللقب ده بيتعرضوا لايه من المجتمع 

لكن ابويا كان معاند جدا رغم تدخل ناس كتير من اهلى و من اهل زوجى

لكن اللى حصل بعد كدا قلب موازين الحكايه ....

اللى حصل انى عرفت انى حامل ...لا و كمان حامل فى توأم 

جوزى لما عرف جالى و حاول يستسمح ابويا و يخليه يتنازل عن قضايا الطلاق 

ابويا قاله عاوز ترجع لمراتك هات لها شقه بره بيت العيله 

جوزى قاله انت عارف يا عمى أن امكانياتى متسمحش انى اشترى شقه دلوقتى و بعدين انا جالى عقد السعوديه و هسافر بعد شهر 

طبعا انا سمعت الكلمه و جالى ذهول ...امتى دورت على عقد ؟؟ و ازاى  حصل ده ؟؟ فكره السفر دى مكنتش مطروحه نهائى 

بابا رد عليه و قاله اذا كان كدا بقا فبنتى تفضل عندى لحد ما تسافر بالسلامه و ترجع تجيب لها شقه و الا بيت او حتى تاخدها معاك 

جوزى مشي و هو زعلان و اتصل عليا و بقينا كل يوم بنكلم بعض لحد ما سافر 

مرت سنه وكنت خلفت اولادى نور الدين و فخر الدين و كانوا تؤام متشابه مكنش حد يقدر يفرقهم عن بعض 

جوزى نزل بعد سنه و لقيته جايلى و بيقولى يلا عشان نروح بيتنا 

بابا قاله هتروح فين ؟؟

متخافش يا عمى انا اخدت لها بيت تانى أما شقتنا فاخويا هيتجوز فيها 

طب مش كنت اخدت رأينا فى البيت اللى اشتريته ده الاول ؟؟

يا عمى انت طلبت بيت و انا جبته و نقلت عفشي فيه و جاى دلوقتى اخد مراتى و اولادى 

بابا قاله خلاص بس هاجى معاك علشان اشوف بيت بنتى دا فين ؟

اتفضل يا عمى 

و رحنا البيت ...كنت فاكره انى هلاقى بقا شقه اجمل من شقتى لكن للاسف اصابتنى خيبة الأمل لما شفت البيت 

بيت قديم جدا على أطراف القريه و له جنينه شجرها ميت و ناشف ، فيها مرجيحه حديد مصديه اوى و فرشها متقطع  ...الدهان من بره واقع و شكله وحش اوى ...لكن الصراحه من جوه جوزى بيضها و نقل عفشنا فيها 

ابويا بص للبيت و قاله ملقتش بيت احسن من كدا شويه ؟؟

دى امكانياتى يا عمى و لما ربنا يفرجها ابقى اجيب الاحسن 

طبعا عرفت بعد كدا انه بعت الفلوس لابوه و امه و هما اللى اشتروله البيت ده 

و كنت متاكده أنهم عاوزين ينتقموا منى و خصوصا بعد اللى حصل معايا و مع اولادى بعد كدا فى البيت ده 😔

يتبع...

قصص رعب روايات جميلة روايات رومانسية روايات اون لاين روايات كاملة كتب وروايات