#اريد_حقى
# الجزء_السادس
قصص رعب روايات جميلة روايات رومانسية روايات اون لاين روايات كاملة
كتب وروايات
خلاص يا ندى بكرا هوصلك قبل ما اروح على المطار عند اهلك
طيب خلاص متزعلش نفسك انت بس
قلت لفوزى الكلمه دى و لسه بقوم عشان احضر الشنط سمعت صوت فرقعه انا و هو
جرينا على بره بسرعه
الحق يا فوزى العربيه بتولع 😳
فوزى جرى على حنفيه الميه و جاب خرطوم الجنينه و لسه هيطفى النار لاقاها طفت لوحدها
انا أما شفت المنظر ده دخلت لولادى جرى حطيتهم فى العربيه بتاعتهم و خرجت بيهم لبره
لقيت فوزى قاعد على الأرض و حاطط ايديه الاتنين فوق دماغه
ببص على العربيه لقيت الأربع كاوتشات سايحين و الكرسي من ناحيه السواق سايح و محروق أما باقى الكرسي سليم و الكنبه اللى ورا كمان سليمه
استغربت جدا و قعدت جنب فوزى و طبطبت على كتفه
متزعلش خدت الشر و راحت
انا مذهول ...هو فيه ايه ؟
معرفش يا فوزى امك اللى تعرف كل حاجه
امى ....اه امى
فوزى خرج التليفون من جيبه و ايده بتترعش و راح متصل على امه
الو يا حبيبي
الو يا ماما ...قوليلى يا ماما حكاية البيت دا ايه ؟؟
مفيش حكايه و لا حاجه يا حبيبي ..
عربيتى اتحرقت لوحدها يا ماما ...من فضلك قوليلى البيت ده ماله ؟؟
يا لهوى اتحرقت ازاى ؟؟ طب يمكن سبت فيها سيجاره مولعه و الا الموتور...
يا ماما متغيريش الموضوع و قوليلى سمعتى ايه عن البيت ده ؟؟
مفيش يا ابنى انت لما كلفتنى اشتريلك بيت او شقه لقيت الفلوس قليله اوى رحت للسمسار و قلت له انا عاوزه بيت فى حدود خمسين ألف
قالى مفيش الأسعار دى يا حاجه أقل حاجه متين الف و انتى طالعه
قلت خلاص و جيت امشي قالى استنى يا حاجه فى بيت ممكن تلاقيه بالتمن اللى بتقولى عليه ده
هو فين ده ؟؟
على أطراف البلد مش جواها
طب و ماله ايه يعنى فى الأطراف ابنى ناوى يشترى عربيه يعنى مش مهم أنه يكون بعيد ...بس اكيد صغير بقا صح ؟؟
بالعكس دا بيت واسع و كبير و له جنينه كمان
الله امال بالسعر ده ليه ؟؟
اصل اتقتل فيه واحده بعيالها من حوالى خمستاشر سنه كدا
يا لهوى ؟؟ و مين اللى قتلها دى ؟؟
و الله ما عارفين ...فى ناس بيقولوا جوزها و ناس تانيه بيقولوا حراميه و كانوا داخلين يسرقوها
يعنى ايه ممسكوش اللى عملها ؟
مش لما يلاقوا جثتها الاول هى و عيالها ؟؟
ليه ؟ هما ملقوش جثتها ؟؟
لا ملقوهاش
طب ما يمكن ممتتش اصلا و تكون طفشت مثلا بعيالها
لا ابوها لما استغيبها راح يدور عليها لقى الأرض كلها دم و فى أجزاء منها و من بناتها موجوده
يا ستار يا رب اجزاء ايه دى ؟؟
تقريبا كدا اللى قتلهم قطعهم و ساب صباع من كل واحده منهم من غير ما ياخد باله
يخربيته البعيد ...يعنى بيطلع عفريتها فى البيت ده و الا ايه الحكايه ؟؟
لا مفيش عفاريت و لا حاجه بس الناس بيخافوا منه عشان حصلت فيه جريمة القتل دى ...و عشان كدا وقف حاله
ااااه ...طب و مين اللى معاه مفتاح البيت دلوقتى ؟ ابوها ؟؟
لا ابوها مات بعدها بسنتين الله يرحمه و البيت دلوقتى راح لاختها ست كبيره و طيبه قوى و مكلمانى على البيت ده من كام شهر عشان مزنوقه و عاوزه تجوز ابنها
طب ممكن نشوفه امتى البيت ده ؟؟
ممكن دلوقتى لو حبيتى
لا دلوقتى متأخر و الدنيا ليل خلينا الصبح بقا
و فعلا رحت له انا و ابوك تانى يوم كان جاب المفتاح من الست و رحنا لقينا البيت حلو وواسع و نضيف اوى زى ما يكون الست مسحته لما عرفت أننا رايحين نشوفه و اتفقت معاه و رحنا سجلنا فى الشهر العقارى و دا اللى حصل يا ابنى
و ابويا يعرف الكلام ده ؟؟
لا انا نبهت على السمسار ميتكلمش قدامه عشان ميقفش لنا فى البيعه خاصه انه كان معترض انك تخرج من البيت اصلا
و ازاى يا امى تعملى كدا ؟؟ مخفتيش عليا أو على حد من عيالى ؟؟
يا ابنى الراجل قالى أن البيت مفيهوش اى حاجه و انا صدقته و خصوصا انك نقلت العفش فيه و محصلش حاجه
ماشي يا ماما ...خلاص
طب تعالوا باتوا عندنا انهارده ؟؟
هنبات عندكم ازاى يعنى ؟؟ بقولك العربيه اتحرقت هجيلكم ازاى ؟؟
طب اصحى ابوك يشوف توكتوك و يجى ياخدك
لا يا امى متصحيش حد انا كويس ..تصبحى على خير
و انت من أهله يا ابنى
فوزى قفل مع أمه و حسيت أن هم الدنيا بقا فوق دماغه
روق يا فوزى ...مالك بس ؟؟
مالى راح يا ندى ...العربيه اللى لسه بدفع اقساطها و البيت اللى اشتريته بشغل سنه بحالها راح
راح ليه بس ؟؟ احنا ممكن نبيعه و نحط تمنه مقدمه لشقه حلوه
و مين بقا اللى هيشترى بيت معفرت زى ده ؟؟ مفيش ناس هبل غيرنا يا ندى
نروح للسمسار و نقوله أنه غشنا
القانون لا يحمي المغفلين ...هيقولك و انا مالى ...و بعدين جاى تقول الكلام ده بعد شهرين من شراكم البيت ؟؟
طب خلاص متزعلش انت كدا كدا مسافر و انا هروح عند اهلى يعنى مش هنفضل فيه اصلا
اه و لما نرجع نلاقى عفشنا اتحرق يبقى الحال ازاى ؟؟
هو العفش ممكن يتحرق ؟؟؟
اه طبعا انتى مش شفتى العربيه حصلها ايه
طب و بعدين ؟؟؟
و لا قبلين ...انا مرهق جدا و عاوز ادخل انام
هننام جوه 😳؟؟؟
هنشغل القران يا ندى و ننام و ربنا يسترها أن شاء الله
دخلت انا و فوزى و شغلنا الراديو على اذاعه القران الكريم و شغلنا موبيلاتنا على سوره البقره حطينا واحد فى الصاله وواحد فى الاوضه اللى هننام فيها
فوزى نام على السرير و هو باصص للسقف و قعد مده كبيره على الوضع ده
بعدها غمض عنيه و كنت حاسه بيه عمال يتقلب و مش جايله نوم
و انا كمان قعدت فتره على ما رحت فى النوم
اول ما عينى غمضت شفتها ...نفس الوصف اللى وصفته تقى اختى ست شعرها طويل و هدومها بتجرجر على الأرض و عنيها عباره عن نينى اسود خالص ووشها متقطع و ماسك فى هدومها بنتين صغيرين شكل بعض بالظبط
الست قربت من السرير و لقيت رأسها بتلف زى ما يكون متركبه على رولمان بلى ..قلبى كان هيقف و بقيت متكتفه
و لقيت نفسي بترفع من السرير و انا بصرخ و محدش سامعنى
لحد ما كنت هخبط فى السقف وهى باصالى بعنيها المخيفه و مركزه عليا زى ما يكون النظره دى اللى رفعانى بالشكل ده
فضلت اصرخ و احاول احرك اديا و رجليا عشان انزل لتحت و ابص على ولادى خايفه عليهم
راحت هى باصه عليهم هى كمان و ابتسمت
انا خفت اوى على اولادى ...خفت تاخدهم أو تموتهم رحت صارخه
انتى عاوزه منى ايه ؟؟ سبينى فى حالى
راحت راده بصوت تخين اوى و قالت
اااااريد. .... حقى
يتبع...
قصص رعب روايات جميلة روايات رومانسية روايات اون لاين روايات كاملة كتب وروايات
تعليقات
إرسال تعليق